ပြည်တွင်းကုန်သွယ်မှုသတင်း

         မအူပင်မြို့နယ်အတွင်းရှိ ကျေးရွာများတွင် စိုက်ပျိုးရေးလုပ်ငန်းများကို လုပ်ကိုင်လျက်ရှိရာ မိုးတွင်းကာလတွင် ဟင်းသီးဟင်းရွက်ကို ပိုမိုစိုက်ပျိုးပြီး စားဖိုဆောင်သီးနှံဖြစ်သည့် ပဲတောင့်ရှည်သီး၊ ချဉ်ပေါင်ရွက်၊ ရုံးပတီသီး၊ သခွားသီး၊ ခရမ်းသီးနှင့်ကန်ဇွန်းရွက်၊ ချဉ်ပေါင်ရွက်၊ သင်္ဘောသီး၊ ကန်ပွန်းချဉ်ရွက်၊ ဆူးပုတ်ရွက်၊ ဖလန်တောင်ဝှေး၊ စသည်အပင်များကို စိုက်ပျိုးလျက်ရှိသည့်အနက် ချဥ်ပေါင်ရွက်ကို တစ်ပိုင်တစ်နိုင် စိုက်ပျိုးလျက်ရှိပြီး၊  မအူပင်မြို့၊ အခွန်လွတ်ဈေးတွင် အရောင်းအဝယ်ဖြစ်လျက်ရှိကြောင်း သိရရှိသည်။

         ချဉ်ပေါင်ရွက်သည် ရာသီမရွေး ပေါများစွာ စိုက်ပျိုးထွက်ရှိနိုင်သော အရွက်တစ်မျိုးဖြစ်သည်။  မိုးရာသီတွင်သာ ဟင်းရွက်ဈေးနှုန်း ပေါများလှပြီး ချဉ်ပေါင်ရွက်ကို  အိမ်ရှင်မများ နေ့စဉ်ချက်ပြုတ်စားသောက်ကြသည်။   ၂၀၂၆ ခုနှစ်၊ မေလ ပထမပတ်အတွင်း အခွန်လွတ်ဈေး၊ ၃လမ်းဈေးများတွင် ဖြစ်ပေါ်နေသော ချဉ်ပေါင်ရွက် ဈေးနှုန်းများမှာ ချဉ်ပေါင်ရွက် လက္ကားဈေး အစီး၁၀၀ လျှင်(၈၀၀၀)ကျပ်၊ ချဉ်ပေါင်ရွက် လက်လီဈေး ၁စီးလျှင် (၁၀၀)ကျပ်၊ ဈေးနှုန်းတို့ဖြင့်လည်းကောင်း  ‌အရောင်းအဝယ် ဖြစ်လျက်ရှိကြောင်း သိရသည်။ ချဉ်ပေါင်ပင် စိုက်ပျိုးပါကလည်း ကုန်ကျစရိတ်နည်းပါးပြီး တစ်ဧကလျှင် ၄ သိန်းခန့်ကုန်ကျပြီး အထွက်နှုန်းအနေဖြင့် ချဉ်ပေါင် အစီးရေ ၆၀၀၀-၈၀၀၀ နီးပါးထွက်ရှိကြောင်း၊ စိုက်ပျိုးပြီး ၄၅ရက်- ၆၀ရက်အတွင်း ဈေးကွက်တင်ပို့နိုင်ကြောင်း ဈေးနှုန်းအတက်အကျပေါ်မူတည်၍ အကျိုးအမြတ်ကျန်ရှိကြောင်း၊ ယနေ့ဈေးဖြင့် အမြတ် ၂၄၀၀၀၀ကျပ်မှ ၃၀၀၀၀၀ ကျပ် နီးပါးခန့် ရရှိကြောင်းနှင့် ရန်ကုန်သို့လည်း စီးပွားဖြစ်စိုက်ပျိုး တင်ပို့သူများရှိကြောင်း ကို ကုန်စိမ်းရောင်းချသူထံမှ သိရှိရပါသည်။

DOCA(ဧရာဝတီ)

         စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ်အတွင်းရှိ လိတ္ထူ‌ကျေးရွာ၊ နတ်ပေးကျေးရွာနှင့် အခြားကျေးရွာများတွင် ၂၀၂၆ ခုနှစ် မိုးရာသီ ဧပြီလကုန် ဇွန်လအစပိုင်းမှစ၍ ဆီထွက်သီးနှံဖြစ်သော မိုးမြေပဲများကို တောင်သူများ စတင်စိုက်ပျိုးလျက်ရှိကြောင်း သိရသည်။

       ကန့်ဘလူမြို့နယ်သည် စိုက်ပျိုးရေးကို အဓိကထားလုပ်ကိုင်သည့် ဒေသတစ်ခုဖြစ်ပြီး နှမ်း၊ နေကြာ၊ မြေပဲစသည့် ဆီထွက်သီးနှံများကို နှစ်စဉ်စိုက်ပျိုးလျက်ရှိရာ ယခုနှစ်တွင်လည်း မိုးရွာသွန်းမှု စတင်ကောင်းမွန်လာသဖြင့် တောင်သူများက မိုးမြေပဲစိုက်ပျိုးရေးလုပ်ငန်းများကို အချိန်မီဆောင်ရွက်နေကြခြင်းဖြစ်ကြောင်း သိရသည်။

       ဒေသခံတောင်သူများ၏ ပြောကြားချက်အရ မိုးမြေပဲစိုက်ပျိုးရာတွင် မျိုးစေ့၊ မြေယာပြင်ဆင်ခ၊ လုပ်သားခ၊ မြေဩဇာနှင့် စိုက်ပျိုးထိန်းသိမ်းစရိတ်များအပါအဝင် တစ်ဧကလျှင် ခန့်မှန်းကုန်ကျစရိတ် ကျပ် ၆၀၀,၀၀၀ မှ ၈၀၀,၀၀၀ ဝန်းကျင်အထိ ကုန်ကျနိုင်ကြောင်း သိရသည်။ မြေပဲဈေးကွက် ကောင်းမွန်ပါက တောင်သူများအတွက် အကျိုးအမြတ်ရရှိနိုင်သည့် သီးနှံတစ်မျိုးဖြစ်ကြောင်းလည်း သိရသည်။ “ဒီနှစ် မိုးဝင်ချိန်ကောင်းတော့ မြေပဲစိုက်ဖို့ အဆင်ပြေတယ်။ မျိုးစေ့နဲ့ လုပ်သားခတွေတော့ တက်နေတယ်။ ဒါပေမယ့် ဈေးကောင်းရရင် တွက်ခြေကိုက်မယ်လို့ မျှော်လင့် ထားပါတယ်” ဟု ဒေသခံတောင်သူတစ်ဦးက ပြောကြားကြောင်း သိရသည်။

     ကန့်ဘလူမြို့နယ်တွင် စိုက်ပျိုးရေးလုပ်ငန်းများ ဖွံ့ဖြိုးတိုးတက်လာစေရန်နှင့် တောင်သူများ ဝင်ငွေတိုးတက်လာစေရန်အတွက် သက်ဆိုင်ရာဌာနများမှ နည်းပညာပံ့ပိုးမှုများနှင့် စိုက်ပျိုးရေး အသိပညာပေးလုပ်ငန်းများကို ဆောင်ရွက်လျက်ရှိကြောင်း သိရှိရပါသည်။

DOCA(စစ်ကိုင်း)

    မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့နယ်အတွင်းရှိ အင်းတော၊ ရှားတော၊ ထန်းတပင်၊ သရက်တော ကျေးရွာများမှာ ရာသီအလိုက်သီးနှံများ စိုက်ပျိုးလျက်ရှိပြီး  ကြက်သွန်နီကို အဓိကအား ထားစိုက်ပျိုးကြပါသည်။ ပေါက်မြို့နယ်တွင် ကြက်သွန်နီ စိုက်ဧက (၁၈၀၀) ရှိကြောင်း မြို့နယ် စိုက်ပျိုးရေးဦးစီးဌာနမှ သိရှိရပါသည်။ ကြက်သွန်နီကို ပင်စိုက် နှင့် ဥစိုက်ဟူ၍ နှစ်မျိုး စိုက်ပျိုးကြပြီး ပင်စိုက်မှာ ပြာသိုလတွင် စိုက်ပျိုး၍ တန်ခူးလတွင် ရိတ်သိမ်းကြောင်း၊ ဥစိုက်မှာ တန်ဆောင်မုန်းလတွင် စိုက်ပြီး တပိုတွဲလတွင် ရိတ်သိမ်းပါသည်။ တစ်ဧကလျှင် ကုန်ကျစရိတ် ကျပ် သိန်း(၁၀၀)ခန့် ကုန်ကျပြီး အထွက်နှုန်းမှာ  ပိဿာချိန်(၅၀၀၀)ခန့် ထွက်ရှိပါသည်။

    ယခု ၂၀၂၆ ခုနှစ်၊ မေလ( ဒုတိယပတ်)တွင် ကြက်သွန်နီဈေးနှုန်းမှာ တစ်ပိဿာလျှင် ကျပ် (၃၀၀ဝ ဈေးဖြင့်ရောင်းချရပြီး တောင်သူတစ်ဦး၏ အသားတင်အကျိုးအမြတ်မှာ ကျပ် သိန်း(၅၀)ခန့်ကျန်ရှိ ကြောင်း၊ ဈေးကွက်အနေဖြင့် လက်ရှိ နယ်မြေအခက်အခဲအရ အနီးပတ်ဝန်းကျင်ရှိ ကျေးရွာများမှ ပေါက်မြို့၊ မြို့မဈေးသို့ လာရောက်ရောင်းချပြီး အနောက်ဘက်ခြမ်းရှိ ကျေးရွာများမှာ ပခုက္ကူမြို့သို့ သွားရောက်ရောင်းချကြောင်း၊ ကုန်ကျစရိတ်မြင့်မားသော်လည်း တွက်ခြေကိုက်မှုရှိကြောင်း၊  ကြက်သွန် နီစိုက်တောင်သူများထံမှ သိရှိရပါသည်။

DOCA(မကွေး)

    မွန်ပြည်နယ်၊ ပေါင်မြို့နယ်တွင် ဒေသထွက် ရာသီစာမင်းဂွတ်သီးများ ယခုနှစ် ပေါ်ဦးပေါ်ဖျားချိန်ကတည်းက စျေးကောင်းရရှိနေတာကြောင့် ခြံပိုင်ရှင်များ အဆင်ပြေကြ တယ်လို့ အရောင်းဒိုင်များထံမှ သိရသည်။

    ပေါင်မြို့နယ်ထွက်အအေးဓာတ်စာမင်းဂွတ်သီးများမှာ စျေးကွက်အတွင်း ဝယ်ယူ စားသုံးသူ များပြားနေတာကြောင့် စတင်ခူးဆွတ်ချိန်မှ ယနေ့အထိ စျေးကောင်းရရှိ နေဆဲဖြစ်တယ်လို့ ပေါင်မြို့နယ်မှ မင်းဂွတ်ရောင်းဝယ်ရေးဒိုင်တစ်ဦးက ပြောသည်။

    "ဒီနှစ် စခူးတဲ့အချိန်ကတည်းက စျေးကောင်းရတယ်၊ အခုချိန်ထိလို့ပြောလို့ရတယ်၊ စျေးကွက်မှာလည်း အရောင်းအဝယ်ရှိတော့ ဒီဘက်ဒေသထွက်မင်းဂွတ်ကို ရသလောက်ပွဲရုံက ယူနေတယ်။ အခုက ရာသီဥတု အရမ်းပူတယ်လေ၊ မင်းဂွတ်က အအေးဓာတ်စာဆိုတော့ ဝယ်စားကြတာလဲပါတယ်။ ဒီနှစ်က ခြံပိုင်ရှင်တွေအတွက် အဆင်ပြေတဲ့နှစ်လို့ပဲ ပြောရမယ်" ဟု ၎င်းက ပြောသည်။

    ယခုနှစ် မင်းဂွတ်သီးပေါ်ဦးပေါ်ဖျားချိန် အလုံးကြီးတစ်လုံးကို ငွေကျပ် (၇၀၀) ဝန်းကျင်ခန့်နှင့် ပုံမှန်အလုံးတစ်လုံးကို (၅၀၀) ကျပ်ခန့် စျေးကွက်အတွင်းပေါက်စျေးရှိခဲ့ပြီး လက်ရှိစျေးမှာ (၄၀၀) ကျပ်ဝန်းကျင်ခန့်သာ လျော့ကျသွားတယ်လို့ ၎င်းက ဆက်ပြော သည်။

   ရာသီစာမင်းဂွတ်ကို မွန်ပြည်နယ်ရှိ မြို့နယ်အများစုတွင် စိုက်ပျိုးကြပြီး ထွက်ရှိသော မင်းဂွတ်သီးများကို ဒေသတွင်းစားသုံးရောင်းချမှုများအပြင် အလုံး (၁၅၀)ပါ ပလတ်စတစ် ကဒ်ဖာခြင်းများဖြင့် ထုတ်ပိုးကာ ရန်ကုန်ပွဲရုံနှင့် မန္တလေးတို့ကို အဓိကတင်ပို့ရောင်းချ ကြောင်း ပေါင်မြို့နယ်အရောင်းဒိုင်များမှ သိရသည်။

    ဒေသထွက် မင်းဂွတ်သီးကို တောင်ပေါ်သီးနှင့် ရွာသီးဟု ဒေသအတွင်း ခွဲခြားထားပြီး တောင်ပေါ်သီးမှာ ရွာသီးထက် အလုံးပိုကြီးသော်လည်း အခွံထူကာ အချဉ်ဓါတ်နည်းနည်း ဖောက်ပြီး ရွာသီးမှာအခွံပါးကာပိုချိုပြီး စျေးနှုန်းအတူတူပင်ဖြစ်ကြောင်း မင်းဂွတ်ခြံပိုင်ရှင် များထံမှ သိရသည်။

    ဒါအပြင် ယခုလို ပူပြင်းတဲ့ကာလမှာ အပူဓါတ်ကိုသက်ရောက်စေသည့် ဒူးရင်းသီးကို စားသုံးပါက ဆန့်ကျင်ဘက် အအေးဓာတ်စာ မင်းဂွတ်သီးနှင့် တွဲဖက် စားသုံးသင့်တယ်လို့ ခြံပိုင်ရှင်များမှ အကြံပြုပြောဆိုခဲ့သည်။

DOCA (မွန်)

          ကရင်ပြည်နယ်အတွင်းရှိ စိုက်ပျိုးရေးဦးစီးဌာန၏ စာရင်းများအရ (၂၀၂၆ ခုနှစ်) စိုက်ပျိုးရာသီ အတွက် ရာဘာစိုက်ဧကမှာ (၂၇၁၃၀၆) ဖြစ်ပြီး ရာဘာရိတ်သိမ်းဧကမှာ (၂၆၁၁၅၉)ဖြစ်ကာ ရာဘာ အထွက်နှုန်းမှာတော့ (၅၇၅ ၄၇) ပေါင် တို့ဖြစ်ကြောင်း သိရသည်။

          ရာဘာစိုက်ပျိုးတောင်သူများအနေဖြင့် ရာဘာစေးများကို အောက်တိုဘာလမှစတင်၍ မိုးမကျမီ မေလဆန်းအထိ အစေးခြစ်ကြောင်း၊ ရာဘာအစေးကို ည ၁၁:00 နာရီမှနံနက် ၅း၀၀ နာရီအချိန် အထိ အစေးခြစ်ယူပြီး ရရှိလာသော ရာဘာစေးကို အက်စစ်နှင့်အအေးခံကာ ခွက်နှင့် ပုံသွင်း၍ စက်ဖြင့်ကြိတ်ကာ ၃ ပေါင်ခွဲ ၄ ပေါင်ခန့် ရှိသော ရာဘာများကို ၄/၅ ရက်ခန့် နေလှန်းပြီး ဈေးကွက်သို့ တင်ပို့ရောင်းချလျက်ရှိကြောင်း ၊ ဈေးကွက်တွင် ရာဘာကို Grade 1,2,3,ခွဲကာ ရောင်းချပြီး ကရင်ပြည်နယ်ဒေသအသီးသီးမှထွက်ရှိသော ရာဘာကုန်ကြမ်းများကို ဘားအံမြို့ပေါ် ရှိ အဝယ်ဒိုင်များသို့ ရောင်းချလျက်ရှိပြီး ဘားအံမြို့ရှိအဝယ်ဒိုင်များမှ ရန်ကုန်ရှိ ကုမ္ပဏီများသို့ တင်ပို့ရောင်းချလျက်ရှိကြောင်းနှင့် အစေးစတင်ခြစ်သောအချိန် အောက်တိုဘာလတွင် ရာဘာ တစ်ပေါင်ဈေးနှုန်းမှာ (၂၈၀၀)ကျပ်နှင့်မေလတတိယပတ်တွင် ရာဘာတစ်ပေါင်ဈေးနှုန်းမှာ (၃၂၀၀) ကျပ်အထိ ဈေးပိုရကာ ရာဘာစိုက်တောင်သူများအတွက် အကျိုးအမြတ်ပိုရရှိကြောင်း ရာဘာစိုက် တောင်သူများထံမှ သိရသည်။

DOCA(ကရင်)