ပြည်တွင်းကုန်သွယ်မှုသတင်း

      ပုသိမ်မြို့ရှိ ကြောင်လျှာသီးကို မိုးရာသီမှသီးသော အသီးတမျိုးဖြစ်ပြီး ဟင်းသီးဟင်းရွက်များထဲတွင် တမျိုးအပါအဝင်ဖြစ်ပါသည်။ ကြောင်လျှာသီးကို  အစိမ်းသီးနှင့် အညိုသီးဟူ၍ (၂)မျိုးခွဲခြားထားပါသည်။ အရသာမှာ ခါးသက်သက်နှင့် ပူရှိန်းရှိန်းအရသာရှိပါသည်။ ကြောင်လျှာသီးအစိမ်းကို ပါးပါးလှီးပြီး သုပ်စား၍သော်လည်းကောင်း၊ အချဉ်စိမ်၍ ချဉ်ဖက်အဖြစ်သော်လည်းကောင်း၊ မီးဖုတ်၍ သော်လည်းကောင်း၊ ကြော်ချက်၍သော်လည်းကောင်း စားသုံးကြပါသည်။ ကြောင်လျှာသီးသည် ဘက်တီးရီးယားများကို တိုက်ဖျက်ပေးခြင်း၊ ဓာတ်တိုးဆန့်ကျင်သော အာနိသင်ရှိခြင်း၊ ရောင်ရမ်းမှုကိုသက်သာစေခြင်း၊ အသည်းကိုကျန်းမာစေခြင်း၊ ကျောက်ကပ်ကို ကျန်းမာစေခြင်း၊ ဆီးချိုကိုသက်သာစေခြင်း၊ ကိုယ်ခံအားကောင်းစေခြင်း၊ အစာခြေစနစ်ကိုကောင်းမွန်စေခြင်း၊ ကင်ဆာရောဂါကို ကာကွယ်ပေးခြင်းစသည့် ကျန်းမာရေးကိုများစွာအထောက်အကူပြုသည့် သီးနှံတစ်မျိုးဖြစ်ပါသည်။

    ပုသိမ်မြို့ဈေးကွက်အတွင်းမှာတော့ ကြောင်လျှာသီး တစ်တောင့်လျှင် (၈၀၀-၉၀၀)ကျပ်ဖြင့် ရောင်းဝယ်နေကြကြောင်း သိရပါသည်။

DOCA(ဧရာဝတီ)

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ကုန်ကြီးကျေးရွာအုပ်စု၊ ဂျင်ရဲမြောင် (စံပြ)ကျေးရွာသည် စိုက်ပျိုးရေးကိုအဓိကလုပ်ကိုင်ပြီး ကြက်သွန်နီ၊ ဝါ၊ ပဲတီစိမ်း၊ နေကြာ၊ နှမ်းတို့ကို ရာသီအလိုက်စိုက်ပျိုးကြကြောင်း၊ မိုးနှမ်းစိုက်တောင်သူ(၅၀)ဦးခန့်ရှိပြီး စိုက်ဧက (၁၀၀)ဧကကျော်ရှိကြောင်းသိရှိရပါသည်။

   နှမ်းနီမျိုးကိုအများဆုံးစိုက်ပျိုးကြပြီး နှမ်းနီ၊ နှမ်းနက်မျိုးကို ယခင်နှစ်မျိုးလက်ကျန်ဖြင့်စိုက်ပျိုးပြီး နှမ်းဖြူမျိုးကို အထက်မင်းလှမြို့၊ စိုက်ပျိုးရေးဦးစီးဌာနမှ မျိုး(၁)ပြည်လျှင် ကျပ်(၁၁၀၀၀)ဖြင့်ဝယ်ယူ၍ စိုက်ပျိုးခြင်းဖြစ်ကြောင်း၊ ကုန်ကျစရိတ်အနေဖြင့် (၁)ဧကလျှင် ကျပ်(၃၅၀၀၀၀-၄၀၀၀၀၀) ရှိကြောင်း၊ ၂၀၂၄ခုနှစ်၊ ဩဂုတ်လ(ပထမပတ်)တွင် စတင်ရိတ်သိမ်းကာ မိုးနည်းသောကြောင့်  (၁)ဧကလျှင် (၆)တင်းသာထွက်ရှိကြောင်း၊ မိုးနှမ်းမှာ ရာသီဥတုပေါ်မူတည်၍ စိုက်ပျိုးရပြီး မိုးများသည့်အခါတွင် နှမ်းပင်များပျက်စီး၍ အထွက်နှုန်းလျော့နိုင်ပြီး မိုးနည်းသည့်အခါတွင်လည်း မျိုးအောင်မှုနည်း၍ အထွက်နှုန်းလျော့နိုင်ကြောင်း၊ ဩဂုတ်လ(ဒုတိယပတ်)တွင် ဈေးနှုန်းအနေဖြင့် နှမ်း(၁)တင်းလျှင် နှမ်းနက်(စမုံ) ကျပ်(၁၆၀၀၀၀)၊ နှမ်းနီ ကျပ်(၁၃၀၀၀၀)၊ နှမ်းဖြူ ကျပ်(၁၄၀၀၀၀) ဈေးရရှိသည့်အတွက် နှမ်းစိုက်တောင်သူများအနေဖြင့် (၁)ဧကလျှင် အကျိုးအမြတ်အနေဖြင့် နှမ်းနက်(စမုန်) ကျပ် (၆၁၀၀၀၀)၊ နှမ်းနီ ကျပ်(၄၃၀၀၀၀)၊ နှမ်းဖြူ ကျပ်(၄၄၀၀၀၀)ထိရရှိကြောင်း၊ ဈေးကွက်အနေဖြင့် မင်းလှမြို့ပေါ်ရှိပွဲရုံများသို့ တင်ပို့ရောင်းချကြကြောင်း ဂျင်ရဲမြောင်(စံပြ)ကျေးရွာနေ နှမ်းစိုက်တောင်သူ ဦးတင်ဇော်ဌေးထံမှသိရှိရပါသည်။

DOCA(မကွေး)

        မကွေးတိုင်းဒေသကြီး၊ မကွေးခရိုင်၊ မကွေးဈေးကွက်သို့ မြို့နယ်အတွင်းရှိ မိကျောင်းရဲ၊ လျောင်းတော်ဦး၊ ကံသစ်၊ ရွာဟောင်းကန်၊ သစ်ရာကောက် စသည့်ကျေးရွာများနှင့် စလင်း၊ ဆင်ဖြူကျွန်း၊ မင်းဘူး၊ မြို့သစ်၊ နတ်မောက်မြို့တို့မှထွက်ရှိသော ပဲတီစိမ်း၊ ပဲနှောက်၊ ကုလားပဲ၊ ပဲကြီး၊ စားတော်ပဲ၊ မတ်ပဲနှင့် အခြားပဲမျိုးစုံများ ဝင်ရောက်ရောင်းဝယ်ဖောက်ကားလျက်ရှိပါသည်။

        ၂၀၂၄ခုနှစ်၊ ဩဂုတ်လ(ပထမပတ်)တွင် ကုလားပဲ(929)(၁)တင်းလျှင် ကျပ်(၈၃၀၀၀)၊ ကုလားပဲဟော်လန်(၁)တင်းလျှင် ကျပ်(၈၂၀၀၀)၊ ပဲကြီးဖြူ(၁)တင်းလျှင် ကျပ်(၇၅၀၀၀)၊ မတ်ပဲ(၁) တင်းလျှင် ကျပ်(၁၀၇၀၀၀)၊ ပဲစင်းငုံနီ(၁)တင်းလျှင် ကျပ်(၁၄၀၀၀၀)တို့ဖြင့်အရောင်းအဝယ်ဖြစ်လျက်ရှိပြီး ကျန်ပဲဈေးနှုန်းများမှာ တည်ငြိမ်လျက်ရှိကြောင်း၊ ဇူလိုင်လ(စတုတ္ထပတ်)နှင့် နှိုင်းယှဉ်ပါက ယခုအပတ်တွင်  ကုလားပဲ(929) ကျပ်(၂၅၀၀)၊ ကုလားပဲဟော်လန် ကျပ်(၂၀၀၀)၊ မတ်ပဲ ကျပ်(၂၀၀၀)၊  ပဲကြီးဖြူ ကျပ်(၅၀၀၀)၊ ပဲစင်းငုံနီ ကျပ်(၇၀၀၀) ဈေးနှုန်းမြင့်တက်ခဲ့ကြောင်း၊ တင်ပို့မှုအနေဖြင့် မန္တလေးမြို့သို့ ပဲတီစိမ်း အိတ်(၁၄၀၀)၊ ရန်ကုန်မြို့သို့ ပဲတီစိမ်း အိတ်(၅၃၅)၊ ကုလားပဲ အိတ်(၁၅၀၀)၊ မတ်ပဲ အိတ်(၃၅၀)၊ ပဲခူးမြို့သို့ ကုလားပဲ အိတ်(၈၀၀) စုစုပေါင်းအိတ်ရေ(၄၅၈၅) တင်ပို့ခဲ့ပြီး တန်ချိန် (၅၁၀) အရောင်းအဝယ်ဖြစ်ခဲ့ကြောင်းသိရှိရပါသည်။

DOCA(မကွေး)

       မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ပန်းတော်ပြင်ကျေးရွာအုပ်စုရှိ ဥယျာဥ်ကျေးရွာသည် နှမ်း၊ ကြက်သွန်နီ၊ ဝါ၊ ကုလားပဲ၊ ပဲကြီး၊ စပါး၊ နေကြာနှင့် အခြားစာဖိုးဆောင်သုံးသီးနှံများကို ရာသီအလိုက်စိုက်ပျိုးကြောင်းသိရပါသည်။

     ဥယျာဉ်ကျေးရွာတွင် ယခင်နှစ်တွင် ဧရာပဒေသာကို စိုက်ဧက(၇)ဧကစိုက်ပျိုးခဲ့သော်လည်း ယခုနှစ်တွင် တောင်သူ(၇)ဦးသည် (၁၅)ဧကခန့်စိုက်ပျိုးထားကြောင်းသိရသည်။ ၎င်းအနေဖြင့် (၂)ဧကကို ၂၀၂၄ခုနှစ်၊ ဩဂုတ်လ(ပထမပတ်)မှစတင်၍ စိုက်ပျိုးထားကြောင်း၊ စပါးမျိုးကို မြို့နယ်စိုက်ပျိုးရေးဦးစီးဌာနမှ (၁)တင်းလျှင် ကျပ်(၆၅၀၀၀)ဖြင့်ဝယ်ယူကာ ပျိုးပင်စိုက်စနစ်ဖြင့် စိုက်ပျိုးထားပြီး ရက်ပေါင်း(၁၆၀)အကြာတွင် ရိတ်သိမ်းရကြောင်း၊ ကုန်ကျစရိတ်အနေဖြင့် ယခင်နှစ်နည်းတူ ယခုနှစ်တွင်လည်း (၁)ဧကလျှင် မျိုးဖိုးနှင့်စိုက်ပျိုးစရိတ်အပါအဝင် ကျပ်(၃၀၀၀၀၀)ခန့်ကုန်ကျကြောင်း၊ အထွက်နှုန်းအနေဖြင့် ယခင်နှစ်တွင် (၁)ဧကလျှင် တင်း(၁၀၀)နီးပါးထွက်ရှိပြီး စပါး(၁)တင်းလျှင် ကျပ် (၃၀၀၀၀)ရရှိခဲ့ကြောင်း၊ ယခုနှစ်တွင် ရောင်းချရန်အတွက်သာမက စားသုံးရန်အတွက်ပါ ဧရာပဒေသာမိုးစပါးကို  ပို၍စိုက်ပျိုးလာကြောင်း ဥယျာဉ်ကျေးရွာနေတောင်သူ ဦးဇော်အောင်ထံမှသိရှိရပါသည်။

DOCA(မကွေး)   

      မကွေးတိုင်းဒေသကြီးသည် မြန်မာနိုင်ငံ၏ ပြည်ပပို့ကုန်များဖြစ်သော ဆီထွက်သီးနှံများဖြစ်သည့် နှမ်း၊ မြေပဲနှင့် ပဲမျိုးစုံ စသည့်သီးနှံများ စိုက်ပျိုးထွက်ရှိသော ဒေသတစ်ခုဖြစ်ပြီး တိုင်းဒေသကြီးအတွင်းမြို့များရှိ ကုန်စည်ဒိုင်နှင့်ပွဲရုံများတွင် နေ့စဉ် အရောင်းအဝယ်ဖြစ်လျက်ရှိကြောင်းသိရသည်။

        နှမ်းသီးနှံမှာ ၂၀၂၄ခုနှစ်၊ ဩဂုတ်လ(ပထမပတ်)တွင် နှမ်း(နှမ်းဖြူ၊ နှမ်းနီ၊ နှမ်းနက်(စမုန်)၊ နှမ်းညိုကြား စုစုပေါင်းတန်ချိန်(၄၈၀)ခန့်အရောင်းအဝယ်ဖြစ်လျက်ရှိပြီး ဈေးနှုန်းအနေဖြင့် နှမ်းဖြူတစ်ပိဿာလျှင် ကျပ်(၉၂၀၀-၁၀၅၀၀)၊ နှမ်းနီတစ်ပိဿာလျှင် ကျပ်(၈၈၅၀-၉၀၀၀)၊ နှမ်းနက်(စမုန်) တစ်ပိဿာလျှင် ကျပ်(၁၂၅၀၀-၁၃၅၀၀)နှင့် နှမ်းညိုကြားတစ်ပိဿာလျှင် ကျပ်(၈၂၀၀-၈၅၀၀)တို့ဖြင့်အရောင်းအဝယ်ဖြစ်ကြောင်း၊ ကုန်စည်စီးဆင်းမှုအနေဖြင့် ရန်ကုန်နှင့်မန္တလေးသို့တင်ပို့ရောင်းချကြပြီး ပြည်ပဈေးကွက်အနေဖြင့် ဂျပန်နိုင်ငံနှင့်ကိုရီးယားနိုင်ငံသို့ တင်ပို့ရောင်းချလျက်ရှိကြောင်းသိရသည်။

     ပဲမျိုးစုံအနေဖြင့် ဩဂုတ်လ(ပထမပတ်)တွင် (မြေပဲ၊ ပဲတီစိမ်း၊ ကုလားပဲ၊ ပဲစင်းငုံနီ၊ မတ်ပဲ၊ စားတော်ပဲ၊ ထောပတ်ပဲ) စုစုပေါင်းတန်ချိန် (၇၃၀)ခန့် အရောင်းအဝယ်ဖြစ်လျက်ရှိပြီး ဈေးနှုန်းအနေဖြင့် မြေပဲဆန်တစ်ပိဿာလျှင် ကျပ်(၇၈၀၀-၈၀၀၀)၊ ပဲတီစိမ်းတစ်ပိဿာလျှင် ကျပ်(၃၀၀၀-၃၃၀၀)၊ ကုလားပဲ(HL) တစ်ပိဿာလျှင် ကျပ်(၄၃၂၀-၄၃၅၀)၊ ကုလားပဲ(929) တစ်ပိဿာလျှင် ကျပ် (၄၃၇၀-၄၄၀၀)၊ ပဲစင်းငုံနီတစ်ပိဿာလျှင် (၆၆၅၀-၆၈၅၀)၊ မတ်ပဲ တစ်ပိဿာလျှင် ကျပ်(၅၂၅၀-၅၄၅၀)၊ စားတော်ပဲတစ်ပိဿာလျှင် ကျပ်(၅၇၅၀-၅၉၅၀)၊ ထောပတ်ပဲတစ်ပိဿာလျှင် ကျပ်(၆၈၄၀-၇၀၀၀)တို့ဖြင့် အရောင်းအဝယ်ဖြစ်ကြောင်း၊ ကုန်စည်စီးဆင်းမှုအနေဖြင့် မန္တလေးနှင့် ရန်ကုန်ဘုရင့်နောင်ကုန်စည်ဒိုင်သို့ တင်ပို့ရောင်းချပြီး ပြည်ပဈေးကွက်အနေဖြင့် ပဲစင်းငုံနှင့်မတ်ပဲကို အိန္ဒိယနိုင်ငံသို့တင်ပို့ရောင်းချလျက်ရှိကြောင်း ဈေးကွက်မှသိရှိရပါသည်။

DOCA(မကွေး)