ပြည်တွင်းကုန်သွယ်မှုသတင်း

         နွားထိုးကြီးမြို့နယ်သည် ဥယျာဉ်ခြံမြေများ များစွာစိုက်ပျိုးလျက်ရှိရာ ကွမ်းခြံများကိုလည်း ကံနှောင်းရွာ၊ နနွင်းတော်ဘိုးရွာ၊ ကံရွာနှင့် လက်ဝဲ၊ မြင်းနီကျေးရွာများတွင် စိုက်ပျိုးထားကြောင်း သိရှိရသည်။ ၂၀၂၅-၂၀၂၆ခုနှစ်၊ နိုဝင်ဘာလ၌ နွားထိုးကြီးမြို့နယ်၏ ကွမ်းစိုက်ပျိုးဧက ၄၉၈ ဧကစိုက်ပျိုးထားကြောင်း ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရသည်။ ကွမ်းပင်များကို ဝါဆိုလ(ဇွန်လ)တွင်စတင်စိုက်ပျိုးပြီး၊ စိုက်ပျိုးချိန်မှ (၃)လအကြာ ကွမ်းရွက်များခူးဆွတ်၍ ဈေးကွက်၌ရောင်းချနေပြီဖြစ်ကြောင်း၊ကွမ်းခြံတစ်ခြံစိုက်ပျိုးထားလျှင် (၄-၅)နှစ်ခန့်အထိ ခူးဆွတ် ရောင်းချရကြောင်း၊ ၂၀၂၅ ခုနှစ်၊ နိုဝင်ဘာလ၌ နွားထိုးကြီးမြို့တွင် ကွမ်းရွက်(ရိုးရိုး) တစ်ပိဿာလျှင် (၉၅၀၀)ကျပ်၊ ကွမ်းနုဝါတစ်ပိဿာလျှင် (၁၁၀၀၀)ကျပ်ခန့် ပေါက်ဈေး များဖြင့်‌ရောင်းချလျက် ရှိကြောင်း၊ ကွမ်းရွက်အရည်အသွေး အမျိုးအစားပေါ်မှုတည်၍ ဈေးနှုန်းများအနည်းငယ် ကွာခြား ကြောင်း၊ ကွမ်းရွက်စိုက်ပျိုးခြင်းဖြင့် စီးပွားဖြစ်ဝင်ငွေရပြီး အရင်းမရှုံးသော ကွမ်းပင်များကိုတိုးချဲ့ စိုက်ပျိုးသင့်ကြောင်း ကွမ်းစိုက်တောင်သူတစ်ဦး၏ ပြောပြချက်အရ သိရှိရသည်။

DOCA(မန္တလေး)

            နွားထိုးကြီးဒေသသည် အပူပိုင်းမိုးနည်းရပ်ဝန်းဒေသဖြစ်သောကြောင့် မိုးရာသီကာလ၌ မိုးသီးနှံများကို အားထားစိုက်ပျိုးရကြောင်း၊ ဒေသအတွင်းရှိ‌‌ကျေးရွာများတွင် မိုးနှံစားပြောင်း သီးနှံကိုလည်း စီးပွားဖြစ်စိုက်ပျိုးထားကြောင်း၊ မေလနှင့် ဇွန်လများတွင်စတင်စိုက်ပျိုးပြီး၊ အောက်တိုဘာလနှင့် ဒီဇင်ဘာလကုန်တွင် ရိတ်သိမ်းမည်ဖြစ်ကြောင်း၊ ၂၀၂၅-၂၀၂၆ ခုနှစ်တွင် မိုးနှံစားပြောင်းစိုက်ဧက (၂၅၄၅၉)ဧက စိုက်ပျိုးထားရှိကြောင်း  မြို့နယ်ကြေးတိုင်နှင့် မြေစာရင်း ဦးစီးဌာန၏ စာရင်းများအရသိရှိရသည်။  စိုက်ပျိုးရာတွင် ထွက်တိုးနီမျိုးနှင့် ရွေဝါမျိုးကိုအများဆုံး စိုက်ပျိုးကြကြောင်း၊ ထွန်ကြောင်းဆွဲ အစေ့ချစနစ်ဖြင့် စိုက်ပျိုးပြီး တစ်ဧကပျမ်းမျှ ကုန်ကျမှု အနေဖြင့် မျိုး၊ သွင်းအားစု၊ လုပ်သားခအပါအဝင် ငွေကျပ်(၃၂၀၀၀၀)ကျပ်ခန့် ကုန်ကျကြောင်း၊ နှံစားပြောင်းကို တိရစ္ဆာန်အစာအဖြစ် အသုံးပြုရန် အများဆုံးစိုက်ပျိုးကြကြောင်း၊ ယခင်နှစ်တစ်ဧက အထွက်နှုန်း အနေဖြင့် (၁၅) တင်းခန့်ထွက်ရှိခဲ့ကြောင်း၊ မိုးကိုမျှော်ပြီးစိုက်ပျိုးရသော သီးနှံဖြစ်သော ကြောင့် ယခုနှစ်တွင်မိုးလေဝသကောင်းပါက အထွက်နှုန်းကောင်းနိုင်မည်ဟုခန့်မှန်းရကြောင်း နွားထိုးကြီးမြို့ နယ်၊ ပဲကြီးခင်းကျေးရွာမှ နှံစားပြောင်းစိုက်တောင်သူတစ်ဦး၏ ပြောကြားချက် အရသိရှိရသည်။ နှံစားပြောင်းသီးနှံကို အသားတိုးနွား၊ နို့စားနွားမွေးမြူရေးလုပ်ငန်းများ အတွက်အသုံးပြုကြောင်း၊ နှံစားပြောင်းထွက်ပေါ်ချိန်တွင် ရန်ကုန်မြို့သို့ တင်ပို့ကြောင်း သိရှိရသည်။

DOCA(မန္တလေး)

    မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၊ မြို့မဈေး၌ မြို့ပတ်ဝန်းကျင်ရှိ ကျောက်တံခါး၊ ရေမြက်၊ စကုမြို့နှင် ပွင့်ဖြူမြို့ပေါ်ရှိ ဥယျာဉ်ခြံများမှထွက်ရှိသည့် တစောင်းခါးပင်များ နိုဝင်ဘာလ (တတိယပတ်)မှ စတင်၍ ဝင်ရောက်အရောင်းအဝယ် ဖြစ်လျက်ရှိကြောင်း သိရသည်။

            ၂၀၂၅ခုနှစ်၊ နိုဝင်ဘာလ(စတုတ္ထပတ်)တွင် တစောင်းခါးပင်(၁)ပိဿာလျှင် ကျပ်(၈၀၀၀)ဖြင့် ရောင်းချလျက်ရှိပြီး (တတိယပတ်)ပေါ်စအချိန်နှင့် နှိုင်းယှဉ်ပါက ဈေးနှုန်းပြောင်းလဲမှုမရှိပဲ အရောင်း အဝယ်ဖြစ်လျက်ရှိကြောင်း၊ ပေါ်ဦးပေါ်ဖျားဖြစ်သည့်အတွက် အရောင်းအဝယ်သွက်ပြီး ဈေးကောင်း လျက်ရှိကြောင်း သိရှိရပါသည်။

DOCA(မကွေး)

                    မြင်းခြံမြို့အေးမြသီတာဈေး၌ ရောင်းချနေသော ပဲမြစ်များကို ကျောက်ဆည်ခရိုင်၊ တံတားဦး မြို့နယ်မှ ဝယ်ယူရောင်းချကြောင်း၊ ၂၀၂၅ခုနှစ်၊ နိုဝင်ဘာလ၌ ရောင်းချနေ‌သော ပဲမြစ် တစ်ပိဿာ လျှင် (၄၀၀၀-၆၀၀၀) ကျပ်ခန့် ပေါက်ဈေး များဖြင့်ရောင်းချကြောင်း၊ ယခင်လနှင့် နှိုင်းယှဉ်ပါက ယခုလတွင် ပဲမြစ်အစစုံတစ်ပိဿာလျှင် (၁၀၀၀-၁၅၀၀) ကျပ်ခန့်ဈေးနှုန်း ကျဆင်းခဲ့ကြောင်း၊ လှိုင်လှိုင်ပေါများစွာ ထွက်ပေါ်ချိန်ဖြစ်သောကြောင့် ဈေးနှုန်းကျဆင်းခြင်း ဖြစ်ကြောင်း၊ နေ့စဉ် ကုန်ချိန် (၂၀-၃၀) ပိဿာခန့်ရောင်းချရကြောင်း ရာသီပေါ်ဖြစ်၍ လူအများ စားသုံးမှုများပြားကြောင်း ပဲမြစ်ရောင်းချရောင်းသူတစ်ဦး၏ ပြောပြချက်အရသိရှိရသည်။  ပဲမြစ်ကိုစားသုံးခြင်းဖြင့် အာဟာရ ဓာတ်ကြွယ်ဝပြီး ဗီတာမင်စီ၊ ဗီတာမင်ကေနှင့် ဖောလစ်အက်ဆစ်ကြွယ်ဝ၍ ပရိုတင်းဓာတ် ကြွယ်ဝစွာပါဝင်ကြောင်း၊ အမျှင်ဓာတ်ပါဝင်မှုမြင့်မားသလို အစာခြေလမ်းကြောင်း ကို ကျန်းမာစေပြီး ဝမ်းမှန်စေကြောင်း၊   ဗီတာမင်စီကြွယ်ဝစွာ ပါဝင်သောကြောင့် ကိုယ်ခံအားစနစ်ကို အားကောင်းစေကြောင်း၊ ကယ်လိုရီနှင့် အဆီဓာတ်အလွန်နည်းသောကြောင့် ကိုယ်အလေးချိန် ထိန်းသိမ်းသူများ အတွက် စားသုံးရန်သင့်တော်ကြောင်း သိရှိရသည်။

DOCA(မန္တလေး)

    မကွေးတိုင်းဒေသကြီး၊ သရက်ခရိုင်၊ သရက်မြို့နယ်ပတ်ဝန်းကျင်ရှိ ကျေးရွာများဖြစ်သော ဘော်ကျေးရွာ၊ တလုပ်ပင်ကျေးရွာ၊ ပျဉ်ထောင်ကျေးရွာနှင့်ရွာသစ်ကျေးရွာများမှ ပိန်းဥများ သရက် မြို့၊ မြို့မဈေးသို့ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။

    နိုဝင်ဘာလသည် ပိန်းဥများလှိုင်လှိုင် ထွက်ရှိသောလဖြစ်ပါသည်။ ၂၀၂၅ခုနှစ်၊ နိုဝင်ဘာလ (ဒုတိယပတ်)နှင့်(တတိယပတ်)တွင် ပိန်းဥတစ်ပိဿာလျှင် ကျပ်(၃၀၀၀မှ ၃၅၀၀)ထိဈေးရှိပြီး ယခု (စတုတ္ထပတ်)တွင် တစ်ပိဿာလျှင် ကျပ်(၃၅၀၀မှ၄၀၀၀) ဈေးနှုန်းဖြစ်ပေါ်ခဲ့ပါသဖြင့် တစ်ပိဿာ လျှင် ကျပ်(၅၀၀) အတက်ဈေးဖြင့် အရောင်းအဝယ်ဖြစ်လျက်ရှိပြီး ပုံမှန်အရောင်းအဝယ် ဖြစ်နေပါ ကြောင်း ဈေးသည်များထံမှ သိရှိရပါသည်။ ပိန်းဥသည် မြန်မာ့ရိုးရာဟင်းလျာများထဲမှ အဟာရ ပြည့်ဝပြီး ကျန်းမာရေးနှင့် ညီညွတ်သည့် အစားအစာဖြစ်ပြီး လူကြိုက်များ၍ ပုံစံအမျိုးမျိုးဖြင့် ကြော်၍လည်ကောင်း၊ ချက်ပြုတ်၍ သော်လည်ကောင်း စားသုံးရပြီး ရာသီစာအစားအစာအဖြစ် စားသုံးကြကြောင်း သိရှိရပါသည်။

DOCA(မကွေး)