ပြည်တွင်းကုန်သွယ်မှုသတင်း

            ကနဖော့ပင်သည် မြန်မာနိုင်ငံနေရာအနှံအပြားတွင် အလေ့ကျပေါက်ရောက်သော အပင်တစ်မျိုး ဖြစ်ပြီး ကန်စွန်းရွက်လို ရေထဲမှာပေါက်‌ရောက်လေ့ရှိသော အပင်တစ်မျိုးဖြစ်ကြောင်း၊ အပင်၏ ပဉ္စငါးပါးလုံးဆေးဖက်ဝင်သော်လည်း ကနဖော့ရွက်ကို အသုံးပြုများပြားကြောင်း သိရှိရသည်။ အရွက် ကိုကြိတ်၍ ဦးခေါင်းတွင် အုံပေးခြင်းဖြင့်ဦးနှောက် ပူခြင်းကိုသက်သာ၍အေးစေပြီး အရေပြားနှင့်  အကြောရောဂါများအတွက်လည်း စားသုံးပါကသက်သာစေကြောင်း၊ အရွက်ကိုနွားနို့နှင့်ဖြစ်စေ၊ ဆိတ်နို့နှင့်ဖြစ်စေ သောက်သုံးပေးခြင်းဖြင့် ဆီးပူညောင်းကျနာကို ပျောက်ကင်းစေကြောင်း၊ ခန္ဓာကိုယ် ဖောရောင်ခြင်းများဖြစ်ခဲ့သော်  ကနဖော့ရွက်ပြုတ်ကိုတို့စား၍ သော်လည်းကောင်း၊ အရွက်ပြုတ်ရည် ဖြင့် ချွေးအောင်းပေးပါကလည်း ဖောရောင်ခြင်းများကို သက်သာပျောက် ကင်းကြောင်း၊ ၎င်းအပင်၏ ပဉ္စငါးပါးကိုပြုတ်၍ အရည်ကိုပျားရည်နှင့် ရောသောက်ပါက ကျောက်ရောဂါ ကို  သက်သာပျောက်ကင်း ကြောင်း၊ ကနဖော့ပင်တစ်ပင်လုံး၏ ပဉ္စငါးပါးကို မုန်ညင်းဆီထည့်၍ပြုတ်ပြီး ဆားအနည်းငယ် ထည့်သောက်ခြင်းဖြင့် အသည်းအားနည်းသော ရောဂါများ ပျောက်ကင်းကြောင်း၊ ဗီတာမင်စီ ပါဝင်သောကြောင့် ကိုယ်ခံအားကိုကောင်းစေပြီး ဖျားနာခြင်း၊ အအေးမိခြင်း၊ စိတ်ဖိစီးမှုကြောင့် နေထိုင်မကောင်းဖြစ်ခြင်းများကို သက်သာပျောက်ကင်းကြောင်း၊ ကျောက်ကပ်အညစ်ကြေး များကို လည်း ထိထိ‌ရောက်ရောက်သန့်စင်ပေကြောင်း၊ ဆီးသွားရခတ်နေသူများ ကနဖော့ရွက်ကို သုတ်စား ခြင်းဖြင့် ဆီးရွှင်စေကြောင်း၊ အမျှင်ဓာတ်ပါဝင်ခြင်းကြောင့် အဆာခံနိုင်စေပြီး ကယ်လိုရီနှင့် အဆီဓာတ် ပါဝင်မှု နည်းသောကြောင့် ကိုယ်အလေးချိန်မတက်အောင် ထိန်းပေးပြီးဝိတ်ကျစေရန် အထောက်အကူပြုကြောင်း လေ့လာဖတ်ရှု့ရသည်။

DOCA(မန္တလေး)

             ထောပတ်သီးပင်သည် နှစ်ရှည်ပင်အမျိုးအစား အပင်ကြီးမျိုးဖြစ်၍ စိုက်ပျိုးပြီး သုံးနှစ်ကြာမှ အသီးများစတင်သီးကြောင်း၊  မြန်မာနိုင်ငံတွင် ထောပတ်သီးကို ရှမ်းပြည်နယ်(တောင်ပိုင်းနှင့် မြောက်ပိုင်း)   မန္တလေးတိုင်းဒေသကြီး ပြင်ဦးလွင်၊ကချင်ပြည်နယ်နှင့် ချင်းပြည်နယ်တို့တွင်အဓိက စိုက်ပျိုးထွက်ရှိကြောင်းသိရှိရသည်။ ထောပတ်သီးများထွက်ပေါ်ချိန်မှာ အောက်တိုဘာလမှ ဇန်နဝါရီလအထိဖြစ်ပြီး၊မျိုးကွဲများအနေဖြင့် ဟာစ်(Hass)၊ဘေးကွန်(Bacon)၊ ဖွတ်(Fuerte)၊ လမ် (Lamb Hass) စသည့်တို့ဖြစ်ကြောင်း၊ ထောပတ်သီးအခွံသည် အစိမ်းရင့်ရောင်ရှိပြီး အဆီဓာတ် ပိုများ၍ ဖောလစ်အက် ဆစ်၊ပိုတက်ဆီယမ်၊အမျှင်ဓာတ်၊များနှင့် Omega-3 ဓာတ် များပါဝင်ပြီး၊ သွေးပေါင်ချိန်ထိန်းချုပ်ရန်၊ ဝမ်းချုပ်မှုမှကာကွယ်ရန်နှင့် ဦးနှောက်ဖွံ့ဖြိုးမှုအတွက် အထောက်အကူဖြစ်ကာ ကင်ဆာနှင့် အဆစ် အမြစ်ရောင်ရမ်းမှုကို ကာကွယ်ပေးကြောင်း၊ ဗီတာမင်အီးကြွယ်ဝသောကြောင့် အသားအရေ ကြည်လင်ပြီး နှလုံးကျန်းမာရေးကိုကောင်းမွန်ကြောင်း၊ အာရုံကြောလုပ်ဆောင်မှုနှင့် သွေးကြောများ ကျန်းမာခြင်းကို အထောက်အကူပြုကြောင်း၊ အမျှင်ဓာတ်ကြွယ်ဝသောကြောင့် ဝမ်းချုပ်ခြင်း ကိုကာကွယ်ပေး၍ ထောပတ်သီးတွင် အာဟာရဓာတ်များစွာပါဝင်ကြောင်း လေ့လာဖတ်ရှု့ရသည်။ ထောပတ်သီးဝယ်ယူလျှင် အညှာအောက်အစိမ်းရောင်ရှိ၍ မှည့်ရန်အကောင်းဆုံးအသီးဖြစ်ပြီး ရွေးချယ် သင့်ကြောင်း၊ အသီးကိုလက်ဖဝါးပေါ်တင်၍ ကိုင်ဆကြည့်ပါကအလေးချိန်ပါလျှင် ထောပတ်သီး အရည်အသွေးကောင်းကြောင်း သိရှိရသည်။

DOCA(မန္တလေး)                          

       မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၊ မြို့မဈေး၌ မြို့ပတ်ဝန်းကျင်ရှိ ကျောက်တန်း ကျေးရွာ၊ ရေမြက်၊ ရေတွင်းကုန်း၊ ရွာသာ၊ ကြာကန်၊ လေးအိမ်တန်းနှင့် လက်ပံတောကျေးရွာတို့မှ စိုက်ပျိုးထွက်ရှိသည့် သခွာသီးများ နိုဝင်ဘာလ(တတိယပတ်)မှ စတင်၍ ဝင်ရောက်အရောင်းအဝယ် ဖြစ်လျက်ရှိကြောင်း သိရသည်။

          ၂၀၂၅ခုနှစ်၊ နိုဝင်ဘာလ(တတိယပတ်)တွင် သခွာသီး(၁)တောင့်လျှင် ကျပ်(၁၂၀၀)ဖြင့် အရောင်းအဝယ်ဖြစ်လျက်ရှိကြောင်း သိရသည်။ ပေါ်ဦးပေါ်ဖျားဖြစ်သည့်အတွက် ဈေးကောင်းရလျက် ရှိသည့်အပြင် အရောင်းအဝယ်မှာလည်း သွက်လျက်ရှိကြောင်း သိရှိရပါသည်။

DOCA(မကွေး)

        ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာဦးစီးဌာန မြို့နယ်တာဝန်ခံနှင့် ဝန်ထမ်းများသည် တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့်အညီ ဈေးကွက်အတွင်း ရောင်းချနေသော အခြေခံစားသောက်ကုန်ဈေးနှုန်းများအား စာရင်းကောက်ယူ၍ အပတ်စဉ်တင်ပြလျက်ရှိရာ နိုဝင်ဘာလ(၂၄)ရက်နေ့၊ နံနက်(၀၉:၀၀)နာရီအချိန်တွင် ကွမ်းခြံကုန်းမြို့နယ် မြို့မဈေးသို့ ပူးပေါင်းအဖွဲ့ဖြင့် ကွင်းဆင်းစိစစ်ခဲ့ကြောင်း သိရှိရသည်။

         ထိုသို့ ကွင်းဆင်းစာရင်းကောက်ယူခြင်း ဆောင်ရွက်ရာတွင် ကွမ်းခြံကုန်းမြို့နယ် စည်ပင်သာယာရေးအဖွဲ့မှ အခွန်ကောက်စာရေး ဦးသန့်ဇော်ဝင်း၊ စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပူးပေါင်း၍ ကွမ်းခြံကုန်းမြို့နယ် မြို့မဈေးအတွင်း အခြေခံစားသောက်ကုန်ရောင်းချသော ကုန်စုံဆိုင်များဖြစ်သည့် ဒေါ်ရီရီသန်းကုန်စုံဆိုင်၊ ဒေါ်မာမာစိုးကုန်စုံဆိုင်တို့မှ စားအုန်းဆီ တစ်ပိဿာလျှင် (၆၈၅၀)ကျပ်၊ မြေပဲဆီ တစ်ပိဿာလျှင် (၂၁၀၀၀)ကျပ်၊ ကြက်သွန်နီ ဆိုဒ်စုံတစ်ပိဿာလျှင် (၁၅၀၀မှ ၂၀၀၀)ကျပ်ထိ၊ ကြက်သွန်ဖြူ (ရှမ်းစ)တစ်ပိဿာလျှင် (၉၀၀၀မှ ၁၀၀၀၀)ကျပ်ထိ၊ ငရုပ်တောင့်ရှည် တစ်ပိဿာ လျှင် (၂၁၀၀၀မှ ၂၂၀၀၀)ကျပ်ထိ၊ မန်းကျည်းသီးမှည့် တစ်ပိဿာလျှင် (၁၄၀၀၀)ကျပ်၊ အိုင်အိုဒင်းဆားတစ်ထုပ်လျှင် (၈၀၀)ကျပ်၊ ပဲခြမ်းတစ်ပိဿာလျှင် (၆၅၀၀)ကျပ်၊ သကြား တစ်ပိဿာလျှင် (၅၀၀၀မှ ၅၅၀၀)ကျပ်ထိ၊ အာလူး တစ်ပိဿာလျှင် (၇၀၀၀မှ ၇၅၀၀)ကျပ်ထိ အသီးသီး အရောင်းအဝယ်ဖြစ်လျက်ရှိကြောင်း သိရှိရသည်။

        ယခင်တစ်ပတ်နှင့် ယခုတစ်ပတ်၏ ဈေးနှုန်းနှိုင်းယှဉ်ရာတွင် အခြေခံစားသောက်ကုန်ဈေးနှုန်းများမှာ ကွာခြားမှုမရှိဘဲ စားအုန်းဆီဈေးနှုန်းမှာ ယခင်တစ်ပတ်ထက် ဈေးနှုန်းအနည်းငယ် ကျဆင်းသွားကြောင်း သိရှိရပါသည်။

DOCA(ရန်ကုန်)

    ၂၀၂၅ ခုနှစ် ၊နိုဝင်ဘာ စတုတ္ထပတ်တွင် ကရင်ပြည်နယ်၊ ဘားအံမြို့ရေပေါ်ဈေးတွင် အခြားဒေသမှဝင်ရောက်လာသော ပုဇွန်ခြောက်များ အရောင်းသွက်လျက်ရှိကြောင်း သိရသည်။

   ပုဇွန်ခြောက်ကို လူတို့စားသုံးသော ဟင်းလျာများထဲတွင် လိုတလိုအသုံးပြု စားသုံးနိုင်ပါသည်။ ဒေသတွင်းပုဇွန်ခြောက်ဈေးနှုန်းများမှာ ပုဇွန်ခြောက်အမြင့်ဆုံးဈေးနှုန်းမှာ တစ်ပိဿာလျှင် (၁၇၀၀၀၀) ကျပ်၊ ပုဇွန်ခြောက်အလတ်ဈေးနှုန်းမှာ တစ်ပိဿာလျှင်(၁၃၀၀၀၀)ကျပ်၊ ပုဇွန်ခြောက်အသေးဈေးနှုန်းမှာ တစ်ပိဿာလျှင် (၈၀၀၀၀) ကျပ်နှင့် ပုဇွန်ခြောက်အမှုန်နို့ဆီးဘူး တစ်ဘူးဈေးနှုန်းမှာ (၂၀၀၀မှ၅၀၀၀) ကျပ်တို့ဖြင့် အရောင်းအဝယ်ဖြစ်လျက်ရှိကြောင်း သိရသည်။ ငါးခြောက်မျိုးစုံဈေးနှုန်းများမှာ ငါးနီတူခြောက် တစ်ပိဿာလျှင် (၂၈၀၀၀)ကျပ်၊ မြှီးတံသွယ်ခြောက် တစ်ပိဿာလျှင် (၃၀၀၀၀)ကျပ်၊ အာဗြဲခြောက် တစ်ပိဿာလျှင် (၃၅၀၀၀)ကျပ်၊ ငါးတန်ခြောက် တစ်ပိဿာလျှင် (၄၀၀၀၀)ကျပ်၊ ငါးအသားမြှောင်း ခြောက် တစ်ပိဿာလျှင် (၄၃၀၀၀)ကျပ်၊ ငါးလျှာပြတ်ခြောက် တစ်ပိဿာလျှင် (၃၅၀၀၀)ကျပ်၊ ငါးကွမ်းစခြောက် တစ်ပိဿာလျှင် (၅၀၀၀၀၊၆၀၀၀၀)ကျပ်နှင့်ငါးရံခြောက် တစ်ပိဿာလျှင် (၈၀၀၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်း ဘားအံမြို့ရေပေါ်ဈေးအရောင်းဆိုင်မှ သိရသည်။

DOCA(ကရင်)