ပြည်တွင်းကုန်သွယ်မှုသတင်း

              စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ပဲမျိုးစုံနှင့်ဆီထွက်သီးနှံတို့ကို အဓိကစိုက်ပျိုးကြပြီး ရာသီစာသီးနှံများနှင့် စားဖို ဆောင်သီးနှံများကိုလည်း စိုက်ပျိုးကြသည်။

              ယခုအခါ ကန့်ဘလူမြို့နယ်အတွင်းရှိကျေးရွာများနှင့် မြို့ပေါ်ရပ်ကွက်များတွင် နွေပဲသီးကို တစ်နိုင်တစ်ပိုင်စိုက်ပျိုးကြကြောင်း၊ နွေပဲသီးပင်သည် အသီးရော အရွက်ပါ စားသုံးနိုင်သောအပင် ဖြစ်ကြောင်း၊  နွေပဲသီးသည် ဆောင်းရာသီးနှင့် နွေရာသီတွင် လှိုင်လှိုင်ထွက်ရှိကြောင်း၊ နွေပဲသီးတွင် (၂)မျိုးရှိပြီး အဖြူရောင်နွေပဲသီးနှင့် အစိမ်းရောင်နွေပဲသီးတို့ဖြစ်ကြောင်း၊ ၂၀၂၆ခုနှစ်၊ ဇန်နဝါရီလ ဒုတိယပတ်အတွင်း ကန့်ဘလူမြို့မဈေးတွင်ရောင်းချလျက်ရှိသည့် နွေပဲသီး(၂၅)ကျပ်သားလျှင် (၄၀၀)ကျပ်၊ (၅၀)ကျပ်သားလျှင် (၈၀၀)ကျပ်၊ (၁)ပိဿာလျှင် (၁၅၀၀)ကျပ်ဖြင့်ရောင်းချကြောင်း၊ မြို့မဈေးရှိ ကုန်စိမ်း ရောင်းချသူတစ်ဦးထံမှ သိရှိရပါသည်။

DOCA(စစ်ကိုင်း)

      ရှမ်းပြည်နယ်တွင် ဒေသတွင်းဆန်ထွက်ရှိမှုမှာ (၉၂၅၃၄၁)တန် ဖြစ်ပြီး သုံးစွဲမှုမှာ (၉၀၁၁၈၉)တန်၊ ပိုလျှံမှုမှာ (၂၄၁၅၁)တန် ဖြစ်ပါသည်။ ရှမ်းပြည်နယ်တွင် ဆန်ဖူလုံမှုရှိပြီး ဆန်လိုအပ်မှုမရှိသော်လည်း ပြည်နယ်အတွင်း၌ တာဝန်ထမ်းဆောင်လျက်ရှိသော နိုင်ငံ့ဝန်ထမ်းများ၊ တပ်ရင်းတပ်ဖွဲ့များနှင့် ရွှေ့ပြောင်းလုပ်သားပြည်သူများအနေဖြင့်  ဒေသမှထွက်ရှိသော ဆန်ကို စားသုံးမှုနည်းပါးပြီး အခြားတိုင်းဒေသကြီးများမှ ဆန်များကို ဝယ်ယူတင်သွင်း ဖြန့်ဖြူးရောင်းချပေးလျက်ရှိပါသည်။

        အခြား တိုင်းဒေသကြီးများမှ ရှမ်းပြည်နယ်အတွင်းသို့ ဆန်များစီးဝင်မှုအခြေအနေများအား ကလောမြို့နယ်၊ နမ့်ပန်တက်စစ်ဆေးရေးဂိတ်တွင် စာရင်းကောက်ယူပြုစုလျက်ရှိပါသည်။ ရှမ်းပြည်နယ် အတွင်းသို့ အများဆုံးစီးဝင်လျက်ရှိသော ဆန်အမျိုးအစားများမှာ ဧည့်မထ၊ ငစိန်၊ ပေါ်ဆန်းနှင့် ရွှေဘိုပေါ်ဆန်း ဆန်များဖြစ်ပါသည်။

       ၂၀၂၆ ခုနှစ်၊ ဇန်နဝါရီလ (ဒုတိယပတ်)အတွင်း ဆန်များ စီးဝင်မှု အခြေအနေမှာ ပဲခူးတိုင်းဒေသကြီး မှ (၃၇) တန်၊ မန္တလေးတိုင်းဒေသကြီး မှ (၆၆)တန်၊ စစ်ကိုင်းတိုင်းဒေသကြီး မှ (၁၁) တန်၊ စုစုပေါင်း(၁၁၄) တန် ဖြစ်ပါသည်။ ရှမ်းပြည်နယ် (တောင်ပိုင်း) သို့ စီးဝင်လာသော ဆန်များအား ရှမ်းပြည်နယ် (အရှေ့ပိုင်း)နှင့် ရှမ်းပြည်နယ် (မြောက်ပိုင်း)ရှိ ဒေသများသို့ ဆက်လက်သယ်ယူပို့ဆောင် ဖြန့်ဖြူးရောင်းချလျက်ရှိကြောင်း သိရှိရပါသည်။

DOCA(ရှမ်း)

                   စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် သောက်ရေသန့် ထုတ်လုပ်သည့် စက်ရုံများရှိပြီး သောက်ရေသန့်အမျိုးမျိုးသည် လူကြီး/လူငယ်အများစု နေ့စဉ် သောက်သုံးနေသော ကုန်စည်ဖြစ်သောကြောင့် သောက်ရေသန့်များ ထုတ်လုပ်ရာတွင် သန့်ရှင်းသောထုတ်လုပ်မှုနှင့်အညီ ထုတ်လုပ်ရောင်းချနိုင်ရေးကို သက်ဆိုင်ရာ အစိုးရဌာနအဖွဲ့အစည်းများက စစ်ဆေးကြပ်မတ်ဆောင်ရွက်လျက်ရှိပါသည်။

              ၂၀၂၆ခုနှစ်၊ ဇန်နဝါရီလ ဒုတိယပတ်အတွင်း ကန့်ဘလူမြို့နယ်တွင် ထုတ်လုပ်ဖြန့်ဖြူး ရောင်းချလျက်ရှိသော သောက်ရေသန့်များမှာ ကောင်းသာ KBU သောက်ရေသန့်၊ ယောနသန်သောက်ရေသန့် ၊ မြတ်နန်းဦး သောက်ရေသန့် ထုတ်လုပ်သော လုပ်ငန်းများရှိပြီး ၂၀ လီတာဝင် ရေဘူးကြီးများကို((၁)ဘူးလျှင် (၁၀၀၀)ကျပ်၊ အိမ်အရောက်ပို့စနစ်ဖြင့် ရောင်းချလျက်ရှိပြီး  ဒေသတွင်းထုတ်လုပ်သော သောက်ရေသန့်ဘူး(၁)လီတာဘူး(၁)ဘူးလျှင် (၆၀၀)ကျပ်၊ ရန်ကုန်မှ ဝင်ရောက်လျက်ရှိသော ကုန်အမှတ်တံဆိပ်ပါ သောက်ရေသန့်ဘူး(၁)လီတာဘူး(၁)ဘူးလျှင် (၁၀၀၀  ကျပ်မှ ၁၂၀၀)ကျပ်)အထိ ရောင်းချလျက်ရှိကြောင်း သိရှိရပါသည်။

DOCA(စစ်ကိုင်း)

                  မြန်မာလူမျိုးတို့သည် မြန်မာ့ရိုးရာအစားအစာများကို အများဆုံးနှစ်သက်ကြသည်။ မြန်မာ့ရိုး ရာမုန့်ကြွေစေ့ကို နံနက်ခင်းတစ်ကြိမ်၊ နေ့လည်အဆာပြေစားလေ့ရှိရာရေနွေးကြမ်း၊လက်ဖက်ရည်၊ကော်ဖီတို့နှင့်တွဲဖက်၍ စားသုံးကြပါသည်။ ဆန်ကို အခြေခံပြီးပြုလုပ်သည့်အတွက် ကျန်းမာ ရေးနှင့် ညီညွတ်ပြီးဘေးဥပါဒ်အန္တရာယ်ကင်းရှင်း၍ လူတိုင်းကြိုက်နှစ်သက်သော အစားအစာတစ် မျိုးဖြစ်သည်။ မုန့်ကြွေစေ့တွင် ဆန်မှုန့်၊ ဆီ၊ ဆားတို့ပါဝင်ပြီး စားတော်ပဲပြုတ်နှင့် နှမ်းထောင်း တို့ဖြင့် တွဲဖက်၍လည်း စားသုံးကြသည်။ ကန့်ဘလူမြို့၊ ၂၀၂၆ခုနှစ်၊ ဇန်နဝါရီလ ဒုတိယပတ် အတွင်း ရောင်းချလျက်ရှိသော မုန့်ကြွေစေ့ဈေးနှုန်းမှာ(၁)ပန်းကန်လျှင် (၃၀၀)ကျပ်၊ (၂)ပန်းကန် လျှင်(၅၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ မုန့်ကြွေစေ့သည် အာဟာရဖြစ်သောမုန့် တစ်မျိုးဖြစ်သဖြင့် ကလေး၊လူကြီးမရွေး ကြိုက်နှစ်သက်သောကြောင့်  အရောင်းအဝယ်သွက်လျက် ရှိကြောင်း သတင်းရရှိပါသည်။                 

DOCA(စစ်ကိုင်း)                

         ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ် သစ်နဖားကျေးရွာမှဒေသ အစားအစာဖြစ်သည့် သဘာဝစစ်စစ် ကုလားပဲခြမ်းလှော်အား ဆီအသုံးမပြုပဲ မြေအိုးခင်းဖြင့် လှော်၍ပြုလုပ်သဖြင့် ကျန်းမာရေးနှင့် ညီညွှတ်၍၊ လူကြိုက်များပြီး တစ်ပိုင်တစ်နိုင်မှသည် ပိုမိုတွင်ကျယ်စွာ လုပ်ကိုင်နေကြောင်း သိရသည်။ ကုလားပဲကိုသာ အဓိကထား အသုံးပြုလုပ်ကိုင်ပြီး ယခင်နှစ် ကကျေးရွာအတွင်းနှင့် အခြားအလှူဒါန၊ မင်္ဂလာပွဲ၊ ဒါနပွဲများမှ အော်ဒါမှာယူမှုကိုသာ လုပ်ကိုင်ခဲ့ပြီး ယခုအခါ အမှတ်တံဆိပ်ဖြင့် မြို့နယ်နှင့် အခြားမြို့နယ်များသို့ ဖြန့်ဖြူး ရောင်းချလျက်ရှိသည်။ ကုလားပဲလှော်ရန် နေအပူချိန် (၂)ရက်ခန့်လှမ်းပြီး မြေအိုးခင်းများတွင် (မီးလင်းဖို)မြေတွင်း မီးဖိုဖြင့် လှော်၍ ပဲဖြန့်ဗန်းပေါ်တွင် လှိမ့်တုံးဖြင့် ပွတ်ပြီး အခွံချွတ်၊ ဇကာချ၊ ပြာခြင်းများ ပြုလုပ်ရသည်။ ကြေသောပဲခြမ်းလှော်စများအား ဘယာကြော်မှုန့်အဖြစ်၎င်း၊ အသေးဆုံးပဲလှော်မှုန့်များအား ၆ ပါတ်လည် အိမ်သုံးမော်တာဖြင့် ပြန်လည်ကြိတ်ခွဲ၍ ပဲမှုန့်ပြုုလုပ်ရောင်းချကြောင်း ကုန်ကြမ်းဖြစ်သော ကုလားပဲ(929)  ၂၀ပိဿာပါ (၁)တင်းလျှင် လက်ရှိဈေး (၈၅၀၀၀)ကျပ်ဖြစ်ပြီး ပဲလှော်ရန်မြေအိုး တစ်လုံး (၅၀၀၀)ကျပ်ဖြင့် တစ်ဖိုစာ အလုံး (၅၀)အားအသုံးပြုကြောင်း ဝလုပ်သား (၃)ဦးဖြင့် တစ်လ ကုလားပဲ (၁၀) တင်းမှ (၁၅)တင်းခန့်လှော်၍ ပုံမှန်ဈေးကွက်ဖြစ်သည့်   ဇီးကုန်းမြို့နှင့် ကြို့ပင်ကောက်မြို့များသို့ ဖြန့်ဖြူးရောင်းချ၍ အလှူပွဲ၊ ဒါနပွဲ၊ မင်္ဂလာပွဲ အချိန်များတွင် ပိုမိုအရောင်းအားကောင်းကြောင်း ယခု ၂၀၂၆ခု  ဇန်နဝါရီလ တွင်ကုလားပဲလှော် လက်ကားဈေးနှုန်းများမှာ (၁၀)ကျပ်သား တစ်ထုပ် (၁၅၀၀)ကျပ်၊ တစ်ပိဿာ (၁၄၀၀၀)ကျပ်၊ ဘေးထွက်ပစ္စည်းဖြစ်သည့် ဘယာကြော်မှုန့် (၁၀)ကျပ်သား တစ်ထုပ် (၁၄၀၀)ကျပ်၊ ပဲမှုန့် (၁၀) ကျပ်သား တစ်ထုပ် (၁၃၀၀)ကျပ်ဖြင့် ရောင်းချလျက်ရှိကြောင်း၊ ကုလားပဲစိမ်း (၂၀)ပိဿာ တစ်တင်း လှော်ပါက ပဲခြမ်းလှော်အသန့် (၁၆)ပိဿာ၊ အကြေအမှုံ  (၃)ပိဿာ၊ အခြောက်အခွံအလျော့ (၁)ပိဿာ ထွက်ရှိကြောင်း  အထွေထွေကုန်ကျစရိတ်နှုတ်ပြီး ပဲတစ်တင်း (၁၄၀၀၀) ကျပ်ခန့် အမြတ်ရရှိပါ၍ စားသုံးသူများ ဘေးကင်းစေမည့် ထုတ်ကုန်များ ထုတ်လုပ်ရောင်းချနေသည့် ဒေသထွက် အစားအစာဖြစ်ကြောင်း လုပ်ငန်းရှင်ထံမှ သိရှိရပါသည်။

DOCA( ပဲခူး)