ပြည်တွင်းကုန်သွယ်မှုသတင်း

    ပဲခူးတိုင်းဒေသကြီး၊  တောင်ငူခရိုင်သည် ဆန်စပါး၊ ဆီထွက်သီးနှံ၊ ပဲမျိုးစုံနှင့် ကြံသီးနှံများစိုက်ပျိုးသော ခရိုင်ဖြစ်ပါသည်။ စစ်တောင်းမြစ်မှာ တောင်ငူခရိုင်ကို ဖြတ်သန်းစီးဆင်းသဖြင့် စပါးကောင်းမွန်စွာအောင်မြင်ဖြစ်ထွန်းပြီး အထွက်နှုန်းလည်းကောင်းမွန်ပါသည်။ ယခုနှစ်တွင် မိုးကောင်းမွန်စွာရွာသွန်းပြီး ရေကြီးရေလျှံမှုနည်းပါးသဖြင့် မိုးစပါးအထွက်တိုးခဲ့ပါသည်။

       တောင်ငူခရိုင်တွင် ယခုနှစ်၌ မိုးစပါး ၄၅၂၆၂၅ဧကစိုက်ပျိုးခဲ့ရာ စိုက်ဧကအားလုံးကို အောင်မြင်စွာရိတ်သိမ်းနိုင်ခဲ့ပါသည်။ ဆင်းသုခ၊ မနောသုခ၊ ဗျော့ထွန်း၊ ရတနာတိုး၊ နှံကောက်၊ ရက် ၉၀ စပါးများအများဆုံးစိုက်ပျိုးပြီး ဒေသပေါ်ဆန်းကိုလည်း အနည်းငယ်စိုက်ပျိုးကြပါသည်။

      လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာနမှရရှိသော စာရင်းဇယားများအရ ယခုနှစ်၌ တောင်ငူခရိုင်၏ မိုးစပါးအထွက်နှုန်းမှာ (၉၂.၀၈) တင်းဖြစ်ကြောင်းသိရသဖြင့် မိုးစပါးတင်းပေါင်း ၄၁၆သိန်းကျော်ထွက်ရှိပါသည်။

      တောင်ငူခရိုင်တွင် လူဦးရေ (၁၀.၅၆) သိန်းကျော်ရှိသဖြင့် ဝမ်းစာစပါးအတွက် တင်းပေါင်း ၁၅၇သိန်းခန့်သုံးစွဲရမည်ဖြစ်ပါသည်။ မျိုးစပါးနှင့်အလေအလွင့်အတွက် တင်းပေါင်း ၁၈သိန်းခန့်ရှိမည်ဖြစ်ရာ စပါးတင်း ၂၄၀သိန်းပိုလျှံမည်ဖြစ်သဖြင့် ယခုနှစ်စပါးပိုလျှံမှုမှုာ ၁၅၃ရာခိုင်နှုန်းခန့်ရှိမည်ဖြစ်ကြောင်းသိရှိရပါသည်။

DOCA(ပဲခူး)

     တောင်ငူမြို့၊ ကန်လမ်းရှိ 555 စီပီကြက်အစာနှင့် ကြက်ဥ၊ ဘဲဥအရောင်းဆိုင်တွင် ၂၀၂၄ခုနှစ်၊ ဇန်နဝါရီလ တတိယပတ်တွင် ကြက်ဥအသေးတစ်လုံးလျှင် ၂၆၀ကျပ်ဈေးနှုန်းရှိခဲ့ရာမှ ယခုဇန်နဝါရီလ စတုတ္ထပတ်တွင် ကြက်ဥအသေးတစ်လုံးလျှင် ၂၃၀ကျပ်၊ ကြက်ဥအကြီးတစ်လုံးလျှင် ယခင်ဇန်နဝါရီလ တတိယပတ်တွင် ၂၈၀ကျပ်ဈေးနှုန်းရှိခဲ့ရာမှ ယခုဇန်နဝါရီလ စတုတ္ထပတ်တွင် ကြက်ဥအကြီးတစ်လုံးလျှင် ၂၄၀ကျပ်မှ ၂၅၀ကျပ်ဖြင့် ဈေးနှုန်းအနည်းငယ်ကျဆင်းသွားခဲ့ပါသည်။

        ဘဲဥမှာ အသေးတစ်လုံးလျှင် ၃၀၀ကျပ်နှင့် အကြီးတစ်လုံးလျှင် ၃၃၀ကျပ်မှ ၃၅၀ကျပ်အထိဖြင့် ဈေးနှုန်းတည်ငြိမ်လျက်ရှိပါသည်။

      ကြက်ဥ၊ ဘဲဥမှာ အခြေခံလူတန်းစားများနှင့် အလုပ်များသော ရုံးဝန်ထမ်းများအတွက် အလွယ်တကူချက်ပြုတ်စားသောက်နိုင်သော စားသောက်ကုန်ဖြစ်သဖြင့် အရောင်းအဝယ်သွက်လျက်ရှိကြောင်း တောင်ငူမြို့ ၊ ကန်လမ်းရှိ 555 ကြက်ဥအရောင်းဆိုင်မှ အရောင်းဝန်ထမ်းတစ်ဦး၏ ပြောကြားချက်အရသိရှိခဲ့ရပါသည်။

DOCA(ပဲခူး)

      ပဲခူးတိုင်းဒေသကြီး၊ ပြည်ခရိုင်၊ ပန်းတောင်းမြို့နယ်၊ ကျွန်းမီးအုပ်စု၊ ဂျင်းရဲကျွန်းကျေးရွာတွင် ငှက်ပျောသီးများ စိုက်ပျိုးထားရှိသဖြင့် (၂.၂.၂၀၂၄) ရက်နေ့ ၊ နံနက်(၁၀:၀၀)နာရီအချိန်တွင် စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံနှင့် ဝန်ထမ်းများသည် သွားရောက် ကွင်းဆင်း လေ့လာခဲ့ပါသည်။

    ပန်းတောင်းမြို့နယ်၊ ကျွန်းမီးအုပ်စု၊ ဂျင်းရဲကျွန်းကျေးရွာတွင် ငှက်ပျောပင်စိုက်ပျိုးသော တောင်သူ ဦးသက်နိုင်ဦးမှ ငှက်ပျောပင်စိုက်ဧက (၁)ဧကခွဲ စိုက်ပျိုးထားပြီး စိုက်ပျိုးသည့်မျိုးမှာ ဖီးကြမ်း ငှက်ပျောသီးမျိုးဖြစ်ပါသည်။ ဖီးကြမ်းငှက်ပျောစိုက်ပျိုးရာတွင် တစ်ဧကုန်ကျစရိတ်များ အနေဖြင့် သမန်းကောင်းရသည်အထိ စက်ကြီးနှင့် ထွန်ယက်ကုန်ကျစရိတ် မှာ ၂၀၀၀၀၀ကျပ်၊ ငှက်ပျောပင် (၅၀၀)ပင် စိုက်ပျိုးရသဖြင့် အပင်ပေါက် တစ်ပင်လျှင် (၄၀၀)ကျပ် နှုန်းဖြင့် ၂၀၀၀၀၀ကျပ်၊ စိုက်ပျိုးခအနေဖြင့် ၁၀၀၀၀၀ကျပ်၊ မြေဩဇာဝယ်ယူခြင်းနှင့် မြေဩဇာ ကျွေးခမှာ ၇၀၀၀၀၀ကျပ် ဖြင့် စုစုပေါင်းကုန်ကျစရိတ်မှာ ၁၂၀၀၀၀၀ကျပ်ခန့် ကုန်ကျကြောင်း သိရပါသည်။ ငှက်ပျောသီးများ ထွက်ပေါ်ချိန်တွင် တစ်ပင်လျှင် ငှက်ပျောသီးအဖီး (၅)ဖီးနှင့် (၆)ဖီး ထွက်ရှိသည်ဟု သိရှိရပါသည်။ ငှက်ပျောပင်စတင်စိုက်ပျိုးပင်ကို အမေပင်ဟုခေါ်ပြီး သီးခိုင်ကို ခုတ်ယူ၍ အမေပင်ကို ခုတ်လိုက်ချိန်တွင် သားတက်တစ်ရုံလျှင် သားတက်(၂)ပင်ကိုသာ ထားရပါသည်။ သားပင်တစ်ပင် လျှင် ငှက်ပျောဖီး (၉)ဖီး နှင့် (၁၀)ဖီးခန့်ထွက်ရှိ၍ ရောင်းဈေးမှာ ငှက်ပျောခိုင် တစ်ခိုင်လျှင် ၇၀၀၀ကျပ်ခန့်ရရှိကြောင်း သိရပါသည်။ ငှက်ပျောပင် (၅၀၀)စိုက်ပျိုးလျှင် ငှက်ပျောခိုင် (၅၀၀)ခန့် ထွက်ရှိသဖြင့် ဝင်ငွေအနေဖြင် ၃၅၀၀၀၀၀ ခန့်ရရှိကြောင်း သိရပါသည်။ ဖီးကြမ်း ငှက်ပျောစိုက်ပျိုးသူ တောင်သူအနေဖြင့် ငှက်ပျောပင် (၅၀၀)တွင်  အသားတင်အမြတ်မှာ သိန်း (၂၀) ကျော်ရရှိကြောင်း သိရှိရပါသည်။

     ဖီးကြမ်းငှက်ပျောသီးမှာ လူကြိုက်များ၍ အသီးသီးလျှင်လည်း တန်ဖိုးမြင့်သဖြင့် တောင်သူများစီးပွားဖြစ်၍ စိုက်ပျိုးသင့်သောသီးနှံတစ်မျိုးဖြစ်ကြောင်း တင်ပြလိုက်ရပါသည်။

DOCA(ပဲခူး)

    ပြည်ခရိုင်၊ ရွှေတောင်မြို့နယ်၊ မီးလောင်အုပ်စု၊ မီးလောင်ကျေးရွာတွင် သကြားပြောင်းများကို စိုက်ပျိုးကြပါသည်။ သကြားပြောင်းများကို လူအများက သားရေစာအဖြစ်စားသုံးကြခြင်း၊ ဟင်းချက်၍လည်း စားသုံးကြခြင်းဖြင့် စားသုံးသူများကြိုက်နှစ်သက်သော ပြောင်းဖူးမျိုးဖြစ်သဖြင့် ပြောင်းဖူး စိုက်ပျိုးသူ တောင်သူများအနေဖြင့်ရောင်းကောင်းသော ပြောင်းဖူးမျိုးဖြစ်ပါသည်။ ပြောင်းဖူး စိုက်ပျိုး သူ တောင်သူများအနေဖြင့် အကျိုးအမြတ်များစွာရရှိကြသဖြင့် ပိုမိုစိုက်ပျိုးလာကြပါသည်။ ထွက်ရှိလာသောပြောင်းဖူးများကို တစ်ဆင့်ပြန်လည်ရောင်းချမည့်သူများက ပြောင်းခင်းသို့ဆင်း၍ ဝယ်ယူကြသလို ရွှေတောင်မြို့မှ ပြည်မြို့နှင့် ရန်ကုန်မြို့သို့ တင်ပို့ရောင်းချကြောင်း သိရှိရပါသည်။ ယခုအခါ ပြည်မြို့အတွင်းရှိ ဈေးကွက်များတွင် သကြားပြောင်း တစ်ဖူးလျှင် ၃၀၀-၄၀၀ကျပ်ဖြင့် အရောင်းအဝယ်ဖြစ်လျက်ရှိကြောင်း သိရပါသည်။

DOCA(ပဲခူး)

    ပြည်ခရိုင်၊ ပြည်မြို့တွင် နေဗီယာမြက်ကို စီးပွားဖြစ် တစ်နိုင်တစ်ပိုင်စိုက်ပျိုးလာကြကြောင်း သိရပါသည်။ အပင်ပုံစံမှာ ကြံပင်လိုလို ပြောင်းဖူးပင်လိုလို အပင်ကြီးမျိုးဖြစ်ပြီး စိုက်ပျိုးရ လွယ်ကူပါသည်။ တိရိစ္ဆာန်များကိုကျွေးလျှင် သာမန်မြက်ထက် ၂ဆ ၃ဆခန့် ကြီးထွားနှုန်းမြန် ၍ရိုးရိုးမြက်က ပရိုတင်းအသားဓါတ် ၅% ခန့်ပါဝင်ပြီး နေဗီယာမြက်၏ အသားဓါတ်မှာ ၁၁% မှ ၁၈% အထိ ပါဝင်ပါသည်။ Bio Gas ထုတ်လုပ်နိုင်ခြင်း လောင်စာထင်းမီးအဖြစ် အသုံးပြုပြီး လျှပ်စစ်မီး ထုတ်လုပ်နိုင်ခြင်း စသည့် ကောင်းကျိုးများစွာရှိသော မြက်အမျိုးအစားဖြစ်သည်။ တစ်ကြိမ် စိုက်ပျိုးလျှင် (၈)နှစ်အထိ အသုံးပြုလို့ရပြီး အကြမ်းခံခြင်း၊ ရေမပေးနိုင်ရင်တောင် အပင်မသေခြင်း၊ သက်တမ်းရှည် အသုံးပြုလို့ရပါသည်။ နေဗီယာမြက်ကို အခြောက်သိမ်းလို့လည်းရကာ မြက်ချဉ်ဖက် သိပ်ပြီး ကျွေးကြောင်းလည်း သိရပါသည်။ တိရိစ္ဆာန် အစာတောင့်ပြုလုပ်ရာတွင်လည်း ပါဝင်မှု ရာခိုင်နှုန်းများကြောင်း သိရှိရပါသည်။

     မွေးမြူရေးလုပ်ငန်းလုပ်ကိုင်သူများအတွက် အစာကုန်ကျစရိတ်သက်သာ၍ ဆင်၊ နွား၊ မြင်း၊ ကြက်၊ ဝက်၊ ဆိတ်၊ ယုန်၊ ပူး၊ ငါးတို့အထိ ကျွေးမွေးနိုင်ပြီး တိရိစ္ဆာန်များ ကျန်းမာရေးကောင်းမွန်စေ၍ လက်ရှိမြန်မာနိုင်ငံတွင် မွေးမြူရေးလုပ်ငန်းများအတွက် နေဗီယာမြက်မျိုးများ စိုက်ပျိုးလာကြပါသည်။ နေဗီယာမြက်မျိုး ၆လက်မ/၇လက်မ တစ်ဆစ်လျှင် ၂၀၀ကျပ်ဖြင့် အရောင်းအဝယ်ဖြစ်ကြောင်း သိရှိရပါသည်။

DOCA(ပဲခူး)