ပြည်ပကုန်သွယ်မှုသတင်းများ

        အင်ဒိုနီးရှားနိုင်ငံသည် တရုတ်နိုင်ငံနှင့် နည်းပညာ၊ စီးပွားရေးပူးပေါင်းဆောင်ရွက်မှုများ တိုးမြှင့်လာမှုကို အခြေခံ၍ Bali ကျွန်းရှိ Kura-Kura Bali အထူးစီးပွားရေးဇုန် (SEZ) ကို ဉာဏ်ရည်တုနည်းပညာ (AI) သုတေသနနှင့် ဆီမီးကွန်ဒတ်တာ ဖွံ့ဖြိုးတိုးတက်ရေးဆိုင်ရာ ဗဟိုချက်တစ်ခုအဖြစ် ဖော်ဆောင်ရန် ကြိုးပမ်းလျက်ရှိကြောင်း သိရသည်။

     အမျိုးသားအထူးစီးပွားရေးဇုန်ကောင်စီ၏ ယာယီအထွေထွေအတွင်းရေးမှူးနှင့် စီးပွားရေးရာ ပူးပေါင်းညှိနှိုင်းရေးဝန်ကြီးဌာန၊ ကုန်သွယ်ရေးနှင့် ဒစ်ဂျစ်တယ်စီးပွားရေးဆိုင်ရာ ညှိနှိုင်းရေး ဒုတိယအတွင်းဝန် Ali Murtopo Simbolon က အဆိုပါဇုန်သည် နည်းပညာဆန်းသစ်တီထွင်မှုများ ဖော်ဆောင်ရာတွင် မဟာဗျူဟာအရ အရေးပါကြောင်း အောက်တိုဘာလ ၁၁ ရက်နေ့က ထုတ်ပြန်ချက်၌ ပြောကြားခဲ့ကြောင်း သိရသည်။

        ကမ္ဘာ့နိုင်ငံများအကြား ပြိုင်ဆိုင်မှုနှင့် မရေရာမသေချာမှုများ မြင့်တက်နေသည့်အချိန်တွင် အင်ဒိုနီးရှားနိုင်ငံသည် ပညာရပ်ဆိုင်ရာ ဖွံ့ဖြိုးတိုးတက်မှုနှင့် စက်မှုလုပ်ငန်းများအကြား ပူးပေါင်းဆောင်ရွက်မှုအတွက် လုံခြုံစိတ်ချရသည့် ပတ်ဝန်းကျင်တစ်ရပ်ကို ပံ့ပိုးပေးနိုင်ကြောင်း ၎င်းက ဆိုသည်။ ထို့ပြင် Tsinghua Southeast Asia Center (TSEA) သည် တရုတ်နိုင်ငံ၊ အရှေ့တောင်အာရှဒေသနှင့် ကမ္ဘာ့အခြားဒေသများအကြား ချိတ်ဆက်ပေးသည့် ပေါင်းကူးတံတားတစ်ရပ်အဖြစ် ဆောင်ရွက်နိုင်မည်ဖြစ်ကြောင်း ၎င်းက ပြောကြားကြောင်း သိရသည်။

         Kura-Kura Bali အထူးစီးပွားရေးဇုန်၌ Tsinghua Southeast Asia Center သည် ရူပဗေဒနှင့် အာရုံကြောသိပ္ပံဆိုင်ရာ အခြေခံသုတေသနအစီအစဉ်များကို စတင်မိတ်ဆက်ထားပြီး တရုတ်နိုင်ငံ ဘေဂျင်းမြို့ရှိ Tsinghua University နှင့် ပူးပေါင်းကာ ဆီမီးကွန်ဒတ်တာဆိုင်ရာ သီးသန့်ဖိုရမ်တစ်ခုကိုလည်း စတင်ဖွဲ့စည်းထားကြောင်း သိရသည်။

         ရှေ့ဆက်ဆောင်ရွက်မည့် အစီအစဉ်များတွင် ဒစ်ဂျစ်တယ်နည်းပညာဆိုင်ရာ သုတေသနနှင့် ဖွံ့ဖြိုးရေးလုပ်ငန်းများ တိုးချဲ့ခြင်း၊ ဉာဏ်ရည်တုနည်းပညာ အသုံးချမှုများ ဖော်ဆောင်ခြင်းနှင့် ဒစ်ဂျစ်တယ်စီးပွားရေးဆိုင်ရာ စီမံကိန်းများ ပိုမိုတိုးချဲ့ဆောင်ရွက်ခြင်းတို့ ပါဝင်ကြောင်း သိရသည်။

         အင်ဒိုနီးရှားနိုင်ငံရှိ အထူးစီးပွားရေးဇုန်များအတွင်း တရုတ်စီးပွားရေးလုပ်ငန်းများ ပိုမို ပါဝင်လာခြင်းသည် နည်းပညာဆိုင်ရာ လုပ်ငန်းဂေဟစနစ် ဖွံ့ဖြိုးတိုးတက်ရေးအတွက် အထောက်အကူပြုလျက်ရှိသည်။ ၂၀၂၆ ခုနှစ် ဒုတိယသုံးလပတ်အထိ အင်ဒိုနီးရှားနိုင်ငံရှိ အထူးစီးပွားရေးဇုန်များတွင် လုပ်ငန်းဆောင်ရွက်နေသည့် ကုမ္ပဏီနှင့် လုပ်ငန်းအဖွဲ့အစည်း ၄၈၁ ခုအနက် ၉၇ ခုမှာ တရုတ်စီးပွားရေးလုပ်ငန်းများဖြစ်ကြောင်း သိရသည်။

        အင်ဒိုနီးရှားနိုင်ငံတစ်ဝန်းတွင် အထူးစီးပွားရေးဇုန် ၂၅ ခု ဖွင့်လှစ်ထားပြီး စုစုပေါင်းဧရိယာ ၂၃,၇၉၇ ဒသမ ၈၈ ဟက်တာခန့် ကျယ်ဝန်းသည်။ အဆိုပါဇုန်များ၌ စုစုပေါင်းရင်းနှီးမြှုပ်နှံမှု အမေရိကန်ဒေါ်လာ ၂၀ ဒသမ ၇ ဘီလီယံ ရရှိထားပြီး လုပ်ငန်းအဖွဲ့အစည်း ၄၈၁ ခု ပါဝင်လုပ်ကိုင်လျက်ရှိကာ အလုပ်အကိုင် ၂၈၃,၀၀၀ ကျော် ဖန်တီးပေးထားကြောင်း သိရသည်။

         တစ်ဖက်တွင်လည်း Kura-Kura Bali အထူးစီးပွားရေးဇုန်၌ ၂၀၂၆ ခုနှစ် ပထမနှစ်ဝက်အထိ အမှန်တကယ်အကောင်အထည်ဖော်ပြီးသော ရင်းနှီးမြှုပ်နှံမှုပမာဏမှာ ရူပီး ၁ ဒသမ ၈ ထရီလီယံ (အမေရိကန်ဒေါ်လာ ၁၀၁ ဒသမ ၁၂ သန်းခန့်) ရှိခဲ့သည်။ ထို့ပြင် အလုပ်အကိုင် ၂,၁၇၃ ခု ဖန်တီးပေးနိုင်ခဲ့ပြီး လာရောက်လည်ပတ်သူ ၁၃၁,၆၅၇ ဦးကိုလည်း လက်ခံနိုင်ခဲ့ကြောင်း သိရသည်။

        စက်မှုလုပ်ငန်းများအကြား ပိုမိုခိုင်မာသည့် ချိတ်ဆက်ပေါင်းစည်းမှု ရရှိစေရန် အင်ဒိုနီးရှားနိုင်ငံ ဂျကာတာ မြို့နှင့် တရုတ်နိုင်ငံ ဘေဂျင်းမြို့တို့သည် Two Countries Twin Parks (TCTP) အစီအစဉ်မှတစ်ဆင့် ပူးပေါင်းဆောင်ရွက်မှုများကို တိုးမြှင့်လျက်ရှိကြောင်း သိရသည်။

      အဆိုပါအစီအစဉ်သည် အင်ဒိုနီးရှားနိုင်ငံ၏ သဘာဝသယံဇာတပေါကြွယ်ဝမှုနှင့် ဈေးကွက် အရွယ်အစားကြီးမားမှုတို့ကို တရုတ်နိုင်ငံ၏ ရင်းနှီးမြှုပ်နှံမှုအရင်းအနှီးနှင့် နည်းပညာကျွမ်းကျင်မှုတို့ဖြင့် ပေါင်းစပ်ကာ တန်ဖိုးမြင့်ကုန်ထုတ်လုပ်မှုနှင့် ဒစ်ဂျစ်တယ်အခြေခံအဆောက်အအုံများ တည်ဆောက်ရန် ရည်ရွယ်ထားကြောင်း သိရသည်။

         အနာဂတ်တွင် အင်ဒိုနီးရှားနှင့် တရုတ်နိုင်ငံတို့အကြား ပူးပေါင်းဆောင်ရွက်မှုများသည် ရင်းနှီးမြှုပ်နှံမှုတစ်ခုတည်းအပေါ် အခြေခံခြင်းထက် နည်းပညာလွှဲပြောင်းပေးခြင်း၊ ပူးတွဲသုတေသနပြုလုပ်ခြင်း၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေးနှင့် နိုင်ငံ၏ စက်မှုလုပ်ငန်းဆိုင်ရာ စွမ်းဆောင်ရည် မြှင့်တင်ရေးတို့အထိ တိုးချဲ့ဆောင်ရွက်သင့်ကြောင်း Ali Murtopo Simbolon က ပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

      အင်ဒိုနီးရှားနိုင်ငံ၏ မွေးမြူရေးကဏ္ဍတစ်ရပ်လုံး ပိုမိုခိုင်မာလာစေရန် ကြက်ဥမှုန့်နှင့် အသားမှုန့် ထုတ်လုပ်သည့် စက်ရုံသုံးရုံ တည်ဆောက်ရန် အစိုးရက ပြင်ဆင်လျက်ရှိကြောင်း စိုက်ပျိုးရေးဝန်ကြီး Andi Amran Sulaiman က ပြောကြားကြောင်း သိရသည်။

       အဆိုပါစက်ရုံများ တည်ဆောက်ခြင်းသည် မွေးမြူရေးထွက်ကုန်များအတွက် ဈေးကွက်ချဲ့ထွင်ရန်၊ ဈေးနှုန်းတည်ငြိမ်မှုကို ထိန်းသိမ်းရန်နှင့် ပြည်ပမှ တင်သွင်းသည့် ထုတ်ကုန်များအပေါ် မှီခိုနေရမှုကို လျှော့ချရန် ရည်ရွယ်ကြောင်း ၎င်းက အောက်တိုဘာလ ၁၀ ရက်နေ့ကထုတ်ပြန်ချက်မှတစ်ဆင့် ပြောကြားခဲ့ကြောင်း သိရသည်။

       စက်ရုံတည်ဆောက်ရေးအစီအစဉ်သည် တိရစ္ဆာန်အစာကုန်ကြမ်းများ ဖြည့်ဆည်းပေးခြင်း၊ လယ်သမားများနှင့် မွေးမြူရေးလုပ်ငန်းရှင်များ၏ ထုတ်လုပ်မှုစွမ်းရည် မြှင့်တင်ခြင်းမှသည် ထွက်ကုန်များ ဝယ်ယူစုဆောင်းခြင်းနှင့် ပြုပြင်ထုတ်လုပ်ခြင်းအထိ ချိတ်ဆက်ထားသည့် မွေးမြူရေးကဏ္ဍဆိုင်ရာ ဂေဟစနစ်တစ်ရပ် တည်ဆောက်ရေး အစိုးရ၏ မဟာဗျူဟာတစ်စိတ်တစ်ပိုင်းဖြစ်ကြောင်း ၎င်းက ရှင်းပြခဲ့ကြောင်း သိရသည်။

         ယင်းအစီအစဉ်နှင့်ပတ်သက်၍ နိုင်ငံပိုင်စီးပွားရေးလုပ်ငန်းများ စီမံခန့်ခွဲရေးအေဂျင်စီ (BP BUMN) နှင့် ကုန်သွယ်ရေးဝန်ကြီးတို့ကို ခေါ်ယူဆွေးနွေးခဲ့ပြီး အထူးသဖြင့် ကြက်ဥမှုန့်နှင့် အသားမှုန့် ထုတ်လုပ်သည့်စက်ရုံများ တည်ဆောက်ခြင်းဖြင့် မွေးမြူရေးကဏ္ဍတစ်ရပ်လုံးကို ချိတ်ဆက်ပေါင်း စည်းရန် သဘောတူညီခဲ့ကြောင်း Andi Amran Sulaiman က ပြောကြားကြောင်း သိရသည်။

         စက်ရုံတည်ဆောက်ရေးလုပ်ငန်းများကို လာမည့်နှစ်တွင် စတင်နိုင်ရန် မျှော်မှန်းထားပြီး တည်ဆောက်မှုပြီးစီးရန် တစ်နှစ်ခွဲခန့် သတ်မှတ်ထားကာ အများဆုံး နှစ်နှစ်အတွင်း အပြီးသတ်နိုင်ရန် ရည်ရွယ်ထားကြောင်း ၎င်းကဆိုသည်။ စက်ရုံသုံးရုံအတွက် ဖြစ်နိုင်ခြေလေ့လာ ဆန်းစစ်မှု များကို မကြာမီ ဆက်လက်ဆောင်ရွက်သွားမည်ဖြစ်သည်။ စက်ရုံတစ်ရုံလျှင် ကနဦးရင်းနှီးမြှုပ်နှံမှု ရူပီး ၂၀၀ ဘီလီယံခန့် လိုအပ်မည်ဟု အစိုးရက ခန့်မှန်းထားပြီး အသားပြုပြင်ထုတ်လုပ်သည့် အဆောက်အအုံများပါဝင်ပါက ရူပီး ၂၅၀ ဘီလီယံအထိ မြင့်တက်နိုင်ကြောင်း သိရသည်။

     မွေးမြူရေးကဏ္ဍ၏ ကုန်ကြမ်းထုတ်လုပ်မှုမှ နောက်ဆုံးထုတ်ကုန်အထိ ချိတ်ဆက်ပေါင်း စည်းထားသည့် စနစ်ကို ခိုင်မာအောင် တည်ဆောက်ခြင်းဖြင့် အဆင့်ဆင့်သော အကျိုးကျေးဇူးများ ရရှိလာမည်ဖြစ်ကြောင်း ဝန်ကြီးက သုံးသပ်သည်။ ယင်းစနစ်အရ လယ်သမားများသည် မိမိတို့ စိုက်ပျိုးထုတ်လုပ်သည့် ပြောင်းဖူးများအတွက် ဈေးကွက်ရရှိမည်ဖြစ်ပြီး မွေးမြူရေးလုပ်ငန်းရှင် များအနေဖြင့် တိရစ္ဆာန်အစာ ပုံမှန်ရရှိနိုင်မည့် အာမခံချက်ရှိလာမည်ဖြစ်သည်။ ထို့ပြင် ကြက်ဥနှင့် အသားထုတ်လုပ်မှု များပြားလာသည့်အခါ ပြုပြင်ထုတ်လုပ်ရေးလုပ်ငန်းများက ထွက်ကုန်များကို ဝယ်ယူအသုံးချနိုင်မည့် ဈေးကွက်တစ်ရပ်အဖြစ် ဆောင်ရွက်ပေးနိုင်မည်ဖြစ်ကြောင်း သိရသည်။

         ကြက်ဥ သို့မဟုတ် ကြက်သားထုတ်လုပ်မှု ပိုလျှံလာပါက သက်တမ်းပိုမိုကြာရှည်စွာ ထိန်းသိမ်းထားနိုင်ပြီး အသုံးပြုနိုင်သည့် နယ်ပယ်ပိုမိုကျယ်ပြန့်သော ထုတ်ကုန်များအဖြစ် ပြောင်းလဲထုတ်လုပ်နိုင်မည်ဖြစ်သည်။ ယင်းကြောင့် မွေးမြူရေးလုပ်ငန်းရှင်များအနေဖြင့် ဝယ်လိုအားနှင့် ဈေးနှုန်းအပြောင်းအလဲများကြောင့် ထိခိုက်လွယ်သည့် လတ်ဆတ်သော ထုတ်ကုန်များကိုသာ အားကိုးရသည့် အခြေအနေမှ လျော့ပါးလာမည်ဖြစ်ကြောင်း သိရသည်။

        အဆိုပါအစီအစဉ်ကြောင့် မွေးမြူရေးလုပ်ငန်းရှင်များ၏ လူမှုစီးပွားဘဝ တိုးတက်လာခြင်း၊ အချို့လများတွင် မကြာခဏကြုံတွေ့ရသည့် ဆုံးရှုံးမှုများ လျော့နည်းလာခြင်းနှင့် ပြည်ပမှ ကုန်ပစ္စည်းတင်သွင်းရန် နိုင်ငံခြားငွေသုံးစွဲရမှု လျော့ကျလာခြင်းတို့ကို ရရှိနိုင်မည်ဖြစ်ကြောင်း Andi Amran Sulaiman က အလေးထားပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

       အင်ဒိုနီးရှားနိုင်ငံတွင် အစိုးရအာဏာပိုင်များသည် အောက်တိုဘာ ၈ ရက်အထိ ပြည်တွင်း တောင်သူများထံမှ ဆန်တန်ချိန် ၄.၁၁ သန်း ဝယ်ယူစုဆောင်းနိုင်ခဲ့ပြီး တစ်နှစ်တာအတွက် သတ်မှတ်ထားသော ဆန်ဝယ်ယူမှုပစ်မှတ် တန်ချိန် ၄ သန်းကို ကျော်လွန်ခဲ့ကြောင်း နိုင်ငံပိုင် ထောက်ပံ့ပို့ဆောင်ရေးကုမ္ပဏီ Bulog က အောက်တိုဘာလ ၉ ရက်နေ့တွင် ပြောကြားခဲ့ကြောင်း သိရသည်။

        Bulog ကုမ္ပဏီ၏ ဥက္ကဋ္ဌနှင့် အမှုဆောင်အရာရှိချုပ် Ahmad Rizal Ramdhani ၏ ပြောကြားချက်အရ ၂၀၂၆ ခုနှစ်အတွက် အစိုးရက သတ်မှတ်ပေးထားသော ဆန်ဝယ်ယူမှုပစ်မှတ်၏ ၁၀၂ ရာခိုင်နှုန်းအထိ ဝယ်ယူစုဆောင်းနိုင်ခဲ့ခြင်းဖြစ်ကြောင်း သိရသည်။

        ၂၀၂၆ ခုနှစ် ဆန်ဝယ်ယူမှုပမာဏသည် ၂၀၂၅ ခုနှစ်တွင် ရရှိခဲ့သော တန်ချိန် ၃.၁၉ သန်းထက် ပိုမိုများပြားခဲ့သည့်အပြင် Bulog ကုမ္ပဏီ၏ ယခင်စံချိန်ဖြစ်သော ၂၀၁၂ ခုနှစ်က ဆန်တန်ချိန် ၃.၆၅ သန်း ဝယ်ယူနိုင်ခဲ့မှုကိုလည်း ကျော်ဖြတ်နိုင်ခဲ့ကြောင်း သိရသည်။

     ထို့အပြင် Bulog သည် ဆန်ဝယ်ယူစုဆောင်းမှုလုပ်ငန်းများကို ပိုမိုထိရောက်စေရန် ဆက်လက်ဆောင်ရွက်သွားမည်ဖြစ်ကြောင်း ၎င်းက ဆိုသည်။ ယင်းအတွက် စပါးထွက်ရှိရာဒေသများတွင် ဝယ်ယူရေးကွန်ရက်များကို အားကောင်းလာစေရန်နှင့် သိုလှောင်ရုံများကို အဆင့်မြှင့် တင်ရန် စီစဉ်ထားကြောင်း သိရသည်။

         အဆိုပါလုပ်ငန်းစဉ်များမှတစ်ဆင့် ရိတ်သိမ်းရာသီများအတွင်း ဆန်နှင့်စပါး ဝယ်ယူစုဆောင်းမှုကို ပိုမိုကောင်းမွန်စွာ ဆောင်ရွက်နိုင်ရန်နှင့် တောင်သူများအတွက် စပါးဈေးနှုန်း တည်ငြိမ်စေရန် ရည်ရွယ်ထားကြောင်း သိရှိရပါသည်။

Source : Xinhua                                                                                   

DOCA (ရန်ကုန်)

         မလေးရှားနှင့် အီဂျစ်နိုင်ငံတို့သည် ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်မှုများ တိုးချဲ့ရန်၊ လေကြောင်းခရီးစဉ် ဆက်သွယ်မှုများ ပိုမိုကောင်းမွန်လာစေရန်နှင့် စီးပွားရေးပူးပေါင်း ဆောင်ရွက်မှု နယ်ပယ်သစ်များ ရှာဖွေရန် အာရုံစိုက်သွားမည်ဖြစ်ကြောင်း မလေးရှားဝန်ကြီးချုပ် အောက်တိုဘာလ ၁၀ ရက်နေ့တွင် ပြောကြားခဲ့ကြောင်း သိရသည်။

       ထို့ပြင် နှစ်နိုင်ငံအနေဖြင့် ပညာရေးကဏ္ဍ ပူးပေါင်းဆောင်ရွက်မှုကိုလည်း ပိုမိုတိုးချဲ့သွားရန် ရည်ရွယ်ထားကြောင်း ၎င်းက ပြောသည်။ ယင်းတွင် အင်ဂျင်နီယာပညာ၊ ဆေးပညာ၊ လျှပ်စစ်နှင့် အီလက်ထရွန်နစ်နည်းပညာ၊ ဒစ်ဂျစ်တယ်နည်းပညာနှင့် ဉာဏ်ရည်တုနည်းပညာ (AI) တို့ ပါဝင်ကြောင်း သိရသည်။

      မလေးရှားသို့ နှစ်ရက်ကြာ နိုင်ငံတော်အဆင့် ချစ်ကြည်ရေးခရီး လာရောက်သည့် အီဂျစ်သမ္မတ နှင့်အတူ ပြုလုပ်သော သတင်းစာရှင်းလင်းပွဲတွင် မလေးရှားဝန်ကြီးချုပ်က ယင်းသို့ ပြောကြားခဲ့ခြင်းဖြစ်သည်။ ပြောကြားချက်အရ ယခုနှစ်အတွင်း နှစ်နိုင်ငံကုန်သွယ်မှုပမာဏသည် ၇၄.၇ ရာခိုင်နှုန်း မြင့်တက်လာခဲ့သည်။ သို့သော် မူလကုန်သွယ်မှုပမာဏ နည်းပါးခဲ့ခြင်းကြောင့် ယခုကဲ့သို့ တိုးတက်လာခြင်းဖြစ်ပြီး ကုန်သွယ်မှု ပိုမိုတိုးချဲ့နိုင်မည့် အခွင့်အလမ်းများစွာ ကျန်ရှိနေသေးကြောင်း ၎င်းက အလေးပေးပြောကြားခဲ့သည်။ မလေးရှားအနေဖြင့် ဆီမီးကွန်ဒတ်တာ၊ လျှပ်စစ်နှင့် အီလက်ထရွန်နစ်ပစ္စည်း၊ စိုက်ပျိုးရေးနှင့် ဆေးဝါးကဏ္ဍများတွင် အီဂျစ်နှင့် ပူးပေါင်းဆောင်ရွက်ရန် အလားအလာကောင်းများ ရှိနေကြောင်း ပြောကြားခဲ့ကြောင်း သိရှိရပါသည်။

         ထို့အပြင် မလေးရှားသည် ဆေးဝါးထုတ်ကုန်များ ရယူနိုင်မည့် အရင်းအမြစ်များအဖြစ် BRICS အဖွဲ့ဝင်နိုင်ငံများအပါအဝင် စီးပွားရေးဖွံ့ဖြိုးတိုးတက်လာနေသော နိုင်ငံများကိုလည်း ရှာဖွေလျက်ရှိကြောင်း ၎င်းက ဆိုသည်။ အီဂျစ်နိုင်ငံသည်လည်း မလေးရှား၏ ဆေးဝါးလိုအပ်ချက်များကို ဖြည့်ဆည်းပေးနိုင်သည့် နိုင်ငံများအနက် တစ်နိုင်ငံဖြစ်ကြောင်း ၎င်းက ဖြည့်စွက်ပြောကြားခဲ့သည်။

      အခြားတစ်ဖက်တွင် အီဂျစ်သမ္မတ အရှေ့အလယ်ပိုင်းဒေသ၌ ပဋိပက္ခများ ပိုမိုပြင်းထန်လာခြင်းကို ရပ်တန့်ရန် အီဂျစ်နိုင်ငံအနေဖြင့် မဆုတ်မနစ် ကြိုးပမ်းဆောင်ရွက်လျက်ရှိကြောင်း ပြောကြားခဲ့သည်။ ငြိမ်းချမ်းရေးတည်ဆောက်ရန်နှင့် နိုင်ငံတကာဥပဒေကို လေးစားလိုက်နာစေရန် နိုင်ငံအားလုံး စုပေါင်းကြိုးပမ်းမှုများ လိုအပ်ကြောင်းလည်း အလေးပေးပြောဆိုခဲ့ကြောင်း သိရှိရပါသည်။

Source : Xinhua

DOCA (ရန်ကုန်)

        မိုးအဆက်မပြတ်ရွာသွန်းမှုကြောင့် ဟင်းသီးဟင်းရွက်ဈေးနှုန်းများ မြင့်တက်လာခဲ့ပြီး အချို့သော ဟင်းခတ်အမွှေးအကြိုင်များ၏ ဈေးနှုန်းမှာ တစ်ကီလိုဂရမ်လျှင် ဗီယက်နမ်ဒေါင် ၁၅၀,၀၀၀ အထိ ရောက်ရှိလာကာ အသားအမျိုးအစားများစွာ၏ ဈေးနှုန်းနှင့် တန်းတူဖြစ်လာကြောင်း သိရသည်။

     ဟိုချီမင်းမြို့ရှိ Xom Moi၊ Thach Da၊ Pham Van Bach နှင့် Pham Van Hai ဈေးများအပြင် ဟင်းသီးဟင်းရွက်အရောင်းဆိုင်များတွင် လေ့လာချက်အရ နံနံပင်ဈေးနှုန်းမှာ ပြီးခဲ့သည့် သီတင်း ပတ်က တစ်ကီလိုဂရမ်လျှင် ဗီယက်နမ်ဒေါင် ၈၀,၀၀၀ မှ ၉၀,၀၀၀ အထိသာ ရှိခဲ့သော်လည်း ယခုအခါ အမျိုးအစားအလိုက် ၁၂၀,၀၀၀ မှ ၁၅၀,၀၀၀ အထိ မြင့်တက်လာခဲ့သည်။  ဈေးနှုန်းများ မြင့်တက်လာခြင်းကြောင့် အရောင်းဆိုင်တိုင်းတွင် အဆိုပါဟင်းသီးဟင်းရွက်များကို ရောင်းချနိုင်ခြင်း မရှိတော့ကြောင်း သိရသည်။  ထို့ပြင် ယခင်က ဝယ်ယူသူများအနေဖြင့် ဗီယက်နမ်ဒေါင် ၁,၀၀၀ မှ ၂,၀၀၀ ဖိုးအထိသာ ဝယ်ယူနိုင်ခဲ့သော်လည်း ယခုအခါ အနည်းဆုံး ၅,၀၀၀ မှ ၁၀,၀၀၀ ဒေါင်ဖိုးအထိ ဝယ်ယူရတော့ကြောင်း သိရသည်။

        နံနံပင် ဈေးနှုန်းမှာ တစ်ကီလိုဂရမ်လျှင် ၁၂၀,၀၀၀ မှ ၁၅၀,၀၀၀ ဒေါင် အထိ ရှိလာသဖြင့် အသားအမျိုးအစားများစွာနှင့် ဈေးနှုန်းတူညီလာသည်။ လက်ရှိတွင် ဝက်သားဈေးနှုန်းမှာ တစ်ကီလို ဂရမ်လျှင် ၉၀,၀၀၀ မှ ၁၄၀,၀၀၀ ဒေါင်အထိရှိပြီး ဝက်နံရိုးနှင့် ဝက်ဗိုက်သား တို့မှာ ၁၅၀,၀၀၀ မှ ၁၈၀,၀၀၀ ဒေါင်အထိ ရှိသည်။ မွေးမြူရေးကြက်သားမှာ ၉၀,၀၀၀ မှ ၁၀၀,၀၀၀ ဒေါင်အထိရှိပြီး လွှတ်ကျောင်းမွေးမြူထားသည့် ကြက်သားမှာ ၁၀၀,၀၀၀ မှ ၁၃၀,၀၀၀ ဒေါင်အထိ ရှိကြောင်း သိရသည်။ ကြက်သွန်မြိတ်၊ ပင်စိမ်းတို့၏ ဈေးနှုန်းများလည်း တစ်ကီလိုဂရမ်လျှင် ၇၀,၀၀၀ မှ ၉၀,၀၀၀ ဒေါင်အထိ မြင့်တက်လာခဲ့ပြီး ယခင်သီတင်းပတ်နှင့် ယခင်နှစ်ကာလတူထက် ၁၀ ရာခိုင်နှုန်းခန့် မြင့်တက်လာခဲ့ကြောင်း သိရသည်။

       ဟင်းခတ်အမွှေးအကြိုင်များသာမက အရွက်စားဟင်းသီးဟင်းရွက်အများအပြား၏ ဈေးနှုန်းများလည်း သိသိသာသာ မြင့်တက်လာခဲ့သည်။ ဆလတ်ရွက်ဈေးနှုန်းမှာ တစ်ကီလိုဂရမ်လျှင် ၆၀,၀၀၀ မှ ၈၀,၀၀၀ ဒေါင်အထိ ရှိလာပြီး လွန်ခဲ့သည့်တစ်လခန့်ကထက် နှစ်ဆမြင့်တက်လာကာ ယခင်နှစ်ကာလတူထက်လည်း ၂၀ ရာခိုင်နှုန်း မြင့်တက်လာခဲ့သည်။ ကန်စွန်းရွက်၊ မုန်ညင်းရွက်၊ ဟင်းနုနွယ်ရွက်နှင့် ပန်းဂေါ်ဖီတို့၏ ဈေးနှုန်းများမှာလည်း ပြီးခဲ့သည့်လထက် ၃၀ မှ ၅၀ ရာခိုင်နှုန်း အထိ မြင့်တက်လာခဲ့သည်။ စိုက်ပျိုးထုတ်လုပ်ရာဒေသများတွင် ရက်ပေါင်းများစွာ မိုးအဆက်မပြတ်ရွာသွန်းခဲ့ခြင်းကြောင့် လက်လီဈေးများ၌ ဟင်းသီးဟင်းရွက်ပြတ်လပ်မှုများ ဖြစ်ပေါ်နေသည်။ မြေနိမ့်ပိုင်းစိုက်ခင်းများမှာ ရေလွှမ်းနေပြီး မြင့်သောနေရာရှိ စိုက်ခင်းများတွင်လည်း ရေဝပ်နေသဖြင့် အပင်များ၏ အမြစ်များ အောက်ဆီဂျင်မရတော့ဘဲ ကြီးထွားမှုနှေးကွေးခြင်း၊ အပင်သေဆုံးခြင်းများ ဖြစ်ပေါ်နေကြောင်း သိရှိရပါသည်။

Source : VN Express                                                                           

DOCA (ရန်ကုန်)