ပြည်တွင်းကုန်သွယ်မှုသတင်း

               ကျွန်းလှမြို့နယ် သံဘိုကျေးရွာ၊ ရှမ်းစုကျေးရွာတို့မှ တစ်ပိုင်တစ်နိုင်စိုက်ပျိုုးပြီး ထွက်ရှိသည့် ဒေသထွက် ခရမ်းသီးနှင့် ခရမ်းချဉ်သီးများကို ဈေးကွက်အတွင်းသို့ ပို့ဆောင်ရောင်းချလျက်ရှိပြီး မိမိတို့ဒေသထွက်များ ဝင်ရောက်မှု နည်းပါးလာသည့်ရာသီများတွင် မန္တလေးမြို့ နှင့် ရှမ်းပြည်နယ် အောင်ပန်းမြို့ တို့မှ မှာယူရောင်းချလျက်ရှိကြောင်းသိရသည်။

            ၂၀၂၆ ခုနှစ်၊  ဇန်နဝါရီလ ဒုတိယပတ်တွင် သစ်ရာမြိုင်ဈေး၌ ရောင်းချနေသော ခရမ်းချဉ်သီး ဈေးနှုန်းအနေဖြင့် ကျွန်းလှဒေသထွက် ခရမ်းချဉ်သီး(ဗမာ) အလုံးကြီး တစ်ပိဿာလျှင်(၆၀၀၀)ကျပ်၊ (၅၀) ကျပ်သားလျှင် (၃၀၀၀)ကျပ်၊ ခရမ်းချဉ်သီး(ထိုင်ဝမ်)အလုံးကြီးတစ်ပိဿာလျှင်(၅၀၀၀)ကျပ်၊ (၅၀)ကျပ်သား လျှင်(၂၅၀၀)ကျပ် နှင့် အလုံးသေး တစ်ပိဿာလျှင်(၄၅၀၀)ကျပ်၊ (၅၀)ကျပ်သား လျှင်(၂၃၀၀)ကျပ်၊ ခရမ်းသီး ဈေးနှုန်းများမှာ ထောပတ် ခရမ်းသီး လက်လီ တစ်ပိဿာ လျှင်(၃၀၀၀)ကျပ်၊ (၅၀)ကျပ် သားလျှင်(၁၅၀၀)ကျပ် နှင့် ပဒေသာ ခရမ်းသီး တစ်ပိဿာလျှင် (၂၅၀၀)ကျပ်၊ (၅၀)ကျပ် သားလျှင် (၁၃၀၀)ကျပ် နှင့် (၂၅)ကျပ်သားလျှင်(၈၀၀)ကျပ် ဈေးနှုန်းတို့ဖြင့်ရောင်းချသောကြောင့် ယခင်အပတ်ထက်ခရမ်းသီးဈေးနှုန်းများ အနည်းငယ် ကျဆင်းပြီး အရောင်းအဝယ် ဖြစ်လျက်ရှိကြောင်း သိရသည်။

DOCA(စစ်ကိုင်း)  

         စတော်ဘယ်ရီပင်ကို သမပိုင်းဇုန်၌လည်းကောင်း၊ အပူပိုင်းဇုန်အတွင်းရှိ တောင်ကုန်းဒေသများ၌လည်းကောင်း၊ စိုစွတ်သောမြေမျိုးနှင့် ပင်လယ်ရေမျက်နှာပြင် အမြင့်ပေ ၃၀၀၀ မှ ၆၀၀၀ အတွင်းရှိ မြေမျိုး၌လည်းကောင်း ပေါက်ရောက်နိုင်ကြောင်း၊ မြန်မာနိုင်ငံတွင် စတော်ဘယ်ရီကို ရှမ်းပြည်နယ် (တောင်ပိုင်း)နှင့် မန္တလေးတိုင်းဒေသကြီး ပြင်ဦးလွင်မြို့တို့တွင် ကျယ်ကျယ်ပြန့်ပြန့် စိုက်ပျိုးကြကြောင်း၊ တောင်ပေါ်ဒေသ နေရာအများအပြားတွင် တစ်နိုင်တစ်ပိုင်မှ စီးပွားဖြစ်အထိ စိုက်ပျိုးလာကြကြောင်း သိရပါသည်။

            စတော်ဘယ်ရီပင်များကို အောက်တိုဘာလနှင့် နိုဝင်ဘာလများတွင် စတင်စိုက်ပျိုးကြပြီး ဒေသသီးခေါ် အလုံးသေးအသီးများသာမက ခပ်ပြားပြားသဏ္ဌာန်ရှိပြီး အရသာချဉ်သော ထိုင်ဝမ်သီးများနှင့် အလုံးကြီးပြီး ချိုသောဂျပန်သီးများကိုလည်း စိုက်ပျိုးကြကြောင်း၊ စိုက်ပျိုးထွက်ရှိလာသော စတော်ဘယ်ရီသီးများကို ဒီဇင်ဘာလမှစတင်ပြီး မေလအထိ ခူးဆွတ်ကြကြောင်း သိရသည်။ အထွက်နှုန်းအနေဖြင့် တစ်ဧကလျှင်ပျမ်းမျှပိဿာ ၃၀၀၀ မှ ၄၀၀၀ ခန့်အထိထွက်ရှိပြီး စတင်ခူးဆွတ်ချိန်မှ ရက်ပေါင်း ၆၀ ခန့် နေ့စဉ်ပုံမှန်ခူးဆွတ်နိုင်သော်လည်း ငါးရက်တစ်ကြိမ်ခူးဆွတ်ပါက ပိုမိုကောင်းမွန်ကြောင်း သိရသည်။

            ယခုအခါ စတင်ထွက်ပေါ်လျက်ရှိသည့် ပေါ်ဦးပေါ်ဖျား ဂျပန်သီးများကို တစ်ပိဿာခန့်ရှိသည့် တစ်ခြင်းလျှင် ကျပ် ၃၅၀၀၀ မှ ၄၀၀၀၀ခန့် အထိရောင်းချပြီး ဒေသတွင်းရှိ စတော်ဘယ်ရီယိုလုပ်ငန်းများနှင့် မိရိုးဖလာ စတော်ဘယ်ရီဝိုင်စိမ်သော လုပ်ငန်းများသို့လည်း လက်လီ/ လက်ကား ဈေးနှုန်းများဖြင့် ရောင်းချကြောင်း သိရှိရပါသည်။

DOCA(ရှမ်း)

               စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ရာသီပေါ်သီးနှံများဖြစ်သော ခဝဲသီး၊ ရွှေဖရုံသီး၊ ကန့်လန့်ဖူး၊ မုံညှင်းရွက်၊ ခရမ်းကဆော့သီး၊ ရုံးပတေသီး၊  ခရမ်းသီးများ ရောင်းချလျက်ရှိရာ ယခုအခါ ပဲစောင်းလျားပင်၊ ရုံးပတေသီးပင်နှင့် ခရမ်းကြွပ်သီးပင်များကို နေအိမ်ခြံဝင်းများတွင်လည်းကောင်း၊ ယာကွက်ခြံစည်းရိုးများတွင်လည်းကောင်း စိုက်ပျိုး၍ရောင်းချ လျက်ရှိကြောင်းသိရသည်။ ပဲစောင်းလျားသီး၊ ရုံးပတေသီးနှင့် ခရမ်းကြွပ်သီးများကို သုပ်စား၊ ချက်စား၊ ငပိရည်နှင့်တွဲဖက်၍လည်း အမျိုးမျိုးပြုလုပ်၍ စားသုံးကြကြောင်း သိရသည်။

            ၂၀၂၆ ခုနှစ်၊ ဇန်နဝါရီလ ဒုတိယပတ်အတွင်း ကန့်ဘလူမြို့မဈေးတွင် ပဲစောင်းလျားသီး၊ ရုံးပတေသီးနှင့် ခရမ်းကြွပ်သီးများကို ကန့်ဘလူမြို့ပေါ်၊နတ်ပေးကျေးရွာနှင့် အခြားသောကျေးရွာ များမှဝယ်ယူ၍ ရောင်းချလျက်ရှိကြောင်း၊ ပဲစောင်းလျားသီး(၅)တောင့်ပါ (၁)စည်းလျှင် (၅၀၀)ကျပ်၊ (၃)စည်းလျှင် (၁၃၀၀)ကျပ်၊ ရုံးပတေသီး(၁)ပိဿာလျှင် (၄၈၀၀)ကျပ်၊(၅၀)ကျပ်သားလျှင် (၂၄၀၀) ကျပ်၊(၂၅)ကျပ်သားလျှင်(၁၂၀၀)ကျပ်၊ ခရမ်းကြွပ်သီး(၁)ပိဿာလျှင် (၃၈၀၀)ကျပ်၊ (၅၀)ကျပ်သား လျှင်(၂၀၀၀)ကျပ်၊ (၂၅)ကျပ်သားလျှင် (၁၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း ကုန်စိမ်းရောင်းချသူထံမှ သတင်းရရှိပါသည်။

DOCA(စစ်ကိုင်း)

         မြန်မာနိုင်ငံရှိ လူငယ်များကြား ရေပန်းစားနေသည့် အီတလီနိုင်ငံရဲ့ အချိုပွဲတစ်မျိုးမှာ Tiramisu (တီရာမိဆု) ဖြစ်ပါသည်။ အီတလီဘာသာနဲ့ Tiramisu အဓိပ္ပာယ်ကတော့ "ငါ့ကို လန်းဆန်းသွားအောင် လုပ်ပေးပါ" (Pick me up)ဟု ဆိုပါသည်။ မူလအရသာသည် ခရင်မ်ပေါ်တွင် ကိုကိုးမှုန့်ဖြူးထားသည့် နူးညံ့အိစက် ခါးသက်ချိုဆိမ့်သော အရသာမျိုး ဖြစ်ပါသည်။

          Tiramisu မှာပါဝင်သည့် ပစ္စည်းတွေကတော့ ကိတ်မုန့်ခြောက်၊ ဘီစကစ်မု့န်များ အရမ်းနူးညံ့ပြီး အဆီအနှစ်ပြည့်ဝတဲ့ အီတလီချိစ် တစ်မျိုး၊ ကိတ်မု့န်ခြောက်နှင့် ဘီစကစ်များ နှစ်ရန်အတွက် ပြင်းရှရှကော်ဖီခါးနှင့် ကိတ်ရဲ့အပေါ်ဆုံးမှာ ဖြူးပေးရန်အတွက် ကိုကိုးမှုန့်တို့ ဖြစ်ပါသည်။

           ကော်ဖီရဲ့ ခါးသက်သက်အရသာ၊ နူးညံ့အိစက်လှတဲ့ ချိစ်ရဲ့ အဆိမ့်အရသာနှင့် အချိုအရသာ ၃ခုကို ပေါင်းစပ်ထားတာကြောင့် ချိုအီသွားတာမျိုး မဟုတ်ဘဲ အရမ်းကိုစားကောင်းလှပါသည်။ ယခုအခါ Tiramisu ကို မူလအရသာအပြင် တီထွင်ဆန်းသစ်ပြီး အရသာအမျိုးမျိုးဖြင့် ဈေးကွက် အတွင်း ထုတ်လုပ်ရောင်းချလျက်ရှိကြောင်း တွေ့ရှိရပါသည်။ တောင်ကြီးမြို့တွင် Tiramisu Cake ကို အသုံးပြုသည့် ပါဝင်ပစ္စည်းများအပေါ်မူတည်၍ တစ်တုံးလျှင် (၆၀၀၀/-) မှ (၁၅၀၀၀/-)ထိ ဈေးနှုန်းဖြင့် ရောင်းချလျက်ရှိပြီး အရောင်းသွက်လျက်ရှိပါကြောင်း သိရှိရပါသည်။

DOCA(ရှမ်း)

             အုန်းပင်သည် နှစ်ရှည်သီးပင်ဖြစ်ပြီး ဒေသမရွေးတွင် စိုက်ပျိုးရလွယ်ကူသော အပင်တစ်မျိုး ဖြစ်ပါသည်။ ကန့်ဘလူခရိုင်အတွင်း၌ ယခင်ကပင် မိမိတို့၏ နေအိမ်ခြံစည်းရိုးများတွင် အမှတ်အသားတစ်ခုအနေဖြင့်လည်းကောင်း၊ အုန်းသီး၊ အုန်းလက်တို့ကိုအသုံးပြုရန်အတွက်လည်းကောင်း ရည်ရွယ်စိုက်ပျိုးကြပါသည်။အုန်းသီးသည် မြန်မာလူမျိုးတို့၏ဘာသာရေးဆိုင်ရာပွဲများ၊အလှူပွဲမင်္ဂလာဆောင်နှင့်နတ်ပွဲများတွင်မပါမဖြစ် အသုံးပြုရသည့် အသီးတစ်မျိုးဖြစ်သည်။

           ၂၀၂၆ခုနှစ်၊ဇန်နဝါရီလ ဒုတိယပတ်အတွင်း အုန်းသီးများကို ကန့်ဘလူမြို့မဈေးတွင်အုန်းသီးအစိမ်းနှင့် အုန်းသီးအခြောက်ဟူ၍(၂)မျိုးရောင်းချလျက်ရှိကြောင်း၊ အုန်းသီးများသည် ကန့်ဘလူ မြို့နယ်အနှံ့အပြားမှ ဝင်ရောက်မှုရှိပြီး ဈေးနှုန်းများမှာ အုန်းသီးစိမ်း(၁)လုံးလျှင် (၂၀၀၀မှ၃၀၀၀) ကျပ်အထိရှိပြီး အုန်းသီးအခြောက်(၁)လုံးလျှင် (၂၅၀၀မှ ၃၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ဈေးအတွင်းရှိဈေးသည်တစ်ဦး၏ပြောပြချက်အရ အုန်းသီးအခြောက်များကို ကန့်ဘလူ မြို့ပေါ်ရှိ ရိုးရာမြန်မာမုန့်လုပ်သူများ၊ အုန်းနို့ခေါက်ဆွဲဆိုင်များမှ ဝယ်ယူကြကြောင်း၊ အုန်းသီးအစိမ်းများကို သာသနာပွဲထိုးသူများမှဝယ်ယူကြကြောင်း၊အုန်းသီးအသုံးပြုမှုများပြားကာဝင်ရောက်သမျှအရောင်းသွက်လျက်ရှိကြောင်းသတင်းရရှိပါသည်။

DOCA(စစ်ကိုင်း)