ပြည်ပကုန်သွယ်မှုသတင်းများ

          Nghi Son Refinery and Petrochemical Plant သည် ပြည်တွင်းဈေးကွက်ရှိ လောင်စာလိုအပ်ချက် ဖြည့်ဆည်းနိုင်ရန်အတွက် ကွန်ဂိုနိုင်ငံမှ တင်သွင်းလာသော Djeno ရေနံစိမ်းစည်ပေါင်း ၉၅၀,၀၀၀ ကျော်ကို လက်ခံရရှိခဲ့ကြောင်း သိရပါသည်။ အဆိုပါရေနံစိမ်း တင်သွင်းမှုကို Nghi Son Petroleum Products Distribution Branch (PVNDB) က စီစဉ်ခဲ့ခြင်းဖြစ်ပြီး ၎င်းသည် Vietnam National Industry - Energy Group ၏ လက်အောက်ခံလုပ်ငန်းတစ်ခုဖြစ်ကာ စက်ရုံ၏လည်ပတ်မှုတည်ငြိမ်စေရန်ရည်ရွယ်ကြောင်း သိရပါသည်။ ရေနံစိမ်း တင်သွင်းရာတွင် အရင်းအမြစ်မျိုးစုံထားရှိခြင်းသည် Nghi Son Refinery and Petrochemical LLC အတွက် ကုန်ကြမ်းထောက်ပံ့မှု တည်ငြိမ်စေရန်နှင့် ပြည်တွင်းလောင်စာဆီထောက်ပံ့မှု လုံခြုံမှုရှိစေရန် အရေးကြီးကြောင်း သုံးသပ်ထားပါသည်။ အထူးသဖြင့် အရှေ့အလယ်ပိုင်းဒေသ တင်းမာမှုများကြောင့် ကူဝိတ်နိုင်ငံမှရေနံတင်သွင်းမှုများ ထိခိုက်လာသည့်အခြေအနေတွင် ထိုသို့ ဆောင်ရွက်လာခြင်းဖြစ်ကြောင်း သိရပါသည်။ ကူဝိတ်ရေနံသည် စက်ရုံ၏မူလဒီဇိုင်းအရ အဓိက ကုန်ကြမ်းဖြစ်နေဆဲဖြစ်သော်လည်း NSRP သည် အစားထိုးကုန်ကြမ်းများကို လုံခြုံပြီး ထိရောက်စွာအသုံးပြုနိုင်ရန်ကြိုးပမ်းမှုအဖြစ် Das Blend ရေနံစိမ်းပထမအသုတ်ကို ယခင်ကအောင်မြင်စွာ စမ်းသပ်အသုံးပြုခဲ့ဖူးကြောင်း သိရပါသည်။ ယခုဆောင်ရွက်မှုသည် ကူဝိတ်ရေနံ သို့မဟုတ် အလားတူ အလတ်စားရေနံများနှင့်အတူ နှစ်စဉ် ရေနံစိမ်းအသစ် စည်ပေါင်း ၁၀ သန်းမှ ၁၂ သန်းအထိ ထပ်မံသုံးစွဲနိုင်ရန်ရည်ရွယ်သည့် မဟာဗျူဟာ၏တစ်စိတ်တစ်ပိုင်းဖြစ်ကြောင်း စက်ရုံက ပြောကြားခဲ့ပါသည်။ အထူးသဖြင့် Residue Hydrodesulfurisation (RHDS) ယူနစ်တွင် catalyst အစားထိုးရသည့်ကာလများကဲ့သို့ လည်ပတ်မှုအခြေအနေများတွင် ၎င်းရည်မှန်းချက်ကို အသုံးချသွားမည်ဟု သိရပါသည်။ Petrovietnam ၏ နိုင်ငံတကာကုန်သွယ်ရေး မဟာဗျူဟာအရ PVNDB သည် NSRP အတွက် ပထမဆုံးရေနံစိမ်းတင်သွင်းမှုကို အောင်မြင်စွာ စီစဉ်ပေးနိုင်ခဲ့ပြီး ၎င်းသည် ရေနံစိမ်းထောက်ပံ့ရေးအရင်းအမြစ်များမျိုးစုံပြုလုပ်ရေး ကြိုးပမ်းမှု၏ တစ်စိတ်တစ်ပိုင်းဖြစ်ကြောင်း သိရပါသည်။ ထိုဆောင်ရွက်မှုသည် နိုင်ငံ၏စွမ်းအင်ဖူလုံရေးကို အထောက်အကူပြုသည့်အပြင် PVNDB အနေဖြင့် လောင်စာဖြန့်ဖြူးရေးမှ ရေနံစိမ်းထောက်ပံ့ရေး ကွင်းဆက်အတွင်း ပိုမိုနက်ရှိုင်းစွာ ပါဝင်လာခြင်းကိုလည်း ဖော်ပြနေကြောင်း သိရပါသည်။ Petrovietnam ၏ နိုင်ငံတကာကုန်သွယ်မှုအတွေ့အကြုံနှင့် အားသာချက်များကို အသုံးချကာ PVNDB သည် NSRP နှင့် နီးကပ်စွာပူးပေါင်း၍ လိုအပ်ချက်များကိုသုံးသပ်ခြင်း၊ သင့်တော်သော ရေနံအရင်းအမြစ်များ ရွေးချယ်ခြင်း၊ စီးပွားရေးဆိုင်ရာရွေးချယ်မှုများကို အကဲဖြတ်ခြင်းနှင့် နိုင်ငံခြားမိတ်ဖက်များနှင့် ညှိနှိုင်းခြင်းတို့ကို ဆောင်ရွက်ခဲ့ကြောင်း သိရပါသည်။ လာမည့်ကာလများတွင် PVNDB သည် NSRP နှင့် ပြည်တွင်းသန့်စင်စက်ရုံများအတွက် သင့်လျော်သောရေနံစိမ်းများကို ဆက်လက်တင်သွင်းသွားမည်ဖြစ်ပြီး အုပ်ချုပ်မှုစံနှုန်းများမြှင့်တင်ခြင်း၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေး၊ နိုင်ငံတကာပူးပေါင်းဆောင်ရွက်မှုနှင့် ထောက်ပံ့ရေးအရင်းအမြစ်မျိုးစုံပြုလုပ်ရေးတို့ကို အားဖြည့်ဆောင်ရွက်သွားမည်ဟု သိရပါသည်။ ယခုနှစ်အစောပိုင်းတွင် ကြေညာခဲ့သည့် ၂၀၂၆ ခုနှစ်ထုတ်လုပ်မှုအစီအစဉ်အရ NSRP သည် ရေနံစိမ်း တန်ချိန် ၁၂.၅ သန်းနီးပါး တင်သွင်းရန်နှင့် ပြည်တွင်းဈေးကွက်သို့ ရေနံထွက်ကုန် တန်ချိန် ၉ သန်းခန့် ထောက်ပံ့ပေးရန် ရည်မှန်းထားကြောင်း သိရပါသည်။ ၂၀၀၈ ခုနှစ်တွင် တည်ထောင်ခဲ့သည့် NSRP သည် Kuwait Petroleum Europe B.V. ၊ Idemitsu Kosan Co. Ltd. ၊ Petrovietnam နှင့် Mitsui Chemicals Inc. တို့ပူးပေါင်းရင်းနှီးမြှုပ်နှံထားသည့် စီမံကိန်းဖြစ်ပြီး စုစုပေါင်းရင်းနှီးမြှုပ်နှံမှုမှာ အမေရိကန် ဒေါ်လာ ၉ ဘီလီယံကျော်တန်ဖိုးရှိကြောင်း သိရှိရပါသည်။

Vietnam Plus                                                                            

DOCA (ရန်ကုန်)

        ထိုင်းနိုင်ငံအခြေစိုက် Thai Union Feedmill Plc (TFM) သည် အီကွေဒေါနိုင်ငံတွင် စက်ရုံတည်ဆောက်ရန် အမေရိကန်ဒေါ်လာ ၅၅ သန်းအထိ ရင်းနှီးမြှုပ်နှံသွားမည်ဖြစ်ကြောင်း ထုတ်ပြန်ခဲ့ပါသည်။ TFM ၏ ဘဏ္ဍာရေးအရာရှိချုပ် Piyanuch Marittanaporn ၏ ပြောကြားချက်အရ အဆိုပါရင်းနှီးမြှုပ်နှံမှုတွင် စက်ရုံတည်ဆောက်ခြင်းနှင့် စက်ပစ္စည်းဝယ်ယူခြင်းတို့ ပါဝင်မည်ဖြစ်ပြီး စီမံကိန်းကို ၂၀၂၈ ခုနှစ်တွင် အပြီးသတ်ရန် ရည်မှန်းထားကြောင်း သိရပါသည်။ စက်ရုံသစ် တည်ဆောက်ပြီးပါက ကုမ္ပဏီ၏ထုတ်လုပ်မှုစွမ်းရည်သည် ၈၀ ရာခိုင်နှုန်းအထိ မြင့်တက်လာမည်ဟု သိရပါသည်။ လက်ရှိတွင် ရှယ်ယာရှင်သဘောတူညီချက်များ ရယူနေဆဲဖြစ်ကြောင်း သိရပါသည်။ TFM ၏ အမှုဆောင်အရာရှိချုပ် Peerasak Boonmechote ၏ ပြောကြားချက်အရ အီကွေဒေါနိုင်ငံသည် ကမ္ဘာ့အကြီးဆုံး ပုစွန်ထုတ်လုပ်သည့်နိုင်ငံဖြစ်ပြီး နှစ်စဉ် တန်ချိန် ၁.၅ သန်းခန့် ထုတ်လုပ်နေကာ နှစ်စဉ်လျှင် ၁၀ မှ ၁၅ ရာခိုင်နှုန်းအထိ တိုးတက်နေကြောင်း သိရပါသည်။ TFM သည် ထိုင်းနိုင်ငံရှိ Samut Sakhon နှင့် Songkhla ဒေသများတွင် စက်ရုံ ၂ ရုံနှင့် အင်ဒိုနီးရှား နိုင်ငံတွင် စက်ရုံ ၁ ရုံ လည်ပတ်လျက်ရှိကြောင်း သိရပါသည်။ ကုမ္ပဏီ၏ ဝင်ငွေ ၈၇ ရာခိုင်နှုန်းခန့်မှာ ထိုင်းပြည်တွင်းဈေးကွက်နှင့် ပို့ကုန်များမှရရှိနေပြီး ၉ ရာခိုင်နှုန်းမှာ အင်ဒိုနီးရှားဈေးကွက်မှဖြစ်ကြောင်း သိရပါသည်။ Peerasak က ကမ္ဘာ့အဆင့်မြင့် ပင်လယ်စာဈေးကွက်တွင် ရေရှည်တည်တံ့မှုနှင့် ထောက်ပံ့မှုကွင်းဆက်တစ်လျောက် ခြေရာခံနိုင်မှု (traceability) ကို အပြည့်အဝ အာမခံပေးနိုင်သည့် ထုတ်လုပ်သူနှင့် တင်ပို့သူများအတွက် အခွင့်အလမ်းများရှိနေကြောင်း ပြောကြားခဲ့ပါသည်။ ထိုင်းနိုင်ငံ၏ ပုစွန်တင်ပို့မှုမှာကျဆင်းလာနေကြောင်းလည်း ၎င်းက ထောက်ပြခဲ့ပါသည်။ ၂၀၁၇ ခုနှစ်တွင် ပုစွန်တန်ချိန် ၂၁၁,၀၀၀ ကို ဘတ် ၆၉.၅ ဘီလီယံတန်ဖိုးဖြင့် တင်ပို့ခဲ့သော်လည်း ၂၀၂၅ ခုနှစ်တွင် တန်ချိန် ၁၂၉,၀၀၀ ဖြင့် ဘတ် ၄၀.၉ ဘီလီယံသာ ကျန်ရှိတော့ကြောင်း သိရပါသည်။ သို့သော် ထိုင်းနိုင်ငံ၏ ပုစွန်ထုတ်လုပ်မှု လျော့နည်းလာနေသော်လည်း မွေးမြူရေးသမားများနှင့် ဆက်ဆံရေးတိုးမြှင့်ကာ ဈေးကွက်လိုအပ်ချက်နှင့် ကိုက်ညီသည့် ထုတ်ကုန်များပံ့ပိုးပေးခြင်းဖြင့် စီးပွားရေးအခွင့်အလမ်းများ ရှိနေသေးကြောင်း TFM က ယုံကြည်ထားပါသည်။ ထိုင်းနိုင်ငံ၏ ရေချိုငါးဈေးကွက်တန်ဖိုးမှာ ဘတ် ၇ ဘီလီယံခန့်ရှိပြီး နိုင်းတီလား ပီယားနှင့် အနီရောင်တီလားပီယားတို့က ဘတ် ၅ ဘီလီယံခန့်ကို ပိုင်ဆိုင်ထားကြောင်း Peerasak က ပြောကြားခဲ့ပါသည်။ snakehead ငါးနှင့် snakeskin gourami ငါးများက ဘတ် ၁.၅ ဘီလီယံခန့် ပိုင်ဆိုင်ထားကြောင်း သိရပါသည်။ TFM ၏ ရေချိုငါးထုတ်ကုန်များမှာ လက်ရှိဈေးကွက်ဝေစု နည်းနေသေးသဖြင့် တိုးတက်နိုင်ခြေများရှိနေကြောင်းလည်း ၎င်းက ပြောကြားခဲ့ပါသည်။ အင်ဒိုနီးရှားနိုင်ငံတွင်လည်း ကုမ္ပဏီသည် အရောင်းကွန်ရက်နှင့် ဈေးကွက်လွှမ်းခြုံမှုကို တိုးချဲ့သွားမည်ဖြစ်ပြီး ထုတ်လုပ်မှုစွမ်းရည်တိုးချဲ့ရေးကိုလည်း စဉ်းစားနေကြောင်း သိရပါသည်။ ထို့ပြင် ငါးအစာမှုန့်ဈေးနှုန်းများသည် ၂၀၂၅ ခုနှစ်တတိယသုံးလပတ်မှစ၍ ၃၀ ရာခိုင်နှုန်းခန့် မြင့်တက်လာသော်လည်း ဂျုံမှုန့်နှင့် ပဲပိစပ်များအတွက် ရေရှည်စာချုပ်များ ချုပ်ဆိုထားနိုင်သဖြင့် ကုမ္ပဏီအနေဖြင့် ထုတ်ကုန်ဈေးနှုန်းများ တိုးမြှင့်မည်မဟုတ်ကြောင်း ဘဏ္ဍာရေးအရာရှိချုပ် Piyanuch က ပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

      အင်ဒိုနီးရှားနိုင်ငံစိုက်ပျိုးမွေးမြူရေးဝန်ကြီး Andi Amran Sulaiman က ကမ္ဘာလုံးဆိုင်ရာ ပထဝီနိုင်ငံရေးတင်းမာမှုများကြောင့် အစားအသောက်ဖူလုံရေးအန္တရာယ်များ မြင့်တက်လာနေချိန်တွင် ဓာတ်မြေဩဇာပံ့ပိုးပေးခဲ့သည့်အတွက် ဩစတြေးလျအစိုးရက အင်ဒိုနီးရှားကို ကျေးဇူးတင်ကြောင်း ပြောကြားခဲ့ပါသည်။ မေလ ၁၆ ရက်နေ့တွင် ထုတ်ပြန်သော ကြေညာချက်အရ Sulaiman က ဩစတြေးလျ စိုက်ပျိုးရေး၊ ငါးလုပ်ငန်းနှင့် သစ်တောဝန်ကြီး Julie Collins ထံမှ ဓာတ်မြေဩဇာ ကုန်သွယ်ရေး ပူးပေါင်းဆောင်ရွက်မှုနှင့် ပတ်သက်၍ တိုက်ရိုက်ဖုန်းခေါ်ဆိုမှုရရှိခဲ့ကြောင်း ပြောကြားခဲ့ပါသည်။ Sulaiman က ကမ္ဘာလုံးဆိုင်ရာ ပထဝီနိုင်ငံရေး စိန်ခေါ်မှုများကြားတွင် ဓာတ်မြေဩဇာ ထောက်ပံ့မှုကို ဖူလုံစေရန် ကူညီပေးခဲ့သည့်အတွက် ဩစတြေးလျ စိုက်ပျိုးရေးဝန်ကြီးက အင်ဒိုနီးရှားကို ကျေးဇူးတင်သည်ဟု ပြောကြားခဲ့ကြောင်း၊ ဩစတြေးလျအနေဖြင့် စွမ်းအင်၊ အစားအသောက်နှင့် စိုက်ပျိုးရေးကုန်ကြမ်းများ၏ ကမ္ဘာလုံးဆိုင်ရာ ထောက်ပံ့ရေးကွင်းဆက် အနှောင့်အယှက်များကို ဓာတ်မြေဩဇာ တင်ပို့မှုမှတစ်ဆင့် ဖြေရှင်းရာတွင် အင်ဒိုနီးရှား၏ ပူးပေါင်းဆောင်ရွက်မှုကို အလွန်တန်ဖိုးထားကြောင်း ပြောကြားခဲ့ပါသည်။ Sulaiman ၏ အဆိုအရ ဩစတြေးလျသည် ထိုတင်ပို့မှုများကို ဒေသတွင်း စိုက်ပျိုးရေးကဏ္ဍ၏ ခံနိုင်ရည်အား မြှင့်တင်ရာတွင် အရေးပါသည့် ပံ့ပိုးမှုတစ်ရပ်အဖြစ် ရှုမြင်နေကြောင်း သိရပါသည်။ ၎င်းက အဆိုပါဖွံ့ဖြိုးတိုးတက်မှုသည် အင်ဒိုနီးရှား၏ ကိုယ်ပိုင်လုံလောက်မှု တိုးတက်လာမှုကို ပြသနေပြီး ထို့ကြောင့် ဓာတ်မြေဩဇာတင်ပို့နိုင်သည့် အနေအထားသို့ ရောက်ရှိလာကြောင်း အလေးပေး ပြောကြားခဲ့ပါသည်။ ဝန်ကြီးက ယခင်က အင်ဒိုနီးရှား သမ္မတ Prabowo Subianto နှင့် ဩစတြေးလျ ဝန်ကြီးချုပ် Anthony Albanese တို့အကြား ဖုန်းဆက်သွယ်ပြောဆိုမှုတွင်လည်း ဩစတြေးလျဘက်ကဓာတ်မြေဩဇာ တင်ပို့ခွင့်ပြုခဲ့သည့်အတွက် ကျေးဇူးတင်ကြောင်း ဖော်ပြခဲ့သည်ဟု ပြောကြားခဲ့ပါသည်။ Sulaiman က အဆိုပါအဆင့်မြင့်ဆက်သွယ်ပြောဆိုမှုများသည် ကမ္ဘာလုံးဆိုင်ရာ ထောက်ပံ့ရေးကွင်းဆက်တွင် အင်ဒိုနီးရှား၏ အခန်းကဏ္ဍ ပိုမိုမြင့်တက်လာနေမှုကို ပြသနေကြောင်းနှင့် ထိုအရာသည် အင်ဒိုနီးရှားအပေါ်ယုံကြည်မှုပိုမိုမြင့်တက်လာနေပြီး ဒေသတွင်းအစားအသောက်တည်ငြိမ်ရေးကို ထိန်းသိမ်းရာတွင် အရေးပါသော နိုင်ငံတစ်ခုအဖြစ် ပေါ်ထွက်လာနေသည့် သက်သေဖြစ်ကြောင်း ပြောကြားခဲ့ပါသည်။  Sulaiman သည် မေ လ ၁၄ ရက် ကြာသပတေးနေ့တွင် East Kalimantan ပြည်နယ် Bontang ဆိပ်ကမ်း၌ ဩစတြေးလျသို့ ယူရီးယားဓာတ်မြေဩဇာ ပထမအသုတ်တင်ပို့မှုအခမ်းအနားသို့ တက်ရောက်ခဲ့ကြောင်း သိရပါသည်။ အဆိုပါတင်ပို့မှုသည် အစိုးရနှစ်ရပ်ကြား သဘောတူညီချက်အရ ဓာတ်မြေဩဇာ တန်ချိန် ၂၅၀,၀၀၀ တင်ပို့ရန် စီစဉ်ထားသည့် အစီအစဉ်၏ တစ်စိတ်တစ်ပိုင်းဖြစ်ကြောင်း သိရပါသည်။ ပထမအသုတ်တွင် တန်ချိန် ၄၇,၂၅၀ တင်ပို့ခဲ့ပြီး နောင်တွင် တင်ပို့သည့်ပမာဏကို တန်ချိန် ၅၀၀,၀၀၀ အထိ တိုးမြှင့်သွားရန် စီစဉ်ထားကာ တန်ဖိုးအားဖြင့် ရူပီး ၇ ထရီလီယံ (အမေရိကန်ဒေါ်လာ ၄၀၀ သန်းခန့်) ရှိမည်ဟု ခန့်မှန်းထားကြောင်း သိရပါသည်။ ဝန်ကြီးက ဓာတ်မြေဩဇာစက်မှုလုပ်ငန်း အားကောင်းလာခြင်းသည် စိုက်ပျိုးရေးထုတ်လုပ်မှု တိုးတက်ရေးအပေါ်အခြေခံထားသည့် နိုင်ငံ၏အစားအသောက် ကိုယ်ပိုင်လုံလောက်မှုအစီအစဉ်ကို အထောက်အကူပြုရန် အရေးကြီးကြောင်း ပြောကြားခဲ့ပါသည်။ ပြည်သူများ၏ စိုးရိမ်မှုများနှင့် ပတ်သက်၍ Sulaiman က ယခုတင်ပို့မှုများသည် ထုတ်လုပ်မှုပိုလျှံမှုမှ ဆောင်ရွက်ခြင်းဖြစ်သောကြောင့် ပြည်တွင်းထောက်ပံ့မှုကို မထိခိုက်စေကြောင်း အာမခံ ပြောကြားခဲ့ပါသည်။ ၎င်း၏ အဆိုအရ နိုင်ငံ၏ ယူရီးယား ထုတ်လုပ်မှုမှာ တန်ချိန် ၇.၈ သန်းအထိ ရောက်ရှိမည်ဟု ခန့်မှန်းထားပြီး ပြည်တွင်းလိုအပ်ချက်မှာ တန်ချိန် ၆.၃ သန်းသာရှိကြောင်း သိရှိရပါသည်။

Antara News                                                                             

DOCA (ရန်ကုန်)

        ဥရောပသမဂ္ဂ (EU) က ပိုမိုတင်းကျပ်လာသည့် အစားအသောက်ဘေးကင်းလုံခြုံရေးနှင့် ပိုးသတ်ဆေးကြွင်းကျန်မှုဆိုင်ရာ စည်းမျဉ်းများ ချမှတ်လာသည့်ကြားမှ ဗီယက်နမ်နိုင်ငံသည် ၎င်း၏ နဂါးမောက်သီး တင်ပို့မှုများကို ဆက်လက်ထိန်းသိမ်းနိုင်ရန် အစီအမံများကို အရှိန်အဟုန်မြှင့် ဆောင်ရွက်လျက်ရှိကြောင်း သိရပါသည်။

        စိုက်ပျိုးရေးနှင့် ပတ်ဝန်းကျင်ထိန်းသိမ်းရေး ဒုတိယဝန်ကြီး Dang Ngoc Diep က ဝန်ကြီးဌာနအနေဖြင့် ဒေသဆိုင်ရာ အာဏာပိုင်များနှင့် အထူးကုအေဂျင်စီများကို စည်းမျဉ်းသစ်များ၏ သက်ရောက်မှုကို အကဲဖြတ်ရန်နှင့် အီးယူအာဏာပိုင်များနှင့် ဆွေးနွေးနိုင်ရေးအတွက် ပြဿနာရပ်များကို ပြန်လည်သုံးသပ်ရန် ညွှန်ကြားထားကြောင်း ပြောကြားခဲ့ပါသည်။ ထို့အပြင် လုပ်ငန်းရှင်များနှင့် ထုတ်လုပ်သူများအနေဖြင့် စည်းမျဉ်းသစ်များကို သိရှိနားလည်စေရန်နှင့် ထုတ်လုပ်မှုမှ တင်ပို့မှုကွင်းဆက်တစ်ခုလုံးတွင် လိုက်နာဆောင်ရွက်နိုင်စေရန် နည်းပညာပိုင်းဆိုင်ရာ သင်တန်းများကိုလည်း စီစဉ်ပေးထားကြောင်း သိရပါသည်။

       ဗီယက်နမ်အာဏာပိုင်များ၏ ပြောကြားချက်အရ စစ်ဆေးမှုများတိုးမြှင့်ခြင်း၊ နောက်ကြောင်းပြန်ခြေရာခံမှု စနစ်များကျင့်သုံးခြင်းနှင့် ပြုပြင်တည့်မတ်သည့် လုပ်ဆောင်ချက်များကြောင့် အီးယူမှ ထုတ်ပြန်သည့် အစားအသောက်ဘေးကင်းလုံခြုံရေးဆိုင်ရာ သတိပေးချက်များ သည် ၂၀၂၄ ခုနှစ်တွင် အမှုပေါင်း ၆၄ ခု ရှိခဲ့ရာမှ ပြီးခဲ့သည့်နှစ်တွင် ၁၇ ခုအထိ သိသိသာသာ လျော့နည်းသွားခဲ့ကြောင်း သိရပါသည်။

      မှတ်သားဖွယ်ရာအချက်အနေဖြင့် ပြီးခဲ့သည့် ဇွန်လအတွင်း အီးယူ၏ ကျန်းမာရေးနှင့် အစားအသောက်ဘေးကင်းလုံခြုံရေး ညွှန်ကြားမှုဦးစီးဌာနမှ လာရောက်စစ်ဆေးရာတွင် ဗီယက်နမ်၏ ငရုတ်သီး၊ နဂါးမောက်သီးနှင့် ဒူးရင်းသီး တင်ပို့မှုများအပေါ် အပြုသဘောဆောင်သည့် အကဲဖြတ်မှုများရရှိခဲ့ပြီး၊ ၎င်းသည် နောင်တွင် စစ်ဆေးမှုအကြိမ်ရေ လျှော့ချနိုင်ရေးအတွက် ညှိနှိုင်းရာတွင် အခြေခံကောင်းတစ်ခု ဖြစ်လာစေကြောင်း သိရပါသည်။

         စိုက်ပျိုးရေးနှင့် သစ်ပင်ပန်းမံကာကွယ်ရေးဌာန ညွှန်ကြားရေးမှူး Huynh Tan Dat က ဗီယက်နမ်သည် အီးယူစံချိန်စံညွှန်းများနှင့် ကိုက်ညီစေရန်အတွက် ဓာတုပစ္စည်းများအပေါ် မှီခိုမှုကိုလျှော့ချကာ ဇီဝနည်းပညာသုံး အပင်ကာကွယ်ရေးနည်းလမ်းများကို တိုးမြှင့်အသုံးပြုပြီး ရေရှည်တည်တံ့သော စိုက်ပျိုးရေးပုံစံများကို မြှင့်တင်နေကြောင်း ပြောကြားခဲ့ပါသည်။ ထို့ပြင် ထုတ်လုပ်မှုပွင့်လင်းမြင်သာမှုရှိစေရန်နှင့် နိုင်ငံတကာလိုအပ်ချက်များနှင့် ကိုက်ညီစေရန် စစ်ဆေးမှုများနှင့် စည်းကမ်းဖောက်ဖျက်မှုများကို တင်းကျပ်စွာ အရေးယူခြင်းများကိုလည်း အရှိန်မြှင့်ဆောင်ရွက်သွားမည်ဖြစ်ကြောင်း သိရပါသည်။

    အီးယူ၏ တင်းကျပ်သော လိုအပ်ချက်များသည် စိန်ခေါ်မှုတစ်ရပ်ဖြစ်သကဲ့သို့ ဗီယက်နမ် စိုက်ပျိုးရေးကဏ္ဍအတွက် ထုတ်ကုန်အရည်အသွေး၊ ပွင့်လင်းမြင်သာမှုနှင့် ရေရှည်တည်တံ့မှုကိုမြှင့်တင်ရန် အခွင့်အလမ်းတစ်ခုလည်းဖြစ်ကြောင်း၊ ထိုမှတစ်ဆင့် နိုင်ငံတကာဈေးကွက်တွင် ဗီယက်နမ်လယ်ယာထွက်ကုန်များ၏ အနေအထားကို ခိုင်မာစေမည်ဖြစ်ကြောင်း ဒုဝန်ကြီး Diep က ပြောကြားခဲ့ကြောင်း သိရှိရပါသည်။

Source: Vnexpress                                                                     

DOCA (ရန်ကုန်)

   စားအုန်းဆီတင်သွင်းမှုသိသာစွာမြင့်တက်လျက်ရှိရာ ၂၀၂၅-၂၀၂၆ ပထမ (၆) လတွင် အိန္ဒိယ၏ ဟင်းသီးဟင်းရွက်ဆီတင်သွင်းမှုသည် တန်ချိန် ၇.၉၄ သန်း (၁၃ ရာခိုင်နှုန်း) မြင့်တက် လျက်ရှိကြောင်း Solvent Extractors Association of India (SEA) က ဗုဒ္ဓဟူးနေ့က‌ ပြောကြား ထားပါသည်။

    ပြီးခဲ့သည့် အစောပိုင်းနှစ်ကာလတူတွင် ကမ္ဘာတစ်ဝန်းစားသုံးဆီတင်သွင်းမှု တန်ချိန် ၇.၀၄ သန်းရှိခဲ့ကြောင်း အိန္ဒိယ၏ဆီထွက်သီးနှံရာသီသည် နိုဝင်ဘာလ မှ အောက်တိုဘာလအထိ ဖြစ် ကြောင်း သိရသည်။

   တင်သွင်းမှုတန်ဖိုးသည် ပြီးခဲ့သည့်နှစ်က ရူပီ ၇၃,၀၀၀ သန်း ရှိခဲ့ရာမှ နိုဝင်ဘာလမှ ဧပြီလ အတွင်း ရူပီ ၈၇,၀၀၀ (၁၉ ရာခိုင်နှုန်း) သို့မြင့်တက်ခဲ့ကြောင်း သိရသည်။ တင်ပို့မှု စုစုပေါင်း အနေ ဖြင့် ဟင်းချက်ဆီတန်ချိန် ၇.၈၂ သန်း နှင့် စားသုံးရန် မဟုတ်သည့်ဆီတန်ချိန် ၁၂၁,၀၀၀ ကို တင်သွင်းထားကြောင်း SEA ကဖော်ပြထားပါသည်။

   စားအုန်းဆီတင်သွင်းမှုသည် ပြီးခဲ့သည့်အစောပိုင်းနှစ်က တန်ချိန် ၂.၇၄ သန်း မှ တန်ချိန် ၃.၉၇ သန်း အထိ နှစ်ဆနီးပါး မြင့်တက်ခဲ့သော်လည်း ပဲပိစပ်နှင့် နေကြာဆီတင်သွင်းမှုသည် တန်ချန် ၄.၁၃ သန်းမှ တန်ချိန် ၃.၈၅ သန်းသို့ ကျဆင်းခဲ့ကြောင်း သိရှိရပါသည်။

    အင်ဒိုနီးရှားနှင့် မလေးရှားနိုင်ငံတို့သည် အိန္ဒိယသို့ စားအုန်းဆီအဓိက တင်ပို့သည့် နိုင်ငံများ ဖြစ်ကြောင်း၊ အာဂျင်တီးနားသည် ပဲပိစပ်ဆီတင်ပို့မှုအများဆုံးဖြစ်ပြီး ဘရာဇီးသည် ဒုတိယ အများဆုံးတင်ပို့သူဖြစ်ကြောင်း၊ ရုရှားနှင့် ယူကရိန်းတို့သည် နေကြာဆီ အဓိကတင်ပို့သည့် နိုင်ငံ များဖြစ်ကြောင်း သိရှိရပါသည်။

    ၂၀၂၅ ခုနှစ် ဧပြီလတွင် စားအုန်းဆီဈေးနှုန်း ၁၄-၁၅ ရာခိုင်နှုန်း မြင့်တက် လာမှုနှင့်အတူ ဟင်းချက်ဆီဈေးနှုန်းများသည် ပြီးခဲ့သည့်နှစ်တွင်သိသာစွာမြင့်တက်ခဲ့ကြောင်း၊ ယင်းနှစ်ကာလတူ မှ ပဲပိစပ်ဆီနှင့် နေကြာဆီဈေးနှုန်းတို့သည်လည်း ၁၇ ရာခိုင်နှုန်း နှင့် ၂၂ ရာခိုင်နှုန်းအကြား မြင့် တက်ခဲ့ကြောင်းသိရှိရပါသည်။

    ပထမနှစ်ဝက်ကာလတွင် အိန္ဒိယသို့ နီပေါနိုင်ငံ၏ သန့်စင်ပြီးဆီများတင်ပို့မှုသည် တန်ချိန် ၂၁၇,၀၀၀ နီးပါးရှိခဲ့ရာ သန့်စင်ပြီး ပဲပိစပ်ဆီ၊ နေကြာဆီ၊ စားအုန်းဆီနှင့် မုန်ညှင်းဆီတို့ အဓိက ပါဝင်ကြောင်း  သိရှိရပါသည်။

    စုစုပေါင်းဟင်းသီးဟင်းရွက်ဆီသိုလှောင်ထားရှိမှုသည် ၂၀၂၅ ခုနှစ် မေလတွင် တန်ချိန် ၁.၃၅ သန်းမှ ၂၀၂၆ ခုနှစ် မေလတွင် တန်ချိန် ၂.၁၂ သန်းအထိ တိုးမြင့်ခဲ့ပြီး ၂၀၂၅ ခုနှစ် ဒီဇင်ဘာ မှစ၍ ပိုက်လိုင်းအတွင်း သိုလှောင်ထားရှိမှု စဉ်ဆက်မပြတ်များပြားလျက်ရှိရာ ဆီထွက်သီးနှံရာသီ ဒုတိယနှစ်ဝက်အထိ တင်သွင်းမှုဆက်လက် မြင့်တက်နေမည်ဖြစ်ကြောင်း သိရှိရပါသည်။

Source: The Business Standard, 13 May 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)