သတင်းနှင့် လှုပ်ရှားမှုများ

စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးနှင့် မြို့နယ်တာဝန်ခံတို့ပါဝင်သည့် စားသုံးသူ အကာအကွယ်ပေးရေးဆိုင်ရာအသိပညာပေး Talk Show အစီအစဉ်ကို တောင်ငူခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ တောင်ငူခရိုင်၌ ၁၆.၉.၂၀၂၀ ရက်နေ့ နံနက်(၁၀:၀၀)နာရီ တွင်လည်းကောင်း၊ ထန်းတပင်မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ၁၈.၉.၂၀၂၀ ရက်နေ့ နံနက်(၁၀:၀၀)နာရီတွင်လည်းကောင်း၊ ဖြူးမြို့နယ် ပြန်ကြားရေးနှင့်ပြည်သူ့ဆက်ဆံရေး ဦးစီးဌာနနှင့် ၂၁.၉.၂၀၂၀ ရက်နေ့ နေ့လယ် (၂းဝဝ)နာရီတွင်လည်းကောင်း သက်ဆိုင်ရာ ပြန်ကြားရေးနှင့်ပြည်သူ့ဆက်ဆံရေးဌာန၏ လူထုအခြေပြုဗဟိုခန်းမများတွင် အသီးသီး ဆောင်ရွက်ခဲ့ကြပါသည်။ 

အဆိုပါ မိနစ်(၂၀)စာ Talk Show  အစီအစဉ်တွင် စားသုံးသူရေးရာဦးစီးဌာန မျှော်မှန်းချက်၊ ရည်မှန်းချက်များ၊ စားသုံးသူရေးရာဦးစီးဌာနပေါ်ပေါက်လာပုံ၊ စားသုံးသူကာကွယ်ရေးဥပဒေပါ စားသုံးသူ၏အခွင့်အရေးများ၊ စီးပွားရေးလုပ်ငန်းရှင်များ၏ တာဝန်များ၊ ကုန်စည်များတွင် ကုန်အညွှန်းအမှတ်အသားဖော်ပြခြင်းများ၊ စားသုံးသူနစ်နာဆုံးရှုံးမှုများအတွက် တိုင်ကြားရန် CICC ဖွင့်လှစ်ထားရှိမှုများ၊ Covid-19 ရောဂါကာကွယ်ထိန်းချုပ်ကုသရေးကာလအတွင်း ကုန်ဈေးနှုန်း တည်ငြိမ်မှုရှိစေရေးအတွက် အရေးကြီးကုန်စည်နှင့်ဝန်ဆောင်မှုဥပဒေအရ ဆောင်ရွက်မှုများကို ဆွေးနွေးပြောကြားကြပါသည်။

Online ဖြင့် အသိပညာပေးခြင်းသည် ထိရောက်သောနည်းလမ်းတစ်ခုဖြစ်ကြောင်းနှင့် အဆိုပါ စားသုံးသူကာကွယ်ရေးဆိုင်ရာ အသိပညာပေး Talk Show အစီအစဉ်များကို သက်ဆိုင်ရာ မြို့နယ်များမှ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၏ IPRD Page များတွင် လွှင့်တင်ပေးထားကြောင်း သိရှိရပါသည်။

စားသုံးသူရေးရာဦးစီးဌာန၏ Website ဖြစ်သော www.doca.gov.mm တွင် ပါဝင်သည့် စားသုံးသူတိုင်ကြားမှု လက်ခံဆောင်ရွက်ရေးစနစ်အသစ်(upgrade consumer complaint system) အား ၂၀၂၀ပြည့်နှစ်စက်တင်ဘာလ ၁ရက်နေ့မှ စတင်၍ အသုံးပြုလျက်ရှိပါသည်။

ဌာန၏mobile application ဖြစ်သော DOCA Myanmar mobile application ကိုလည်း ဖော်ပြပါစနစ်အသစ်ဖြင့် အသုံးပြုနိုင်ရေး version အသစ်ရေးဆွဲထားရှိပါသည်။

သို့ပါ၍ စားသုံးသူပြည်သူများအနေဖြင့် version အသစ်ရေးဆွဲထားသော DOCA Myanmar mobile application ကို အသုံးပြုကြပါရန် လေးစားစွာဖြင့် မေတ္တာရပ်ခံအသိပေး အပ်ပါသည်။

version အသစ်ဖြင့်ရေးဆွဲထားသော DOCA Myanmar mobile application အား https://www.doca.gov.mm/ Website တွင် လည်းကောင်း၊ google play store တွင် လည်းကောင်း အခမဲ့ download ရယူနိုင်ပါသည်။

စားသုံးသူရေးရာဦးစီးဌာန

    စီးပွားရေးလုပ်ငန်းရှင်များသည် COVID-19 ကာလအတွင်း ရောဂါကာကွယ်ရေးအတွက် လိုအပ်သော ပစ္စည်းများ ရောင်းချခြင်းနှင့် ပတ်သက်၍ သက်ဆိုင်ရာဌာနများက ထုတ်ပြန်ထားသည့် ဉပဒေ၊ စည်မျဉ်း၊ စည်းကမ်း၊ အမိန့်၊ ညွှန်ကြားချက်များနှင့်အညီ လိုက်နာ ဆောင်ရွက်ကြရမည် ဖြစ်သည့်အတွက် အရေးကြီး အသုံးများသော Mask များဈေးနှုန်းမြှင့်တင် ရောင်းချခြင်း မပြုရန်နှင့် ပစ္စည်း ပြတ်လပ်မှု မရှိစေ ရေး စီမံဆောင်ရွက်ရန် လိုအပ်ပါသည်။

တစ်ဖက်တွင်လည်း စားသုံးသူရေးရာဦးစီးဌာန အနေဖြင့် ဈေးကွက်အတွင်း အရည်အသွေးမီ Mask များအား သင့်တင့်သည့် ဈေးနှုန်းဖြင့် ဖြန့်ဖြူးပေးနိုင်ရေးအတွက် လုပ်ငန်းရှင်များ၊ အသင်း အဖွဲ့များနှင့် ဆွေးနွေးညှိနှိုင်း၍ တရုတ်နိုင်ငံ FDA အသိအမှတ်ပြု Mask များစွာ ဝယ်ယူတင်သွင်း ဖြန့်ဖြူးနိုင်ရန် စီစဉ်ဆောင်ရွက်လျက် ရှိပါသည်။ လုပ်ငန်းရှင်များအနေဖြင့် မိမိတို့နိုင်ငံ အရေးကြုံ လိုအပ်နေသော အချိန် တွင် တည်ငြိမ်သော ဈေးနှုန်းများဖြင့် တင်သွင်း၊ ထုတ်လုပ်၊ ဖြန့်ဖြူးရန် လိုအပ်ပါသဖြင့် အောက် ဖော်ပြပါ အချက်များကို လိုက်နာ ဆောင်ရွက်ကြရန် တိုက်တွန်း နှိုးဆော်အပ်ပါသည်-

(က)    ဈေးကွက်အတွင်း ကုန်စည် ဝယ်လိုအား များပြားလာမှုကို အခွင့်ကောင်းယူ၍ မလျော်ကန် သော ဈေးနှုန်းများဖြင့် မြှင့်တင်ရောင်းချခြင်း မပြုရန်၊

(ခ)     စံချိန်၊ စံညွှန်းနှင့် အရည်အသွေး မမီသော၊ လုံခြုံစိတ်ချရမှု မရှိသော Mask များကို ဈေးကွက် အတွင်း ဖြန့်ဖြူးရောင်းချခြင်း မပြုရန်၊

(ဂ)     ဈေးနှုန်းမြှင့်တင် ဖြန့်ဖြူးရန် သို့မဟုတ် ဈေးကစားရန် ရည်ရွယ်ချက်ဖြင့် ကုန်စည် သိုလှောင် ခြင်းများ မပြုလုပ်ရန်၊

(ဃ)    ကုန်စည် ပြတ်လပ်မှု မရှိစေရန်အတွက် ပုံမှန်တင်သွင်းခြင်း၊ ပုံမှန်ထုတ်လုပ်ခြင်း နှင့် ဖြန့်ဖြူး ရောင်းချခြင်းများ ဆောင်ရွက်ရန်၊

(င)     Mask များအား လက်ကားဖြန့်ချိရာတွင် ဈေးနှုန်းနှင့်အရည်အသွေး မှန်ကန်စွာဖြင့် ဖြန့်ဖြူး ရောင်းချရန်၊

(စ)     လုပ်ငန်းရှင်များအနေဖြင့် Mask များ ထုတ်လုပ်၊ ဖြန့်ဖြူး၊ ရောင်းချ၊ သိုလှောင်မှုများ နှင့်ပတ်သက်၍ ထုတ်ပြန်ထားသည့် အမိန့်၊ ညွှန်ကြားချက်များနှင့်အညီ လိုက်နာဆောင်ရွက် မှုမရှိပါက အရေးကြီးကုန်စည်နှင့် ဝန်ဆောင်မှု ဉပေဒ ပုဒ်မ ၁၁၊ ပုဒ်မခွဲ (ခ) အရ အရေးယူ သွားမည်ဖြစ်ပါကြောင်း နှင့် စားသုံးသူများ နစ်နာမှု မရှိစေရေး၊ မိမိတို့၏ လုပ်ငန်းများ ရေရှည် လည်ပတ်ဆောင်ရွက်သွားနိုင်ရေးတို့အတွက် စားသုံးသူ ကာကွယ်ရေး ဉပဒေ အခန်း (၁၀)၊ ပုဒ်မ ၂၁ နှင့်အညီ လုပ်ငန်းများအား မှန်မှန်ကန်ကန် ဆောင်ရွက်ကြရန်။

စားသုံးသူရေးရာဦးစီးဌာန

၂၀၂၀ ပြည့်နှစ် စက်တင်ဘာ ၃ ရက်နေ့တွင် စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး အစည်းအဝေးခန်းမတွင် တိုင်းဒေသကြီးဦးစီးမှူးနှင့် မိုဘိုင်းဖုန်းလုပ်ငန်းရှင် ဥက္ကဌ အပါအဝင် မိုဘိုင်းဖုန်း လုပ်ငန်းရှင် အသင်းမှ တာဝန်ရှိသူများ တွေ့ဆုံဆွေးနွေးခဲ့ကြပါသည်။

          ဆွေးနွေးပွဲတွင်  စားသုံးသူရေးရာဦးစီးဌာန၊ တိုင်း‌ဒေသကြီးဦးစီးမှူး ဦးခင်မောင်လှိုင် က စားသုံးသူကာကွယ်ရေးလုပ်ငန်းများဆောင်ရွက်ရာတွင် မိုဘိုင်းဖုန်းများနှင့်ပတ်သက်သည့် တိုင်ကြားမှုများရှိပါက ပူးပေါင်းဖြေရှင်းဆောင်ရွက်နိုင်စေရန် ရည်ရွယ်ပါကြောင်း၊ လုပ်ငန်းရှင်များဘက်မှ ဝန်ဆောင်မှုပေးသည့်အခါ  သတင်းအချက်အလက်များကို စားသုံးသူများသိရှိစေရန် ကြိုတင် အသိပေးသင့်ကြောင်း၊ မှန်ကန်သော အချက်အလက်နှင့် ပြည်စုံသော ဝန်ဆောင်မှု အဆင့်အတန်းနှင့်အညီ ပြည့်ဝစွာပေးရန်လိုအပ်ပါကြောင်း၊ စားသုံးသူနှင့်သဘောတူညီထားသည့် ဝန်ဆောင်မှုတန်ဖိုးအတိုင်းပေးအပ်စေလိုကြောင်း၊ မိုဘိုင်းဖုန်းလုပ်ငန်းရှင်များအသင်း ဖွံ့ဖြိုးတိုးတက်ရေးအတွက် လိုအပ်သည်များကို ကူညီဆောင်ရွက်သွားမည်ဖြစ်ပါ ကြောင်း ပြောကြားခဲ့ပါသည်။

          မိုဘိုင်းဖုန်းလုပ်ငန်းရှင် အသင်းဥက္ကဌ ဦးနေလင်းအောင်က ၂၀၁၉ ခုနှစ်တွင် အသင်းကိုစတင် ဖွဲ့စည်းခဲ့ပါကြောင်း၊ မိုဘိုင်းဖုန်းနှင့် ပတ်သက်သည့် အခွန်ဘဏ္ဍာများ ပိုမို တိုးတက်ရရှိခဲ့ပါကြောင်း၊ အတတ်ပညာဖွံ့ဖြိုးတိုးတက်ရေးများတွင် ကူညီထောက်ပံ့သွားမည် အစီအစဉ်များရှိပါကြောင်း၊ စားသုံးသူရေးရာဦးစီးဌာန၏ စီးပွားရေးလုပ်ငန်းရှင်နှင့် သက်ဆိုင်သည့် ဥပ‌ဒေများကို လေ့လာ၍ ပူးပေါင်းဆောင်ရွက်သွားမည်ဖြစ်ပါကြောင်း အပြန်အလှန် ဆွေးနွေးခဲ့ကြကြောင်း သတင်းရရှိပါသည်။

စစ်ကိုင်းတိုင်းဒေသကြီး

စားသုံးသူရေးရာဦးစီးဌာန

မော်လမြိုင်မြို့နယ် တရားမဝင် တိရိစ္ဆာန်နှင့် တိရစ္ဆာန်ထွက်ပစ္စည်းများ တရားမဝင် တင်သွင်း/ တင်ပို့ခြင်း တားဆီးကာကွယ်ရေးလုပ်ငန်းကော်မတီမှ ကော်မတီဝင်များဖြစ်သည့် အထွေထွေ အုပ်ချုပ်ရေးဦးစီးဌာန၊ မွေးမြူရေးနှင့်ကုသရေးဦးစီးဌာန၊ စားသုံးသူရေးရာဦးစီးဌာန၊ မြန်မာနိုင်ငံ ရဲတပ်ဖွဲ့၊ စည်ပင်သာယာ်ရေးအဖွဲ့တို့မှ ခရိုင်/မြို့နယ်အဆင့် တာဝန်ရှိသူများ၊ မွန်ပြည်နယ်မွေးမြူရေးလုပ်ငန်းအဖွဲ့မှ အတွင်းရေးမှူးနှင့် ရပ်ကွက်အုပ်ချုပ်ရေးမှူးတို့ ပါဝင်သော ပူးပေါင်းအဖွဲ့သည် ၁-၉-၂၀၂၀ ရက်နေ့တွင် မွန်ပြည်နယ်၊ မော်လမြိုင်မြို့ရှိ ရတနာထွန်းငါးဈေးရုံ၌ ရှောင်တခင်ဝင်ရောက်စစ်ဆေးခဲ့ရာ တရားမဝင် တင်သွင်းရောင်းချလျက်ရှိသော တန်ဖိုးကျပ် (၂၇) သိန်း ဝန်းကျင်ခန့်ရှိသည့် အေးခဲအသား (ကြက်သား၊ ကြက်ကလီစာ) များကို ဖမ်းဆီးသိမ်းဆည်းခဲ့ပါသည်။ ဆက်လက်၍ ပူးပေါင်းအဖွဲ့သည် ဖမ်းဆီးရမိသော တရားမဝင် အေးခဲအသား (ကြက်သား၊ ကြက်ကလီစာ) များအား မော်လမြိုင်မြို့၊ မုရောင်းရပ်ရှိ စည်ပင်သာယာအမှိုက်စွန့်ပစ်ရာနေရာ၌ မြေမြှုပ်မီးရှို့ဖျက်ဆီးခဲ့ပြီး တရားမဝင်အေးခဲအသား (ကြက်သား၊ ကြက်ကလီစာ) များ တင်သွင်းရောင်းချသူများအား သက်ဆိုင်ရာဥပဒေများနှင့် အရေးယူသွားရန် စီစဉ်ဆောင်ရွက်လျက်ရှိကြောင်း သိရှိရပါသည်။

မွန်ပြည်နယ်

စားသုံးသူရေးရာဦးစီးဌာန