ပြည်တွင်းကုန်သွယ်မှုသတင်း

           ဒန့်ဒလွန်ပင်သည် မြန်မာနိုင်ငံနေရာအနှံအပြားတွင် ပေါက်ရောက်ကြောင်း၊ ဒန့်ဒလွန်ပင် ၏အရွက်ကို လွန်ခဲ့သောနှစ်ပေါင်းများစွာကပင်တိုင်းရင်းဆေးများတွင်အသုံးပြုကြကြောင်း၊ ဒန့်ဒ လွန်ပင်၏ပင်စည်သည် အဖြူရောင်ဖြစ်ပြီး ကျွတ်ဆက်သည့်အကိုင်းအလက်များနှင့် ဘဲဥပုံ အစိမ်း ရောင်အရွက်များပါရှိပါသည်။ ဒန့်ဒလွန်ရွက်တွင် ပရိုတင်း၊ ကယ်လ်ဆီယမ်၊ ဗီတာမင်စီ၊ ပိုတက် ဆီယမ်စသည့် အာဟာရဓာတ်များစွာပါဝင်ကြောင်း၊ ဒန့်ဒလွန်တွင် မှိုပိုးကိုသေစေနိုင်သည့် အာနိသင်ရှိ၍ ရောဂါပိုးများကိုတိုက်ဖျတ်ပေးနိုင်သည့် အစွမ်းရှိသည့်အပြင် ရောင်ရမ်းမှုကိုလျော့ ပါးစေနိုင်သည့် အစွမ်းလည်းရှိကြောင်း၊  ဒန့်ဒလွန်ရွက်တွင်ခန္ဓာကိုယ်ဖွဲ့စည်းမှုနှင့် ပရိုတင်း ဖြစ်ပေါ်မှု အတွက်အသုံးဝင်သည့်  အမိုင်နိုအက်ဆစ်များပါဝင်ပြီး ခန္ဓာကိုယ်၏ ကျန်းမာရေးကို အထောက်အကူပြုကြောင်း၊ ဒန့်ဒလွန်ရွက်သည် အနာဖြစ်ခြင်း၊ အပူလောင်ခြင်း၊ ပြတ်ရှ ဒဏ်ရာများနှင့် အသေးစားဒဏ်ရာများကိုလည်း သက်သာစေနိုင်ပြီး အနာကျက်လည်း မြန်စေကြောင်း၊ နို့တိုက်မိခင်များအတွက်လည်း ဒန့်ဒလွန်ရွက်ကိုစားသုံး ပေးခြင်းဖြင့် နို့ထွက်အား ကောင်းပြီး သံဓာတ်ကြွယ်ဝကြောင်း၊  အဆီများကိုလောင်ကျွမ်းစေနိုင်ပြီး ခန္ဓာကိုယ်ကို ကျစ်လျစ်ပြီး နှလုံးနှင့်ပါတ်သက်သော ရောဂါများကို လျော့ချပေးကြောင်း၊  ဒန့်ဒလွန်ရွက်သည် ဆီးချိုရောဂါကို ထိန်းချုပ်ပေး၍ သွေးတွင်းသကြား ဓာတ်ကိုလည်းလျော့ချပေးကြောင်း၊ ဗီတာမင်C တို့ပါဝင် သောကြောင့် အသားအရည်ကို ကြည်လင်ပြီး သွေးသားသန့်စင်၍ ဦးရေပြားသွေး လည်ပတ်မှု ကိုကောင်းမွန်ပြီး ဆံပင်များကိုနက် မှောင်သန်စွမ်းကြောင်း၊ ဒန့်ဒလွန်ရွက်ကို စားသုံး ပေးခြင်းဖြင့် ခေါင်းကိုက်ခြင်း၊ ကိုယ်လက်မအီမသာ ဖြစ်ခြင်းနှင့် အခြားအာရုံ ကြောဆိုင်ရာ ဝေဒနာများကို သက်သာစေနိုင်ကြောင်း၊ ဒန့်ဒလွန်ရွက်သည် အစာကြေလွယ်ပြီး အစာချေဖျတ်မှု ကိုကောင်း မွန်ကြောင်း၊ သံဓာတ်ပြည့်ဝသောကြောင့် ကိုယ်ခံအားကောင်းစေပြီး အသည်းနှင့် အရိုးကျန်းမာ သန်စွမ်းကြောင်း၊ ဆီးကျောက်တည်ခြင်းမှ ကာကွယ်၍၊ ကျောက်ကပ် ရောဂါမဖြစ် အောင် တားဆီးပေးကြောင်း သွေးတိုးဝေဒနာရှင်များအနေဖြင့် ဒန့်သလွန်ရွက်နှင့်ဒန့်သလွန် သီးများ ကို ပုံမှန်စားသုံးခြင်းဖြင့် သွေးတိုးရောဂါကို သက်သာစေနိုင်ကြောင်း စာပေများမှ ဖတ်ရှု့သိရှိရသည်။ မြင်းခြံမြို့ အေးမြသီတာဈေးတွင် ၂၀၂၅ ခုနှစ်၊စက်တင်ဘာလ နောက်ဆုံး ပတ်တွင် ရောင်းချနေသော ဒန့်သလွန်ရွက်တစ်စီးလျှင် (၃၀၀) ကျပ်၊ ဒန့်သလွန်အသီး ၃ တောင့်ပါတစ်စီး လျှင် (၄၀၀) ကျပ်ပေါက်ဈေးများဖြင့် ရောင်းချကြောင်း သိရှိရသည်။

DOCA (မန္တလေး)       

      မြန်မာနိုင်ငံ စက်သုံးဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ တိုင်းဒေသကြီး/ ပြည်နယ်အလိုက် စက်သုံးဆီရည်ညွှန်းဈေးနှုန်းများအားနေ့စဉ်ထုတ်ပြန်ပေးလျက်ရှိပါ သည်။ မကွေးမြို့နယ်တွင် စက်သုံးဆီဆိုင်များအားလုံး ပုံမှန်ဖွင့်လှစ်ရောင်းချပေးနေပြီး လိုအပ်သလောက်ရောင်းချပေးနေကြောင်း သိရှိရပါသည်။

     ၂၀၂၅-ခုနှစ်၊ စက်တင်ဘာလ တတိယအပတ်အတွင်း ဖြစ်ပေါ်ခဲ့သောစက်သုံးဆီဈေးနှုန်းများမှာ          92(၁)လီတာလျှင်ကျပ်(၃၀၁၅)၊ 95(၁)လီတာလျှင် ကျပ်(၃၀၉၀)၊ ဒီဇယ်(ရိုးရိုး) (၁)လီတာလျှင်  ကျပ် (၂၆၉၅)၊ ဒီဇယ်(ပရီမီယံ) (၁)လီတာလျှင်ကျပ်(၃၂၉၀) ဖြစ်ပြီး စတုတ္ထအပတ်အတွင်း ဖြစ်ပေါ်နေသော ဈေးနှုန်းများမှာ 92(၁)လီတာလျှင်  ကျပ်(၃၀၄၀) ၊ 95(၁)လီတာလျှင် ကျပ် (၃၁၀၀)၊ ဒီဇယ် (ရိုးရိုး)(၁)   လီတာလျှင် ကျပ်(၂၇၀၀)၊ ဒီဇယ် (ပရီမီယံ) (၁) လီတာလျှင် ကျပ် (၃၂၉၅) တို့ဖြစ်၍ ယခင်အပတ်နှင့် ယခုအပတ် ဈေးနှုန်းနှိုင်းယှဉ်ပါက 92(၁) လီတာလျှင် ကျပ် (၂၅)၊ 95(၁) လီတာလျှင် ကျပ်(၁၀)၊ ဒီဇယ် (ရိုးရိုး) (၁) လီတာလျှင် ကျပ်(၅)၊ ဒီဇယ်(ပရီမီယံ) (၁)လီတာ လျှင် ကျပ်(၅) တို့ဈေးနှုန်း အနည်းငယ်မြင့် တက်လာကြောင်း လေ့လာသိရှိရပါသည်။

DOCA(မကွေး)

       မကွေးတိုင်းဒေသကြီး၊ မကွေးမြို့နယ် ယင်းချောင်းတလျောက်ရှိ ကျေးရွာများနှင့် စလင်း (ဆင်ဖြူကျွန်း) မြို့ နွယ်တမယ်ချောင်း တလျောက်ရှိ ကျေးရွာများတွင် အာလူးကို စိုက်ပျိုးကြကြောင်း သိရသည်။

     ၂၀၂၅ ခုနှစ်၊ စက်တင်ဘာလ(ပထမပတ်)တွင် မကွေးမြို့ပေါ်ရှိဈေးများ၌ ရောင်းချနေသော အာလူးဈေးနှုန်းမှာ (၁)ပိဿာလျှင် ကျပ်(၅၀၀၀)ဖြစ်ခဲ့ပြီး၊ စက်တင်ဘာလ(စတုတ္ထပတ်)တွင် (၁)ပိဿာလျှင် ကျပ်(၆၀၀၀)ဖြစ်၍ စက်တင်ဘာလ (ပထမပတ်)နှင့်(စတုတ္ထပတ်) နှိုင်းယှဉ်ပါက ကျပ်(၁၀၀၀) ဈေးနှုန်းမြင့်တက်လာကြောင်း၊ တိုင်းဒေသကြီးအတွင်း ထွက်ရှိသော အာလူးများ ရာသီ ကုန်သွားပြီး ရှမ်းပြည်နယ်ဘက်တွင်လည်း အာလူးစိုက်ပျိုးချိန်ဖြစ်၍ ဝင်ရောက်မှုနည်းသောကြောင့် ဈေးနှုန်းမြင့် တက်ရခြင်းဖြစ်ကြောင်း သိရှိရပါသည်။

DOCA(မကွေး)

            ၂၀၂၅ ခုနှစ်၊ စက်တင်ဘာလ တတိယပတ်အတွင်း ပုသိမ်မြို့ရှိ ဈေးကြီးများနှင့် သားငါးကုန်သည်များထံမှ ရရှိသောအချက်အလက်များအရ ဆိတ်သား၏ ဈေးနှုန်းမှာ တစ်ပိဿာလျှင် ကျပ် ၃၅,၀၀၀ မှ ၄၀,၀၀၀ အတွင်း ရှိနေကြောင်း သိရပါသည်။

            ဆိတ်သားဈေးနှုန်းအား လွန်ခဲ့သော ရက်သတ္တပတ်အနည်းငယ်ကထက် ယခုအခါတွင် အနည်းငယ် မြင့်တက်လာသည်ကို တွေ့ရပါသည်။ ဤမြင့်တက်မှုသည် မိုးရာသီကာလအတွင်း ဆိတ်အရေအတွက် ရောင်းချမှုနည်းပါးလာခြင်း၊ သယ်ယူပို့ဆောင်ရေး ကုန်ကျစရိတ်များ မြင့်တက်လာခြင်း စသည့်အကြောင်းရင်းများကြောင့် ဖြစ်နိုင်ကြောင်း ကုန်သည်များက ဆိုပါသည်။

            ပုသိမ်မြို့အနေဖြင့် ဆိတ်သားဈေးကွက်တွင် ဒေသခံမှ မွေးမြူထားသော ဆိတ်များနှင့် အနီးအနားရှိ ကျေးရွာများမှ တင်ပို့လာသော ဆိတ်များ ရောနှောရောင်းချနေခြင်း ဖြစ်ပါသည်။ ဆိတ်သားအား နေ့စဉ်စားသုံးမှုထက် အထူးပွဲလမ်းသဘင်များ၊ ဧည့်ခံပွဲများနှင့် ကျန်းမာရေးအကြောင်းပြချက်များဖြင့် ဝယ်ယူစားသုံးမှုများပြားကြောင်း သိရပါသည်။ ဆိတ်သားသည် ပရိုတိန်းဓာတ်ကြွယ်ဝပြီး ကျန်းမာရေးနှင့် ညီညွတ်သည်ဟု ယူဆထားသည့် အလေ့အထများကြောင့် ဝယ်လိုအားရှိနေဆဲဖြစ်ပါကြောင်း သိရှိရပါသည်။

DOCA (ဧရာဝတီ)

         မြင်းခြံမြို့နယ်သည် ပြောင်းပြာဆည်ရှိပြီး မိုးကောင်းသောက်ယာမြေများတွင်ဆေးရွက်ကြီး၊ ပဲမျိုးစုံ၊ ကြက်သွန်နီ‌နှင့် ဆီထွက်သီးနှံများ စိုက်ပျိုးထားလျက်ရှိရာ ပဲလွမ်းသီးနှံကို လည်းစိုက်ပျိုး ထားကြောင်း၊ ပဲလွမ်းသီးနှံအား အရောင်ကိုလိုက်၍ ပဲလွမ်းဖြူ၊ ပဲလွမ်းနီ၊ ပဲစာဥဟုခေါ် ကြကြောင်း၊ ပဲလွမ်းသည် ရေငတ်ဒဏ်နှင့် မြင့်မားသောအပူချိန်ကိုခံနိုင်သည့် ပဲတစ်မျိုးဖြစ်ကြောင်း၊ စိုက်ပျိုး ချိန်မှာ ဇူလိုင်လမှစ၍ အောက်တိုဘာလအထိစိုက်ပျိုးကြပြီး၊ ရိတ်သိမ်းချိန်မှာ ဒီဇင်ဘာလ မှစ၍   ဇန်နဝါရီလအထိ ရိတ်သိမ်းထွက်ပေါ်မည်ဖြစ်ကြောင်း သိရှိရသည်။ ၂၀၂၅-၂၀၂၆ ခုနှစ်တွင် မြင်းခြံ မြို့နယ်၌ ပဲလွမ်းပဲကိုစီမံကိန်းသီးနှံအဖြစ် (၂၂၅၀) ဧကလျာထား ချက်အပေါ်(၄၂၁)ဧက စိုက်ပျိုးပြီး စီးကြောင်းနှင့် ဆက်လက်စိုက်ပျိုးရန်ကျန်ရှိသော ဧကများအား အောက်တိုဘာလအထိ လျာထား ချက်ပြည့်မှီအောင်  စိုက်ပျိုးသွားမည်ဖြစ်ကြောင်း မြို့နယ်ကြေးတိုင်နှင့် မြေစာရင်း ဦးစီး ဌာန၏ စာရင်းများအရ သိရှိရသည်။  ပဲလွမ်းသီးနှံစိုက်ပျိုးထားရှိမှုကို ထနောင်းတိုင်ရွာ၊ ပျော်ဘွယ် စံပြရွာ၊ တလုပ်မြို့ရွာ၊ ရွာသစ်ရွာ၊ ကွမ်းစိုက်ရွာနှင့် သင်ပြွန်းကျေးရွာ များတွင် အများဆုံး စိုက်ပျိုး ကြကြောင်း၊  တောင်သူများ အနေဖြင့် ပဲလွမ်းသီးနှံအားရေဆင်း-၁မျိုးနှင့် ရေဆင်း-(၂) မျိုးကိုစိုက် ပျိုး ထားရှိကြောင်း၊ ပဲလွမ်းသီးနှံ စိုက်ပျိုးထားရှိမှုကို တန်းကြားစနစ်ဖြင့် နှံစားပြောင်း၊ ဝါသီးနှံတို့ဖြင့် စိုက်ပျိုးထားရှိကြောင်း သိရှိရသည်။ ၂၀၂၅ခုနှစ်၊ စက်တင်ဘာလစတုတ္ထပတ်တွင် မြင်းခြံမြို့ နယ်ရှိပွဲရုံများ၌ ပဲလွမ်းတစ်တင်းလျှင် (၆၂၇၀၀) ကျပ်ခန့်ပေါက် ဈေးများဖြင့် အရောင်းအဝယ် ဖြစ်လျက်ရှိကြောင်း သိရှိရ သည်။

DOCA (မန္တလေး)