ပြည်တွင်းကုန်သွယ်မှုသတင်း

            အာလူးသီးနှံသည် အာဟာရတန်ဖိုးမြင့်မားသောကြောင့် ကမ္ဘာ့နိုင်ငံအများစုတွင် အဓိက အစားအစာအဖြစ် စားသုံးလျက်ရှိသောသီးနှံဖြစ်ပါသည်။ မြန်မာ့အာလူးစိုက်ဧရိယာ၏ (၇၅)ရာခိုင်နှုန်းကျော် ကိုရှမ်းပြည်နယ်တွင် စိုက်ပျိုးပြီး စိုက်ပျိုးသူအတွက်အကျိုးအမြတ်ရှိသည့် သီးနှံဖြစ်သည့်အပြင် စားသုံးသူတို့အတွက်လည်း အာဟာရတန်ဖိုးမြင့်မားသဖြင့် မြန်မာနိုင်ငံအတွင်း စိုက်ပျိုးဖြစ်ထွန်းသောဒေသများ၌ တိုးချဲ့စိုက်ပျိုးလျက်ရှိသည်။ အာလူးသီးနှံသည် အေး၍သမရာသီဥတုကို ကြိုက်နှစ်သက်ပါသည်။ မိုးရေချိန်(၄၀-၈၀)လက်မရွာသွန်းသောဒေသများတွင် ဖြစ်ထွန်းပါသည်။ ဆည်ရေ၊ မြောင်းရေရရှိသည့်ဒေသများတွင် ဆောင်းရာသီ၌ စိုက်ပျိုးကြပါသည်။ အာလူးစိုက်ပျိုးဖြစ်ထွန်းသည့် အသင့်တော်ဆုံးအပူချိန်မှာ (၁၆-၂၇)ဒီဂရီစင်တီဂရိတ်ဖြစ်၍ (၂၈)ဒီဂရီစင်တီဂရိတ် ထက်ကျော်လွန်ပါက အပင်ကြီးထွားမှုနှေးကွေးသွားပါသည်။ အာလူးပင်၏သက်တမ်းမှာ ပုံမှန်အားဖြင့် ၃လခွဲ-၄ လအတွင်းရှိပြီး နေ့တာရှည်ပါက သက်တမ်းအနည်းငယ်ပိုရှည်၍ နေ့တာတိုပါက သက်တမ်းအနည်းငယ်တိုပါသည်။ ပဲခူးမြို့ပေါ်ရှိစျေးများတွင် ယခုဇန်နဝါရီလတတိယအပတ်တွင် အာလူးစျေးနှုန်းမှာ အကြီးတစ်ပိဿာလျှင် လက်လီစျေး(၅၈၀၀-၆၀၀၀)ခန့်ရှိပြီး၊ လက်ကား စျေးနှုန်းမှာ (၅၀၀၀)ကျပ်ခန့်ဖြင့်ရောင်းချလျက်ရှိကြောင်း သိရှိရပါသည်။

DOCA(ပဲခူး)

                 ကျွန်းလှမြို့၊ ပိတောက်မြိုင်ဈေးတွင် အသား/ငါးနှင့် အခြားစား‌သောက် ကုန်ပစ္စည်းများ၊ လူသုံး ကုန်ပစ္စည်းများကို ဒေသတွင်းနှင့် အခြားဒေသများမှ ဝယ်ယူရောင်းချလျက်ရှိရာ ယခုအခါ တွင် လမ်းပန်း ဆက်သွယ်ရေး အခက်ခဲများကြောင့်  ကုန်ဈေးနှုန်းများ အနည်းငယ် မြင့်တက်လျက်ရှိရာမှ အသား/ငါး ဈေးနှုန်းများထဲမှ အမဲသားဈေးနှုန်းသည်လည်း မြင့်တက်လျက်ရှိပါသည်။

                အမဲသားများကို ကျွန်းလှမြို့ ဒေသတွင်းဟင်းစလေများမှ လက်လီ/လက္ကား ရောင်းချလျက်ရှိရာ ၂၀၂၆ ခုနှစ်၊ ဇန်နဝါရီလ တတိယပတ်၏ အမဲသား ဈေးနှုန်းများ အနေဖြင့် အမဲသားရှယ်(တစ်တုံးထဲသား) လက်လီ တစ်ပိဿာလျှင် (၃၂၀၀၀)ကျပ်၊(၅၀)ကျပ်သားလျှင်(၁၆၀၀၀)ကျပ်၊ အမဲသားရိုးရိုး (အသားပြွန်း) လက်လီ တစ်ပိဿာလျှင်(၃၀၀၀၀)ကျပ်၊ (၅၀)ကျပ်သားလျှင်(၁၅၀၀၀)ကျပ်၊ အမဲပုဆိုးကြမ်း တစ်ပိဿာ လျှင်(၁၆၀၀၀)ကျပ်၊ အမဲသား အတိုအစ တစ်ပိဿာ(၁၂၀၀၀)ကျပ်၊ အမဲခေါင်းသား တစ်ပိဿာလျှင် (၁၂၀၀၀)ကျပ်၊ အမဲသွေးခဲ တစ်ပိဿာလျှင်(၅၀၀၀)ကျပ်၊ အမဲအူ တစ်ပိဿာလျှင်(၁၀၀၀၀)ကျပ် နှင့် အမဲရိုး တစ်ပိဿာ(၈၀၀၀)ကျပ် ဈေးနှုန်းတို့ဖြင့် အရောင်းအဝယ် ဖြစ်လျက်ရှိကြောင်း အမဲသားသည် ထံမှ သိရပါသည်။   DOCA(စစ်ကိုင်း)

           ဇော်စိမ်း၊ ဇော်ကျား၊ဇော်လုံးစသည့် ပန်းပင်များမှာ အမျိုးအစားတူညီကြပြီး မြန်မာလူမျိုးတို့နှင့်ရင်းနှီးသော ပန်းပင်များဖြစ်ကြပါသည်။ ဇော်စိမ်းကို အချို့နေရာများတွင် ကျောက်စိမ်းပင်၊ ကျောက်စိမ်းပန်းဟူ၍လည်း ခေါ်ဆိုကြပါသည်။ ပတ်ဝန်းကျင်တွင် အလေ့ကျပေါက်ရောက် လေ့ရှိသလို ဘုရားပန်းထိုးရန်အတွက် မိမိတို့၏နေအိမ်ခြံဝန်းများအတွင်း၌လည်း တစ်ပိုင်တစ်နိုင် စိုက်ပျိုးလေ့ရှိကြသည်။ ဇော်စိမ်းပင်များသည် သဘာဝအရအကြမ်းခံပြီး အိမ်တွင်းအိမ်ပြင် အလွယ်တကူစိုက်ပျိုးနိုင်သော အပင်မျိုးဖြစ်သည်။ မြေအမျိုးအစားနှင့် ရာသီမ‌ရွေးစိုက်ပျိုးနိုင်သော အပင်မျိုးဖြစ်သည်။ အပင်ပိုင်းမျိုးပွားနည်းနှင့်ကိုင်း၊ အတက်တို့ကို မြေကြီးထဲသို့ထိုးစိုက် ထားရုံမျှဖြင့် ရှင်သန်ကြီးထွားနိုင်ကြပါသည်။ အိုးနှင့်စိုက်ပျိုးမည်ဆိုပါက ရေမဝပ်ဘဲလေဝင်လေထွက်ကောင်း သောပန်းအိုးကိုရွေးချယ်ရပါမည်။ အပင်၏ပတ်ပတ်လည်တွင် အမြစ်များကြီးထွားပွားများနိုင်ဖို့အတွက် သင့်တင့်သောနေရာရနိုင်မည့် ပန်းအိုးများဖြစ်ရန်လိုအပ်သည်။ ထို့နောက် မိမိအိမ်တွင် ရှိသောအပင်(သို့မဟုတ်) ကိုင်းကို အိုးထဲသို့ထည့်စိုက်ပြီး စိုက်ပျိုးနိုင်ပါသည်။ အပင်စိုက်ပျိုးထားသော အိုးထဲကမြေသည် အစိုဓာတ်အမြဲရရှိနေရန်လိုအပ်ပေသည်။

      အိုးနှင့်မဟုတ်ဘဲမြေကြီးပေါ်တွင် ချစိုက်မည်ဆိုပါက ဘောင်ဖော်ပြီးစိုက်ပျိုးလျှင်ပိုကောင်းသည်။ ဘောင်ဖော်ရာတွင် အမြစ်ကောင်းကောင်းကြီးထွားနိုင်ရန်အတွက် အနက် ၆လက်မဝန်းကျင် ရရှိအောင်ပြုလုပ်ထားသင့်ပါသည်။ နွားချေး၊ မြေဆွေး အလွယ်တကူရနိုင်မည်ဆိုလျှင် ဘောင်ပြုလုပ်ရင်းကြိုတင်ထည့်ထားသင့်ပါသည်။ အပင်စိုက်ပျိုးရာတွင် ၆လက်မအကွာအဝေး ထားပြီးစိုက်ပျိုးနိုင်ပါသည်။ စိုက်ပျိုးပြီး ၁၀-၁၅ရက်အကြာတွင် အမြစ်နှင့်အညွှန့်လေးများ ထွက်လာမည်ဖြစ်သည်။ ယခု ဇန်နဝါရီလတတိယအပတ်တွင် ပဲခူးမြို့ရှိစျေးများထဲတွင် ဇော်စိမ်းပန်းစည်း အကြီးအသေးအရွယ်အစားပေါ်မူတည်၍ စျေးနှုန်း ကျပ်(၂၀၀၀-၃၀၀၀-၃၅၀၀)အသီးသီးဖြင့် ရောင်းချလျက်ရှိကြောင်း သိရှိရပါသည်။

DOCA(ပဲခူး)

    ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်တွင် အသေးစား၊ အလတ်စား၊ အငယ်စား ဖွံ့ဖြိုးတိုးတက်ရန် ကူညီ အားပေးဆောင်ရွက်လျက်ရှိသည်။ ဒေသတွင်း စီးပွားရေးလုပ်ငန်းများ ဈေးကွက်ရရှိရေး ပြည်တွင်းကုန်သွယ်မှု ဖွံ့ဖြိုးတိုးတက်ရေးအတွက် မုန့်လုပ်ငန်းများ တပိုင်တနိုင် ထုတ်လုပ်မှုမှ စီးပွားဖြစ်လုပ်ကိုင်နိုင်ရေး နည်းလမ်းကောင်း ရှာဖွေပြီး ပူးပေါင်းဆောင်ရွက်လျက်ရှိသည်။ 

          မအူပင်မြို့ မြို့မရပ်ကွက်ရှိ ဦးထွန်းဝေ မုန့်ဟင်းခါးဖတ်ထုတ်လုပ်သော လုပ်ငန်းသည် ၁၂ ရပ်ကွက် တွင် ထုတ်လုပ်ကြောင်း သိရပြီး ကုန်ကြမ်းအနေဖြင့် ဆန်(ကရင်မ)နှင့် ဆန်ကွဲကိုသာ အသုံးပြုကြောင်း၊ ထုတ်လုပ်မှု အနေဖြင့် တစ်နေ့ကို ၂၄ပြည် ဆန် ၃အိတ် ကုန်ကျပြီး တစ်နေ့ ရင်းနှီးမြုပ်နှံမှု ကုန်ကျစရိတ်  ၃၅၀၀၀၀ကျပ်မှ -၄၀၀၀၀၀ကျပ် ဝန်းကျင်ခန့်ကုန်ကျကြောင်းသိရသည်။ မုန့်ဖတ် ထွက်ရှိမှု အနေဖြင့် တစ်နေ့ထုတ်လုပ်မှု၏ ပိဿာချိန် ၂၀၀မှ ၃၀၀ခန့် ထွက်ရှိသည်၊၊ မုန့်ဖတ်ရောင်းချ မှု ဈေးနှုန်းအနေဖြင့် လက်ကားဈေး ၂၅၀၀ကျပ် လက်လီဈေး ၃၀၀၀ကျပ်ဖြင့် ရောင်းချပြီး မအူပင်မြို့အတွင်းသာ ရောင်းချကြောင်း သိရသည်။ တစ်နေ့ထုတ်လုပ်မှု ထွက်ရှိမှုအပေါ် ရရှိသော အကျိုးအမြတ် အနေဖြင့် ငွေကျပ် ၁၅၀၀၀၀-၂၀၀၀၀၀/-ကျပ် ခန့် ရရှိကြောင်း၊ အလှူ၊ မင်္ဂလာရက်များ ရှိပါက မုန်ဖတ်ပိုမိုထုတ်လုပ်ရောင်းချရသည်။ မုန့်ဖတ်ထုတ်လုပ်သည့် လုပ်ငန်းကို ၁၉၉၀ခုနှစ် ကတည်းက လုပ်ကိုင်လာခြင်းဖြစ်ပြီး စီးပွားဖြစ် တပိုင်တစ်နိုင်လုပ်ကိုင်လျက်ရှိကြောင်း မုန့်ဖတ်ထုတ်လုပ်သူပိုင် ရှင်ထံမှ သိရသည်။

DOCA(ဧရာဝတီ)

                 စစ်ကိုင်းတိုင်းဒေသကြီး၊ မုံရွာမြို့နယ်၊ ကန်သာယာဈေးအတွင်းတွင် ကုန်စိမ်းသီးနှံအစုံ ရောင်းချလျက် ရှိရာ  ရာသီပေါ်အသီးအရွက်များဖြစ်သည့် တမာရွက်၊ ညောင်ရွက်၊ ထနောင်းဖူး၊ သမုန်းဖူး(သမုန်းပွင့်)၊ ကန့်လန့်ဖူး၊ မုန့်ညှင်းရွက်၊ နံနံပင်၊ ပဲကြီးအစို၊ ပန်းမုံလာပွင့်၊ မုံလာထုတ်၊ ခါကြက်ဥ၊ ခရမ်းသီး၊ သံပုရာသီး၊ နှင့် ခရမ်းချဉ်သီး စသည့်သီးနှံများ ရောင်းချလျက် ရှိကြောင်း သိရသည်။

              တမာပင်သည် အပူပိုင်းအမြဲစိမ်းအပင်တစ်မျိုးဖြစ်ပြီး အညာဒေသများတွင် ပေါက်ရောက်သောအပင်ကြီးမျိုးဖြစ်သည်။ တမာရွက်အမျိုးအစား အမျိုးမျိုးရှိရာ ခြံစည်းရိုးတမာ၊ ရေတမာနှင့် စားတမာဟူ၍ ရှိသည့်အနက် စားတမာဖူး/တမာရွက်နုသည်လူတိုင်းနီးပါးကြိုက်နှစ်သက်သော အရွက်တစ်မျိုးဖြစ်ပြီး ထမင်းမြိန်စေသော အရန်ဟင်းကြမ်းတစ်မျိုးအဖြစ် အသုံးပြုကြပါသည်။

                    ယခုအချိန်တွင် ရာသီစာတမာရွက်နုများ ပေါ်စအချိန်ဖြစ်၍ ဈေးကောင်းရနေကြောင်း၊ ယခင်နှစ်က တမာရွက်နု(၁၀)သားလျှင် (၈၀၀/၁၀၀၀)ကျပ်၊ ယခုနှစ်တွင်မူ (၁၀)သားလျှင် ကျပ်(၁၅၀၀-၁၈၀၀)အထိ ရောင်းချရကြောင်းသိရသည်။တမာရွက်နုများကို ပြုတ်၍ ခရမ်းချဉ်သီး ငါးပိချက်၊ ငံပြာရည်ချက်၊ ငါးပိရည်နှင့် ငါးခြောက်ချက်များတို့ဖြင့် တွဲဖက်စားသုံးကြသည်။ တမာရွက်နုများသည် ပြာသိုလနှင့် တပိုတွဲလများတွင် ထွက်ရှိပြီး ဈေးကွက်အတွင်းသို့ စတင်ဝင်ရောက်လျက်ရှိပြီး အရောင်းအဝယ်ဖြစ်လျက်ရှိကြောင်းသိရသည်။

DOCA(စစ်ကိုင်း)