ပြည်တွင်းကုန်သွယ်မှုသတင်း

      တောင်ငူမြို့၊ ညောင်ပင်ဈေးအတွင်းရှိ ကြက်ဥ၊ ဘဲဥအရောင်းဆိုင်တွင် ဇူလိုင်လ၊ နောက်ဆုံးအပတ်တွင် ကြက်ဥတစ်လုံးလျှင် အကြီးအသေးအလိုက် အသေးတစ်လုံးလျှင် ၃၅၀ကျပ်နှင့် အကြီးတစ်လုံးလျှင် ၃၇၀ကျပ်ဈေးနှုန်းရှိခဲ့သော်လည်း ၂၀၂၄ခုနှစ်၊ ဩဂုတ်လ၊ တတိယအပတ်တွင် ယခင်ကြက်ဥတစ်လုံး ၃၅၀ကျပ်မှာ ၃၈၀ကျပ်နှင့်  ၃၇၀ကျပ်တန် ကြက်ဥမှာ တစ်လုံးလျှင် ၄၂၀ကျပ်ဖြင့် ဈေးနှုန်းမြင့်တက်သွားပါသည်။

        ဘဲဥမှာ အသေးတစ်လုံးလျှင် ၄၇၀ကျပ်နှင့် အကြီးတစ်လုံးလျှင် ၅၀၀ကျပ်အထိ ဈေးနှုန်းမြင့်တက်သွားပါသည်။ ယခုကဲ့သို့ ဘဲဥများဈေးတက်သွားရခြင်းမှာ ရေကြီးခြင်းကြောင့် လမ်းပန်းဆက်သွယ်ရေးခေတ္တပြတ်တောက်သွားသဖြင့် အခြားမြို့နယ်မှတင်သွင်းသောဘဲဥများ ဈေးကွက်အတွင်းသို့မရောက်သောကြောင့် ဈေးနှုန်းမြင့်တက်သွားခြင်းဖြစ်ကြောင်း ညောင်ပင်ဈေးရှိ ကြက်ဥ၊ ဘဲဥအရောင်းဆိုင်ပိုင်ရှင်တစ်ဦး၏ ပြောကြားချက်အရသိရှိရပါသည်။

          ကြက်ဥ၊ ဘဲဥမှာ အခြေခံလူတန်းစားများနှင့် အလုပ်များသောရုံးဝန်ထမ်းများ အလွယ်တကူချက်ပြုတ်စားသောက်နိုင်သော စားသောက်ကုန်ဖြစ်သဖြင့် အရောင်းအဝယ်မှာ သွက်လျက် ရှိကြောင်း တောင်ငူမြို့ ညောင်ပင်ဈေးရှိ ကြက်ဥ၊ဘဲဥအရောင်းဆိုင်မှ အရောင်းဝန်ထမ်းတစ်ဦး၏ ပြောကြားချက်အရသိရှိရပါသည်။

DOCA(ပဲခူး)

      တောင်ငူမြို့နယ်၊ စစ်တောင်းမြစ်အရှေ့ဘက်ကမ်းရှိ ပေါင်းလောင်းတိမ်ရွာသည် ဟင်းသီးဟင်းရွက်များကိုစိုက်ပျိုးလျက်ရှိရာ ကန်စွန်းရွက်စိုက်ခင်းမှ ဝင်ငွေရရှိလျက်ရှိပါသည်။ ကန်စွန်းရွက် (၀.၁၀)ဧကတွင် ရက်(၂၀)လျှင် တစ်ကြိမ်ခူးဆွတ်နိုင်ကြောင်း၊ တစ်ကြိမ်ခူးလျှင် အစည်း ၂၀၀ခန့်ရကြောင်းသိရပါသည်။

        ယခုအချိန်သည် မိုးရာသီဖြစ်သဖြင့် စိုက်ပျိုးသည့်ကန်စွန်းရွက်များအပြင် အလေ့ကျပေါက်သည့် လယ်ကန်စွန်းရွက်များလည်းပေါသဖြင့် ဈေးလည်းပေါပါသည်။ ပေါင်းလောင်းတိမ်ရွာ ကန်စွန်းစိုက်ခင်းမှ ကန်စွန်းရွက်များကို ၂၀၂၄ခုနှစ်၊ ဩဂုတ်လ၊ တတိယအပတ်တွင် တောင်ငူမြို့ ညောင်ပင်ဈေးတွင် တစ်စည်းလျှင် ၂၀၀ကျပ်ဖြင့်ရောင်းချရကြောင်း ကန်စွန်းရွက်စိုက်ပျိုးသူ တစ်ဦးထံမှသိရပါသည်။

DOCA(ပဲခူး)

        တောင်ငူမြို့ ညောင်ပင်ဈေးရှိ ဘုရားပန်းဆိုင်များတွင် ပန်းထိမ်ငိုပန်းများ ရောင်းအားကောင်းလျက်ရှိပါသည်။ ပန်းထိမ်ငိုပန်းများသည် အခြားပန်းများထက်စာလျှင် ရက်တာရှည်ခံသဖြင့် လူကြိုက်များခြင်းဖြစ်ပါသည်။

       ညောင်ပင်ဈေးရှိ ပန်းဆိုင်များမှရောင်းချသော ပန်းထိမ်ငိုပန်းများမှာ တောင်ငူဒေသ ရှမ်းဝတီးရွာမှထွက်ရှိသည့် ပန်းထိမ်ငိုပန်းများနှင့် မန္တလေးတိုင်းဒေသကြီး၊ ပြင်ဦးလွင်ဒေသမှ လာရောက်ရောင်းချသည့် ပန်းထိမ်ငိုပန်းများဟူ၍ နှစ်မျိုးရှိပြီး ပြင်ဦးလွင်ပန်းထိမ်ငိုပန်းများမှ ဒေသပန်းထိမ်ငိုပန်းများထက် အပွင့်ကြီးသည့်အပြင် ဈေးနှုန်းလည်းကြီးပါသည်။

       ၂၀၂၄ခုနှစ်၊ ဩဂုတ်လ၊ တတိယအပတ်တွင် ဒေသထွက် ပန်းထိမ်ငိုပန်း(အဖြူ) ၁၀ပွင့်ပါတစ်စည်းလျှင် ၁၅၀၀ကျပ်ရှိပြီး ပြင်ဦးလွင်ဒေသမှဝင်ရောက်လာသည့် ပန်းထိမ်ငိုပန်းများမှာ ၁၀ပွင့်ပါတစ်စည်းလျှင် ၃၀၀၀ကျပ်ရှိကြောင်း ညောင်ပင်ဈေးရှိ ဘုရားပန်းရောင်းချသူများထံမှသိရပါသည်။

DOCA(ပဲခူး)

       ဘူးသီးသည် မြန်မာ့ခြံထွက် သစ်သီးဝလံတစ်မျိုးဖြစ်ပါသည်။ တောင်ငူမြို့အနီးရှိကျေးရွာများတွင် ဘူးပင်များကို တစ်နိုင်တစ်ပိုင်စိုက်ပျိုးကြသူများ အပိုဝင်ငွေရရှိကြပါသည်။ ယခုအခါတွင် ဘူးသီးများလှိုင်လှိုင်ပေါ်နေပြီဖြစ်ရာ တောင်ငူမြို့ပေါ်ရှိ ဈေးများတွင် ရောင်းချလျက်ရှိနေပါသည်။

      ဘူးသီးကို အသားဟင်းနှင့်ရော၍ ချက်စားကြပါသည်။ မြန်မာ့ရိုးရာ ဘူးသီးကြော်သည်လည်း လူအများကြိုက်သည့် အကြော်တစ်မျိုးဖြစ်ပါသည်။ တောင်ငူမြို့၊ ရပ်ကွက်တိုင်းလိုလိုပင် အကြော်ဆိုင်များရှိရာ ဘူးသီးသည် ရောင်းအားကောင်းလျက်ရှိပါသည်။

    ဘူးသီးအပြင် ဘူးညွန့်ကိုလည်း ကြော်၍ဖြစ်စေ၊ အရည်သောက်ဟင်းချက်၍ဖြစ်စေ စားသုံးကြပါသည်။ ၂၀၂၄ခုနှစ်၊ ဩဂုတ်လ၊ တတိယအပတ်တွင် တောင်ငူမြို့ ညောင်ပင်ဈေးတွင် ဘူးသီးတစ်လုံးလျှင် ၁၅၀၀ကျပ်နှင့် ဘူးညွန့်တစ်စည်းလျှင် ၃၀၀ကျပ်၊ လေးစည်းယူလျှင် ၁၀၀၀ကျပ်ဖြင့်ရောင်းချလျက်ရှိ ကြောင်း ဟင်းသီးဟင်းရွက်ဆိုင်များမှသိရပါသည်။

DOCA(ပဲခူး)

      ဖရဲသီးသည် အာဖရိကတိုက် (၁၆)ရာစု အရှေ့တောင်အာရှနိုင်ငံများမှစ၍ ကမ္ဘာအနှံ့ဒေသများသို့ ပျံ့နှံ့ရောက်ရှိသည်။ မြန်မာနိုင်ငံတွင်လည်း ဖရဲသီးများကို ဒေသအနှံ့အပြား၌ စိုက်ပျိုးကြသည်။ မြန်မာနိုင်ငံတွင် ဖရဲသီးစိုက်ပျိုးသောဒေသများမှာ ပဲခူးတိုင်းဒေသကြီး၊ မန္တလေးတိုင်းဒေသကြီး၊ ရန်ကုန်တိုင်းဒေသကြီး၊ စစ်ကိုင်းတိုင်းဒေသကြီး စသည့်ဒေသများတွင် စိုက်ပျိုးကြသည်။ ဖရဲသီးသည် ကျန်းမာရေးအတွက် အလွန်ကောင်းမွန်သော ရာသီစာအသီးတစ်မျိုးဖြစ်ပါသည်။ ဖရဲသီးမှာ ယခင်‌က နွေအခါမှသာပေါ်သော ရာသီစာဖြစ်သော်လည်း ယခုအခါတွင် ရာသီအားလုံး၌ စိုက်ပျိုးကြပါသည်။

     ဖရဲသီးတွင် ကာဗွန်ဟိုက်ဒရိတ်၊ ဗီတာမင်အေနှင့် စီပါဝင်သော ရာသီစာအသီးဖြစ်ပါသည်။ ဖရဲသီးတွင် ရေဓာတ်ပေါကြွယ်ဝစွာပါဝင်သောကြောင့် ရေအစားထိုးအနေဖြင့် စားသုံးနိုင်ပြီး  အပူကင်းအောင် စားပေးသင့်သော အသီးတစ်မျိုးလည်းဖြစ်ပါသည်။ ဖရဲသီးတွင် အသားဓာတ်၊ အမျှင်ဓာတ်၊ ကာဗွန်ဟိုက်ဒရိတ်၊ ဆိုဒီယမ်နှင့်ပိုတက်ဆီယမ်တို့ပါဝင်ပြီး ဖရဲသီးကိုစားသုံးပေးခြင်းကြောင့် ကောင်းကျိုးများလည်းရရှိစေပါသည်။ ဖရဲသီးကိုစားသုံးပေးခြင်းဖြင့် မှတ်ဉာဏ်ကောင်းခြင်း၊ ဝမ်းချုပ်ခြင်း၊ ခေါင်းကိုက်ခြင်းနှင့် ကျောက်ကပ်ရောဂါတို့ကိုလည်းကာကွယ်နိုင်ပါသည်။ ပန်းနာရင်ကြပ်၊ လေးဘက်နာ၊ အဆစ်အမြစ်ရောင်ရောဂါနှင့် အရိုးဆိုင်ရာရောဂါများလည်း ဖြစ်နိုင်ချေလျော့နည်းစေပါသည်။ အိုမင်းရင့်ရော်ခြင်းကိုလည်းလျော့နည်းစေပြီး အရွယ်တင်နုပျိုစေပါသည်။ ဖရဲသီးကို စားသုံးခြင်းဖြင့် မိမိခန္ဓာကိုယ်အတွက် ကောင်းကျိုးများစွာကိုရရှိစေပါသည်။ ဖရဲသီးများကိုဝယ်ယူရာတွင် အလုံးအကြီး၊ အလတ်၊ အသေးခွဲ၍ ဝယ်ယူရခြင်းများရှိသည်။ ပဲခူးတိုင်းဒေသကြီး (အနောက်ပိုင်း) မင်းလှမြို့နယ်၊ မြို့မစျေး၌ ၂၀၂၄ခုနှစ်၊ ဩဂုတ်လ၊ တတိယအပတ်တွင် ဖရဲသီးအကြီးတစ်လုံးလျှင် (၄၀၀၀)ကျပ်၊ အလုံးလတ်တစ်လုံးလျှင် (၃၀၀၀)ကျပ်၊ ဖရဲသီးအလုံးသေးတစ်လုံးလျှင် (၂၅၀၀)ကျပ်ဖြင့်ရောင်းချနေကြောင်း ဖရဲသီးရောင်းချသူများထံမှသိရှိရပါသည်။

DOCA(ပဲခူး)