ပြည်တွင်းကုန်သွယ်မှုသတင်း

        မြန်မာလူမျိုးများ၏ ဘုရားစင်များတွင် ဘုရားပန်းတင်သည့်အခါ အောင်သပြေပန်းမှာ မပါမဖြစ် လှူဒါန်းသောပန်းဖြစ်ပါသည်။ ယခုဆိုလျှင် ပန်းဈေးကွက်တွင် မြန်မာသပြေဟုခေါ်သာ အောင်သပြေညွန့်ကို ငုတ်များတွေတူးရောင်းသော သပြေငုတ်၊ အညွန့်ကလေးများ ရဲရဲတောက်နေအောင်လှသော အာဆီယံသပြေစသည့် သပြေပန်းမျိုးစုံမှာလည်း ဈေးကွက်ထဲ၌ နေရာယူလျက်ရှိပေသည်။

       သပြေပင်ကို ရာသီမရွေးစိုက်ပျိုးနိုင်ပါသည်။ ရေကြိုက်သည့်အပင်အမျိုးအစားဖြစ်သည့်အတွက် သပြေပင်စိုက်မည်ဆိုလျှင် ရေရရှိသာအရပ်ဒေသ၊ ရေသွယ်ယူ၍လွယ်ကူသောနေရာများတွင် စိုက်ပျိုးရသည်။ သပြေပင်သည် နှစ်ရှည်ပင်အမျိုးအစားဖြစ်၍ သပြေပင်ကို စီးပွားဖြစ်စိုက်ပျိုးပါက တစ်နေ့လျှင် ရေ(၂)ကြိမ်လောင်းပြီး စိုက်ပျိုး၍ရကြောင်းသိရပါသည်။ သပြေပင်သည် အမြစ်ရှည်သည့်အပင်မျိုးဖြစ်ပြီး ရေကြိုက်သည့်အပင်ဖြစ်ပါသည်။ သပြေငုတ်များကို စိုက်ပျိုးပြီး (၃-၅)နှစ်အကြာ၌ ငုတ်တူးပြီး ဈေးကွက်သို့ပို့နိုင်ပါသည်။ အာဆီယံသပြေကိုမူ ပြုစုမှုကောင်းလျှင် ကောင်းသကဲ့သို့ (၈)လမှ တစ်နှစ်ခွဲကာလတွင် ဈေးကွက်အတွင်းသို့တင်ပို့နိုင်ပြီး နောက်ပိုင်းတွင်မူ (၁၅)ရက်တစ်ခါ ဖြတ်ရောင်းနိုင်ပါသည်။ မြန်မာနိုင်ငံ၌ သပြေပင်စိုက်ပျိုးခြင်းကို ရှမ်းပြည်နယ်တောင်ပိုင်း၊ ပဲခူးတိုင်း၊ မန္တလေးတိုင်းနှင့် ရန်ကုန်တိုင်း စသည့်နေရာများတွင် အများဆုံးစိုက်ပျိုးကြပါသည်။ ပဲခူးနယ်ဘက်မှထွက်သော သပြေများကို  နေပြည်တော်ဈေးကွက်သို့တင်ပို့ကြပြီး အာဆီယံသပြေမှာ မြို့ကြိုက်သပြေဖြစ်သည်။ တာရှည်ခံခြင်းကို ကြိုက်နှစ်သက်သောသူများက သပြေငုတ်ကို အဝယ်များကြပါသည်။ အာဆီယံသပြေမှာ လှပမှုရှိပြီး ရက်ရှည်အထားမခံဘဲ သုံးရက်မျှသာအထားခံပါသည်။

     ပဲခူးမြို့မဈေးကြီးနှင့် တာပေါ်ဈေးများတွင် သပြေများကို ဖြန့်ဖြူးရောင်းချပေးလျက်ရှိပါသည်။ ယခုအခါတွင် သပြေဈေးနှုန်းများမှာ အတက်အကျမရှိဘဲ တည်ငြိမ်လျက်ရှိပါသည်။ ၂၀၂၄ခုနှစ်၊ သြဂုတ်လ၊ တတိယအပတ်တွင် အခက်(၅)ခက်ပါသော သပြေတစ်စည်းလျှင် ၁၀၀၀ကျပ်၊ သပြေငုတ်တစ်ငုတ်လျှင် ၂၀၀၀ကျပ်၊ ၃၀၀၀ကျပ်၊ ၄၀၀၀ကျပ်အထိ ဈေးနှုန်းအမျိုးမျိုးဖြင့်ရောင်းချနေကြောင်း မြို့မဈေးကြီးရှိ သပြေညွန့်ရောင်းချသူတစ်ဦးထံမှသိရှိရပါသည်။

DOCA(ပဲခူး)

       ပဲခူးတိုင်း‌ဒေသကြီး၊ ပဲခူးမြို့နယ်တွင် ငါးရံ့ခြောက်ကို ဒေသထွက်ကုန်တစ်ခုအနေဖြင့် ထုတ်လုပ်ရောင်းချလျက်ရှိပါသည်။ ငါးရံ့ခြောက်ကို ခရီးသွားပြည်သူများအနေဖြင့် လက်ဆောင်ပေးခြင်းအတွက်သော်လည်းကောင်း ကိုယ်တိုင်စားသုံးရန်အတွက်သော်လည်းကောင်း ဝယ်ယူလျက်ရှိကြပါသည်။

      ၂၀၂၄ခုနှစ်၊ သြဂုတ်လ၊ တတိယအပတ်တွင် ငါးရံ့ခြောက်ပြုလုပ်ရာ၌ ငါးရံ့အစိုတစ်ပိဿာကို ၂၁၀၀၀ ကျပ်ဈေးမှ ၂၅၀၀၀ကျပ်ဈေးအထိ အကောင်အကြီး/အသေးပေါ် မူတည်၍ ဝယ်ယူရပြီး အဆိုပါငါးအစိုကို ခွဲခြမ်းပြီးနေလှန်းရာတွင် ငါးခြောက်အဖြစ် ၃၅ကျပ်သားသာထွက်ရှိပါသည်။ ငါးရံ့ခြောက်ထုတ်လုပ်သူများအနေဖြင့် ငါးရံ့အစိုတစ်ပိဿာကို အခြောက်ပြုလုပ်ရာ၌ ခန့်မှန်းကုန်ကျငွေ ၂၅၀၀၀ကျပ်ဖြစ်ပြီး ငါးရံခြောက်တစ်ပိဿာလျှင် ၇၅၀၀၀ကျပ်မှ ၈၀၀၀၀ကျပ်ဈေးဖြင့်ရောင်းချရသည့်အပေါ် စီးပွားဖြစ်လုပ်ကိုင်သူများအတွက် တွက်ခြေကိုက်ပြီး တစ်နိုင်တစ်ပိုင်ထုတ်လုပ်သူများအတွက် အမြတ်အစွန်းအနည်းငယ်သာကျန်ရှိမည်ဖြစ်သော်လည်း ပဲခူးမြို့အတွင်း ငါးရံ့ခြောက်လုပ်ငန်းမှာ တွင်တွင်ကျယ်ကျယ်လုပ်ကိုင်ဆောင်ရွက်လျက်ရှိကြောင်းသိရှိရပါသည်။

DOCA(ပဲခူး)

      ပဲခူးတိုင်း‌ဒေသကြီး၊ ပဲခူးခရိုင်၊ ကဝမြို့နယ်၊ လက်ရက်ကန်းလုပ်ငန်းမှာ ယခင်က ကျားတက်ကျေးရွာတစ်ခုတည်းရှိခဲ့ရာမှ ၂၀၂၁ခုနှစ်တွင် မိုးခိုင်ကြီးကျေးရွာနှင့် ဝေသာလီကျေးရွာများ၌ပါ တိုးချဲ့လုပ်ကိုင်လာကြသည့်အတွက် လက်ရက်ကန်းအလုပ်ရုံ (၅)ခုအထိတည်ထောင်လုပ်ကိုင်လာကြကြောင်းသိရသည်။

  လက်ရက်ကန်းတစ်စင်ကို ထိုးကွင်း (၅၀)ပါ ကျပ်ဆယ်နှစ်သိန်းခန့်ကုန်ကျပြီး လုပ်ငန်းတည်ခါစတွင် ရက်ကန်းစင်(၆)စင်သာ ထောင်ထားနိုင်ပြီး အလုပ်သမား(၅)ဦးခန့်ငှားရမ်းကာ ကိုယ်တိုင်လည်းရက်လုပ်ကြောင်း၊ ယခုအချိန်တွင် ရက်ကန်းရုံ (၁)ရုံလျှင် ရက်ကန်းစင် (၁၂)ခုဆံ့ ရက်ကန်းအလုပ်ရုံ (၅)ရုံအထိတိုးချဲ့နိုင်ခဲ့ပြီး ယခုထက် ပိုမိုတိုးချဲ့လုပ်ကိုင်ပါက ဒေသတွင်းရှိ လူငယ်/ လူရွယ်များအတွက် အလုပ်အကိုင်အခွင့်အလမ်းများရကြမည်ဖြစ်ကြောင်း၊  ချည်ကုန်ကြမ်းကို မန္တလေးမြို့မှမှာယူပြီး ချည်ချောလုံချည်များကိုရက်လုပ်ရောင်းချကြောင်း၊ ချည်အစိပ်/အကျဲပေါ် မူတည်၍ တစ်လလျှင် ခြောက်ထည်မှ တစ်ဆယ့်နှစ်ထည်အထိရရှိကာ ၂၀၂၄ခုနှစ်၊ သြဂုတ်လ၊ တတိယအပတ်တွင် တစ်ထည်လျှင် ကျပ်(၈၀၀၀)မှ ကျပ် (၁၂၀၀၀)အထိရောင်းချရကြောင်း၊ ဈေးနှုန်းသက်သာသဖြင့် ပြည်သူများသုံးစွဲပါက ပြည်တွင်းဖြစ်ကို အားပေးရာရောက်ကြောင်း၊  မန္တလေး၊ ရန်ကုန်မြို့နှင့် ပဲခူးမြို့များသို့ ရောင်းချရသည့်အပြင် ‌ဒေသအတွင်း၌လည်းရောင်းချရခြင်း၊ ထို့ပြင် Social Media  မှတစ်ဆင့် ရောင်းချနေသည့်အတွက် လုပ်ငန်းတိုးချဲ့လည်ပတ်နိုင်ကြောင်း၊ ရက်ကန်းလုပ်ငန်းကို စိတ်ဝင်စားသော လူငယ်၊ လူရွယ်များကိုလည်း အခမဲ့သင်ကြားပေးပြီး ရက်ကန်းစင်များတိုးချဲ့ သွားရန်လည်း အစီအစဉ်ရှိကြောင်း၊ ရက်ကန်းလုပ်ငန်းရှင်တစ်ဦးထံမှ ဆွေးနွေးသိရှိရပါသည်။

DOCA(ပဲခူး)

     ပဲခူးမြို့နယ်၊ ကတွင်းခြံကျေးရွာတွင် W အမှတ်တံဆိပ် ပဲပြားကို  ပဲခူးမြို့ပေါ်ရှိ ဒေသထုက်ကုန်တစ်ခုအနေဖြင့် ဈေးကြီးများနှင့် ကတွင်းခြံကျေးရွာအနီး၌ အရောင်းအဝယ်ဖြစ်နေ ကြောင်းသိရသည်။ အဆိုပါအမှတ်တံဆိပ် ပဲပြားများကို  ပဲပုတ်မှ ရေစိမ်ကြိတ်ပြီး ပဲအနှစ်များကိုကျို၍ ပုံစံခွက်များဖြင့်ထည့်ပြီး ဖိစဉ်များဖြင့် ၂၅မိနစ်/ ၃၀မိနစ်ခန့်ဖိပြီးမှရရှိသော W အမှတ်တံဆိပ် ပဲပြားများဖြစ်လာကြောင်း၊ ၂၀၂၄ခုနှစ်၊ သြဂုတ်လ၊ တတိယအပတ်တွင် ပဲပုတ်ပဲတစ်တင်းခွဲတစ်အိတ်လျှင် ကျပ်၁၆၀၀၀၀နှုန်းဖြင့် နေ့စဉ် ၁၅အိတ်ပြုလုပ်ကြောင်းသိရှိရပြီး တစ်အိတ်လျှင် ပဲပြားတုံး ၈၄၀တုံးထွက်ရှိ၍ ဈေးအရောက် လက်ကားဈေးမှာ တစ်တုံးလျှင် ၃၀၀ကျပ်ဖြင့်အရောင်းအဝယ်ဖြစ်နေကာ အရင်းဈေးမှာ (၁၆၀၀၀၀) ကျပ်ဖြစ်၍ အကျိုးအမြတ်မှာ ကျပ်(၉၀၀၀၀)ကျော်ဖြစ်ကြောင်းသိရှိရသည်။ ပဲပြားကို ပဲပင်ပေါက်နှင့်တွဲဖက်၍ အများဆုံးရောင်းရပြီး  ပဲပြားမှာ ပဲခူးမြို့တွင် အရောင်းအဝယ်လိုက်နေကြောင်း၊ ကျန်းမာရေးဦးစီးဌာန၊ အစားအသောက်နှင့် ဆေးဝါးကွပ်ကဲရေးဦးစီးဌာနတို့၏ လမ်းညွှန်ကွပ်ကဲမှုဖြင့် ကျန်းမာရေးနှင့်အညီ စားသုံးသူများ စားသုံးနိုင်ရေး ဆောင်ရွက်လျက်ရှိကြောင်းသိရှိရပါသည်။

DOCA(ပဲခူး)

     ယခုအချိန်ရာသီကာလသည် ကျွဲကောသီးများလှိုင်လှိုင်ပေါ်ချိန်ဖြစ်ရာ ပဲခူးဈေးကွက်အတွင်းသို့ ကျွဲကောသီးများ စတင်ဝင်ရောက်လျက်ရှိနေပြီဖြစ်ကြောင်းသိရသည်။ အဆိုပါ ကျွဲကောသီးများအား မွန်ပြည်နယ်အတွင်းရှိ ကျိုက်ထို၊ ဘီးလင်း၊ သထုံ၊ မော်လမြိုင်မြို့များမှ အဓိကဝင်ပြီး အခြားနယ်များမှလည်း ဝင်ရောက်လျက်ရှိကြောင်းသိရသည်။

        ကျွဲကောသီးပင်ခြံများမှ တိုက်ရိုက်ဝယ်ယူသည့် ပဲခူးမြို့မဈေးကြီးမှ ကုန်သည်ကြီးများအနေဖြင့် ၂၀၂၄ခုနှစ်၊ သြဂုတ်လ၊ တတိယအပတ်တွင် လက်ကားဈေးနှုန်းအနေဖြင့် အလုံးကြီးတစ်လုံးလျှင် (၂၅၀၀)ကျပ်၊ အလုံးသေးတစ်လုံးလျှင် (၂၀၀၀)ကျပ်နှုန်းဖြင့်ဝယ်ယူကြပြီး လက်လီဈေးကွက်တွင်  ကျွဲကောသီးသည် လူကြိုက်များသည့်သီးနှံဖြစ်သောကြောင့် အလုံးကြီးတစ်လုံးလျှင် (၂၅၀၀-၃၅၀၀)ကျပ်နှုန်းဖြင့်လည်းကောင်း၊ အလုံးသေးတစ်လုံးလျှင် (၁၂၀၀- ၁၅၀၀)ကျပ်နှုန်းတို့ဖြင့်ရောင်းချလျက်ရှိကြောင်း၊ တစ်နေ့လျှင် အရေအတွက်အားဖြင့် အလုံး(၅၀)မှ (၈၀)ကျော်အထိရောင်းချလျက်ရှိကြောင်း၊ ကျန်းမာရေးနှင့်ညီညွတ်သည့် အသီးအနှံဖြစ်သောကြောင့် စားသုံးသင့်သည့် အသီးအနှံဖြစ်ကြောင်း ကျွဲကောသီးရောင်းချသူ ကုန်သည်တစ်ဦးထံမှ သိရှိရပါသည်။

DOCA(ပဲခူး)