ပြည်တွင်းကုန်သွယ်မှုသတင်း

    တောင်သာမြို့နယ်သည် ဆည်မြောင်းကန်ချောင်းများ အသင့်အတင့်ရှိ၍ ဆောင်းသီးနှံများကိုလည်း စိုက်ပျိုးထားရှိသည်။ ဆောင်းမြေပဲသီးနှံကို အောက်တိုဘာလ၊ နိုဝင်ဘာလနှင့် ဒီဇင်ဘာလတို့၌ စိုက်ပျိုးကြပြီး ဖေဖော်ဝါရီလ၊ မတ်လနှင့် ဧပြီလတို့တွင်ရိတ်သိမ်းထွက်ပေါ်ကြောင်း သိရှိရသည်။

    တောင်သာမြို့နယ်သည် ပြည်တွင်းစားသုံးဆီဖူလုံစေရေးအတွက် ၂၀၂၅-၂၀၂၆ ခုနှစ်၌ ဆောင်းမြေပဲသီးနှံကို စိုက်ပျိုးဧက(၉၂၈၉) ဧကစိုက်ပျိုးထားကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရသိရှိရသည်။ ဆောင်းမြေပဲစိုက်ပျိုးထားရှိသော ကျေးရွာများမှာ ကျောဇီရွာ၊ ဆီမီးကန်ရွာ၊ ရုံးတောရွာ၊ မင်းစုရွာနှင့် ရသစ်ကျေးရွာတို့တွင် စိုက်ပျိုးထားကြောင်း၊  စိုက်ပျိုးချိန်မှ ရိတ်သိမ်းချိန်အထိ (၄) လခန့်ကြာမြင့်ကြောင်း၊ ပင်ထောင်မျိုးနှင့် ပင်ပြန့်မျိုးများကို စိုက်ပျိုးထားရှိကြောင်း၊ မျိုး၊ သွင်းအားစု၊ လုပ်သားခအပါအဝင် (၇၅၀၀၀၀/-) ကျပ်ခန့် ကုန်ကျကြောင်း၊ ယခင်နှစ်အထွက်နှုန်းအနေဖြင့် တစ်ဧကလျှင် (၅၅-၅၆)တင်းခန့် ထွက်ရှိကြောင်း၊ ယခင်နှစ်ထွက်ပေါ်ချိန်၌ မြေပဲဆံတစ်တင်းလျှင် (၁၀၉၀၀၀) ကျပ်ခန့်ရရှိခဲ့ကြောင်း၊ ယခုနှစ် တွင်ဆောင်းမြေပဲများ ရာသီဥတုကောင်းမွန်ပြီး ရေသွင်းရေထုတ်၊ အပင်ပြုစုမှုနှင့် မြေဩဇာ များပုံမှန်ကျွေးနိုင်ပါက မြေပဲများအထွက်နှုန်း ကောင်းနိုင်မည်ဖြစ်ကြောင်း၊ ထွက်ပေါ်ချိန်တွင် ဈေးနှုန်းများကောင်းပါက တောင်သူများအနေဖြင့် အကျိုး အမြတ်များ ပိုမိုရရှိနိုင်မည်ဖြစ်ကြောင်း မင်းစုရွာမှ မြေပဲစိုက်တောင်သူတစ်ဦး၏ ပြောကြားချက်အရသိရသည်။

DOCA(မန္တလေး)

   မိတ္ထီလာခရိုင်၊ မလှိုင်မြို့နယ် အနေဖြင့် ခရိုင်အတွင်း ပဲစင်းငုံအများဆုံးစိုက်ပျိုးထွက်ရှိသော ဒေသဖြစ်ပြီး ယခုနှစ် စိုက်ဧကမှာ (၇၁၃၀၅)ဧကဖြစ်ကြောင်း သက်ဆိုင်ရာဌာနမှ သိရှိရပါသည်။ ယခုအခါ ပဲစင်းငုံများ လှိုင်လှိုင်ထွက်ပေါ်နေပြီဖြစ်ရာ ယခုတစ်ပတ်တွင် ပဲစင်းငုံတစ်တင်း လျှင်(၁၀၀၀၀၀)ကျပ်ဖြင့် ပွဲရုံများမှဝယ်လျှက်ရှိကြောင်း ယခင်ဈေးထက်အနည်းငယ်မြင့်တက်လာ ကြောင်း တစ်နေ့လျှင်တစ်တင်းခွဲအိတ်(၁၀၀၀ မှ ၁၅၀၀)ကြား အရောင်းအဝယ်ဖြစ်လျှက်ရှိပြီး ပဲစင်းငုံကို ရန်ကုန်သို့တင်ပို့ရောင်းချရာ ယခုတစ်ပတ်အတွင်း မြို့ပေါ်ပွဲရုံများတင်ပို့ရောင်းချ ခြင်းမရှိဘဲ တက်ဈေးမျှော်နေကြောင်းသိရသည်။

     ထောပတ်ပဲဈေးကွက်အနေဖြင့် ယခင်တစ်ပတ်က တစ်တင်းလျှင် (၇၂၀၀၀)ကျပ်ဖြင့် အရောင်း အဝယ်ဖြစ်လျှက်ရှိရာ ယခုတစ်ပတ်မှာတော့ (၆၅၀၀၀)ကျပ်ဖြစ်ပြီး အထွက်ပါးသွားပြီး ရာသီကုန်ချိန်ဖြစ်သလို အဝင်လမ်းနည်းပါးကြောင်း တစ်ရက်လျှင် အိတ်(၅၀)ခန့်သာ အရောင်းအဝယ်ဖြစ်ကြောင်းသိရသည်။      

DOCA(မန္တလေး)  

    မိတ္ထီလာဈေးကွက်၌ ဖေဖော်ဝါရီလဆန်းတွင် အာလူးဈေးများကျဆင်းလာကြောင်းသိရသည်။ ဒေသတွင်းစိုက်ပျိုးမှုမရှိသော အာလူးကို ရှမ်းပြည်နယ်တောင်ပိုင်းရှိ တောင်ကြီး၊ အောင်ပန်းတို့မှ တင်သွင်းရပါသည်။ ဝယ်ရင်းဈေးမြင့်လာခြင်းကြောင့် ဒီဇင်ဘာလလယ်ခန့်မှစ၍ ဈေးမြင့်လာသော အာလူးဈေးမှာ ဇန်နဝါရီလဆန်းတွင်အနည်းငယ်ကျဆင်းလာပြီဖြစ်ကြောင်း သိရသည်။ တစ်ပိဿာရောင်းဈေးတွင်ဒီဇင်ဘာလဆန်းတွင် (၄၀၀၀) ကျပ်ရှိခဲ့ရာမှ လလယ်တွင် (၅၀၀၀) ကျပ်သို့ မြင့်တက်လာပြီး လကုန်ပိုင်းမှစ၍ ဇန်နဝါရီလကုန်အထိ (၅၅၀၀) အထိဈေးကောင်းနေခဲ့ပါသည်။ ဖေဖော်ဝါရီလဆန်းတွင် တစ်ပိဿာ (၅၀၀၀) ကျပ်သို့ အနည်းငယ်ပြန်လည်ကျဆင်းလာခြင်းမှာ ဆောင်းသီးနှံအဖြစ် အစိုက်များသော အာလူးများ ရိတ်သိမ်းရာသီဖြစ်ကြောင်းဟုသိရသည်။ အာလူးကြော်ကို စီးပွားဖြစ်ထုတ်လုပ်ရောင်းချမှုအပြင် နေ့စဉ်စားသုံးသူများ၏ ဝယ်လိုအားရှိသည့်အတွက် ဈေးကွက်အတွင်း ရောင်းအားပုံမှန်ရှိကြောင်းသိရှိရသည်။

DOCA(မန္တလေး)

    ပဲမြစ်သည် နွယ်ပင်တစ်မျိုးဖြစ်ပြီး ပဲစောင်းလျားသီးအပင်မှ အမြစ်ဖြစ်သည်။ ပဲမြစ်ကို နေရာဒေသအနှံအပြားတွင်စိုက်ပျိုးကြသည်။ ပဲမြစ်သည် ဆောင်းရာသီတွင်ပေါ်လေ့ရှိပြီး မိတ္ထီလာဈေး ကွက်သို့ ကျောက်ဆည်နယ်ဘက်မှဝင်ရောက်လျှက်ရှိပါသည်။ ပဲမြစ်ကို ရာသီစာအဖြစ်ပြုတ်၍ ဆီ/ဆားတို့ နှင့်တို့စားခြင်း ၊ ထောင်း၍ မြေပဲထောင်း ၊ နှမ်းထောင်းတို့နှင့် စားသုံးကြပါသည်။ မိတ္ထီလာဈေးကွက်အတွင် ဈေးနှုူန်းအနေဖြင့် ဖေဖော်ဝါရီလပထမပတ်တွင် ပဲမြစ်လက်ကား ဈေးတစ်ပိဿာလျှင်(၂၅၀၀-၃၀၀၀) ကျပ်နှင့် လက်လီတစ်ပိဿာလျှင် (၃၀၀၀-၄၀၀၀)ကျပ်နှုန်းတို့ဖြင့် အရောင်းအဝယ်ဖြစ်လျှက်ရှိကြောင်းပဲမြစ်အရောင်းဆိုင်များမှသိရပါသည်။

DOCA(မန္တလေး)

     မိတ္ထီလာမြို့ရှိ သီးနှံပွဲရုံများတွင် အရောင်းအဝယ်သွက်သော ပဲစင်းငုံသီးနှံမှာ ဖေဖော်ဝါရီလဆန်းတွင် ဈေးအနည်းငယ်ပြန်လည်ကျဆင်းလာကြောင်းသိရသည်။ ဒီဇင်ဘာလနှောင်းပိုင်းမှစ၍ ဈေးကွက်ဝင်ရောက်လာသော ပဲစင်းငုံသီးနှံပေါ်စက တစ်တင်းလျင် (၈၈၀၀၀/)ကျပ်ဝန်းကျင် ဈေးရှိ ခဲ့ကြောင်း သိရသည်။ ဇန်နဝါရီလတွင် ဈေးကွက်အဝင်လှိုင်လာရာ တစ်တင်းလျင်(၉၂၀၀၀/)ကျပ် မှ စ၍ တဖြေး ဖြေးမြင့်တက်လာရာ လကုန်ပိုင်းတွင် (၁၀၃၀၀၀/)ကျပ်ထိဈေးမြင့်လာခြင်းကြောင့် တောင်သူများ စိတ်ကျေနပ်မှုရခဲ့သော်လည်း ဖေဖော်ဝါရီလဆန်းတွင် (၉၈၀၀၀/)ကျပ်သို့ ပြန်လည် ကျဆင်းသွားကြောင်း သိရသည်။သို့သော်လည်း သီးနှံပေါ်စနှင့် နှိုင်းယှဉ်လျင် ဈေးကောင်းနေဆဲ ဖြစ်ပြီး ဈေးကွက်အဝင်များ ကြောင်းသီးနှံပွဲရုံများမှသိရသည်။ မိတ္ထီလာမြို့ရှိ သီးနှံပွဲရုံများသို့ ကျေးရွာများရှိ ပဲစင်းငုံစိုက်တောင်သူများက ကိုယ်တိုင်လာရောက်ရောင်းချမှုများပြီး မိတ္ထီလာ ဈေးကွက်မှ ရန်ကုန်သို့ တင်ပို့ကြောင်းသိရ သည်။

DOCA(မန္တလေး)