ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီး၊ မုံရွာမြို့နယ်၊ ညောင်ဖြူပင်၊ သစ်စိမ့်၊ထနောင်းတောကျေးရွာတွင် နှမ်းနှင့်ပဲမျိုးစုံသီးနှံများကို အဓိက စိုက်ပျိုးကြပြီး ဟင်းသီးဟင်းရွက်သီးနှံများလည်း တစ်နိုင်တစ်ပိုင်စိုက်ပျိုးလျက်ရှိရာ ညောင်ဖြူပင်ကျေးရွာတွင် ရွှေဖရုံသီး စိုက်ဧက ၅ ဧကခန့် စိုက်ပျိုးထားရှိကြောင်း သိရသည်။

          ရွှေဖရုံသီးကို ဇူလိုင်လတွင် စတင်စိုက်ပျိုး၍ အောက်တိုဘာလတွင် အသီးရင့်မှည့်ကာ ခူးဆွတ်နိုင်ကြောင်း၊ မျိုးအနေဖြင့် အလုံးပြား ရွှေဖရုံသီးမျိုးကို စိုက်ပျိုးကြပြီး တစ်ဧကလျှင် မျိုးစေ့ ၁၀၀ ဂရမ်ပါအထုပ် ၁၆ ထုပ်ခန့် ကုန်ကျကြောင်း၊ စိုက်ပျိုးရာတွင် မြေအောက်ရေတင်စနစ်ဖြင့် စိုက်ပျိုးပြီး တစ်ပေခွဲအကွာ ကျင်းများတူး၍ အစေ့ချစိုက်ပျိုးရကြောင်း၊  စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် တစ်ဧကလျှင် ငွေကျပ် ၁၅ သိန်းခန့် ကုန်ကျကြောင်း၊ အထွက်နှုန်းအနေဖြင့်  တစ်ဧကလျှင် အလုံးရေ ၁၅၀၀- ၁၇၀၀ ခန့် ထွက်ရှိပြီး ဈေးနှုန်းအနေဖြင့် ဩဂုတ်လ စတုတ္တပတ်တွင် ရွှေဖရုံသီးတစ်လုံးလျှင် အကြီး၊ အသေးအပေါ်မူတည်၍ လက်ကားဈေး ငွေကျပ် ၁၀၀၀-၂၀၀၀-၄၀၀၀ ဖြင့် ရောင်းချရပြီး အကျိုးအမြတ်အနေဖြင့် တစ်ဧကလျှင် ငွေကျပ် ၁၅ သိန်းခန့် ရရှိကြောင်း၊ ဈေးကွက် အနေဖြင့် လက်လီလက်ကားကုန်စိမ်းသည်များမှ စိုက်ခင်းအထိ လာရောက် ဝယ်ယူကြပြီး မုံရွာမြို့ပေါ်ရှိ ကုန်စိမ်းပွဲရုံများသို့ တင်ပို့ရောင်းချကြကြောင်း၊ ရွှေဖရုံသီးပင် စိုက်ပျိုးခြင်းသည် အသီးများသာမက အညွန့် (အရွက်)များပါ ရောင်းချရသောကြောင့် အပိုဝင် ငွေများရရှိပြီး စျေးနှုန်းကောင်းမွန်သောကြောင့် တောင်သူများအနေဖြင့် အကျိုးအမြတ် များပိုမို ရရှိမည်ဖြစ်ကြောင်း သိရသည်။

DOCA(စစ်ကိုင်း)

    ကယားပြည်နယ် လွိုင်ကော်မြို့အတွင်းရှိ လောပိတမြို့နယ်နှင့်ဆိုလဆယ်ကျေးရွာများတွင် မိုးမြေပဲကို မိသားစုစားသုံးရန်နှင့် ဒေသတွင်းရှိဆီစက်များသို့တင်ပို့ရန်အတွက်အများအပြား စိုက် ပျိုးကြပါသည်။ မြေပဲတွင် မိုးမြေပဲနှင့်ဆောင်းမြေပဲဟူ၍ (၂)မျိုးရှိပါသည်။ ယခုအခါမိုးတွင်း ကာလ ဖြစ်၍ မိုးမြေပဲကိုအဓိကထားစိုက်ပျိုးကြပါသည်။

    မြေပဲစိုက်ရာတွင် မြေကို ဘောင်များ ဖော်ပြီးဘောင်ပေါ်တွင်မြေပဲကိုအတန်းလိုက်စိုက်ပျိုး၍ ရေသွင်းရလွယ်ကူပြီး မိုးများပါကရေဝပ် ခြင်းမှကာကွယ်ပေးပါသည်။ မျိုးစေ့ချရာတွင် တစ်ကျင်း လျှင်မျိုးစေ့ (၁)စေ့မှ(၂)စေ့သာချပြီးမြေ ကြီးထဲသို့ ၁.၅လက်မမှ၂လက်မခန့်အနက်တွင် စိုက်ရပါ သည်။ မိုးရာသီတွင် ပေါင်းမြက် အလွန်တက်တတ်သဖြင့် စိုက်ပြီး ရက်(၂၀)နှင့် (၄၀)အတွင်း ပေါင်း နှစ်ကြိမ်မဖြစ်မနေလိုက်ပေးရပါသည်။ ရက်(၄၀)ဒုတိယအကြိမ် ပေါင်းလိုက်ချိန်တွင် အပင်ခြေကို မြေပွပွဖြင့် မြေတောင်မြှောက် ပေးရပါသည်။ မိုးမြေပဲကို မိုးဦးကျ မေလလယ်နှင့်ဇွန်လလယ်တွင် စိုက်ပျိုးကြသည်။

          မြေပဲရိတ်သိမ်းချိန်ကို စက်တင်ဘာလမှအောက်တိုဘာလထိရိတ်သိမ်းကြပြီး များသောအား ဖြင့် သက်တမ်း တိုစိုက်ကြသဖြင့် ရက်ပေါင်း(၁၀၀)မှ   (၁၀၅)ရက်ခန့် ကြာတက်ပါသည်။ ထို့နောက် မြေပဲအရွက် များဝါလာချိန်၊ အတောင့်၏၇၀% ရင့်ချိန်တွင် ရိတ်သိမ်းကြပါသည်။ ခူးဆွတ်ပြီးအစို ဓာတ်ရှိသောကြောင့် ၃-၄ ရက်ခန့် အခြောက်ခံ နေလှန်းထားပြီး သိမ်းဆည်းထားပါသည်။ စိုက်ပျိုး ရန်အတွက် မြေပဲမျိုးစေ့ (၆)တင်းမှ (၈)တင်း အထိလိုအပ်ပါသည်။ အခြောက်ခံပြီးရလာသော မြေပဲကို ကြိတ်ပြီးဆီအဖြစ်လည်းကောင်း၊ မြေပဲလှော်၊ မြေပဲ ယို၊မြေပဲစားလှော်ပြုလုပ်၍   သရေစာ အဖြစ်လည်းစားသုံးကြပါသည်။ ဆီကြိတ်ပြီးထွက်လာသော မြေပဲဖတ်များကို နွား၊ကြက်၊ဝက်မွေးမြူ ရေးတွင်၎င်းတို့၏အစာအဖြစ် အသုံးပြုကြပါသည်။ မြေပဲခွံကို မြေဆွေးအဖြစ်လည်း အသုံးပြုကြ ပါသည်။  

     မြေပြင်စရိတ်အနေဖြင့်ထယ် ထိုးခြင်း၊ ထွန်မွှေးခြင်းနှင့် ဘောင်ဖော်ခြင်းများအတွက် စက်သုံး ဆီနှင့် စက်ငှားရမ်းခများ ပါဝင်ပြီး မျိုးစေ့ဝယ်ယူခနှင့် မျိုးစေ့ခွာခများလည်း ကုန်ကျပါသည်။ သဘာဝ မြေဩဇာနွားချေး၊ကွန်ပေါင်းနှင့်ဓာတ်မြေဩဇာများဝယ်ယူခကုန်ကျသည့်အပြင်မြေပဲ အပင်ပြုစုရာ တွင် ပေါင်းမြက်နှိမ်နင်းခြင်းနှင့် မြေ တွင်းအောင်းပိုးကာကွယ်ရေးဆေးဖျန်းခြင်း စရိတ်များလည်း ကုန်ကျပါသည်။ မြေပဲနုတ်ခြင်း၊ဆွတ်ခူးခြင်း၊သယ်ယူခြင်းနှင့် အခြောက်လှန်ခြင်းတို့အတွက် နေ့စား လုပ်အားခ များအပါအဝင် တစ်ဧကလျှင် (၈)သိန်းမှ (၁၀)သိန်းကျပ် ဝန်းကျင်ခန့် ကုန်ကျပါ သည်။

     ပျမ်းမျှအားဖြင့် တစ်ဧကလျှင် မြေပဲတောင့်(၄၅)တင်းမှ (၅၀)တင်း အထိထွက်ရှိပါသည်။ လက်ရှိ   ကယားပြည်နယ် တွင် မြေပဲတောင့်(၁)ပိဿာဈေးနှုန်းမှာ (၆၀၀၀)ကျပ်ခန့်ရှိပြီး မြေပဲတစ်တင်းလျှင် ဈေးနှုန်း (၄၂၀၀၀)ကျပ်ဖြင့် အရောင်းအဝယ်ဖြစ်လျက်ရှိပါသည်။ အထွက်နှုန်းကောင်းမွန်ပါက တစ် ဧက လျှင်စုစုပေါင်း (၁၆) သိန်းမှ (၂၀)သိန်း အထိရရှိနိုင်ပြီး ကုန်ကျစရိတ်နုတ်ပြီးပါက တောင်သူ အတွက် (၈)သိန်းမှ (၁၀)သိန်း ဝန်းကျင်အထိ အသားတင်အကျိုးအမြတ် ကျန်ရှိနိုင်ပါသည်။ ၂၀၂၆-၂၀၂၇ ဘဏ္ဍာနှစ် ကယားပြည်နယ် မြေပဲစိုက်ပျိုးမှုမှာ ဇူလိုင်လကုန်အထိ (၅၄၅၂) ဧကခန့် စိုက်ပျိုး ခဲ့ပြီး ဖြစ်ပါကြောင်း သက်ဆိုင်ရာဌာန၏ စာရင်းအရ သိရှိရပါသည်။

    ဩဂုတ်လတွင်မြေပဲများစတင်ထွက်ရှိပြီး မြေပဲများကို ပြုတ်၍ သီရိမင်္ဂလာဈေးအတွင်း၌ နို့ဆီ (၁)ဘူးလျှင် ၁၀၀၀ ကျပ် ဖြင့်အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ကယား)

          မကွေးတိုင်းဒေသကြီး၊ ပခုက္ကူခရိုင်အတွင်း မြို့နယ်များ၊ ဂန့်ဂေါခရိုင်နှင့် ပခုက္ကူမြို့တစ်ဖက်ကမ်း မန္တလေးတိုင်းဒေသကြီး၊ ညောင်ဦးခရိုင်အတွင်းရှိ ကျေးရွာများမှ စိုက်ပျိုးထွက်ရှိသော ကုလားပဲ 929 ၊ V6 ၊ V2 ၊ HL သီးနှံများကို ပခုက္ကူကုန်စည်ဒိုင်တွင် နေ့စဉ်အရောင်းအဝယ်ဖြစ်လျက်ရှိပါသည်။ ကုလားပဲသီးနှံများဖြစ်သည့် 929 ၊ V6 ၊ V2 ၊ HL ကုလားပဲသီးနှံများ စတင်ထွက်ပေါ်သည့် အချိန်တွင် ပခုက္ကူကုန်စည်ဒိုင်တွင် ကုလားပဲ 929 တစ်တင်းလျှင် (၇၄၀၀၀)ကျပ်၊  V6 တစ်တင်းလျှင် (၇၄၅၀၀) ကျပ်၊ V2 တစ်တင်းလျှင် (၇၂၀၀၀)ကျပ်နှင့် HL တစ်တင်းလျှင် (၇၂၀၀၀)ကျပ် ဈေးနှုန်းများဖြင့် အရောင်းအဝယ်ဖြစ်ခဲ့ပါသည်။

           ကုလားပဲသီးနှံဈေးနှုန်း အပြောင်းအလဲမှာ ထူးခြားပြောင်းလဲမှုမရှိပဲ ပုံမှန်အတိုင်း အရောင်းအဝယ်ဖြစ်လျက်ရှိရာ ၂၀၂၆ ခုနှစ်၊ ဇူလိုင်လအကုန် ဩဂုတ်လအစ (ပထမပတ်)တွင် ကုလားပဲဈေးနှုန်းများမှာ 929 တစ်တင်းလျှင် (၇၅၂၀၀)ကျပ်၊  V6 တစ်တင်းလျှင် (၇၃၅၀၀)ကျပ်၊ V2 တစ်တင်းလျှင် (၇၃၅၀၀)ကျပ်နှင့် HL တစ်တင်းလျှင် (၇၂၅၀၀) ကျပ်ဖြင့် အရောင်းအဝယ်ဖြစ်ခဲ့ပြီး ကုလားပဲ 929 နှင့် ကုလားပဲ V2 သီးနှံများမှာ ပြည်ပဝယ်လိုအားရှိသောကြောင့် ဈေးနှုန်းအမြင့်ဖြင့် အရောင်းအဝယ်ဖြစ်လျက်ရှိကြောင်း သိရသည်။

          ကုလားပဲသီးနှံများမှာ ရာသီကုန်ချိန်ဖြစ်ခြင်း၊ ဈေးကွက်ဝယ်လိုအားရှိခြင်းတို့ကြောင့် ဩဂုတ် လ(တတိယပတ်)တွင် ကုလားပဲဈေးနှုန်းများမှာ 929 တစ်တင်းလျှင်(၈၃၀၀၀)ကျပ်၊ V6 တစ်တင်းလျှင် (၇၆၅၀၀)ကျပ်၊ V2 တစ်တင်းလျှင် (၈၃၀၀၀) ကျပ်နှင့် HL တစ်တင်းလျှင် (၇၂၅၀၀)ကျပ်ဖြင့် အသီးသီး အရောင်းအဝယ်ဖြစ်ခဲ့ပြီး ဩဂုတ်လ (ပထမပတ်)နှင့် နှိုင်းယှဉ်ကြည့်လျှင် 929 တစ်တင်း လျှင် (၇၈၀၀)ကျပ်၊  V6 တစ်တင်းလျှင် (၃၀၀၀)ကျပ်၊ V2 တစ်တင်းလျှင် (၉၅၀၀)ကျပ်ဈေးနှင့် ကုလားပဲ HL ပဲအနေဖြင့် ပြည်တွင်း၌ အများဆုံးအသုံးပြုသည့်အတွက် ဈေးနှုန်းတည်ငြိမ်လျက်ရှိပြီး  ပခုက္ကူကုန်စည်ဒိုင်တွင် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(မကွေး)

      စစ်ကိုင်းတိုင်းဒေသကြီးအတွင်း  ဩဂုတ်လ တတိယပတ်တွင် ဖြစ်ပေါ်နေသော စပါး/ ဆန် ဈေးနှုန်းများမှာ ရွှေဘိုခရိုင်တွင်  ရွှေဘိုပေါ်ဆန်း (စပါး)(သစ်) တင်း ၁၀၀ လျှင် ၆၁၀၀၀၀၀ ကျပ် ၊ ပေါ်ဆန်း(ဆန်)(သစ်) ၂၄ ပြည်ပါ တစ်အိတ်လျှင် ၂၄၀၀၀၀ ကျပ်၊ ဧရာမင်း ဆန် (သစ်) ၂၄ ပြည်ပါ တစ်အိတ်လျှင်  ၁၆၅၀၀၀ ကျပ်၊ ရွှေဝါထွန်း(နွေ) စပါးတင်း ၁၀၀ လျှင် ၂၀၀၀၀၀၀ ကျပ်၊ ဆန်(၂၄)ပြည်တစ်အိတ်လျှင် ၁၀၀၅၀၀ ကျပ် တို့ဖြင့် ရောင်းချလျက်ရှိပါသည်။

      ကလေးခရိုင်၊ ကလေးမြို့နယ်တွင် ဧည့်မထ(စပါး) တင်း ၁၀၀ လျှင် ၂၇၀၀၀၀၀ ကျပ် ၊ ဆန် ၂၄ ပြည်ပါတစ်အိတ်လျင် ၉၅၀၀၀ ကျပ်၊ ဧရာမင်း(စပါး) (ဟောင်း) တင်း ၁၀၀ လျှင် ၃၂၀၀၀၀၀ ကျပ်၊ ဆန် ၂၄ ပြည်ပါတစ်အိတ်လျင် ၁၃၀၀၀၀ ကျပ် တို့ဖြင့် ရောင်းချလျက်ရှိကြောင်းသိရသည်။

            စစ်ကိုင်းခရိုင်တွင်   ရွှေဘိုပေါ်ဆန်း စပါးတင်း ၁၀၀ လျှင် ၅၉၀၀၀၀၀ ကျပ် ၊ ပေါ်ဆန်း (ဆန်) ၂၄ ပြည်ပါ တစ်အိတ်လျှင် ၂၃၅၀၀၀ ကျပ်၊ ဧရာမင်း စပါး(ဟောင်း) တင်း ၁၀၀ လျှင် ၃၅၀၀၀၀၀ ကျပ်၊ ဆန် ၂၄ ပြည်ပါ တစ်အိတ်လျှင် ၁၈၀၀၀၀ ကျပ်၊ မနောသုခ စပါး(သစ်)  တင်း ၁၀၀ လျှင် ၂၂၀၀၀၀၀ ကျပ်၊ ဆန် ၂၄ ပြည်ပါ တစ်အိတ်လျှင် ၉၈၀၀၀ ကျပ်တို့ဖြင့် ရောင်းချလျက်ရှိကြောင်း သိရသည်။

    မုံရွာခရိုင်၊ မုံရွာမြို့တွင် ဧရာမင်းစပါး တင်း ၁၀၀ လျှင် ၃၇၀၀,၀၀၀ ကျပ်၊  ဆန် ၂၄ ပြည်တစ်အိတ်လျှင် ၁၇၅၀၀၀ ကျပ်၊ ရွှေဘိုပေါ်ဆန်း စပါး  တင်း ၁၀၀ လျှင် ၆၀ ၀၀၀၀၀ ကျပ် ၊ ဆန် ၂၄ ပြည် တစ်အိတ်လျှင် ၂၄၀၀၀၀ ကျပ်၊ မနောသုခ စပါး(သစ်)တင်း ၁၀၀ လျှင် ၂၆၀၀,၀၀၀ ကျပ် ၊  ဆန် ၂၄ ပြည် တစ်အိတ်လျှင် ၁၁၀၀၀၀ ကျပ် ၊ ရွှေဝါထွန်းစပါး(သစ်) တင်း ၁၀၀ လျှင် ၂၃၀၀၀၀၀ ကျပ် ၊ ဆန် ၂၄ပြည် တစ်အိတ်လျှင် ၁၀၅၀၀၀ ကျပ်တို့ဖြင့်  အရောင်းအဝယ်ဖြစနေကြောင်း သိရသည်။

DOCA(စစ်ကိုင်း)

  စစ်ကိုင်းတိုင်းဒေသကြီး၊ ကနီမြို့နယ်တွင် နှမ်း၊ ပဲမျိုးစုံ၊ ပန်းမျိုးစုံနှင့် စားဖိုဆောင်သီးနှံများ စိုက်ပျိုးသည့်အပြင် ဥယျာဉ်ခြံမြေသီးနှံများကိုလည်း စီးပွားဖြစ် စိုက်ပျိုးကြပြီး ကနီမြို့နယ်တွင် ငှက်ပျောစိုက်ဧက ၃ ကျော် စိုက်ပျိုးထားရှိကြောင်း သိရသည်။

          ငှက်ပျောသီးနှံကို ဇူလိုင်လတွင် စိုက်ပျိုး၍ စိုက်ပျိုးပြီးတစ်နှစ်ကျော်အကြာ စက်တင်ဘာလတွင် လှိုင်လှိုင်ထွက်ပေါ်ကြောင်း၊ မျိုးအနေဖြင့် ဖီးကြမ်းငှက်ပျောမျိုးကို အများဆုံး စိုက်ပျိုးကြပြီး ငှက်ပျောစိုက်ပျိုးရာတွင် ငှက်ပျောသားတက်များကို တူးယူ၍ ၃-၄ ရက်ခန့် အခြောက်ခံကာ စိုက်ပျိုးရပြီး တစ်ဧကလျှင် ငှက်ပျောသားတက် ၇၀၀-၈၀၀ ခန့် စိုက်ပျိုးရကြောင်း၊ စိုက်ပျိုးထုတ်လုပ်မှု ကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခ၊ ငှက်ပျောသား တက်ရှင်း လင်းခြင်း အပါအဝင် တစ်ဧကလျှင် ငွေကျပ် သိန်း ၁၀ ခန့် ကုန်ကျပြီး အထွက်နှုန်း အနေဖြင့် ငှက်ပျောခိုင် ၁၈၀၀-၂၀၀၀ ခန့် ထွက်ရှိ၍ တစ်ခိုင်လျှင် ရောင်းတန်းဝင် ငှက်ပျောဖီး ၄-၅ ဖီးခန့် ရရှိကြောင်း၊ ဈေးနှုန်းအနေဖြင့်  ဩဂုတ်လ တတိယပတ်တွင် ဖီးကြမ်းငှက်ပျောတစ်ဖီးလျှင် ရောင်းတန်းဝင် တစ်ဖီးလျှင် ၂၀၀၀-၃၀၀၀ ကျပ်၊ အဖျား တစ်ဖီးလျှင် ၁၀၀၀-၁၂၀၀ ကျပ်နှုန်းဖြင့် ရောင်းချရပြီး အကျိုးအမြတ်အနေဖြင့် တစ်ဧကလျှင် ငွေကျပ် ၂၀ သိန်းကျော်ခန့် ရရှိ ကြောင်း၊ ဈေးကွက်အနေဖြင့် မုံရွာမြို့ပေါ်ရှိ ငှက်‌ပျောပွဲရုံများ၊ သစ်သီးဆိုင်များသို့ တင်ပို့ရောင်းချကြောင်း၊ ယခုနှစ်တွင် ငှက်ပျော သီးဈေးနှုန်းများ ကောင်းမွန်သောကြောင့် တောင်သူများအနေဖြင့် အကျိုး အမြတ်များရရှိကြောင်း သိရသည်။

DOCA(စစ်ကိုင်း)