ပြည်တွင်းကုန်သွယ်မှုသတင်း

     ရှမ်းပြည်နယ် (တောင်ပိုင်း) ဒေသထွက် ကုန်ပစ္စည်းများ စိုက်ပျိုးရေးထွက်ကုန်များအား အခြားတိုင်းဒေသကြီး/ ပြည်နယ်များသို့ နေ့စဉ် တင်ပို့ရောင်းချလျက်ရှိရာ အများဆုံးတင်ပို့သည့် ကုန်ပစ္စည်းများမှာ အစေ့ထုတ်ပြောင်း၊ ပဲစင်းငုံ၊ ပဲပုတ် ၊ သစ်သီးဝလံများနှင့် ဟင်းသီးဟင်းရွက် စားဖိုဆောင်သီးနှံများ၊ လက်ဖက်ခြောက်၊ လက်ဖက်စို၊ မွေးမြူရေးထုတ်ကုန်ဖြစ်သော ဝက်၊ ကြက် နှင့် ကြက်ဉများဖြစ်ကြောင်း သိရှိရပါသည်။

     (၂၁-၉-၂၀၂၅)ရက်နေ့မှ (၂၇-၉-၂၀၂၅)ရက်နေ့ထိ ရှမ်းပြည်နယ်(တောင်ပိုင်း)မှ အခြားတိုင်း ဒေသကြီး/ပြည်နယ်များသို့ အစေ့ထုတ်ပြောင်း(  ၁၂၈၂၇ )တန်၊ပဲစင်းငုံ (၄၅၄)တန်၊ ပဲပုတ် (၂၃၀၁)တန်၊ စားဖိုဆောင်သီးနှံများဖြစ်သော ကြက်သွန်ဖြူ၊အာလူးနှင့်ဂျင်း (၉၂၉)တန်၊ လက်ဖက်ခြောက် (၂၈၀)တန် ၊ မွေးမြူရေးထုတ်ကုန်ဖြစ်သော ဝက်၊ကြက် (၉၅၉)တန် တင်ပို့နိုင်ခဲ့ကြောင်း သတင်းရ ရှိခဲ့ပါသည်။

DOCA(ရှမ်း)

   ရှမ်းပြည်နယ်(မြောက်ပိုင်း)၊ မူဆယ်မြို့တွင် ရောင်းချနေသော ဆန်ဈေးနှုန်းမှာ ပေါ်ဆန်မွှေး ဆန် တစ်ပြည်လျှင် (၉၅၀၀) ကျပ်မှ (၁၂၀၀၀) ကျပ်၊ ဧည့်မထဆန် တစ်ပြည်လျှင် (၇၀၀၀) ကျပ်မှ (၈၀၀၀) ကျပ်၊ ငစိန်ဆန်တစ်ပြည်လျှင် (၆၅၀၀) ကျပ်မှ (၇၅၀၀) ကျပ်နှုန်းဖြင့် ရောင်းချလျက်ရှိကြောင်း သိရှိရသည်။

   ရှမ်းပြည်နယ်(မြောက်ပိုင်း)တွင် လတ်တလောဖြစ်ပေါ်နေသော နိုင်ငံရေးအခြေနေများ ကြောင့် ကုန်စည်စီးဆင်းမှုများခက်ခဲလျက်ရှိနေကြောင်း၊ အခြေခံစားကုန်အချို့ကိုပင်နယ်စပ် ဖြစ်သော တရုတ်မှတစ်ဆင့် တစ်နိုင်တစ်ပိုင်ယူ၍ ရောင်းချနေရကြောင်း၊ မြန်မာပြည်တွင်းမှယူ၍ ရောင်းချရာတွင်လည်း လမ်းခရီးခက်ခဲမှုများနှင့် ကုန်ကျစရိတ်မြင့်မားမှုကြောင့် များစွာအဆင်မပြေမှု များရှိကြောင်း ဒေသခံများမှ သိရှိရပါသည်။

DOCA(ရှမ်း)

         ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ် မြန်မာ့စီးပွားရေးဘဏ်တွင် (၂၂.၉.၂၀၂၅) ရက်နေ့ နံနက်(၀၈:၀၀) နာရီအချိန်မှစတင်၍ ပင်စင်စားဝန်ထမ်းများအား အခြေခံစားသောက်ကုန် ဆီနှင့် ကြက်ဥများအား ဈေးနှုန်းသက်သာစွာဖြင့် ပြည်သူများဝယ်ယူအသုံးပြုနိုင်ရေး ရောင်းချပေးလျက်ရှိပါသည်။ ဆန်နှင့် စားအုန်းဆီများရောင်းချပေးရာတွင် မြို့နယ်စီမံအုပ်ချုပ်ရေးအဖွဲ့၊ မြို့နယ်စည်ပင် သာယာရေးအဖွဲ့၊ စားသုံးသူရေးရာဦးစီးဌာန မြို့နယ်တာဝန်ခံ ဦးသန့်ဇင်ဦးနှင့် မြို့နယ် စားအုန်းဆီ လက္ကားကိုယ်စားလှယ်များမှ ပူးပေါင်းဆောင်ရွက်ခဲ့ကြောင်း သိရသည်။

         ထိုသို့ရောင်းချရာတွင် ပြည်သူများအား သက်သာသောဈေးနှုန်းဖြင့် ဝယ်ယူစားသောက်နိုင်ရန် စားအုန်းဆီ (၅၀ ကျပ်သား)ဘူးခွံအပါ တစ်ဗူးလျှင် ၃၅၀၀/- ကျပ်နှုန်းဖြင့် ပိဿာချိန် (၅၀)နှင့် ကြက်ဥ(၅)လုံး တစ်ထုပ်လျှင် (၂၀၀၀)ကျပ်ဖြင့် အလုံးရေ (၅၀၀)လုံးအား ရောင်းချပေးခဲ့ကြောင်း သိရှိရပါသည်။ ထိုသို့ရောင်းချခြင်းကို ဌာနဆိုင်ရာများမှ ပူးပေါင်း၍ ပြည်သူများ ဈေးနှုန်းသက်သာစွာ ဝယ်ယူနိုင်ရေး ဆောင်ရွက်ပေးခြင်းဖြစ်ကြောင်း သတင်းရရှိပါသည်။

DOCA(ဧရာဝတီ)

     ရှမ်းပြည်နယ်(မြောက်ပိုင်း)၊ လားရှိုးမြို့၊ မြို့မဈေးတွင် အသီးအရွက်များ၊ ဒေသထွက် သီးနှံများအပြင် အာလူးနှင့် ကြက်သွန်များကိုလည်းရောင်းချလျက်ရှိကြောင်းတွေ့ရှိရပါသည်။

    အာလူးဈေးနှုန်းမှာ တစ်ပိဿာလျှင် (၂၅၀၀) မှ (၃၀၀၀) ကျပ်၊ ကြက်သွန်နီ တစ်ပိဿာလျှင် (၃၀၀၀) မှ (၄၀၀၀) ကျပ်၊ ကြက်သွန်ဖြူ(ရှမ်း) တစ်ပိဿာလျှင်(၇၅၀၀) ကျပ်မှ (၁၀၀၀၀) ကျပ်၊ ကြက်သွန်ဖြူ(ကြူကုတ်) တစ်ပိဿာလျှင်(၁၀၀၀၀) ကျပ်မှ (၁၂၀၀၀) ကျပ် အထိရှိပြီး အမျိုးအစား ပေါ်မူတည်၍ ကွဲပြားကြောင်းသိရှိရသည်။ ရှမ်းပြည်နယ်(မြောက်ပိုင်း)တွင် လတ်တလော ဖြစ်ပေါ် နေသော နိုင်ငံရေးအခြေနေများကြောင့် ကုန်စည်စီးဆင်းမှုများခက်ခဲလျက်ရှိနေပြီး၊ အရောင်း အဝယ်များလည်းပါးနေကြောင်း ကုန်ရောင်းချသူများထံမှ သိရှိရပါသည်။

DOCA(ရှမ်း)

     ရှမ်းပြည်နယ်(တောင်ပိုင်း)တွင် ယခုအချိန်သည် Hass မျိုး ထောပတ်သီးများ အရောင်းသွက်နေချိန်ဖြစ်ပါသည်။ အသီးအရွယ်အစား သေးငယ်ပေမဲ့လည်း အတွင်းသားထူပြီး အရသာမှာ ပျစ်ပျစ်နှစ်နှစ်နဲ့ ဆိမ့်ဆိမ့်လေး ဖြစ်တာကြောင့် စားကောင်းပြီး လက်ဆောင်ပေးလျှင်လည်း မျက်နှာပန်းလှသဖြင့် လူကြိုက်များတဲ့ အသီးဖြစ်ပါသည်။ အမျှင်မပါတဲ့အတွက် သဘာဝအတိုင်း အခွံခွာ၍ အစိမ်းစားနိုင်သလို ကြိုက်နှစ်သက်ရာတို့နဲ့ရောစပ်၍ ထောပတ်သီး‌ ဖျော်ရည်အဖြစ်လည်းကောင်း ဆလပ်သုပ်နေဖြင့်လည်းကောင်း အမျိုးမျိုး စားသုံးတတ်ကြပါသည်။ Hass မျိုး ထောပတ်သီးများကို အသီးအရည်အသွေးနှင့် အရွယ်အစားပေါ် မူတည်ပြီး အဆင့်များ ခွဲခြား၍ အသေးဆုံးဆိုဒ် 1Kg လျှင် ၂၅၀၀/- မှ ပရီမီယံဆိုဒ် 1Kg လျှင် ၉၅၀၀/- ခန့် ဈေးရှိကြောင်း သိရှိရပါသည်။

DOCA(ရှမ်း)