ပြည်ပကုန်သွယ်မှုသတင်းများ

          အိန္ဒိယနိုင်ငံသည် ပြည်တွင်း၌ သကြားဖူလုံမှု ပိုမိုကောင်းမွန်စေရန်နှင့် ဈေးနှုန်းများကို ထိန်းချုပ်နိုင်ရန်အတွက် ယခုနှစ် စက်တင်ဘာ ၃၀ ရက်အထိ သကြားတင်ပို့မှုကို ချက်ချင်းအာဏာသက်ရောက်သည့် အမိန့်ဖြင့် ပိတ်ပင်လိုက်ကြောင်း သိရပါသည်။

          သို့သော်လည်း အဆိုပါအမိန့်သည် CXL နှင့် အကောက်ခွန်နှုန်းထားခွဲတမ်း (TRQ) အစီအစဉ်များအောက်တွင် ဥရောပသမဂ္ဂ (EU) နှင့် အမေရိကန်ပြည်ထောင်စုတို့ထံ အသီးသီး တင်ပို့နေသည့် သကြားများနှင့် သက်ဆိုင်ခြင်းမရှိကြောင်း သိရပါသည်။ အဆိုပါအစီအစဉ် များအရ တင်ပို့သူများသည် သတ်မှတ်ထားသော သကြားပမာဏကို အကောက်ခွန် လုံးဝမပေးရဘဲ သို့မဟုတ် သိသိသာသာ လျှော့ချထားသည့် နှုန်းထားများဖြင့် အဆိုပါနိုင်ငံများသို့ တင်ပို့ခွင့် ရရှိကြကြောင်း သိရပါသည်။

        နိုင်ငံခြားကုန်သွယ်မှုဆိုင်ရာ ညွှန်ကြားမှုဦးစီးဌာန (DGFT) ၏ အမိန့်သည် ကြိုတင်ခွင့်ပြုချက်စနစ်အရ တင်ပို့မှုများ၊ အစိုးရချင်း ချိတ်ဆက်တင်ပို့မှုများ (Government-to-Government)နှင့် ကုန်ပစ္စည်းတင်ပို့ရန် လုပ်ငန်းစဉ်အတွင်း ရောက်ရှိနေနှင့်ပြီးသား ကုန်စည်စုများနှင့်လည်း သက်ဆိုင်ခြင်းမရှိကြောင်း သိရပါသည်။

         ၂၀၂၅-၂၀၂၆ သကြားစျေးကွက်နှစ် (အောက်တိုဘာလမှ စက်တင်ဘာလ) အတွက် စားနပ်ရိက္ခာဝန်ကြီးဌာနသည် အစပိုင်းတွင် တန်ချိန် ၁၅ သိန်းတန်ခန့်တင်ပို့ခွင့်ပြုခဲ့ပြီးနောက် ထပ်တိုးတန်ချိန် ၅ သိန်းတန်ခန့်ထပ်မံခွင့်ပြုခဲ့ရာ ၎င်းအနက် တန်ချိန် ၈၇,၅၈၇ တန်ခန့်ကိုသာ အတည်ပြုခဲ့ကြောင်း သိရပါသည်။ ထို့ကြောင့် သကြားတင်ပို့ခွင့် စုစုပေါင်း တန်ချိန် ၁၆ သိန်းနီးပါး ခွင့်ပြုခဲ့ပြီးဖြစ်ကြောင်း သိရပါသည်။

          စားနပ်ရိက္ခာဝန်ကြီးဌာနနှင့် သကြားစက်ရုံများသည် ၂၀၂၅-၂၀၂၆ စျေးကွက်နှစ်တစ်ခုလုံးတွင် ကုန်စည်ပို့ဆောင်မှု တန်ချိန် ၇.၅ သိန်းမှ ၈ သိန်းကြား ရှိလိမ့်မည်ဟု မျှော်မှန်းထားခဲ့ကြကြောင်း ထုတ်ပြန်ခဲ့ပါသည်။ လုပ်ငန်းအဖွဲ့အစည်းတစ်ခုဖြစ်သည့် ISMA ၏ အဆိုအရ မဟာရဋ္ဌ (Maharashtra) နှင့် ကာနာတာကာ (Karnataka) ပြည်နယ်များတွင် အထွက်နှုန်း ပိုမိုကောင်းမွန်လာမှုကြောင့် ၂၀၂၅-၂၆ စျေးကွက်ရာသီ ဧပြီလအထိ အိန္ဒိယ၏ သကြားထုတ်လုပ်မှုသည် ၇.၃၂ ရာခိုင်နှုန်း မြင့်တက်ခဲ့ပြီး တန်ချိန် ၂၇.၅၂ သန်းတန်အထိရှိခဲ့ကြောင်း သိရပါသည်။

          ISMA ၏ ခန့်မှန်းချက်အရ အီသနော (Ethanol) ထုတ်လုပ်ရန် လွှဲပြောင်းအသုံးပြုမှုများအပြီးတွင် ၂၀၂၅-၂၀၂၆ စျေးကွက်ရာသီအတွက် စုစုပေါင်းသကြားထုတ်လုပ်မှုသည် တန်ချိန် ၂၉.၃ သန်းတန်အထိ ရှိလာမည်ဖြစ်ပြီး ၎င်းသည် ၂၀၂၄-၂၅ တွင် မှတ်တမ်းတင်ခဲ့သည့် တန်ချိန် ၂၆.၁၂ သန်းထက် ပိုမိုမြင့်တက်လာခြင်းဖြစ်ကြောင်း သိရပါသည်။

       အရှေ့အလယ်ပိုင်းပဋိပက္ခကြောင့် ဖြစ်ပေါ်လာရသည့် မရေရာမှုများနှင့် ငွေကြေးဖောင်းပွမှုဆိုင်ရာ စိုးရိမ်ပူပန်မှုများကြားတွင် ကုန်စည်တစ်ခုကို တင်ပို့မှု ပိတ်ပင်လိုက်ခြင်းက ဈေးနှုန်းများ မြင့်တက်မလာစေရန် တားဆီးရာတွင် အထောက်အကူ ဖြစ်စေသည်။ ၂၀၂၂ ခုနှစ် အောက်တိုဘာလတွင် အိန္ဒိယနိုင်ငံသည် သကြားတင်ပို့မှုအပေါ် ကန့်သတ်ချက်များ စတင်ချမှတ်ခဲ့ပြီးနောက် ၎င်းကို အခါအားလျော်စွာ သက်တမ်းတိုးမြှင့်ခဲ့သည်။ ကမ္ဘာ့ဒုတိယ အကြီးဆုံး သကြားထုတ်လုပ်သည့် နိုင်ငံဖြစ်သော အိန္ဒိယသည် သကြားစက်ရုံများအကြား အချိုးကျ ခွဲတမ်းချပေးသည့် စနစ်ဖြင့် သကြားတင်ပို့မှုကို အစိုးရ၏ ထိန်းချုပ်မှုအောက်တွင် ထားရှိထားခြင်းဖြစ်ကြောင်း သိရပါသည်။

Source: hindu times                                                                  

DOCA (ရန်ကုန်)

         မလေးရှားနိုင်ငံ၏ သဘာဝရာဘာထုတ်လုပ်မှုသည် ၂၀၂၆ ခုနှစ်၊ ပထမသုံးလပတ်အတွင်း သိသိသာသာ လျော့ကျခဲ့ပြီး ယခင်နှစ်ကာလတူနှင့် နှိုင်းယှဉ်ပါက ၂၅.၃ ရာခိုင်နှုန်း ကျဆင်းကာ ထုတ်လုပ်မှုတန်ချိန် ၇၁,၀၁၃ တန်သာရှိခဲ့ကြောင်း မေလ ၁၃ ရက်နေ့က ထုတ်ပြန်သည့် တရားဝင် ကိန်းဂဏန်းများအရ သိရသည်။

        မလေးရှားနိုင်ငံ စာရင်းအင်းဌာန၏ ထုတ်ပြန်ချက်တွင် ယခုထုတ်လုပ်မှု ပမာဏသည် ၂၀၂၅ ခုနှစ်၊ စတုတ္ထသုံးလပတ်နှင့် နှိုင်းယှဉ်လျှင်လည်း ၁၀.၄ ရာခိုင်နှုန်း လျော့နည်းသွားခြင်းဖြစ်ကြောင်း ဖော်ပြထားသည်။ လအလိုက် ထုတ်လုပ်မှုအခြေအနေအရ မတ်လအတွင်း ရာဘာတန်ချိန် ၂၁,၃၁၀ တန် ထုတ်လုပ်နိုင်ခဲ့သဖြင့် ဖေဖော်ဝါရီလထက် ၈.၂ ရာခိုင်နှုန်း ကျဆင်းခဲ့ပြီး၊ ယခင်နှစ် မတ်လနှင့် နှိုင်းယှဉ်ပါက ၂၉.၃ ရာခိုင်နှုန်းအထိ ထိုးဆင်းသွားခဲ့ခြင်းဖြစ်သည်။ မလေးရှားနိုင်ငံ၏ သဘာဝရာဘာ ပြည်ပတင်ပို့မှုမှာ မတ်လအတွင်း တန်ချိန် ၃၃,၁၃၇ တန် ရှိခဲ့ပြီး ယခင်လထက် ၂.၂ ရာခိုင်နှုန်း အနည်းငယ် လျော့ကျခဲ့ကြောင်း သိရသည်။

        မတ်လအတွင်း မလေးရှားရာဘာကို အများဆုံး တင်ပို့ခဲ့သည့်နိုင်ငံမှာ တရုတ်နိုင်ငံဖြစ်ပြီး စုစုပေါင်း တင်ပို့မှု၏ ၄၄ ရာခိုင်နှုန်းရှိကြောင်း သိရသည်။ ဂျာမနီနိုင်ငံသည် ၁၈.၁ ရာခိုင်နှုန်းဖြင့် ဒုတိယအများဆုံးဖြစ်ပြီး၊ ၎င်းတို့၏နောက်တွင် ပေါ်တူဂီ (၄.၆ ရာခိုင်နှုန်း)၊ အမေရိကန် ပြည်ထောင်စု (၄.၄ ရာခိုင်နှုန်း) နှင့် ဘရာဇီးနိုင်ငံ (၃.၉ ရာခိုင်နှုန်း) တို့ အသီးသီး တည်ရှိနေကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

         တရုတ်နိုင်ငံ၏ စက်ရုံများသည် Artificial Intelligence (AI) နှင့် ဆက်စပ်သည့် လုပ်ငန်းများမှ အော်ဒါအမြောက်အမြားကို ဖြည့်ဆည်းရန် ထုတ်လုပ်မှုများ တိုးမြှင့်ခဲ့ခြင်းကြောင့် ဧပြီလအတွင်း ပို့ကုန်တင်ပို့မှု သိသိသာသာ မြင့်တက်ခဲ့သည်။ ထို့ပြင် အီရန်နှင့် ဖြစ်ပွားနိုင်ခြေရှိသော စစ်ပွဲကြောင့် ကမ္ဘာ့ကုန်ကြမ်းစရိတ်များ မြင့်တက်လာမည်ကို စိုးရိမ်သဖြင့် ကုန်ပစ္စည်းများ ကြိုတင်စုဆောင်းထားကြခြင်းကလည်း ပို့ကုန်တိုးတက်မှုကို အားပေးခဲ့ကြောင်း သိရသည်။

          ပို့ကုန်တိုးတက်မှုမှာ ဧပြီလတွင် ပို့ကုန်ပမာဏ အမေရိကန်ဒေါ်လာ ၃၅၉.၄ ဘီလီယံ ရှိခဲ့ပြီး ယခင်နှစ်ကာလတူထက် ၁၄.၁ ရာခိုင်နှုန်း မြင့်တက်ခဲ့သည်။ ၎င်းမှာ စီးပွားရေးပညာရှင်များ ခန့်မှန်းထားသည့် ၇.၉ ရာခိုင်နှုန်းထက် များစွာသာလွန်နေသည်။ သွင်းကုန်မှာလည်း ၂၅.၃ ရာခိုင်နှုန်း မြင့်တက်ကာ ဒေါ်လာ ၂၇၄.၆ ဘီလီယံ အထိ ရှိခဲ့သည်။ ကုန်သွယ်ရေးပိုငွေမှာ ဧပြီလတွင် ဒေါ်လာ ၈၄.၈ ဘီလီယံ အထိ ရှိခဲ့ပြီး မတ်လတွင် ၅၁.၁၃ ဘီလီယံသာ ရှိခဲ့သည်။ အမေရိကန်နှင့် ကုန်သွယ်မှုမှာ ယခုနှစ်အတွင်း ကုန်သွယ်မှုပိုငွေမှာ ဒေါ်လာ ၈၇.၇ ဘီလီယံ အထိ ရှိနေသည်။

        မေလ ၁၄-၁၅ ရက်တွင် အမေရိကန်သမ္မတ ဒေါ်နယ်ထရမ့်သည် ဘေဂျင်းသို့ သွားရောက်ကာ သမ္မတရှီကျင့်ဖျင်နှင့် တွေ့ဆုံမည်ဖြစ်သည်။ အဆိုပါခရီးစဉ်အတွင်း မြင့်တက်နေသော ကုန်သွယ်ရေးပိုငွေကိစ္စမှာ အဓိကအချက်ဖြစ်လာနိုင်ပြီး တင်းမာနေသော နှစ်နိုင်ငံ ဆက်ဆံရေး၊ ထိုင်ဝမ်အရေးနှင့် အီရန်ပဋိပက္ခများကို ဆွေးနွေးကြမည်ဖြစ်သည်။ တရုတ်ပို့ကုန် လုပ်ငန်းရှင်များသည် အရှေ့အလယ်ပိုင်း ပဋိပက္ခဒဏ်ကို ကြံ့ကြံ့ခံနိုင်နေသော်လည်း စီးပွားရေးပညာရှင်များက သတိပေးချက်များကို ထုတ်ပြန်ထားသည်။ သတိပေးချက်များမှာ စစ်ပွဲရှည်ကြာပြီး လောင်စာဆီဈေး မြင့်တက်လာပါက ပို့ကုန်ဈေးကွက် ဝယ်လိုအားကျဆင်းနိုင်ခြင်း၊ လောင်စာဆီ၊ ရေနံ၊ ကျောက်မီးသွေးနှင့် ဓာတုပစ္စည်းများ၏ သွင်းအားစုစရိတ်များ မြင့်မားနေဆဲဖြစ်ခြင်း၊  လက်လီရောင်းအား (စားသုံးမှု) မှာ စက်မှုကုန်ထုတ်လုပ်မှု၏ နောက်တွင်သာ ရှိနေသေးပြီး အလုပ်လက်မဲ့နှုန်း အနည်းငယ်မြင့်တက်လာခြင်းတို့ဖြစ်ကြောင်း သိရှိရပါသည်။

Source : Vn Economy                                                                         

DOCA (ရန်ကုန်)

         အမေရိကန်နိုင်ငံဆိုင်ရာဗီယက်နမ်သံရုံးသည် အမေရိကန်စီးပွားရေးဦးစီးဌာန၊ SelectUSA programme တို့နှင့် ပူးပေါင်းကာ “Connect with Vietnam/SelectUSA 2026” အခမ်းအနားကို မေလ ၄ ရက် ညပိုင်းတွင် ဝါရှင်တန်ဒီစီ၌ ကျင်းပခဲ့ရာ အစိုးရဌာနများ၊ ရင်းနှီးမြှုပ်နှံမှု မြှင့်တင်ရေးအဖွဲ့အစည်းများနှင့် နှစ်နိုင်ငံ စီးပွားရေးအသိုင်းအဝိုင်းမှ ကိုယ်စားလှယ် ၁၄၀ နီးပါး တက်ရောက်ခဲ့ကြောင်း သိရပါသည်။ အခမ်းအနားတွင် မိန့်ခွန်းပြောကြားရာ၌ Nguyen Quoc Dung က SelectUSA သည် နိုင်ငံတကာရင်းနှီးမြှုပ်နှံသူများအတွက် အမေရိကန်၏ စီးပွားရေး ဝန်းကျင်ကို လေ့လာဝင်ရောက်နိုင်စေသည့် အရေးပါသော ပလက်ဖောင်းတစ်ခုဖြစ်ကြောင်း၊ ထို့ပြင် Vietnam နှင့် United States တို့အကြား ဘက်စုံ မဟာဗျူဟာမိတ်ဖက်ဆက်ဆံရေး ပိုမို နက်ရှိုင်းလာနေသည့်အချိန်တွင် နှစ်နိုင်ငံစီးပွားရေးလုပ်ငန်းများအကြား ချိတ်ဆက်ပူးပေါင်းမှုကို လည်း တိုးမြှင့်ပေးနေကြောင်း အလေးပေးပြောကြားခဲ့ပါသည်။ ဝါရှင်တန်ဒီစီ၌ ယခုနှစ်ကျင်းပသည့် SelectUSA ရင်းနှီးမြှုပ်နှံမှုဖိုရမ်တွင် ဗီယက်နမ်ကိုယ်စားလှယ်အဖွဲ့ ပါဝင်တက်ရောက်ခဲ့ပြီး ထုတ်လုပ်ရေး၊ ကုန်သွယ်ရေး၊ ထောက်ပံ့ပို့ဆောင်ရေးနှင့် နည်းပညာကဏ္ဍများမှ ကုမ္ပဏီများက အမေရိကန်ဈေးကွက်အတွင်း ရင်းနှီးမြှုပ်နှံမှုတိုးချဲ့ရန်၊ လုပ်ငန်းတည်ထောင်ရန်နှင့် ကမ္ဘာလုံးဆိုင်ရာ တန်ဖိုးကွင်းဆက်များနှင့် ပိုမိုချိတ်ဆက်နိုင်ရန် စိတ်ဝင်စားမှုမြင့်မားကြောင်း ပြသခဲ့ကြသည်ဟု သိရပါသည်။ အဆိုပါပွဲသည် အမေရိကန်ကုမ္ပဏီများ၊ စီးပွားရေးအသင်းအဖွဲ့များနှင့် ပြည်နယ်အဆင့် ရင်းနှီးမြှုပ်နှံမှုမြှင့်တင်ရေးအဖွဲ့များ၏ အာရုံစိုက်မှုကို ရရှိခဲ့ကြောင်း သိရပါသည်။ အထူးသဖြင့် ဝါရှင်တန်ဒီစီတွင် နိုင်ငံအများအပြားနှင့် အမေရိကန်ပြည်နယ်များက တစ်ပြိုင်နက် ရင်းနှီးမြှုပ်နှံမှုမြှင့်တင်ရေးလှုပ်ရှားမှုများ ပြုလုပ်နေသော်လည်း အမေရိကန်ဘက်မှ တက်ရောက် မှုများပြားခဲ့ခြင်းက ဒေသတွင်းစီးပွားရေးလုပ်ငန်းများအကြား ဗီယက်နမ်အပေါ် စိတ်ဝင်စားမှု မြင့်တက်လာသည်ကို အလေးပေးပြသနေကြောင်း သိရပါသည်။ တက်ရောက်သူများ၏ ကနဦး တုံ့ပြန်ချက်များအရ အခမ်းအနား၏ အရည်အသွေး၊ ဆွေးနွေးချက်များ၏ သက်ဆိုင်မှုနှင့် လက်တွေ့အသုံးဝင်မှုတို့ကို ချီးကျူးပြောဆိုခဲ့ကြပြီး အတွေ့အကြုံရှိသော ဟောပြောသူများက လည်း ဗီယက်နမ်လုပ်ငန်းရှင်များ၏ စိတ်ဝင်စားမှုနှင့် ကိုက်ညီသည့် အမြင်များကို မျှဝေခဲ့ကြောင်း သိရပါသည်။ အဆိုပါအခမ်းအနားသည် နှစ်နိုင်ငံစီးပွားရေးနှင့် ရင်းနှီးမြှုပ်နှံမှု ပူးပေါင်းဆောင်ရွက် မှုမြှင့်တင်ရာတွင် ဗီယက်နမ်သံရုံး၏ အရေးပါသော ပေါင်းကူးတံတားအဖြစ် ဆက်လက်ပါဝင်နေမှုကို ထပ်မံအတည်ပြုခဲ့ပြီး ဗီယက်နမ်စီးပွားရေးလုပ်ငန်းများ နိုင်ငံတကာဈေးကွက်သို့ တိုးချဲ့ဝင်ရောက်နိုင်ရန်လည်း ပံ့ပိုးပေးလျက်ရှိကြောင်း သိရပါသည်။ TVD Capital Partners ၏ တည်ထောင်သူနှင့် မန်နေဂျင်းပါတနာ Tuyen Do က ယခုအခမ်းအနားသည် ဗီယက်နမ်လုပ်ငန်းများအတွက် လုပ်ငန်းအရွယ်အစားတိုးချဲ့ရန်၊ ယုံကြည်မှုတည်ဆောက်ရန်နှင့် အကြံပေးများ၊ ရင်းနှီးမြှုပ်နှံမှုအခွင့်အလမ်းများနှင့် ယုံကြည်စိတ်ချစွာချိတ်ဆက်ဆောင်ရွက်နိုင်ရန် အကောင်းဆုံး ပလက်ဖောင်းတစ်ခုဖြစ်ကြောင်း ပြောကြားခဲ့ပါသည်။ ထို့အပြင် Ice Miller ဥပဒေရုံး၏ Vietnam Desk အကြီးအကဲ Mai Phan Zymaris က ဗီယက်နမ်စီးပွားရေးလုပ်ငန်းများတွင် အရင်းအနှီးနှင့် ပြည်တွင်းအတွေ့အကြုံများရှိနေသော်လည်း အမေရိကန်ဈေးကွက်သို့ ဝင်ရောက်ရာတွင် မဟာဗျူဟာကို သေချာစဉ်းစားရန်၊ သင့်လျော်သည့်ဒေသခံမိတ်ဖက်များကိုရွေးချယ်ရန်နှင့် အမေရိကန် ဘဏ္ဍာငွေရင်းမြစ်များ ရရှိနိုင်ရန် လိုအပ်ချက်အမျိုးမျိုးကို ဖြည့်ဆည်းရမည်ဖြစ်ကြောင်း သုံးသပ်ပြောကြားခဲ့သည်ဟု သိရှိရပါသည်။

Vietnam Plus                                                                            

DOCA (ရန်ကုန်)

         အမေရိကန်ကုန်သွယ်ရေးကိုယ်စားလှယ်ရုံး (USTR) နှင့် ထိုင်းကုန်သွယ်ရေးဝန်ကြီးဌာနသည် အကောက်ခွန်ဖိအားများ လျှော့ချနိုင်ရေးအတွက် အပြန်အလှန်ကုန်သွယ်ရေး သဘောတူညီချက်ဆိုင်ရာညှိနှိုင်းမှုများကို အပြီးသတ်နိုင်ရန် ဆွေးနွေးမှုများ ပြုလုပ်ခဲ့ကြောင်း သိရပါ သည်။ အမေရိကန်ကုန်သွယ်ရေးကိုယ်စားလှယ် Jamieson Greer နှင့် ဒုတိယအကြီးအကဲဖြစ်သူ Rick Switzer တို့နှင့် တွေ့ဆုံဆွေးနွေးပြီးနောက် ထိုင်းစီးပွားကူးသန်းဝန်ကြီး Suphajee Suthumpun က ဆွေးနွေးပွဲများသည် အပြုသဘောဆောင်ကြောင်းနှင့် နှစ်ဖက်စလုံးက အပြန် အလှန်ကုန်သွယ်ရေးသဘောတူညီချက် (ART) ဆိုင်ရာဆွေးနွေးမှုများကို လျင်မြန်စွာဆောင်ရွက်ရန် သဘောတူထားကြောင်း ပြောကြားခဲ့ပါသည်။ Mrs Suphajee က ရည်မှန်းချက်မှာ လက်တွေ့ကျသည့် တိုးတက်မှုများရရှိစေရန်နှင့် သဘောတူညီချက်ကိုအမြန်ဆုံး အပြီးသတ်နိုင်ရန်ဖြစ်ပြီး ၎င်းက စီးပွားရေးနှင့် ရင်းနှီးမြှုပ်နှံမှုဆိုင်ရာ ယုံကြည်မှုကို တိုးမြှင့်ပေးမည်ဖြစ်သကဲ့သို့ ထိုင်းနိုင်ငံအပေါ် အမေရိကန်၏ ကုန်သွယ်ရေးဆိုင်ရာ အရေးယူမှုများမှ ဖြစ်ပေါ်လာနိုင်သည့် ဖိအားများကိုလည်း လျှော့ချပေးနိုင်မည်ဖြစ်ကြောင်း၊ အမေရိကန်ဘက်က ကုန်သွယ်မှုညီမျှမှုကို ဦးစားပေးဆောင်ရွက်နေပြီး ပြုပြင်ထုတ်လုပ်ထားသော စိုက်ပျိုးရေးထုတ်ကုန်များနှင့် စွမ်းအင်ကဏ္ဍများကဲ့သို့ နှစ်ဖက်အကျိုးရှိနိုင်သည့် နယ်ပယ်များတွင် ထိုင်းစီးပွားရေးလုပ်ငန်းများ ရင်းနှီးမြှုပ်နှံနိုင်ရန် အခွင့်အလမ်းများ ဖန်တီးပေးထားကြောင်းနှင့် ထိုင်းနိုင်ငံအနေဖြင့် ပြည်တွင်းတွင် မထုတ်လုပ်နိုင်သော်လည်း လိုအပ်ချက်ရှိသည့် ကဏ္ဍများတွင် အမေရိကန်မှ တင်သွင်းမှုများကို တိုးမြှင့်သွားရန် စီစဉ်ထားကြောင်း ပြောကြားခဲ့ပါသည်။ ထို့အပြင် အမေရိကန်တွင် ထုတ်လုပ်နိုင်ခြင်းမရှိသည့် ထိုင်းထုတ်ကုန်များအတွက် အခွန်ကင်းလွတ်ခွင့်များ ရရှိရေးကိုလည်း ထိုင်းဘက်က တင်ပြဆွေးနွေးခဲ့ကြောင်း သိရပါသည်။ Mrs Suphajee ၏ ပြောကြားချက်အရ အမေရိကန်ဘက်က တောင်းဆိုချက်များကို စဉ်းစားပေးရန် ဆန္ဒရှိကြောင်း ပြသခဲ့ပြီး ၎င်းသည် နှစ်ဖက်အကျိုးရှိမည့် ဖြေရှင်းနည်းများရှာဖွေရန် အဆင်ပြေမှုနှင့် လိုက်လျောညီထွေရှိမှုကို ဖော်ပြနေကြောင်း သိရပါသည်။ Mrs Suphajee က ART ဆိုင်ရာ ဆွေးနွေးမှုများနှင့်ပတ်သက်၍ ထိုင်းနိုင်ငံသည် လက်တွေ့ကျပြီး အကောင်အထည် ဖော်နိုင်သည့်ရလဒ်များကို ဦးစားပေးထားကြောင်း၊ အမေရိကန်ဘက်ကလည်း သတ်မှတ်အချိန် ဇယားများနှင့် အသေးစိတ်စည်းမျဉ်းများအပေါ် ဆွေးနွေးရန်အသင့်ရှိကြောင်းနှင့် ထို့ပြင် အမေရိကန်သည် ထုတ်လုပ်မှုကွင်းဆက်များတွင် အမေရိကန်ကုန်ကြမ်း အသုံးပြုမှုအချိုးကို တိုးမြှင့်လိုကြောင်းပြောကြားခဲ့ပါသည်။ ထိုင်းကုန်သွယ်ရေးဝန်ကြီးဌာနသည် မေလ ၁၃ ရက်နှင့် ၁၄ ရက်တို့တွင် ထိုင်းကိုယ်စားလှယ်အဖွဲ့ကို အမေရိကန်သို့ စေလွှတ်သွားမည်ဖြစ်ပြီး USTR ၏ Section 301 စုံစမ်းစစ်ဆေးမှုနှင့် ပတ်သက်သည့် မေးမြန်းချက်များကို ရှင်းလင်းဖြေကြား သွားမည်ဖြစ်ကြောင်း သိရပါသည်။ ထို့ပြင် အမေရိကန်ခရီးစဉ်အတွင်း Mrs Suphajee သည် အထက်လွှတ်တော်အမတ် Tammy Duckworth နှင့်လည်း တွေ့ဆုံခဲ့ပြီး စီးပွားရေးပူးပေါင်း ဆောင်ရွက်မှု၊ ရင်းနှီးမြှုပ်နှံမှုနှင့် နှစ်နိုင်ငံအကြား ထုတ်လုပ်မှုကွင်းဆက်များ အားကောင်းလာစေရေး ဆွေးနွေးခဲ့ကြောင်း သိရပါသည်။ အမေရိကန်ဘက်က သန့်ရှင်းစွမ်းအင်၊ ကာဗွန် လျှော့ချရေးနည်းပညာများ၊ အသေးစားမော်ဂျူလာ နျူကလီးယားစွမ်းအင်၊ အစားအသောက်ဆိုင်ရာ နည်းပညာတီထွင်မှု၊ ပြည်သူ့ကျန်းမာရေးပူးပေါင်းဆောင်ရွက်မှုနှင့် ကလေးအစားအစာ ထုတ်လုပ်ရေးလုပ်ငန်းများကဲ့သို့ အလားအလာမြင့်မားသည့်ကဏ္ဍများတွင် ပူးပေါင်းဆောင်ရွက်ရန် အဆိုပြုထားကြောင်းလည်း သိရှိရပါသည်။

Bangkok Post                                                                           

DOCA (ရန်ကုန်)