ပြည်တွင်းကုန်သွယ်မှုသတင်း

                        နေကြာသီးနှံသည် မြန်မာနိုင်ငံတွင် စားသုံးဆီဖူလုံရေးအတွက် အဓိကစိုက်ပျိုးကြသည့် အရေးပါသော ဆီထွက်သီးနှံတစ်မျိုးဖြစ်ကြောင်း၊  မြင်းခြံခရိုင်၊ တောင်သာမြို့နယ်၏ မိုးကောင်း သောက်ယာမြေများတွင် စပါး၊ ပဲ၊ ပြောင်း၊ နှမ်းသီးနှံမျိုးစုံ အောင်မြင်ဖြစ်ထွန်းလျက်ရှိရာ ဆီထွက် သီးနှံတစ်မျိုးဖြစ်သော မိုးနေကြာ သီးနှံကိုလည်း တောင်သူများမှ သီးထပ်သီးညှပ် စိုက်ပျိုးသည့်အပြင် သီးသန့်ဧကအလိုက် စိုက်ပျိုးလျက်ရှိပါသည်။ မိုးနေကြာကို မေလနှင့် ဇွန်လတို့တွင်စိုက်ပျိုးပြီး စက်တင်ဘာလနှင့် အောက်တိုဘာလတို့တွင် ရိတ်သိမ်းထွက်ပေါ်ကြောင်း၊ တောင်သာမြို့နယ် မိုးနေကြာစိုက်ပျိုးမှုအနေဖြင့် ၂၀၂၆-၂၀၂၇ခုနှစ်၌ လျာထား (၄၇၅) ဧကတွင် အမှန်စိုက်ပျိုး ထားရှိမှု (၅၀၂)ဧက စိုက်ပျိုးထားကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရ သိရှိရသည်။ တစ်ဧကအနေဖြင့် မျိုး(၄-၅) ပြည်ခန့် စိုက်ပျိုးရကြောင်း၊ စိုက်ပျိုးသော မျိုးများမှာ ဆင်းရွှေကြာ မျိုး-၁၊ ဆင်းရွှေကြာမျိုး-၂ မျိုးများကိုအများဆုံး စိုက်ပျိုးကြကြောင်း၊ စိုက်ပျိုးနည်းမှာ ဘောင်ကြောင်းပေးစနစ်နှင့် ပတ်ကြဲ စိုက်ပျိုးစနစ်ဖြင့် (၂)မျိုးလုံး စိုက်ပျိုးကြကြောင်း၊ တစ်ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် (၅၃၀၀၀၀) ကျပ်ခန့်ကုန်ကျကြောင်း၊ ယခင်နှစ် အထွက်နှုန်းအနေဖြင့် (၂၄) တင်းခန့် ထွက်ရှိကြောင်း၊ ယခင် နှစ်ထွက်ပေါ်ချိန်တွင် နေကြာတစ်တင်းလျှင် (၆၅၀၀၀) ကျပ်ခန့် စျေးနှုန်းများဖြင့် အရောင်းအဝယ်ဖြစ်ခဲ့ကြောင်း၊ ဒေသတွင်း နေကြာဆီ တစ်ပိဿာလျှင် (၂၁၀၀၀) ကျပ်ခန့် ဈေးနှုန်းများရှိကြောင်း၊ ယခင်နှစ်တစ်ဧက အကျိုးအမြတ်အနေဖြင့် (၅၀၀၀၀၀)ကျပ်ခန့် ရရှိကြောင်း၊ သီးနှံပေါ်ချိန်တွင် တောင်သူများမှ ဒေသတွင်းရှိပွဲရုံများနှင့် မန္တလေးမြို့သို့ အဓိကတင်ပို့‌ကြောင်း၊ တောင်သာမြို့နယ်အနေဖြင့် မိုးနေကြာများကို အောက်တိုဘာလကုန်တွင် စတင် ရိတ်သိမ်းမည်ဖြစ်ကြောင်း၊ မိုးနေကြာသီးနှံ များကို တောင်သာမြို့နယ်အတွင်းရှိ သံဘိုရွာ၊ ကန်သာယာ ရွာ၊ အေးရွာ၊ အင်တဲရွာ၊ ထနောင်းကုန်း ရွာနှင့် မင်းရင်ရွာတို့တွင် စိုက်ပျိုးထားကြောင်း၊ တောင်သူများအတွက် ကုန်ကျစရိတ်သက်သာ၍ အကျိုးအမြတ်ရရှိပြီး ဆီထွက်သီးနှံဖူလုံစေရန်  ကျန်းမာရေးနှင့် သင့်တော်သော နေကြာသီးနှံကို ပိုမိုတိုးချဲ့စိုက်ပျိုးသင့်ကြောင်း နေကြာစိုက် တောင်သူတစ်ဦး၏ ပြောကြားချက်အရသိရှိရသည်။

DOCa(မန္တလေး)        

         မကွေးတိုင်းဒေသကြီး၊ သရက်ခရိုင်၊ သရက်မြို့မဈေးကြီးအတွင်း မိုးသီးနှံဖြစ်သော သကြားပြောင်းဖူးများ အောင်လံမြို့နယ် မိုးကောင်းကျေးရွာနှင့် မိုးဖုန်းကျေးရွာများမှ အများအပြား ဝင်ရောက်လျက်ရှိပါသည်။ သကြားပြောင်းဖူးကို ဇွန်လတွင် စတင်စိုက်ပျိုးပြီး တစ်ဧကလျှင်ပြောင်းဖူးမျိုးစေ့(၇)ပြည် ခန့်စိုက်ပျိုးရကြောင်း၊ စိုက်ပျိုးစရိတ်၊ မျိုးသွင်းအားစုနှင့် လုပ်သားခများ အပါအဝင်စုစုပေါင်း ကုန်ကျစရိတ်ကျပ်(၅၅၀၀၀၀)ကုန်ကျကြောင်းနှင့် အထွက်နှုန်းမှာ အဖူးရေ(၃၈၀၀ မှ ၄၀၀၀)ခန့် ထွက်ရှိ ကြောင်း၊ စက်တင်ဘာလတွင် စတင်ခူးဆွတ်ရောင်းချရပြီဖြစ်ကြောင်း သိရသည်။

          သကြားပြောင်းဖူးများကို ကုန်သည်များမှ အခင်းထဲသို့လာရောက် ဝယ်ယူကြကြောင်း၊ အခင်းဈေး ပြောင်းဖူး တစ်ဖူးလျှင် (ဂျွန်) ကျပ် (၃၀၀) ရကြောင်း၊ ပြောင်းဖူးများမှာ ဖွံ့ဖြိုးကြီးထွားပြီး တစ်ရာသီစာ ပြောင်းဖူးသီးနှံ တစ်ဧက အကျိုးအမြတ်အနေဖြင့် စိုက်ပျိုးကုန်ကျစရိတ်များ နှုတ်ပြီး ကျပ်(၆၀၀၀၀၀) ခန့်မြတ်ကြောင်း၊ ပြောင်းဖူးသီးနှံပင်ကိုလည်း နွားစာအဖြစ် ပြန်လည်ရရှိကြောင်း၊ ယခု‌၂၀၂၆ခုနှစ်၊ အောက်တိုဘာလတွင် သကြားပြောင်းဖူးများ ပိုမိုအဝယ်လိုက်လာကြောင်း၊ စိုက်ပျိုးသူတောင်သူများ အနေဖြင့်လည်း အဆင်ပြေလျက်ရှိကြောင်း မိုးကောင်းကျေးရွာ သကြားပြောင်းဖူးစိုက်ပျိုးရောင်းချသည့် တောင်သူတစ်ဦးထံမှ သိရှိရပါသည်။

DOCA(မကွေး)

              မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက် ဒေသတစ်ခုဖြစ်သော ကြောင့် သီးနှံမျိုးစုံ စိုက်ပျိုးဖြစ်ထွန်းလျက်ရှိရာ ၄င်းသီးနှံများအနက် ဈေးကွက်ဝယ်လိုအားရှိသော ငရုတ်သီးနှံကိုလည်း စီးပွားဖြစ်တိုးချဲ့ စိုက်ပျိုးလာကြပါသည် ။ ကျောက်ဆည်ခရိုင်အတွင်းတွင် ငရုတ် စိုက်ပျိုးမှုအနေဖြင့် ၂၀၂၆-၂၀၂၇ ဘဏ္ဍာနှစ်တွင် ကျောက်ဆည်မြို့နယ်တွင်(၈၇၇)ဧက ၊ စဉ့်ကိုင်မြို့နယ်တွင်(၂၇၉၂)ဧက ၊ မြစ်သားမြို့နယ်တွင် (၂၈၄၅)ဧက ၊ စုစုပေါင်း(၆၅၁၄)ဧက စိုက်ပျိုးထားရှိပြီး စဉ့်ကိုင်မြို့နယ်တွင်(၄၇၂)ဧက ရိတ်သိမ်းပြီးကြောင်း သက်ဆိုင်ရာဌာန၏ စာရင်း များအရသိရှိရပါသည်။ အများဆုံးစိုက်ပျိုးသော မျိုးများမှာ သာမို ၊ ဒီမွန်နှင့် (၆၉၂)မျိုးများဖြစ်ပြီး အထွက်နှုန်းကောင်းသော (၆၉၂)မျိုးကို ပိုမိုစိုက်ပျိုးကြကြောင်း ၊ ငရုတ် (၁)ဧက ကုန်ကျစရိတ် အနေဖြင့် မျိုး ၊ သွင်းအားစု ၊ လုပ်သားခအပါအဝင် စုစုပေါင်း (၁၅)သိန်းကျပ်ခန့် ကုန်ကျကြောင်း ၊ စျေးနှုန်းအနေဖြင့် စက်တင်ဘာလတွင် ငရုတ်သီးအညှာပါအခြောက် (၁)ပိဿာလျှင် (၁၅၀၀၀/-) ကျပ် ၊ ငရုတ်သီးအညှာခြွေ(၁)ပိဿာလျှင်(၁၈၀၀၀/-)ကျပ်စျေးနှုန်းများဖြင့်အရောင်းဖြစ်ခဲ့ပြီးအောက်တိုဘာလဒုတိယပတ်တွင်ငရုတ်သီးအညှာပါအခြောက်(၁) ပိဿာလျှင်(၁၆၀၀၀/-) ကျပ် ၊ ငရုတ်သီးအညှာခြွေ(၁)ပိဿာလျှင် (၂၀၀၀၀/-)ကျပ် စျေးနှုန်းများဖြင့် အရောင်းဖြစ်နေပြီး စျေးနှုန်း မြင့်တက်လျက်ရှိကြောင်း၊ သီးနှံထွက်ပေါ်ချိန်တွင် ငရုတ်စိုက် တောင်သူများမှ ပွဲရုံများသို့ တိုက်ရိုက် ရောင်းချကြကြောင်း ၊ ပွဲရုံများမှတဆင့် မန္တလေး၊ရန်ကုန်မြို့များသို့ တင်ပို့ရောင်းချလျက်ရှိ ကြောင်း ပွဲရုံများမှသိရှိရပါသည်။ 

DOCa(မန္တလေး)

        စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများဖြစ်သည့် စပါး၊ မြေပဲ၊ နှမ်း၊ နေကြာ၊ ပဲစင်းငုံ၊ မတ်ပဲနှင့် ပဲမျိုးစုံ စသည့်သီးနှံမျိုးစုံ စိုက်ပျိုးလျက်ရှိရာ နိုင်ငံခြားဝင်ငွေရှာဖွေပေးနေသည့် ပြည်ပပို့ကုန် မတ်ပဲသီးနှံကို ကန့်ဘလူမြို့နယ် မြေထူးကျေးရွာ၊ ထန်းကုန်းကျေးရွာနှင့် အခြားသောကျေးရွာများတွင် စိုက်ပျိုးလျက်ရှိကြောင်း ကြေးတိုင်နှင့် မြေစာ ရင်းဦးစီးဌာန၏ စာရင်းများအရ သိရသည်။

    ကန့်ဘလူမြို့နယ်၌ ၂၀၂၆ ခုနှစ်၊ အောက်တိုဘာလ တတိယပတ်အတွင်း ဈေးနှုန်းများမှာ မတ်ပဲတစ်တင်းလျှင် ၁၀၀၀၀၀ ကျပ်၊ မတ်ပဲ(ဂျပန်)တစ်တင်းလျှင် ၁၀၇၀၀၀ ကျပ်နှုန်းတို့ဖြင့် အရောင်းအဝယ်ဖြစ်လျက်ရှိကြောင်း၊ ယခင်အပတ်၏ ဈေးနှုန်းနှိုင်းယှဉ်ပါက တတိယပတ်အတွင်း မန္တလေးဈေးကွက်၌ အရောင်းအဝယ်လိုက်လာသောကြောင့် မတ်ပဲတစ်တင်းလျှင် ကျပ် ၉၀၀၀နှင့် မတ်ပဲ (ဂျပန်)တစ်တင်းလျှင် ကျပ် ၁၀၀၀၀ ဈေးနှုန်းမြင့်တက်လာကြောင်း၊ မန္တလေးပဲဈေးကွက်၏ အရောင်းအဝယ်ဖြစ်မှုနှင့် ဈေးနှုန်းအတက်၊ အကျပေါ်မူတည်၍ ဈေးနှုန်းအပြောင်းအလဲဖြစ်လျက်ရှိကြောင်း သီးနှံရောင်းဝယ်ရေး လုပ်ငန်းရှင်များထံမှ သတင်းရရှိသည်။

DOCA(စစ်ကိုင်း)

          ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ပြီး ဒေသတွင်းစားသုံးဆီဖူလုံစေရေးအတွက် ကန့်ဘလူမြို့နယ် တောက္ကရှပ်ကျေးရွာ၊ မြေထူးကျေးရွာ၊ နတ်ပေးကျေးရွာနှင့် အခြားသောကျေးရွာများတွင် ဆောင်းနှမ်းကိုအဓိက စိုက်ပျိုးကြောင်း၊ နှမ်းသီးနှံကို ဒေသတွင်းစားသုံး၍ ပိုလျှံသောသီးနှံများကို ရွှေဘိုမြို့နှင့် မန္တလေးမြို့ရှိပွဲရုံများ သို့ အဓိကတင်ပို့ကြောင်း သိရသည်။

     ၂၀၂၆ ခုနှစ်၊ အောက်တိုဘာလ တတိယပတ်အတွင်း နှမ်းနက်(စမုံ)တစ်တင်းလျှင် ကျပ် ၁၉၀၀၀၀၊ နှမ်းဖြူ(ဂျပန်)တစ်တင်းလျှင် ကျပ် ၁၅၄၀၀၀ နှုန်းဖြင့်အရောင်းအဝယ်ဖြစ်လျက်ရှိရာ  ယခင်အပတ်၏ဈေးနှုန်းများနှင့် နှိုင်းယှဉ်ပါက ယခုတတိယပတ်အတွင်း မန္တလေးဈေးကွက်၌ နှမ်းသီး နှံအဝယ်လိုက်လာသောကြောင့် နှမ်းနက်(စမုံ) တစ်တင်းလျှင် ကျပ် ၁၀၀၀၀ ဈေးနှုန်းမြင့်တက်လာကြောင်း၊ မန္တလေးမြို့ရှိ ကုန်စည်ဒိုင်နှင့် ပွဲရုံများ၏ ဈေးနှုန်းအတက်/ အကျပေါ်မူတည်၍ ဈေးနှုန်းအပြောင်းအလဲရှိကြောင်း၊ ဒေသတွင်း ပွဲရုံလုပ်ငန်းရှင်များထံမှ သိရှိရပါသည်။

DOCA(စစ်ကိုင်း)