ပြည်တွင်းကုန်သွယ်မှုသတင်း

   မကွေးတိုင်းဒေသကြီးအစိုးရအဖွဲ့၏လမ်းညွှန်မှုဖြင့် တိုင်းဒေသကြီးစားသုံးသူရေးရာဦးစီးဌာနနှင့် မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းတို့ပူးပေါင်း၍ ဒေသခံ အခြေခံလူတန်းစားများကို တစ်ဖက်တစ်လမ်းမှ စားဝတ်နေရေးအထောက်အကူပြုစေရန်ရည်ရွယ်၍ စားသုံးသူရေးရာဦးစီးဌာန၊ စလင်းမြို့နယ်တာဝန်ခံ ဦးဆန်းလင်းမောင်(ဦးစီးမှူး)နှင့် အဖွဲ့သည် (၁-၂-၂၀၂၄) ရက်နေ့၊ နံနက်(၀၈:၀၀)နာရီအချိန်မှ နေ့လယ်(၁၅း၀၀)နာရီအချိန်ထိ စလင်းမြို့နယ်အတွင်းရှိ အုတ်ဖိုကန်ကျေးရွာ၊ တောစိမ့်ကျေးရွာ၊ အောင်ချမ်းသာကျေးရွာ၊ ကူထိုကျေးရွာနှင့် ဖိုဝန်းကျေးရွာ အစရှိသည့် ကျေးရွာ(၅)ရွာ၌ ဆင်ဖြူကျွန်းမြို့ဆီလုပ်ငန်းရှင်အရောင်းကိုယ်စားလှယ်ထံမှ မင်းဘူးခရိုင်အတွက် ခွဲတမ်းရရှိသော စားအုန်းဆီများကို (၁)ပိဿာလျှင် ကျပ်(၅၀၀၀)ဖြင့် အိမ်ထောင်စု (၅၅၀)စုကို စားအုန်းဆီပိဿာ(၅၅၀)ပိဿာရောင်းချပေးရာ၌ ပူးပေါင်းဆောင်ရွက်ခဲ့ကြပါသည်။

     အဆိုပါရောင်းချပေးနေမှုကို စလင်းမြို့နယ်၊ စီမံအုပ်ချုပ်ရေးဥက္ကဋ္ဌ ဦးနေလင်းနိုင်၊ စားသုံးသူရေးရာဦးစီးဌာနမှ ဦးဆန်းလင်းမောင်(ဦးစီးမှူး)၊ မြို့နယ်စည်ပင်သာယာရေးအဖွဲ့မှ ဦးနန်းဦးမောင် (ဒုတိယဦးစီးမှူး)နှင့် စားအုန်းဆီအရောင်းကိုယ်စားလှယ်များပူးပေါင်း၍ ကြပ်မတ်ဆောင်ရွက်ခဲ့ကြောင်းနှင့် နေ့စဉ်ဖြန့်ဖြူးရောင်းချပေးလျက်ရှိသော စားအုန်းဆီများကိုလည်း  သက်ဆိုင်ရာဌာနများ၏ သတ်မှတ်ထားသော ညွှန်ကြားချက်များနှင့်အညီ ဆက်လက်ရောင်းချပေးသွားမည်ဖြစ်ကြောင်း စလင်းမြို့နယ်ဆီကုန်သည်နှင့်ဆီလုပ်ငန်းရှင် ဦးမောင်မောင်လွင်ထံမှသိရှိရပါသည်။

DOCA(မကွေး)

    မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်သည် စိုက်ပျိုးရေးလုပ်ငန်း၊ စားသောက်ကုန်လုပ်ငန်း၊ ရေနံလုပ်ငန်း စသည့်စီးပွားရေးလုပ်ငန်းများလုပ်ကိုင်ကြလျက်ရှိကြောင်း သိရှိရပါသည်။

      အထက်မင်းလှမြို့နယ်၌ ပဲကြော်လုပ်ငန်းလုပ်ကိုင်ကြသည့် လုပ်ငန်းရှင်(၄)ဦးရှိပြီး ၎င်း (၄) ဦးအနက် မွှေးမွှေးအမှတ်တံဆိပ်ဖြင့် ထုတ်လုပ်ရောင်းချသည့် ပဲကြော်လုပ်ငန်းမှာလည်း တစ်ခုအပါအဝင်ပင်ဖြစ်ပါသည်။ မွှေးမွှေးအမှတ်တံဆိပ်ဖြင့် ပဲကြော်လုပ်ငန်းကို ၁၉၉၈ခုနှစ်ကတည်းက စတင်လုပ်ကိုင်ခဲ့သည့်လုပ်ငန်းဖြစ်သောကြောင့် နှစ်ပေါင်း(၂၆)နှစ်နီးပါးသက်တမ်းရှိပြီဖြစ်ကြောင်းသိရှိရပါသည်။ ပဲကြော်လုပ်ငန်း၏ အဓိကကုန်ကြမ်းဖြစ်သော ပဲကြီးကို မင်းလှမြို့ပေါ်ရှိ ပွဲရုံများမှဝယ်ယူပြီး တစ်နှစ်ပတ်လုံးစာအတွက် သိုလှောင်ထားကြောင်း၊ ဝယ်ယူရာ၌ ပဲကြီး တစ်တင်းလျှင် ကျပ်(၇၅၀၀၀-၈၅၀၀၀)ပေးရကြောင်း၊ ဝယ်ယူပြီးသောပဲကြီးများကို ပဲခွဲစက်ဖြင့်ကြိတ်ခွဲပြီး ရေစိမ်၍အခွံချွတ်၍ကြော်ရကြောင်း၊ ပုံမှန်(၅)ရက်လျှင် တစ်ကြိမ်ကြော်ရပြီး အရောင်းအဝယ်နည်းပါးသောအခါ (၇)ရက်လျှင် တစ်ကြိမ်ကြော်ရကြောင်း၊ ပဲကြီးကြော်ရာ၌ အချိန်(၃၀)ပါ ပဲကြီး(၈)အိတ်မှ (၁၀)အိတ်ထိကြော်ရကြောင်း၊ တစ်ခါကြော်လျှင် ဆီပိဿာ(၁၂၀)ပိဿာထိကုန်ကျကြောင်း၊ ကြော်ပြီးနောက် ပဲကြီးများကို (၂၅)ကျပ်သား(၁)ထုပ်လျှင် ကျပ်(၂၅၀၀)၊ (၁)ပိဿာ(၁)ထုပ်လျှင် ကျပ်(၉၅၀၀)ဖြင့်ထုပ်၍ရောင်းချကြောင်း၊ ဈေးနှုန်းအနေဖြင့် တစ်ပတ်အတွင်း အတက်အကျရှိနိုင်သော်လည်း တက်နိုင်သမျှ စားသုံးသူပြည်သူများအတွက် ဈေးနှုန်းသက်သာစွာရောင်းချပေးလျက်ရှိကြောင်း၊ လုပ်အားအနေဖြင့် ပဲကြီးကြော်သည့်ရက်တွင် အကြော်ဆရာ(၁)ဦးနှင့် ထုပ်ပိုးရန် အကူ(၃)ဦးကို တစ်နေ့လျှင် ကျပ်(၆၀၀၀) ဖြင့်ငှားရမ်းရကြောင်း၊ အလှူပွဲများ၊ မင်္ဂလာဆောင်ပွဲများရှိသောလများတွင် ပဲကြော်မှာ ပိုမိုရောင်းချရကြောင်း၊  ပဲကြော်သာမက၊ ပဲလှော်၊ နှစ်ပြန်ကြော်၊ ကုလားပဲခြမ်းကြော်များကိုလည်း ထုတ်လုပ်ရောင်းချလျက်ရှိကြောင်း၊ ဈေးကွက်အနေဖြင့် အထက်မင်းလှမြို့ပေါ်နှင့် ပတ်ဝန်းကျင် ကျေးရွာများ၌ အဓိကထားရောင်းချကြောင်း၊ လုပ်ငန်းအတွက်လိုအပ်သည့် ဆီကိုရရှိအောင် စားသုံးသူရေးရာဦးစီးဌာနအနေဖြင့် ဆောင်ရွက်ပေးပါသောကြောင့် အဆင်ပြေလျက်ရှိပါကြောင်း၊ အသေးစားစက်မှုလက်မှုလုပ်ငန်းဦးစီးဌာန၏ လုပ်ငန်းမှတ်ပုံတင်ခွင့်ပြုချက်လည်းရရှိထားပြီးဖြစ်ပါကြောင်း အထက်မင်းလှမြို့ရှိ မွှေးမွှေးအမှတ်တံဆိပ်ဖြင့် ထုတ်လုပ်ရောင်းချသည့် ပဲကြော်လုပ်ငန်းပိုင်ရှင် ဦးစိုးအောင်ထံမှပသိရှိရပါသည်။

DOCA(မကွေး)

     ရှမ်းပြည်နယ် (တောင်ပိုင်း)က ထွက်ရှိတဲ့ပြောင်းတွေကတော့ ဆက်တိုက် ဈေးကျဆင်းနေလို့ တောင်သူတွေ အရှုံးပေါ်နေတယ်လို့ ပြောင်းပွဲရုံတွေက သိရပါတယ်၊ ၂၀၂၃ ခုနှစ် အောက်တိုဘာလတုန်းကလည်း ပြောင်းဈေးကျဆင်းခဲ့ပြီး၊ လပိုင်းအတွင်း ဈေးအနည်းငယ်ပြန် တက်ခဲ့ပေမဲ့ အခု၂၀၂၄ ခုနှစ် ဇန်နဝါရီလအတွင်းမှာ ထပ်ပြီးဈေးကျသွား ခဲ့တာလို့လည်း ဆိုပါတယ်။ အရင်က ပြောင်းအဝယ်ဈေး  ၁၂၀ဝိ/- ၊ ၁၃၀ဝိ/-၊ကျပ်ကနေ အခု ၈၀ဝိ/- ဝန်းကျင်အထိ ကျဆင်း လာတာဖြစ်ပြီး ပွဲရုံတွေက  ၁၀၀ဝိ/- ဝန်းကျင်နဲ့ ပြန်ရောင်းနေတယ်လို့သိရပါတယ်၊ လတ်တလောအခြေအနေတွေကြောင့် အဓိကဝယ်ယူနေတဲ့  ထိုင်းနဲ့ တရုတ်ကို တင်ပို့ဖို့ခက်နေပြီး၊ နိုင်ငံရဲ့ ကုန်သွယ်ရေးမူဝါဒ အပြောင်းအလဲတွေကြောင့်လည်း ပြောင်းဈေးကကျလာ တာဖြစ် တယ်လို့လည်း သိရပါတယ်၊ရှမ်းပြည်နယ်တောင်ပိုင်းရှိ ပြောင်းစိုက်တောင်သူတွေများမှာ၊ ကုမ္ပဏီဘက်က မျိုးစေ့များထုတ်ပေးတာမျိုးရှိပေမဲ့ မြေဩဇာ၊ ပိုးသတ်ဆေးကိုတော့ ထုတ်ပေးခြင်း မရှိသလို စိုက်ပျိုးရေးချေးငွေတွေလည်းမရှိတော့လို့ အခက်အခဲဖြစ်နေရတယ်လို့လည်း သိရပါတယ်။

    အရင်နှစ်တွေက ပြောင်းဈေးကျပေမဲ့ နေ့စားလုပ်အားခတွေဟာ တစ်ရက်ကို ၄၀၀ဝိ/- ၅၀၀ဝိ/- ပဲ၊ပေးရတာကြောင့် တောင်သူတွေအတွက် စရိတ်ကာမိခဲ့ပေမဲ့ ၊ ဒီနှစ်အတွင်းမှာ ကုန်ဈေး နှုန်းတက်လာတာနဲ့အတူ လုပ်သားခကလည်း တစ်ရက်ကို ၁၀၀ဝိ/-မှ ၂၀၀၀ဝိ/- ထိ ပေးနေရတာ ကြောင့် ပိုပြီးအရှုံးပေါ်နေတယ်လို့လည်း သိရပါတယ်။ ‌

     ပြောင်းကို ရှမ်းပြည်နယ် (တောင်ပိုင်း)က၊ ပင်လောင်း၊ ဆီဆိုင်၊ညောင်ရွှေ၊ကလော စတဲ့မြို့နယ်တွေမှာ စိုက်ပျိုးကြပြီး၊ တနိုင်ငံလုံးရဲ့ စိုက်ပျိုးမှု ၄၉ ရာခိုင်နှုန်းခန့်ဟာ ရှမ်းပြည်နယ် အတွင်းက ဖြစ်တယ်လို့လည်း စိုက်ပျိုးရေးသတင်းရင်းမြစ်ကသိရပါတယ်၊ ၂၀၂၃-၂၀၂၄ ခုနှစ် အတွင်း မြန်မာနိုင်ငံအတွင်းမှ ပြောင်းတန်ချိန် တစ်သိန်းခန့်ကို ပြည်ပသို့တင်ပို့နိုင်ခဲ့ပြီး၊ ၆၀ ရာခိုင်နှုန်းက ထိုင်းနိုင်ငံကို တင်ပို့တယ်လို့ ပြောင်းလုပ်ငန်းရှင်အသင်းကထုတ်ပြန်ထားကြောင်း သိရှိရပါတယ်။

DOCA(ရှမ်း)

  ၇.၂.၂၀၂၄ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

    ၇.၂.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-