သတင်းနှင့် လှုပ်ရှားမှုများ

       မန္တလေးတိုင်းဒေသကြီး၊ ကျောက်ပန်းတောင်းမြို့နယ် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနနှင့် စားသုံးသူရေးရာဦးစီးဌာနတို့ပူးပေါင်း၍ စားသုံးသူကာကွယ်ရေးအကြောင်း သိကောင်း စရာ အသိပညာပေး Talk Show ကို ဖေဖော်ဝါရီလ ၁၀ ရက်နေ့၊ မွန်းလွဲ ၂:၀၀ နာရီက မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန လူထုအခြေပြုဗဟိုဌာနတွင် ကျင်းပပြုလုပ်ခဲ့ ပါသည်။

          အဆိုပါ Talk Show တွင် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာန မြို့နယ်ဦးစီးမှူး ဒေါ်မေသက်နွယ် က စားသုံးသူကာကွယ်ရေးဥပဒေပေါ်ပေါက်လာပုံနှင့် ရည်ရွယ်ချက်များ၊ အခွင့် အရေးများ၊ စားသုံးသူကာကွယ်ရေးဆိုင်ရာ ဥပဒေအကြောင်းအရာများကို မေးမြန်းရာ စားသုံးသူ ရေးရာဦးစီးဌာန မြို့နယ်တာဝန်ခံ ဒေါ်မြသန္တာထွန်း က စားသုံးသူကာကွယ်ရေးဥပဒေကို ၂၀၁၄ ခုနှစ်၊ မတ်လ ၁၄ ရက်နေ့တွင် စတင်ပြဌာန်းခဲ့ကြောင်းနှင့် ၂၀၁၉ ခုနှစ်၊ မတ်လ ၁၅ ရက်နေ့တွင် ပိုမိုပြည့်စုံအောင် ပြန်လည်ပြင်ဆင်ဖြည့်စွက်ပြဌာန်းခဲ့ပါကြောင်း၊ ဥပဒေပြဌာန်းရခြင်း ရည်ရွယ်ချက် များနှင့်စားသုံးသူ၏ အဓိပ္ပာယ်ဖွင့်ဆိုချက်၊ စားသုံးသူအခွင့်အရေး ၈ ချက်တို့ကို အကျယ်တဝင့် ရှင်းလင်းဆွေးနွေးခဲ့ပါသည်။

          စားသုံးသူကာကွယ်ရေးနှင့်စပ်လျဉ်းသည့် အသိပညာပေးခြင်းများကို နည်းလမ်းပေါင်းစုံဖြင့် အသိပညာပေးခြင်းများကို ဆောင်ရွက်လျက်ရှိရာ  လုပ်ငန်းရှင်များအပါအဝင် စားသုံးသူပြည်သူတစ်ရပ်လုံး သိရှိနားလည်ပြီး လုပ်ငန်းရှင်များမှလည်း မိမိတို့ထုတ်လုပ်သော ကုန်စည်များကို ဥပဒေများနှင့် အညီထုတ်လုပ်လာစေခြင်း၊ စားသုံးသူများမှလည်း ကုန်စည်၊ ဝန်ဆောင်မှုများကို ရွေးချယ်ဝယ်ယူ တတ်လာစေခြင်း၊ မိမိတို့၏ အခွင့်အရေးများကို သိရှိနားလည်၍ နစ်နာဆုံးရှုံးမှုများကို အရေးဆို တိုင်ကြားလာနိုင်စေဖြင့် စားသုံးသူကာကွယ်ရေးလုပ်ငန်းများ အောင်မြင်တိုးတက်လာမည်ဖြစ်ပါသည်။ ယခု အသိပညာပေး Talk Show ကို ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှလည်း Facebook စာမျက်နှာနှင့် Telegram Channel, MOI Website တို့တွင် လွှင့်တင်ပေးသွားမည်ဖြစ်ကြောင်း သိရသည်။    

DOCA(မန္တလေး)        

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူး မူဝါဒ(ပြည်တွင်း)ဌာနခွဲ တာဝန်ခံနှင့် ဝန်ထမ်းများအဖွဲ့သည် (၈.၂.၂၀၂၆)ရက်နေ့၊ နံနက်(၁၀:၀၀) နာရီအချိန်တွင် ပခုက္ကူမြို့မဈေးအတွင်းရှိ ဆန်ပွဲရုံများနှင့် လက်လီ/လက်ကားရောင်းချသော ဆန် ရောင်းဝယ်ရေးဆိုင်များသို့ သွားရောက်၍ ကွင်းဆင်းစစ်ဆေး အသိပညာပေးမှုများ ဆောင်ရွက်ခဲ့ ပါသည်။

    ထိုသို့ ကွင်းဆင်းစစ်ဆေးရာတွင် ဆန်ဆိုင်/ပွဲရုံများအား ဈေးနှုန်းမြှင့်တင် မရောင်းချရန်၊ ဈေးကစားရန်အလို့ငှာ ရည်ရွယ်ချက်ဖြင့် သိုလှောင်ထားခြင်းများမပြုလုပ်ရန်၊ သတ်မှတ်ထားသော ဈေးနှုန်းများအား ဗီနိုင်းချိတ်ဆွဲ၍ ရောင်းချရန် အသိပညာပေးဆွေးနွေးခဲ့ပါသည်။  ဆန်ရောင်းချ သူများမှ ဆန်များကို ရောင်းရသလောက်သာ မှာယူရောင်းချကြောင်း၊ အများအပြား သိုလှောင် ထားခြင်း များမရှိကြောင်း၊ ဈေးနှုန်းများကိုလည်း သတ်မှတ်ဈေးနှုန်းများဖြင့် ရောင်းချနေသည်ကို တွေ့ရှိရကြောင်း၊ သက်ဆိုင်ရာဌာနများ၏ ညွှန်ကြားချက်များကိုလည်း လိုက်နာဆောင်ရွက် ရန်လိုကြောင်း၊ MyRO မှတ်ပုံတင် ထားသော သိုလှောင်ရုံများအား လစဉ် ဆန် ရ၊ ထုတ်၊ ကျန်စာရင်းများ ဖြည့်သွင်းရန်လိုကြောင်း၊ လက်ကျန်များ မဖြည့်သွင်းလျှင် လုပ်ငန်းရှင်၏ တာဝန်သာဖြစ်ကြောင်း၊ မှတ်ပုံမတင်ရသေးသော သိုလှောင်ရုံများကိုလည်း တစ်ပါတည်း မှတ်ပုံတင် ရန်အသိပေးခဲ့ကြောင်း၊ လက်ရှိရောင်းချနေသော ဆန်များနှင့် ဧရာဝတီ/ ရွှေဘိုပေါ်ဆန်းဆန်များ၏ ဈေးနှုန်း ၊လက်ကျန်၊ စီးဝင်/ စီးထွက်များကို မှတ်တမ်းကောက်ယူခဲ့ပြီး ဆန်ရောင်းဝယ်ရေးဆိုင်များ အား  သိရှိကြောင်း ဝန်ခံကတိလက်မှတ်ရေးထိုးခဲ့ကြောင်း သိရှိရပါသည်။

DOCA(မကွေး)

    စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ စားသုံးသူရေးရာ ဌာနခွဲတာဝန်ခံ ဒု-ဦးစီးမှူး ဒေါ်နွယ်နွယ်အေးနှင့်ဝန်ထမ်းများအဖွဲ့သည် စားသုံးသူအခွင့်အရေးနှင့် အကျိုးစီးပွားကို ကာကွယ်ရန် ရည်ရွယ်၍ (၁၀.၂.၂၀၂၆)ရက်၊ နံနက်(၁၀:၀၀)နာရီအချိန်တွင် ပခုက္ကူမြို့၊“ပညာစံအိမ်” ကိုယ်ပိုင်အထက်တန်းကျောင်း၌ စားသုံးသူ ကာကွယ်ရေးအသိပညာပေး ဟောပြောပွဲကျင်းပ ပြုလုပ်ခဲ့ရာဆရာ/ဆရာမ(၃)ဦး၊ ကျောင်းသား/ သူ(၉၈)ဦး၊ စုစုပေါင်း(၁၀၁)ဦး တက်ရောက်ခဲ့ပါသည်။

     အဆိုပါဟောပြောပွဲတွင် စားသုံးသူရေးရာဌာနခွဲတာဝန်ခံက စားသုံးသူရေးရာ ဦးစီးဌာနပေါ် ပေါက်လာပုံ၊ မျှော်မှန်းချက်၊ ရည်မှန်းချက်များ၊ လုပ်ငန်းဆောင်ရွက်ချက်များ၊ စားသုံးသူကာကွယ် ရေးဥပဒေပါ စားသုံးသူကာကွယ်ရေးလုပ်ငန်းသည် စားသုံးသူနှင့် စီးပွားရေးလုပ်ငန်းရှင်အကြား ကော်မရှင်နှင့် ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှုရှိသောလုပ်ငန်းစဉ် ဖြစ်သော ကြောင့် စားသုံးသူအခွင့်အရေး နစ်နာဆုံးရှုံးမှုများဖြစ်ပေါ်ပါက မိမိတို့ဌာနသို့တိုင်ကြားနိုင် ပါကြောင်း  အကျယ်တဝင့် ဟောပြောခဲ့ပါသည်။

    ဆက်လက်၍ ငွေစာရင်းတာဝန်ခံ ဒု-ဦးစီးမှူး ဒေါ်တင်တင်မော်က  စားသုံးသူ ကာကွယ်ရေး ဥပဒေ အခန်း(၉)၊ ပုဒ်မ(၁၉) ပြဌာန်းချက်ပါ စားသုံးသူအခွင့်အရေးနှင့် ပုဒ်မ(၂၀)တွင် ပြဌာန်းထား သည့် စားသုံးသူ၏ တာဝန်များကို သိရှိရန်လိုအပ်ကြောင်း၊ အခွင့်အရေးများသိရှိပြီး ရယူနိုင်မှသာ လျှင် ဘေးအန္တရာယ်ကင်းရှင်းစွာ သုံးစွဲခွင့်၊ နစ်နာမှုများအတွက် တိုင်ကြားနိုင်ခွင့်၊ ပြန်လည်ကုစား နိုင်ခွင့်များရှိပြီး နောင်အနာဂတ်မှာ ပတ်ဝန်းကျင်ကောင်းတွင် နေထိုင်နိုင်မည်ဖြစ်ကြောင်း၊ လိုက်နာ ရမည့်တာဝန်(၄)ချက်ကိုလည်း အသေးစိတ် ဟောပြောခဲ့ပါသည်။

    ဆက်လက်၍ သတင်းအချက်အလက်နည်းပညာနှင့် အရည်အသွေးစီမံခန့်ခွဲရေးဌာနခွဲတာဝန်ခံ ဒု-ဦးစီးမှူး ဒေါ်သူဇာကျော်က စားသုံးသူ ကာကွယ်ရေး ဥပဒေ(၂၀၁၉)၊ အခန်း(၁၈)ပါ ကုန် အညွှန်းအမှတ်အသားဖော်ပြခြင်း အကြောင်းအရာများ၊ အခန်း(၁၉)ပါတိုင်ကြားခြင်းနှင့် စပ်လျဉ်း၍ ရှင်းလင်းဆွေးနွေးခြင်း၊ စားသုံးသူအခွင့်အရေးများ နစ်နာဆုံးရှုံးမှုရှိလျှင် စားသုံးသူသတင်း ပြန်ကြား ရေးနှင့် တိုင်ကြားမှုလက်ခံဆောင်ရွက်ရေး စင်တာ(CICC)သို့ တိုင်ကြားနိုင်ကြောင်း၊ တိုင်ကြားနိုင် သူများနှင့် တိုင်ကြားနိုင်သည့်နည်းလမ်းများ မှာ DOCA Myanmar မိုဘိုင်း Application Facebook စာမျက်နှာ နှင့် Consumer Call Center (1535)ဖွင့်လှစ်ထားရှိပြီးဖြစ်၍တိုင်ကြားနိုင်ကြောင်း အသိပညာပေးဟောပြောပြီး၊ အသိပညာပေးမှု များအပေါ် ဖြေဆိုနိုင်သော ကျောင်းသား/သူများအား အမှတ်တရလက်ဆောင်ပေးပြီး လက်ကမ်းစာစောင်များဖြန့်ဝေခဲ့ကြောင်း သိရှိရပါသည်။

DOCA(မကွေး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူးနှင့်ဝန်ထမ်းများသည် တိုင်းဒေသကြီး ဦးစီးမှူး၏ လမ်းညွှန်မှုဖြင့် ထုတ်ကုန်များလုံခြုံစိတ်ချရမှုရှိစေရေး၊ ကုန်စည်များတွင် ကုန်အညွှန်းအမှတ် အသားများ ပြည့်စုံစွာ ထည့်သွင်းဖော်ပြထားခြင်းရှိ/မရှိ၊ စားသုံးသူများ နေ့စဉ်အသုံးပြု လျက်ရှိသော ကုန်စည်နှင့်ဝန်ဆောင်မှု များဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရန် ရည်ရွယ်၍ လစဉ် သတ်မှတ်ထားသောဦးစားပေး ကုန်စည်အမျိုးမျိုးနှင့် အခြားကုန်စည်များကို သတ်မှတ်စံချိန်စံညွှန်း များ၊ ညွှန်ကြားချက်များနှင့် ကိုက်ညီ မှုရှိ/မရှိ ဈေးကွက်စောင့်ကြည့် စစ်ဆေးခြင်းများ ဆောင်ရွက် လျက်ရှိပြီး ဝန်ဆောင်မှုလုပ်ငန်းများနှင့် စပ်လျဉ်း၍ ကွင်းဆင်း စောင့်ကြည့်စစ်ဆေးမှုများကိုလည်း ဆောင်ရွက်လျက်ရှိပါသည်။ ဈေးကွက်စောင့်ကြည့်စစ်ဆေးရာတွင် မိတ်ဘက်ဌာနဆိုင်ရာများနှင့်ပူး ပေါင်း၍ လည်းကောင်း၊ စားသုံးသူကာကွယ်ရေးဥပဒေအရခန့်အပ်ထားသော စစ်ဆေးရေးအရာရှိများ က ဦးဆောင်၍သော်လည်းကောင်း ဆောင်ရွက်လျက်ရှိပါသည်။

     ပခုက္ကူခရိုင်အနေဖြင့် ၂၀၂၆ခုနှစ်၊ ဇန်နဝါရီလအတွင်း ခရိုင်ဦးစီးမှူးနှင့် ဒု-ခရိုင်ဦးစီးမှူးတို့မှ ဦးဆောင်၍ ပခုက္ကူမြို့နယ်တာဝန်ခံ၊ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့်ဝန်ထမ်းများသည် ဟင်းလျာများတွင် အရောင်၊ အနံ့၊ အရသာများအတွက် အသုံးပြုသော ပစ္စည်းအမျိုးမျိုးအား ဦးစား ပေးကုန်စည်အဖြစ် ကုန်အညွှန်းအမှတ်အသားများ ပြည့်စုံစွာထည့်သွင်းဖော် ပြထားခြင်းရှိ/မရှိ ဈေး ကွက်စောင့်ကြည့်စစ်ဆေးရာတွင် ပခုက္ကူမြို့ပေါ်ရပ်ကွက်များတွင် ရောင်းချလျက်ရှိသော ကုန်စုံဆိုင် နှင့်စတိုးများ၊ ကျောင်းမုန့်ဈေးတန်းများတွင် ရောင်းချနေသောကုန်စည်များ၌ ကုန်အညွှန်းအမှတ် အသားများ ပြည့်စုံစွာထည့်သွင်း ဖော်ပြထားခြင်းရှိ/မရှိ(၅)ကြိမ်၊ ဆိပ်ဖြူမြို့တွင်(၁)ကြိမ်၊ ဂန့်ဂေါမြို့ တွင်(၁)ကြိမ်၊ ပခုက္ကူမြို့နှင့် ဆိပ်ဖြူမြို့တွင်စားသုံးဆီအမျိုးမျိုးအား ဈေးကွက်စောင့်ကြည့်စစ်ဆေး ခြင်း(၂)ကြိမ်၊ ဈေးကွက်မရောက်မီ စားသုံးဆီ ဆုံဆီများ ထုတ်လုပ်ဖြန့်ဖြူးရောင်းချသည့် လုပ်ငန်း ရှင်များထံသို့ ကွင်းဆင်းဆောင်ရွက်ခြင်းအား ပခုက္ကူမြို့မှ(၂)ကြိမ်၊ စုစုပေါင်းဈေးကွက်စောင့်ကြည့် စစ်ဆေးခြင်း(၁၁)ကြိမ်၊ အထူးဈေးကွက်အနေဖြင့် စားသုံးဆီ၊ စက်သုံးဆီနှင့်ဆေးဝါးများအား သတ် မှတ်ရည်ညွှန်းဈေးများနှင့် အချဉ်အတွယ်မှန်ကန်မှုရှိစေရန် မိတ်ဖက်ဌာနများနှင့် ပူးပေါင်းဆောင်ရွက် ကွင်းဆင်းခဲ့ပြီး ဌာန၏ဥပဒေ၊ အမိန့်နှင့်ညွှန်ကြားချက်ပါ အကြောင်းအရာများကိုအသိပညာပေး ဆွေးနွေးဆောင်ရွက်ခဲ့ပါသည်။

ထို့ပြင် အွန်လိုင်းမှတ်ပုံတင်ခြင်းဆိုင်ရာများနှင့်စပ်လျဉ်း၍ ပခုက္ကူမြို့ပေါ်ရှိ အွန်လိုင်းစနစ်ဖြင့် ရောင်းချနေသော ယခင်အွန်လိုင်းမှတ်ပုံတင်ထားသည့်လုပ်ငန်းရှင်များအား အွန်လိုင်းစနစ်ဖြင့် ရောင်းချသည့်လုပ်ငန်းဆိုင်ရာ အမိန့်ကြော်ငြာစာများ၊ စားသုံးသူကာကွယ်ရေး ဥပဒေပါစီးပွားရေး လုပ်ငန်းရှင်၏ တာဝန်များနှင့်ကုန်အညွှန်းအမှတ်အသား ဖော်ပြချက်များသိရှိစေရန် အသိပညာပေး ခြင်းနှင့် အွန်လိုင်းစနစ် ဖြင့်ရောင်းချနေသော လုပ်ငန်းရှင်များနှင့်တွေ့ဆုံ၍ အွန်လိုင်းမှတ်ပုံတင်ရန် အတွက် လိုအပ်သည့်အချက်အလက်များအား အသေးစိတ်ရှင်းလင်းဆွေးနွေးခြင်း၊ သယ်ယူပို့ဆောင် ရေးဝန်ဆောင်မှုနှင့်စပ်လျဉ်း၍ (အင်တာနက်ဝန်ဆောင်မှု)ကဏ္ဍစုံအား ပို့/ဆက်ဦးစီးဌာန၊ မော်တော် ယာဉ်လိုင်း များကြီးကြပ်မှုကော်မတီနှင့် ပူးပေါင်း၍ သယ်ယူပို့ဆောင်ရေးကားဂိတ်များသို့ သွား ရောက်၍ သယ်ယူပို့ဆောင်ရေးဝန်ဆောင်မှုနှင့် စပ်လျဉ်း၍အသိပညာပေးဆွေးနွေးခြင်း၊ ကုန်အညွှန်း အမှတ်အသားစိစစ်ခွင့်ပြုချက်ရရှိသော လုပ်ငန်းရှင် များအားကုန်အညွှန်းအမှတ်အသား စိစစ်ခွင့်ပြု ချက်များပေးအပ်ခြင်းများ ပြုလုပ်ဆောင်ရွက်ခဲ့ကြောင်း သိရပါသည်။

DOCA(မကွေး)

    မြင်းခြံခရိုင်ဦးစီးမှူးရုံး၌ (၇.၂.၂၀၂၆) ရက်နေ့၊ နံနက် ၁၀:၃၀ နာရီအချိန်တွင် စားသုံးသူရေးရာ ဦးစီးဌာန၊ မြင်းခြံခရိုင်ဦးစီးမှူး နှင့် မြင်းခြံမြို့နယ်ရှိ စားသောက်ကုန်ထုတ်လုပ်သော လုပ်ငန်းရှင်များ တွေ့ဆုံ၍ ဆွေးနွေးဟောပြောပွဲ ကျင်းပပြုလုပ်ခဲ့ပါသည်။

          အဆိုပါတွေ့ဆုံဆွေးနွေးဟောပြောပွဲတွင် စားသုံးသူရေးရာဦးစီးဌာန၊ မြင်းခြံခရိုင်ဦးစီးမှူး ဦးသန်းစိုး (လက်ထောက်ညွှန်ကြားရေးမှူး)က စားသုံးသူရေးရာဦးစီးဌာနအနေဖြင့် MSME လုပ်ငန်းများ ဖွံ့ဖြိုး တိုးတက်ရေးကိုလည်း အားပေးကူညီဆောင်ရွက်ပေးလျက်ရှိရာ လုပ်ငန်းရှင်များအနေဖြင့်လည်း မိမိတို့ထုတ်လုပ်သော ကုန်စည်များကို အရည်အသွေးပြည့်ဝကောင်းမွန်ပြီး စားသုံးသူအတွက် ဘေးအန္တရာယ် ကင်းရှင်းမှုရှိအောင် စီးပွားရေးကျင့်ဝတ်စည်းကမ်းများ၊ သတ်မှတ်ပြဌာန်းထားသော ဥပဒေများနှင့်အညီ ထုတ်လုပ်ရန်လိုအပ်ပါကြောင်း၊ နိုင်ငံတော်မှလည်း MSME လုပ်ငန်းများအား အလေးထားအားပေးကူညီဆောင်ရွက်ပေးလျက်ရှိရာ ပြည်တွင်းဈေးကွက်တွင်သာမက ပြည်ပဈေး ကွက်များထိတိုင် ထိုးဖောက်နိုင်ရန်လုပ်ဆောင်ကြရမည်ဖြစ်ကြောင်း၊ မိမိတို့စားသုံးသူ ကာကွယ်ရေး ဥပဒေ အရ ကုန်စည်နှင့်ပတ်သက်၍ ကုန်စည်အမျိုးအစားအလိုက်ထည့်သွင်းဖော်ပြရမည့် ကုန်အညွှန်းအမှတ်အသားများ မှန်ကန်စွာဖော်ပြပါရှိစေရေးအတွက် စိစစ်မှုများ ဆောင်ရွက်ပေးလျက်ရှိရာ လာရောက်၍ စိစစ်မေးမြန်းလျှောက်ထားနိုင်ပါကြောင်း၊ ကုန်စည်နှင့်ဝန်ဆောင်မှုများနှင့် ပတ်သက်၍ စားသုံးသူများထိခိုက်နစ်နာမှုမဖြစ်ပေါ်စေရေး၊ သတ်မှတ်ချက်များနှင့်အညီ ထုတ်လုပ်သော ကုန်စည်များသာ ရောင်းချမှုရှိစေရေးအတွက် ဈေးကွက်အတွင်းရှိ ကုန်စည်များကို အစဉ်တစိုက် ဈေးကွက်စောင့်ကြည့်စစ်ဆေးလျက်ရှိသလို ဈေးကွက်မရောက်မီ ကုန်စည်များကိုလည်း လုပ်ငန်းခွင်များသို့ကွင်းဆင်း၍ ဈေးကွက် စောင့်ကြည့်စစ်ဆေးခြင်း များဆောင်ရွက်နေသည့်အတွက် သတ်မှတ်ချက်များနှင့်ကိုက်ညီမှု၊ လိုက်နာမှုများမရှိလျှင် သတ်မှတ်ထားသော ဥပဒေများအတိုင်း အရေးယူခံရမည်ဖြစ်ပါကြောင်းနှင့်သိရှိလိုသည်များအား မေးမြန်းဆွေးနွေးနိုင်ပါကြောင်း ရှင်းလင်းဟောပြောဆွေးနွေးရာ လုပ်ငန်းရှင်များမှ ကုန်အညွှန်းအမှတ်အသားဖော်ပြခြင်းနှင့်ပတ်သက်၍ မိမိတို့ သိရှိလိုသည်များအား မေးမြန်းဆွေးနွေးခဲ့ကြကြောင်းနှင့်  ဟောပြောပွဲသို့ လုပ်ငန်းရှင်(၄၆)ဦး တက်ရောက်ခဲ့ကြောင်း သိရှိရသည်။

DOCA(မန္တလေး)