ပြည်တွင်းကုန်သွယ်မှုသတင်း

               မြန်မာနိုင်ငံတွင် မန်ကျည်းပင်များ ပေါများလာသည်နှင့်အမျှ မန်ကျည်းသီး ၊ မန်ကျည်းဖူး ၊ မန်ကျည်းရွက်နုတွေကို လူတော်တော်များများ နှစ်သက်စွာစားသုံးကြကြောင်း ၊ မြန်မာ့ရိုးရာ ဆေးနည်းမှာ မန်ကျည်းတစ်ပင်လုံးက ပစ်စရာမရှိအောင် အသုံးဝင်ကြောင်း ၊ အိမ်ရှင်မများ ဟင်းချက်ရာတွင် ပုံစံမျိုးစုံဖြင့် အသုံးပြုကြကြောင်း ၊ မန်ကျည်းသီးမှည့် သီးသန့်ပဲဖြစ်ဖြစ်၊ ဟင်းအနှစ် အဖြစ်လည်း ချက်စားကြသလို ဖျော်ရည်အဖြစ်လည်း သောက်သုံးကြကြောင်း ၊  ချဉ်ရည်ဟင်း ၊ အကင်အမျိုးမျိုးအတွက် အချဉ်ပြုလုပ်ခြင်းတို့တွင်လည်းအသုံးပြုကြောင်း ၊ မန်ကျည်းသီးမှည့်သည် အရသာ ထိမိရုံသာမက ကျန်းမာရေးကောင်းကျိုးများလည်း များစွာရှိကြောင်း ၊ မန်ကျည်းသီးမှည့် စားသုံးခြင်း ဖြင့် နှလုံးကျန်းမာရေးကို အထောက်အကူပြုနိုင်ခြင်း ၊ သွေးဖိအားကို မျှတစေခြင်း ၊ အသည်းအဆီ ဖုံးခြင်းကို ကာကွယ်ပေးခြင်း စသည့်ကျန်းမာရေးကောင်းကျိုးများစွာ ရရှိကြောင်း၊ ထောင်းပြီးငပိနှင့် ချက်စားခြင်းအပြင် ပုဇွန်ဆိတ် ၊ ပုဇွန်ဆီ ၊ ငါးပိကောင်များဖြင့်လည်း ချက်စားလေ့ရှိကြောင်း ၊ မန်ကျည်းသီး ဈေးနှုန်းအနေဖြင့် ယခင် မန်ကျည်းသီးမှည့် တစ်ပိဿာလျှင် (၁၀၀၀၀/-)ကျပ်ဖြင့်ရောင်းဝယ်ခဲ့ပြီး ယခုအချိန်တွင် မန်ကျည်းသီးမှည့် တစ်ပိဿာလျှင် (၁၂၀၀၀/-) ကျပ်ဖြင့် ရောင်းဝယ်လျက်ရှိသောကြောင့် ယခင်လနှင့်နှိုင်းယှဉ်ပါက (၂၀၀၀/-)ကျပ်အထိ စျေးနှုန်း မြင့်တက်ခဲ့ကြောင်း သိရှိရပါသည်။

DOCA(မန္တ‌လေး)              

             မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့် စပါး၊ ပဲ၊ ပြောင်း၊ နှမ်းသီးနှံမျိုးစုံ အောင်မြင်ဖြစ်ထွန်းလျက်ရှိရာ ၄င်းသီးနှံများအနက် ဆီထွက်သီးနှံ တစ်မျိုးဖြစ်သော မြေပဲသီးနှံများအား မိုးနှင့်ဆောင်းရာသီများတွင် စိုက်ပျိုးကြပါသည်။ ကျောက်ဆည်ခရိုင်တွင် ၂၀၂၅-၂၀၂၆ ဘဏ္ဍာနှစ်တွင် မြေပဲ(ဆောင်း) (၁၁၅၀)ဧက စိုက်ပျိုးထားရှိ ကြောင်း၊ မြေပဲ(ဆောင်း)မှာ ပင်ထောင်မျိုး နှင့် ပင်ပြန့်မျိုးဟူ၍ (၂)မျိုးရှိကြောင်း ၊ ယခုအချိန်တွင် ပင်ထောင်မျိုးများ စတင်ထွက်ပေါ်လျက်ရှိကြောင်း ၊ မြေပဲစိုက်ပျိုးမှု ကုန်ကျစရိတ်အနေဖြင့် (၁)ဧကလျှင် မျိုး ၊ သွင်းအားစု ၊ လုပ်သားခအပါအဝင် စုစုပေါင်း (၆၀၀၀၀၀)ကျပ် ဝန်းကျင်ခန့် ကုန်ကျကြောင်း ၊ မြေပဲစိုက်ပျိုးရာတွင် ထွန်ကြောင်းဆွဲ ၊ အစေ့ချစနစ်ဖြင့် စိုက်ပျိုးကြကြောင်း ၊ အထွက်နှုန်းအနေဖြင့် သီးနှံအရည်အသွေးပေါ်မူတည်ပြီး တင်း(၂၅-၃၀)ခန့် ထွက်ရှိခဲ့ကြောင်း၊ မြေပဲဈေးနှုန်းအနေဖြင့်မြေပဲတောင့်(၁)တင်းလျှင်(၅၂၅၀၀/-)ကျပ်၊မြေပဲဆံတစ်ပိဿာလျှင်(၇၅၀၀/) ကျပ် ၊ မြေပဲဆီ(၁)ပိဿာလျှင်(၁၂၅၀၀/-)ကျပ် ဈေးနှုန်းများဖြင့် အရောင်းအဝယ်ဖြစ်နေကြောင်း ၊ ဈေးကွက်အနေဖြင့် ပွဲစားများမှ ကျေးရွာအရောက် ဝယ်ယူမှုများရှိသလို တောင်သူများမှလည်း ပွဲရုံများသို့ တိုက်ရိုက်တင်ပို့ရောင်းချကြောင်း ၊ ပွဲရုံများမှ တဆင့် မန္တလေး ၊ ရန်ကုန်မြို့များသို့ တင်ပို့ရောင်းချကြကြောင်း မြေပဲစိုက်တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တ‌လေး)              

                    မန္တလေးတိုင်းဒေသကြီး ကျောက်ဆည်ခရိုင်သည် ‌ရှေးယခင်ကပင် လယ်တွင်းကိုးခရိုင်တွင် တစ်ခု အပါအဝင်ဖြစ်ပြီး ဆည်၊မြောင်း၊ကန်၊ချောင်းများတည်ရှိသောကြောင့် စိုက်ပျိုးရေးလုပ်ငန်းများ ဖြစ်ထွန်းအောင်မြင်ပြီး ခရိုင်အတွင်း အဓိကစိုက်ပျိုးသော သီးနှံများမှာ စပါး၊ ပဲ၊ ပြောင်း၊ နှမ်း၊ ငရုတ်၊ ကြက်သွန်၊ဝါ၊နနွင်း စသည့်သီးနှံများအား ရာသီအလိုက် စိုက်ပျိုးဖြစ်ထွန်းလျက်ရှိပါသည် ။ ၄င်းသီးနှံ များအနက် ကျောက်ဆည်ခရိုင်မှထွက်ရှိသော ကြက်သွန် ၊ ဝါနှင့်ငရုတ်သီးနှံများမှာ စျေးကွက်အတွင်း ဝယ်လိုအားကောင်းသော သီးနှံများအဖြစ်ထင်ရှားပါသည် ။ စိုက်ပျိုးထွက်ရှိလာသော သီးနှံများအား ယခင်က မိရိုးဖလာ နေရောင်ခြည်ကိုအသုံးပြုပြီး နေလှန်းအခြောက်ခံကာ မန္တလေးမြို့ နှင့် ကျောက်ဆည်ခရိုင်အတွင်းရှိ သီးနှံပွဲရုံများသို့ ရောင်းချကြောင်း ၊ သီးနှံများအား နေရောင်ခြည်ကို အသုံးပြုပြီး နေလှန်းအခြောက်ခံရာတွင် (၇) ရက်ခန့် ကြာမြင့်ပြီး အများစုမှာ ပြည်သူများသွားလာရာ ကတ္တရာလမ်းမပေါ် နှင့် ကွင်းပြင်ကျယ်များတွင် နေလှန်းပြီး ထွက်ရှိလာသော သီးနှံမှာအရောင် မညီခြင်း ၊ အစိုဓာတ်မညီခြင်း ၊ သန့်ရှင်းမှုအားနည်းခြင်း ၊ အစိုဓာတ်ကြောင့် အယ်လဖာတော့ပ်ဆင် မှိုစိတ်ဖြစ်ပေါ်နိုင်သောကြောင့် တောင်သူများမှာ ဈေးကောင်းမရရှိခြင်း နှင့် စားသုံးသူပြည်သူများမှာ လည်းဘေးကင်းလုံခြုံမှုမရှိခြင်းတို့ဖြစ်ပေါ်လျက်ရှိပါသည်။ ယခုအချိန်တွင် ခေတ်စနစ်များ တိုးတက် လာသောကြောင့် ဒေသတွင်းလုပ်ငန်းရှင်များမှာ ယခင်သီးနှံများအား သဘာဝအတိုင်း နေလှန်း အခြောက်ခံရာမှ ယခုအချိန်တွင် Solar Dryer Dome တို့ဖြင့် သီးနှံများကို နေလှန်းအခြောက်ခံခြင်း လုပ်ငန်းများ လုပ်ကိုင်လာကြပါသည် ။ ထိုင်းနိုင်ငံမှထုတ်လုပ်သည့် Solar Dryer Dome အား မြစ်သားမြို့နယ် ၊ ကူမဲမြို့ရှိ  A1 Family Factory တပ်ဆင်ပြီး ငရုတ် ၊ ကြက်သွန်(အဖြူ/နီ) သီးနှံများအား အခြောက်ခံပြီး အမှုန့်များပြုလုပ်ပြီး စျေးကွက်အတွင်းသို့ ဖြန့်ချီရောင်းချလျက်ရှိ ပါသည်။ ၄င်းကိရိယာ၌ မီးဖိုချောင်သုံး သီးနှံမျိုးစုံအား အခြောက်ခံနိုင်ကြောင်း ၊ ဒေသတွင်း လုပ်ငန်းရှင်များ၊တောင်သူများမှ စိတ်ပါဝင်စားမှုရှိကာ မကြာခဏလာရောက်လေ့လာလေ့ရှိကြောင်း၊ Solar Dryer Dome ၏ နည်းပညာပိုင်း အနေဖြင့်(Green House Effect)အား သုံးစွဲထားကြောင်း၊ Solar Dryer Dome အမိုးပြား(PC Sheet)သည် နေရောင်ခြည်တွင် ပါဝင်သော ခရမ်းလွန်ရောင်ခြည် နှင့် အနီအောက်ရောင်ခြည်တို့ကို ကာကွယ်ပေးထားသဖြင့် သီးနှံများ၏ မူလအရောင်အသွေး ပျက်စီးမှုမရှိဘဲ နေရောင်ခြည်၏ အပူချိန်အား (၅)ဆမြင့်တက်စေကြောင်း ၊  လုပ်သားများဝင်ရောက် လုပ်ကိုင်ရာတွင် အန္တရာယ်မရှိနိုင်ကြောင်း၊ ငရုတ်သီး၊ အသားခြောက်၊ လက်ဖက်၊ ချဉ်ပေါင်၊ နနွင်း စသည့် အခြားစားသောက်ကုန်ပစ္စည်းများကို သန့်ရှင်းစွာခြောက်သွေ့စေသည့် စနစ်တစ်ရပ်ဖြစ် ကြောင်း ၊ ထုတ်ကုန်များကို လေဆိုး ၊ ဖုန်မှုန့် ၊ ပိုးမွှားများကပ်ညှိခြင်းမရှိဘဲ သန့်ရှင်းစွာခြောက်သွေ့ စေနိုင်ကြောင်း၊ Solar Dryer Dome တစ်ခုလျှင် အလျား(၆၀)ပေ၊အနံ(၄၀)ပေရှိပြီး ငရုတ်သီးနှံများ လှန်းပါကပိဿာ(၄၀၀၀)ခန့်နှင့်ကြက်သွန်(အဖြူ/နီ)ဆိုပါက(၁၂၀၀)ပိဿာခန့်ဆံ့ကြောင်း ၊ နေလှန်း အခြောက်ခံပါက(၃)ရက်ခန့်သာကြာသည့်အတွက် သီးနှံများအား  အချိန်တိုအတွင်း  ခြောက်သွေ့စေ ကြောင်း၊ ထိုသို့ခြောက်သွေ့ရာတွင် နေရောင်ခြည်တိုက်ရိုက်မထိသဖြင့် သီးနှံများ အရောင်မပျက် ၊ အနံ့အရသာပြောင်းလဲခြင်းမရှိဘဲ အရည်အသွေးမြင့် ထုန်ကုန်ရရှိခြင်းစသည့် အကျိုးကျေးဇူးများ ရရှိပါသည် ။ A1 Family Factory စက်ရုံတွင် ငရုတ်၊ ကြက်သွန် သီးနှံများအား အဆိုပါ အခြောက်ခံ ကိရိယာဖြင့် အမှုန့်များပြုလုပ်ပြီး စျေးကွက်အတွင်း ဖြန့်ဖြူးလျက်ရှိပါသည် ။ ၄င်းစက်ရုံတွင် အမှုန့် ကြိတ်စက်(၄)လုံးရှိပြီး တစ်ရက်လျှင် ငရုတ်သီးအခြောက် (၂၀၀၀)ပိဿာခန့် အမှုန့်ကြိတ်ပြီး စျေးကွက်အတွင်းသို့ဖြန့်ဖြူးလျက်ရှိရာ ပြည်တွင်းသာမကဘဲ ပြည်ပနိုင်ငံဖြစ်သော ဂျပန်နိုင်ငံသို့ပါ တင်ပို့ရောင်းချလျက်ရှိပါသည်။ယခုအချိန်တွင်ငရုတ်သီးများစတင်ထွက်ပေါ်လျက်ရှိရာကျောက်ဆည် ခရိုင်အတွင်းသာမက ဧရာဝတီတိုင်း ၊ အောင်ပန်း၊ပခုက္ကူ၊ပျော်ဘွယ်၊မိတ္ထီလာဒေသများမှထွက်ရှိသည့် ငရုတ်သီးအစိုများအား ဝယ်ယူလျက်ရှိရာ စျေးနှုန်းအနေဖြင့် (၁)ပိဿာလျှင်(၃၅၀၀/-)ကျပ် စျေးဖြင့် ဝယ်ယူကြောင်း၊ဒေသတွင်းတောင်သူများမှာ ယခင်ကသီးနှံများအားနေရောင်ခြည်ဖြင့်အခြောက်ခံပြီး ‌စျေးကွက်ရှိရာသို့ သွားရောက်ရောင်းချသဖြင့် အချိန်ကုန်ပြီး ကုန်ကျစရိတ်များကြောင်း ၊ ယခုအခါ တွင်စိုက်ခင်းထဲမှထွက်ရှိသော သီးနှံများအားနေလှန်းအခြောက်ခံခြင်းမရှိဘဲ သီးနှံအစိုအားတိုက်ရိုက် ရောင်းချသောကြောင့် ကုန်ကျစရိတ်နည်းပြီး တောင်သူများအတွက် တွက်ခြေကိုက်ကြောင်း ၊ ကျောက်ဆည်ခရိုင်အတွင်း အဆိုပါ Solar Dryer Dome အား A1 Family Factory စက်ရုံအပြင် အခြားလုပ်ငန်းရှင်များမှလည်း တပ်ဆင်အသုံးပြုလျက်ရှိပါသည် ။ စိုက်ပျိုးရေးထွက်ကုန် အသီးအနှံ များအပြင် အစာအာဟာရ ထုတ်ကုန်များ၊ ငါးခြောက်၊ အသားခြောက်စသည်များကို Solar Dryer Dome ဖြင့် အသုံးပြု အခြောက်ခံနိုင်ပြီး သန့်ရှင်းသော ၊ မှိုဆိပ်ကင်းသော ၊ အစိုဓာတ်ပါဝင်မှု နည်းသော ကုန်ပစ္စည်းများကို ရရှိပြီး ပြည်တွင်းကုန်သွယ်မှုဖွံ့ဖြိုးတိုးတက်စေရုံသာမက ဒေသခံ ပြည်သူများ ကျန်းမာရေးနှင့်ညီညွတ်ပြီး သန့်ရှင်းသပ်ရပ်သော သီးနှံများကို သုံးစွဲနိုင်မှာဖြစ်သည့် အတွက် သီးနှံများအား နေရောင်ခြည်စွမ်းအင်သုံး Solar Dryer Dome ကိရိယာအား အသုံးပြုသင့် ပါကြောင်းရေးသားအပ်ပါသည်။

DOCA(မန္တ‌လေး)              

    ကန့်ဘလူခရိုင်၊ ကျွန်းလှမြို့ရှိ ကုန်မျိုးစုံရောင်းဝယ်ရေးဆိုင်များ နှင့် ဈေးများတွင် ရှင်မတောင်သနပ်ခါးတုံးများကို ရွှေဘိုမြို့နှင့်မုံရွာမြို့တို့မှ မှာယူရောင်ချလျက်ရှိကြောင်း သိရသည်။

     ၂၀၂၅ ခုနှစ်၊ နိုဝင်ဘာလ တတိယပတ်အတွင်း ကျွန်းလှမြို့တွင် ရောင်းချနေသော မြန်မာ့ရိုးရာ ရှင်မတောင်သနပ်ခါးဈေးနှုန်းမှာ ရှင်မတောင်သနပ်ခါးတုံး အကြီးအသေးပေါ်မူတည်၍ အတုံးကြီး(၁)တုံးလျှင်(၄၀၀၀)ကျပ်၊ အလတ်(၁)တုံးလျှင်(၃၅၀၀ မှ ၃၀၀၀)ကျပ်ဈေးနှင့် အသေး (၁)တုံးလျှင်(၂၅၀၀မှ၂၀၀၀)ကျပ်ထိ နှင့် သနပ်ခါးတုံးအမြစ်တုံးကလေးများသည်(၇၀၀ မှ ၁၀၀၀) ကျပ်ထိ ‌ဈေးနှုန်းအသီးသီးတိုဖြင့်  အရွယ်အစား အမျိုးအစားပေါ်မူတည်၍ အရောင်းအဝယ် ဖြစ် လျက်ရှိကြောင်း သတင်းရရှိပါသည်။

DOCA(စစ်ကိုင်း)

            မိတ္ထီလာမြို့ခရိုင်၌ လယ်ယာစိုက်ပျိုးရေးလုပ်ငန်းများမှ သီးနှံမျိုးစုံစိုက်ပျိုးလျက်ရှိရာ ဆန်စပါး ၊ဆီထွက်သီးနှံ၊ပဲမျိုးစုံ၊ငရုတ်၊ကြက်သွန်၊ဝါစသည့်သီးနှံများကို အဓိကစိုက်ပျိုးကြပြီး သစ်သီးဝလံဖြစ်သည် ငှက်ပျောကို စိုက်ပျိုးမှုမှာအနည်းငယ်သာရှိကြောင်း၊ ၂၀၂၅-၂၀၂၆ ခုနှစ် ၊ငှက်ပျောစိုက် ဧက(၅၀၂)ဧကသာရှိကြောင်း ကြေးတိုင်နှင့်မြေစာရင်းဦီးစီးဌာနစာရင်းအရသိရှိရပါသည်။ 

     မိတ္ထီလာဈေးကွက်သို့ ကျောက်ဆည်၊ တောင်ငူ၊ လွိုင်ကော်မြို့များမှ ငှက်ပျောများ အဝင်များ ကြောင်းသိရှိရပါသည်။ ယခုနိုဝင်ဘာလတတိယပတ်တွင် ငှက်ပျောဖီးကြမ်း တစ်ဖီးလျှင်  (၄၅၀၀-၅၀၀၀)ကျပ်၊ ရခိုင်ငှက်ပျောတစ်ဖီးလျှင်(၂၅၀၀-၃၀၀၀)ကျပ်၊ သီးမွေးငှက်ပျောတစ်ဖီးလျှင် (၅၀၀၀-၆၀၀၀)ကျပ်ဖြင့်အရောင်းအဝယ်ဖြစ်လျက်ရှိကြောင်း ယခင်လနှင့်ကာလတူနှိုင်းယှဉ်လျှင် အလှူပွဲများကုန်ချိန်ဖြစ်၍ ငှက်ပျောတစ်ဖီးလျှင်(၅၀၀)ကျပ်ခန့် ဈေးနှုန်းအနည်းငယ်ကျဆင်းလာ ကြောင်း သိရှိရပါသည်။

DOCA(မန္တ‌လေး)