ပြည်ပကုန်သွယ်မှုသတင်းများ

ကမ္ဘောဒီးယားနိုင်ငံနှင့် ဖိလစ်ပိုင်နိုင်ငံတို့ ကုန်သွယ်ရေးနှင့် စိုက်ပျိုးရေးဆိုင်ရာ ဆက်ဆံရေး ပိုမိုခိုင်မာစေရန် ရည်မှန်း

ကမ္ဘောဒီးယားနှင့် ဖိလစ်ပိုင်နိုင်ငံတို့သည် စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်မှုများကို ပိုမိုနက်ရှိုင်းစေရန် ၎င်းတို့၏ ထောက်ခံမှုကို အတည်ပြုခဲ့ကြပြီး၊ လွှတ်တော်ဥက္ကဋ္ဌ ဟွန်ဆင်က စိုက်ပျိုးရေးထုတ်ကုန်များ ပိုမိုတင်ပို့နိုင်မည့် အလားအလာများကို အလေးပေးပြောကြားခဲ့ကြောင်း သိရပါသည်။

အဆိုပါ ကတိကဝတ်သည် လွှတ်တော်၏ Solidarity Palace ၌ မစ္စတာ ဟွန်ဆင်နှင့် ကမ္ဘောဒီးယားနိုင်ငံဆိုင်ရာ ဖိလစ်ပိုင်သံအမတ်ကြီး Flerida Ann Camille P Mayo တို့အကြား မနေ့က ပြုလုပ်ခဲ့သည့် နှုတ်ဆက်ပွဲတွေ့ဆုံမှုအတွင်း ထွက်ပေါ်လာခြင်းဖြစ်ကြောင်း သိရပါသည်။
သံအမတ်ကြီး Mayo ၏ သက်တမ်းအတွင်း နှစ်နိုင်ငံဆက်ဆံရေး တိုးတက်လာမှုကို မစ္စတာ ဟွန်ဆင်က ချီးကျူးစကားပြောကြားခဲ့ကြောင်း လွှတ်တော်ပြောရေးဆိုခွင့်ရှိသူ Chea Thyrith က ပြောကြားခဲ့ကြောင်း သိရသည်။

ဖိလစ်ပိုင်သမ္မတ ဖာဒီနန် မားကို့စ် ဂျူနီယာ၏ ကမ္ဘောဒီးယားခရီးစဉ်နှင့် ဝန်ကြီးချုပ် ဟွန်မာနက်၏ ဖိလစ်ပိုင်ခရီးစဉ်များ အပါအဝင် အဆင့်မြင့်ခေါင်းဆောင်များ၏ အပြန်အလှန် လည်ပတ်မှုများကြောင့် သံတမန်ရေးရာ ဆက်ဆံရေးများ တိုးတက်လာမှုကို သံအမတ်ကြီးက အလေးအနက် ပြောကြားခဲ့ကြောင်း Thyrith က မှတ်ချက်ပြုခဲ့ကြောင်း ပြောကြားခဲ့ပါသည်။

သံအမတ်ကြီး Mayo သည် ကုန်သွယ်ရေးနှင့် ရင်းနှီးမြှုပ်နှံမှု ကဏ္ဍများတွင် ပူးပေါင်းဆောင်ရွက်မှု တိုးချဲ့ရန် အဓိကထား ပြောကြားခဲ့ပြီး၊ ကမ္ဘောဒီးယား စိုက်ပျိုးရေးထုတ်ကုန်များကို ပမာဏပိုမို၍ တင်သွင်းရန် ဖိလစ်ပိုင်နိုင်ငံက များစွာစိတ်ပါဝင်စားကြောင်း အလေးပေးပြောဆိုခဲ့ပါသည်။ ထို့ပြင် ပြည်သူအချင်းချင်း အပြန်အလှန် ထိတွေ့ဆက်ဆံမှုများ ပိုမိုတက်ကြွလာပြီး ဒေသတွင်း ဆက်ဆံရေးကို ပိုမိုနီးကပ်စေကြောင်း ၎င်းက ဖြည့်စွက် ပြောကြားခဲ့ကြောင်း သိရပါသည်။

မစ္စတာ ဟွန်ဆင်က အဆိုပါကတိကဝတ်ကို ကြိုဆိုခဲ့ပြီး ယင်းကဏ္ဍများသည် နှစ်နိုင်ငံဆက်ဆံရေး၏ အခြေခံအုတ်မြစ်ဖြစ်ကြောင်း သိရပါသည်။ ဖိလစ်ပိုင်စျေးကွက်သို့ ဆန်တင်ပို့မှုများ ဆက်လက် မြင့်တက်လာလိမ့်မည်ဟု ယုံကြည်ကြောင်းလည်း ၎င်းက ပြောကြားခဲ့ပါသည်။ ထို့ပြင် ခရီးသွားလုပ်ငန်းကို လွယ်ကူချောမွေ့စေရန်နှင့် စီးပွားရေးပေါင်းစည်းမှုကို အားကောင်းစေရန်အတွက် နှစ်နိုင်ငံအကြား တိုက်ရိုက်လေကြောင်းပျံသန်းမှုများ ပိုမိုတိုးချဲ့ရန် ၎င်းက တိုက်တွန်းခဲ့ကြောင်း သိရပါသည်။ သံအမတ်ကြီး Mayo ကလည်း ကမ္ဘောဒီးယားနိုင်ငံသည် ဖိလစ်ပိုင်ခရီးသွားများအတွက် အဓိက လည်ပတ်ရာနေရာတစ်ခုအဖြစ် ရှိနေဆဲဖြစ်ကြောင်း သဘောတူ လက်ခံခဲ့ကြောင်း သိရပါသည်။ ဆွေးနွေးပွဲအတွင်း မစ္စတာ ဟွန်ဆင်က ကမ္ဘောဒီးယား-ထိုင်း နယ်စပ်ပြဿနာကို ထည့်သွင်းပြောကြားခဲ့ပြီး၊ အဆိုပါအငြင်းပွားမှုကို နိုင်ငံတကာဥပဒေများနှင့်အညီ၊ တည်ဆောက်ထားပြီးဖြစ်သည့် နှစ်နိုင်ငံ ဆွေးနွေးရေးလုပ်ထုံးလုပ်နည်းများမှတစ်ဆင့် ငြိမ်းချမ်းစွာ ဖြေရှင်းရမည်ဖြစ်ကြောင်း ထပ်လောင်းပြောကြားခဲ့ပါသည်။

သံအမတ်ကြီး Mayo က ပြန်လည်တုံ့ပြန်သည့်အနေဖြင့် လက်ရှိအာဆီယံဥက္ကဋ္ဌ ဖြစ်သည့်အားလျော်စွာ ဖိလစ်ပိုင်နိုင်ငံအနေဖြင့် ဒေသတွင်း တည်ငြိမ်မှုကို ဦးစားပေးအဖြစ် ရှိနေစေရေး သေချာစေလျက်၊ ကမ္ဘောဒီးယား-ထိုင်း နယ်စပ်အငြင်းပွားမှုကို ငြိမ်းချမ်းစွာ ဖြေရှင်းနိုင်ရေးအတွက် ကြိုးပမ်းမှုများကို ဆက်လက်ထောက်ခံသွားမည်ဖြစ်ကြောင်း အတည်ပြုပြောကြားခဲ့သည်ဟု သိရှိရပါသည်။

Source: Khmertimes

DOCA (ရန်ကုန်)

ကမ္ဘောဒီးယားနှင့် ဘရာဇီးတို့ လွတ်လပ်သောကုန်သွယ်မှုသဘောတူညီချက် ဖြစ်မြောက်နိုင်ခြေအတွက် ဆွေးနွေးပွဲများ စတင်

ပြည်ပကုန်သွယ်မှုသတင်းများ

ကမ္ဘောဒီးယားနှင့် ဘရာဇီးနိုင်ငံတို့သည် စီးပွားရေးဆိုင်ရာ အလားအလာများကို အမြင့်ဆုံးအထိ မြှင့်တင်နိုင်ရန်အတွက် နှစ်နိုင်ငံလွတ်လပ်သောကုန်သွယ်မှု သဘောတူညီချက်များ (FTAs) နှင့် ဝင်ငွေခွန်နှစ်ထပ်မံစည်းကြပ်မှု ရှောင်လွှဲရေးသဘောတူညီချက်များ (DTAs) ရေးထိုးနိုင်မည့် ဖြစ်မြောက်နိုင်ခြေကို လေ့လာရန်နှင့် ရင်းနှီးမြှုပ်နှံမှုမြှင့်တင်ရေးနှင့် အပြန်အလှန် ကာကွယ်ပေးရေးဆိုင်ရာ သဘောတူညီချက်များကို ပြင်ဆင်ရန် ဆန္ဒရှိကြောင်း ဖော်ပြခဲ့ကြကြောင်း သိရပါသည်။

အဆိုပါ ဆွေးနွေးမှုများကို ဒုတိယဝန်ကြီးချုပ်နှင့် စီးပွားရေးနှင့်ဘဏ္ဍာရေးဝန်ကြီး Aun Pornmoniroth နှင့် ကမ္ဘောဒီးယားနိုင်ငံဆိုင်ရာ ဘရာဇီးသံအမတ်ကြီး Vivian Loss Sanmartin တို့အကြား ဖနွမ်းပင်မြို့တွင် ဇူလိုင် ၁၅ ရက်က ပြုလုပ်ခဲ့သည့် စီစဉ်ထားသော တွေ့ဆုံမှုနှင့် လုပ်ငန်းခွင်ဆွေးနွေးပွဲအတွင်း ပြောကြားခဲ့ခြင်းဖြစ်ကြောင်း သိရပါသည်။

တွေ့ဆုံမှုအတွင်း ဒုတိယဝန်ကြီးချုပ်က အထူးသဖြင့် ၂၀၂၄ ခုနှစ်တွင် ဖနွမ်းပင်မြို့၌ ဘရာဇီးသံရုံး စတင်တည်ထောင်ခဲ့ပြီးနောက်ပိုင်း နှစ်နိုင်ငံဆက်ဆံရေး ဖွံ့ဖြိုးတိုးတက်လာမှုကို မြင့်မားစွာ တန်ဖိုးထားချီးကျူးခဲ့ကြောင်း သိရပါသည်။ မကြာသေးမီနှစ်များအတွင်း နှစ်နိုင်ငံအကြား ကုန်သွယ်မှုပမာဏမှာ သိသိသာသာ မြင့်တက်လာခဲ့ပါသည်။ ၂၀၂၅ ခုနှစ်တွင် နှစ်နိုင်ငံကုန်သွယ်မှုသည် အမေရိကန်ဒေါ်လာ ၁၈၆ သန်းခန့်အထိ ရှိခဲ့ပြီး ၂၀၂၄ ခုနှစ်နှင့် နှိုင်းယှဉ်ပါက ၈၁ ရာခိုင်နှုန်းကျော် တိုးတက်မှုနှုန်း ရှိခဲ့သည်။ သံအမတ်ကြီး ဆန်မာတင်ကလည်း နှစ်ဦးနှစ်ဖက် စီးပွားရေးအကျိုးအမြတ်များအတွက် ရင်းနှီးမြှုပ်နှံမှု၊ စီးပွားရေးချိတ်ဆက်မှုများနှင့် ပုဂ္ဂလိကကဏ္ဍ ပူးပေါင်းပါဝင်မှုများကို မြှင့်တင်ခြင်းဖြင့် ကမ္ဘောဒီးယားနိုင်ငံနှင့် ပူးပေါင်းဆောင်ရွက်မှုကို ပိုမိုခိုင်မာအောင်နှင့် တိုးချဲ့သွားရန် ဘရာဇီးအစိုးရ၏ ခိုင်မာသော ကတိကဝတ်ကို ထပ်လောင်းအတည်ပြုခဲ့ကြောင်း သိရပါသည်။ နှစ်ဖက်စလုံးက စိုက်ပျိုးရေး၊ စွမ်းအင်နှင့် ဘဏ္ဍာရေးနည်းပညာ (FinTech) တို့အပါအဝင် ရေတိုရေရှည် ပူးပေါင်းဆောင်ရွက်မှုအတွက် အဓိက အလားအလာရှိသော ကဏ္ဍအချို့ကို ဖော်ထုတ်ခဲ့ကြ ကြောင်း သိရပါသည်။

Pornmoniroth ကဘရာဇီးအစိုးရနှင့် ပြည်သူများကို အထူးကျေးဇူးတင်ရှိကြောင်း ဖော်ပြခဲ့ပြီး၊ နှစ်နိုင်ငံပြည်သူများထံသို့ သာယာဝပြောမှုများ ဆောင်ကြဉ်းပေးနိုင်ရန်အတွက် နှစ်နိုင်ငံအကြား ဆက်ဆံရေးသည် ဆက်လက်၍ ပိုမိုနက်ရှိုင်းလာလိမ့်မည်ဖြစ်ကြောင်း ခိုင်မာသောယုံကြည်မှုကို ထုတ်ဖော်ပြောကြားခဲ့ကြောင်း သိရှိရပါသည်။

Source: Khmertimes

DOCA (ရန်ကုန်)

ဒုတိယသုံးလပတ်တွင် ၅.၈ ရာခိုင်နှုန်းဖြင့် မျှော်မှန်းထားသည်ထက် ပိုမိုမြန်ဆန်စွာ တိုးတက်လာသည့် မလေးရှားနိုင်ငံ၏ စီးပွားရေး

ပြည်ပကုန်သွယ်မှုသတင်းများ

မလေးရှားနိုင်ငံ၏ စီးပွားရေးသည် ကုန်ထုတ်လုပ်မှုလုပ်ငန်းများ အရှိန်ရလာခြင်းနှင့် သတ္တုတွင်းထွက်ပစ္စည်း ထုတ်လုပ်မှု ပြန်လည်ဦးမော့လာခြင်းတို့ကြောင့် ဒုတိယသုံးလပတ်တွင် မျှော်မှန်းထားသည်ထက် ပိုမိုမြန်ဆန်စွာ တိုးတက်လာခဲ့ကြောင်း တရားဝင် ကနဦးခန့်မှန်းချက်များအရ သိရပါသည်။

မလေးရှားနိုင်ငံ စာရင်းအင်းဌာန၏ အဆိုအရ ဧပြီလမှ ဇွန်လအထိ ဒုတိယသုံးလပတ်အတွင်း စုစုပေါင်း ပြည်တွင်းထုတ်လုပ်မှုတန်ဖိုး (GDP) သည် ယခင်နှစ် အလားတူကာလနှင့် နှိုင်းယှဉ်ပါက ၅.၈ ရာခိုင်နှုန်း တိုးတက်လာခဲ့ကြောင်း သိရပါသည်။ ၎င်းပမာဏသည် Bloomberg သတင်းဌာန၏ စစ်တမ်းကောက်ယူမှုတွင် ခန့်မှန်းထားသည့် ပျမ်းမျှတိုးတက်မှုနှုန်း ၅.၂ ရာခိုင်နှုန်းထက်မက ပိုမိုမြင့်မားခဲ့ပြီး၊ ပထမသုံးလပတ်၏ တစ်နှစ်ထက်တစ်နှစ် တိုးတက်မှုနှုန်း ဖြစ်သော ၅.၄ ရာခိုင်နှုန်းထက်လည်း ပိုမိုမြင့်မားခဲ့ကြောင်း သိရပါသည်။

စိုက်ပျိုးရေးကဏ္ဍမှလွဲ၍ ကျန်စီးပွားရေးကဏ္ဍ အားလုံးတွင် တိုးတက်မှုများ ရှိခဲ့ပြီး၊ စိုက်ပျိုးရေးကဏ္ဍတွင်မူ ကျဆင်းမှု (သို့မဟုတ်) ဆုတ်ယုတ်မှုရှိခဲ့ကြောင်း အဆိုပါဌာနက ဇူလိုင်လ ၁၇ ရက်နေ့တွင် ထုတ်ပြန်သည့် ကြေညာချက်၌ ပြောကြားခဲ့ကြောင်း သိရပါသည်။
အရှေ့အလယ်ပိုင်းစစ်ပွဲ ပြင်းထန်နေမှုကြောင့် စွမ်းအင်နှင့် စက်မှုလုပ်ငန်းသုံး ကုန်ကြမ်းပစ္စည်းများ ပြတ်လပ်မှုများ ကြုံတွေ့နေရသည့်ကြားမှ မ လေးရှားနိုင်ငံအပြင် ၎င်း၏တောင်ဘက်အိမ်နီးချင်း စင်ကာပူနိုင်ငံတို့ပါ ဒုတိယသုံးလပတ်တွင် စီးပွားရေးလုပ်ငန်းများ အားနည်းသွားနိုင်သည်ဟူသော မျှော်လင့်ချက်များကို ဆန့်ကျင်ကျော်လွှားနိုင်ခဲ့ကြောင်း သိရပါသည်။

မလေးရှားနိုင်ငံ၏ စီးပွားရေးသည် ယခုနှစ်တွင် ၄ ရာခိုင်နှုန်းမှ ၅ ရာခိုင်နှုန်းကြား တိုးတက်ရန် မျှော်မှန်းထားပြီး တိုးတက်မှုနှုန်းသည် သတ်မှတ်ချက်၏ အထက်ဝက်ခန့်အထိ ဖြစ်လာနိုင်ခြေရှိကြောင်း မလေးရှားဗဟိုဘဏ် ဥက္ကဋ္ဌ Datuk Seri Abdul Rasheed Ghaffour က ဇူလိုင်လအစောပိုင်းတွင် ပြောကြားခဲ့ကြောင်း သိရပါသည်။

တစ်နှစ်ထက်တစ်နှစ် နှိုင်းယှဉ်ချက်အရ ပံ့ပိုးမှုဘက်ဆိုင်ရာ အချက်အလက်များအရ မလေးရှားနိုင်ငံ စီးပွားရေးထွက်ကုန်၏ ထက်ဝက်ကျော်ကို ကိုယ်စားပြုသော ဝန်ဆောင်မှုကဏ္ဍ၏ တိုးတက်မှုနှုန်းသည် ဒုတိယသုံးလပတ်တွင် ၅.၄ ရာခိုင်နှုန်းဖြင့် အနည်းငယ် လျော့နည်းခဲ့ပြီး၊ လက္ကားနှင့် လက်လီကုန်သွယ်မှုလုပ်ငန်းများက အဓိကပံ့ပိုးပေးခဲ့ကြောင်း သိရပါသည်။

အခြားတစ်ဖက်တွင်မူ ကုန်ထုတ်လုပ်မှုကဏ္ဍသည် ပို့ကုန်ဦးတည်သော စက်မှုလုပ်ငန်းများ၊ အထူးသဖြင့် လျှပ်စစ်၊ အီလက်ထရွန်နစ်နှင့် အလင်းပြပစ္စည်း ထုတ်ကုန်များ ထုတ်လုပ်မှုကြောင့် ပထမသုံးလပတ်တွင် ၅.၉ ရာခိုင်နှုန်းရှိခဲ့ရာမှ ဒုတိယသုံးလပတ်တွင် ၇.၅ ရာခိုင်နှုန်းအထိ အရှိန်အဟုန် မြင့်တက်လာခဲ့ကြောင်း သိရပါသည်။ သတ္တုတွင်းနှင့် ကျောက်မျက်တူးဖော်ရေးလုပ်ငန်းများမှ ထွက်ရှိမှုသည် ၂၀၂၆ ခုနှစ်၏ ပထမသုံးလအတွင်း ၂.၁ ရာခိုင်နှုန်း ကျဆင်းခဲ့ရာမှ ယခုအခါတွင် သဘာဝဓာတ်ငွေ့ကို အဓိကအခြေခံ၍ ၁၀.၂ ရာခိုင်နှုန်းအထိ ပြန်လည်ဦးမော့လာခဲ့ကြောင်း သိရပါသည်။ စိုက်ပျိုးရေးကဏ္ဍမှာမူကဏ္ဍခွဲ အားလုံးနီးပါး ကျဆင်းသွားခဲ့ပြီးနောက် ပြီးခဲ့သည့် သုံးလပတ်က ၂.၆ ရာခိုင်နှုန်း တိုးတက်ခဲ့ရာမှ ယခုတွင် ၃.၇ ရာခိုင်နှုန်းအထိ ကျဆင်းသွားခဲ့ကြောင်း သိရှိရပါသည်။

Source: The Edge Malaysia

DOCA (ရန်ကုန်)

သရက်သီးများ ပြည်ပပို့ကုန်ပန်းတိုင် မြင့်မြင့်မားမား သတ်မှတ်လိုက်သည့် အင်ဒိုနီးရှားနိုင်ငံ

ပြည်ပကုန်သွယ်မှုသတင်းများ

အင်ဒိုနီးရှားနိုင်ငံသည် ဂျာဗားအရှေ့ပိုင်းမှ သရက်သီး ပြည်ပတင်ပို့မှုကို မြှင့်တင်ရန် ကြိုးပမ်းနေပြီး၊ ဂျပန်နိုင်ငံကို ဦးစားပေး ပို့ကုန်စျေးကွက်အဖြစ် သတ်မှတ်လိုက်ကြောင်း သိရပါသည်။ အင်ဒိုနီးရှားနိုင်ငံ ရွှေ့ပြောင်းအခြေစိုက်နေထိုင်ရေးဆိုင်ရာဝန်ကြီး Muhammad Iftitah Sulaiman Suryanagara က ဂျပန်နိုင်ငံတွင် အရည်အသွေးမြင့် ပရီမီယံသစ်သီးဝလံများအတွက် ဝယ်လိုအားအားကောင်းလျက်ရှိပြီး၊ ကုန်စည်အခြေပြု စီးပွားရေးဇုန်များ ဖော်ဆောင်ခြင်းက လုပ်ငန်းကဏ္ဍအတွင်း ကြုံတွေ့နေရသည့် နည်းပညာပိုင်းဆိုင်ရာ ကုန်သွယ်မှု အတားအဆီးများကို ဖြေရှင်းကျော်လွှားနိုင်ရန် အထောက်အကူပြုလိမ့်မည်ဟု ပြောကြားခဲ့ ကြောင်း သိရပါသည်။ သစ်သီးဖျက်ပိုး ကဲ့သို့သော စိန်ခေါ်မှုများသည် ဈေးကွက်ဝင်ရောက်ရေးအတွက် အတားအဆီးများ ဖြစ်စေနိုင်သော်လည်း၊ ယင်းအတားအဆီးများကို ကျော်လွှားနိုင်ပါက စိုက်ပျိုးထုတ်လုပ်သူများအတွက် ပိုမိုမြင့်မားသော တန်ဖိုးများကို ဖန်တီးပေးနိုင်လိမ့် မည်ဟု ဝန်ကြီးကပြောကြားခဲ့ကြောင်း သိရပါသည်။

ဂျာဗားအရှေ့ပိုင်း၊ Pasuruan ခရိုင်မှ ထွက်ရှိသော ထောပတ်သရက်သီးများနှင့် Probolinggo ခရိုင်မှ ထွက်ရှိသော အရုမာနစ်သရက်သီးများသည် ထိပ်တန်းဥယျာဉ်ခြံသီးနှံ ပို့ကုန်များဖြစ်လာနိုင်သည့် အလားအလာရှိကြောင်း သိရပါသည်။ အဆိုပါဒေသများမှ ထွက်ရှိသော သစ်သီးဝလံများကို အမေရိကန်၊ တရုတ်နှင့် သြစတြေးလျနိုင်ငံ သံအမတ်ကြီးများထံ ပုံမှန်ဂါရဝပြု လက်ဆောင်ပေးအပ်လေ့ရှိပြီး ကောင်းမွန်သော တုံ့ပြန်မှုများ ရရှိထားကြောင်းလည်း ဝန်ကြီးက ပြောကြားခဲ့ပါသည်။

အဆိုပါ ပြည်ပတင်ပို့မှု အားကောင်းလာစေရန်အတွက် ရွှေ့ပြောင်းအခြေစိုက်နေထိုင်ရေး ဝန်ကြီးဌာနသည် အခြားသော အစိုးရအေဂျင်စီများနှင့် ပူးပေါင်းကာ စိုက်ပျိုးထုတ်လုပ်ခြင်း၊ ပြုပြင်မွမ်းမံခြင်းမှသည် ဈေးကွက်ရှာဖွေခြင်းနှင့် ပြည်ပတင်ပို့ခြင်းအထိ တန်ဖိုးကွင်းဆက် တစ်ခုလုံးကို အားကောင်းစေမည့် ကုန်စည်အခြေပြုဒေသများ ဖော်ဆောင်ရန် ပြင်ဆင်နေကြောင်း သိရပါသည်။

ဒေသတစ်ခုချင်းစီကို သရက်သီး၊ ဒူးရင်းသီး၊ အုန်းသီး သို့မဟုတ် အခြားသော စိုက်ပျိုးရေးထွက်ကုန်များဖြစ်စေ ၎င်းတို့၏ နှိုင်းယှဉ်ချက်အရ သာလွန်ကောင်းမွန်သည့် အားသာချက်များအပေါ်မူတည်၍ ဖွံ့ဖြိုးတိုးတက်အောင် ဆောင်ရွက်သွားမည်ဖြစ်ကြောင်း Suryanagara က အလေးပေးပြောကြားခဲ့ကြောင်း သိရပါသည်။

Source: Fruitnet.com

DOCA (ရန်ကုန်)

မလေးရှားနိုင်ငံမှ တရုတ်နိုင်ငံသို့ ဒူးရင်းသီးအစို တင်ပို့ရန် ထိုင်းနိုင်ငံဖြတ်ကျော် ကုန်းလမ်းလမ်းကြောင်းကို စဉ်းစားလျက်ရှိ

ပြည်ပကုန်သွယ်မှုသတင်းများ

မလေးရှားနိုင်ငံသည် သယ်ယူပို့ဆောင်ရေး စရိတ်စကများ လျှော့ချရန်နှင့် ပြည်တွင်း၌ ဒူးရင်းသီးများ အလွန်အကျွံ ထွက်ရှိနေသည့် ပြဿနာကို ဖြေရှင်းရန်အတွက် တရုတ်နိုင်ငံ၏ ချမ်းသာကြွယ်ဝသော ကမ်းရိုးတန်းမြို့ကြီးများအပြင် အခြားဒေသများရှိ စားသုံးသူများထံပါ ရောက်ရှိနိုင်မည့် တရုတ်နိုင်ငံသို့ ဒူးရင်းသီးအစို တင်ပို့မည့် ကုန်းလမ်းပို့ကုန် လမ်းကြောင်းသစ် တစ်ခုကို ရှာဖွေဖော်ထုတ်လျက်ရှိသည်။

မလေးရှားနိုင်ငံသည် ပြည်တွင်းစိုက်ပျိုးထုတ်လုပ်သော ဒူးရင်းသီးများကို တရုတ်နိုင်ငံသို့ ကုန်းလမ်းမှတစ်ဆင့် တင်ပို့နိုင်မည့် လမ်းကြောင်းတစ်ခုကို ဖော်ဆောင်ရန်အတွက် ထိုင်းအစိုးရ၊ တရုတ်နိုင်ငံ အကောက်ခွန် အထွေထွေအုပ်ချုပ်မှုအာဏာပိုင်အဖွဲ့ (GACC) တို့နှင့် ဆွေးနွေးမှုများ ပြုလုပ်နေကြောင်း Malay Mail သတင်းဌာနတွင် ဖော်ပြထားကြောင်း သိရသည်။

စိုက်ပျိုးရေးနှင့် စားနပ်ရိက္ခာဖူလုံရေးဝန်ကြီး Datuk Seri Mohamad Sabu က ဤအစီအစဉ်သည် ပြည်နယ်အများအပြားတွင် တစ်ပြိုင်နက်တည်း ဖြစ်ပေါ်နေသော ဒူးရင်းသီးရာသီကြောင့် ဒူးရင်းသီးများ အလွန်အကျွံ ပိုလျှံနေချိန်တွင် ဒူးရင်းစိုက်တောင်သူများကို ကူညီပံ့ပိုးပေးရန် အစိုးရ၏ ကြိုးပမ်းဆောင်ရွက်မှုတစ်ရပ်ဖြစ်ကြောင်း ပြောကြားခဲ့သည်။

၂၀၂၆ ခုနှစ် သြဂုတ်လတွင် ကုန်ဆုံးမည့် အမြင့်ဆုံးရာသီမတိုင်မီ ပိုလျှံနေသော ထုတ်လုပ်မှုများကို ကူညီထိန်းညှိပေးရန်အတွက် ဖက်ဒရယ်စိုက်ပျိုးရေးစျေးကွက်ရှာဖွေရေး အာဏာပိုင်အဖွဲ့ (FAMA) အနေဖြင့် ရင်းဂစ် ၇ သန်း (စင်္ကာပူဒေါ်လာ ၂.၂ သန်း) တန်ဖိုးရှိ ဒူးရင်းသီး တန်ချိန် ၁,၀၀၀ ကို ဝယ်ယူရန် မျှော်မှန်းထားကြောင်း The Star သတင်းစာတွင် ဖော်ပြထားသည်။ ဤအစီအစဉ်သည် မလေးရှားနိုင်ငံ၏ ဒူးရင်းသီးလုပ်ငန်းတွင် ထုတ်လုပ်မှုပမာဏက လက်ရှိတင်ပို့နိုင်စွမ်းထက် ပိုမိုများပြားနေပြီး ပြည်တွင်းလက်လီစျေးနှုန်းများ ထိုးကျနေသည့် ဖိအားများနှင့် ရင်ဆိုင်နေရချိန် တွင် ပေါ်ပေါက်လာခြင်းကြောင်း သိရသည်။

ဒူးရင်းစိုက်ခင်းများစွာ သီးပွင့်ရိတ်သိမ်းနိုင်သည့် သက်တမ်းသို့ ရောက်ရှိလာခြင်းကြောင့် ထွက်ရှိမှုနှုန်း မြင့်တက်လာပြီး ယခုနှစ်ပိုင်းအတွင်း အခက်ခဲဆုံးသော ရာသီတစ်ခုကို ဖြတ်သန်းနေရသည်။ လက်ရှိတွင် တရုတ်နိုင်ငံသို့ လေကြောင်းလိုင်းဖြင့် တစ်ရက်လျှင် ဒူးရင်းသီးအစို တန်ချိန် ၄၀ ခန့်သာ တင်ပို့နိုင်သဖြင့် စရိတ်သက်သာသော ကုန်းလမ်းလမ်းကြောင်းကို အသုံးပြုနိုင်ပါက ပိုမိုများပြားသော တန်ဖိုးပမာဏကို တင်ပို့နိုင်မည်ဖြစ်ပြီး ပြည်တွင်း၌ ပိုလျှံနေမှုကိုလည်း သက်သာ စေမည်ဟု တာဝန်ရှိသူများက ယုံကြည်နေကြသည်။

အကယ်၍ ခွင့်ပြုချက်ရရှိပါက ဒူးရင်းသီးအစိုကို ကုန်းလမ်းမှတစ်ဆင့် တင်ပို့ခြင်းက တင်ပို့မှုပမာဏကို သိသိသာသာ တိုးတက်စေမည့်အပြင် သယ်ယူပို့ဆောင်ရေးစရိတ်ကိုလည်း ၄၀ ရာခိုင်နှုန်း အထိ လျှော့ချပေးနိုင်မည်ဖြစ်ကြောင်း ဤကိစ္စနှင့် နီးစပ်သည့် မလေးရှားအရာရှိ တစ်ဦးက The Straits Times သို့ ပြောကြားခဲ့ကြောင်း သိရှိရပါသည်။

Source : VN Express

DOCA (ရန်ကုန်)

မလေးရှားနိုင်ငံ၏ စားအုန်းဆီဈေးနှုန်းသည် ဩဂုတ်လ၌ အတက်အကျ အကန့်အသတ်အတွင်းရှိနိုင်

ပြည်ပကုန်သွယ်မှုသတင်းများ

    မလေးရှားနိုင်ငံရှိ စားသုံးဆီအဓိကတင်သွင်းသူများအနေဖြင့် စားအုန်းဆီဝယ်လိုအား အေး နေပြီး စွမ်းအင်ဈေးနှုန်း အခိုင်အမာရှိနေသော်လည်း စားအုန်းဆီဈေးနှုန်းသည် နောက်လအတွင်း အတက်အကျ အကန့်အသတ်အတွင်း ရှိနိုင်ကြောင်း စားအုန်းဆီကောင်စီ(industry council) က ဗုဒ္ဓဟူးနေ့တွင် ပြောကြားခဲ့သည်။

စားအုန်းဆီကြမ်းဈေးနှုန်းသည် ဩဂုတ်လတွင် တစ်တန်ကို ၄,၄၀၀ ရင်းဂစ် မှ ၄,၆၅၀ ရင်းဂစ် အကြား အရောင်းအဝယ်ဖြစ်နိုင်မည်ဟု မျှော်မှန်းထားကြောင်း မလေးရှားစားအုန်းဆီ ကောင်စီက ထုတ်ပြန်ကြေညာချက်တစ်ခုမှာ ပြောကြားခဲ့သည်။ ဘိုင်အိုဒီဇယ်ဝယ်ယူမှု စည်းမျဉ်း သတ်မှတ်ချက်များအပြင် အမေရိကန်-အီရန် ပဋိပက္ခပြန်လည်ဖြစ်ပွားခြင်းကြောင့် လောင်စာဆီ ဈေးနှုန်းသည် စားအုန်းဆီနှင့် ပဲပုတ်ဆီဈေးနှုန်းထက် ပိုမိုမြင့်တက်စေလာသည်ကို ဂရုပြုမိလာ စေခဲ့သည်။

အဓိကစားသုံးသည့် ဈေးကွက်တွင် ဟင်းသီးဟင်းရွက်ဆီလက်ကျန်ပမာဏမြင့်မားနေခြင်း နှင့် ဝယ်လိုအားနည်းနေခြင်းတို့ကြောင့် ဈေးနှုန်းပိုမိုရရှိရန် အကန့်အသတ်ရှိနိုင်ကြောင်း အဆိုပါ ကောင်စီက ဆိုသည်။

ရေခဲမုန့်မှသည် ဆပ်ပြာဆီအထိ တွင်ကျယ်စွာ အသုံးပြုလျက်ရှိသည့် စားသုံးဆီ၏ ဈေးနှုန်း သည် ရာသီဥတု အခြေအနေအပေါ် စိုးရိမ်မှုများကြောင့် ကုန်ထုတ်လုပ်မှုကျဆင်းခဲ့သဖြင့် ယခုနှစ် မှစ၍ ၁၄ ရာခိုင်နှုန်း မြင့်တက်သွားသည်။ သို့သော်ငြားလည်း ဝယ်လိုအားနည်းနေချိန် ပစ္စည်းလက် ကျန် များပြားခြင်းက ဈေးနှုန်း အဆမတန်မြင့်တက်ခြင်းကို ထိန်းသိမ်းနိုင်ဖို့အတွက် အထောက် အပံ့ ဖြစ်စေခဲ့သည်။

မတ်လကစတင်ပြီး ရာသီအလိုက် ထုတ်လုပ်မှု တိုးတက်သည့် ကာလသို့ ရောက်ရှိလာသဖြင့် လစဉ်ထုတ်လုပ်မှုပမာဏသည် ဇွန်လ၌ ၈ ရာခိုင်နှုန်းထိ မြင့်တက်ကာ တန်ချိန်ပေါင်း ၁.၆၃သန်းထိ ရှိခဲ့သောကြောင့် မလေးရှားနိုင်ငံရှိ ဆီလက်ကျန်ပမာဏသည် ‌၄ လ အတွင်း အမြင့်ဆုံး မြင့်တက် ခဲ့သည်။

အဓိက တင်သွင်းသည့်ဈေးကွက်၌ ဟင်းသီးဟင်းရွက်ဆီဝယ်လိုအားသည် အသင့်အတင့် အနေအထားသာ ရှိနေသေးကြောင်း အဆိုပါ ကောင်စီက ပြောကြားခဲ့သည်။ ထို့အပြင် တင်သွင်းမှု နှေးကွေးနေသော်ငြားလည်း လက်ကျန်ပမာဏမြင့်မားနေခြင်းက ငွေကြေးဖောင်းပွမှု ဖိအားများ ကြားတွင် ဆီစားသုံးမှုနည်းပါးနေသည်ကို ညွှန်းဆိုနေကြောင်း သိရသည်။

သို့သော်လည်း အိန္ဒိယနိုင်ငံသည် ဒီပါဝလီ (Diwali) ပွဲတော် မတိုင်မီကာလများဖြစ်သည့် ဇူလိုင်လ နှင့် စက်တင်ဘာလအကြားကာလများတွင် ပုံမှန်အားဖြင့် နှစ်စဉ် ဟင်းသီးဟင်းရွက်ဆီ လိုအပ်ချက်၏ ၃၀ ရာခိုင်နှုန်းခန့်ကို တင်သွင်းလေ့ရှိသဖြင့် ကုန်ပစ္စည်း ပြန်လည်ဖြည့်တင်းမှုများ ပြုလုပ်လာမည်ဖြစ်ရာ ဝယ်လိုအားကို ပြန်လည်ဖြည့်တင်းပေးလိမ့်မည်ဟု ကောင်စီက မျှော်လင့် ထားသည်။

မလေးရှားနိုင်ငံစားအုန်းဆီကောင်စီကို အစိုးရမှကိုယ်စားလှယ်များအပြင် ဆီစက်ပိုင်ရှင် များ၊ ဆီသန့်စင် စက်ပိုင်ရှင်များ၊ စိုက်ပျိုးသူ တောင်သူငယ်များ၊ ထုတ်လုပ်သူများနှင့် အခြားသော စက်မှုလုပ်ငန်း အသင်းအဖွဲ့များဖြင့် ပါဝင်ဖွဲ့စည်းထားရှိကြောင်း သိရသည်။

Source: The Edge Malaysia, 23 Jul 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အင်ဒိုနီးရှားအစိုးရက ဇီဝဒီဇယ်ဆီ B50 ထုတ်လုပ်ပိုင်ခွင့်ပြုမှုသည် စားအုန်းဆီကြမ်းတင်ပို့မှုကို မထိခိုက်စေကြောင်း ပြောကြား

ပြည်ပကုန်သွယ်မှုသတင်းများ

အင်ဒိုနီးရှားနိုင်ငံ၊ စီးပွားရေးရေးရာ ပေါင်းစပ်ညှိနှိုင်းရေးဝန်ကြီးဌာနက စားအုန်းဆီ ၅၀ % ပါဝင်သည့် ဇီဝဒီဇယ်ဆီ(B50)အစီအစဉ်ကို မဖြစ်မနေအကောင်အထည်ဖော်ပါက အင်ဒိုနီးရှား၏ စားအုန်းဆီကြမ်း (CPO) တင်ပို့မှုပမာဏကို လျှော့ချစေမည်မဟုတ်ကြောင်း အာမခံထားသည် ကို အင်ဒိုနီးရှားအခြေစိုက် ANTARA သတင်းဌာနက ဇူလိုင်လ ၂၀ ရက်က ဖော်ပြထားသည်။

စီးပွားရေးရေးရာပေါင်းစပ်ညှိနှိုင်းရေးဝန်ကြီးဌာနမှ ချိတ်ဆက်မှုနှင့် ဝန်ဆောင်မှုဖွံ့ဖြိုး တိုးတက်မှုဆိုင်ရာ ကျွမ်းကျင်ပညာရှင်ဖြစ်သူ ဒုတိယဝန်ကြီး Mr. Dida Gardera က (B50) အစီ အစဉ်ကို မဖြစ်မနေ အကောင်အထည်ဖော်ပါက အင်ဒိုနီးရှား၏ စားအုန်းဆီကြမ်း (CPO) တင်ပို့မှု ပမာဏကို လျှော့ချစေမည်မဟုတ်ကြောင်း အာမခံထား ပြောကြားရခြင်းမှာ ၂၀၂၄ ခုနှစ် တွင် B35 အစီအစဉ်မှ B40 အစီအစဉ်သို့အကူးအပြောင်းကာလအတွင်း နိုင်ငံ၏အောင်မြင်သော လမ်းကြောင်း မှတ်တမ်းက ကျောထောက်နောက်ခံပြုထားခြင်းကြောင့်ဖြစ်ကြောင်း ဇူလိုင်လ ၁၇ ရက် (တနင်္လာနေ့) တွင် ပြောကြားခဲ့သည်။

၂၀၂၄ ခုနှစ်မှ ၂၀၂၅ ခုနှစ်အတွင်း B35 မှ B40 သို့ တိုးမြှင့်လိုက်သည်နှင့်အမျှ ပြည်တွင်း စားအုန်းဆီ လိုအပ်ချက်သည် ကီလိုလီတာ ၃ သန်းမှ ၄ သန်းအထိ မြင့်တက်လာခဲ့သည်။ အဓိက အားဖြင့် နိုင်ငံတော်၏ စားအုန်းဆီပို့ကုန်ကလည်း အဆိုပါကာလတွင် ကီလိုလီတာ ၃ သန်းမှ ၄ သန်းအထိ မြင့်တက်လာပါသည်ဟု Mr. Dida က ရှင်းလင်းပြောကြားသည်။

ခိုင်မာသော ပို့ကုန်များသည် ပြည်တွင်း ဇီဝဒီဇယ်ဆီကဏ္ဍအတွက် အရေးပါသော မက်လုံး တစ်ခု အဖြစ်ရပ်တည်နေကာ နိုင်ငံတကာကုန်သွယ်မှုကို အထိခိုက်ခံ၍ မရသည့်အတွက် အစိုးရ အနေဖြင့် ဟန်ချက်ညီအောင် ထိန်းသိမ်းဖော်ဆောင်လျက်ရှိကြောင်း ၎င်းကအလေးပေး ပြောကြား ခဲ့သည်။

၎င်း၏အဆိုအရ အစိုးရက စားအုန်းဆီမဟာဗျူဟာတွင် အဓိကကဏ္ဍကြီးသုံးရပ်ဖြစ်သည့် B50 လုပ်ပိုင်ခွင့်ပြုမှု၊ ပြည်တွင်းစားသုံးဆီရရှိမှုနှင့် အသေးစားစိုက်ခင်းများ သက်သာချောင်ချိရေး တို့ကို ဦးစားပေးဆောင်ရွက်ခဲ့သည်။

အဆိုပါ ဦးစားပေးလုပ်ငန်းသုံးရပ် တစ်ပြိုင်နက် အောင်မြင်မှုရရှိစေရန် ဝန်ကြီးဌာနက ဆီအုန်း စိုက်ခင်းရန်ပုံငွေ စီမံခန့်ခွဲရေးအင်ဂျင်စီ (Plantation Fund Management Agency (BPDP)) အပါအဝင် သက်ဆိုင်ရာအေဂျင်စီများနှင့် အနီးကပ်ညှိနှိုင်းဆောင်ရွက်လျက်ရှိပါကြောင်း ၎င်းက ဆိုသည်။

အစိုးရက ကာဗွန်ထုတ်လွှတ်မှုလျှော့ချရန်နှင့် အမျိုးသားစွမ်းအင်လုံခြုံရေးကို အား ကောင်း ခိုင်မာစေရန် အစိုးရ၏မဟာဗျူဟာကြိုးပမ်းမှုတစ်စိတ်တစ်ပိုင်းအဖြစ် ၂၀၂၆ ခုနှစ် ဇူလိုင်လတွင် B50 လုပ်ပိုင်ခွင့်ပြုမှုကို တရားဝင်စတင်ခဲ့သည်။ B50 မူဝါဒက သဘာဝပတ်ဝန်းကျင် အကျိုးကျေးဇူး များအပြင် ၂၀၂၆ ခုနှစ်ကုန်တွင် နိုင်ငံခြားငွေ ရူပီ ၁၇၀ ထရီလီယံ (ညီမျှအမေရိကန်ဒေါ်လာ ၉.၄၈ ဘီလီယံ)ကို နိုင်ငံတော်က ချွေတာနိုင်မည်ဖြစ်ပြီး ပြည်တွင်းစားအုန်းဆီကြမ်း၏ တန်ဖိုးကို မြှင့်တင်ကာ လူပေါင်း ၂.၁ သန်းခန့်အတွက် လည်း အလုပ်အကိုင်အခွင့်အလမ်းများ ဖန်တီးပေး မည်ဖြစ်သည်။

      လွန်ခဲ့သည့် နှစ်ပတ်အကြာ ဇူလိုင်လ ၉ ရက်တွင် သမ္မတက B50 မူဝါဒကို တရားဝင် စတင် ဆောင်ရွက်ရေးမိတ်ဆက်သည့် Launch အခမ်းအနားပြုလုပ်ခဲ့ပြီး B50 အားအပြည့်အဝ ဖော်ဆောင်မှုကို ကြိုတင်စီမံထားသည့်အဆင့်လိုက် အချိန်ဇယားအတိုင်း လုပ်ဆောင်သွားမည် ဖြစ်ကြောင်း ၎င်းကဆိုသည်။

      လက်ရှိ B40 စားအုန်းဆီစတော့လက်ကျန်များကို ဖျက်သိမ်းရန်နှင့် B50 စံနှုန်းနှင့်အညီ နည်းပညာပိုင်းဆိုင်ရာ ရောစပ်မှုလုပ်ငန်းစဉ်များကို ချိန်ညှိဆောင်ရွက်ရန် လောင်စာဆီဖြန့်ဖြူး ရောင်းချသူများအား သုံးလကြာ အကူးအပြောင်းကာလအဖြစ် ခွင့်ပြုသတ်မှတ်ထားကြောင်း သိရ သည်။

      B50 အစီအစဉ်အတွက် အရာအားလုံး အဆင်သင့်ဖြစ်နေပါကြောင်း၊ သို့သော် ကျန်ရှိနေ သေးသည့် B40 စားအုန်းဆီစတော့လက်ကျန်များကြောင့် ထုံးစံအတိုင်း အကူးအပြောင်း ဖြစ်စဉ် တစ်ခု ဖြစ်လာမှာဖြစ်ကြောင်း၊ လက်ရှိမှာတော့ အစီအစဉ်အတိုင်း လုပ်ဆောင်နေပြီး တင်းကျပ် သည့် စောင့်ကြည့်အကဲဖြတ်မှုကို ဆက်လက်လုပ်ဆောင်သွားမှာဖြစ်ကြောင်း စီးပွားရေးရေးရာ ပေါင်းစပ်ညှိနှိုင်းရေးဝန်ကြီးဌာနမှ ချိတ်ဆက်မှုနှင့် ဝန်ဆောင်မှု ဖွံ့ဖြိုးတိုးတက်မှုဆိုင်ရာ ကျွမ်းကျင် ပညာရှင်ဖြစ်သူ ဒုတိယဝန်ကြီး Mr. Dida Gardera က နိဂုံးချုပ်ပြောကြားခဲ့သည်။

Source: ANTARA, 20 Jul 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

သဘာဝရော်ဘာ တစ်ကီလိုဂရမ်လျှင် ရူပီး ၅၀ ထပ်မံတိုးမြှင့်၍ အိန္ဒိယအစိုးရဝယ်ယူလျက်ရှိ

ပြည်ပကုန်သွယ်မှုသတင်းများ

ရော်ဘာစိုက်တောင်သူများသက်သာချောင်ချိစေရေး ‌ငွေကြေးထောက်ပံ့မှုအနေဖြင့် သဘာဝ ရော်ဘာတစ်ကီလိုဂရမ်လျှင် ရူပီး ၂၀၀ မှ ၂၅၀ အထိ တိုးမြှင့်၍ အနိမ့်ဆုံးဈေး သတ်မှတ် ဝယ်ယူ ပေးလျက်ရှိကြောင်း Kerala ပြည်နယ်အစိုးရက တနင်္လာနေ့က ပြောကြားခဲ့သည်။

ရော်ဘာထုတ်လုပ်ရေးအထောက်အကူပြုအစီအစဉ်အရ အနိမ့်ဆုံးဈေးသတ်မှတ်ဝယ်ယူခြင်း ကို ၂၀၂၆ ခုနှစ်၊ ဇူလိုင်လ ၃ ရက်နေ့မှစတင်၍ ဥပဒေမူကြမ်းတွင် စတင်ထည့်သွင်းသွားမည် ဖြစ် ကြောင်း ပြည်နယ်ဝန်ကြီးချုပ်ရုံးမှ တာဝန်ရှိသူတစ်ဦးကပြောကြားခဲ့သည်။

ပြည်နယ်ဝန်ကြီး V D Satheesan က ထုတ်လုပ်မှုကုန်ကျစရိတ်မြင့်တက်လာသည့်အတွက် ရော်ဘာစိုက်တောင်သူများအား ထောက်ပံ့ပေးနိုင်ရေး နိုင်ငံ့ဘဏ္ဍာရန်ပုံငွေတွင် တိုးမြှင့်ထည့်သွင်း ထားခြင်းဖြစ်ကြောင်းအသိပေးကြေညာထားသည်။

ရော်ဘာစိုက်တောင်သူများ၊ အသင်းအဖွဲ့များနှင့် လူထုကိုယ်စားလှယ်များက စိုက်ပျိုးကုန် ကျစရိတ်အဆမတန်များပြားနေသည့်အတွက် အနိမ့်ဆုံးဈေးသတ်မှတ်ချက်အား တိုးမြှင့်ပေးရန် တောင်းဆိုလျက်ရှိကြောင်း သိရသည်။ တောင်းဆိုမှုများအရ အစိုးရအနေဖြင့် သဘာဝရော်ဘာ တစ်ကီလိုဂရမ်လျှင် ရူပီး ၂၀၀ မှ ၂၅၀ အထိ ရူပီး ၅၀ ထပ်မံတိုးမြှင့်၍ ဝယ်ယူသွားရန် ဆုံးဖြတ်ခဲ့ ကြောင်းသိရသည်။

Source :The Hindu Business Line, 20 Jul 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

စင်္ကာပူနိုင်ငံ၏ ရေနံမဟုတ်သော ပြည်တွင်းပို့ကုန် တိုးတက်မှု လျော့ကျသွား

ပြည်ပကုန်သွယ်မှုသတင်းများ

၂၀၂၆ ခုနှစ် ဇူလိုင်လ ၁၇ ရက်နေ့တွင် ထုတ်ပြန်ခဲ့သည့် Enterprise Singapore ၏ တရားဝင်အချက်အလက်များအရ စင်္ကာပူနိုင်ငံ၏ ရေနံမဟုတ်သော ပြည်တွင်းပို့ကုန်သည် မေလတွင် ၃၈.၄ ရာခိုင်နှုန်းအထိ စံချိန်တင်တိုးတက်ခဲ့ရာမှ ယခု ဇွန်လတွင် တစ်နှစ်ထက်တစ်နှစ် နှိုင်းယှဉ်ချက်အရ ၂၀.၇ ရာခိုင်နှုန်းသာ တိုးတက်ခဲ့သဖြင့် တိုးတက်မှုနှုန်း လျော့နည်းသွားကြောင်း သိရသည်။

AI နှင့် သက်ဆိုင်သော ထုတ်ကုန်များအပေါ် ဝယ်လိုအား မြင့်မားမှုကြောင့် လျှပ်စစ်ပစ္စည်း ပို့ကုန်သည် ၁၀၅.၁ ရာခိုင်နှုန်းအထိ သိသိသာသာ ထိုးတက်သွားခဲ့သော်လည်း လျှပ်စစ်မဟုတ်သော ပို့ကုန်မှာမူ ၂.၉ ရာခိုင်နှုန်း ကျဆင်းသွားခဲ့သည်။

ရေနံမဟုတ်သော ပြန်လည်ပို့ကုန်မှာ မေလတွင် ၃၃.၅ ရာခိုင်နှုန်း တိုးတက်ခဲ့ရာမှ ဇွန် လတွင် တစ်နှစ်ထက်တစ်နှစ် နှိုင်းယှဉ်ချက်အရ ၆၀.၃ ရာခိုင်နှုန်းအထိ တိုးတက်မှုပိုမိုမြန်ဆန်လာခဲ့သည်။ လျှပ်စစ်ပစ္စည်း ပြန်လည်ပို့ကုန်နှင့် လျှပ်စစ်မဟုတ်သော ပြန်လည်ပို့ကုန် တို့သည် အသီးသီး ၈၃.၁ ရာခိုင်နှုန်းနှင့် ၂၈ ရာခိုင်နှုန်းစီ အသီးသီး တိုးတက်ခဲ့ကြောင်း သိရသည်။

စင်္ကာပူနိုင်ငံ၏ စုစုပေါင်း ကုန်စည်ကူးသန်းရောင်းဝယ်မှုသည် ပို့ကုန်နှင့် သွင်းကုန် နှစ်ခုစလုံး တိုးတက်လာခဲ့ခြင်းကြောင့် ပြီးခဲ့သည့်လက ၃၉.၆ ရာခိုင်နှုန်း တိုးတက်ခဲ့ရာမှ ဇွန်လတွင် ၄၉.၃ ရာခိုင်နှုန်းအထိ ဆက်လက်ကျယ်ပြန့် တိုးတက်လာခဲ့ကြောင်း သိရှိရပါသည်။

Source : Xinhua

DOCA (ရန်ကုန်)

ကုန်သွယ်ရေးနှင့် ရင်းနှီးမြှုပ်နှံမှုပူးပေါင်းဆောင်ရွက်ရန် ဆွေးနွေးပွဲကျင်းပခဲ့သည့် ဗီယက်နမ်နှင့် အယ်လ်ဂျီးရီးယား

ပြည်ပကုန်သွယ်မှုသတင်းများ

အယ်လ်ဂျီးရီးယားနိုင်ငံရှိဗီယက်နမ်ကုန်သွယ်ရေးရုံးသည် ဗီယက်နမ်နှင့် အယ်လ်ဂျီးရီးယား နိုင်ငံတို့အကြား ကုန်သွယ်ရေးပူးပေါင်းဆောင်ရွက်မှုမြှင့်တင်နိုင်ရေးအတွက် ဇူလိုင် ၁၆ ရက်တွင် လူကိုယ်တိုင်နှင့် အွန်လိုင်းစနစ်ပေါင်းစပ်ကျင်းပသည့် (Hybrid) စီးပွားရေးချိတ်ဆက်ဆွေးနွေးပွဲကို ပြုလုပ်ခဲ့ကြောင်း သိရပါသည်။ အဆိုပါဆွေးနွေးပွဲသို့ ဗီယက်နမ်လုပ်ငန်းရှင် ၂၀ နီးပါးနှင့် အယ်လ်ဂျီးရီးယားဘက်မှ လုပ်ငန်း ၁၅ ခု၊ ကုန်သွယ်ရေးအဖွဲ့အစည်းများနှင့် မီဒီယာကိုယ်စား လှယ်များ တက်ရောက်ခဲ့ကြကြောင်း သိရပါသည်။ ဗီယက်နမ်အကောက်ခွန်ဦးစီးဌာန၏ စာရင်း များအရ ၂၀၂၆ ခုနှစ် ပထမငါးလအတွင်း ဗီယက်နမ်မှ အယ်လ်ဂျီးရီးယားသို့ တင်ပို့မှုတန်ဖိုးသည် အမေရိကန်ဒေါ်လာ ၂၈၄ သန်းရှိခဲ့ပြီး ယခင်နှစ်တူညီသည့်ကာလနှင့် နှိုင်းယှဉ်ပါက အနည်းငယ် တိုးတက်ခဲ့ကြောင်း သိရပါသည်။ ၎င်းအနက် ကော်ဖီစိမ်းသည် စုစုပေါင်းတင်ပို့မှုတန်ဖိုး၏ ၈၅ ရာခိုင်နှုန်းခန့်ရှိပြီး အဓိကတင်ပို့ကုန်အဖြစ် ရပ်တည်လျက်ရှိကြောင်း သိရပါသည်။ ထို့ပြင် သီဟိုဠ်စေ့၊ ငရုတ်ကောင်း၊ အုန်းသီးခြောက်၊ ဓာတုထုတ်ကုန်များနှင့် ရေထွက်ပစ္စည်းများကိုလည်း တင်ပို့လျက်ရှိကြောင်း သိရပါသည်။ အလားတူ ဗီယက်နမ်သည် အယ်လ်ဂျီးရီးယားမှ Carob Powder၊ စွန်ပလွံသီးနှင့် ကြက်ခြေထောက်များကို အဓိကတင်သွင်းလျက်ရှိကြောင်း သိရပါသည်။ ဆွေးနွေးပွဲတွင် အယ်လ်ဂျီးရီးယား သွင်းကုန်၊ ပို့ကုန်၊ ကုန်သွယ်ရေးနှင့် ရင်းနှီးမြှုပ်နှံမှုဖိုရမ် (AFIETI) ကိုယ်စားလှယ်နှင့် ဗီယက်နမ်သို့ ကြက်ခြေထောက်တင်ပို့နေသည့် ကုမ္ပဏီတစ်ခု၏ ဒါရိုက်တာဖြစ်သူ Mohammad Nabil က အယ်လ်ဂျီးရီးယားလုပ်ငန်းရှင်များသည် ဗီယက်နမ်မှ ငရုတ်ကောင်းကဲ့သို့ ဟင်းခတ်အမွှေးအကြိုင်များ၊ ကော်ဖီ၊ သီဟိုဠ်စေ့နှင့် အုန်းသီးခြောက်တို့ကို တင်သွင်းလိုကြောင်း ပြောကြားခဲ့ပါသည်။ Nabil က အယ်လ်ဂျီးရီးယားအနေဖြင့် စွန်ပလွံသီး၊ သံလွင်ဆီနှင့် အထူးသဖြင့် ဗီယက်နမ်အလှကုန်လုပ်ငန်းအတွက် အရည်အသွေးမြင့် ကုန်ကြမ်း အဖြစ်အသုံးပြုနိုင်သည့် သဘာဝမရှိမဖြစ်ဆီများ (Natural Essential Oils) တင်ပို့မှုကို တိုးချဲ့လိုကြောင်း၊ နှစ်နိုင်ငံအကြားပူးပေါင်းဆောင်ရွက်မှုကို အစဉ်အလာသွင်းကုန်၊ ပို့ကုန်လုပ်ငန်းများ ထက်ကျော်လွန်၍ ဖက်စပ်လုပ်ငန်းများနှင့် မဟာမိတ်ပူးပေါင်းဆောင်ရွက်မှုများ ထူထောင်သင့် ကြောင်းနှင့် ထိုသို့ဆောင်ရွက်ခြင်းဖြင့် ဗီယက်နမ်လုပ်ငန်းများသည် အယ်လ်ဂျီးရီးယားဈေးကွက်သာမက အာဖရိကဈေးကွက်တစ်ခုလုံးသို့လည်း ဝင်ရောက်နိုင်မည်ဖြစ်ကြောင်း ပြောကြားခဲ့ပါသည်။ အယ်လ်ဂျီးရီးယားကုမ္ပဏီတစ်ခု၏ ကိုယ်စားလှယ်ကလည်း mayonnaise အပါအဝင် ဆော့စ်အမျိုးမျိုးထုတ်လုပ်ရန်အတွက် ဗီယက်နမ်မှကုန်ကြမ်းပစ္စည်းများတင်သွင်းလိုပြီး ထုတ်ကုန်များကို ဗီယက်နမ်နှင့် အာရှဈေးကွက်များသို့ဖြန့်ဖြူးရန် ရည်ရွယ်ထားကြောင်း ပြောကြားခဲ့ပါသည်။ အခြားလုပ်ငန်းတစ်ခုကလည်း ပင်လယ်ရေကုထုံးစင်တာများ (Seawater Therapy Centres) ကို စီမံခန့်ခွဲလည်ပတ်နိုင်သည့်အာရှမိတ်ဖက်များ၊ အထူးသဖြင့် ဗီယက်နမ်လုပ်ငန်းများကို ရှာဖွေလျက်ရှိကြောင်းနှင့် နှိပ်နယ်ကုထုံးနှင့် ကုသရေးနည်းပညာများဆိုင်ရာ လူ့စွမ်းအားအရင်းအမြစ် လေ့ကျင့်ပေးရေးအပြင် ခေတ်မီနည်းပညာနှင့် ကျွမ်းကျင်မှုများရရှိရန်လည်း မျှော်လင့်ထားကြောင်းပြောကြားခဲ့ပါသည်။ AFIETI ၏ ပြင်ပဆက်ဆံရေးအကြံပေး Kerroud Abdelhamid က အယ်လ်ဂျီးရီးယားအနေဖြင့် ဗီယက်နမ်မှ အချောသတ်နှင့် တစ်စိတ်တစ်ပိုင်းထုတ်လုပ်ပြီး အီလက်ထရွန်နစ်အစိတ်အပိုင်းများကို ဝယ်ယူလိုကြောင်းပြောကြားခဲ့ပြီး ဗီယက်နမ်ထုတ်လုပ်သူ များ၏ယှဉ်ပြိုင်နိုင်စွမ်းကို ယုံကြည်ကြောင်းလည်း ပြောကြားခဲ့ပါသည်။ ထို့ပြင် အယ်လ်ဂျီးရီးယားရှိအစိုးရနှင့် ပုဂ္ဂလိကအဖွဲ့အစည်းများသည် ရေရှည်အကျိုးတူပူးပေါင်းဆောင်ရွက်နိုင်မည့် စီးပွားရေးမိတ်ဖက်များကိုရှာဖွေလျက်ရှိပြီး အစဉ်အလာကုန်သွယ်မှုထက်ကျော်လွန်သည့် ပူးပေါင်းဆောင်ရွက်မှုများကိုဦးတည်နေကြောင်း ၎င်းကပြောကြားခဲ့ပါသည်။ ဆွေးနွေးပွဲတွင် ဗီယက်နမ် လုပ်ငန်းများက ၎င်းတို့၏ထုတ်ကုန်များကို မိတ်ဆက်ပြသခဲ့ကြပြီး အယ်လ်ဂျီးရီးယားစားသုံးသူများ၏ နှစ်သက်မှု၊ အကောက်ခွန်အတားအဆီးများ၊ ရင်းနှီးမြှုပ်နှံမှုဆိုင်ရာ အထောက်အပံ့များနှင့် ကုန်ထုတ်လုပ်မှုမူဝါဒများကို မေးမြန်းဆွေးနွေးခဲ့ကြကြောင်း သိရပါသည်။ ဗီယက်နမ်ကုန်သွယ် ရေးအတိုင်ပင်ခံ Hoang Duc Nhuan က နှစ်နိုင်ငံလုပ်ငန်းရှင်များ၏ မေးမြန်းချက်များကို ဖြေကြားခဲ့ပြီး အထူးသဖြင့် ကုန်သွယ်ရေးမူဝါဒအသစ်များနှင့် သွင်းကုန်၊ ပို့ကုန် ငွေပေးချေမှုစနစ်များကို ရှင်းလင်းပြောကြားခဲ့ကြောင်း သိရပါသည်။ ထို့အပြင် ဟိုချီမင်းမြို့ရှိ Saigon Exhibition and Convention Centre (SECC) တွင် စက်တင်ဘာ ၃ ရက်မှ ၅ ရက်အထိ ကျင်းပမည့် Vietnam International Sourcing Expo 2026 ပြပွဲကို မိတ်ဆက်ခဲ့ပြီး အယ်လ်ဂျီးရီးယားအစိုးရ အဖွဲ့အစည်းများနှင့် စီးပွားရေးလုပ်ငန်းရှင်များကို တက်ရောက်ရန်ဖိတ်ကြားခဲ့ကြောင်း သိရပါသည်။ ဆွေးနွေးပွဲပြင်ပတွင်လည်း အယ်လ်ဂျီးရီးယားနိုင်ငံရှိ ဗီယက်နမ်ကုန်သွယ်ရေးရုံးက ကော်ဖီစိမ်း၊ လက်ဖက်ခြောက်၊ ငရုတ်ကောင်း၊ အုန်းသီးခြောက်နှင့် အခြားစိုက်ပျိုးရေးထုတ်ကုန်များကိုပြသခဲ့ပြီး အယ်လ်ဂျီးရီးယားလုပ်ငန်းရှင်များနှင့် အဖွဲ့အစည်းများအနေဖြင့် ဗီယက်နမ်၏ ပို့ကုန်အလားအလာများကို လေ့လာနိုင်သည့်အပြင် အနာဂတ်စီးပွားရေးပူးပေါင်းဆောင်ရွက်မှု အခွင့်အလမ်းများကိုလည်း ရှာဖွေနိုင်ခဲ့ကြောင်း သိရှိရပါသည်။

Vietnam Plus

DOCA (ရန်ကုန်)

Languages

Main menu

ပြည်ပကုန်သွယ်မှုသတင်းများ

သရက်သီးများ ပြည်ပပို့ကုန်ပန်းတိုင် မြင့်မြင့်မားမား သတ်မှတ်လိုက်သည့် အင်ဒိုနီးရှားနိုင်ငံ

မလေးရှားနိုင်ငံ၏ စားအုန်းဆီဈေးနှုန်းသည် ဩဂုတ်လ၌ အတက်အကျ အကန့်အသတ်အတွင်းရှိနိုင်

သဘာဝရော်ဘာ တစ်ကီလိုဂရမ်လျှင် ရူပီး ၅၀ ထပ်မံတိုးမြှင့်၍ အိန္ဒိယအစိုးရဝယ်ယူလျက်ရှိ

စင်္ကာပူနိုင်ငံ၏ ရေနံမဟုတ်သော ပြည်တွင်းပို့ကုန် တိုးတက်မှု လျော့ကျသွား

Pages

You are here

ပြည်ပကုန်သွယ်မှုသတင်းများ

Pages