ပြည်ပကုန်သွယ်မှုသတင်းများ

        ထိုင်းနိုင်ငံ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနသည် ယခုနှစ်အတွင်း ဆန်တင်ပို့မှုကို တန်ချိန် ၇ သန်းအထိ မြှင့်တင်နိုင်ရန်အတွက် ဆန်တင်ပို့သူများနှင့် နီးကပ်စွာ ပူးပေါင်းဆောင်ရွက်လျက်ရှိပြီး အာဖရိက၊ လက်တင်အမေရိကနှင့် အာရှတို့ကို အဓိက တိုးတက်မှုရှိမည့် ဈေးကွက်များအဖြစ် သတ်မှတ်ထားသည်။

        ဒုတိယဝန်ကြီးချုပ်နှင့် စီးပွားရေးနှင့် ကူးသန်းရောင်းဝယ်ရေးဝန်ကြီး ဖြစ်သူ Suphajee Suthumpun က ဆန်ကုန်သွယ်မှု အခြေအနေများနှင့် ဈေးကွက်ဖြစ်ပေါ်တိုးတက်မှုများကို ပြန်လည်သုံးသပ်ရန်နှင့် ဆန်တင်ပို့မှုကို ပိုမိုမြှင့်တင်နိုင်မည့် နည်းလမ်းများကို ရှာဖွေဖော်ထုတ်ရန် အတွက် ဝန်ကြီးဌာနအနေဖြင့် ထိုင်းဆန်တင်ပို့သူများအသင်းနှင့် ဆွေးနွေးမှုများ ပြုလုပ်ခဲ့ကြောင်း ပြောကြားခဲ့သည်။

         ပြည်ပသို့ ဆန်တင်ပို့ခြင်းသည် ဆန်အထွက်နှုန်းများကို ဝယ်ယူပေးရန်နှင့် ထိုင်းလယ်သမားများအတွက် ဝင်ငွေရရှိစေရန် ပံ့ပိုးပေးသည့် အဓိက ယန္တရားတစ်ခု ဖြစ်နေဆဲဖြစ်ကြောင်း ၎င်းက အလေးအနက် ပြောကြားခဲ့သည်။ ထို့အပြင် အလားအလာကောင်းမွန်သော ဈေးကွက်များ တွင် ထိုင်းဆန်ကို မြှင့်တင်ရောင်းချနိုင်ရေးအတွက် ကမ္ဘာတစ်ဝန်းရှိ စီးပွားရေးသံမှူးများနှင့် ပူးပေါင်းဆောင်ရွက်ရန် နိုင်ငံခြားကုန်သွယ်မှုဦးစီးဌာနနှင့် အပြည်ပြည်ဆိုင်ရာ ကုန်သွယ်မှုမြှင့်တင်ရေး ဦးစီးဌာနတို့ကို ညွှန်ကြားထားကြောင်းလည်းဆိုသည်။

       ဝန်ကြီးဌာနအနေဖြင့် ကမ္ဘာ့အဓိကဈေးကွက်ကြီးများတွင် ကုန်သွယ်မှုအခွင့်အလမ်းများ တိုးချဲ့နိုင်ရန်အတွက် ပုဂ္ဂလိကကဏ္ဍနှင့်အတူ တက်ကြွစွာ ပူးပေါင်းဆောင်ရွက်သွားမည်ဖြစ်သည်။ ထိုင်းဆန်၏ ယှဉ်ပြိုင်နိုင်စွမ်းကို မြှင့်တင်ရန် ရည်ရွယ်သည့် ရေရှည်စီမံကိန်းများကို အကောင် အထည်ဖော်ရန် သက်ဆိုင်ရာဌာနများကို ညွှန်ကြားထားကြောင်းလည်း ၎င်းက ဆက်လက် ပြောကြားခဲ့သည်။ အဆိုပါ စီမံကိန်းများတွင် ပြောင်းလဲလာသော ကမ္ဘာ့ဈေးကွက် လိုအပ်ချက်နှင့် ကိုက်ညီမည့် ဆန်စပါးမျိုးစိတ်သစ်များ ဖွံ့ဖြိုးတိုးတက်အောင် ဆောင်ရွက်ခြင်း၊ ပို့ကုန်ဈေးကွက် အသစ်များသို့ တိုးချဲ့ခြင်းနှင့် လာမည့်နှစ်များတွင် ဆန်စပါးအထွက်နှုန်းကို ထိခိုက်စေနိုင်သည့် အယ်လ်နီညို ရာသီဥတုဖြစ်စဉ်နှင့်ပတ်သက်သော စိန်ခေါ်မှုများကို စီမံခန့်ခွဲခြင်းတို့ ပါဝင်သည်။

          ထို့အပြင် ဝန်ကြီးဌာနအနေဖြင့် လယ်သမားများအတွက် ပံ့ပိုးကူညီမှုအစီအစဉ်များကို မြှင့်တင်ရန်နှင့် နိုင်ငံ၏ ဆန်စပါးထုတ်လုပ်မှု လုံခြုံစိတ်ချရမှုကို အားကောင်းစေရန်အတွက် သက်ဆိုင်ရာ အေဂျင်စီများနှင့် နီးကပ်စွာ ဆက်လက်ပူးပေါင်းဆောင်ရွက်သွားမည်ဖြစ်ကြောင်း သိရှိရပါသည်။

Source : VN Express                                                                           

DOCA (ရန်ကုန်)

    ကမ္ဘောဒီးယားရနံ့မွှေးဆန်သည် ၎င်း၏ထူးကဲကောင်းမွန်သော အရည်အသွေးကြောင့် ကျော်ကြား မှုရရှိထားပြီး တရုတ်နိုင်ငံမှ ဝယ်လိုအား အခိုင်အမာရရှိနေကာ နိုင်ငံတစ်ဝန်းရှိ တောင်သူများအတွက် အမှန်တကယ် အကျိုးကျေးဇူးများ ဖော်ဆောင်ပေးလျက်ရှိသည်။ Battambang ပြည်နယ်မှ တောင်သူ များသည်လည်း ယင်းအကျိုးကျေးဇူးများကို ခံစားရရှိနေသူများထဲတွင် ပါဝင်သည်။

     အသက် ၅၈ နှစ်အရွယ် တောင်သူတစ်ဦးဖြစ်သူ Roeu Chamroeun သည် Banan ခရိုင်ရှိ ၎င်း ၏ ၉.၅ ဟက်တာကျယ်ဝန်းသော စိုက်ပျိုးရေးခြံတွင် Phka Romduol နှင့် ဖကာမာလစ် Phka Malis ပရီမီယံဆန်စပါးမျိုးများကို စိုက်ပျိုးလျက်ရှိသည်။ အဆိုပါ ထိပ်တန်း ဆန်စပါးမျိုးများသည် ၎င်းတို့၏ သဘာဝမွှေးရနံ့၊ နူးညံ့သော အနေအထားနှင့် ဆုတံဆိပ်ရရှိထားသော အရည်အသွေးတို့ကြောင့် လူကြိုက်များ တန်ဖိုးကြီးပေသည်။ တစ်နှစ်လျှင် စပါးတန်ချိန် ၅၀ ကျော် ရိတ်သိမ်းရောင်းချနေရ သည့် Chamroeun က တရုတ်နိုင်ငံ၏ ဝယ်ယူမှုများသည် ၎င်းတို့အတွက် တည်ငြိမ်မှုနှင့် ပိုမို ကောင်းမွန်သော ဝင်ငွေများကို ဆောင်ကြဉ်းပေးခဲ့ကြောင်း တရုတ်နိုင်ငံသည် ကမ္ဘောဒီးယားဆန် အတွက် ခိုင်မာသည့် ဈေးကွက်တစ်ခု ဖန်တီးပေးထားခြင်းသည် တောင်သူများ၏ လူနေမှုဘဝ ပိုမို ကောင်းမွန်လာရန် ကူညီပေးခြင်းဖြစ်ကြောင်း အဆိုပါတောင်သူမှ ဆင်ဟွာသတင်းဌာနသို့ ပြောကြား ခဲ့သည်။

     အလားတူ တောင်သူတစ်ဦးဖြစ်သူ Suom Mom ကလည်း ကမ္ဘောဒီးယားဆန်သည် ၎င်း၏ သာလွန်ကောင်းမွန်သော အရည်အသွေးကြောင့် တရုတ်နိုင်ငံတွင် ခိုင်မာသော နာမည်ကောင်း တစ်ခု ရရှိထားကြောင်း ထောက်ခံပြောဆိုခဲ့သည်။  ဤအကျိုးကျေးဇူးများကို ဆန်စက်လုပ်ငန်း ကဏ္ဍတွင် လည်း ခံစားရရှိနေကြသည်။ Battambang ပြည်နယ်ရှိ Taing Eanghuot  ဆန်စက်မှ ကြီးကြပ် ရေးမှူး Taing Sokchamroeun က ၎င်းတို့၏ ဆန်စက်သည် နေ့စဉ် ဆန်တန်ချိန် ၃၀ ကျော် ကြိတ်ခွဲ ထုတ်လုပ်နေပြီး မကြာသေးမီက တရုတ်နိုင်ငံသို့ စတင် တင်ပို့နေပြီဖြစ်ကြောင်း ပြောကြားခဲ့သည်။ အဆိုပါ ဆန်စက်သည် ဘေးအန္တရာယ်ကင်းရှင်းမှုနှင့် အရည်အသွေးကို သေချာစေရန်အတွက် တင်းကျပ်သော HACCP သန့်ရှင်းရေးစံနှုန်းများအတိုင်း လည်ပတ်ဆောင်ရွက်နေခြင်း ဖြစ်သည်။

     ကမ္ဘောဒီးယား ဆန်စပါးအဖွဲ့ချုပ် (Cambodia Rice Federation) ဥက္ကဋ္ဌ Lay Chhun Hour က ကမ္ဘောဒီးယား ဆန်ချောတင်ပို့ရာတွင် တရုတ်နိုင်ငံသည် အဓိကဦးတည်ရာနိုင်ငံအဖြစ် ဆက်လက် ရှိနေကြောင်း အတည်ပြုခဲ့သည်။ တရုတ်နိုင်ငံသည် အထူးသဖြင့် ကမ္ဘောဒီးယား ပရီမီယံရနံ့မွှေးဆန် အတွက် အရေးပါပြီး တန်ဖိုးမြင့်မားသည့် ဈေးကွက်ကြီးတစ်ခုဖြစ်ရာ ဆန်စပါးကဏ္ဍ အတွက် သိသာ ထင်ရှားသည့် ဝင်ငွေနှင့် တိုးတက်မှုကို တွန်းအားပေးနေခြင်းဖြစ်ကြောင်း အဆိုပါ ဥက္ကဋ္ဌက ပြောကြား ခဲ့သည်။

Source: The Khmer Daily Network, 22 Jun 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့

     အိန္ဒိယနိုင်ငံတွင် မုတ်သုံလေအားပျော့မှုကြောင့် ခရိုင်ပေါင်း ၃၀၀ ကျော်၌ သီးနှံများ စိုက်ပျိုးမှု အပေါ် ထိခိုက်နိုင်ခြေရှိသဖြင့် ထိုသို့သက်ရောက်မှုကို လျှော့ချနိုင်ရေး အရေးပေါ်အစီအမံများ ရေးဆွဲ ချမှတ်ထားပြီး  နွေသီးနှံစိုက်ပျိုးရာသီအတွက် ပြင်ဆင်မှုများကို မြှင့်တင်လုပ်ဆောင်လျက် ရှိသည်ဟု စိုက်ပျိုးရေးဝန်ကြီး Shivraj Singh Chouhan က ဇွန် ၂၃ ရက်နေ့တွင် ပြောကြားခဲ့သည်။

    အိန္ဒိယအနေဖြင့် ယခုနှစ်မုတ်သုံရာသီ၌ မိုးရွာသွန်းမှုမှာ ပျမ်းမျှမိုးရေချိန်ရရှိမှုအောက် ၄၃ ရာခိုင်နှုန်းခန့် လျော့နည်းရရှိထားပြီး ဇူလိုင်လ ၂ ရက်နေ့တွင် ကုန်ဆုံးမည့် ရက်သတ္တပတ်အထိ မိုးရွာ သွန်းမှု အားနည်းနေဦးမည်ဟု မိုးလေဝသဌာနက ခန့်မှန်းချက် ထုတ်ပြန်ထားကြောင်းဖြင့် ပြည်နယ် စိုက်ပျိုးရေးဝန်ကြီးများ၊ ဌာနဆိုင်ရာအရာရှိများ၊ သိပ္ပံပညာရှင်များနှင့် တွေ့ဆုံဆွေးနွေးသည့် အစည်း အဝေးတစ်ခုအပြီး သတင်းထောက်များသို့ ဝန်ကြီး Mr. Chouhan က ပြောဆိုခဲ့ခြင်းဖြစ်သည်။

    အိန္ဒိယမိုးလေဝသဌာနသည် ဇွန်လမှ စက်တင်ဘာလအထိ မုတ်သုံရာသီကာလအတွက် နှစ် ပေါင်း ၅၀ အတွင်း ပျမ်းမျှမိုးရေချိန်ရရှိမှု ၈၇ စင်တီမီတာ (၃၅ လက်မ) ၏ ၉၆ ရာခိုင်နှုန်းမှ ၁၀၄ ရာ ခိုင်နှုန်း အကြား မိုးရေချိန်ရရှိပါက ပျမ်းမျှ သို့မဟုတ် ပုံမှန် မိုးရွာသွန်းမှုဟု အဓိပ္ပါယ်ဖွင့်ဆိုထားသည်။ အဆိုပါဌာနက ၂၀၂၆ ခုနှစ်အတွင်း အယ်နီညိုဖြစ်စဉ်ကြောင့် မုတ်သုံလေ အားပျော့မှုရှိပြီး ၁၁ နှစ်တာ ကာလအတွင်း မိုးရေချိန်ရရှိမှု အနည်းဆုံးဖြစ်နိုင်သည်ဟု ပြီးခဲ့သည့် မေလ၌ ခန့်မှန်းထားခဲ့သည်။

    လူဦးရေသန်းပေါင်း ၁၄၀၀ မှီတင်းနေထိုင်သည့် အိန္ဒိယနိုင်ငံတွင် နှစ်စဉ် မိုးရေချိန်ရရှိမှု၏ ၇၀ ရာခိုင်နှုန်းခန့်မှာ မုတ်သုံရာသီ မိုးရွာသွန်းမှုမှဖြစ်ပြီး စိုက်ပျိုးမြေဧရိယာ၏ တစ်ဝက်နီးပါးသည် ဆည် ရေပေးဝေမှုကင်းမဲ့ခြင်း၊ နိုင်ငံ့လူဦးရေ၏ ထက်ဝက်ခန့်သည် ၎င်းတို့၏ လူနေမှုဘဝအတွက်  လယ်ယာ စိုက်ပျိုးရေးအပေါ် အမှီပြုနေရခြင်းတို့ကြောင့် မုတ်သုံမိုးရွာသွန်းမှုသည် နိုင်ငံအတွင်း ရေအရင်း အမြစ်များ ဖြည့်ဆည်းမှုအတွက် အလွန်အရေးပါလျက်ရှိသည်။ ယခုကဲ့သို့ မုတ်သုံလေ အားပျော့မှုက လယ်ယာစိုက်ပျိုးရေးလုပ်ငန်း၌ ဝင်ငွေရရှိမှုကို ထိခိုက်ဖွယ်ရှိနေသော်လည်း အိန္ဒိယနိုင်ငံအနေဖြင့် ဆန်နှင့် ဂျုံတို့ကဲ့သို့သော အရန်ရိက္ခာများကို ပိုလျှံစွာ စုဆောင်းထားရှိပြီးဖြစ်သည်။

    တောင်သူလယ်သမား သန်းပေါင်းများစွာသည် ဇွန်လနှင့် ဇူလိုင်လ မိုးရာသီကာလအတွင်း စပါး၊ ပြောင်း၊ ဝါ၊ ပဲပုပ်နှင့် ကြံ စသည့်သီးနှံများကို စတင်စိုက်ပျိုးမှုရှိပြီး မုတ်သုံမိုး ရွာသွန်းမှု နှောင့်နှေးခြင်း သို့မဟုတ် နေရာကွက်ကျား အနည်းငယ်သာ ရွာသွန်းခြင်းသည် သီးနှံထွက်ရှိမှုကို လျော့နည်းစေ ပြီး ကျေးလက်ဒေသ ဝင်ငွေရရှိမှုကို ကျဆင်းစေမည်ဖြစ်သည်။ 

   အစိုးရသည် ခရိုင်ပေါင်း ၃၁၅ ခု အနက် ၁၁၁ ခုတွင် လယ်ယာမြေများ၏ လေးပုံတစ်ပုံခန့်ကသာ ဆည်ရေရရှိသဖြင့် ၎င်းခရိုင်များကို ဦးစားပေး အမြင့်ဆုံးထားရှိဆောင်ရွက်ရမည့် နယ်မြေအဖြစ် သတ်မှတ်ထားကြောင်း၊ အခြားခရိုင် ၇၆ ခုကိုလည်း အလယ်အလတ်အဆင့် ဦးစားပေးအဖြစ် သတ်မှတ်ထားကြောင်း စိုက်ပျိုးရေးဝန်ကြီးက ပြောဆိုခဲ့သည်။

    တောင်သူလယ်သမားများအနေဖြင့် မိုးကောင်းသောက်စိုက်ပျိုးမြေဧရိယာများတွင် ပဲမျိုးစုံ၊ နှံစားပြောင်းနှင့် ဆီထွက်သီးနှံတို့ ကဲ့သို့သော ရေအသုံးပြုမှုနည်းပါးပြီး စိုက်ပျိုးကာလ တိုတောင်း သည့် သီးနှံများကို ပြောင်းလဲစိုက်ပျိုးလာစေရေး တွန်းအားပေး ဆောင်ရွက်ရန်၊ ဆည်တမံများ၊ ရေကန်များနှင့် အခြားသော ရေထွက်ရှိသည့် အဆောက်အအုံများကို ပြန်လည်ပြုပြင်ရန်နှင့် ရေအရင်းအမြစ် ထိန်းသိမ်းစောင့်ရှောက်မှုလုပ်ငန်းများကို ဦးစားပေးလုပ်ဆောင်ရန် ပြည်နယ်များသို့ ဗဟိုအစိုးရက အကြံပြုထားကြောင်း သိရှိရသည်။

Source: Reuters, 23 Jun 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ဗီယက်နမ်နိုင်ငံတွင် စိုက်ပျိုးရေးနှင့် ပတ်ဝန်းကျင်ရေးရာ ဝန်ကြီးဌာနသည် လယ်ယာ၊ သစ် တောနှင့် ရေထွက်ကုန်ပစ္စည်းများအတွက် ကုန်ထုတ်လုပ်မှု နောက်ကြောင်းခြေရာခံစနစ်ကို ရှေ့လာ မည့် ဇူလိုင်လ ၁ ရက်နေ့မှ စတင်၍ တရားဝင်ကျင့်သုံးနိုင်ရေး အပြီးသတ်ပြင်ဆင်မှုများကို လုပ်ဆောင် လျက်ရှိရာ ဈေးကွက်လိုအပ်ချက်ကို ဖြည့်ဆည်းပေးမှုနှင့်အတူ ပွင့်လင်းမြင်သာရှိမှုနှင့် အုပ်ချုပ်မှု ဆိုင်ရာ စွမ်းဆောင်နိုင်စွမ်းကို မြှင့်တင်ပေးမည့် သိသာထင်ရှားသော အဆင့်တစ်ရပ်သို့ ဦးတည် ရောက်ရှိလာပြီဖြစ်ကြောင်း VNA သတင်းဌာနက ဖော်ပြထားသည်။

      ဟနွိုင်မြို့တွင် ဇွန်လ ၂၂ ရက်နေ့၌ စိုက်ပျိုးရေးနှင့် ပတ်ဝန်းကျင်ရေးရာဝန်ကြီးဌာန၊ ဒုတိယ ဝန်ကြီး Hoang Trung ဦးဆောင်၍ ကျင်းပခဲ့သော အဆိုပါစနစ် ထူထောင်ရေး ပြင်ဆင်ဆောင်ရွက် မှုဆိုင်ရာ အစည်းအဝေးတွင် သိပ္ပံနှင့် နည်းပညာဦးစီးဌာနမှ ညွှန်ကြားရေးမှူး Nguyen Van Long က ဥပဒေမူဘောင် တိုးတက်ကောင်းမွန်ရေး၊ နည်းပညာဆိုင်ရာ အခြေခံ အဆောက်အအုံ ထူထောင်ရေး နှင့် သတင်းအချက်အလက် ပေါင်းစပ်စုစည်းမှုနှင့် ကနဦးလုပ်ငန်း အစီအမံများ လုပ်ဆောင်ရေးဟူ၍ အဓိကနယ်ပယ် သုံးရပ်အပေါ် အလေးပေး ပြင်ဆင်လုပ်ကိုင်လျက်ရှိကြောင်း ပြောဆိုခဲ့သည်။

       ဗီယက်နမ် စိုက်ပျိုးရေးနှင့် ပတ်ဝန်းကျင်ရေးရာ ဝန်ကြီးဌာနသည် လက်ရှိတည်ဆဲ ဥပဒေ လုပ်ထုံးလုပ်နည်းများကို ပြန်လည်သုံးသပ်ခြင်းနှင့် တညီတညွတ်တည်းရှိသော ဥပဒေမူဘောင် တစ်ရပ် ထူထောင်လျက် ကုန်စည်ခြေရာခံစနစ်လုပ်ဆောင်မည့် လှည့်လည်စာ မူကြမ်းတစ်စောင် ရေးဆွဲပြုစုခြင်းတို့ကို ဆောင်ရွက်လျက်ရှိသည်။ ထို့အပြင် ၎င်းခြေရာခံစနစ် အကောင်အထည်ဖော် ဆောင်မှုနှင့် စီမံခန့်ခွဲမှုတို့ကို လိုက်လျောညီထွေရှိ‌စေရေး အမိန့်တစ်ရပ် ထုတ်ပြန်နိုင်ရန် သက်ဆိုင် သည့် ဌာနများနှင့်လည်း ပေါင်းစပ်ညှိနှိုင်းလျက်ရှိသည်။

       ကုန်စည်ခြေရာခံစနစ် လွှင့်တင်လုပ်ဆောင်မည့် နည်းပညာစင်္ကြန် (technical platform)  ကို Netacom ကုမ္ပဏီက ၂၀၂၅ ခုနှစ် နှောင်းပိုင်းကပင် ထူထောင်ထားရှိခဲ့ပြီး ၎င်းကို ဆက်လက် အဆင့်မြှင့်တင်မှု လုပ်ဆောင်မည်ဖြစ်သည်။ အဆိုပါ ဝန်ကြီးဌာနရှိ ဒီဂျစ်တယ် အသွင်ကူးပြောင်းရေး ဦးစီးဌာနသည် လိုအပ်သော သတင်းအချက်အလက်နည်းပညာဆိုင်ရာ အခြေခံအဆောက်အအုံများ ကို တည်ထောင်ထားပြီး လုပ်ငန်းဆောင်ရွက်မှု တည်ငြိမ်ရေးနှင့် လုံခြုံမှုရှိစေရေးအတွက် ဆိုင်ဘာ လုံခြုံမှု ဆန်းစစ်ချက်များ လုပ်ဆောင်ခြင်း၊ ဖြစ်ပေါ်လာနိုင်မည့် ထိခိုက်နိုင်ခြေရှိသည်များကို ကိုင်တွယ် ဖြေရှင်းခြင်းများ ဆောင်ရွက်မည်ဖြစ်သည်။

       သတင်းအချက်အလက်စုစည်းရာတွင် သက်ဆိုင်ရာအစိုးရအေဂျင်စီများ၊ ဒေသအာဏာပိုင် များနှင့် စီးပွားရေးလုပ်ငန်းများအား စိုက်ပျိုးထုတ်လုပ်သည့် နယ်မြေဧရိယာ သင်္ကေတအမှတ်များ၊ ကုန်ပစ္စည်းထုပ်ပိုးမှု အချက်အလက်များနှင့် စစ်ဆေးစမ်းသပ်ချက် ရလဒ်များအပါအဝင် အဓိက အရေး ကြီးသော အချက်အလက်များကို မျှဝေပံ့ပိုးရန် ညွှန်ကြားထားပြီးဖြစ်သည်။

       အဆိုပါစနစ်ကို စမ်းသပ်လုပ်ဆောင်ရာတွင် အများစုသော နည်းပညာဆိုင်ရာပံ့ပိုးသူများ သည် စနစ်၌ပေါင်းစည်းလုပ်ကိုင်မှုကို ပြီးမြောက်ခဲ့ကြပြီဖြစ်ပြီး နောက်ဆုံးအဆင့် ချိတ်ဆက်မှုများ မှာ ဇွန် ၃၀ ရက်နေ့မတိုင်မီ ပြီးစီးဖွယ်ရာရှိသည်။ လက်ရှိကာလတွင် အဆိုပါ နည်းပညာစင်္ကြန်၌ ပြည်နယ် ပေါင်း ၂၆ ခုနှင့် မြို့ကြီးများရှိ ကုမ္ပဏီ ၁၄၉ ခုထံမှ ကုန်စည်အမျိုးအမည်ပေါင်း ၁၈၀၀၀ ကျော်ကို လက်ခံထားပြီးဖြစ်ရာ တရားဝင်လွှင့်တင်မှု လုပ်ဆောင်ရန် အသင့်ရှိနေပြီဖြစ်သည်ကို ဖော်ပြလျက် ရှိသည်။

      ကုန်ထုတ်လုပ်မှု နောက်ကြောင်းခြေရာခံစနစ် ကနဦးစမ်းသပ် အကောင်အထည်ဖော်ခြင်း ကို အဓိကပို့ကုန်များ အထူးသဖြင့် ဒူးရင်းသီးအတွက် ဆောင်ရွက်ခဲ့ပြီးဖြစ်သည်။ စစ်ဆေးတွေ့ရှိချက်များ အရ ၎င်းစနစ်သည် ပို့ကုန်များ နောက်ကြောင်းခြေရာခံခြင်းကို ထိရောက်စွာ ပံ့ပိုးပေးနိုင်ပြီး ပွင့်လင်း မြင်သာရှိမှုကို တိုးတက်ကောင်းမွန်စေလျက် စီးပွားရေးလုပ်ငန်းများအတွက် နိုင်ငံတကာ ဈေးကွက်၌ တင်းကျပ်စွာ လုပ်ဆောင်လာကြသော လိုအပ်ချက်များနှင့် ကိုက်ညီစေရေး အကူအညီဖြစ်စေကြောင်း တွေ့ရှိရသည်။

      ဒီဂျစ်တယ် အသွင်ကူးပြောင်းရေးဦးစီးဌာနအနေဖြင့် အဆိုပါခြေရာခံစနစ်၏ အခြေခံ အဆောက် အအုံများ ထူထောင်ခြင်း၊ လုပ်ငန်းဆောင်ရွက်မှု လုပ်ထုံးလုပ်နည်းများရေးဆွဲခြင်း၊ စနစ်၌ အသုံးပြုသူ များသို့ လုပ်ပိုင်ခွင့်ပေးမည့် ယန္တရားစနစ် တည်ထောင်ခြင်းနှင့် လုံခြုံမှုအစီအမံများ ချမှတ်ခြင်းတို့ကို ဇူလိုင်လ ၁ ရက်နေ့ မတိုင်မီ အပြီးဆောင်ရွက်ရန် ဒုတိယဝန်ကြီး Mr. Trung က အစည်းအဝေးတွင် တာဝန်ပေးအပ်ခဲ့သည်။ ထို့အပြင် စနစ်၌အထူးပြုပါဝင်မည့် အေဂျင်စီများသည်လည်း ပင်မသတင်း အချက်အလက် ပေါင်းစည်းမှုတွင် စံကိုက်ညီမှုနှင့် ချိန်ကိုက်လုပ်ဆောင်မှုတို့ကို အရှိန်မြှင့်တင်ရန်၊ အချက်အလက် စွမ်းဆောင်နိုင်မှုကို အမြင့်မားဆုံးဖြစ်စေပြီး နှစ်ကြိမ်ထပ် ပြန်လည်လုပ်ဆောင်ရမှုကို ရှောင်ကြဉ်နိုင်ရန်အတွက် တစ်ကြိမ်ကြေညာချက်ထုတ်ပြန် စတင်ပြီးသည့်နောက် အကြိမ်ကြိမ် အသုံးပြုနိုင်ရေးဟူသော စည်းမျဉ်းကို အလေးပေးဆောင်ရွက်ရန် ၎င်းက တိုက်တွန်းပြောဆိုခဲ့သည်။

Source: Vietnam Plus, 22 Jun 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

       ဗီယက်နမ်နိုင်ငံ မြောက်ပိုင်းရှိ Bac Ninh ပြည်နယ်သည် Gia Binh အပြည်ပြည်ဆိုင်ရာလေဆိပ်နှင့် ချိတ်ဆက်ထားသော ၅,၀၀၀ ဟက်တာ အကျယ်အဝန်းရှိ လွတ်လပ်သောကုန်သွယ်ရေး ဇုန် (Free Trade Zone) တစ်ခုကို ဖွံ့ဖြိုးတိုးတက်ရေး စီမံကိန်းအဖြစ် အကောင်အထည် ဖော်သွားမည်ဖြစ်ကြောင်း သိရပါသည်။ အဆိုပါစီမံကိန်းသည် နိုင်ငံတကာ ကုန်သွယ်ရေးနှင့် ဝန်ဆောင်မှုဗဟိုဌာနတစ်ခုဖန်တီးရန်နှင့် ဒေသ၏ စီးပွားရေးတိုးတက်မှုအတွက် အင်အားအသစ် တစ်ခုဖြစ်လာစေရန် ရည်ရွယ်ထားခြင်းဖြစ်ကြောင်း သိရပါသည်။ ၎င်းအစီအစဉ်ကို၂၀၅၀ အထိ မျှော်မှန်းချက်နှင့်အတူ ၂၀၂၁-၂၀၃၀ ကာလအတွက် မဟာစီမံကိန်းအရ ပြည်နယ်ပြည်သူ့ ကောင်စီက အတည်ပြုခဲ့ကြောင်း သိရပါသည်။ လွတ်လပ်ကုန်သွယ်ရေးဇုန်ကို ထုတ်လုပ်မှု၊ ထောက်ပံ့ပို့ဆောင်ရေး၊ ကုန်သွယ်ရေး၊ ဝန်ဆောင်မှုလုပ်ငန်းများ၊ ဆန်းသစ်တီထွင်မှုနှင့် ဒစ်ဂျစ်တယ် စီးပွားရေးတို့ကိုပေါင်းစပ်ထားသည့် ခေတ်မီစီးပွားရေး စင်တာတစ်ခုအဖြစ် တည်ဆောက်သွားမည်ဖြစ်ကြောင်း သိရပါသည်။ ထို့ပြင် ဗီယက်နမ်နှင့် ကမ္ဘာ့ဈေးကွက်များအကြား ချိတ်ဆက်ပေးမည့် ဝင်ပေါက်တစ်ခုအဖြစ်သာမက မြောက်ပိုင်းဒေသ စီးပွားရေးဖွံ့ဖြိုးတိုးတက်မှုကို ညှိနှိုင်းပေးမည့် အဓိကဗဟိုချက်အဖြစ်လည်း ရပ်တည်လာမည်ဟု မျှော်မှန်းထားကြောင်း သိရပါသည်။ စီမံကိန်းကို အထောက်အကူပြုရန် Bac Ninh ပြည်နယ်သည် ICAO 4F စံနှုန်းနှင့် ကိုက်ညီသည့် Gia Binh အပြည်ပြည်ဆိုင်ရာလေဆိပ် တည်ဆောက်ရေးကို အရှိန်မြှင့်ဆောင်ရွက်နေကြောင်း သိရပါသည်။ အဆိုပါလေဆိပ်သည် ၂၀၃၀ ပြည့်နှစ်တွင် ခရီးသည် ၃၀ သန်းနှင့် ကုန်စည်တန်ချိန် ၁.၆ သန်းကို နှစ်စဉ် ကိုင်တွယ်နိုင်မည်ဖြစ်ပြီး ၂၀၅၀ ပြည့်နှစ်တွင် ခရီးသည် ၅၀ သန်းနှင့် ကုန်စည်တန်ချိန် ၂.၅ သန်းအထိ တိုးမြှင့်နိုင်မည်ဟု ခန့်မှန်းထားကြောင်း သိရပါသည်။ ထို့အပြင် Kep နှင့် Lang Giang ဒေသများနှင့် အနီးဝန်းကျင်ဒေသများတွင် ဧရိယာ ၁၀,၀၀၀ ဟက်တာခန့်ရှိ အထူးစီးပွားရေးဇုန် တစ်ခုကိုလည်း တည်ထောင်သွားမည်ဖြစ်ကြောင်း သိရပါသည်။ အဆိုပါဇုန်သည် မြောက်-တောင် စီးပွားရေးလမ်းကြောင်း၊ ဟနွိုင်းမြို့တော်ဒေသ၏ စက်မှု-မြို့ပြ-ဝန်ဆောင်မှုကွင်းဆက်နှင့် အမြန်လမ်းများ၊ ရထားလမ်းများ၊ နယ်စပ်ဖြတ်ကျော်ရထားဘူတာနှင့် Kep ICD ကဲ့သို့သော မဟာ ဗျူဟာမြောက် အခြေခံအဆောက်အအုံများ၏ အားသာချက်များကို အသုံးချသွားမည်ဖြစ်ကြောင်း သိရပါသည်။ အထူးစီးပွားရေးဇုန်အတွင်း အဆင့်မြင့်နည်းပညာစက်မှုလုပ်ငန်းများ၊ ထောက်ပံ့ ပို့ဆောင်ရေးလုပ်ငန်းများ၊ ကုန်သွယ်ရေး၊ မြို့ပြဖွံ့ဖြိုးရေး၊ သိပ္ပံနှင့် နည်းပညာ၊ ဆန်းသစ်တီထွင်မှု၊ ပညာရေး၊ ကျန်းမာရေးစောင့်ရှောက်မှုနှင့် သဘာဝပတ်ဝန်းကျင်အခြေပြု ခရီးသွားလုပ်ငန်းများကို ဦးစားပေး ဖွံ့ဖြိုးတိုးတက်သွားမည်ဖြစ်ကြောင်း သိရပါသည်။ ပြည်နယ်၏ ဖွံ့ဖြိုးတိုးတက်ရေး မဟာဗျူဟာအရ အဆိုပါအဓိကစီမံကိန်းများသည် ယှဉ်ပြိုင်နိုင်စွမ်းမြှင့်တင်ခြင်း၊ ရင်းနှီးမြှုပ်နှံမှုများ ဆွဲဆောင်ခြင်း၊ စီးပွားရေးတိုးတက်မှု အရှိန်မြှင့်တင်ခြင်းတို့ကို အထောက်အကူပြုမည်ဖြစ်ပြီး Bac Ninh ပြည်နယ်ကို နိုင်ငံတကာအဆင့်မီ ကုန်သွယ်ရေးနှင့် ဝန်ဆောင်မှုဗဟိုဌာနတစ်ခုအဖြစ် တဖြည်းဖြည်း ပြောင်းလဲသွားစေရန် ရည်မှန်းထားကြောင်း သိရပါသည်။ တစ်ဖက်တွင်လည်း ပြည်နယ်သည် ဒစ်ဂျစ်တယ်အခြေခံအဆောက်အအုံများအပေါ် အခြေခံသည့် e-Commerce လုပ်ငန်းများ တိုးချဲ့ဖွံ့ဖြိုးရေး၊ လုပ်ငန်းရှင်များနှင့် သမဝါယမအသင်းများအား ပြည်တွင်းနှင့် နိုင်ငံတကာ အွန်လိုင်းဈေးကွက်များတွင် ပါဝင်နိုင်ရေး အားပေးခြင်းတို့ကို ဆောင်ရွက်လျက် ရှိကြောင်း သိရပါသည်။ ထို့အပြင် ခေတ်မီနည်းပညာများ အသုံးပြုကာ အရည်အသွေးမြင့် ပို့ဆောင်ရေးနှင့် Logistics ဝန်ဆောင်မှုများ ဖွံ့ဖြိုးတိုးတက်စေရန် စီစဉ်ထားကြောင်း သိရပါသည်။ ခရီးသွားကဏ္ဍတွင်လည်း Bac Ninh ပြည်နယ်ကို ဟနွိုင်းမြို့တော်ဒေသ၏ အဓိက ယဉ်ကျေးမှု၊ ဘာသာရေး၊ သဘာဝပတ်ဝန်းကျင်နှင့် ဖျော်ဖြေရေးခရီးသွားနေရာတစ်ခုအဖြစ် ဖွံ့ဖြိုးစေရန် ရည်ရွယ်ထားပြီး ဒေသတွင်းနှင့် ပြည်နယ်ချင်းဆက်သွယ်သည့် ခရီးသွား လမ်းကြောင်းများတွင် အရေးပါသောနေရာတစ်ခုအဖြစ် ရပ်တည်နိုင်ရန် ကြိုးပမ်းလျက်ရှိကြောင်း သိရှိရပါသည်။

Vietnam Plus                                                                            

DOCA (ရန်ကုန်)