ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်ရှိ ကွမ်းသီးကန်၊ မြောက်လူးကန်၊ မီးသွေးကန်၊ ဘုန်းကံ၊ ကျေးရွာများတွင် လယ်ယာစိုက်ပျိုးရေးလုပ်ငန်းကို အဓိကအားထား၍  စိုက်ပျိုးကြပါသည်။ ပခုက္ကူမြို့နယ်တွင် ၂၀၂၅ - ၂၀၂၆ ဘဏ္ဍာနှစ် ပဲတီစိမ်းစိုက်ဧက (၁၆၅၈၉)ဧကရှိကြောင်း မြို့နယ်စိုက်ပျိုး ရေးဦးစီးဌာနမှ သိရှိရပါသည်။ ပဲတီစိမ်းကို ကဆုန်၊ နယုန်တွင် စတင်စိုက်ပျိုးပြီး ဝါဆို၊ ဝါခေါင်တွင် ရိတ်သိမ်းရသဖြင့် သက်တမ်း(၂)လခန့်ကြာမြင့်ပါသည်။  

      ပဲတီစိမ်းတစ်ဧက စိုက်ပျိုးရန် မျိုးစေ့(၃)ပြည်အသုံးပြုရပြီး ပဲစင်းငုံနှင့်သီးညှပ်စိုက်ပျိုးပါသည်။  မျိုးစေ့ဖိုး၊ မြေပြုပြင်ခ နှင့် ထွန်ယက်ခ၊ အလုပ်သမားခ၊ သွင်းအားစု၊ ရိတ်သိမ်းခနှင့် ခြွေလှေ့ခ စုစုပေါင်း   တစ်ဧကကုန်ကျစရိတ် ကျပ်(၃)သိန်းခန့်ကုန်ကျကြောင်း၊ ပဲတီစိမ်းနှင့် ပဲစင်းငုံကို  သီးညှပ် စိုက်ပျိုး ခြင်းသည် ကုန်ကျစရိတ်ကို အလွန်သက်သာစေပြီး တောင်သူများအတွက် များစွာတွက်ခြေကိုက် ကြောင်း၊ ယခင်နှစ်တွင် မိုးရွာသွန်းမှုနောက်ကျ၍  အထွက်နှုန်းလျော့ သော်လည်း တောင်သူသီးနှံ ပေါ်ချိန်တွင် ကျပ်(၁၅၀၀၀၀)ဝန်းကျင်ထိ ဈေးရရှိသောကြောင့် တောင်သူများ အကျိုးအမြတ်ရရှိပါ သည်။

     ဈေးနှုန်းမှာ၂၀၂၆ ခုနှစ်၊ ဇွန်လ (ဒုတိယပတ်)တွင် တစ်တင်းလျှင် ကျပ်(၈၅၀၀၀)ဈေးဖြင့် ပခုက္ကူ ကုန်စည်ဒိုင်၌ အရောင်းအဝယ်ဖြစ်နေပြီး ယခင် မေလ လကုန်ပိုင်းတွင် ကျပ်(၁၀၃၀၀၀)ထိ ဈေးပေါက်ခဲ့ ကြောင်း၊ ယခင်လနှင့်ဈေးနှုန်းနှိုင်းယှဉ်ပါက  ကျပ်(၁၈၀၀၀)ဝန်းကျင်ထိ ဈေးနှုန်းကျဆင်းသွားကြောင်း၊ လက်ရှိအချိန်တွင် တရုတ်နိုင်ငံ၏ ဝယ်လိုအားလျော့နည်းခြင်း၊ ရာသီအလိုက် ပဲအသစ်ဝင်ရောက်မှုနှင့် လက်ကျန်များခြင်း၊ ပြည်တွင်းကုန်သည်များ အဝယ်အေးခြင်းတို့ကြောင့် ဈေးကျခြင်းဖြစ်ကြောင်း၊ သို့သော်လည်း ဥရောပနိုင်ငံများနှင့် အိန္ဒိယဝယ်လိုအားပေါ်မူတည်၍ ဈေးနှုန်းပြန်လည် လှုတ်ခတ်နိုင် ကြောင်း ကုန်သည်များ၏ ဈေးကွက်သုံးသပ်ချက်အရ သိရှိရပါသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်ရှိ မြောက်လူးကန်၊ ဘုန်းကံ ၊ မီးသွေးကန် ကျေးရွာများတွင်  လယ်ယာစိုက်ပျိုးရေးလုပ်ငန်းကို အဓိက အားထား၍ စိုက်ပျိုးကြပါသည်။ ပခုက္ကူမြို့ နယ်တွင် ၂၀၂၅ - ၂၀၂၆ ဘဏ္ဍာနှစ်၌ ပဲစင်းငုံစိုက်ဧက (၄၈၈၆)ဧကရှိကြောင်း မြို့နယ်စိုက်ပျိုးရေးဦးစီး ဌာနမှ သိရှိရပါသည်။ ကဆုန်၊ နယုန်၊ ဝါဆိုလများတွင် စိုက်ပျိုးကြပြီး နတ်တော်၊ ပြာသို၊ တပိုတွဲလ များတွင် ရိတ်သိမ်းရသဖြင့် သက်တမ်း(၇)လ မှ (၈)လခန့် ကြာမြင့်သည်။

     ပဲစင်းငုံတစ်ဧက စိုက်ပျိုးရန် မျိုးစေ့ (၂)ပြည်အသုံးပြုပြီး ပဲတီစိမ်းနှင့်သီးညှပ်စိုက်ပျိုးပါသည်။  မျိုးစေ့ဖိုး၊ မြေပြုပြင်ခ နှင့် ထွန်ယက်ခ၊ အလုပ်သမားခ၊ သွင်းအားစု၊ ရိတ်သိမ်းခနှင့် ခြွေလှေ့ခ စုစုပေါင်း   တစ်ဧက ကုန်ကျစရိတ် ကျပ်(၂-၃)သိန်းခန့် ကုန်ကျကြောင်း၊ ပဲစင်းငုံသည် ရေသွင်းရန်မလိုဘဲ ရာသီဥတု ဒဏ်ခံနိုင်ရည်ရှိခြင်း၊ ပိုးသတ်ဆေးနှင့် သွင်းအားစု သုံးစွဲမှုနည်းခြင်းတို့ကြောင့် ကုန်ကျစရိတ် သက်သာ ကြောင်း၊ ယခင်နှစ်တွင် မိုးနည်း၍ အထွက်နှုန်း(၆)တင်းခန့်သာ ထွက်ရှိသောကြောင့် တောင်သူများ အကျိုးအမြတ်နည်းပါသော်လည်း ပဲစင်းငုံသီးနှံသည် ကုန်ကျစရိတ် သက်သာပြီး တွက်ခြေကိုက်သော သီးနှံဖြစ်၍ ယခုနှစ်တွင် ထပ်မံတိုးချဲ့ စိုက်ပျိုးကြပြီး သီးနှံပေါ်ချိန်တွင် ဈေးကောင်းရရန် မျှော်လင့်မိ ကြောင်း စိုက်တောင်သူထံမှ သိရှိရပါသည်။

    ပခုက္ကူကုန်စည်ဒိုင်၌ (၁၀.၆.၂၀၂၆)ရက်နေ့တွင် ပဲစင်းငုံ တစ်တင်းလျှင် ကျပ်(၉၆၀၀၀)ဈေးဖြင့် အရောင်းအဝယ်ဖြစ်နေကြောင်း၊ ဇန်နဝါရီ၊ ဖေဖေါ်ဝါရီလများတွင် ကျပ်(၁)သိန်းကျော်ထိ ဈေးပေါက်ခဲ့ပြီး ယခု ပြည်ပဝယ်လိုအားပါးသဖြင့်  ဈေးအနည်းငယ်ပြန်လည်အေးပြီး ဈေးအကျဘက်သို့ ဦးတည်နေ ကြောင်း၊ ပြည်တွင်းစားသုံးမှုနည်းပြီးပြည်ပဝယ်လိုအားပေါ်တွင် ရာနှုန်းပြည့်နီးပါးမှီခိုနေရသော ပို့ကုန် သီးနှံဖြစ်သောကြောင့် ဈေးအတက်/အကျ လှုတ်ခတ်မှုရှိကြောင်း ကုန်သည်များ၏ ပဲဈေးကွက် သုံးသပ် ချက်အရ  သိရှိရပါသည်။

DOCA(မကွေး)

       စစ်ကိုင်းတိုင်းဒေသကြီး၊ မုံရွာမြို့နယ်ပတ်ဝန်းကျင်ရှိ ကျေးရွာများ၊ ချောင်းဦး၊ ဘုတလင်၊ အရာတော် စသည့် ကျေးရွာများတွင် ဟင်းသီးဟင်းရွက်စားဖိုဆောင်သီးနှံများ၊  ဆီထွက် သီးနှံနှင့် ပဲမျိုးစုံသီးနှံများကို စိုက်ပျိုးထားသည့်အနက် ဆောင်းမြေပဲကိုလည်း စိုက်ပျိုးထားကြောင်း ၂၀၂၅-၂၀၂၆ ခုနှစ်၊ မုံရွာခရိုင်၌ ဆောင်းမြေပဲ စိုက်ဧက ၄၃၈၇၈ ဧကခန့် စိုက်ပျိုး ထားကြောင်း သိရသည်။

         ဆောင်းမြေပဲကို အောက်တိုဘာနှင့် နိုဝင်ဘာလတွင် စတင်စိုက်ပျိုးကြပြီး ဖေဖော်ဝါရီလနှင့် မတ်လတွင် လှိုင်လှိုင်ထွက်ပေါ် လျက်ရှိကြောင်း၊ မျိုးအနေဖြင့် မြေပဲလုံးဆန်အဖြူမျိုးများကို စိုက်ပျိုးကြ‌ပြီး စိုက်ပျိုးထုတ်လုပ် မှုကုန်ကျစရိတ်အနေဖြင့်  မြေပြုပြင်ခြင်း၊ စိုက်ပျိုးခြင်း၊ အပင်ပြုစုခြင်း၊ ရိတ်သိမ်းခြင်း၊   သွင်းအားစုများ အပါအဝင် တစ်ဧကလျှင် ငွေကျပ် ၉၂၃၀၀၀ ခန့် ကုန်ကျကြောင်း၊ အထွက်တင်း ၆၅ တင်း ခန့် ထွက်ရှိ၍ ဈေးနှုန်းအနေဖြင့် မြေပဲတောင့် တစ်တင်းလျှင် ငွေကျပ် ၄၂၀၀၀ ဖြင့် အရောင်းအဝယ်ဖြစ်ခဲ့ပြီး အကျိုးအမြတ်အနေဖြင့် တစ်ဧကလျှင် ငွေကျပ် ၁၈ သိန်းခန့် ရရှိကြောင်း၊ ဈေးကွက်အနေဖြင့် ဆောင်းမြေပဲများကို မုံရွာမြို့ပေါ်ရှိ ပွဲရုံများသို့ တင်ပို့ရောင်းချပြီး ထိုမှတစ်ဆင့် ရန်ကုန်မြို့နှင့် မန္တလေးမြို့များသို့လည်းကောင်း၊ ဒေသတွင်းရှိ ဆီစက်လုပ်ငန်းရှင်များနှင့် မြေပဲကို တန်ဖိုးမြှင့်ထုတ်ကုန်(Value Added) ပြုလုပ်၍ ပြန်လည်ရောင်းချသည့် လုပ်ငန်းရှင်များမှလည်းကောင်း ဝယ်ယူကြကြောင်း၊ ယခုနှစ်တွင် အထွက်နှုန်းကောင်းပြီး ဈေး‌ကောင်းရရှိသော ကြောင့် တောင်သူများ အကျိုးအမြတ်များရရှိကြောင်း သိရှိရပါသည်။

DOCA(စစ်ကိုင်း)

             စစ်ကိုင်းတိုင်းဒေသကြီးသည် နိုင်ငံတော်၏ တတိယစပါးကျီတစ်ခု ဖြစ်သည့်အတိုင်း ရွှေဘိုခရိုင်သည်လည်း စစ်ကိုင်းတိုင်းဒေသကြီး၏ ပထမစပါးကျီတစ်ခုအဖြစ် ရပ်တည်လျက်ရှိပါသည်။ ရွှေဘိုခရိုင်အနေဖြင့် သဖန်းဆိပ်ဆည်ရေသောက် လယ်ဧက (၄.၄)သိန်းခန့်တွင် ရွှေဘိုပေါ်ဆန်းစပါးကို ဧက(၃)သိန်း ခန့်  နှစ်စဉ် စိုက်ပျိုးလျက်ရှိကြောင်း သိရှိရပါသည်။

         ရွှေဘိုခရိုင်တွင် ဇွန်လ ဒုတိယပတ်တွင် ရွှေဘိုပေါ်ဆန်းစပါး တင်း(၁၀၀)လျှင် (၅၇၀၀၀၀၀)ကျပ်၊ ရွှေဘိုပေါ်ဆန်းဆန် (၂၄)ပြည်ပါ တစ်အိတ်လျှင် (၂၁၀၀၀၀)ကျပ် ပေါက်ဈေးဖြင့် ဈေးနှုန်းတည်ငြိမ်လျက်ရှိပြီး၊ဒေသတွင်းသာမက ပိုလျှံသောဆန်များကို အခြားတိုင်း/ပြည်နယ် ဒေသအသီးသီးသို့ တင်ပို့ရောင်းချလျက်ရှိကြောင်း သိရပါသည်။

        ၂၀၂၆ခုနှစ် ဇွန်လ ဒုတိယပတ်အတွင်း ရွှေဘိုပေါ်ဆန်းဆန် စီးထွက်မှုမှာ ရန်ကုန်သို့ (၂၅၀၁၄)အိတ်၊ မန္တလေးသို့ (၆၀၀၄) အိတ်၊ နေပြည်တော်သို့ (၉၇၀) အိတ်၊ ပဲခူးသို့ (၁၅၇၀)အိတ်၊ ပြည်သို့ (၂၀၄)အိတ်၊ တောင်ငူသို့ (၆၀)အိတ်၊ ကျောက်ပန်းတောင်းသို့ (၁၀၀)အိတ်၊ မိတ္ထီလာသို့ (၁၁၀)အိတ်၊ ကရင်ပြည်နယ် ဘားအံမြို့သို့ (၁၄၅၀)အိတ်၊ မြဝတီသို့ (၃၁၀)အိတ်၊ ရှမ်းပြည်နယ် (တောင်ပိုင်း)သို့ (၄၄၉၉)အိတ်၊ မွန်ပြည်နယ်သို့ (၁၆၈၀)အိတ်၊မူဆယ်သို့ (၂၂၀)အိတ်၊ မကွေးတိုင်းသို့(၅၅၈)အိတ်၊ ကချင်ပြည်နယ်သို့ (၁၀၉၀)၊  စုစုပေါင်း အိတ်ရေ (၄၃၈၃၉)၊ တန်အားဖြင့် (၂၁၉၂)တန် စီးထွက်ခဲ့ကြောင်း သတင်းရရှိပါသည်။

DOCA(စစ်ကိုင်း)

                      မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့်စပါး၊ပဲ၊ပြောင်း၊နှမ်းသီးနှံမျိုးစုံ စိုက်ပျိုးဖြစ်ထွန်းလျက်ရှိရာ ၄င်းသီးနှံများအနက် ဆီထွက်သီးနှံ တစ်မျိုးဖြစ်သော မိုးနှမ်းသီးနှံကို၂၀၂၆-၂၀၂၇ဘဏ္ဍာနှစ်တွင် မိုးနှမ်းကို မေလနှင့်ဇွန်လများတွင် စတင်စိုက်ပျိုးခဲ့ပြီး စက်တင်ဘာလတွင် စတင်ထွက်ရှိမည်ဖြစ်ကြောင်း ၊ နှမ်းစိုက်ပျိုးမှု အနေဖြင့် ဘောင်ကြောင်းပေးစနစ်ဖြင့် စိုက်ပျိုးကြပြီး အများဆုံး စိုက်ပျိုးသောမျိုးများမှာ နှမ်းဖြူ၊နှမ်းညိုနှင့် နှမ်းနက်မျိုးများကိုစိုက်ပျိုးကြပါသည် ။ (၁)ဧက စိုက်ပျိုးမှုအနေဖြင့် နှမ်းမျိုး ၁ပြည်လျှင်(၈၀၀၀-၈၅၀၀)ကျပ်အထိ ပေးဝယ်ရကြောင်း ၊ (၁)ဧက ကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခ အပါအဝင်စုစုပေါင်း(၅၅၀၀၀၀/-)ကျပ်ခန့်ကုန်ကျကြောင်း၊(၁)ဧကမျိုး (၂-၃)ပြည် စိုက်ပျိုးရကြောင်း၊ ယခင်နှစ် အထွက်နှုန်းအနေဖြင့် (၁၂-၁၃)တင်းခန့်ထွက်ရှိခဲ့ပြီး ယခင်နှစ် နှမ်းစျေးနှုန်းအနေဖြင့် နှမ်းဖြူတစ်တင်းလျှင်(၁၃၀၀၀၀/-) ကျပ် ၊ နှမ်းညို တစ်တင်းလျှင်(၁၃၂၀၀၀/-)ကျပ် ၊ နှမ်းနက် တစ်တင်းလျှင် (၁၂၀၀၀၀/-)ကျပ် စျေးနှုန်းများဖြင့်  အရောင်းအဝယ်ဖြစ်ခဲ့ပြီး နှမ်းဆီ ၁ပိဿာလျှင် (၁၈၀၀၀/-)ကျပ်စျေးနှုန်းများဖြင့် ရောင်းဝယ်ခဲ့ပြီး (၁)ဧက အကျိုးအမြတ်အနေဖြင့် စိုက်ပျိုးစရိတ် နှုတ်ပြီး(၁၁၀၀၀၀၀/-)ကျပ်ခန့်မြတ်ခဲ့ကြောင်း ၊ ယခုဇွန်လ ဒုတိယအပတ်တွင် နှမ်းစျေးနှုန်းအနေဖြင့် နှမ်းဖြူတစ်တင်းလျှင် (၁၁၇၀၀၀/-) ကျပ် ၊ နှမ်းညို တစ်တင်းလျှင်(၁၁၃၀၀၀/-) ကျပ် ၊ နှမ်းနက် တစ်တင်းလျှင်(၁၂၀၀၀၀/-)ကျပ် စျေးနှုန်းများဖြင့်  အရောင်းအဝယ်ဖြစ်နေပြီး နှမ်းဆီ ၁ပိဿာ လျှင် (၁၈၀၀၀/)ကျပ် စျေးနှုန်းများဖြင့် ရောင်းဝယ်လျှက်ရှိကြောင်း ၊ ကုန်သွယ်ရောင်းဝယ်မှုအနေဖြင့် တောင်သူများမှ နှမ်းသီးနှံထွက်ပေါ်ချိန်တွင် နီးစပ်ရာ ကျောက်ဆည်မြို့ပေါ်ရှိ ပွဲရုံများသို့ တိုက်ရိုက် သွားရောက်ရောင်းချကြကြောင်း ၊ ပွဲရုံများမှတဆင့် ရန်ကုန် ၊ မန္တ‌လေးမြို့များသို့ တင်ပို့ရောင်းချ လျက်ရှိပါသည် ။ တောင်သူများမှာ နှမ်းကိုဆီထွက်သီးနှံ အဖြစ်ကျယ်ကျယ်ပြန့်ပြန့် စိုက်ပျိုးလျှက် ရှိပါသည် ။ နှမ်းသီးနှံထွက်ပေါ်ချိန်တွင် အထွက်နှုန်းနှင့် စျေးနှုန်းများကောင်းမွန်ပါက တောင်သူများ အကျိုးအမြတ်ပိုမိုဖြစ်ထွန်းနိုင်ကြောင်း၊ နှမ်းစိုက်ပျိုးသောတောင်သူတစ်ဦး၏ပြောကြားချက်အရ သိရှိရပါသည်။

DOCA(မန္တလေး)