ပြည်တွင်းကုန်သွယ်မှုသတင်း

    ဧရာဝတီတိုင်းဒေသကြီးအတွင်း ထွက်ရှိပြီး ပြည်တွင်း/ပြည်ပဈေးကွက်မှာ အရောင်းအဝယ် ဖြစ်နေသည့် တံမြက်စည်းပြုလုပ်ရာတွင် အသုံးပြုလျက်ရှိသော ကိုင်းဘောပင်များမှာ ရာသီချိန် သဘာဝအလျောက် အလေ့ကျပေါက်ရောက်လျက်ရှိပြီး ကိုင်းဘောထွက်ရှိချိန် ဇန်နဝါရီလ ပထမပတ်မှစတင်ကာ ဈေးကွက်အတွင်း အရောင်းအဝယ်ဖြစ်၍ မတ်လဒုတိယပတ် ရောက်လျှင် ကိုင်းဘောရာသီ ပြီးဆုံးသွားကြောင်း ဈေးကွက်မှသိရသည်၊၊

      ကိုင်းဘောအဓိကထွက်ရှိရာ ဒေသများမှာ တောင်စောင်း၊ တောင်ကုန်းများရှိသော ချောင်းသာ၊ ငွေဆောင်၊ မော်တင်စွန်းသွား ကားလမ်းဘေးဝန်းကျင်ရှိ သီဟိုဠ်ခြံ၊ ရာဘာခြံများ၊ မြေလွတ်၊ မြေရိုင်းများ ၊ ပင်လယ်ကမ်းခြေဒေသဝန်းကျင် ကျေးရွာများနှင့် ပင်လယ်နှင့်နီးကပ် လျက်ရှိသော ငပုတောမြို့နယ်အတွင်းရှိ ကျေးရွာများတွင်လည်း ထွက်ရှိပြီး ကိုင်းဘောရာသီ ရောက်လျှင် ကိုင်းဘောကုန်ကြမ်း ထွက်ရှိသော ဒေသများတွင် အဝယ်ဒိုင်များဖွင့်လှစ်ဝယ်ယူပြီး ပုသိမ်မြို့ပေါ် သာပေါင်းမြို့နှင့် ရန်ကုန်မြို့ပေါ်ရှိ နှစ်ပတ်လည်တံမြက်စည်း  ပြုလုပ်ရောင်းချ သည့်လုပ်ငန်းရှင်များမှ ဝယ်ယူသိုလှောင်၍ ပြည်တွင်းဈေးကွက်မှာ တံမြက်စည်းပြုလုပ် ရောင်းချလျက်ရှိကြောင်း ပုသိမ်မြို့နယ် မဒေါ့ကုန်း ကျေးရွာအုပ်စု မဒေါ့ကုန်းကျေးရွာရှိ ကိုင်းဘောအဝယ်ဒိုင်မှသိရသည်၊၊

     အဝယ်ဒိုင်မှဝယ်ယူထားသော ကိုင်းဘောများကို (၇) ရက်ခန့်လှမ်း၍ ကိုင်းဘော အချောင်းရေ (၁၀၀) စီး အစီးအရေ (၃၀) ကို ဒေသအခေါ်ကိုင်းဘောတစ်ဘောဟု ခေါ်ဆိုပြီး အနု၊ အလတ်၊ အရင့် အမျိုးအစား ၃ မျိုး ခွဲခြား၍ အနုနှင့်အလတ်များကို ရန်ကုန်မှ တစ်ဆင့် ပြည်ပဈေးကွက်တင်ပို့မှု ရှိသလို ကိုင်းဘောအရင့်များကို ပြည်တွင်းတံမြက်စည်းပြုလုပ်ရာတွင် အဓိကအသုံးပြုလျက်ရှိကြောင်း အဝယ်ဒိုင်မှ ဝယ်ယူရာတွင် ကိုင်းဘောအတို၊ အလတ်၊ အရှည် ပေါ်မူတည်၍ ဈေးနှုန်းကွာခြားမှုရှိပြီး ယခင်နှစ်ကိုင်းဘောတစ်ဘောဈေးနှုန်းမှာ ကျပ် ၁၅၀၀ဝ/ ၂၀၀၀၀ ဝန်းကျင် ဈေးအတွင်းသာရှိပြီး ယခုနှစ် ဈေးနှုန်းမှာ ကိုင်းဘောအတိုအရှည် ပေါ်မူတည်၍ ကျပ် ၂၅၀၀၀မှ ကျပ် ၃၅၀၀၀ ဈေးနှင့် အရောင်းအဝယ်ဖြစ်လျက်ရှိပြီး ယခင် နှစ်ထက် ကျပ် ၁၀၀၀၀ ဝန်းကျင် ဈေးပို၍ရရှိကြောင်း ကိုင်းဘောထွက်ရှိရာ ကျေးရွာရှိ ဒေသခံများမှာ ကိုင်းဘောခုတ်ယူရောင်းချခြင်းဖြင့် တစ်နေ့လျှင် ကျပ် ၅၀၀၀/၆၀၀၀မှ ၁၀၀၀၀ ဝန်းကျင် ဝင်ငွေရရှိကြောင်း အဝယ်ဒိုင်မှ သိရသည်၊၊

DOCA(ဧရာဝတီ)

    ဗားဂရာငှက်ပျောသီးအသင်းတွင် ဇန်နဝါရီလ နောက်ဆုံးပတ်အတွင်း ငှက်ပျောသီးဝင်ရောက်မှုစာရင်းနှင့် ဈေးနှုန်းများမှာ ရန်ကုန်တိုင်း၊ နေပြည်တော်၊ စစ်ကိုင်းတိုင်း၊ ဧရာဝတီတိုင်း၊ မန္တလေးတိုင်းနှင့် ပဲခူးအနောက်၊ တိုင်း(၆) တိုင်းများမှ အများဆုံးဝင်ရောက်ကြောင်း၊ ဧရာဝတီတိုင်းနှင့် ရန်ကုန်တိုင်းတို့၌ ငှက်ပျောဝင်ရောက်မှုပိုမိုဝင်ရောက်ကြောင်း၊ ဧရာဝတီတိုင်း၊ ပဲခူးအနောက်နှင့် ရန်ကုန်တိုင်းတို့မှ ရခိုင်ငှက်ပျောသီး၊ ဖီးကြမ်း၊ ရွှေငှက်ပျောသီး၊ သီးမွှေး၊ ငှက်ပျောချဉ်များဝင်ရောက်ကြောင်းသိရပါသည်။ ရန်ကုန်တိုင်းမှဝင်ရောက်သော ငှက်ပျောသီးဈေးနှုန်းများမှာ ရခိုင်တစ်ဖီးလျှင် (၅၀၀မှ ၁၅၀၀) ကျပ်၊ ဖီးကြမ်းတစ်ဖီးလျှင် (၈၀၀မှ ၂၅၀၀) ကျပ်၊ ရွှေငှက်ပျောသီးတစ်ဖီးလျှင် (၁၀၀၀မှ ၄၅၀၀) ကျပ်၊ သီးမွှေးတစ်ဖီးလျှင် ၇၀၀မှ ၃၅၀၀ကျပ်၊ ငှက်ပျောချဉ်မှာ ခိုင်ပြတ်ရောင်းဈေး (၃၀၀၀မှ ၁၀၀၀၀) ကျပ်ရှိပြီး ဧရာဝတီတိုင်းနှင့် ပဲခူးအနောက်မှ ငှက်ပျောသီးဈေးနှုန်းများမှာ ရန်ကုန်တိုင်းမှ ငှက်ပျောဈေးနှုန်းများအတိုင်းဖြစ်ကြောင်း သိရှိရပါသည်။ နေပြည်တော်မှဝင်ရောက်သော ဖီးကြမ်းငှက်ပျောတစ်ဖီးဈေးနှုန်းမှာ (၁၀၀၀မှ ၂၅၀၀) ကျပ်၊ စစ်ကိုင်းတိုင်းဒေသကြီး၊ ဘုတလင်နယ်မှထွက်သော ဖီးကြမ်းတစ်ဖီးမှာ (၁၅၀၀မှ ၃၅၀၀) ကျပ်၊ မန္တလေးတိုင်းမှ ဖီးကြမ်းတစ်ဖီးလျှင် ၁၅၀၀မှ ၃၅၀၀) ထိရှိကြောင်းသိရှိရပါသည်။ ယခုနှစ် ငှက်ပျောဝင်ရောက်မှုမှာ ပြီးခဲ့သည့်နှစ်များထက် အဝင်နည်းကြောင်း၊ သယ်ယူစရိတ်များခြင်း၊ ရာသီဥတုဖောက်ပြန်မှုများကြောင့် ဝင်ရောက်မှုနည်းကြောင်း ငှက်ပျောအသင်း၏ ပြောကြားချက်အရသိရှိရပါသည်။

DOCA(ရန်ကုန်)

     ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာန၏ကွပ်ကဲမှုအောက်ရှိ ဘုရင့်နောင်ကုန်စည်ဒိုင်သို့  နေ့စဉ် မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီ လက်ကျန် အခြေအနေများအား  အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှုစာရင်းများအရလည်းကောင်း၊ ကြက်သွန်နီလက်ကျန်အခြေအနေအား နေ့စဉ်စုံစမ်းလျက်ရှိပါသည်။ ဇန်နဝါရီလ (၂၃) ရက်နေ့မှ ဇန်နဝါရီလ (၂၉)ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီဝင်ရောက်ရာဒေသများဖြစ်သည့် ဆိပ်ဖြူ၊ မြင်းခြံ၊ မြစ်သား၊ မုံရွာ၊ တောင်တွင်းဒေသတို့မှ ကြက်သွန်နီ (၁၁၄၀၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့်ပြန်လည်စီးထွက်မှုရှိကြောင်းသိရှိရပါသည်။ ထို့ကြောင့် ကြက်သွန်နီလက်ကျန်မှာ (၄၅၆၀၀၀) ကျန်ရှိကြောင်း ကုန်စည်ဒိုင်သတင်းအရသိရှိရသည်။ မြင်းခြံကြက်သွန်နီ (အသစ်) အချောတစ်ပိဿာလျှင် ကျပ်၁၂၀၀၊ အသန့်တစ်ပိဿာလျှင် ကျပ်၁၇၀၀၊ အကြီးတစ်ပိဿာလျှင် ကျပ်၂၁၀၀၊ ရှယ်တစ်ပိဿာလျှင် ကျပ်၂၂၀၀၊ မြစ်သားကြက်သွန်နီ(အသစ်) အချောတစ်ပိဿာလျှင် ကျပ်၂၂၀၀၊ အသန့်တစ်ပိဿာလျှင် ကျပ်၂၇၀၀၊ အကြီးတစ်ပိဿာလျှင် ကျပ်၃၁၀၀၊ ရှယ်တစ်ပိဿာလျှင် ကျပ်၂၈၀၀၊  ဆိပ်ဖြူကြက်သွန်နီ (အသစ်) အချောတစ်ပိဿာလျှင် ကျပ်၁၃၀၀၊ အသန့်တစ်ပိဿာလျှင် ကျပ်၁၈၀၀၊ အကြီးတစ်ပိဿာလျှင် ကျပ်၂၁၀၀၊ ရှယ်တစ်ပိဿာလျှင် ကျပ်၂၁၀၀၊  မုံရွာကြက်သွန်နီ (အသစ်) အချောတစ်ပိဿာလျှင် ကျပ်၁၂၀၀၊ အသန့်တစ်ပိဿာလျှင် ကျပ်၁၇၀၀၊ အကြီးတစ်ပိဿာလျှင် ကျပ်၂၁၀၀၊ ရှယ်တစ်ပိဿာလျှင် ကျပ်(၂၂၀၀/၂၁၀၀)၊  တောင်တွင်းကြက်သွန်နီ (အသစ်) အချောတစ်ပိဿာလျှင် ကျပ်၁၂၀၀၊ အသန့်တစ်ပိဿာလျှင် ကျပ်၁၇၀၀၊ အကြီးတစ်ပိဿာလျှင် ကျပ်၂၁၀၀၊ ရှယ်တစ်ပိဿာလျှင် ကျပ်၂၂၀၀ စသည်ဖြင့် ဈေးနှုန်းအသီးသီးရှိကြောင်း စုံစမ်းသိရှိရပါသည်။

DOCA(ရန်ကုန်)

   ၆.၂.၂၀၂၄ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

     ၆.၂.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-