ပြည်တွင်းကုန်သွယ်မှုသတင်း

ပြောင်းသီးနှံမှာမွေးမြူရေး အစားစပ်လုပ်ငန်း တွင်သုံးစွဲမှု များပြားခြင်း၊ ပြည်ပတင်ပို့ ခြင်း တို့ကြောင့် မန္တလေးစျေးကွက်တွင် အရောင်းသွက်သည့် ကုန်စည်ဖြစ် ကြောင်း သိရပါသည်။ မန္တလေးအစေ့ထုတ်ပြောင်းစျေးကွက်သို့ ရှမ်းပြည်နယ်မှ အများအပြား ဝင်ရောက်လျက် ရှိပြီး၊ မန္တလေးတိုင်းဒေသကြီးနှင့် စစ်ကိုင်းတိုင်းဒေသကြီးတို့မှလည်းဝင်ရောက်လျက်ရှိကြောင်း သိ ရပါ သည်။ မန္တလေးတိုင်းဒေသကြီးအတွင်း ၂၀၂၄ - ၂၀၂၅ ခုနှစ်တွင် အစေ့ ထုတ်ပြောင်းစိုက်ပျိုးမှု ၃၆၆၂၂ ဧက၊ ရိတ်သိမ်းမှု ၁၃၃၃၁ ဧက၊ အထွက်နှုန်း ၄၉.၅၅ တင်း၊ အထွက်တင်း စုစုပေါင်း ၆၆၀၅၉၁ တင်းဖြစ်ကြောင်းသိရပါသည်။ မန္တလေးပွဲစား၊ကုန်သည်စက်ပိုင်များ မဟာကထိန်တော်အသင်းတွင် ၂၀၂၅ ခုနှစ်၊ ဇူလိုင်လဒုတိယပတ်အတွင်း ဖြစ်ပေါ်သည့်အစေ့ ထုတ်ပြောင်းစျေး မှာ ၃တင်း ဝင်တစ်အိတ်လျင်ပြောင်းဖူးစေ့(ဗမာ) ၈၇၀၀၀ ကျပ်နှင့်၈၈၀၀၀ကျပ်၊ပြောင်းဖူးစေ့(ရှမ်း) ၉၀၀၀၀ ကျပ်နှင့် ၉၂၀၀၀ ကျပ်၊ပြောင်းဖူးစေ့(စီပီ) ၉၁၀၀၀ကျပ်၊တစ်ပိဿာ စျေးအနေဖြင့်ပြောင်း ဖူးစေ့(ဗမာ) ၁၆၁၁ ကျပ်နှင့် ၁၆၃၀ ကျပ်၊ ပြောင်းဖူးစေ့(ရှမ်း)၁၆၆၇ကျပ်နှင့် ၁၇၀၄ကျပ်၊ပြောင်းဖူး စေ့(စီပီ) ၁၆၈၅ ကျပ်စျေးတို့ဖြစ်ကြောင်းသိရပါသည်။ ယခင်နှစ်ကာလတူ တစ်ပိဿာစျေးမှာ ပြောင်းဖူးစေ့ (ဗမာ) ၁၂၂၂ ကျပ်နှင့်၁၂၄၁ကျပ်၊ ပြောင်းဖူးစေ့(ရှမ်း)၁၂၇၈ ကျပ် နှင့် ၁၂၉၆ ကျပ်၊ ပြောင်းဖူးစေ့(စီပီ) ၁၂၅၉ကျပ်နှင့်၁၂၈၇ကျပ်တို့ ဖြစ်ကြောင်း သိရပါသည်။ယခုနှစ် စျေးနှင့် ယခင် နှစ် ကာလတူစျေးနှိုင်းယှဉ်ပါက တစ်ပိဿာလျှင် ၃၀၀ ကျပ်အထက်ပိုမိုရရှိ ကြောင်း သိရပါ သည်။ DOCA(မန္တလေး)

ပြည်တွင်းစားသုံးမှုနှင့်ပြည်ပသို့တင်ပို့သည့်ပဲတီစိမ်းမှာ စျေးကောင်းရသည့် ပဲအမျိုးအစား ဖြစ်ပါသည်။ မန္တလေးပဲမျိုးစုံစျေးကွက်သို့ ပဲတီစိမ်းဝင်ရောက်မှုအနေဖြင့် မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီးနှင့် ရှမ်းပြည်နယ်တို့မှ ဝင် ရောက်ကြောင်း သိရပါသည်။ မန္တလေးတိုင်းဒေသကြီးအတွင်း၂၀၂၄-၂၀၂၅ ခုနှစ် ပဲတီစိမ်းစိုက်ပျိုး မှု (၂၇၀၉၅၈)ဧက၊ ရိတ်သိမ်း(၂၅၃၄၄၁)ဧက၊ အထွက်နှုန်း(၁၁.၆၄)တင်းနှင့် အထွက် (၂၉၄၉၀၁၇) တင်း ဖြစ်ကြောင်း သိရပါသည်။ မန္တလေးပွဲစား၊ကုန်သည်၊စက်ပိုင်များမဟာ ကထိန်တော် အသင်း တွင်၂၀၂၅ခုနှစ်ဇူလိုင်လဒုတိယပတ်အတွင်းဖြစ်ပေါ်လျက်ရှိသောစျေးမှာ ၃တင်းဝင်တစ်အိတ်လျှင် ပဲတီစိမ်းအညာ ၂၈၀၀၀၀ ကျပ်နှင့် ၃၈၈၀၀၀ ကျပ်၊ပဲတီရွှေဝါ(ပဲခွဲ)၂၄၀၀၀၀ ကျပ်နှင့် ၂၅၀၀၀၀ ကျပ်၊ တစ်ပိဿာစျေးမှာပဲတီစိမ်းအညာ ၄၉၇၈ကျပ်နှင့် ၆၈၉၈ ကျပ်၊ ပဲတီရွှေဝါ(ပဲခွဲ) ၄၂၆၇ ကျပ် နှင့် ၄၄၄၄ ကျပ်တို့ဖြစ်ကြောင်း သိရပါသည်။ ယခင်နှစ်ကာလတူ တစ်ပိဿာစျေးမှာ ပဲတီစိမ်း (အညာ) ၂၉၃၃ ကျပ်နှင့် ၃၆၂၇ ကျပ်၊ပဲတီစိမ်း(ပဲခွဲ)၂၇၅၆ ကျပ်နှင့်၂၈၄၄ ကျပ်ဖြစ်ပေါ်ခဲ့ပြီး၊ ကာလတူ စျေးနှိုင်းယှဉ်ပါက ပဲတီစိမ်းအညာမှာ တစ်ပိဿာလျှင် ၃၂၇၁ ကျပ်စျေးပိုမိုရရှိ ကြောင်း သိရပါသည်။ DOCA(မန္တလေး)

မျှစ်ကို အင်္ဂလိပ်လို (Bamboo Shoot)ဟုခေါ်သည်။ Bamboo ဆိုတာ ဝါးပင် Shoot ဆိုတာ အတက်အကင်းကိုပြောတာဖြစ်ပါသည်။ ဝါးအတက်အကင်းလေး (ဝါးပင်ပေါက်စ) ဖြစ်ပါသည်။ မျှစ်ဆိုတာ တစ်ချိန်ကျ ဝါးပင်ဖြစ်မယ့် အပင်ဖြစ်ပါသည်။ ရက်သတ္တနှစ်ပတ်သား မတိုင်ခင် ဝါးပင်ပေါက်အရွယ်မှာ ချိုးယူ၍ မျှစ်အဖြစ် စားသောက်နိုင်သည်။ မျှစ်ကို ချက်ချင်းလက်ငင်းချိုးယူ စားသုံးနိုင်သကဲ့သို့ တာရှည်ခံအောင်ထား၍လည်း စားသုံးနိုင်သည်။ ဝါးပင်ပေါက်ကို မျှစ် စားစရာအဖြစ် အသုံးဝင်ရုံမျှမက ဝါးပင် နှစ်နှစ်သားခန့်တွင် နှီးဖျာ အဖြစ်ယက်လုပ်နိုင်ပြီး ငါးနှစ်သားခန့်တွင် အထပ်သား၊ ထရံ၊ ကုလားထိုင်၊ အိမ်အမိုးအကာနှင့် ဝါးတိုင် စသည်ဖြင့် လူ့အသုံးအဆောင်ပစ္စည်း များအတွက် အသုံးဝင်လှပါသည်။ မျှစ်စို့သည် နုသည်။ ချိုသည့် အရသာရှိသည်။ ဝါးအမျိုးမျိုးရှိသလို မျှစ်အမျိုးအစားလည်း အများကြီးရှိပါသည်။ ဘယ်အမျိုးအစားပဲဖြစ်ဖြစ် မျှစ်ဟာ အာဟာရဓါတ်များစွာပါပြီး ဈေးကလည်း အရမ်းမကြီးသည့်အတွက် လူတန်းစားမရွေးရဲ့ ကြိုက်နှစ်သက်ခြင်းကိုလည်း ခံရပါသည်။ မျှစ်မှာ ကစီဓါတ် ၄ ရာခိုင်နှုန်းနဲ့ အမိုင်နိုအက်စစ် အမျိုးပေါင်း ၁၇ မျိုး အပါအဝင် အသားဓါတ် ၅ ရာခိုင်နှုန်း ပါသည့်အတွက် အာဟာရ တန်ဖိုးမြင့်ပါတယ်။ ဒါ့အပြင် ဆယ်လူလို့စ် ခေါ် အမျှင်ဓါတ်၊ ဗီတာမင်ဘီ၊ ဗီတာမင်အေ၊ သံဓါတ်၊ သွပ်ဓါတ်၊ ဖောလစ်အက်စစ်ဓါတ်၊ နစ်ကိုတင်းနစ်အက်စစ်၊ ဆီလီနီယံဓါတ်၊ ပိုတက်ဆီယမ်ဓါတ်တို့လည်း ကြွယ်ဝစွာပါရှိပါသည်။ ဗီတာမင်တွေ၊ သတ္ထုဓါတ်တွေ များစွာပါသည့် အတွက် မျှစ်သည် ခန္ဓာကိုယ်အတွင်းရှိ အဆိပ်များကိုပြေစေနိုင်သည်။ ကိုယ်တွင်းရှိ ဖရီးရက်ဒီကယ်ဓါတ် များကို လျော့ချပေးနိုင်သောကြောင့် မျှစ်အား ရေရှည်စားသုံးပေးပါက နုပျိုပြီး အသက်ပိုရှည်နိုင်သည်။ ပိုတက်စီယမ်ဓါတ်ကလည်း သွေးတိုးကိုလျှော့ချပေးနိုင်သည်။ မျှစ်တွင် ပါဝင်သော ဗီတာမင်ဘီနှင့် နီကိုတင်းနစ်အက်စစ်တို့က အဆီချပေးနိုင်သည်။ မြင်းဖုခေါ် အသားလုံးတည်ခြင်း ဖြစ်ပွားမှုကိုလည်း လျှော့ချပေးနိုင်သည်။ မျှစ်တွင် အမျှင်ဓါတ်ခေါ် ဆယ်လူးလို့စ်ဓါတ်လည်း များပြားစွာပါသည့်အတွက် အူမကြီးအား လှုပ်ရှားစေရန် နှိုးဆွပေးသောကြောင့် ဝမ်းချုပ်ခြင်းအား မဖြစ်စေဘဲ ဝမ်းကိုမှန်စေကာ အူမကြီးကင်ဆာဖြစ်ပွားနိုင်ခြေကို လျှော့ချပေးပါသည်။ မျှစ်မှာ မပြည့်ဝဆီ ခေါ် unsaturated fat သာ ပါဝင်သည့်အတွက် မျှစ်မှီဝဲသဖြင့် အဆီတက်မှာ စိုးရိမ်စရာမလိုပါ။ ဒါ့အပြင် မျှစ်စားခြင်းဖြင့် ကိုလက်စထရောဓါတ်ကိုပါ ကျစေနိုင်ပါသည်။ မျှစ်ကို အမျိုးမျိုးလုပ်စားနိုင်ပါသည်။ မျှစ်ချည်းပဲပေါင်းစားတာ၊ ပြုတ်ပြီး ငပိရည်နဲ့တို့စားတာ၊ ကြော်စားတာ၊ သုပ်စားတာအပြင် အသားတစ်မျိုးမျိုးနဲ့ကြော်စားတာ၊ မျှစ်ချဉ်နဲ့ဝက်သား သို့မဟုတ် ငါးခေါင်းနဲ့ ဟင်းချိုချက်သောက်တာ၊ မျှစ်ကို အခြောက်လှမ်းပြီး သုပ်စားတာစသဖြင့် စုံလင်စွာ လုပ်စားနိုင်ပါသည်။ မျှစ်စားမည်ဆိုပါက အမြင်လှအောင် အနီရောင်၊ အဝါရောင် စသဖြင့် တားမြစ်ဆေး ဆိုးထားသည့်မျှစ်တွေကို ရှောင်ပါ။ ဖြစ်နိုင်လျှင် မျှစ်ချိုးရောင်းသည့်သူဆီက တိုက်ရိုက်ဝယ်စားတာ သို့မဟုတ် သဘာဝအတိုင်းရောင်းသည်ဆိုင်ကပဲရှာဝယ်ပြီးစားတာ ကျန်းမာရေးအတွက် ကောင်းပါသည်။ မိုးဦးကာလ မျှစ်စတင်ချိုးရသည့်အချိန်ဖြစ်၍ ယခင်လက မျှစ်စိမ်း ၂၅ ကျပ်သားလျှင် ၃၀၀၀ ကျပ်နှုန်း၊ ၁ ပိဿာလျှင် ၁၀၀၀၀ ကျပ်နှုန်းဖြင့် ယခုလတွင် မျှစ်စိမ်း ၂၅ ကျပ်သားလျှင် ၂၀၀၀ ကျပ်နှုန်း၊ ၁ ပိဿာလျှင် ၇၀၀၀ ကျပ်နှုန်းဖြင့် ရောင်းချလျက်ရှိကြောင်း သိရှိရပါသည်။ DOCA(မန္တလေး)

နေရာဒေသအလိုက် အခေါ်အဝေါ် အမျိုးမျိုးရှိကြသည်။ ကြာဖက်ကြီး၊ အရိုးဆက်ပင်၊ အသားဆက်ပင်၊ တောပရုတ်ဆီပင် ဟူ၍လည်းခေါ်ကြသည်။ အရိုးဆက်ပင်၊ အသားဆက်ပင် ၊ အ‌ကြော ဆက်ပင် တဖြစ်လည်းခေါ်သည်။ အရိုးဆက်ပင်သည် ကျွန်းရွက်နှင့်ဆင်တူပြီး ဖက်ခါးပင်အသီးနှင့် ဆင်တူသည်။အရိုးဆက်ပင်၏အရွက်သည် အင်ရွက်ထက်ကြီး၏။ ခွေးသွားစိတ်ရှိ၏။ အကိုင်းများ စိမ်း၏။ အပွင့်သည်ဖြူ၏။ အရိုးဆက်ပင်၏အမြစ်ကိုသွေးလိမ်းက ပွေးပျောက်၏။ အရိုးဆက်ရွက် သတ္ထုရည်ကိုအနာမြုံများ၌ အုံပေးလျှင်အနာကျက်၏ အသားနုတက်စေ၏။ ခန္ဓာကိုယ်တွင် ကိုက်ခဲ နာကျင်လျှင် ၎င်းမြစ်ကိုသွေး၍ မီးနှင့်နွေးပြီးလိမ်းဆေးအဖြစ်လိမ်းကပျောက်၏။ အနာသည်သွေးများ ယိုစီးလျှင် လိမ်ပေးကသွေးရပ်ပြီး အနာပဆုပ်ကျောလုံးပုပ်ဆိုသည့်အနာများကို အရိုးဆက်ရွက် ညက်အောင်ထောင်းပြီးအုံပေးပါကပျောက်၏။ပျောက်ရန်ခက်ခဲသောအနာအို၊အနာဆွေးများလည်းပျောက်ကင်းသည်။ အရိုးကျိုး၊ အရိုးအက်ပါက ၎င်းနည်းအတိုင်းပြုလုပ်၍ ကောင်းမွန်သည်ဟု ဆေးပညာ ဗဟုသုတမှလေ့လာသိရှိရပါသည်။ဆေးဖက်ဝင်ရုံမက ပန်းလည်းလှသည့် အရိုးဆက်ပင် ကိုစိုက်ပျိုးထားသင့်ပါသည်။ အရိုးဆက်ပင်တစ်ပင်လျှင် (၃၀၀၀/၅၀၀၀)ကျပ်ဖြင့် ရောင်းချ လျက်ရှိကြောင်း ပန်းပျိူးပင်အရောင်းဆိုင်မှသိရှိရသည်။ DOCA(မန္တလေး)

မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်ရှိ ခရမ်းချဉ်သီးဈေးကွက်သို့ ရှမ်းပြည်နယ် အောင်ပန်းနှင့်ပုပ္ပါးဒေသထွက် ခရမ်းချဉ်သီးများ နေ့စဉ်ဝင်ရောက်အရောင်းအဝယ်ဖြစ်လျက်ရှိပြီး ထိုင်ဝမ်ခရမ်းချဉ်သီးမျိုးများ အများဆုံးဝင်ရောက်လျက်ရှိကြောင်း သိရှိရသည်။ ဗမာခရမ်းချဉ်သီးမှာ အခွံပါးပြီး အနှစ်များသော်လည်း တာရှည်အထားခံမှုမရှိ၍ ဈေးကွက်အတွင်း၌ ဝယ်ယူစားသုံးမှု နည်းခြင်းကြောင့် တောင်သူစိုက်ပျိုးမှုနည်း၍ ဈေးကွက်သို့ ဝင်ရောက်မှုနည်းကြောင်း၊ ထိုင်ဝမ် ခရမ်းချဉ်သီးမျိုးမှာ အခွံထူပြီး အထားခံ၍ အလုံးလှသည့်အပြင် အချဉ်ဓါတ်ပါဝင်မှုနည်းခြင်းကြောင့် ဝယ်ယူစားသုံးမှုများကြောင်း သိရှိရသည်။ ခရမ်းချဉ်သီးဈေးကွက်အနေဖြင့် ၂၀၂၅ခုနှစ်၊ ဇူလိုင်လ(ပထမပတ်)မှစ၍ ထိုင်ဝမ်ခရမ်းချဉ်သီး တစ်ပိဿာလျှင် ကျပ်(၄၀၀၀-၃၆၀၀) ဈေးအမြင့်ဖြင့် အရောင်းအဝယ်ဖြစ်ကြောင်း၊ ဒေသတွင်း ခရမ်း ချဉ်သီးစိုက်ပျိုးထားရှိသော စိုက်ခင်းများမှ ခရမ်းချဉ်သီးထွက်ရှိမှုနည်း၍ ဈေးကွက်သို့ ကုန်ဝင် ရောက်မှုနည်းခြင်းနှင့် လမ်းပန်းဆက်သွယ်ရေး အခက်အခဲများကြောင့် သယ်ယူစရိတ်ကြီးမြင့်၍ ဈေးကျဆင်းခြင်းမရှိဘဲ ဈေးအမြင့်ဖြင့်အရောင်းအဝယ်ဖြစ်ကြောင်း ပခုက္ကူမြို့ ကုန်စိမ်းသီးနှံရောင်း ဝယ်ရေးဈေးကွက်မှ သိရှိရသည်။ DOCA(မကွေး)