ပြည်ပကုန်သွယ်မှုသတင်းများ

          ဗီယက်နမ်နိုင်ငံသည် ၂၀၂၆ ခုနှစ်၏ ပထမခြောက်လအတွင်း အမေရိကန်ဒေါ်လာ ၄.၇၈ ဘီလီယံတန်ဖိုးရှိ ကော်ဖီများကို ပြည်ပသို့ တင်ပို့ခဲ့ပြီး တင်ပို့မှုပမာဏ တိုးတက်လာခဲ့သော်လည်း ကာလတူနှိုင်းယှဉ်ချက်အရ တန်ဖိုးအားဖြင့် ၁၄.၄ ရာခိုင်နှုန်း ကျဆင်းသွားခဲ့ကြောင်း သိရပါသည်။

         အဆိုပါကာလအတွင်း ပြည်ပတင်ပို့မှုပမာဏမှာ ယခင်နှစ်ကာလတူထက် ၉.၇ ရာခိုင်နှုန်း မြင့်တက်လာပြီး မက်ထရစ်တန် ၁.၁ သန်း ရှိခဲ့ကာ ဇွန်လတစ်လည်း တင်ပို့မှုအနေဖြင့် တန်ဖိုး အမေရိကန်ဒေါ်လာ ၅၅၂.၆ သန်းရှိ ကော်ဖီတန်ချိန် ၁၅၀,၀၀၀ ပါဝင်ခဲ့ကြောင်း သိရပါသည်။

       စိုက်ပျိုးရေးနှင့် ပတ်ဝန်းကျင်ထိန်းသိမ်းရေး ဝန်ကြီးဌာန၏ အဆိုအရ ပထမနှစ်ဝက်အတွင်း ပျှမ်းမျှ ပြည်ပတင်ပို့မှုဈေးနှုန်းမှာ တစ်တန်လျှင် အမေရိကန်ဒေါ်လာ ၄,၄၃၅ ဝန်းကျင်ရှိပြီး ၂၀၂၄-၂၅ ခုနှစ်အတွင်း ဈေးနှုန်းများမြင့်တက်ခဲ့သည့် ကာလနောက်ပိုင်း ယခင်နှစ်ကာလတူနှင့် နှိုင်းယှဉ်ပါက ၂၂ ရာခိုင်နှုန်း ကျဆင်းသွားခြင်းဖြစ်ကြောင်း သိရပါသည်။

       ဂျာမနီ၊ အီတလီနှင့် အမေရိကန်နိုင်ငံတို့သည် ဗီယက်နမ်နိုင်ငံ၏ အကြီးဆုံးဈေးကွက် သုံးခုအဖြစ် ဆက်လက်တည်ရှိနေပြီး စုစုပေါင်း ကော်ဖီတင်ပို့မှု၏ ၁၄.၁ ရာခိုင်နှုန်း၊ ၇.၉ ရာခိုင်နှုန်းနှင့် ၆.၉ ရာခိုင်နှုန်းစီ အသီးသီးရှိကြောင်း သိရပါသည်။ သို့ရာတွင် ၂၀၂၆ခုနှစ်၊ ဇန်နဝါရီလမှ မေလအတွင်း အဆိုပါဈေးကွက်များသို့ တင်ပို့မှုမှာ လွန်ခဲ့သောတစ်နှစ်ကထက် တန်ဖိုးအားဖြင့် ၂၁.၇ ရာခိုင်နှုန်း၊ ၉.၆ ရာခိုင်နှုန်းနှင့် ၂.၂ ရာခိုင်နှုန်းစီ ကျဆင်းခဲ့ကြောင်း သိရပါသည်။

       တရုတ်နိုင်ငံသို့ တင်ပို့မှုမှာမူ တန်ဖိုးအားဖြင့် ၇၀.၇ ရာခိုင်နှုန်းအထိ ထိုးတက်သွားခဲ့ပြီး ဗီယက်နမ်ကော်ဖီကို အဓိကတင်သွင်းသည့် ထိပ်သီး ၁၅ နိုင်ငံအနက် အားအကောင်းဆုံး တိုးတက်မှုဖြစ်ခဲ့ကြောင်း သိရပါသည်။ ပြည်တွင်း၌မူ ကော်ဖီဈေးနှုန်းများသည် တစ်ကီလို ဂရမ်လျှင် ဗီယက်နမ်ဒေါင် ၉၀,၀၀၀ (အမေရိကန်ဒေါ်လာ ၃.၄၂) အထက်သို့ ပြန်လည်ဦးမော့လာခဲ့ကြောင်း သိရပါသည်။   ဗီယက်နမ် ကော်ဖီနှင့် ကိုကိုးအသင်းက ကမ္ဘာ့ကော်ဖီဈေးကွက်သည် ပိုမိုစိန်ခေါ်မှုကြီးမားသောအဆင့်သို့ ရောက်ရှိနေပြီဖြစ်ကြောင်း ပြောကြားခဲ့ပြီး၊ အဓိကအားဖြင့် ဘရာဇီးနိုင်ငံကြောင့် ဖြစ်ပေါ်လာသည့် ထောက်ပံ့မှု (အထွက်နှုန်း) တိုးတက်လာခြင်းမှာ မကြာသေးမီနှစ်များအတွင်း အနည်းငယ်သာ တိုးတက်လာခဲ့သည့် စားသုံးမှုနှုန်းထက် ကျော်လွန်နေခြင်းကြောင့်ဖြစ်ကြောင်း သိရပါသည်။

         အဆိုပါ ထောက်ပံ့မှု ပိုမိုများပြားလာခြင်းက လာမည့်လများတွင် ဈေးနှုန်းများအပေါ် ဆက်လက်ကျဆင်းစေရန် ဖိအားဖြစ်စေလိမ့်မည်ဟု မျှော်မှန်းရပြီး အထူးသဖြင့် ဗီယက်နမ်၏ အဓိက ပို့ကုန်အမျိုးအစားဖြစ်သော ရိုဘတ်စတာ (Robusta) ကော်ဖီကဏ္ဍတွင် ဖြစ်နိုင်ကြောင်း ၎င်းအသင်းမှ ထုတ်ပြန်သော ထုတ်ပြန်ချက်များအရ သိရပါသည်။

              ပို့ကုန်လုပ်ငန်း Vinh Hiep ၏ ဥက္ကဋ္ဌ ဖြစ်သူ Thai Nhu Hiep က မကြာသေးမီနှစ်များအတွင်း ဈေးနှုန်းများ မြင့်တက်လာခြင်းကြောင့် ကော်ဖီစိုက်တောင်သူများ၏ လူနေမှုဘဝ မြှင့်တင်ပေးနိုင်ခဲ့ကြောင်း ပြောကြားခဲ့ပါသည်။

        ကော်ဖီအသင်းအနေဖြင့် လုပ်ငန်းကဏ္ဍအနေဖြင့် အထွက်နှုန်းတိုးချဲ့ခြင်းထက် ရေရှည်တည်တံ့မှုဆိုင်ရာ အသိအမှတ်ပြုလက်မှတ်များရရှိထားသော အရည်အသွေးမြင့် ကော်ဖီစေ့များ တင်ပို့မှုကို တိုးမြှင့်ခြင်းနှင့် လှော်ပြီးသားကော်ဖီ၊ အသင့်ဖျော်ကော်ဖီနှင့် အောဂဲနစ်စပ်ကော်ဖီ ထုတ်ကုန်များ တင်ပို့မှုကို မြှင့်တင်ခြင်းတို့ဖြင့် တန်ဖိုးပိုမိုဖန်တီးနိုင်ရေးဆီသို့ အလေးဂရုပြု ပြောင်းလဲရန်လိုအပ်ကြောင်း အလေးအနက် ပြောကြားခဲ့ကြောင်း သိရပါသည်။

        လက်ရှိတွင် နိုင်ငံ၏ ကော်ဖီစိုက်ပျိုးဧရိယာ၏ ၃၀ ရာခိုင်နှုန်းခန့်သည် ရေရှည်တည်တံ့သော ကုန်ထုတ်လုပ်မှု စံချိန်စံညွှန်းများအောက်တွင် အသိအမှတ်ပြုလက်မှတ် ရရှိထားပြီးဖြစ်သဖြင့် ပြည်ပပို့ကုန်ဈေးကွက်များ၏ ပိုမိုတင်းကြပ်လာသော လိုအပ်ချက်များကို ပြည့်မီရန် ခိုင်မာသောအုတ်မြစ်တစ်ခု ဖြစ်စေခဲ့ကြောင်း သိရပါသည်။

     ထို့အပြင် ဗီယက်နမ်နိုင်ငံ၏ ကော်ဖီအသင်းက တရုတ်၊ ရုရှား၊ တောင်ကိုရီးယား၊ အယ်လ်ဂျီးရီးယားနှင့် နော်ဒစ်နိုင်ငံများ အပါအဝင် အလားအလာရှိသော ဈေးကွက်များတွင် ကုန်သွယ်မှုမြှင့်တင်ရေးကို ပိုမိုအားကောင်းစွာ လုပ်ဆောင်ရန် တောင်းဆိုခဲ့ကြောင်းနှင့် ပြုပြင်မွမ်းမံထားသော ကော်ဖီထုတ်ကုန်များ တင်ပို့မှုကို ပံ့ပိုးပေးနိုင်ရန် အာရှနှင့် ဥရောပရှိ အဓိက လက်လီအရောင်းဆိုင်ကြီးများနှင့် ချိတ်ဆက်မှုများကို တိုးချဲ့ရန်လည်း တိုက်တွန်းခဲ့ကြောင်း သိရှိရပါသည်။

Source: Vietnumplus                                                                 

DOCA (ရန်ကုန်)

       ၂၀၂၆ ခုနှစ်၏ ပထမနှစ်ဝက်တွင် ကုန်သွယ်ရေးနှင့် ဝန်ဆောင်မှုကဏ္ဍသည် စီးပွားရေးဖွံ့ဖြိုးတိုးတက်မှု၏ အရေးပါသော မဏ္ဍိုင်နှင့် မောင်းနှင်အားအဖြစ် ဆက်လက်ရပ်တည်နေသည်။ လက်လီရောင်းချမှုလုပ်ငန်းများ အားကောင်းမောင်းသန် ပြန်လည်ဦးမော့လာခြင်း၊ ခရီးသွားလုပ်ငန်း အရှိန်အဟုန်ဖြင့် တိုးတက်လာခြင်းနှင့် ကုန်စည်နှင့် ခရီးသည်စီးဆင်းမှု စည်ကားလာခြင်းတို့သည် အလားအလာကောင်းသော စီးပွားရေးပုံရိပ်ကို ဖန်တီးပေးလျက်ရှိသည်။

       ဘဏ္ဍာရေးဝန်ကြီးဌာနအောက်ရှိ အထွေထွေစာရင်းအင်းရုံးက ထုတ်ပြန်သည့် ၂၀၂၆ ခုနှစ် ဒုတိယသုံးလပတ်နှင့် ပထမခြောက်လပတ် လူမှုစီးပွားရေးအခြေအနေ အစီရင်ခံစာအရ ကုန်သွယ်ရေးနှင့် လူသုံးကုန်ဝန်ဆောင်မှု လုပ်ငန်းများသည် ဇွန်လတွင် ဆက်လက်စည်ကားလျက်ရှိကြောင်း သိရသည်။

        ဇွန်လအတွင်း ကုန်စည်လက်လီရောင်းချမှုနှင့် လူသုံးကုန်ဝန်ဆောင်မှု စုစုပေါင်းရရှိငွေကို ဗီယက်နမ်ဒေါင် ၆၆၅.၆ ထရီလီယံ ဟု ခန့်မှန်းထားပြီး ယခင်လထက် ၁.၁ ရာခိုင်နှုန်း တိုးတက်လာကာ ယခင်နှစ်ကာလတူနှင့် နှိုင်းယှဉ်ပါက ၁၄.၈ ရာခိုင်နှုန်းအထိ သိသိသာသာ တိုးတက်လာ ခြင်းဖြစ်သည်။

       ၂၀၂၆ ခုနှစ် ဒုတိယသုံးလပတ်တွင် လက်ရှိပေါက်ဈေးများအရ ကုန်စည်လက်လီရောင်းချမှုနှင့် လူသုံးကုန်ဝန်ဆောင်မှု စုစုပေါင်းရရှိငွေသည် ဗီယက်နမ်ဒေါင် ၁,၉၇၇.၆ ထရီလီယံ ရှိမည်ဟု ခန့်မှန်းရပြီး ယခင်သုံးလပတ်ထက် ၃.၄ ရာခိုင်နှုန်းနှင့် ယမန်နှစ်ကာလတူထက် ၁၃.၉ ရာခိုင်နှုန်း အသီးသီး တိုးတက်လာခဲ့သည်။ ယင်းရလဒ်များကြောင့် ၂၀၂၆ ခုနှစ်၏ ပထမခြောက်လအတွက် စုစုပေါင်း လက်လီရောင်းချမှုနှင့် ဝန်ဆောင်မှုရရှိငွေသည် ဗီယက်နမ်ဒေါင် ၃,၈၈၉.၅ ထရီလီယံသို့ ရောက်ရှိခဲ့ပြီး ယခင်နှစ်ကာလတူထက် ၁၂.၉ ရာခိုင်နှုန်း တိုးတက်လာခဲ့သည်။ ကုန်ဈေးနှုန်းအပြောင်းအလဲ အချက်အလက်များကို ဖယ်ထုတ်၍ တွက်ချက်မည်ဆိုလျှင်ပင် အမှန်တကယ် တိုးတက်မှုနှုန်းမှာ ၇.၃ ရာခိုင်နှုန်းရှိပြီး ပြည်တွင်းဝယ်လိုအားနှင့် စားသုံးသူလိုအပ်ချက်  ပြန်လည်ဦးမော့လာမှုကို ထင်ဟပ်နေသည်။

        ကုန်စည်လက်လီရောင်းချမှုသည် ဗီယက်နမ်ဒေါင် ၂,၉၄၁.၈ ထရီလီယံရှိပြီး စုစုပေါင်း၏ ၇၅.၆ ရာခိုင်နှုန်း တိုးတက်ခဲ့သည်။ ယခင်နှစ်ထက် ၁၂.၅ ရာခိုင်နှုန်းတိုးတက်လျက်ရှိသည်။ ထူးထူးခြားခြား တိုးတက်ခဲ့သည့် ကုန်ပစ္စည်းများမှာ ကျောက်မျက်ရတနာနှင့် အဖိုးတန်သတ္တုများ ၃၁.၃ ရာခိုင်နှုန်း၊ စက်သုံးဆီထုတ်ကုန်များမှာ ၁၅.၃ ရာခိုင်နှုန်း၊ သစ်နှင့် ဆောက်လုပ်ရေးပစ္စည်းများမှာ ၁၃.၂ ရာခိုင်နှုန်းနှင့် အဝတ်အထည်မှာ ၁၂.၅ ရာခိုင်နှုန်းတိုးတက်ခဲ့သည်။ အပန်းဖြေခရီးသွားလုပ်ငန်းမှာ ပထမနှစ်ဝက်တွင် ဝင်ငွေ ဗီယက်နမ်ဒေါင် ၄၉.၈ ထရီလီယံ ရရှိခဲ့ပြီး ယခင်နှစ်ထက် ၁၅ ရာခိုင်နှုန်း တိုးတက်ခဲ့သည်။

         ကုန်စည်စီးဆင်းမှု ချောမွေ့ခြင်းသည် ခရီးသွားရာသီအတွင်း ပြည်တွင်းပြည်ပ ခရီးသွားများ၏ သွားလာရေးလိုအပ်ချက်ကို ဖြည့်ဆည်းပေးရုံသာမက လုပ်ငန်းများ၏ ကုန်ထုတ်လုပ်မှု၊ စီးပွားရေးနှင့် သွင်းကုန်ထုတ်ကုန်လုပ်ငန်းများကိုပါ ထိရောက်စွာ အကျိုးပြုခဲ့သည်။

          ၂၀၂၆ ခုနှစ် ပထမခြောက်လအတွင်း ဝန်ဆောင်မှုကဏ္ဍ၏ အထင်ရှားဆုံးသော အချက်တစ်ခုမှာ ဗီယက်နမ်နိုင်ငံသို့ နိုင်ငံတကာခရီးသွားများ အလုံးအရင်းနှင့် ဝင်ရောက်လာခြင်းဖြစ်သည်။ အဆင်ပြေချောမွေ့သော ဗီဇာမူဝါဒများကို ထိရောက်စွာကျင့်သုံးခြင်း၊ ဈေးကွက်မြှင့်တင်ရေး အစီအစဉ်များ လုပ်ဆောင်ခြင်းနှင့် ခရီးသွားလုပ်ငန်းဆိုင်ရာ ဝန်ဆောင်မှုများကို စဉ်ဆက်မပြတ် မတူကွဲပြားအောင် ဖန်တီးပေးခြင်းတို့ကြောင့် ပထမခြောက်လအတွင်း ဗီယက်နမ်သို့ လာရောက်သည့် နိုင်ငံခြားသားခရီးသွား အရေအတွက်သည် ၁၂.၃ သန်း ရှိမည်ဟု ခန့်မှန်းရပြီး ယခင်နှစ် ကာလတူထက် ၁၄.၉ ရာခိုင်နှုန်း တိုးတက်လာခဲ့သည်။

        လေကြောင်းခရီးစဉ်သည် ကမ္ဘာလှည့်ခရီးသွားများအကြား ရေပန်းအစားဆုံး သွားလာရေးပုံစံအဖြစ် ဆက်လက်ရှိနေပြီး ခရီးသည် ၁၀.၁ သန်း (စုစုပေါင်း၏ ၈၂.၆ ရာခိုင်နှုန်း) ကို ကြိုဆိုနိုင်ခဲ့သည်။ ထူးခြားသည်မှာ နယ်စပ်ကုန်သွယ်ရေးချောမွေ့မှု အားသာချက်များကြောင့် ကုန်းလမ်းမှတစ်ဆင့် ဝင်ရောက်လာသည့် ခရီးသွားအရေအတွက်သည် ၃၇.၅ ရာခိုင်နှုန်းအထိ အံ့မခန်း တိုးတက်လာပြီး ၁.၉ သန်းအထိ ရှိခဲ့ကြောင်း သိရှိရပါသည်။

     ခရီးသွားများ၏ ပထဝီဝင်အနေအထားအရ ဝင်ရောက်မှုကို ကြည့်မည်ဆိုလျှင် အာရှဒေသသည် ခရီးသွား ၉.၀၆ သန်းကျော်ဖြင့် ဗီယက်နမ်၏ အကြီးမားဆုံး ခရီးသွားအရင်းအမြစ် ဈေးကွက်အဖြစ် ဆက်လက်တည်ရှိနေသည်။ သို့သော်လည်း ဥရောပဈေးကွက်သည် အံ့ဩစရာအကောင်းဆုံးအဖြစ် ၅၆.၁ ရာခိုင်နှုန်းအထိ မြင့်တက်လာပြီး ခရီးသွားဦးရေ ၂.၁ သန်းနီးပါး ရှိလာခဲ့ကြောင်း သိရသည်။

        အမေရိက၊ ဩစတြေးလျနှင့် အာဖရိကကဲ့သို့သော အခြားဈေးကွက်များသည်လည်း ၁၉ ရာခိုင်နှုန်းမှ ၂၂ ရာခိုင်နှုန်းအကြား တည်ငြိမ်သော တိုးတက်မှုနှုန်းကို ထိန်းထားနိုင်ခဲ့သည်။ ဤအခြေအနေသည် ပြည်တွင်းအပန်းဖြေစခန်းများနှင့် ခရီးသွားလာမှု လှုံ့ဆော်ရေးအစီအစဉ်များ၏ ဆွဲဆောင်မှုရှိပုံကို ထင်ဟပ်နေပြီး ပြည်တွင်းစားသုံးသူများကို ထိန်းထားနိုင်ကာ အမျိုးသားစီးပွားရေးအတွက် သိသာထင်ရှားသော သုံးစွဲမှုအရင်းအမြစ်များကို ကာကွယ်ပေးနိုင်ခဲ့ကြောင်း သိရှိရပါသည်။

Source : Vn Economy

DOCA (ရန်ကုန်)

​          မိုးဆက်တိုက်ရွာသွန်းမှုကြောင့် အသီးအနှံများ၏ အရည်အသွေး ကျဆင်းသွားခြင်းနှင့် အတူ ပြည်ပတင်ပို့သည့် လုပ်ငန်းများက ဝယ်ယူမှုစံနှုန်းများကို ပိုမိုတင်းကျပ်လာခြင်းတို့ကြောင့် စိုက်ပျိုးရေးဒေသ အများအပြားတွင် ဒူးရင်းသီးစျေးနှုန်းများ ဆက်တိုက်ကျဆင်းနေကြောင်း သိရသည်။

​          Dong Nai ပြည်နယ်တွင် အသက် ၆ နှစ်ရှိ ဒူးရင်းပင် ၁၀၀ ပိုင်ဆိုင်သည့် Mr. Manh က ယခု နှစ်တွင် ၎င်း၏ခြံမှ အသီးတန်ချိန် ၅ တန်ခန့် ထွက်ရှိခဲ့ပြီး ယခင်နှစ်ထက် ၂၀ ရာခိုင်နှုန်း တိုးတက်လာကြောင်း ပြောကြားခဲ့သည်။ သို့သော်လည်း Monthong ဒူးရင်းသီးအားလုံးကို တစ်ကီလိုဂရမ်လျှင် ၅၅,၀၀၀ ဗီယက်နမ်ဒေါင်ဖြင့်သာ ရောင်းချခဲ့ရသဖြင့် ယခင်နှစ်ကာလတူထက် ၂၁ ရာခိုင်နှုန်း ကျဆင်းသွားကာ သမိုင်းတစ်လျှောက် အနိမ့်ဆုံးစျေးနှုန်း ဖြစ်ခဲ့သည်။

​     စျေးနှုန်းများ ကျဆင်းသွားရုံသာမက ယခုနှစ်တွင် အသီးအနှံများ၏ အရည်အသွေးမှာ ယခင်နှစ်များကဲ့သို့ မကောင်းခြင်းကြောင့် လယ်သမားအများအပြား စိုးရိမ်နေကြသည်။ Dak Lak ပြည်နယ်တွင် ဒူးရင်းစိုက်ခင်း တစ်ဟက်တာကျော် ပိုင်ဆိုင်သည့် Ms. Hanh ကမူ ရိတ်သိမ်းချိန် မရောက်သေးသော်လည်း မိုးဆက်တိုက်ရွာသွန်းမှုကြောင့် အသီးအရည်အသွေး ထိခိုက်မည်ကို စိုးရိမ်သဖြင့် ကုန်သည်များထံမှ စရန်ငွေကို ကြိုတင်လက်ခံရန် ဆုံးဖြတ်ခဲ့ကြောင်း ပြောကြားခဲ့သည်။

​          လယ်သမားများသာမက ပွဲစား/ကုန်သည်များလည်း ဖိအားပေးခံနေရပြီး ဝယ်ယူမှုများကို လျှော့ချနေကြသည်။ မဲခေါင်မြစ်ဝကျွန်းပေါ်ဒေသနှင့် အရှေ့တောင်ပိုင်း ပြည်နယ်များတွင် ဒူးရင်းသီး အဓိကဝယ်ယူနေသည့် Mr. Hoang က ပြည်ပတင်ပို့သည့် ကုမ္ပဏီများ၏ ပိုမို တင်းကျပ်သော အရည်အသွေးစံနှုန်းများကြောင့် နေ့စဉ် အသီးတန်ချိန် အနည်းငယ်သာ ကောက်ယူနိုင်တော့ပြီး ယင်းမှာ ယခင်နှစ် ပမာဏ၏ သုံးပုံတစ်ပုံခန့်သာ ရှိတော့ကြောင်း ပြောကြားခဲ့သည်။

​          စျေးကွက်လေ့လာမှုများအရ စျေးနှုန်းများ ကျဆင်းနေသည့်အပြင် ပြည်ပတင်ပို့သည့် လုပ်ငန်းများကလည်း ၎င်းတို့၏ ဝယ်ယူမှုစံနှုန်းများကို တင်းကျပ်ထားကြောင်း သိရသည်။ ဂိုဒေါင်အများအပြားသည် အရည်အသွေး တစ်သမတ်တည်းရှိသော အသီးများကိုသာ လက်ခံပြီး မမှည့်ခြင်း၊ အခွံထူခြင်း သို့မဟုတ် လိုအပ်ချက်များ မပြည့်မီခြင်းစသည့် လက္ခဏာများရှိသော အသီးများကို ပယ်ချလျက်ရှိသည်။

​          ခြံပိုင်ရှင်များနှင့် ကုန်သည်အများအပြား၏ အဆိုအရ ယခုကဲ့သို့ ရာသီအလယ်တွင် ဒူးရင်းသီးစျေးနှုန်း အဆမတန်ကျဆင်းခြင်းသည် ဖြစ်ခဲသော ဖြစ်ရပ်တစ်ခုဖြစ်သည်။ ဤအခြေအနေသည် ရာသီဥတုကြောင့် အသီးအရည်အသွေး ကျဆင်းလာချိန်တွင် ပြည်ပတင်ပို့မှု ဝယ်လိုအား နှေးကွေးသွားခြင်းကို ထင်ဟပ်နေကြောင်း သိရှိရပါသည်။

​ Source : VN Express                                                                          

DOCA (ရန်ကုန်)

          ကနေဒါနိုင်ငံ၏ ပို့ကုန်ဖွံ့ဖြိုးရေးအေဂျင်စီဖြစ်သည့် Export Development Canada (EDC) နှင့် ထိုင်းနိုင်ငံ ပို့ကုန်-သွင်းကုန်ဘဏ် (EXIM Thailand) တို့သည် နှစ်နိုင်ငံအကြား ရင်းနှီး မြှုပ်နှံမှုမြှင့်တင်ရေး၊ ကုန်သွယ်မှုတိုးချဲ့ရေးနှင့် အာရှ-ပစိဖိတ်ဒေသအတွင်း ပူးပေါင်းဆောင်ရွက်မှုများ အားကောင်းစေရန်ရည်ရွယ်၍ နားလည်မှုစာချွန်လွှာ (MoU) ကို လက်မှတ်ရေးထိုးခဲ့ကြကြောင်း သိရပါသည်။ အဆိုပါသဘောတူညီချက်အရ နှစ်ဖက်အဖွဲ့အစည်းများသည် ကနေဒါနှင့် ထိုင်းနိုင်ငံတို့အပြင် အာရှ-ပစိဖိတ်ဒေသရှိ စီမံကိန်းများကို ပူးပေါင်းပံ့ပိုးနိုင်ရေးအတွက် လုပ်ငန်းပူးပေါင်းဆောင်ရွက်မှု မူဘောင်တစ်ရပ်ကို ချမှတ်သွားမည်ဖြစ်ပြီး နှစ်နိုင်ငံအကျိုးတူစီးပွားရေး ကဏ္ဍများတွင် ပူးပေါင်းဆောင်ရွက်မှုကိုလည်း မြှင့်တင်သွားမည်ဖြစ်ကြောင်း သိရပါသည်။ EDC ဥက္ကဋ္ဌနှင့် အမှုဆောင်အရာရှိချုပ် Alison Nankivell က ယခုမိတ်ဖက်ပူးပေါင်းဆောင်ရွက်မှုသည် သန့်ရှင်းသောနည်းပညာ၊ အခြေခံအဆောက်အအုံနှင့် ဒစ်ဂျစ်တယ်စက်မှုလုပ်ငန်းများကဲ့သို့သော ကဏ္ဍများ ဖွံ့ဖြိုးတိုးတက်ရေးအတွက်အရေးပါကြောင်း၊ ကနေဒါနိုင်ငံ၏ နည်းပညာနှင့် အတွေ့ အကြုံများက ထိုင်းနိုင်ငံနှင့် ဒေသတွင်းတွင် ရေရှည်တည်တံ့သော ဖွံ့ဖြိုးတိုးတက်မှုကို အထောက်အကူပြုမည်ဖြစ်ကြောင်း ပြောကြားခဲ့ပါသည်။ EXIM Thailand ဥက္ကဋ္ဌ Charat Rattanabooniti ကလည်း ယခုပူးပေါင်းဆောင်ရွက်မှုမှတစ်ဆင့် ထိုင်းနိုင်ငံအနေဖြင့် ငွေကြေးအရင်းအမြစ်များ ပိုမိုရရှိနိုင်ခြင်း၊ စီးပွားရေးကွန်ရက်များ ချိတ်ဆက်နိုင်ခြင်းနှင့် အာရှ-ပစိဖိတ်ဒေသအတွင်း ထိုင်းနှင့် ကနေဒါကုမ္ပဏီများအတွက် စီးပွားရေးအခွင့်အလမ်းသစ်များ ဖော်ဆောင်နိုင်မည်ဖြစ်ကြောင်း ပြောကြားခဲ့ပါသည်။ ပူးပေါင်းဆောင်ရွက်မှုများကို စိုက်ပျိုးရေးနှင့် စားသောက်ကုန်လုပ်ငန်း၊ သန့်ရှင်းသောနည်းပညာ၊ စွမ်းအင်ကူးပြောင်းရေး၊ ဒစ်ဂျစ်တယ်စက်မှုလုပ်ငန်း၊ အဆင့်မြင့်ကုန် ထုတ်လုပ်မှုနှင့် အရေးပါသောသတ္တုတွင်းထွက်ပစ္စည်းကဏ္ဍများတွင် ဦးစားပေးဆောင်ရွက်သွားမည်ဖြစ်ကြောင်း သိရပါသည်။ ထို့ပြင် ရေရှည်တည်တံ့သော ဖွံ့ဖြိုးရေးဆိုင်ရာ အလေ့အကျင့် ကောင်းများ၊ စွန့်စားမှုစီမံခန့်ခွဲရေးနှင့် ရေရှည်တည်တံ့သော ဘဏ္ဍာရေးဆိုင်ရာ အသိပညာများကိုလည်း နှစ်ဖက်အကြား မျှဝေဖလှယ်သွားမည်ဖြစ်ကြောင်း သိရပါသည်။ ၂၀၂၅ ခုနှစ်တွင် ကနေဒါနှင့် ထိုင်းနိုင်ငံတို့အကြား ကုန်စည်ကုန်သွယ်မှုပမာဏသည် ကနေဒါဒေါ်လာ ၇.၄ ဘီလီယံခန့်အထိ ရောက်ရှိခဲ့ပြီး စိုက်ပျိုးရေးနှင့် စားသောက်ကုန်၊ အခြေခံအဆောက်အအုံ၊ အဆင့်မြင့်ကုန်ထုတ်လုပ်မှု၊ သန့်ရှင်းသောနည်းပညာနှင့် ဒစ်ဂျစ်တယ်စက်မှုလုပ်ငန်းများတွင် ကုန်သွယ်ရေးအခွင့်အလမ်းများ ဆက်လက်တိုးတက်လျက်ရှိကြောင်း သိရပါသည်။ ထို့အပြင် ၂၀၂၅ ခုနှစ်တွင် ကနေဒါနိုင်ငံ၏ ထိုင်းနိုင်ငံသို့ ပို့ကုန်တင်ပို့မှုတန်ဖိုးမှာ ကနေဒါဒေါ်လာ ၂.၁၄ ဘီလီယံအထိ ရောက်ရှိခဲ့ပြီး ၂၀၂၀ ပြည့်နှစ်မှ ၂၀၂၅ ခုနှစ်အတွင်း နှစ်စဉ်ပျမ်းမျှ တိုးတက်နှုန်း ခုနစ်ရာခိုင်နှုန်းကျော်ရှိခဲ့ကြောင်း သိရှိရပါသည်။

Bangkok Post                                                                           

DOCA (ရန်ကုန်)

         ထိုင်းနိုင်ငံစက်မှုလုပ်ငန်းအသင်း (FTI) သည် တရုတ်အသေးစားနှင့် အလတ်စားစီးပွားရေးလုပ်ငန်းများ (SMEs) ထိုင်းနိုင်ငံတွင် ပိုမိုရင်းနှီးမြှုပ်နှံလာစေရေးအတွက် ထိုင်းလုပ်ငန်းရှင်များနှင့် စီးပွားရေးမိတ်ဖက်ချိတ်ဆက်ပေးခြင်းနှင့် ထိုင်းစီးပွားရေးဘဏ်များထံမှ ငွေကြေးထောက်ပံ့မှုရရှိနိုင်ရေးတို့ကို အားပေးကူညီသွားမည့်အစီအစဉ်များကို အကောင်အထည်ဖော် ဆောင်ရွက်လျက်ရှိကြောင်း သိရပါသည်။ FTI ၏ ဒုတိယဥက္ကဋ္ဌနှင့် ထိုင်း-တရုတ် စီးပွားရေးနှင့် ရင်းနှီးမြှုပ်နှံမှု သုတေသနဌာန ဥက္ကဋ္ဌ Veerachai Monsintorn က အရှေ့ပိုင်းစီးပွားရေးစင်္ကြံ (EEC) ဒေသ အတွင်း ရင်းနှီးမြှုပ်နှံမှုများ ပိုမိုတိုးတက်လာစေရန် Roadshow လှုပ်ရှားမှုတစ်ရပ်ကို စတင် ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။ အဆိုပါလှုပ်ရှားမှုမှတစ်ဆင့် တရုတ်လုပ်ငန်းရှင်များနှင့် ထိုင်းကုမ္ပဏီများအကြား စီးပွားရေးချိတ်ဆက်မှုများ ဖော်ဆောင်ပေးကာ ပူးပေါင်းရင်းနှီးမြှုပ်နှံမှုလုပ်ငန်းများ အကောင်အထည်ဖော်နိုင်ရေးကို မြှင့်တင်ပေးသွားမည် ဖြစ်ကြောင်း ၎င်းက ပြောကြားခဲ့ပါသည်။ FTI အနေဖြင့် ထိုင်းနိုင်ငံတွင် ရင်းနှီးမြှုပ်နှံလိုပြီး ထိုင်းလုပ်ငန်းရှင်များနှင့် မိတ်ဖက်ပူးပေါင်းဆောင်ရွက်လိုသည့် တရုတ် SMEs များကို ဆွဲဆောင် နိုင်ရန် မျှော်မှန်းထားကြောင်း သိရပါသည်။ ထို့ပြင် ငွေကြေးဆိုင်ရာ ဝန်ဆောင်မှုများကို ပိုမို လွယ်ကူချောမွေ့စေရေးအတွက် FTI သည် ထိုင်းဘဏ်လုပ်ငန်းရှင်များအသင်းနှင့် ထိုင်းကုန်သည်ကြီးများအသင်းတို့ပါဝင်သည့် ကုန်သွယ်ရေး၊ စက်မှုလုပ်ငန်းနှင့် ဘဏ်လုပ်ငန်း ပူးပေါင်းညှိနှိုင်းရေးကော်မတီ (JSCCIB) နှင့် ပူးပေါင်းဆောင်ရွက်လျက်ရှိကြောင်း သိရသည်။ JSCCIB သည် စီးပွားရေးမိတ်ဖက်ချိတ်ဆက်ရေးအစီအစဉ်များကို ကူညီဆောင်ရွက်ပေးမည့်အပြင် နိုင်ငံ တကာရင်းနှီးမြှုပ်နှံသူများနှင့် ပြည်တွင်းဘဏ္ဍာရေးအဖွဲ့အစည်းများအကြား ချိတ်ဆက်ပေးသွား မည်ဖြစ်ကြောင်း၊ တရုတ် SMEs အများစုမှာ ထိုင်းဘဏ်စနစ်နှင့် မရင်းနှီးသေးသဖြင့် ချေးငွေရရှိရေးတွင် အခက်အခဲများ ကြုံတွေ့နေရကြောင်း Veerachai က ပြောကြားသည်။ FTI သည် ထိုင်းစက်မှုဇုန်ဖွံ့ဖြိုးရေးကုမ္ပဏီ Amata Corporation နှင့်လည်း ပူးပေါင်းဆောင်ရွက်လျက်ရှိပြီး တရုတ်ရင်းနှီးမြှုပ်နှံသူများကိုလက်ခံနိုင်ရန် တရုတ်စက်မှုဇုန်ဒုတိယအဆင့်စီမံကိန်းကို တိုးချဲ့အကောင်အထည်ဖော်လျက်ရှိကြောင်း သိရပါသည်။ ထိုပူးပေါင်းဆောင်ရွက်မှုကြောင့် တရုတ်လုပ်ငန်းများအတွက် စနစ်တကျဖွဲ့စည်းထားသည့် ရင်းနှီးမြှုပ်နှံမှုဝန်းကျင်တစ်ရပ် ဖော်ဆောင် နိုင်မည်ဖြစ်ပြီး စည်းမျဉ်းစည်းကမ်းများကို ထိရောက်စွာကြီးကြပ်နိုင်ရေးနှင့် ပွင့်လင်းမြင်သာမှု ပိုမိုရရှိလာမည်ဟု မျှော်လင့်ထားကြောင်း သိရပါသည်။ လက်ရှိတွင် EEC ဒေသအတွင်း လျှပ်စစ်မော်တော်ယာဉ်၊ စမတ်အီလက်ထရွန်နစ်နှင့် ပြန်လည်ပြည့်ဖြိုးမြဲစွမ်းအင်ကဏ္ဍများ၌ အကြီးစားရင်းနှီးမြှုပ်နှံမှုစီမံကိန်းများ တိုးမြှင့်ဆောင်ရွက်လျက်ရှိသဖြင့် တရုတ်ရင်းနှီးမြှုပ်နှံမှုများမှာ ဆက်လက်မြင့်တက်လျက်ရှိကြောင်း သိရသည်။ သို့ရာတွင် တရုတ်ကုမ္ပဏီအချို့သည် သတ်မှတ်စက်မှုဇုန်များ၏ ပြင်ပတွင် လုပ်ငန်းဆောင်ရွက်နိုင်ရန် ထိုင်းနိုင်ငံသား အမည်ခံရှယ်ယာရှင်များကို အသုံးပြုခဲ့သည်ဟု သတင်းများထွက်ပေါ်နေသဖြင့် စည်းမျဉ်းစည်းကမ်းလိုက်နာမှုနှင့်ပတ်သက်၍ စိုးရိမ်မှုများလည်းရှိနေကြောင်း သိရပါသည်။ Veerachai က Roadshow လှုပ်ရှားမှုမှတစ်ဆင့် တရားဝင်ရင်းနှီးမြှုပ်နှံမှုများကို အားပေးမြှင့်တင်နိုင်မည်ဖြစ်ပြီး တရားမဝင်လုပ်ငန်းများနှင့် ဆက်နွှယ်သည့် “Grey Chinese” အုပ်စုများ၏ အပျက်သဘောဆောင်သော ပုံရိပ်နှင့် ဂုဏ်သိက္ခာရှိသည့် တရုတ် SMEs များကို ခွဲခြားမြင်သာစေရန် အထောက်အကူပြုမည်ဖြစ်ကြောင်း ပြောကြားခဲ့ကြောင်း သိရပါသည်။

Bangkok Post                                                                          

DOCA (ရန်ကုန်)