ပြည်တွင်းကုန်သွယ်မှုသတင်း

        ငါးရံ့ငါးဆိုလျှင် ငါးခြောက်ပြုလုပ်ပါက အရမ်းချိုပြီး စားကောင်းသည့်ငါးဖြစ်သည့်အပြင် မြစ်ချောင်း၊ အင်းအိုင်များပေါများသော ပဲခူးတိုင်းဒေသကြီးတွင် ငါးရံ့ခြောက်ကို ဒေသထွက်ကုန်တစ်ခုအနေဖြင့် ထုတ်လုပ်ရောင်းချလျှက်ရှိပါသည်။ ငါးရံ့မျိုးစိတ်ပေါင်းများစွာရှိသည့်အနက် မြန်မာနိုင်ငံတွင် ငါးရံ့ (၅) မျိုးရှိပြီး ရေချိုတွင်သာနေထိုင်ကြပြီး ရေချို၌သာ သားပေါက်လေ့ရှိပြီး ငါးရံ့အောက် အမျိုးအစားမှာ ကြီးထွားနှုန်းကောင်းမွန်သောကြောင့် ရွေးချယ်မွေးမြူသင့်သော ငါးမျိုးဖြစ်သည်။

          ငါးရံ့ကို ငါးရံ့အူဆီပြန်၊ ငါးရံ့ခေါင်းချဉ်ရည်ဟင်း၊ ငါးရံ့ဒန့်သလွန်ဟင်း၊ ငါးရံ့ပင်စိမ်း၊ ငါးရံ့ဆန်လှော်ဟင်းများသည်လည်း လူကြိုက်များသော ဟင်းလျာများဖြစ်ကြသည့်အပြင် ငါးရံ့ငါးမှာ ချိူလှသဖြင့် မုန့်ဟင်းခါးပြုလုပ်ရာ၌လည်း အသုံးပြုကြသောကြောင့် ဈေးကွက်တွင် လူကြိုက်များသော ငါးဖြစ်ပါသည်။ ငါးရံ့ငါးမွေးမြူရာတွင်  ရောဂါမရှိဘဲ အကြမ်းခံနိုင်ခြင်း၊ အစာချေးမများခြင်း၊ အသေအပျောက်နည်းခြင်း၊ ကျွေးသလောက်စား၊ စားသလောက်အရွယ်အစားကြီးထွားနိုင်ခြင်းအပြင် ငါးစိုရော ငါးခြောက်ပါ ဝယ်လိုအားကောင်းမွန်ခြင်းကြောင့် စီးပွားရေးတွင်လည်း အရေးပါသောငါးတစ်မျိုးဖြစ်ခြင်းကြောင့် တိုးချဲ့မွေးမြူသင့်သော ငါးတစ်မျိုးဖြစ်သည်။

          ငါးခြောက်ပြုလုပ်ရာတွင် ငါးရံ့အစိုတစ်ပိဿာကို ၂၀၀၀၀ ဈေးမှ ၂၅၀၀၀ ဈေးအထိ အကောင်၊ အကြီး၊ အသေးပေါ်မူတည်၍ ဝယ်ယူရပြီး အဆိုပါ ငါးအစိုကို ခွဲခြမ်းပြီး နေလှမ်းရာတွင် ငါးခြောက်အဖြစ် ၂၅ ကျပ်သားမှ ၃၀ ကျပ်သားအထိ ထွက်ရှိပါသည်။ ငါးရံ့ခြောက်ထုတ် လုပ်သူများအနေဖြင့် ငါးရံ့အစိုတစ်ပိဿာကို အခြောက်ပြုလုပ်ရာ၌ ခန့်မှန်းကုန်ကျငွေ ၈၀၀၀၀ ကျပ်ဖြစ်ပြီး ငါးရံ့ခြောက် တစ်ပိဿာ ၉၀၀၀၀ ကျပ်မှ ၁၀၅၀၀၀ ကျပ်ဈေးဖြင့် ရောင်းချရသည့်အတွက် ငါးရံ့ခြောက် တစ်ပိဿာအပေါ် ၁၅၀၀၀ ကျပ်ခန့် အမြတ်အစွန်းရရှိပြီးငါးရံအရေခွံကိုလည်းကြော်၍ ပြန်လည်ရောင်းချနိုင်ပါ၍ ထုတ်လုပ်သူများအနေဖြင့် တစ်ပိုင်တစ်နိုင်ထုတ်လုပ်ရောင်းချလျက်ရှိကြောင်း သိရှိရပါသည်။

DOCA(ပဲခူး)

         မြင်းခြံမြို့နယ်အတွင်းရှိ ဒါးကျွန်းကျေးရွာနှင့် ပတ္တာကျေးရွာများ၌ ပန်းမျိုးစုံစိုက်ပျိုးလျက်ရှိရာ အေးမြသောဆောင်းရာသီ၌ အောင်မြင်ဖြစ်ထွန်းပြီး  စီးပွားရေးအတွက် ဈေးကောင်းရရှိသော ဂန္ဓမာပန်းအဝါမျိုးများကို တစ်နိုင်တစ်ပိုင် စိုက်ပျိုးလျက်ရှိကြောင်း၊ တိုက်ရိုက်အစေ့ချ စနစ်ဖြင့်စိုက်ပျိုးပြီး မြေဘောင်တင်စနစ်ဖြင့်  (၆) လက်မအကွာတွင် ပင်ကြားတန်းကြား အကွာအဝေး စိုက်ပျိုးထားကြောင်း၊ မြေအောက်ရေတင်စနစ်တို့ဖြင့် စိုက်ပျိူးပြီး မြေအကျယ်အဝန်း ပေ (၈၀) ပတ်လည်တွင် အပင်အ‌ရေအတွက်(၈၅၀၀)ခန့် စိုက်ပျိုးလျက်ရှိကြောင်း သိရ သည်။  ဂန္ဓမာပန်းမျိုးကို စက်တင်ဘာလ၌ စတင်စိုက်ပျိုး၍ စိုက်ပျိုးပြီး ၄လအကြာ ဒီဇင်ဘာလတွင် ပန်းများစတင်ခူးဆွတ်၍ ဈေးကွက်၌ ရောင်းချကြောင်း၊ စိုက်ပျိုးပြီးပန်းပင်များကို  ၇ရက်ခြားတစ်ကြိမ် ပိုးသတ်ဆေးဖြန်းပေးရပြီး ဂန္ဓမာပန်း(အဝါမျိုး)အား စိုက်ပျိုးကုန်ကျစရိတ်အနေဖြင့် သွင်းအားစု၊ လုပ်သားခအပါအဝင်၊ မြေပြုပြင်ခြင်း၊ ရေတင်သွင်းခြင်း၊ စုစုပေါင်း ငွေကျပ်(၁၄) သိန်းဝန်းကျင်ခန့်ကုန်ကျကြောင်း၊ ဈေးနှုန်းဈေးကွက်အနေဖြင့်  ပန်း(၁)ခိုင်လျှင် ၇၀၀ ကျပ်ဖြင့် ရောင်းချရကြောင်း၊  ပန်းစပွင့်သည်မှ ၅ ရက်ခြား တစ်ကြိမ်ခူးဆွတ်နိုင်ကြောင်း ယခုနှစ်တွင် ပန်းများဈေးကောင်းရရှိသဖြင့် အကျိုးအမြတ် (၉)သိန်းကျပ်ခန့် ရရှိကြောင်း၊ ဒေသထွက် ဂန္ဓမာပန်းများကို မြင်းခြံမြို့ရှိ စံပြဈေး၊ မြို့မဈေးနှင့် အေးမြသီတာဈေးများသို့ရောင်းချကြောင်း၊ စိုက်ခင်းသို့လည်း တိုက်ရိုက်လာရောက်ဝယ်ယူကြကြောင်း၊ တောင်သာမြို့နှင့် နွားထိုးကြီးမြို့များသို့လည်း တင်ပို့ရောင်းချကြောင်း  ဒါးကျွန်းကျေးရွာမှ ပန်းစိုက်တောင်သူ၏ပြောပြချက်အရ သိရှိရပါသည်။

DOCA(မန္တလေး)

       မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသတစ်ခုဖြစ်သောကြောင့် စပါး၊ ပဲ၊ ပြောင်း၊ နှမ်းသီးနှံမျိုးစုံ အောင်မြင်ဖြစ်ထွန်းလျက်ရှိရာ ကျောက်ဆည်ခရိုင်အတွင်းရှိ ကျေးလက်နေတောင်သူများသည် မိသားစု အပိုဝင်‌ငွေရရှိရေးအတွက် ဆောင်းသီးနှံဖြစ်သော ပဲကြီးသီးနှံကို လယ်ကန်သင်းရိုးများတွင် တစ်ပိုင်တစ်နိုင်စိုက်ပျိုးလာရာမှ ယခုအခါတွင် တွက်ခြေကိုက်သီးနှံဖြစ်သောကြောင့် လယ်မြေ၊ ယာမြေများတွင် စီးပွားဖြစ်အများအပြား စိုက်ပျိုးလာကြပါသည် ။

        ၂၀၂၅-၂၀၂၆ ဘဏ္ဍာနှစ်တွင် ပဲကြီး စိုက်ပျိုးမှုအနေဖြင့် ကျောက်ဆည်မြို့နယ်တွင်(၂၄၂)ဧက ၊ မြစ်သားမြို့နယ်တွင် (၂၄၀)ဧက၊ စုစုပေါင်း(၄၈၂)ဧက စိုက်ပျိုးထားရှိပြီးကြောင်း သက်ဆိုင်ရာဌာန၏စာရင်းများအရ သိရှိရပါသည်။ ပဲကြီးသီးနှံကိုအောက်တိုဘာလတွင် စတင်စိုက်ပျိုးကြပြီး စိုက်ပျိုးရာတွင် ထွန်မွှေ၊ စိုက်ကြောင်းဆွဲပြီး ကျင်းဖောက်စနစ်ဖြင့် စိုက်ပျိုးကြကြောင်း၊ (၁)ဧက ကုန်ကျစရိတ်အနေဖြင့်မျိုး၊ သွင်းအားစု၊ ရိတ်သိမ်း၊ ချွေလှေ့၊ အလုပ်သမားခအပါအဝင် စုစုပေါင်း(၃၀၀,၀၀၀/-)ကျပ် ဝန်းကျင်ကုန်ကြကြောင်း၊ ယခင်နှစ် အထွက်နှုန်းအနေဖြင့် ပဲကြီးအခြောက် (၁၀-၁၂)တင်းခန့် ထွက်ရှိခဲ့ကြောင်း၊ ဈေးနှုန်းအနေဖြင့် ပဲကြီးအခြောက် တစ်တင်းလျှင် (၈၀,၀၀၀/-)ကျပ်၊ ပဲကြီးအစို (၁)ပြည်လျှင်(၂,၅၀၀-၃,၀၀၀)ကျပ် ဈေးနှုန်းများဖြင့်ရောင်းဝယ်ခဲ့ကြောင်း၊ ရိတ်သိမ်းပြီးပဲကြီးအခြောက်များကို ဒေသတွင်းရှိ ပွဲရုံများကိုသာ ရောင်းချကြပြီး ပဲကြီးလှော်၊ ပဲကြီးကြော်လုပ်ငန်းရှင်များမှလည်း ကျေးရွာအရောက် လာရောက်ဝယ်ယူကြကြောင်း၊ (၁)ဧက အကျိုးအမြတ်အနေဖြင့် (၅၀၀,၀၀၀/-)ကျပ်ဝန်းကျင် မြတ်ခဲ့ကြောင်း၊ ပဲကြီးသီးနှံမှာ စိုက်ပျိုးသည်မှ ရိတ်သိမ်းပြီးသည်အထိ (၃)လမှ(၆)လအတွင်းရှိပါသည်။ စိုက်ပျိုးပြီး (၃)လအကြာတွင် အဖူးအပွင့်များစတင်ဖူးပွင့်ပြီး ယခုအချိန်တွင် အစောစိုက် (ဆောင်း)ပဲကြီးအစိုများ စတင်ထွက်ပေါ်လျက်ရှိပြီး ပေါ်ဦးပေါ်စအချိန်တွင် ပဲကြီးအစို ဈေးနှုန်းမှာ လက်ကားဈေး (၁)ပြည်လျှင် (၁၀,၀၀၀)ကျပ်၊ လက်လီဈေး တစ်ဘူးလျှင်(၁,၅၀၀)ကျပ် ဈေးဖြင့်ရောင်းချလျက်ရှိကြောင်း၊ တောင်သူအများစုမှာ ပဲကြီးအစိုများကိုသာ ခူးဆွတ်၍ ရောင်းချကြကြောင်း၊ ပဲကြီးအခြောက် ဈေးနှုန်းအနေဖြင့် ယခုအချိန်တွင် တစ်တင်းလျှင် (၁၁၀,၀၀၀)ကျပ်စျေးနှုန်းဖြင့် အရောင်းအဝယ်ဖြစ်လျက်ရှိကြောင်းကို နေလသုခပွဲရုံ မှသိရှိရသည်။ ပဲကြီးသီးနှံ စိုက်ပျိုးခြင်းဖြင့် မိသားစုအပိုဝင်ငွေရရှိရုံသာမက ကျွဲစာ၊ နွားစာများအတွက်လည်း ဖူလုံလျက်ရှိသောကြောင့် ပိုမိုတိုးချဲ့ စိုက်ပျိုးသင့်ပါကြောင်းကို ဖျောက်ဆိပ်ပင်ကျေးရွာမှ ပဲကြီးစိုက်တောင်သူတစ်ဦးထံမှ သိရှိရပါသည်။

DOCA(မန္တလေး)

                    ရွှေဘိုခရိုင်အနေဖြင့် ၂၀၂၅-၂၀၂၆ ခုနှစ်တွင် ရွှေဘိုပေါ်ဆန်း မိုးစပါး (၃၁၃,၄၅၇)ဧကနှင့် အခြားမိုးစပါး(၃၃၀,၃၇၉)ဧက စုစုပေါင်း  (၆၄၃,၈၃၆)ဧက စိုက်ပျိုးပြီး ရာသီကုန် ရိတ်သိမ်းပြီးစီး၍ အထွက်နှုန်းအနေဖြင့် တစ်ဧကလျှင်  ၈၀တင်းနှုန်းထွက်ရှိသဖြင့် စုစုပေါင်း ၅၁,၅၀၆,၈၈၀ တင်း ထွက်ရှိကြောင်း သက်ဆိုင်ရာဌာနများ၏ စာရင်းများအရ သိရှိရသည်။

          ရွှေဘိုခရိုင်အတွင်း ၂၀၂၅-၂၀၂၆ မိုးစပါးများကို ၂၀၂၅ခုနှစ် ဒီဇင်ဘာလ (ဒုတိယပတ်)မှ စတင်ရိတ်သိမ်းပြီး ပေါ်ချိန် စပါး/ဆန် ဈေးနှုန်းများမှာ ရွှေဘိုပေါ်ဆန်း စပါးတင်း ၁၀၀လျှင် ၃,၇၀၀,၀၀၀ကျပ်၊ ရွှေဘိုပေါ်ဆန်းဆန်(၂၄)ပြည်ပါ တစ်အိတ်လျှင် (၁၅၀,၀၀၀)ကျပ်၊ ဧရာမင်းစပါး တင်း၁၀၀လျှင် ၂,၀၀၀,၀၀၀ကျပ်၊ ဧရာမင်းဆန် (၂၄)ပြည်ပါ တစ်အိတ်လျှင် (၁၀၀,၀၀၀)ကျပ် ရှိပြီး ယခု ဇန်နဝါရီလ  ဒုတိယပတ်တွင် ရွှေဘိုပေါ်ဆန်းစပါး တင်း၁၀၀လျှင် ၃,၉၀၀,၀၀၀ကျပ်၊ ရွှေဘိုပေါ်ဆန်းဆန်(၂၄)ပြည်ပါ တစ်အိတ်လျှင် (၁၄၀,၀၀၀)ကျပ်၊ ဧရာမင်းစပါး တင်း၁၀၀လျှင် ၂,၀၀၀,၀၀၀ကျပ်၊ ဧရာမင်းဆန် (၂၄)ပြည်ပါ တစ်အိတ်လျှင် (၁၀၀,၀၀၀)ကျပ်ဖြင့် အရောင်းအဝယ် ဖြစ်လျက်ရှိကြောင်း သတင်းရရှိသည်။

DOCA(စစ်ကိုင်း)

      ဧရာဝတီတိုင်းဒေသကြီး၊ ဟင်္သာတမြို့နယ်အတွင်းရှိ ကုလားပဲဆံနှင့် ကုလားပဲလုံး ဈေးကွက်များသည် ဩဂုတ်လ တတိယပတ်အတွင်း ဈေးနှုန်းများ တည်ငြိမ်လျက်ရှိကြောင်း သိရှိရပါသည်။ ဟင်္သာတခရိုင်သည် ဧရာဝတီတိုင်းဒေသကြီးအတွင်း ပဲမျိုးစုံစိုက်ပျိုးမှုအများဆုံး ခရိုင်တစ်ခုဖြစ်ပြီး ၂၀၂၄-၂၀၂၅ ခုနှစ်အတွင်း ကုလားပဲ (၂၅,၀၀၀) ဧကခန့် စိုက်ပျိုးထုတ်လုပ် လျက်ရှိကြောင်း သက်ဆိုင်ရာဌာနများ၏ စာရင်းများအရ သိရသည်။

          ဒေသထွက်ကုလားပဲများကို ပြည်တွင်းဈေးကွက်သို့ တင်ပို့ရောင်းချသည့်အပြင် ပဲခွဲစက် များဖြင့်ခွဲ၍ ကုလားပဲဆံများ ထုတ်လုပ်ရောင်းချမှုများလည်း ရှိကြောင်း သိရသည်။ စက်တင် ဘာလ တတိယပတ်အတွင်း ဟင်္သာတမြို့နယ်ဈေးကွက်ရှိ ကုလားပဲဈေးနှုန်းများ(ခန့်မှန်း) ကုလားပဲဆံ (၁)ပြည် - ကျပ် ၁၀,၀၀၀ ၊ ကုလားပဲဆံ (၁)တင်း - ကျပ် ၁၆၀,၀၀၀ ၊ ကုလားပဲလုံး (၁)ပြည် - ကျပ် ၈,၀၀၀ ၊ ကုလားပဲလုံး (၁)တင်း - ကျပ် ၁၂၈,၀၀၀ ဖြစ်ပြီး ဈေးနှုန်းများမှာ ကုလားပဲ၏အရည်အသွေး၊ အဆင့်အတန်းနှင့် ရောင်းသည့်နေရာဒေသအလိုက် အနည်းငယ် ကွဲပြားမှုရှိနိုင်ကြောင်း သိရပါသည်။

          ဟင်္သာတမြို့နယ်အတွင်း ကုလားပဲဆံများကို တစ်ဆင့်ပြန်လည်ရောင်းချမည့်သူများ၊ ကိုယ်တိုင်ကြော်သည့် ကုလားပဲဆံကြော်ဖိုများ၊ အလှူမင်္ဂလာပွဲလမ်း ဆောင်ရွက်မည့်သူများမှ အဓိကဝယ်ယူကြပြီး ကုလားပဲလုံးများကို ဒေသတွင်းရှိစားသုံးသူများ၊ တစ်ဆင့်ပြန်လည် ရောင်းချမည့်သူများ၊ ကုလားပဲသုတ်ရောင်းချသူများမှ အဓိကဝယ်ယူကြောင်း သိရသည်။

          ယခုလက်ရှိတွင် ဈေးကွက်အတွင်း ကုလားပဲဆံနှင့် ကုလားပဲလုံးများ ဝင်ရောက်မှုနှုန်းမှာ ပုံမှန်ဖြစ်ပြီး ဝယ်လိုအားလည်း ပုံမှန်ရှိသောကြောင့် ဈေးနှုန်းများ တည်ငြိမ်လျက်ရှိကြောင်း သိရပါသည်။

DOCA(ဧရာဝတီ)