ပြည်ပကုန်သွယ်မှုသတင်းများ

   ယခုနှစ်တွင် ဖိလစ်ပိုင်သို့ တင်ပို့မှု သိသာစွာကျဆင်းခဲ့သဖြင့် ဗီယက်နမ်နိုင်ငံ၏  ဆန်တင်ပို့မှု သည် ၁၁.၅ ရာခိုင်နှုန်းလျော့နည်းလျက်  မက်ထရစ်တန် ၈ သန်းဝန်းကျင်ခန့်သာရှိမည်ဟု ခန့်မှန်း ရကြောင်း ဗီယက်နမ် စားသောက်ကုန်အသင်း ဥက္ကဋ္ဌက ဒီဇင်ဘာ ၂ ရက်နေ့တွင် ပြောကြားခဲ့သည်။

     ဗီယက်နမ်နိုင်ငံသည် ကမ္ဘာပေါ်တွင် အိန္ဒိယနှင့် ထိုင်းနိုင်ငံတို့၏ နောက်၌ တတိယမြောက် အကြီးဆုံး ဆန်တင်ပို့သည့်နိုင်ငံဖြစ်ပြီး ၎င်း၏ အဓိကဈေးကွက်များမှာ ဖိလစ်ပိုင်၊ အင်ဒိုနီးရှားနှင့် အာဖရိကတို့ ဖြစ်ကြသည်။ ၎င်း၏အကြီးဆုံးဈေးကွက်ဖြစ်သော ဖိလစ်ပိုင်နိုင်ငံ၌ တောင်သူများကို ကာကွယ်ရန်အတွက် ဆန်တင်သွင်းမှုကို အစိုးရကတားမြစ်ခဲ့ပြီးနောက် ဗီယက်နမ်နိုင်ငံ၏ ဖိလစ်ပိုင် သို့ ဆန်တင်ပို့မှုများမှာ စက်တင်ဘာလတွင် ရပ်ဆိုင်းသွားခဲ့သည်။ ယင်း တားမြစ်ချက်သည် ယခုနှစ် ကုန်အထိ သက်ရောက်မည်ဖြစ်သည်။ ဖိလစ်ပိုင်အနေဖြင့် ဆန်တင်သွင်းမှု ပိတ်ပင်ထားခြင်းကို  ထပ်မံသက်တမ်းတိုးသွားရန် ဖြစ်နိုင်ချေများစွာရှိကြောင်း ဗီယက်နမ် စားသောက်ကုန်အသင်း ဥက္ကဋ္ဌ Do Ha Nam က Reuters သတင်းဌာနသို့ ပြောကြားခဲ့သည်။

     ဗီယက်နမ်၏ အကောက်ခွန်ဆိုင်ရာ အချက်အလက်များအရ ယခုနှစ်၏ ပထမ ၁၀ လတာ ကာလအတွင်း ဖိလစ်ပိုင်သို့ ဆန်တင်ပို့မှုသည် ၂၀၂၄ ခုနှစ်၏ အလားတူကာလနှင့် နှိုင်းယှဉ်ပါက ၁၈.၅ ရာခိုင်နှုန်း လျော့နည်းခဲ့ပြီး တန်ချိန် ၂.၉၆ သန်းသို့ ကျဆင်းခဲ့သည်။

     ကမ္ဘာလုံးဆိုင်ရာ ဆန်လိုအပ်ချက် ဝယ်လိုအားသည် ဆက်လက် ခိုင်မာနေဆဲဖြစ်ကြောင်း၊ ဗီယက်နမ်သည် အရည်အသွေးမြင့်မားသော ဆန်ထုတ်လုပ်မှုအပေါ် အာရုံစိုက်လျက် အခြားသော ဈေးကွက်များသို့ တင်ပို့မှုကို မြှင့်တင်ရန် ကြိုးပမ်းသွားမည်ဖြစ်ကြောင်း၊ ၎င်းတို့အနေဖြင့် အရည် အသွေးမြင့်ဆန်များအတွက် ပြင်းထန်သော ဈေးကွက်ပြိုင်ဆိုင်မှုနှင့် ရင်ဆိုင်နေရခြင်း မရှိကြောင်း နှင့် တစ်နှစ်တာ ဆန်တင်ပို့မှုကို တန်ချိန် ၈ သန်းမှ ၉ သန်းအတွင်း ဆက်လက်ထိန်းထားနိုင်မည်ဟု ယုံကြည်ကြောင်း Mr. Nam က ဖြည့်စွက်ပြောကြားခဲ့သည်။

     ၎င်း၏ အဆိုအရ ရေရှည်တွင် ဗီယက်နမ်အစိုးရသည် ဆန်တင်ပို့မှုကို လျှော့ချပြီး ဈေးကွက် အခြေအနေများနှင့် လိုက်လျောညီထွေရှိသော အခြားသီးနှံများ စိုက်ပျိုးရေး မြေယာများကို အသုံးပြု မည့် စီမံကိန်းများရှိကြောင်း သိရှိရသည်။ ဗီယက်နမ်၏ ဆန်အိုးဖြစ်သော မဲခေါင်မြစ်ဝကျွန်းပေါ် ဒေသတွင် ရာသီဥတုပြောင်းလဲမှု၏ သက်ရောက်မှုများကြောင့် တောင်သူအချို့သည် ပြီးခဲ့သည့် နှစ်များက ပုစွန်မွေးမြူရေးနှင့် အခြားသီးနှံများ စိုက်ပျိုးရေးသို့ ပြောင်းလဲခဲ့ကြသည်။

Source: Bangkok Post, 2 Dec 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ကမ္ဘာ့ထိပ်တန်း ဆန်ထုတ်လုပ်ရောင်းချသည့်နိုင်ငံဖြစ်သည့် အိန္ဒိယနိုင်ငံက ဆန်ပိုလျှံမှု ကြောင့် ဆန်ဈေးနှုန်းများ နိမ့်ကျမှုသည် ယခုနှစ်ကုန်ပိုင်းမှ ၂၀၂၆ ခုနှစ်အတွင်း ဆက်လက်ကြာရှည် နိုင်ကြောင်း သတိပေးခဲ့သည်။ ထို့အပြင် အရှေ့တောင်အာရှတွင် ရာသီဥတု ဖောက်ပြန်နေမှုကြောင့် ထုတ်လုပ်မှုကို ထိခိုက်စေနိုင်ကြောင်း သိရှိရသည်။

      ကမ္ဘာ့အဓိက ဆန်ထုတ်လုပ်သည့် နှစ်နိုင်ငံဖြစ်သည့် ဗီယက်နမ်နှင့် ထိုင်းနိုင်ငံတို့တွင် ယခင် လများအတွင်း ထုတ်လုပ်မှုကို ကျဆင်းစေနိုင်သည့် ရာသီဥတု ဆိုးဝါးခြင်းများကို ကြုံတွေ့နေရပြီး အရှေ့တောင်အာရှ ဆန်ဈေးကွက်သည် မတည်ငြိမ်မှုများနှင့် ရင်ဆိုင်နေရကြောင်း သိရှိရသည်။ အိန္ဒိယ ဆန်တင်ပို့ရောင်းချသူများ အသင်းချုပ် (IREF) က အဆိုပါ ဆန်တင်ပို့သည့် အရှေ့တောင် အာရှ နှစ်နိုင်ငံ၏ ဆန်ထုတ်လုပ်မှုကျဆင်းခြင်းသည် အနည်းဆုံး ယာယီအခိုက်အတန့် ကာလတစ်ခု အတွင်း ကမ္ဘာ့ဆန် ဈေးကွက်အပေါ် သက်ရောက်မှုရှိနိုင်ကြောင်း ပြောကြားခဲ့သည်။

      နယူးဒေလီမြို့ အခြေစိုက် IREF အသင်းချုပ် ဥက္ကဋ္ဌ Dr Prem Garg က Bernama သတင်း ဌာနသို့ ပြောကြားရာတွင် ၂၀၂၅ ခုနှစ် တစ်လျှောက်လုံးနှင့် ၂၀၂၆ ခုနှစ်တို့တွင် ဈေးကွက်အတွင်း ကမ္ဘာ့ဆန်ဈေးနှုန်းများ နိမ့်ကျနေဦးမည်ဖြစ်ကြောင်း၊ ပြင်းထန်သော ဈေးကွက်မတည်ငြိမ်မှုများကို သုံးနှစ်ကြာ ခံစားခဲ့ရပြီးနောက် ၂၀၂၄ ခုနှစ်တွင် ကမ္ဘာ့ဆန်ထုတ်လုပ်မှု မက်ထရစ်တန် ၅၄၁ သန်း ရှိခဲ့မှုနှင့်အတူ ဈေးကွက် ပိုလျှံမှုကို ရင်ဆိုင်နေရပြီး ယင်းအခြေအနေသည် ဈေးနှုန်းကျဆင်းမှုများကို ဖိအားပေးနေကြောင်း သိရှိရသည်။

      ကမ္ဘာ့ကုန်သွယ်မှုဆိုင်ရာ ချေးငွေအန္တရာယ် စီမံခန့်ခွဲမှုကုမ္ပဏီဖြစ်သည့် ပြင်သစ်အခြေစိုက် Coface ၏ ထုတ်ပြန်ချက်အရ အိန္ဒိယသည် ဘာစမာတီမဟုတ်သော ဆန်တင်ပို့မှု ပိတ်ပင်ချက်ကို ရုတ်သိမ်းခဲ့သည့် တစ်နှစ်အတွင်း ဆန်ဈေးနှုန်းများ ၃၅ ရာခိုင်နှုန်း ကျဆင်းသွားပြီး နိုင်ငံတကာ ဆန် ဈေးကွက်သည် လွန်ခဲ့သော ဆယ်စုနှစ်အတွင်း အနိမ့်ဆုံးကြုံခဲ့ရသည့် ဆန်ဈေးနှုန်းများအနက် တစ်ခုအဖြစ် ကြုံတွေ့နေရသည်။

      ဆန်ဈေးကွက်တွင် ဆန်ဈေးနှုန်းများသည် မက်ထရစ်တန် တစ်တန်လျှင် မလေးရှားရင်းဂစ် ၁၄၈၈ နှင့်ညီမျှသော အမေရိကန်ဒေါ်လာ ၃၆၀ ဝန်းကျင်ခန့်တွင် ရှိနေကြောင်း၊ ဒေသတွင်း ဆန်ဈေး ကွက်သည် ယခုနှစ်အတွင်း စိန်ခေါ်မှုများစွာနှင့် ရင်ဆိုင်နေရကြောင်း၊ နှစ်စဉ် ဆန်မက်ထရစ် တန် ပေါင်း ၈ သန်းခန့် တင်ပို့လေ့ရှိသည့် ဗီယက်နမ်နှင့် ထိုင်းနိုင်ငံတို့သည် လက်ရှိတွင် မိုးသည်းထန်စွာ ရွာခြင်း၊ ရေလျှံခြင်းနှင့် မြေပြိုမှုများ ကြုံတွေ့နေရပြီး လယ်ကွင်းအချို့ ပျက်စီးခဲ့ရကြောင်း၊ အဆိုပါ အခြေအနေသည် လာမည့်လများအတွင်း ဆန်တင်ပို့မှုကို ထိခိုက်စေနိုင်ကြောင်း သိရှိရသည်။

    အဓိက ဆန်တင်သွင်းသည့် နှစ်နိုင်ငံဖြစ်သည့် အင်ဒိုနီးရှားနှင့် ဖိလစ်ပိုင်နိုင်ငံတို့သည် ၎င်းတို့ ၏ ပြည်တွင်းဈေးကွက်ကို ကာကွယ်ရန် ဆန်တင်သွင်းမှုကို ယာယီပိတ်ပင်ခဲ့ကြောင်း၊ အရှေ့တောင် အာရှ၌ ရာသီဥတုဆိုးရွားမှု (ရေလျှံခြင်း၊ မိုးရေချိန်မမှန်ခြင်းနှင့် ဆားငန်ရေဝင်ရောက်ခြင်း) သည် ထိုင်းနှင့် ဗီယက်နမ်ကဲ့သို့သော ဆန်အဓိက ထုတ်လုပ်သည့်နိုင်ငံများတွင် ဖြစ်ပွားပါက ကမ္ဘာ့ ဆန် ထောက်ပံ့မှုကို ထိခိုက်စေနိုင်ပြီး ကမ္ဘာ့ဆန်ဈေးနှုန်းများကို လွှမ်းမိုးနိုင်ကြောင်း၊ သို့သော် စုစုပေါင်း အကျိုးသက်ရောက်မှုသည် ရာသီဥတုနှင့်ဆက်စပ်သော ဆုံးရှုံးမှုများကို အိန္ဒိယကဲ့သို့ အခြားဒေသ များမှ ထုတ်လုပ်မှုနှင့် ကမ္ဘာ့လိုအပ်ချက်တို့က မည်မျှတုံ့ပြန် ဖြေရှင်းနိုင်သည့် အပေါ် မူတည်နေ ကြောင်း သိရှိရသည်။

    အဆိုပါ ဆန်တင်သွင်းမှု ယာယီပိတ်ပင်ချက်များသည် လာမည့်ကာလအတွက် ဆန်တင် သွင်းမှု လိုအပ်ချက်ကို လျော့နည်းစေပြီး ကမ္ဘာ့ဆန်ဈေးနှုန်းများအပေါ် ဖိအားကျဆင်းမှုကို တည်ငြိမ် စေနိုင်သော်လည်း ၎င်းတို့သက်သက်ဖြင့် ပိုလျှံမှုကြောင့်ဖြစ်သော ကျယ်ပြန့်သည့်အားနည်းမှုကို ပြန် လည်ပြောင်းလဲနိုင်မည် မဟုတ်ကြောင်း၊ အိန္ဒိယနိုင်ငံအနေဖြင့် ၂၀၂၅-၂၀၂၆ ကာလအတွင်း ဆန် မက်ထရစ်တန် ၂၄ သန်းမှ ၂၅ သန်းအထိ တင်ပို့ဖွယ်ရှိကြောင်းဖြင့် ဆန်လုပ်ငန်းနယ်ပယ်၌ နှစ်ပေါင်း ၁၁၈ နှစ်ကြာမျှ လုပ်ကိုင်လာခဲ့သော Shri Lal Mahal Group ၏ ဥက္ကဋ္ဌ ဖြစ်သူ Garg က ပြောကြားခဲ့သည်။

Bernama, December 2, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    ဖေ့စ်ဘွတ်နှင့် အခြားသော ဆိုရှယ်မီဒီယာများကို လည်ပတ်နေသည့် နည်းပညာကုမ္ပဏီကြီး မီတာ (Meta) က ဩစတေးလျနိုင်ငံ၌ အသက် ၁၆ နှစ်အောက် သုံးစွဲသူများအား ဆိုရှယ်မီဒီယာ သုံးစွဲခွင့် ပိတ်ပင်မည်ဖြစ်ကြောင်း ပြောကြားသည်။

    အဆိုပါ ကြေညာချက်သည် ဒီဇင်ဘာ ၁၀ ရက်နေ့တွင် စတင်အသက်ဝင်မည့် ကလေးများ အား ဆိုရှယ်မီဒီယာ အသုံးပြုခွင့်ကို တားမြစ်သည့် ဥပဒေထွက်ပေါ်လာခြင်းကြောင့် ဖြစ်ကြောင်း သိရသည်။ နိုဝင်ဘာ ၂၀ ရက်တွင် မီတာ ကုမ္ပဏီက အသက် ၁၃ နှစ်မှ ၁၅ နှစ်ကြား အင်စတာဂရမ်၊ သရက်စ်နှင့် ဖေ့စ်ဘွတ်အသုံးပြုသူများအား အထက်ပါပိတ်ပင်မှုနှင့် ပတ်သက်ပြီး အသိပေးခဲ့သည်။

    အသုံးပြုသူများအနေဖြင့် ၎င်းတို့၏ အချက်အလက်များကို ဒေါင်းလုတ်လုပ်နိုင်ရန် ကုမ္ပဏီက ၎င်းတို့၏အကောင့်များကို မဖယ်ရှားမီ ၁၄ ရက် အချိန်ပေးထားသည်။

    အသက် ၁၆ နှစ် ပြည့်သည်နှင့် ပြန်လည်ဝင်ရောက်ခွင့်ရနိုင်ကြောင်း မီတာကုမ္ပဏီက ပြောကြားသည်။ အသက် ၁၆ နှစ်အောက် သြစတြေးလျနိုင်ငံသား ၁၅၀၀၀၀ ခန့်သည် ဖေ့စ်ဘွတ်ကို အသုံးပြုကြ ပြီး ၃၀၀၀၀၀ ခန့်သည် အင်စတာဂရမ်ကို အသုံးပြုကြသည်။

   ဒီဇင်ဘာ ၁၀ ရက်တွင် စတင်အသက်ဝင်မည့် ဥပဒေသစ်အရ ဆိုရှယ်မီဒီယာပလက်ဖောင်း များသည် အသက်မပြည့်သေးသူများကို အကောင့်ဖန်တီးခြင်း သို့မဟုတ် အသုံးပြုခွင့်ကို တားမြစ် ရမည်ဟု ဖော်ပြထားသည်။ မလိုက်နာပါက ဒဏ်ရိုက်ခံ ရမည်ဖြစ်သည်။

     အဆိုပါ လူမှုမီဒီယာများတွင် TikTok၊ X၊ Snapchat နှင့် YouTube အပါအဝင် ပလက်ဖောင်း ၁၀ ခု ပါဝင်ကြောင်း သိရသည်။

Source: အင်န်အိတ်ချ်ကေ                                                    

DOCA(ပြည်ထောင်စုနယ်မြေ)

          ကမ္ဘောဒီးယားနိုင်ငံနှင့် ကနေဒါနိုင်ငံတို့မှ နှစ်နိုင်ငံအကြီးတန်းအရာရှိများသည် ရင်းနှီးမြှုပ်နှံမှုပူးပေါင်းဆောင်ရွက်မှု ပိုမိုနက်ရှိုင်းစေရန်၊ ရင်းနှီးမြှုပ်နှံသူများနှင့် ပိုမိုခိုင်မာသော ထိတွေ့ဆက်ဆံမှုနှင့် ပိုမိုကျယ်ပြန့်သော စီးပွားရေးထိတွေ့ဆက်ဆံမှုအတွက် 21-9-2025 ရက်နေ့တွင် တွေ့ဆုံဆွေးနွေးခဲ့ပြီး စီးပွားရေးမိတ်ဖက်ဆက်ဆံရေးကို နက်ရှိုင်းစေရန် တွေ့ဆုံဆွေးနွေးမှုများ ပြုလုပ်ခဲ့ကြသည်။ CDC တွင် ကျင်းပခဲ့သော ဆွေးနွေးပွဲသည် နှစ်နိုင်ငံစီးပွားရေးအခွင့်အလမ်းများ တိုးချဲ့ခြင်းနှင့် ကမ္ဘောဒီးယား၏ အလျင်အမြန် ပြောင်းလဲနေသော ရင်းနှီးမြှုပ်နှံမှုကဏ္ဍတွင် ဝင်ရောက်လိုသော ကနေဒါရင်းနှီးမြှုပ်နှံသူများအတွက် လမ်းကြောင်းများကို ခိုင်မာစေရန် အဓိကထား ဆွေးနွေးခဲ့ကြသည်။ တွေဆုံစဉ်အတွင်း CDC ၏ ဒုတိယဥက္ကဋ္ဌ Sun Chanthol က ကနေဒါနိုင်ငံတွင် မကြာသေးမီက ပြုလုပ်ခဲ့သော ကမ္ဘောဒီးယားရင်းနှီးမြှုပ်နှံမှုလမ်းပြပွဲ၏ အပြုသဘော ဆောင်သောရလဒ်များကို ပြောကြားခဲ့ပြီး  ကနေဒါစီးပွားရေးလုပ်ငန်းများအကြား ကမ္ဘောဒီးယား၏ ရင်းနှီးမြှုပ်နှံမှုအလားအလာကို သိသိသာသာ ပိုမိုကျယ်ပြန့်စေခဲ့ကြောင်း ပြောကြားခဲ့သည်။ ကမ္ဘောဒီးယားနိုင်ငံဆိုင်ရာ ကနေဒါသံအမတ်ကြီး DesRoches က ကမ္ဘောဒီးယားနိုင်ငံ၏ လက်ရှိပြုပြင်ပြောင်းလဲမှုများအပေါ် စိတ်ဝင်စားမှုကို ပြောကြားခဲ့ပြီး  နိုင်ငံ၏ စီးပွားရေးပတ်ဝန်းကျင်အပေါ် ပိုမိုတိကျပြီး အပြုသဘောဆောင်သော အမြင်ကို မြှင့်တင်ရန် ကတိကဝတ်ပြုခဲ့သည်။ DesRoches က ကနေဒါအစိုးရသည် ကမ္ဘောဒီးယားနိုင်ငံနှင့် ကုန်သွယ်မှုနှင့် ရင်းနှီးမြှုပ်နှံမှုဆက်ဆံရေးကိုတိုးချဲ့ရန် ယခင်ကထက် ပိုမိုနီးကပ်စွာ လုပ်ဆောင်နေကြောင်း ထပ်လောင်းပြောကြားခဲ့ကြောင်းသိရှိရပါသည်။

Source: Khmer Times

DOCA(ရန်ကုန်)

         မလေးရှားနိုင်ငံသို့ အသားတင်ပို့မှုနှင့်ပတ်သက်၍ ဝန်ကြီးချုပ်ကော်မတီ၏ အဆင့်မြင့်အစည်းအဝေးတစ်ခုကို ကျင်းပပြုလုပ်ခဲ့ပြီး အဆိုပါအစည်းအဝေးကို ဝန်ကြီးချုပ်အထူးလက်ထောက်ဆိုသူ (SAPM) Haroon Akhtar Khan နှင့် စီးပွားရေးရာပြည်ထောင်စုဝန်ကြီး Jam Kamal Khan တို့က ပူးတွဲဥက္ကဌ အဖြစ်ဆောင်ရွက်ခဲ့ကြောင်း သိရပါသည်။ အဆိုပါ အစည်းအဝေးတွင် ပြည်သူလူထုနှင့် ပုဂ္ဂလိကမှ ရှယ်ယာကိုင်ဆောင်သူများကို အချက်အခဲများ ပြန်လည်သုံးသပ်ရန်၊ လမ်းညွှန်မှုများပေးရန်နှင့် မလေးရှားနိုင်ငံသို့ အသားတင်ပို့မည့် မြှင့်တင်နိုင်မည့် ပါကစ္စတန်နိုင်ငံ အနာဂတ်လမ်းကြောင်းများကို ဖန်တီးနိုင်ရန်အတွက် ခေါ်ယူဆွေးနွေးခဲ့ကြောင်း သိရပါသည်။ အဆိုပါ အစည်းအဝေးတွင် ကော်မတီက မလေးရှားနိုင်ငံသို့ အမေရိကန်ဒေါ်လာ ၂၀၀ သန်းခန့်တန်ကြေးရှိသော အသားများတင်ပို့နိုင်ရန် အဆိုပြုခဲ့ကြောင်းသိရပါသည်။ ဝန်ကြီး Jam Kamal Khan ကလည်း ပို့ဆောင်မှုမြန်ဆန်ချောမွေ့ အဆင်ပြေစေရန်အတွက် ပုဂ္ဂလိကပို့ကုန် လုပ်ငန်းရှင်များနှင့် အတူ စီးပွားရေးပူးပေါင်းဆောင်ရွက်မှုပုံစံတစ်ခု ဖန်တီးသွားမည်ဖြစ်ကြောင်း အထူးအလေးပေး ပြောကြားခဲ့ပါသည်။ ထို့အပြင် ၎င်းက ပါကစ္စတန်နိုင်ငံ၏ စီးပွာရေးနယ်ပယ်များ ကိုချဲ့ထွင်ရန် လိုအပ်ကြောင်းနှင့် FMD ကာကွယ်ဆေးဓာတ်ခွဲခန်းတည်ဆောက်ရန်နှင့် တင်ပို့ကုန်လုပ်ငန်းရှင် များအတွက် ပစ်မှတ်ထား သောမက်လုံများ မိတ်ဆက်ရန်အတွက် အထူးအလေးထားပြောကြားခဲ့ပါသည်။ SAPM Haroon Akhtar Khan ကလည်း ပြည့်စုံသောတင်ပို့မှုနည်းဗျူဟာကို ဝန်ကြီးချုပ်လမ်းညွှန်ချက်နှင့်အညီ ရေးဆွဲနေကြောင်း ပြန်လည်အတည်ပြုခဲ့ပါသည်။ ထို့အပြင် ၎င်းက ပါကစ္စတန်နိုင်ငံသည် အရိုးမပါသော အသားတင်ပို့မှုအတွက် ကမ္ဘာလုံးဆိုင်ရာ စံချိန်စံညွှန်းများနှင့် ကိုက်ညီမှုရှိစေရန် ပြင်ဆင်နေကြောင်း ပြောကြားခဲ့ပါသည်။ Haroon က အပြည်ပြည်ဆိုင်ရာဈေးကွက်များတွင် ပါကစ္စတန်နိုင်ငံ၏ ယှဉ်ပြိုင်မှုများ အဆင့်မြှင့်တင်ရန်အတွက် တင်သွင်းထုတ်လုပ်မှုယန္တရားများ၊ အအေးခဲအဆောက်အဦးများနှင့် ထုတ်ပိုးမှုစနစ်များ တိုးတက်အောင်ပြုလုပ်ခြင်းသည် အရေးပါကြောင်း အထူးအလေးထားပြောကြားခဲ့ပါသည်။ အစည်းအဝေးအဆုံးသတ်တွင် Jam Kamal Khan က အသစ်ဖန်တီးထားသော စီးပွားရေးပုံစံတစ်ခုကို ဝန်ကြီးချုပ်အား တင်ပြသွားမည်ဟု နိဂုံးချုပ် အမှာစကားပြောကြားခဲ့ကြောင်း သိရပါသည်။

Source: Brecorder.com                                                              

DOCA (ရန်ကုန်)