ပြည်တွင်းကုန်သွယ်မှုသတင်း

      ရှမ်းပြည်နယ်(အရှေ့ပိုင်း)၊ ကျိုင်းတုံခရိုင်အတွင်းရှိ ဆန်စက်များအနက် ဝမ်းစာစပါးကြိတ်ခွဲထုတ်လုပ်ရာမှ ထွက်ရှိသောဆန်ထွက်ပစ္စည်းဖွဲနုများကို ဒေသတွင်းသုံးစွဲရာ၌ ငါးမွေးကန်များ၊ ကြက်မွေးမြူရေးခြံများ၊ ဝက်မွေးမြူရေးခြံများ၊ အခြားသောမွေးမြူရေးလုပ်ငန်းများနှင့်  တိရိစ္ဆာန်အစာများအဖြစ်အသုံးပြုကြပါသည်။

       ကျိုင်းတုံမြို့အတွင်းရှိ စပါးကြိတ်ခွဲရာမှထွက်ရှိသော ဖွဲနု၊ ဖွဲကြမ်းများသည် ဒေသတွင်းသုံးစွဲရန် လုံလောက်မှုမရှိသောကြောင့် မိုင်းပျဉ်းမြို့၊ မိုင်းခတ်မြို့မှတစ်ဆင့် ဝယ်ယူအသုံးပြုလျက်ရှိကြောင်းသိရှိရပါသည်။

         ဩဂုတ်လတွင် (စက်သေး)(ဟာလာစက်) ဖွဲကြမ်း (၂၅) ကီလိုတစ်အိတ်လျှင် (၁၂၀၀၀) ကျပ်၊ (စက်ကြီး)(တန် (၁၀၀) ကျစက်) ဖွဲနု (၂၅) ကီလိုတစ်အိတ်လျှင် (၂၀၀၀၀) ကျပ်ဈေးဖြင့် ရောင်းဝယ်လျက်ရှိပါသည်။ ကျိုင်းတုံမြို့သို့ ဖွဲနု၊ ဖွဲကြမ်းဝင်ရောက်မှုမှာ ပုံမှန်ဝင်ရောက်မှုရှိခြင်းကြောင့် ဈေးနှုန်းတည်ငြိမ်လျက်ရှိကြောင်း ဈေးကွက်အတွင်း ရောင်းဝယ်သူများထံမှသိရှိရပါသည်။

DOCA(ရှမ်း)

         စားသုံးသူရေးရာဦးစီးဌာန၊ သထုံခရိုင်ဦးစီးမှူးနှင့် ဝန်ထမ်းများသည်  ၁၂-၈-၂၀၂၄ ရက်နေ့တွင် သထုံမြို့မဈေးတွင် ဆန်/စပါးလုပ်ငန်းရှင်အသင်းနှင့် ဆန်စက်လုပ်ငန်းရှင်အသင်းတို့ပူးပေါင်း၍ ပြည်သူများသို့ သက်သာသောဈေးနှုန်းဖြင့် ဆန်များရောင်းချရာတွင် စနစ်တကျရှိစေရေး စားသုံးသူပြည်သူများလက်ဝယ် အမှန်တကယ်ရောက်ရှိရေး၊ သင့်တင့်မျှတသောဈေးနှုန်းဖြစ်စေရေးအတွက် ကြီးကြပ်ဆောင်ရွက်ခဲ့သည်။

        အဆိုပါနေ့တွင် ဧည့်မထဆန် (၁၀) မှတ် တစ်ပြည်လျှင် (၃၀၀၀) ကျပ်၊ ပေါ်ဆန်းဆန်တစ်ပြည်လျှင် (၅၅၀၀) ကျပ်ဖြင့် လူတစ်ဦးလျှင် (၂) ပြည်နှုန်းရောင်းချခဲ့ရာ ပြည်သူလူထု (၇၂၀) ဦးအားရောင်းချပေးနိုင်ခဲ့ကြောင်းသိရှိရသည်။

        ထိုကဲ့သို့ ပြည်သူများသို့ သက်သာသောဈေးနှုန်းဖြင့် ဆန်များရောင်းချခြင်းကို သထုံမြို့နယ်ရှိ မြို့ပေါ်ရပ်ကွက် (၅) ရပ်ကွက်တွင် တစ်ရက်ခြားစနစ်ဖြင့် ရောင်းချသွားမည်ဖြစ်‌ကြောင်းသိရှိရပါသည်။

DOCA(မွန်)

      မကွေးတိုင်းဒေသကြီးအတွင်းရှိ ပခုက္ကူခရိုင်၊ ပခုက္ကူမြို့သည် သီးနှံမျိုးစုံရောင်းဝယ်ဖောက်ကားရာမြို့တစ်မြို့ဖြစ်၍ စီးပွားရေးဈေးကွက်အချက်အချာကျပြီး အခြားတိုင်းဒေသကြီး မြို့နယ်များမှ လိုအပ်သောပဲမျိုးစုံဝယ်ယူရရှိသော မြို့တစ်မြို့ဖြစ်ပါသည်။ ပခုက္ကူသီးနှံဈေးကွက်သို့ ပခုက္ကူကျွန်းဒေသများ၊ မြိုင်၊ ပေါက်၊ ရေစကြိုမြို့နယ်များနှင့် စစ်ကိုင်း၊ မန္တလေးတိုင်းဒေသကြီးအတွင်းရှိ မြို့နယ်များမှထွက်ရှိသော သီးနှံမျိုးစုံဝင်ရောက်ပြီး ရောက်ဝယ်ဖောက်ကားလျက်ရှိပါသည်။ယခုဩဂုတ်လ(ဒုတိယပတ်)တွင် ဆီထွက်သီးနှံ နှမ်းအမျိုးအစားအလိုက် ဈေးတက်ပြီး အရောင်းအဝယ်ဖြစ်လျက်ရှိသည်။ နှမ်းနက်စမုံမှာ ဈေးကွက်သို့ မိုးနှမ်းအသစ်များဝင်ရောက်ခြင်းမရှိဘဲ ဆောင်းရာသီထွက် နှမ်းနက်စမုံအဟောင်းများသာ အရောင်းအဝယ်ဖြစ်ကြောင်း၊ နှမ်းဖြူများမှာ ရေစကြိုမြို့မှ အများဆုံးဝင်ရောက်လျက်ရှိကြောင်း နေ့စဉ် တစ်ရက်လျှင် ပိဿာ(၃၀)ဝင်အိတ် (၁၀၀- ၂၀၀)ထိ ပွဲရုံဈေးကွက်တွင် အရောင်းအဝယ်ဖြစ်ကြောင်း သိရှိရသည်။

         ဈေးနှုန်းအနေဖြင့် ၂၀၂၄ခုနှစ်၊ ဩဂုတ်လ(ဒုတိယပတ်)တွင် နှမ်းဖြူတစ်တင်းလျှင် ကျပ် (၁၃၉၀၀၀-၁၃၄၀၀၀)၊ နှမ်းနက်စမုံတစ်တင်းလျှင် ကျပ်(၁၉၅၀၀၀-၁၉၀၀၀၀)ဈေးနှုန်းဖြစ်ပြီး (ပထမပတ်)တွင် နှမ်းဖြူတစ်တင်းလျှင် ကျပ်(၁၃၄၀၀၀-၁၃၂၀၀၀)၊ နှမ်းနက်စမုံတစ်တင်းလျှင် ကျပ် (၁၅၀၀၀၀-၁၄၅၀၀၀)ဖြစ်၍ တစ်ပတ်အတွင်း နှမ်းဖြူတစ်တင်းလျှင် ကျပ်(၅၀၀၀)ခန့်၊ နှမ်းနက်(စမုန်) တစ်တင်းလျှင် ကျပ်(၄၅၀၀၀)ခန့်ဈေးတက်ပြီး အရောင်းအဝယ်ဖြစ်ကြောင်း၊  ဈေးကွက်သို့ ဝင်ရောက်လျက်ရှိသည့် နှမ်းများကို မြို့ပေါ်ရှိ ဆီစက်လုပ်ငန်းရှင်များနှင့် နှမ်းလှော်လုပ်ငန်းရှင်နှင့် စားသောက်ကုန်လုပ်ငန်းရှင်များက ဝယ်ယူမှုများပြီး မန္တလးဈေးကွက်သို့လည်းတင်ပို့လျက်ရှိကြောင်း မြို့ပေါ်ရှိ ဆီထွက်သီးနှံရောင်းဝယ်ရေးလုပ်ငန်းရှင်တစ်ဦးထံမှသိရှိရပါသည်။

DOCA(မကွေး)

       မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြေပဲဈေးကွက်တွင် မြေပဲဆန်ဈေးနှုန်းများဆက်လက်မြင့်တက်ပြီး အရောင်းအဝယ်ဖြစ် လျက်ရှိသည်။ ၂၀၂၄ခုနှစ်၊ ဩဂုတ်လ(ဒုတိယပတ်)တွင် မြေပဲဆန်တစ်ပိဿာလျှင် ကျပ်(၁၀၅၀၀- ၉၅၀၀)ထိပေါက်ဈေးရှိလာသည်။ တောင်သူနှင့် ကုန်သည်များတွင် ပဲလက်ကျန်နည်းလာပြီး မြို့ပေါ်ရှိဆီစက်ပိုင်ရှင်များမှ ဝယ်လိုအားကောင်းနေခြင်းကြောင့် မြေပဲဈေးနှုန်းများ တရိပ်ရိပ်မြင့်တက်လျက်ရှိကြောင်း၊ ပခုက္ကူဈေးကွက်သို့ မြေပဲစိုက်ပျိုးမှုများသော ထီးလင်း၊ ဆော၊ ကျောက်ထု၊ လောင်းရှည်မြို့နယ်များမှ အများဆုံးဝင်ရောက်ကြောင်း၊ မြို့ပေါ်ရှိပွဲရုံများတွင် နေ့စဉ် မြေပဲဆန် ပျမ်းမျှပိဿာ(၃၀)ဝင်အိတ် (၁၀၀-၁၅၀) အရောင်းအဝယ်ဖြစ်ကြောင်း ဈေးကွက်မှသိရှိရသည်။

  ဈေးနှုန်းအနေဖြင့် ဩဂုတ်လ(ဒုတိယပတ်)တွင် မြေပဲလုံးဆန်နီ(ပြန့်) တစ်ပိဿာလျှင် ကျပ် (၁၀၅၀၀-၁၀၀၀၀)၊ မြေပဲဆီဆန်တစ်ပိဿာလျှင် ကျပ်(၉၅၀၀-၉၂၀၀)၊ မြေပဲလုံးဆန်(ဖြူ) တစ်ပိဿာလျှင် ကျပ်(၁၀၀၀၀-၉၅၀၀)၊ ဆီဆန်တစ်ပိဿာလျှင် ကျပ်(၉၅၀၀-၉၃၀၀)ဈေးနှုန်းရှိပြီး ယခင်ဩဂုတ်လ (ပထမပတ်)တွင် မြေပဲလုံးဆန်နီ(ပြန့်) တစ်ပိဿာလျှင် ကျပ်(၉၅၀၀-၉၂၀၀)၊ မြေပဲဆီဆန်တစ်ပိဿာလျှင် ကျပ်(၉၅၀၀-၉၀၀၀)၊ မြေပဲလုံးဆန်(ဖြူ) တစ်ပိဿာလျှင် ကျပ်(၈၇၀၀-၈၅၀၀)၊ ဆီဆန်တစ်ပိဿာလျှင် ကျပ်(၈၃၀၀-၈၀၀၀)ဈေးနှုန်းဖြစ်၍ တစ်ပတ်အတွင်း မြေပဲဆန်တစ်ပိဿာလျှင် ကျပ်(၁၀၀၀)ခန့်ဈေးတက်ပြီး အရောင်းအဝယ်ဖြစ်ကြောင်း၊ မြေပဲဆန်ဈေးမြင့်တက်ခြင်းနှင့်အတူ မြေပဲဆီ၊ မြေပဲဖတ်ဈေးနှုန်းများလည်းမြင့်တက်ပြီး အရောင်းအဝယ်ဖြစ်ကြောင်း၊ မြို့ပေါ်ရှိ ဆီစက်လုပ်ငန်းရှင်များ၊ ဆားလှော်လုပ်ငန်းရှင်များက ဝယ်ယူကြောင်း၊ မြေပဲဈေးနှုန်းမြင့်တက်သော်လည်း အရောင်းအဝယ်သွက်လျက်ရှိကြောင်း ပွဲရုံဈေးကွက်မှသိရှိရပါသည်။   

DOCA(မကွေး)

      ပုသိမ်မြို့ရှိ ကြောင်လျှာသီးကို မိုးရာသီမှသီးသော အသီးတမျိုးဖြစ်ပြီး ဟင်းသီးဟင်းရွက်များထဲတွင် တမျိုးအပါအဝင်ဖြစ်ပါသည်။ ကြောင်လျှာသီးကို  အစိမ်းသီးနှင့် အညိုသီးဟူ၍ (၂)မျိုးခွဲခြားထားပါသည်။ အရသာမှာ ခါးသက်သက်နှင့် ပူရှိန်းရှိန်းအရသာရှိပါသည်။ ကြောင်လျှာသီးအစိမ်းကို ပါးပါးလှီးပြီး သုပ်စား၍သော်လည်းကောင်း၊ အချဉ်စိမ်၍ ချဉ်ဖက်အဖြစ်သော်လည်းကောင်း၊ မီးဖုတ်၍ သော်လည်းကောင်း၊ ကြော်ချက်၍သော်လည်းကောင်း စားသုံးကြပါသည်။ ကြောင်လျှာသီးသည် ဘက်တီးရီးယားများကို တိုက်ဖျက်ပေးခြင်း၊ ဓာတ်တိုးဆန့်ကျင်သော အာနိသင်ရှိခြင်း၊ ရောင်ရမ်းမှုကိုသက်သာစေခြင်း၊ အသည်းကိုကျန်းမာစေခြင်း၊ ကျောက်ကပ်ကို ကျန်းမာစေခြင်း၊ ဆီးချိုကိုသက်သာစေခြင်း၊ ကိုယ်ခံအားကောင်းစေခြင်း၊ အစာခြေစနစ်ကိုကောင်းမွန်စေခြင်း၊ ကင်ဆာရောဂါကို ကာကွယ်ပေးခြင်းစသည့် ကျန်းမာရေးကိုများစွာအထောက်အကူပြုသည့် သီးနှံတစ်မျိုးဖြစ်ပါသည်။

    ပုသိမ်မြို့ဈေးကွက်အတွင်းမှာတော့ ကြောင်လျှာသီး တစ်တောင့်လျှင် (၈၀၀-၉၀၀)ကျပ်ဖြင့် ရောင်းဝယ်နေကြကြောင်း သိရပါသည်။

DOCA(ဧရာဝတီ)