ပြည်တွင်းကုန်သွယ်မှုသတင်း

    ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသ တစ်ခုဖြစ်ပြီး ဒေသတွင်းစားသုံးဆီဖူလုံစေရေးအတွက် ကန့်ဘလူမြို့နယ် တောက္ကရှပ်ကျေးရွာ၊ မြေထူးကျေးရွာ၊ နတ်ပေးကျေးရွာနှင့် အခြားသောကျေးရွာများတွင် ဆောင်းနှမ်းကိုအဓိက စိုက်ပျိုး ကြောင်း၊ နှမ်းသီးနှံကို ဒေသတွင်း၌ဆီကြိတ်သော်လည်း ပိုလျှံသောသီးနှံများကို ရွှေဘိုမြို့နှင့် မန္တလေးမြို့ရှိပွဲရုံများသို့ အဓိကတင်ပို့ကြောင်း သိရသည်။

    ၂၀၂၅ ခုနှစ်၊ နိုဝင်ဘာလ တတိယပတ်အတွင်း နှမ်းနက်(စမုံ)တစ်တင်းလျှင် (၂၃၅၀၀၀)ကျပ်၊ နှမ်းဖြူ(ဂျပန်)တစ်တင်းလျှင် (၁၀၀၀၀၀)ကျပ်ဈေးနှုန်းဖြင့် အရောင်းအဝယ်ဖြစ်လျက်ရှိရာ  ယခု နိုဝင်ဘာလ ဒုတိယပတ်၏ ဈေးနှုန်းနှင့်နှိုင်းယှဉ်ပါက တတိယပတ်အတွင်း နှမ်းနက်တစ်တင်းလျှင် (၇၀၀၀)ကျပ်ဈေးနှုန်းမြင့်တက်ပြီး၊ နှမ်းဖြူတစ်တင်းလျှင်(၆၀၀၀)ကျပ် ဈေးနှုန်းကျဆင်းသွား ကြောင်း ဒေသတွင်းသီးနှံပွဲရုံများထံမှ သိရသည်။

DOCA(စစ်ကိုင်း)

     မြန်မာလူမျိုးတို့သည် အသီးအနှံများ၊ သဘာဝအစားအသောက်ဖြစ်သော ထန်းပင်မြစ်၊ ပဲမြစ်၊ ကန်စွန်းဥ၊ ပိန်းဥ စသည့်တို့ကိုလည်း လွန်စွာကြိုက်နှစ်ကြပါသည်။ ဆောင်းရာသီရောက်လာသည်နှင့် မနက်အိပ်ယာထ မီးဖို၍ မီးလှုံရင်း ပိန်းဥပြုတ်၊ ကန်စွန်းဥပြုတ်၊ ပဲမြစ်ပြုတ်တို့ဖြင့် နံနက်စာ စားသောက်ခြင်းသည်လည်း ဓလေ့တစ်ခုဖြစ်ပါသည်။ ပိန်းဥသည် အစာအိမ်နှင့်အူလမ်းကြောင်းကျန်းမာရေးကို ကောင်းကျိုးပြုသော အမျှင်ဓာတ်ပါဝင်မှု မြင့်မားစေခြင်း၊ အစာခြေဖျက်နိုင်စွမ်း ပိုကောင်း၍ ဝမ်းမှန်စေခြင်း၊ သွေးဖိအားကိုလျော့ကျစေသောကြောင့် အာရုံကြောစနစ်ကို မြှင့်တင်ပေးခြင်း၊ အမြင်အာရုံကောင်းစေခြင်း၊ ဗီတာမင်အီးနှင့်ဗီတာမင်အေတို့ကြောင့် အသားအရေ ထိန်းသိမ်းနိုင်စွမ်းကောင်း၍ အရေးအကြောင်းများ ပြေပျောက်စေခြင်း၊ အသားအရေဝင်းလက်လှပစေနိုင်ခြင်း၊ အဓိက အစွမ်းသတ္တိက ကိုယ်ခံအားစနစ်ကို အားကောင်းစေခြင်း၊ အဆုတ်ကျန်းမာရေးကောင်းစေခြင်း၊ ပင်ပန်းနွမ်းလျမှု ပြေလျော့စေခြင်း၊ အကြားအာရုံချို့ယွင်းမှုကို တိုးတက်ကောင်းမွန်စေခြင်းတို့ကြောင့် ပုံမှန်စားသုံးပေးသင့်ကြောင်း သိရှိရသည်။ ၂၀၂၅ ခုနှစ်၊ နိုဝင်ဘာလ တတိယပတ်တွင် မြင်းခြံမြိုဲ့၌ အရောင်းအဝယ်ဖြစ်သော ပိန်းဥစျေးနှုန်းမှာ တစ်ပိဿာလျှင် ၃၀၀၀/- မှ ၄၀၀၀/- ကျပ်ဖြစ်ကြောင်း သိရသည်။

DOCA(မန္တ‌လေး)                  

            ကန်စွန်းဥကို ပုံမှန်စားသုံးခြင်းဖြင့် မျက်စိအမြင်အာရုံကောင်းခြင်း၊ ကိုယ်ခံအားကောင်းစေခြင်း၊ အစာအိမ်နာဖြစ်ခြင်းကို သက်သာစေခြင်း၊ ကိုယ်အလေးချိန်ကို ထိန်းညှိပေးခြင်း၊ သွေးတွင်းသကြားဓာတ်ကို ထိန်းညှိပေးခြင်း၊ ဆီးချိုရောဂါကို ကာကွယ်ပေးနိုင်ခြင်း၊ အမျှင်ဓာတ်ကြွယ်ဝသောကြောင့် ဝမ်းမှန်စေခြင်း၊ နာတာရှည်ရောဂါများ မဖြစ်အောင် ကာကွယ်ရန် ကန်စွန်းဥကို စားသုံးသင့်ပါကြောင်း၊ အမြင်အာရုံကိုလည်း ကောင်းစေခြင်း၊ အဆစ်အမြစ်များနာကျင်မှုကို သက်သာစေခြင်း၊ ကန်စွန်းဥမှာ ပါသော အမျှင်ဓာတ်က အစာခြေစနစ်ကို ကျန်းမာစေ၍ ဝမ်းချုပ်မှုကင်းဝေးခြင်း စသည့်ကျန်းမာရေးကောင်းကျိုးများကြောင်း  လေ့လာသိရှိရပါသည်။ ထိုကြောင့် ယခုလို ဆောင်းရာသီတွင် ကန်စွန်းဥများ လှိုင်လှိုင်ပေါ်ပြီဖြစ်ရာ အညာဒေသတွင် အလှူပွဲများ၊ မင်္ဂလာဆောင်ပွဲများ၊ ဘုရားပွဲများတွင် ပြုတ်၍ ဧည့်ခံခြင်း၊ ကန်စွန်းယို ထိုး၍ ဧည့်ခံခြင်း၊ နံနက်စာအဆာပြေအဖြစ်ပြုတ်၍ ပဲဆီနှင့်ဆားဖြင့် စားသောက်ခြင်းတို့သည်လည်း ဓလေ့တစ်ခုဖြစ်ပါသည်။ မြင်းခြံမြို့ အေးမြသီတာဈေး၊ မြို့မစည်ပင် သာယာဈေးနှင့်စံပြဈေးတို့တွင် တစ်ပိဿာလျှင် ၃၀၀၀/- မှ ၄၀၀၀/- ကျပ်ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(မန္တ‌လေး)                  

               မုန်ညင်းသည် အဝါရောင်ပန်းပွင့်ကာ အနံ့စူးရှပြီး အရသာ အနည်းငယ်ခါးသက်လေးပင်သော အသီးအနှံတစ်မျိုးဖြစ်သည်။ သတ်သတ်လွတ် ဟင်းရွက်ကြော်ဖြင့် လည်းကောင်း၊ မုန်ညင်းစိမ်း စွပ်ပြုတ်၊ မုန်ညင်းချဉ်ရည်ဟင်းဖြင့်လည်းကောင်း၊ အသားတစ်မျိုးမျိုးနှင့် ရော၍လည်းကောင်း စားသုံးလေ့ရှိကြပါသည်။ ယခုလို ဆောင်းရာသီတွင် အသီးအနှံများ လှိုင်လှိုင်ပေါများလာပြီး မုန်ညင်းစိမ်းသည် ရာသီနှင့်လိုက်ဖက်သော အသီးအနှံဖြစ်ပါသည်။ မုန်ညင်းရွက်တွင် ဗီတာမင်များ အကောင်းဆုံးပါရှိခြင်း၊ ပင်စည်နှင့်အပွင့်တို့သည် ဝမ်းပျော့စေခြင်း၊ အသည်းနှင့် သွေးကိုသန့်စင်စေခြင်း၊ ကိုလက်စထရော ကျဆင်းစေခြင်း၊ ဖိုင်တိုအာဟာရဓာတ် များစေခြင်း၊ အမျှင်ဓာတ်ကြွယ်ဝခြင်း၊ အရိုးကို သန်မာစေသော ဗီတာမင် K များခြင်း၊ ကိုယ်ခံစွမ်းအားကောင်းစေသော ဗီတာမင်ဓာတ်ကြွယ်ဝခြင်း၊ အသားအရေနှင့်မျက်လုံးကို သန်မာစေသော ဗီတာမင်A ပါရှိကြောင်း သိရသည်။ ဆောင်းရာသီတွင် အအေးဓာတ်ကို မုန်ညင်းပူပူလေးကြော်ချက်၍ ခရမ်းချဉ်သီးငါးပိချက်နှင့်ဲဖက်စားသုံးပါက အလွန်ထမင်းမြိန်စေပါသည်။ မြင်းခြံမြို့တွင်လည်း ရာသီစာနှင့် လိုက်ဖက်သော မုန်ညင်းများ ရောင်းဝယ်လျက်ရှိရာ မုန်ညင်းတစ်စည်းလျှင် ၅၀၀/- ကျပ်ဖြင့် အရောင်းအဝယ်ဖြစ်လျက်ရှိကြောင်း ကုန်စိမ်းရောင်းချသူတစ်ဦးထံမှ သိရှိရသည်။

DOCA(မန္တ‌လေး)                  

             မန္တ‌လေးတိုင်းဒေသကြီး ၊ ကျောက်ဆည်မြို့နယ်သည် စပါး၊ပဲ၊ပြောင်း၊နှမ်း၊ငရုတ်၊ကြက်သွန် စသည့်စိုက်ပျိုးရေးလုပ်ငန်းကို အဓိကထားလုပ်ကိုင်ပြီး လယ်ယာထွက်သီးနှံများအပြင် ဥယျာဉ်ခြံသီးနှံများကိုလည်း တစ်နိုင်တစ်ပိုင် စိုက်ပျိုးလျက်ရှိပါသည်။ ဥယျာဉ်ခြံသီးနှံများမှာ သရက်၊ မာလကာ၊  သံပုရာနှင့် နဂါးမောက်သီးကို အဓိကထားစိုက်ပျိုးကြပါသည်။ နဂါးမောက်သီးကို တောင်နောက်ကျေးရွာနှင့်သင်တောင်းကျေးရွာများတွင် စိုက်ပျိုးကြပါသည်။နဂါးမောက်သီးတွင် အဖြူသီးနှင့်အနီသီး  ဟူ၍(၂)မျိုးရှိပြီး အဖြူသီးမှာလူကြိုက်များကြောင်း၊ ကျောက်ဆည်နယ်မှ ထွက်သော နဂါးမောက်သီးကို ကျောက်ဆည်မြို့ရှိ မြို့မစျေး၊ အေးမြကြည်လင်စျေးနှင့် သစ်သီးဆိုင်များသို့ တင်ပို့ရောင်းချလျက်ရှိကြောင်း၊  နဂါးမောက်သီးစျေးနှုန်းမှာ ယခင်လက တစ်လုံးလျှင် ၈၀၀/- မှ ၁၀၀၀/- ကျပ်ရှိပြီး ယခုလတွင်  တစ်လုံးလျှင် ၁၀၀၀/- မှ ၁၅၀၀/- ကျပ်ဖြင့် ရောင်းဝယ်လျက်ရှိကြောင်း၊ အလုံးအကြီး ၊ အသေးပေါ်မူတည်၍ စျေးနှုန်းကွာခြားကြောင်း ၊ ဈေးကွက်အတွင်းတွင် နဂါးမောက်သီးဝင်ရောက်မှု နည်းပါးလာသောကြောင့် ယခင်လကထက် ဈေးနှုန်းအနည်းငယ်မြင့်တက်လျက်ရှိကြောင်း၊ နဂါးမောက်သီးကို စားသုံးခြင်းဖြင့် အစာခြေစနစ်ကို မြှင့်တင်ပေးခြင်း၊ အသားအရည်လှပစေခြင်း၊ အရိုးကျန်းမာရေးကို ကောင်းမွန်စေခြင်းနှင့် သွေးတွင်းသကြားဓာတ်ကို ထိန်းညှိပေးခြင်းစသည့်ကျန်းမာရေးအကျိုးကျေးဇူးများ ရရှိနိုင်ကြောင်း ၊ ကျောက်ဆည်မြို့ရှိ သစ်သီးရောင်းချသည့်ဆိုင်များမှသိရှိရပါသည်။ DOCA(မန္တ‌လေး)