ပြည်တွင်းကုန်သွယ်မှုသတင်း
Powered by Drupal
ပန်းသီးကျန်းမာရေးနှင့်ဈေးကွက်
သစ်သီးဝလံတွေ၊ဟင်းသီးဟင်းရွက်တွေဟာ လူ့ခန္ဓာကိုယ်က နေ့စဉ်လိုအပ်တဲ့ ဗီတာမင် နှင့် သတ္တုဓါတ်တွေကို လုံလောက်စွာ ပေးစွမ်းနိုင်တဲ့အပြင် အာဟာရလည်းဖြစ်၊ ရောဂါတွေကို လည်း ကင်းဝေးစေလို့ နေ့စဉ် အစာအဟာရထဲမှာ မရှိမဖြစ် စားပေးသင့်တဲ့ အစားအစာများ လည်းဖြစ်ပါတယ်။ယင်းအစားအစာများထဲမှ ပန်းသီးကို တစ်နေ့တစ်လုံး မှန်မှန် စားသုံးပေးခြင်း ဖြင့် အရွယ်တင်နုပျိုစေပြီး ကင်ဆာရောဂါ၊ နှလုံး၊ သွေးတိုး၊ ဆီးချိုကို ကာကွယ်ပေးနိုင်တဲ့ Antioxidant တွေ၊ အစာကြေစေတဲ့ အမျှင်ဓါတ်တွေ၊ လူ့ခန္ဓာကိုယ်ကနေ့စဉ် လိုအပ်တဲ့ဗီတာမင် C နဲ့သတ္တုဓါတ်တွေ အများအပြား ပါဝင်ပါ တယ်၊ ကယ်လိုရီနည်းပြီးအမျှင်ဓာတ်များသောကြောင့် ဗိုက်ပြည့်စေ၍ကိုယ်အလေးချိန် ထိန်းသိမ်းရာတွင် စားသုံးကြကြောင်း၊ ဗီတာမင်ကေပါဝင် သော ကြောင့်အရိုးသိပ်သည်းဆကိုတိုးမြင့်စေခြင်းကြောင့်တစ်နေ့ကို ပန်းသီးတစ်လုံးစားပေးခြင်းဖြင့် ကျန်းမာရေးကိုအထောက်အကူပြုကြောင်း အထောက်အကူများစွာပေးသည့်အတွက် လူကြိုက် များသည့်အသီးတစ်မျိုးဖြစ်ကြောင်း သိရသည်။
ပန်းသီးသည် ချို၍ စားနိုင်သည့် သစ်သီးဖြစ်သည်။ ပန်းသီးပင် (Malus pumila ) မှ သီးသည့် အသီးဖြစ်သည်။ ပန်းသီးပင်များကို ကမ္ဘာတစ်ဝန်းတွင်ကျယ်ပြန့်စွာ စိုက်ပျိုးကြသည်။ ပန်းသီးပင်များ၏ မူလပေါက်ရောက်ရာဒေသသည် အာရှတိုက်အလယ်ပိုင်း ဖြစ်သည်။ မြန်မာနိုင်ငံ တောင်ပေါ်ဒေသများတွင် စိုက်ပျိုးဖြစ်ထွန်းကြသည်။ ပန်းသီးပင်သည် အစေ့မှ စိုက်ပျိုးပါက ကြီးထွားကြသည်။ ပုံမှန်အားဖြင့် ပန်းသီးပင် စိုက်ပျိုးသူများသည် ကိုင်းဆက်သည့် နည်းလမ်းကို အသုံးပြုကြသည်။ ထိုနည်းလမ်းကို အသုံးပြုခြင်းဖြင့် ပန်းသီးပင်၏အရွယ်အစားကို ထိန်းချုပ်နိုင် ပေသည်။ ပန်းသီးအမျိုးအစား ပေါင်း ၇၀၀၀ ကျော်ရှိပါတယ်။ ပန်းသီးများသည် အများအားဖြင့် အနီရောင်၊ အစိမ်းရောင်၊ အဝါရောင် (သို့မဟုတ်) သုံးမျိုးပေါင်းစပ်ထားသော အသီးများသာ တွေ့ရှိရပါသည်။ ပန်းသီးမှတန်ဖိုးမြှင့်ထုတ်ကုန်အဖြစ် ပန်းသီးဝိုင်ထုတ်လုပ် ရောင်းချကြပြီး အကျိုးအမြတ်ရရှိကြောင်းသိရှိရပါသည်။ပန်းသီးများကိုရှမ်းပြည်နယ်၊ အောင်ပန်းမြို့၊ တရုတ်ဖက် တို့မှ မန္တလေးမြို့သစ်သီးပွဲရုံများသို့ တင်သွင်းကြောင်းသိရှိရပါသည်။ မန္တလေးမြို့၊ လက်လီ သစ်သီးဆိုင်များတွင်ပန်းသီးများကို သစ်သီးပွဲရုံများမှ မှာယူရောင်းချလျက်ရှိကြောင်း၊ ၂၀၂၅ ခုနှစ်၊ နိုဝင်ဘာလအတွင်း မန္တလေးမြို့၊ သစ်သီးတန်းရှိသစ်သီးဆိုင်များတွင် ပန်းသီး အလုံးကြီး (၁) လုံး လျှင်(၃၅၀၀/- ၅၀၀၀/-၆၅၀၀/-) ကျပ်၊ ပန်းသီးအလုံးသေး (၃) လုံးလျှင် (၅၀၀၀) ကျပ်ဖြင့် ရောင်းချလျက်ရှိကြောင်း၊ လူကြီးလူငယ်မရွေး ကြိုက်နှစ်သက်သည့်အတွက် အရောင်းအဝယ် ဖြစ်လျက် ရှိကြောင်းသိရှိရပါသည်။
DOCA(မန္တလေး)
ပေါ်ဦးပေါ်ဖျား ယာကွန်များ
ယာကွန်ပင်ဟာ တောင်အမေရိကမျိုးရင်းအပင်တစ်မျိုးဖြစ်ပြီး နေကြာပင်နှင့် မျိုးစိတ် တူပါတယ်။ ယာကွန်ပင်မှာ သေးငယ်ပြီး အရောင်တောက်ပတဲ့ ဒေစီပန်းလိုမျိုး ပန်းပွင့်လေး တွေပွင့်ကြပါတယ်။အချို့နိုင်ငံတွေမှာယာကွန်ဥကို Super Food ဟုခေါ်ဆိုကြောင်းသိရပါတယ်။ ယာကွန်ဥကိုရေကန်စွန်းဥ၊မြေအောက်ပန်းသီးဟုခေါ်ဆိုကြပါသည်။အရသာမှာချိုပြီး အရည်ရွှမ်း ပြီးကြွပ်ဆပ်ကာပန်းသီးအရသာနှင်တူသောကြောင့်မြေအောက်ပန်းသီးဟုခေါ်ဆိုကြောင်း သိရပါ သည်။ယာကွန်ဥကို အောက်တိုဘာလတွင် စတင်ဖော်ပြီး ဇန်နဝါရီနှင့်ဖေဖေါ်ဝါရီလတွင် အချိုဆုံး အချိန်ဖြစ်ပါသည်။ ယာကွန်ဥဟာ စိမ်းစားသီးနှံအမျိုးအစားဖြစ်ပြီး ယာကွန်ပင်ကို ကျန်းမာရေး အတွက်အသုံးပြုတဲ့နေရာမှာအရွက်ကိုအခြောက်ခံပြီး ရေနွေးကြမ်းထဲထည့်ပြီး သောက်သုံးတာ မျိုးရှိသလို အမြစ် (ယာကွန်ဥ)ကို အစိမ်းစားသလို ဖျော်သောက်တာ၊ မီးကင်စားတာနဲ့ သုတ်စား တာမျိုးရှိပြီး ယာကွန်ဥကကြွပ်ရွပြီးချိုပါတယ်။ ယာကွန်မှာ ကယ်လိုရီပါဝင်မှုနည်းပြီး ပရိုတင်း၊ အမျှင်ဓါတ်နဲ့ ဗီတာမင်အေ၊ ဘီဝမ်း၊ဘီတူးနဲ့ ဗီတာမင်စီလိုမျိုး ဗီတာမင်ဓါတ်တွေ ကြွယ်ဝစွာ ပါဝင်ပါတယ်၊ယာကွန်ဥမှာပါတဲ့အချိုဓါတ်ကဖရက်တိုအိုလီဂိုဆက်ရိုက်က သကြားဓါတ် တစ်မျိုး ဖြစ်ပြီး ဒီအချိုဓါတ်ကိုခန္ဓာကိုယ်ကမချေဖျက်နိုင်တာကြောင့် ယာကွန်ဥဟာ ဆီးချိုရောဂါသည် နှင့် ကိုယ်အလေးချိန်ချချင်သူများ စားသုံးဖို့သင့်တော်သော သီးနှံ တစ်မျိုး ဖြစ်ပါတယ်။
ရာသီပေါ်သီးနှံတစ်မျိုးဖြစ်တဲ့ ယာကွန်ဥ(ရေကန်စွန်းဥ)စားသုံးမှုတွေဟာ ၂၀၂၄ ခုနှစ် နောက်ပိုင်းမှာခေတ်စားလာပြီး ဝယ်ယူစားသုံးသူများလာတာကြောင့် ဈေးကောင်းရနေပါတယ်။ တစ်နှစ်မှာ (၂)လ သာရပြီး တစ်နိုင်ငံလုံး (၂)မြို့လောက်သာ အများအပြား ထွက်ရှိသောကြောင့် ဈေးနှုန်းကြီးမားသော်လည်း ခန္ဓာကိုယ်အလေးချိန်ကို လျှော့ချပေးနိုင်မှု၊ အသည်းအဆီဖုံးရောဂါ ကာကွယ်ပေးနိုင်မှု၊ ဆီးချိုရောဂါကို ထိန်းညှိပေးနိုင်မှုနဲ့ ကိုယ်ခံအားကောင်းစေမှု စတဲ့ အားသာ ချက်တွေကြောင့်ဈေးနှုန်းကြီးမြင့်သော်လည်းဝယ်ယူစားသုံးသူများလာသည့် အတွက် ရောင်းအား ကောင်းလျှက်ရှိကြောင်း၊ ရှမ်းပြည်နယ် ဟိုပုန်း ၊မိုးကုတ်မြို့တို့မှ ထွက်ရှိသော ယာကွန်ဥကို နေပြည်တော်၊ ရန်ကုန်နှင့် မန္တလေးမြို့များသို့ အဓိက ပို့ဆောင်နေပြီး ရန်ကုန်မြို့သည် အများဆုံး ဝယ်ယူသည့်နေရာဖြစ်သည်။လက်ရှိအချိန်ဈေးနှုန်းမှာလက္ကားဈေး တစ်ပိဿာ (၄)လုံး ဝန်းကျင်စီး ကျပ်၆၀၀၀/-၊ လတ်(၆-၇)လုံးဝန်းကျင်းစီးတစ်ပိဿာ ကျပ် ၃၀၀၀/-၊ လက်လီဈေး တစ်ပိဿာ ကျပ် ၈၀၀၀/ ၈၅၀၀/၉၀၀၀/- ဈေးရှိပြီး ၊ယာကွန်လက်ဖက်ခြောက် ယခုနှစ်ပေါ် အသစ်ခြောက် ၂၅ ကျပ်သား တစ်ထုပ် ကျပ် ၁၀၀၀၀/- ၅၀ ကျပ်သားတစ်ထုပ် ကျပ် ၁၇၀၀၀/- တစ်ပိဿာ ကျပ်၃၀၀၀၀/- ဖြင့် အရောင်းအဝယ်ဖြစ် လျက်ရှိကြောင်းသိရပါသည်။
DOCA(မန္တလေး)
သရက်မြို့နယ်၌ ဒေသတွင်းထွက်ရှိသော ကွမ်းရွက်များ ဈေးကွက်အတွင်း အရောင်းအဝယ်သွက်လျက်ရှိ
မကွေးတိုင်းဒေသကြီး၊ သရက်ခရိုင်၊ သရက်မြို့နယ်တွင် ကွမ်းစိုက်ပျိုးခြင်းကို မြင်ဘာခြံ ကျေးရွာ၊ ထုံးတောင်ကျေးရွာ၊ မီးသွေးဖုတ် ကျေးရွာ၊ မြင်ဘာခြံကျေးရွာ စသည့်ကျေးရွာများတွင် တနိုင်တပိုင်စိုက်ပျိုးလာကြကြောင်း၊ ကွမ်းကိုလည်းစားသုံးသူများပြားလာပါသဖြင့် အခြားဒေသမှ ဝင်ရောက်လာသော ကွမ်းရွက်များကို သုံးစွဲကျရာမှ ယခုအခါဒေသအတွင်း ထွက်ရှိသောကွမ်းနုဝါမှာ လူကြိုက်များပြီး သုံးစွဲမှုပိုမိုများပြားလာကြောင်း ဈေးကွက်အတွင်းတွင်လည်း အရောင်းသွက်လျက် ရှိကြောင်း သိရှိရပါသည်။
ကွမ်းရွက်ပင်သည် အေးမြ၍ စိုစွတ်သောရာသီဥတုကို ကြိုက်နှစ်သက်၍ အပူဒဏ်မခံနိုင်ပါ သဖြင့် မိုးအကုန်ဆောင်းအကူးတွင် ပျိုးပင်များကို အမိုးအကာပြုလုပ်၍ အပင်တစ်ပင်ချင်းစီတွင် ဝါးတိုင်တစ်တိုင်စီ ထောင်၍ စိုက်ပျိုးရသောနွယ်ပင်အမျိုးအစား ဖြစ်ပြီး သူ၏ သက်တမ်းမှာ သုံးနှစ် ဖြစ်ကြောင်း၊ စိုက်ပျိုးပြီး သုံးလအကြာတွင်စတင်၍ အရွက်များခူး၍ရကြောင်း ပျိုးပင်တစ်ပင်လျှင် ကျပ်(၆၀၀-၇၀၀)ရှိပြီး ပျိုးပင် အပင်(၂၀၀) စိုက်ပျိုးပါက သွင်းအားစုငွေကျပ်လေးသိန်းခန့် ကုန်ကျ ကြောင်း၊ စတင်ခူးဆွတ်သည့် အချိန်မှစ၍ ၁၄ရက်တစ်ကြိမ် ခူးဆွတ်ရပြီး စတင်ခူးဆွတ်သည့် အချိန်တွင်(၂)ပိဿာမှ (၄)ပိဿာအထိ ခူးဆွတ်ရရှိကြောင်း၊ တစ်နှစ်အတွင်း သွင်းအားစုငွေ ပြန် လည်ရရှိကြောင်း၊ ကျန်နှစ်များတွင် ရေလောင်းပေါင်းသင်ပေးခြင်းဖြင့် ရရှိသော ကုန်ပစ္စည်း၏ တန် ဖိုးသည် အကျိုးအမြတ်များသာဖြစ်ကြောင်း၊ ၂၀၂၅ခုနှစ်၊ နိုဝင်ဘာလ(ပထမပတ်)နှင့် (ဒုတိယပတ်) အတွင်းတွင် ကွမ်းရွက်အကြီး၊အသေးအလိုက် တစ်ပိဿာလျှင် ကျပ်(၉၀၀၀-၁၀၀၀၀) ဈေးနှုန်းဖြင့် တဆင့်ဈေးရောင်းချသူများအား ဖောက်သည်ပေး လျက်ရှိပြီး အရောင်းအဝယ်ဖြစ်လျက်ရှိကြောင်း၊ အခြား ဒေသမှဝင်ရောက်လာသောကွမ်းရွက်မှာ တစ်ပိဿာလျှင်ကျပ်၁၈၀၀၀-၂၀၀၀၀ဈေးနှုန်းရှိ၍ ဒေသတွင်း ထွက်ရှိသော ကွမ်းရွက်များမှာ သယ်ယူ စရိတ်သက်သာခြင်း အရည်အသွေးကောင်းမွန် ခြင်း၊ ဈေးနှုန်းသက်သာခြင်း တို့ကြောင့် သရက်မြို့မှ ထွက်ရှိသောကွမ်းများကိုသာ စားသုံးသူများပြား လျက်ရှိကြောင်း အခြားဒေသမှ ဝင်ရောက်လာသော ကွမ်းများကို သုံးစွဲမှုနည်းပါးလာကြောင်း ယခင်၂၀၂၄ခုနှစ်၊ နိုဝင်ဘာလတွင် ဖြစ်ပေါ်ခဲ့သော ဈေးနှုန်းနှင့် နှိုင်းယှဉ်ပါကသိသိသာသာ ပြောင်း လဲခြင်းမရှိသော်လည်း ယခုနှစ်ကွမ်းရွက် ဈေးနှုန်းမှာ သင့်တင့်မျှတလျက်ရှိပါကြောင်း ကွမ်းစိုက် တောင်သူများထံမှ သိရှိခဲ့ရပါသည်။
DOCA(မကွေး)
မင်းဘူးမြို့နယ်၊ ကြီးပင်ကန်ကျေးရွာ၌ ဧရာပဒေသာစပါးစိုက်ခင်းများအောင်မြင်ဖြစ်ထွန်းလျက်ရှိ
မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့နယ်၊ ကြီးပင်ကန်အုပ်စုရှိ ကြီးပင်ကန်ကျေး ရွာသည် စိုက်ပျိုးရေးကို အဓိကလုပ်ကိုင်ပြီး စပါး၊ ကုလားပဲ၊ နှမ်း၊ မြေပဲ စသည့် သီးနှံများကိုရာသီ အလိုက်စိုက်ပျိုးလျက်ရှိကြောင်း သိရသည်။
ကြီးပင်ကန်ကျေးရွာ၌ ၂၀၂၅ခုနှစ်၊ ဩဂုတ်လ(စတုတ္ထပတ်)မှ စတင်ပြီး ဧရာအဒေသာစပါး မျိုးကို တောင်သူ(၇၀)ဦးမှ စိုက်ဧက(၁၈၀)ခန့်စိုက်ပျိုးခဲ့ကြောင်း သိရသည်။ ၎င်းကျေးရွာနေ တောင်သူ(၁)ဦးက ၎င်းအနေဖြင့် ဧရာပဒေသာစပါးစိုက်ဧက(၃)ဧကခန့် စိုက်ပျိုးခဲ့ကြောင်း၊ ယခင်နှစ်ဧရာပဒေသာ စပါးစိုက်ခင်းမှ စိုက်ပျိုးထွက်ရှိသည့်စပါးစေ့များကို မျိုးအနေဖြင့် ဖယ်ချန်၍ စိုက်ပျိုးခြင်းဖြစ်ပြီး (၁)ဧကလျှင် မျိုး(၂)တင်းခွဲခန့်ကုန်ကြကြောင်း၊ စိုက်ပျိုးပြီးရက်ပေါင်း (၁၃၀)အကြာတွင်ရိတ်သိမ်းရ ကြောင်း၊ စိုက်ပျိုးကုန်ကျစရိတ်အနေဖြင့် မြေပြုပြင်ခ၊ လုပ်အားခနှင့် အခြားသွင်အားစုစရိတ်အပါအဝင် ယခင်နှစ်နည်းတူ ကျပ်(၁၅၀၀၀၀၀) ခန့်ကုန်ကျကြောင်း၊ အထွက်နှုန်းအနေဖြင့် ယခင်နှစ်(၁)ဧကလျှင် တင်း(၈၀)ထိ ထွက်ရှိပြီး (၁)တင်းလျှင် ကျပ်(၃၂၀၀၀)ခန့်ရရှိကာ အကျိုးအမြတ်အနေဖြင့် ကျပ် (၁၀၆၀၀၀၀)ခန့် ရရှိခဲ့ကြောင်း၊ ဈေးကွက်အနေဖြင့် မင်းဘူးမြို့ပေါ်ရှိ ပွဲရုံများသို့ ရောင်းချကြောင်း၊ ယခုအချိန်တွင် ကြီးပင်ကန်ကျေးရွာ၌ ဧရာပဒေသာစပါးစိုက်ခင်းများအောင်မြင်ဖြစ်ထွန်းလျက်ရှိ ကြောင်း သိရသည်။
DOCA(မကွေး)
ဂေါ်ရခါးသီး၏ကျန်းမာရေးအကျိုးပြုပုံနှင့်ဈေးနှုန်းဈေးကွက်
ဂေါ်ရခါးသီးကိုမြန်မာနိုင်ငံတွင် ဈေးနှုန်းသက်သက်သာသာဖြင့်ဝယ်ယူရရှိနိုင်ပြီး ကျန်းမာရေး နှင့်လည်းညီညွတ်သော အသီးအနှံတစ်မျိုးဖြစ်ပါသည်။ဂေါ်ရခါးသီးတွင် အစွမ်းထက်သော ဓာတ်တိုး ဆန့်ကျင်ပစ္စည်းများပါဝင်ပြီး ဆဲလ်များပျက်စီးမှုကိုကာကွယ်ပေးခြင်း၊ ရောင်ရမ်းခြင်း ကိုလျော့ချပေးပြီး ခန္ဓာကိုယ်အတွင်း ဓာတ်တိုးဖိစီးမှုကိုလျော့ချပေးသည့်အပြင်ကင်ဆာရောဂါ၊ ဆီးချိုရောဂါနှင့် ရောင်ရမ်း မှုကို ဟန့်တားပေးပါသည်။ ဂေါ်ရခါးသီးကိုစားသုံးပေးခြင်းဖြင့် သွေးတိုးခြင်း၊ ကိုလက်စထရောမြင့်မား ခြင်းနှင့် သွေးစီးဆင်းမှုအားနည်းခြင်းကြောင့် နှလုံးရောဂါ ဖြစ်နိုင်ခြေအကြောင်း အရင်းများစွာကိုတား ဆီးပေးသည့်အပြင် ဂေါ်ရခါးသီးတွင်ပါဝင်သော ဓာတ်ပေါင်းများက သွေးကြောများကိုပြေလျော့ စေကာ သွေးစီးဆင်းမှုကို ကောင်းမွန်စေပြီး သွေးပေါင်ချိန်ကို လျော့ကျစေနိုင်ပါသည်။ ဂေါ်ရခါးသီးတွင် ကာဗို ဟိုက်ဒရိတ်နည်းပါးပြီး ပျော်ဝင်နိုင်သော အမျှင်ဓာတ်မြင့်မားသောကြောင့် သွေးတွင်းသကြားဓာတ်ကို ထိန်းညှိပေးနိုင်ပါသည်။ ဖောလိတ်ဓာတ်ကြွယ်ဝစွာပါဝင်သောကြောင့် ကိုယ်ဝန်ဆောင်မိခင်များ စားသုံး ပေးခြင်းဖြင့်လမစေ့ဘဲ ကလေးမွေးဖွားခြင်းမှ တားဆီးပေးနိုင်ပါသည်။ ဂေါရခါးသီးကို သင့်တင့်မျှတစွာ စားသုံးပေးပါကထူးခြားသည့် ဘေးထွက်ဆိုးကျိုးများစွာမရှိသော်လည်း အလွန်အကျွံစားသုံးပေးပါက ဝမ်းပျက်ဝမ်းလျှောခြင်း၊ လေပွခြင်းနှင့် ရင်ပြည့်ရင်ကယ်ဖြစ်ခြင်းစသည့် အစာအိမ်နှင့်အူလမ်းကြောင်း ဆိုင်ရာပြဿာနာ များကိုဖြစ်စေနိုင်ပါသည်။ ထိုကဲ့သို့ ကျန်းမာရေးအတွက်များစွာ အကျိုးပြုနိုင်ပြီး ဘေးထွက်ဆိုးကျိုးနည်းသည့် ဂေါရခါးသီးကို မြင်းခြံမြို့၊ အေးမြသီတာဈေးတွင် နိုဝင်ဘာလတတိယ ပတ်ဂေါ်ရခါးသီးဈေးနှုန်းမှာ(၅)လုံး (၁၀၀၀) ကျပ်ဖြင့်အရောင်းအဝယ်ဖြစ်လျက် ရှိကြောင်းသိရှိရသည်။
DOCA(မန္တလေး)
မင်းဘူးမြို့၊ မြို့မဈေး၌ ထန်းပင်မြစ် စတင်ဝင်ရောက်အရောင်းအဝယ်ဖြစ်လျက်ရှိ
မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၊ မြို့မဈေး၌ ကျောက်တန်းကျေးရွာမှထွက်ရှိ ထန်းပင်မြစ်များ နိုဝင်ဘာလ(တတိယပတ်)မှ စတင်၍ ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။
၂၀၂၅ ခုနှစ်၊ နိုဝင်ဘာလ(တတိယပတ်)တွင် ထန်းပင်မြစ်အချောင်း(၂၀)ပါ (၁)စည်းလျှင် ကျပ်(၃၀၀၀)ဖြင့် အရောင်းအဝယ်ဖြစ်လျက်ရှိကြောင်း၊ ပေါ်ဦးပေါ်ဖျားဖြစ်သည့်အတွက် ဈေးကောင်းရလျက်ရှိသည့်အပြင် အရောင်း အဝယ် မှာလည်းသွက်လျက်ရှိကြောင်း သိရှိရပါသည်။
DOCA(မကွေး)
စားအုန်းဆီအခြေခံလက်ကား ရည်ညွှန်းဈေးနှုန်း တစ်ပိဿာ ငွေကျပ် ၆,၂၈၀ဖြစ်ကြောင်း ထုတ်ပြန်ကြေညာ
စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းသော စားသုံးဆီများကို သင့်တင့်သောဈေးနှုန်းဖြင့် ဝယ်ယူစားသုံးနိုင်စေရန်နှင့် ပြည်တွင်းလိုအပ် ချက်များကိုဖြည့်ဆည်းပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီက ဆောင်ရွက်ပေးလျက်ရှိ ကြောင်းသိရပါသည်။
ပြည်တွင်းလိုအပ်ချက်ကိုဖြည့်ဆည်းပေးနိုင်ရေးစားအုန်းဆီကို ပြည်ပမှဝယ်ယူတင်သွင်း ရာတွင် စားအုန်းဆီတင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေးကို ထိန်းကျောင်းဆောင်ရွက်လျက်ရှိသည်။
ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့် ဈေးနှုန်းဖြစ်ပေါ် မှုများအရ ၂၀၂၅ခုနှစ်၊ နိုဝင်ဘာလ ၂၈ ရက်နေ့မှ ဒီဇင်ဘာလ ၄ ရက်နေ့အထိ ရန်ကုန်အထိုင် ဈေးအခြေခံလက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ်၆,၂၈၀ ဖြစ်ကြောင်းစားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန်ကြေညာထားကြောင်း သိရှိရပါသည်။
ပြည်တွင်းဈေးကွက်အတွင်း အဆိုပါထုတ်ပြန်ကြေညာထားသည့် စျေးနှုန်းထက် ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းအပါအဝင် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ကြောင်းသိရှိရသည်။
စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊ Facebook Page နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်းသိရှိရပါသည်။
မင်းဘူးမြို့၊ မြို့မဈေး၌ အာလူးဈေးမြင့်တက်လျက်ရှိ
မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၊ မြို့မဈေး၌ အာလူးကို ကျောက်ပန်းတောင်းမြို့နှင့် ရှမ်းပြည်နယ်၊ အောင်ပန်းမြို့ တို့မှထွက်ရှိသော ရှမ်းအာလူးများသာဝင်ရောက် အရောင်းအဝယ် ဖြစ်လျက်ရှိကြောင်း သိရသည်။
၂၀၂၅ ခုနှစ်၊ နိုဝင်ဘာလ(ဒုတိယပတ်)တွင် အာလူး(၁)ပိဿာလျှင်(အလုံးအကြီးအသေးနှင့် အရည် အသွေးလိုက်၍) ကျပ်(၆၅၀၀-၇၀၀၀-၇၅၀၀)ဖြင့် အရောင်းအဝယ်ဖြစ်လျက်ရှိပြီး အောက်တိုဘာလ (ဒုတိယပတ်)တွင် အာလူး(၁)ပိဿာလျှင် ကျပ်(၆၀၀၀-၆၅၀၀-၇၀၀၀)ဖြင့် ရောင်းချခဲ့ရာ ဈေးနှုန်းနှိုင်း ယှဉ်ပါက အာလူး(၁)ပိဿာလျှင် ကျပ်(၅၀၀)ခန့် ဈေးတက်ပြီး အရောင်းအဝယ်ဖြစ်ကြောင်း၊ ယခုကာလ တွင် ဒေသတွင်းအာလူး ထွက်ရှိမှုမရှိသေးဘဲ ရှမ်းပြည်နယ်၊ အောင်ပန်းမြို့မှ မှာယူရောင်းချရပြီး လမ်း ပန်းဆက်သွယ်ရေး အခက်အခဲကြောင့် သယ်ယူစရိတ်မြင့်မားလာ၍ အာလူးဈေးနှုန်းမှာ အနည်းငယ် မြင့်တက်ရခြင်းဖြစ်ကြောင်း သိရှိရသည်။
DOCA(မကွေး)
ဆောင်းရာသီ၏ရာသီစာထန်းပင်မြစ်နှင့်ဆေးဖက်ဝင်
ထန်းပင်မြစ်သည် ဆောင်းရာသီနှင့် အင်မတန်လိုက်ဖက်လှပြီး အညာဒေသ၏ မပါမဖြစ် ရာသီစာ အစားအစာတစ်မျိုးဖြစ်သည်။ ထန်းပင်မြစ်ကို မီးဖုတ်ပြီး စားကြသလို ဆီ၊ဆားနှင့်လည်း တို့စားကြသည်။ ထန်းမြစ်ကို မီးဖုတ်စားရင်အနံ့ပိုပြီးမွှေးသောကြောင့် ထန်းမြစ်မီးဖုတ် နှင့် ရေနွေး ကြမ်းက တကယ်ကိုလိုက်ဖက်လှပါသည်။ ထန်းပင်မြစ်ကို ထန်းမြစ်ကြော်စားခြင်း၊ ထန်းမြစ်ပြုတ်စား ခြင်းစသည့်ဖြင့် အမျိုးမျိုးပြုလုပ်စားသုံးကြသည်။ ထန်းပင်မြစ်သည် သွေး ၊ လေ ၊သည်းခြေ ၊သလိပ်၊ အစာကြေညက်ခြင်းနှင့် ဝမ်းမီးတောက်စေနိုင်ပါသည်။ ထန်းပင်မြစ်သည် လူတို့၏ခန္ဓာကိုယ်အတွက် လိုအပ်သော ဗီတာမင်ဘီဓာတ်ပေါင်းစုအပြင် အဆီဓာတ်နှင့် ပရိုတိန်းဓာတ်များလည်းပါဝင်ပါသည်။ အမျှင်ဓာတ်ကြွယ်ဝစွာပါရှိသောကြောင့် အစာခြေစနစ်ကိုတိုးတက်ကောင်းမွန်စေပြီး ဝမ်းချုပ်ခြင်းမှ လည်းကာကွယ်ပေးနိုင်ခြင်း၊ ခန္ဓာကိုယ်တွင်း အပူဓာတ်ကိုလျှော့ချပေးနိုင်ခြင်း ၊ ကလေးငယ်များ ရေကျောက်ရောဂါကိုသက်သာစေနိုင်ခြင်း ၊ အဆီနှင့် ပရိုးတိန်းတို့ပါဝင်သောကြောင့် ခန္ဓာကိုယ်ပိန်လှီ သူများစားပေးခြင်းဖြင့် ကိုယ်အလေးချိန်တိုးတက်လာစေနိုင်ခြင်း၊အစာအိမ်နာရှိသူများအတွက်ကောင်း ကျိုးပြုစေနိုင်ခြင်း၊ အင်ဆူလင်ထွက်ရှိမှုကို လှုံဆော်ပေး၍ ဆီးချိုရောဂါများကိုသက်သာစေနိုင်ခြင်း၊ ကိုယ်ခံစွမ်းအားကို တိုးတက်ကောင်းမွန်စေနိုင်ခြင်း၊ အမျိုးသမီးများ သားအိမ်အတွက် အားဖြစ်စေနိုင် ခြင်း၊ ကိုယ်ဝန်ဆောင်များ ထန်းပင်မြစ်ကို စားပေးခြင်းဖြင့် မိခင်နှင့်သန္ဓေသား ကျန်းမာရေးအတွက် အကျိုးဖြစ်ထွန်းစေနိုင်ခြင်း၊ ထန်းပင်မြစ်သည် ဆောင်းရာသီတွင်သာ ပေါပေါများများရရှိနိုင်ပြီး ခန္ဓာကိုယ်တွင်း အပူဓာတ်ကိုလျှော့ချပေးနိုင်သည့် ရာသီစာဆေးဖက်ဝင်အစားအစာတစ်မျိုးဖြစ်သည်။ ဆောင်းရာသီရောက်သည့်အခါ ခန္ဓာကိုယ်တွင်း အပူဓာတ်များသူတွေမှာ လည်ချောင်းနာ ၊ ခံတွင်းနာ ၊ သွားဖုံးနာ၊ နှုတ်ခမ်းတွင်ရေယုန်ပေါက်ကာ အပူကန်တတ်ကြသည်။ ထိုသူများက ထန်းပင်မြစ်ကို ပို၍စားသုံးပေးသင့်ကြောင်း ဆေးပညာစာပေများမှလေ့လာသိရှိရပါသည်။
DOCA(မန္တလေး)
Pages
