ပြည်တွင်းကုန်သွယ်မှုသတင်း

          စစ်ကိုင်းတိုင်းဒေသကြီး၊ ကန့်ဘလူခရိုင်သည် စိုက်ပျိုးရေးလုပ်ငန်းများကို အဓိကထား လုပ်ကိုင်သော ဒေသတစ်ခုဖြစ်ပြီး သီးနှံစိုက်ပျိုးရာတွင် အထွက်နှုန်းများ ပိုမိုကောင်းမွန်စေရန်နှင့် ပန်းတိုင်အထွက်နှုန်းရရှိရေးအတွက် ကန့်ဘလူခရိုင်အတွင်းရှိ  သီးနှံစိုက်ပျိုးသူများက ဝယ်ယူအသုံး ပြုလျက်ရှိကြောင်း သိရသည်။

          ၂၀၂၆ ခုနှစ်၊ စက်တင်ဘာလ နောက်ဆုံးပတ်အတွင်း ကန့်ဘလူခရိုင်၏ စိုက်ပျိုးရေးသုံး ဓာတ်မြေဩဇာနှင့် ပိုးသတ်ဆေးဈေးနှုန်းများမှာ ပန်းဖူး(50)kgတစ်အိတ်လျှင် ၁၄၀၀၀၀ ကျပ်၊ မြှားကမ္ဘာ(50)kg တစ်အိတ်လျှင် ၁၃၀၀၀၀ ကျပ်၊ ရွှေနဂါးပုလဲသာ (50)kg တစ်အိတ်လျှင် ၁၂၀၀၀၀ ကျပ်၊ ရွှေတောနစ်(၅၀၀)စီစီတစ်ဘူးလျှင် ၂၅၀၀၀ ကျပ်၊ မိုရယ်လ်မုန်း အမြစ်ပွား၊ အသီးတင်၊ အပင်သန် ဟော်မုန်းဆေး (၅၀၀)စီစီ တစ်ဘူးလျှင်  ၃၅၀၀၀ ကျပ်ဖြင့် အရောင်းအဝယ်ဖြစ်လျက်ရှိကြောင်း၊ မန္တလေးဈေးကွက်၌ ဝယ်ယူရသည့် ဈေးနှုန်းကျဆင်းလာသည့်အတွက် ယခုနောက်ဆုံးပတ် အတွင်း ပန်းဖူးနှင့် မြှားကမ္ဘာတစ်အိတ်လျှင် ၁၀၀၀၀ ကျပ်နှင့် မိုရယ်လ်မုန်း (၅၀၀)စီစီ တစ်ဘူးလျှင် ၅၀၀၀ ကျပ် ဈေးနှုန်းကျဆင်းသွားကြောင်း ဓာတ်မြေဩဇာနှင့် ပိုးသတ်ဆေးရောင်းချသည့် လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)       

                မြင်းခြံမြို့နယ်၌  သာပေါင်းမြစ်ရေတင်စီမံကိန်းဖြင့်  စပါးများကိုစိုက်ပျိုးလျက်ရှိကြောင်း၊ အဓိက စိုက်ပျိုးသော ကျေးရွာများမှာ သာပေါင်းရွာ၊ အနိမ့်ရွာ၊ ကံရွာ၊ ကျားတိုင်ရွာ၊ ငါ့နန်းရွာ၊ ခေါင်းခွဲရွာ၊ ဆုံရွာ၊ ဖက်ပင်အိုင်ရွာနှင့် ကတော‌ကျေးရွာ တို့တွင်မိုးစပါးများကို အဓိကထား စိုက်ပျိုးကြကြောင်း၊ မိုးစပါး များစိုက်ပျိုးချိန်မှာ ဇူလိုင်လ၊ ဩဂုတ်လ၊ စက်တင်ဘာလတို့တွင် စတင်စိုက်ပျိုးပြီး၊ ဒီဇင်ဘာလနှင့် ဇန်နဝါရီလတို့တွင် ရိတ်သိမ်းထွက်ပေါ်ကြောင်းသိရှိရသည်။ ၂၀၂၆ခုနှစ်တွင် မြင်းခြံမြို့နယ်တွင် မိုးစပါး စိုက်ပျိုးရန်လျာထား (၃၃၄၅) ဧကတွင် စိုက်ပျိုးပြီးဧက (၁၃၁၀)ဧက စိုက်ပျိုးပြီးစီးပြီးဖြစ်ကြောင်း၊ မျိုးကွဲများ အနေဖြင့် မနောသုခ မျိုး(၈၂၀)ဧက၊ ဆင်းသုခမျိုး (၃၄၀) ဧကနှင့် အောင်နိုင်တိုးမျိုး(၁၅၀) ဧကစိုက်ပျိုး ထားကြောင်း၊ စိုက်ပျိုးရန်ကျန်ရှိသော ဧကများ ဆက်လက်စိုက်ပျိုးလျှက်ရှိကြောင်း စိုက်ပျိုးရေး ဦးစီးဌာန၏ စာရင်းများအရ သိရှိရသည်။ မျိုးစပါးစျေးနှုန်းအနေဖြင့် စပါးတစ်တင်းလျှင် (၃၀၀၀၀) ကျပ်ခန့် ပေါက်စျေးရှိကြောင်း၊ (၁)ဧက စိုက်ပျိုးရန် အတွက် စပါးမျိုး(၂-၃)တင်းခန့် စိုက်ပျိုးရကြောင်း၊ ကြဲပတ်စနစ်ဖြင့် စိုက်ပျိုးကြောင်း၊ မျိုး၊ သွင်းအားစု၊ လုပ်သားခအပါအဝင် (၆၀၀၀၀၀) ကျပ်ခန့် ကုန်ကျကြောင်း၊ ယခင်နှစ်အထွက်နှုန်း အနေဖြင့် တစ်ဧကလျှင် (၈၀)တင်းခန့် ထွက်ရှိကြောင်း၊ မြင်းခြံဒေသသည် ဆန်လိုဒေသဖြစ်၍ ဒေသတွင်း စားသုံးရန်အတွက်သာ ကြိတ်ခွဲရောင်းချကြကြောင်း၊ စပါးစိုက်ပျိုးမှု နည်းသောကြောင့် စပါးအရောင်း အဝယ်အနေဖြင့် ဈေးကွက်မရှိကြောင်း၊ ယခင်နှစ် မနောသုခမိုးစပါး တစ်တင်းခွဲ တစ်အိတ် လျှင်(၃၀၀၀၀)ကျပ်ခန့် ပေါက်ဈေးရှိကြောင်း၊ ယခင်နှစ်မနောသုခဆန် တစ်တင်ခွဲ တစ်အိတ်လျှင် (၆၅၀၀၀-၇၀၀၀၀) ကျပ်ခန့် ပေါက်ဈေးရှိ၍ ထွက်ရှိသောစပါးများကို ဒေသတွင်း စားသုံးရန်နှင့် တိရစ္ဆာန်အစာအဖြစ် အသုံးပြုကြ ကြောင်း၊ မြင်းခြံမြို့နယ်၏ လူဦး‌ရေအရ လိုအပ်သော ဆန်ချောများကို မန္တလေးမြို့၊ ပုသိမ်မြို့၊ မြောင်းမြမြို့နှင့် စလင်းမြို့ တို့မှစားသုံးရန် ဝယ်ယူရ ကြောင်း၊  ယခုနှစ်သည် မိုးများစွာရွာသွန်းသဖြင့် မိုးစပါးများ အထွက်နှုန်းကောင်းနိုင်ကြောင်း၊ အကျိုးအမြတ်လည်း ရနိုင်ကြောင်း ဖက်ပင်အိုင်ရွာမှ မိုးစပါးစိုက် တောင်သူတစ်ဦး၏ ပြောကြားချက် အရသိရှိရပါသည်။

DOCA(မန္တလေး)

တိုင်းဒေသကြီး/ပြည်နယ် မြို့နယ်များအလိုက် ၆-၁၀ -၂၀၂၆ ရက်နေ့တွင် ဖြစ်ပေါ်လျက်ရှိသော ဆန်၊ ဆီ၊ မီးဖိုချောင်သုံးပစ္စည်းများ၊ သားငါးနှင့် ဥ‌ဈေးနှုန်းများကို ပူးတွဲပါ ဖိုင်တွင် ကြည့်ရှုနိုင်ပါသည်-

          မွန်ပြည်နယ်၊ ကျိုက်ထိုမြို့နယ်အတွင်း ငါးခြောက်ဈေးကွက်မှာ လက်ရှိကာလတွင် စားသုံးသူများ၏ ဝယ်လိုအားနှင့် ကုန်ပစ္စည်းဝင်ရောက်မှုအခြေအနေများအပေါ်မူတည်၍ အရောင်းအဝယ်ပုံမှန်ဖြစ်လျက်ရှိကြောင်း သိရသည်။ ဈေးကွက်အတွင်း ငါးခြောက်အမျိုး အစား၊ အရွယ်အစား၊ အရည်အသွေးနှင့် ထုတ်လုပ်သည့်ဒေသအလိုက် ဈေးနှုန်းများကွာခြားမှု ရှိပြီး ငါးခြောက်အမျိုးအစားအချို့မှာ စားသုံးသူဝယ်လိုအား ကောင်းမွန်သဖြင့် အရောင်း အဝယ်ဖြစ်လျက်ရှိကြောင်း သိရသည်။

          လက်ရှိတွင် ငါးခြောက်ဈေးနှုန်းများအနေဖြင့် ငါးရံ့ခြောက်၊ ငါးပုတ်သင်ခြောက်၊ ငါးနီတူခြောက်၊ ငါးပိဿာခြောက်နှင့်အခြားငါးခြောက်များမှာ အရည်အသွေးနှင့် အရွယ်အစား အပေါ်မူတည်၍ ဈေးနှုန်းကွားခြားလျက်ရှိသည်။ ကုန်ကြမ်းငါးရရှိမှု၊ ငါးခြောက်ထုတ်လုပ်မှု စရိတ်နှင့် သယ်ယူပို့ဆောင်ရေးစရိတ်များသည် ဈေးနှုန်းအပေါ် သက်ရောက်မှုရှိလျက်ရှိ ကြောင်း သိရသည်။ ထို့အပြင် ရာသီဥတုအခြေအနေကြောင့် ငါးဖမ်းဆီးရရှိမှု လျော့နည်းခြင်း သို့မဟုတ် တိုးလာခြင်းများ ဖြစ်ပေါ်ပါက ငါးခြောက်ကုန်ကြမ်းရရှိမှုနှင့် ဈေးနှုန်းများအပေါ် သက်ရောက်နိုင်ကြောင်း သိရသည်။

          ငါးခြောက်ဈေးနှုန်းများသည် ကုန်ပစ္စည်းဝင်ရောက်မှု၊ စားသုံးသူဝယ်လိုအားနှင့် ထုတ်လုပ်မှု ကုန်ကျစရိတ်များအပေါ် မူတည်၍ လာမည့်ကာလတွင် အတက်အကျရှိနိုင်သော် လည်း လက်ရှိတွင် ဈေးကွက်အတွင်း အရောင်းအဝယ်ပုံမှန် ဆက်လက်ဖြစ်ပေါ်လျက်ရှိ ကြောင်း သိရသည်။ ယခုအချိန်တွင် ငါးနီတူခြောက် တစ်ပိဿာလျှင် ကျပ် (၅၀၀၀၀) ဝန်းကျင်ရှိနေပြီး၊ ငါးရံ့ခြောက် တစ်ပိဿာလျှင် ကျပ် (၇၀၀၀၀) ဝန်းကျင်ရှိနေပြီး၊ အာဗြဲခြောက် တစ်ပိဿာလျှင် ကျပ် (၇၅၀၀၀) ခန့်ရှိကြောင်း သိရသည်။

DOCA (မွန်)

       တနင်္သာရီတိုင်းဒေသကြီး၊ မြိတ်ခရိုင်အတွင်းရှိ တောင်သူဦးကြီးများသည် မိသားစုစားဝတ်နေရေးအတွက် ရာသီအလိုက်သီးနှံမျိုးစုံ စိုက်ပျိုးကြပါသည်။ ကန်စွန်း၊ ချဥ်ပေါင်၊ငရုတ်သီး၊ ဘူးသီး၊ ခရမ်းသီး၊ ပဲသီး အစရှိသည့် သီးနှံများလည်း စိုက်ပျိုးကြပါသည်။ ၎င်းသီးနှံများအပြင် စီးပွားဖြစ်ဝင် ငွေတိုးသော ကန်စွန်းပင် ဟင်းသီးဟင်းရွက်ပင်များကိုလည်း စိုက်ပျိုးလာကြပါကြောင်း၊ ကန်စွန်းရွက်စိုက်ပျိုးရာတွင် ဘောင်များပြုလုပ်၍ တိုက်ရိုက်အစေ့ချစနစ်ဖြင့် စိုက်ပျိုးကြကြောင်း သိရှိရပါသည်။ ကန်စွန်းစိုက်ပျိုးပြီး (၃)ပတ်မှ (၄)ပတ်သားအချိန်တွင် ကန်စွန်းရွက်များ စတင်ခူးဆွတ်ရောင်းချရကြောင်းလည်း သိရှိရပါသည်။ ကန်စွန်းရွက်များကို ကုန်သည်ပွဲစားများအနေဖြင့် ကန်စွန်းစိုက်ခင်းအထိ လာရောက်ဝယ်ယူကြပြီး အမြို့မြို့အနယ်နယ်ရှိ ဈေးများသို့ ပြန်လည်ရောင်းချကြောင်း သိရှိရပါသည်။ ကန်စွန်းရွက်သည် အာဟာရဓာတ်ကြွယ်ဝတဲ့ ဟင်းရွက်ဖြစ်ပါကြောင်း၊ ကန်စွန်းရွက်တွင် ဗီတာမင်အေ၊ ဗီတာမင် B1၊ ဗီတာမင်စီ၊ ဗီတာမင်ကေ၊ ပရိုတင်းဓာတ်၊ ကယ်လ်စီယမ်၊ ဖော့စ်ဖရပ်စ်၊ သံဓာတ်၊ ကယ်ရိုတင်းဓါတ်၊ ဆိုဒီယမ်စတဲ့ အာဟာရဓာတ်တွေများစွာ ပါဝင်သောကြောင့် ကျန်းမာရေးအတွက် အကျိူးများစေသည့် အရွက် တစ်မျိုးဖြစ်ပါကြောင်း၊ ကန်စွန်းရွက်တွင်ပါဝင်သည့်  ဗီတာမင်အေသည် မျက်လုံးကျန်းမာရေးအတွက် အထောက်အကူပေးပြီး အချိန်ကြာမြင့်စွာ မျက်လုံးအသုံးပြုနေရသူများ ကွန်ပျူတာနှင့် အလုပ်လုပ်နေရသူများအနေဖြင့် အမြဲတမ်းစားသုံးပေးသင့်ပါကြောင်း၊ ကန်စွန်းရွက်သည် မြန်မာလူမျိုးတို့၏ ထမင်းပွဲတွင် မပါမဖြစ် ဟင်းတစ်ခွက်ဖြစ်ကြောင်း စားသုံးသူများထံမှသိရှိရပြီး ကန်စွန်းရွက်စိုက်ပျိုးခြင်းအားဖြင့် စီးပွားလည်းဖြစ်ဝင်ငွေလည်းတိုးကြောင်း ကန်စွန်းပင်စိုက်ပျိုးသော တောင်သူဦးကြီးများထံမှ သိရှိရပါသည်။

          ၂၀၂၆ခုနှစ်၊ စက်တင်ဘာလနောက်ဆုံးပတ်တွင် မြိတ်မြို့ပေါ်ရှိဈေးများတွင် ရောင်းချနေသော ကန်စွန်းရွက်ဈေးနှုန်းမှာ တစ်စည်းလျှင် (၈၀၀)ခန့်ကျပ်ရှိကြောင်း သိရှိရပါသည်။

DOCA(တနင်္သာရီ)