ပြည်တွင်းကုန်သွယ်မှုသတင်း

              နတ်တော်လဆန်အခါသမယတွင်ကုန်စိမ်းစျေးကွက်သို့မန္တလေးတိုင်းဒေသကြီးရှိ အမရပူရ ခရိုင်၊ပြင်ဦးလွင်ခရိုင်၊ကျောက်ဆည်ခရိုင်နှင့်မိတ္တီလာခရိုင်တို့မှ ထွက်သည့်ကုန်စိမ်းများ၊ စစ်ကိုင်းတိုင်းဒေသကြီးနှင့် ရှမ်းပြည်နယ်တို့မှ ထွက်သည့်ပန်းဂေါ်ဖီပွင့်ဖြူများ ဝင်ရောက်မှုများပြား လျက် ရှိပြီး၊စျေးအနည်းငယ်ကျဆင်းကာ အရောင်းသွက်လျက်ရှိကြောင်း  သိရှိရပါသည်။ ၂၀၂၅ ခုနှစ် နိုဝင်ဘာလနောက်ဆုံးပတ်အတွင်း ဖြစ်ပေါ်သည့်စျေးနှုန်းများမှာ ပန်းဂေါ်ဖီ ပွင့်ဖြူ ၁ ခုလျှင် အပွင့် (ကြီး) ၁၅၀၀ ကျပ်နှင့် ၁၈၀၀ကျပ်၊ အပွင့်(သေး) ၁၀၀၀ ကျပ်နှင့် ၁၂၀၀ ကျပ်စျေးတို့ဖြင့် ရောင်းချပြီး၊ အပွင့်အရွယ်အစားအပေါ် မူတည်၍ စျေးကွာခြားမှုရှိကြောင်းသိရှိရပါသည်။မန္တလေးမြို့၊ သီရိမာလာ စျေးအတွင်း နေ့စဉ် ကုန်စိမ်းသီးနှံ ဝင်ရောက်မှုမှာ ကုန်စည်အမျိုးအစားအလိုက် Canter ၁၂ဘီးနှင့် ၆ ဘီး) ယာဉ်(၄၀) စီး နှင့်(၆၀)စီး အကြားဝင်ရောက်လျက်ရှိကြောင်း သိရှိရပါသည်။

DOCA(မန္တလေး)

     တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့ပေါ်အနီးတစ်ဝိုက်ကျေးရွာများ၌ စီးပွားဖြစ် ဘုရားပန်းများ စိုက်ပျိုးရောင်းချလျက်ရှိပြီး လူကြိုက်များသော ပန်းတိမ်ငိုပန်းများနှင့် အခြားသော  ဘုရားပန်းများကို ရန်ကုန်နှင့် မော်လမြိုင်တို့ဘက်မှ အများဆုံးတင်သွင်း‌ရောင်းချလျက်ရှိကြောင်း သိရှိရပါသည်။ ပန်းတိမ်ငိုဘုရားပန်းသည် အထားခံပြီး တစ်မျိုးလေးကျက်သရေရှိသည့်အတွက် ဈေးကောင်းရရှိကြောင်းလည်း သိရှိရပါသည်။

          ၂၀၂၅ခုနှစ် နိုဝင်ဘာလနောက်ဆုံးပတ်တွင် မြိတ်မြို့ပေါ်တွင် ရောင်းချနေသော ပန်းတိမ် ငိုဘုရားပန်းဈေးနှုန်းမှာ (၁၀)ပွင့်လျှင် (၆၀၀၀)ကျပ်ရှိကြောင်းသိရှိရပါသည်။

DOCA(တနင်္သာရီ)

     တနင်္သာရီတိုင်းဒေသကြီး၊ မြိတ်မြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များ တွင် ဟင်းသီးဟင်းရွက်စိုက်ပျိုးရေးလုပ်ငန်းများကို အများအပြားလုပ်ကိုင်လျက်ရှိကြောင်း သိရှိရ သည်။ ဒေသခံများသည် သခွားသီး၊ ခရမ်းသီး၊ ကန်စွန်းရွက်၊ ချဉ်ပေါင်ရွက်၊ ရုံးပတီသီး၊ ဘူးသီး၊ ငရုတ်သီး စသည့် သီးနှံများကို စိုက်ပျိုးကြသည့်အပြင် ရွှေဖရုံသီးများကိုလည်း တစ်နိုင်တစ်ပိုင် စိုက်ပျိုးကြပြီး မြိတ်မြို့ဈေးကြီးနှင့် ကျေးရွာဈေးများသို့ လာရောက်ရောင်းချကြကြောင်းသိရှိရသည်။ ရွှေဖရုံသီးသည် အာဟာရဓာတ်များစွာပါဝင်ပြီး ကျန်းမာရေးအတွက် အထူးကောင်းမွန်သည့် ဟင်းသီးဟင်းရွက်တစ် မျိုးဖြစ်ကာ ဒေသခံများအနေဖြင့်ဟင်းချိုချက်သောက်ခြင်း၊ ကြော်စားခြင်းများ  ပြုလုပ်လေ့ရှိကြောင်း သိရှိရသည်။

      ၂၀၂၅ခုနှစ်၊ နိုဝင်ဘာလပထမပတ်အတွင်း မြိတ်မြို့ပေါ်ရှိဈေးများ၌ ရောင်းချလျက် ရှိသော ရွှေဖရုံသီးဈေးနှုန်းမှာ ရွှေဖရုံသီး(၁)ပိဿာလျှင် (၃၅၀၀)ကျပ်မှ (၄၀၀၀)ကျပ်၊ ရွှေဖရုံသီး (၁)စိတ် လျှင် (၁၅၀၀)ကျပ်မှ (၂၀၀၀)ကျပ်ဖြင့် အရောင်းအဝယ်ဖြစ်ပွားလျက်ရှိကြောင်း ဒေသခံကုန်စိမ်း ရောင်းချသူများထံမှ သိရှိရသည်။

DOCA(တနင်္သာရီ)

    တနင်္သာရီတိုင်း၊ မြိတ်ခရိုင်တွင် ဒေသတွင်းစီးပွားရေးအနေဖြင့် တစ်နိုင်တစ်ပိုင် စိုက်ပျိုးရေး လုပ်ကိုင်လျက်ရှိပြီး နဂါးမောက်သီးများလည်းစိုက်ပျိုးလျက်ရှိသည်။ နဂါးသီကို အဖြူအနီဟူ၍ နှစ်မျိုးရှိပြီး မြိတ်မြို့တွင် နှစ်မျိုးစလုံးစိုက်ပျိုးကြသည်။ သို့သော် စျေးကွက်တွင် ရောင်းချရန် စီးပွားဖြစ်စိုက်ပျိုးထားခြင်းမျိုးမရှိသဖြင့် ကော့သောင်းနှင့် ရန်ကုန်မြို့တို့မှ ဝယ်ယူကြပါသည်။ ဒေသစိုက် နဂါး‌မောက်သီး‌နှင့် ကော့သောင်မှဝင်‌ရောက်လာသော နဂါးမောက်သီးများတွင် ကော့ သောင်းသီးမှာ စျေးပိုမိုရရှိကြောင်းသိရှိရပါသည်။ ဒေသထွက်အသီးသည် အလုံးငယ်ခြင်းကြောင့်နှင့် ကော့သောင်းသီးသည် သယ်ယူပို့ဆောင်စရိတ်များကြောင့် စျေးပိုရကြောင်းသိရှိရပါသည်။ ဒေသ ထွက် နဂါးမောက်သီးအဖြူတစ်လုံးလျှင် ၃၅၀၀-၄၀၀၀ ကျပ်ခန့်ရရှိချိန်တွင် ကော့သောင်းအသီးမှာ ၄၅၀၀-၅၀၀၀ ကျပ်ခန့်ရရှိကြောင်း၊ နဂါးမောက်သီးအနီတစ်လုံးလျှင် ၅၀၀၀ ကျပ်ခန့်စျေးရရှိကြောင်း သိရှိရပါသည်။

DOCA(တနင်္သာရီ)

    တနင်္သာရီတိုင်း၊ မြိတ်ခရိုင်သည် ကမ်းရိုးတန်းဒေသဖြစ်သည့်အတွက် ဓနိပင်များ သဘာဝ ပေါက်ရောက်လျက်ရှိပြီး ၎င်းဓနိပင်မှ ဒေသတွင်း စီးပွားဖြစ်လုပ်ကိုင်ကြလျက်ရှိသည်။ ယခု နိုဝင်ဘာ လကုန်တွင် ဆောင်းရာသီသို့ဝင်ရောက်လာပြီး ဓနိရည်ချိုရောင်းအားကောင်းလာကြောင်းသိရှိရပါ သည်။ ဓနိရည်ချိုသည်အေးလာသည်နှင့်အမျှ အရသာပိုချိုလာပြီး မြိတ်မြို့တွင် ရာသီပေါ် အစား အစာအဖြစ် ကောက်ညင်းပေါင်းနှင့်တွဲဖက်၍ သောက်သုံးကြလေ့ရှိသည်။ ညအချိန်တွင် မြိတ်မြို့တွင်း ဘေးတွဲ၊ တုတ်တုတ် (အိုးဝေ)များဖြင့် မြို့ပတ်၍ ရောင်းချကြပြီး ရှမ်းချောင်းစျေးကြီးများတွင် ‌အများဆုံးရောင်းချကြသည်။ မြို့ပတ်၍ ‌ရောင်းချလျက်ရှိသော ဓနိရည်ချိုစျေးနှုန်းမှာ ရေသန့်ဗူး တစ်ဗူးလျှင် ၃၀၀၀ ကျပ်ခန့်ရှိပြီး၊ ရှမ်းချောင်းစျေးများတွင် ရောင်းချနေသောစျေးနှုန်းမှာ ၂၃၀၀ကျပ် ခန့်ရှိကြောင်း သိရှိရပါသည်။ ဓနိရည်ချိုဖြင့် တွဲဖက်စားသုံးရန် ကောက်ညှင်းပေါင်းကို တစ်ထုတ်လျှင် ၅၀၀ကျပ်ဖြင့်ရောင်းချလျက်ရှိကြောင်း သိရှိရပါသည်။

DOCA(တနင်္သာရီ)