ပြည်တွင်းကုန်သွယ်မှုသတင်း

       ဧရာဝတီတိုင်းဒေသကြီး၊ မအူပင်ခရိုင်အတွင်း၌ နနွင်းများကို စိုက်ပျိုးသူအနည်းငယ်ရှိပြီး နနွင်းစိုက်ပျိုးသူထံမှ နနွင်းတက်များကို ဝယ်ယူ၍ ကြိတ်ခွဲကာ မအူပင်ဈေးကွက်အတွင်းရောင်းချနေကြောင်း သိရသည်။ နနွင်းတက်များကို ၂၀၂၆ခုနှစ် ဖေဖော်ဝါရီလ စတင်၍ တူးဖော်လျက်ရှိရာ မတ်လတွင်  နနွင်းမှုန်အနေဖြင့် ကြိတ်ခွဲထုတ်လုပ်ရောင်းချကြောင်း၊ နနွင်းများ စတင်တူးဖော်ချိန်တွင် စျေးနှုန်းများကောင်းမွန်လျက်ရှိပြီး တောဝယ်နနွင်းအစို ၁ပိဿာလျှင်  ၁၀၀၀ ကျပ်ဖြင့် အရောင်းအဝယ်ဖြစ်ခဲ့ရာ မတ်လတွင် နနွင်းတက် ၁ပိဿာလျှင် ၁၂၀၀ကျပ် ဖြင့် ဈေးအနည်းငယ်တက်လာကြောင်း နနွင်းမှုန်ကြိတ်ခွဲခြင်းတွင် နနွင်းနုကြိတ်ခွဲမှုနှင့် နနွင်းခေါင်းကြမ်း ကြိတ်ခွဲ၍ ၂မျိုး ရောင်းချကြောင်းသိရသည်။ နနွင်းနုမှုန် ၁ပိဿာလျှင် ၃၀၀၀၀ကျပ်ဖြင့်လည်းကောင်း၊ နနွင်းခေါင်းကြမ်းမှုန့် ၁ပိဿာလျှင် ၂၀၀၀၀ ကျပ်ဖြင့် ဈေးကွက်အတွင်း လက်လီရောင်းချလျက်ရှိပြီး လက်ကားဈေးအနေဖြင့် နနွင်းနုမှုန် ၁ပိဿာ ၂၅၀၀၀ကျပ်၊ နနွင်းခေါင်းကြမ်းမှုန့် ၁ပိဿာလျှင် ၁၅၀၀၀ကျပ်ဖြင့် လက်ကားရောင်းချပေးလျက်ရှိကြောင်း နနွင်းရောင်းချသူထံမှ သိရသည်။ ယခင်နှစ်ဈေးနှင့် နှိုင်းယှည်ပါက ဈေး ၁ပိဿာ ၃၀၀၀ကျပ် မြင့်တက်လာကြောင်း’သိရသည်။ ဈေးကွက်အနေဖြင့် နနွင်းများကို ဝယ်ယူသိုလှောင်သူများ ရှိသလို ဈေးကောင်းချိန်မှ ထုတ်ရောင်းသူများလည်းရှိသည်။  နနွင်းစစ်စစ်ကို ပရဆေးဆိုင်များမှလည်းဝယ်ယူ၍ ကြိတ်ခွဲရောင်းချကြသည်။ တောသည်များမှလည်း ကိုယ်တိုင်းမအူပင်မြို့ ဈေးများအတွင်းရောင်းချလျက်ရှိကြောင်း သိရှိရပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ် အသေးစား၊ အလတ်စား၊ အငယ်စားနှင့် စီးပွားရေးလုပ်ငန်းဖြစ်သည့် သင်းရနံ ပဲမုန့်လုပ်ငန်းကို ကုန်းဘောင်မင်းလမ်းမှ ထုတ်လုပ်ဖြန့်ဖြူးရောင်းချနေမှုများကို ၂၀၂၆ခုနှစ် မတ်လ ၁၃ရက်နေ့ ညနေက ဓနုဖြူမြို့နယ် စားသုံးသူရေးရာဦးစီးဌာနမှ မြို့နယ်ဦးစီးမှူးနှင့် ဝန်ထမ်းများ သွားရောက်လေ့လာခဲ့ကြကြောင်း သိရသည်။

           သင်းရနံ့ပဲမုန့်လုပ်ငန်းရှင် ဦးသိန်းဝင်းနှင့် တွေ့ဆုံ၍ မုန့်ထုတ်လုပ်မှု အဆင့်ဆင့်ကိုမေးမြန်းခဲ့ရာ လုပ်ငန်းကို ၂၀၂၅ခုနှစ်မှ စတင်ပြုလုပ်ခဲ့ကြောင်း၊ ပဲမုန့်ထုတ်လုပ်ရာတွင် ပါဝင်ကုန်စည်များမှာ ဂျုံ၊ သကြား၊ ဆီ၊ ဆား၊ ကုလားပဲ၊ ပါဝင်ထုတ်လုပ်ပါကြောင်း၊ ကုလားပဲကို နူးအောင်ပြုတ်၍ စက်ဖြင့်ချေပြီး ကုလားပဲအနှစ်၊ ဆား၊ သကြား၊ ဆီကို ထည့်၍ ယိုထိုးထားရပါသည်။ မုန့်ပြုလုပ်သည့်အခါ ဆီဂျုံ၊ ရေဂျုံရှိ ပြုလုပ်ထား၍ ဂျုံနှင့် ပဲအနှစ်တို့ကို မုန့်အဝိုင်းပြုလုပ်၍ အပေါ်အောက်ကို ဆီဂျုံ၊ ရေဂျုံသုတ်လိမ်း၍ မီးဖုတ်ကာ ပဲမုန့်ပြုလုပ်ရကြောင်း ရှင်းပြသည်။ သင်းရနံ့ပဲမုန့်ကို ရင်းနှီးမြုပ်နှံမှုအနေဖြင့် ငွေကျပ် သိန်း ၄၀ ခန့် ရင်းနှီးထားရှိပြီး ထုတ်လုပ်လျက်ရှိကြောင်း၊ ထုတ်လုပ်မှုအနေဖြင့် ၁လလျှင် ပဲမုန့် ဗူး ၃၀၀ခန့်ထုတ်လုပ်ရရှိကြောင်း သိရသည်။ ဈေးကွက်ဖြန့်ဖြူးမှုအနေဖြင့် ဒေသတွင်းသာထုတ်လုပ်ဖြန့်ဖြူးရောင်းချပါကြောင်း လုပ်ငန်းရှင်ထံမှ သိရသည်။ ရောင်းချမှုဈေးနှုန်းအနေဖြင့် သင်းရနံ့ပဲမုန့် ၁ဗူးလျှင် လက်ကားဈေး ၄၀၀၀ကျပ်၊ ဒေသတွင်း မုန့်ဆိုင်များမှ လက်လီ ၁ဗူးလျှင် ၄၃၀၀ကျပ်ဖြင့်ရောင်းချပေးလျက်ရှိကြောင်းသိရပြီး သင်းရနံ့ပဲမုန့်လုပ်ငန်းသည် ဒေသတွင်း အသေးစား၊ အလတ်စား၊ အငယ်စားလုပ်ငန်း တစ်ခု ဖြစ်ပြီး စားသုံးသူရေရာဦးစီးဌာနတွင် ကုန်အညွှန်းအမှတ်အသား အသိအမှတ်ပြုရရှိထားပြီးဖြစ်ကြောင်း သိရသည်။

DOCA(ဧရာဝတီ)

     တနင်္သာရီတိုင်းဒေသကြီး၊ မြိတ်မြို့တွင် အဓိကအခြေခံစားသောက်ကုန်ဖြစ်သည့် ကြက်သွန်နီ နှင့် ကြက်သွန်ဖြူသည် လက်ရှိကာလတွင် အခြားတိုင်းဒေသကြီးများမှ အဓိကတင်သွင်း ဝင်ရောက် လျက်ရှိပြီး ဈေးကွက်အတွင်း ဝယ်လိုအားနှင့်အညီ ရောင်းဝယ်လျက်ရှိသည်။ ကြက်သွန်နီ နှင့် ကြက်သွန် ဖြူများကို အများအားဖြင့် ရှမ်းပြည်နယ်၊ မန္တလေး တိုင်းဒေသကြီးနှင့် ပခုက္ကူဒေသများမှ ကားလမ်း ကြောင်းဖြင့် တင်ပို့လာကြပြီး မြိတ်မြို့ရှိ စျေးများနှင့် ပွဲရုံများသို့ဖြန့်ချိရောင်းချလျက်ရှိသည်။ လက်ရှိ အချိန်တွင် မြိတ်မြို့သို့ ကြက်သွန်နီနှင့် ကြက်သွန်ဖြူ ဝင်ရောက်မှုမှာ ပုံမှန်ရှိနေသော်လည်း သယ်ယူ ပို့ဆောင်ရေးစရိတ်နှင့် ကုန်ပစ္စည်းဝယ်လိုအားအပေါ် မူတည်၍ ဈေးနှုန်းများမှာ အနည်းငယ် ပြောင်းလဲ လျက်ရှိကြောင်းသိရပါသည်။ ထို့အပြင် စားသုံးသူများအနေဖြင့် အခြေခံစားသောက်ကုန်ဖြစ်သော ကြက်သွန်နီနှင့် ကြက်သွန်ဖြူကို နေ့စဉ် အသုံးပြုမှုများရှိနေသဖြင့် ဈေးကွက်အတွင်း ဝယ်လိုအားမှာ ပုံမှန်ရှိနေပြီး ဈေးနှုန်းများမှာ အချို့ အချိန်များတွင် အနည်းငယ်အတက်အကျရှိနိုင်ကြောင်း သိရှိရပါ သည်။ မြိတ်မြို့တွင် ကြက်သွန်နီနှင့် ကြက်သွန်ဖြူများကို မြိတ်မြို့ဆိပ်ငယ် ဈေးကြီးနှင့် စမ်းချောင်း ကုန်စိမ်းများတွင် နေ့စဉ်အရောင်းအဝယ်သွက်လျက်ရှိကြောင်းလည်းသိရှိရပါသည်။  ကြက်သွန်နီနှင့် ကြက်သွန်ဖြူများသည် အဓိကမပါမဖြစ်သော စားဖိုချောင်သုံးဖြစ်သည့်အပြင် အလွယ်တကူ ဝယ်ယူချက် စားရသော အသီးအနှံတစ်မျိုးလည်းဖြစ်သည်။

          ၂၀၂၆ခုနှစ်၊ မတ်လတတိယပတ်တွင် မြိတ်မြို့ပေါ်တွင် ရောင်းချနေသော ကြက်သွန်နီ တစ်ပိဿာ လျှင် (၃၀၀၀)ကျပ်မှ (၃၅၀၀)ကျပ်၊ ကြက်သွန်ဖြူ (ရှမ်း) တစ်ပိဿာလျှင် (၁၄၀၀၀)ကျပ်မှ(၁၅၀၀၀) ကျပ်၊ ကြက်သွန်ဖြူ(ကြူဂုတ်)တစ်ပိဿာလျှင် (၁၄၀၀၀)ကျပ်ခန့် ရှိကြောင်း မြိတ်မြို့ ကုန်စုံဆိုင်များမှ သိရှိရပါသည်။

DOCA(တနင်္သာရီ)

               ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ညောင်လေးပင်တာဝန်ခံရုံးအနေဖြင့် ကုန် ဈေးနှုန်းတည်ငြိမ်ရေး၊ စားသုံးသူကာကွယ်ရေး လုပ်ငန်းများအပြင် နှစ်စဉ် ကျင်းပလျက်ရှိသော  ပွဲတော်များကိုလည်း ပါဝင်ဆင်နွှဲလျက်ရှိရာ မတ်လ ၂ ရက်နေ့တွင် ကျရောက်သော  (၆၄) နှစ် မြောက် “တောင်သူလယ်သမားနေ့ MSMEs ဒေသထုတ်ကုန်များ အရောင်းပြခန်းနှင့် သစ်သီးဝလံ၊ ပန်းမန်ပြပွဲ” တွင် ဝင်ရောက်ဆင်နွှဲခဲ့ကြောင်း သိရှိရပါသည်။

               (၆၄) နှစ်မြောက် ကျရောက်သော “တောင်သူလယ်သမားနေ့” ကို ကြိုဆိုဂုဏ်ပြုသောအား ဖြင့် ပဲခူးမြို့ “ကျိုက်ပညာယျ” စေတီတော်မြတ်ကြီး၌ ပဲခူးတိုင်းဒေသကြီး အစိုးရအဖွဲ့မှ ဦးစီးဦး ဆောင် ကျင်းပသော တောင်သူလယ်သမားနေ့ အခမ်းအနားတွင် ပဲခူးတိုင်းဒေသကြီးအတွင်းရှိ ခရိုင်/ မြို့နယ်များမှ ထွက်ရှိသော ဒေသထွက်ကုန်ပစ္စည်းများကို သက်ဆိုင်ရာ ခရိုင်/ မြို့နယ်အလိုက် ခင်းကျင်းရောင်းချခဲ့ပါသည်။ ထို့အပြင် ပြပွဲ/ ပြိုင်ပွဲများအနေဖြင့်  သစ်သီးဝလံများ၊ ပန်းများ၊ လယ် ယာထွက်ကုန်ပစ္စည်းများကို ခရိုင်/ မြို့နယ်များမှ ဝင်ရောက်ယှဉ်ပြိုင်ခဲ့ပြီး ပဲခူးတိုင်းဒေသကြီး အစိုးရ အဖွဲ့မှ ဆုများလည်း ချီးမြှင့်ခဲ့ပါသည်။ “တောင်သူလယ်သမားနေ့” ဈေးရောင်းပွဲတော်တွင် ညောင် လေးပင်ခရိုင်ဦးစီးမှူးရုံးအနေဖြင့် ညောင်လေးပင်ခရိုင်၊ ညောင်လေးပင်မြို့နယ်အတွင်း ထွက်ရှိသော ဒေသထွက်ကုန် ပစ္စည်းများဖြစ်သည့် ACT ရှောက်ချဉ်ရည်နှင့် ရှောက်ပျားရည်၊ (လုပ်သား) မရွေး၊ ရွှေခေတ် (အသင့်စားမုန့်) စသည်တို့ကို ရောင်းချပေးခဲ့ကြောင်း သတင်းရရှိပါသည်။

DOCA( ပဲခူး) 

               ပဲခူးတိုင်းဒေသကြီးသည် မြန်မာနိုင်ငံတွင် စပါးစိုက်ပျိုးမှုအနေဖြင့် ဧရာဝတီတိုင်းပြီးလျှင် ဒုတိယနေရာ၌ရှိနေပါသည်။ ပဲခူးတိုင်းဒေသကြီး၊ တောင်ငူခရိုင်ရှိ မြို့နယ်များတွင် မိုးစပါး၊ နွေစပါး နှင့်မတ်ပဲအား အဓိကစိုက်ပျိုးလျက်ရှိပါသည်။ တောင်ငူခရိုင်ရှိ မြိုနယ်များအနက် ရေတာရှည် မြို့နယ်တွင် နွေစပါးစိုက်ပျိုးဧက (၁၉၄၄၀)ဧကလျာထားပြီး ဖေဖော်ဝါရီလ နောက်ဆုံး အပတ်တွင် (၁၆၇၈၈)ဧက စိုက်ပျိုးပြီးစီးသွားကြောင်းသိရှိရသည်။ယခုမတ်လ (ပထမ)အပတ်တွင် နွေစပါး လျာထားဧက (၁၉၄၄၀)ဧကမှာ အားလုံးစိုက်ပျိုးပြီးစီးသွားပြီဖြစ်ကြောင်း သက်ဆိုင်ရာဌာနစာရင်း ဇယားများအရ သိရှိရပါသည်။

          ရေတာရှည်မြို့နယ်တွင် နွေစပါးမျိုးများအနေဖြင့် နှံကောက်၊ ရက်(၉၀)နှင့်ရတနာတိုးတို့ အား အဓိကစိုက်ပျိုးကြသော်လည်း နှံကောက်အမျိုးအစားမှာ စိုက်ပျိုးမှုအများဆုံးဖြစ်ကြောင်း သိရှိ ရသည်။ ရေတာရှည်မြို့နယ်ရှိနွေစပါးများ အောင်မြင်ဖြစ်ထွန်းပြီး အထွက်နှုန်းကောင်းစေရန် အတွက် ဆွာဆည်မှရေများ လုံလောက်စွာပေးဝေလျက်ရှိပါသည်။ နွေစပါးမှာ မိုးစပါးထက် အထွက်နှုန်းကောင်းမွန်သောကြောင့် တစ်ဧကအထွက်နှုန်းကောင်းမွန်ရေး ရေတာရှည်မြို့နယ် တောင်သူဦးကြီးများမှ မျှော်မှန်းလျက်ရှိကြောင်း လေ့လာသိရှိရသည်။

DOCA( ပဲခူး)