ပြည်ပကုန်သွယ်မှုသတင်းများ

      ဥရောပနှင့် အာရှတို့၏ ဝယ်လိုအား ခိုင်မာမှုကြောင့် တောင်ကိုရီးယားနိုင်ငံ၏ မော်တော် ယာဉ်တင်ပို့မှုသည် စတုတ္ထမြောက်လအဖြစ် တိုးတက်လာခဲ့ကြောင်း အစိုးရ၏ အချက်အလက် များအရ သိရှိရပါသည်။

          ကုန်သွယ်ရေး၊ စက်မှုလက်မှုနှင့် စွမ်းအင်ဝန်ကြီးဌာန၏ အဆိုအရ စက်တင်ဘာလတွင် ကားတင်ပို့မှုသည် တစ်နှစ်တာကာလအတွင်း ၁၆.၈ ရာခိုင်နှုန်း တိုးတက်ကာ အမေရိကန်ဒေါ်လာ ၆.၄၁ ဘီလီယံအထိ ရောက်ရှိခဲ့ပြီး ဇွန်လကတည်းက ဆက်တိုက်တိုးတက်နေခဲ့ပါသည်။

          အမေရိကန်နိုင်ငံသို့ ကားတင်ပို့မှုသည် ၇.၅ ရာခိုင်နှုန်း လျော့ကျခဲ့ပြီး အမေရိကန်ဒေါ်လာ ၂.၃၈ ဘီလီယံ ရှိခဲ့သော်လည်း ဥရောပသမဂ္ဂနှင့် အာရှ သို့ တင်ပို့မှုသည် နှစ်ဆတိုးတက်လာခဲ့ ပါသည်။ ဥရောပသမဂ္ဂသို့ အမေရိကန်ဒေါ်လာ ၉၅၈ သန်းနှင့် အာရှသို့ အမေရိကန်ဒေါ်လာ ၈၂၃ သန်း တင်ပို့ခဲ့ကြောင်း သိရှိရပါသည်။

          သဘာဝပတ်ဝန်ကျင် ထိန်းသိမ်းသော ဆီဒင်ကားများ တင်ပို့မှုသည် ပြီးခဲ့သည့်နှစ် အလားတူ ကာလနှင့် နှိုင်းယှဉ်ပါက စက်တင်ဘာလတွင် ၂၂.၉ ရာခိုင်နှုန်း မြင့်တက်ခဲ့ပြီး အမေရိကန်ဒေါ်လာ ၂.၆၇ ဘီလီယံ အထိ ရှိခဲ့ပါသည်။

          တင်ပို့ခဲ့သော ယာဉ်အရေအတွက်သည် စက်တင်ဘာလတွင် ၂၂၈၁၅၃ စီးရှိပြီး ယခင်နှစ်ထက် ၁၁ ရာခိုင်နှုန်း တိုးတက်ခဲ့ပါသည်။ ကားပစ္စည်းအစိတ်အပိုင်းများ တင်ပို့မှုသည် ၆ ရာခိုင်နှုန်းမြင့်တက်ပြီး အမေရိကန်ဒေါ်လာ ၁.၉၂ ဘီလီဘံ အထိရှိခဲ့ပါသည်။

          ပြည်တွင်းစက်ရုံများတွင် ထုတ်လုပ်သည့် မော်တော်ယာဉ်အရေအတွက်သည် တစ်နှစ်တာ အခြေခံဖြင့် ၈.၉ ရာခိုင်နှုန်း တိုးတက် လာပြီး ၃၃၄၃၁၉ စီး အထိ ရှိခဲ့ပါသည်။ ပြည်တွင်း၌ ထုတ်လုပ်သော မော်တော်ယာဉ်များနှင့် ပြည်ပမှ တင်သွင်းသော မော်တော်ယာဉ်များ အပါအဝင် ပြည်တွင်း၌ ရောင်းချသော ကားအရေအတွက်မှာ စက်တင်ဘာလတွင် ၁၅၇၈၉၈ စီးဖြစ်ပြီး ယခင် နှစ်ကထက် ၂၀.၈ ရာခိုင်နှုန်း တိုးတက်ခဲ့ပါသည်။

Source : Xinhua                                                                               

  DOCA (ရန်ကုန်)

     ဗီယက်နမ်နိုင်ငံသည် လက်ရှိကျင်းပနေသော ၁၅ ကြိမ်မြောက်အမျိုးသားလွတ်တော်၏ ၁၀ ကြိမ်မြောက်အစည်းအဝေးတွင် တင်သွင်းခဲ့သည့် အစိုးရအစီရင်ခံစာအရ ၂၀၂၆ ခုနှစ်တွင် ပြည်တွင်း အသားတင်ထုတ်လုပ်မှု GDP တိုးတက်မှုသည် ၁၀ ရာခိုင်နှုန်း သို့မဟုတ် ၁၀ ရာခိုင်နှုန်း ထက်ပိုမို ရရှိ ရန် ခန့်မှန်းထားကြောင်း သိရှိရပါသည်။

          အစိုးရသည် လာမည့်နှစ်အတွက် အဓိက လူမှုစီးပွားဖွံ့ဖြိုးတိုးတက်မှု ပစ်မှတ် ၁၅ ခုကို ချမှတ်ထားရာ တစ်ဦးချင် GDP ကို အမေရိကန်ဒေါ်လာ ၅၄၀၀ သို့မဟုတ် ၅၅၀၀ ကြားသို့ တိုးမြှင့် ရန်လည်း ပါဝင်ပါသည်။

          တစ်ချိန်တည်းတွင် အစိုးရသည် ပျှမ်းမျှစားသုံးသူဈေးနှုန်း အညွှန်းကိန်း (CPI) တိုးတက်မှုကို ၄.၅ ရာခိုင်နှုန်းခန့်တွင် ထိန်းသိမ်းထားရန်နှင့် ၂၀၂၆ ခုနှစ်တွင် လုပ်သားအင်အား ကုန်ထုတ်စွမ်းအား ကို ၈ ရာခိုင်နှုန်းခန့် တိုးမြင့်ရန် ရည်ရွယ်ထားပါသည်။

          အောက်တိုဘာ ၂၀ ရက်နေ့တွင် စတင်ဖွင့်လှစ်ပြီး ဒီဇင်ဘာ ၁၁ ရက်နေ့အထိ ကျင်းပ ပြုလုပ်မည့် ၁၅ ကြိမ်မြောက်အမျိုးသားလွတ်တော်၏ ၁၀ ကြိမ်မြောက်အစည်းအဝေးတွင် စီးပွားရေး၊ ဥပဒေပြုရေးနှင့် လူမှုရေးဆိုင်ရာ ကိစ္စရပ်များကို ကျယ်ကျယ်ပြန့်ပြန့် ဆွေးနွေးရန် စီစဉ်ထားကြောင်း ဗီယက်နမ်သတင်း အေဂျင်စီက ပြောကြားခဲ့ကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

       မကြာသေးမီက ကြေညာခဲ့သော မက္ကဆီကိုနိုင်ငံမှအလတ်စားနှင့် အကြီးစားယာဉ်များ အတွက် အခွန် ၂၅ ရာခိုင်နှုန်းအပေါ် လျှော့ပေါ့ပေးရန်အမေရိကန်နိုင်ငံမှ စီစဉ်လျှက်ရှိကြောင်း မက္ကဆီကို စီးပွားရေးဝန်ကြီး Mercelo Ebrard က အောက်တိုဘာလ ၁၇ ရက်နေ့တွင်ပြောကြားခဲ့ သည်။ အဆိုပါယန္တရားသည် အပေါ့စားယာဉ်များအတွက် အသုံးပြုသည့်ပုံစံနှင့် ဆင်တူမည်ဖြစ်ပြီး၊ မော်တော်ယာဥ်ထုတ်လုပ်မှုတွင် နှစ်နိုင်ငံအကြား အစိတ်အပိုင်းများ မြင့်မားစွာပေါင်းစပ်မှုကြောင့် မက္ကဆီကိုကို အကျိုးပြုကြောင်း Ebrard ပြောကြားခဲ့သည်။ "အမေရိကန်အစိုးရက အခွန် လျှော့ပေါ့မှုလုပ်ငန်းစဉ်ရှိကြောင်း ပြောကြားထားပြီး ၎င်းသည် မက္ကဆီကိုတွင် လည်ပတ်နေသော ကုမ္ပဏီ အများအပြားအား အကျိုးရှိစေမည်ဖြစ်ကြောင်း Ebrard က သတင်းထောက်များအား ပြောကြားခဲ့သည်။

      အမေရိကန်သမ္မတ Donald Trump သည် နိုဝင်ဘာ ၁ ရက်မှစတင်၍ တင်သွင်းလာသော အလတ်စား နှင့် အကြီးစား ထရပ်ကားများအားလုံးအပေါ် အခွန် ၂၅ ရာခိုင်နှုန်း စည်းကြပ်မည်ဟု ယခုသီတင်း ပတ်အစောပိုင်းတွင် ကြေညာခဲ့သည်။ အလားတူ အပေါ့စားယာဉ်များအပေါ် အခွန် ၂၅ ရာခိုင်နှုန်း ကောက်ခံမှုသည် ဧပြီလကတည်းက သမ္မတအမိန့်အရ အသက်ဝင်ခဲ့သည်။ မက္ကဆီကိုနှင့် ကနေဒါတွင် ထုတ်လုပ်သည့် ကားများသည် နည်းပညာအရ အခွန်ကောက်ခံသော်လည်း၊ မြောက် အမေရိက လွတ်လပ်သော ကုန်သွယ်မှု သဘောတူညီချက်၏ အကြောင်းအရာ လိုအပ်ချက်များနှင့် ကိုက်ညီသော ကားထုတ်လုပ်သူများသည် အမေရိကန်လုပ် အစိတ်အပိုင်းများ၏ တန်ဖိုးကို နုတ်ယူ ကောက်ခံသွားမည်ဖြစ်ကြောင်းသည်။

 DOCA(ရန်ကုန်)

         ကော်ပိုရိတ်နှင့် ဝင်ငွေခွန် နှစ်ရပ်စလုံး တိုးလာမှုကြောင့် ယခုနှစ် ပထမ ရှစ်လတာအတွင်း တောင်ကိုရီးယား၏ အခွန်ဝင်ငွေ မြင့်တက်လာခဲ့ကြောင်း အစိုးရ အချက်အလက်များတွင် အောက်တိုဘာလ ၁၆ ရက်နေ့တွင် ဖော်ပြခဲ့သည်။

         ဇန်နဝါရီမှ ဩဂုတ်လအတွင်း အခွန်ငွေ ဝမ် ၂၆၀.၈ ထရီလီယံ (အမေရိကန်ဒေါ်လာ ၁၈၃.၉ ဘီလီယံ) ရှိပြီး ယမန်နှစ် အလားတူကာလနှင့် နှိုင်းယှဉ်ပါက ဝမ် ၂၈.၆ ထရီလီယံ (ဒေါ်လာ ၂၀.၂ ဘီလီယံ) တိုးလာကြောင်း စီးပွားရေးနှင့် ဘဏ္ဍာရေးဝန်ကြီးဌာနထုတ်ပြန်ချက်အရသိရသည်။ ကော်ပို ရိတ်နှင့် ဝင်ငွေခွန်ကောက်ခံမှုသည် ဝမ် ၁၇.၈ ထရီလီယံ (ဒေါ်လာ ၁၂.၆ ဘီလီယံ) နှင့် ဝမ် ၉.၆ ထရီလီယံ (၆.၈ ဘီလီယံဒေါ်လာ) တိုးသွားသော်လည်း တန်ဖိုးထပ်တိုးအခွန်ငွေ ဝမ် ၁.၂ ထရီလီယံ (ဒေါ်လာ ၈၄၆ သန်း) ကို ကိုးကားဖော်ပြသည့် ကာလတွင် လျော့ကျသွားခဲ့သည်။ အခွန်နှင့် အခွန် မဟုတ်သော ၀င်ငွေ အပါအဝင် စုစုပေါင်း ဝင်ငွေသည် ဇန်နဝါရီမှ ဩဂုတ်လအတွင်း စုစုပေါင်း ဝမ် ၄၃၁.၇ ထရီလီယံ (ဒေါ်လာ ၃၀၄.၃ ဘီလီယံ) ရှိပြီး ယခင်နှစ်ကထက် ဝမ် ၃၅ ထရီလီယံ (ဒေါ်လာ ၂၄.၇ ဘီလီယံ) တိုးလာသည်။ စုစုပေါင်းအသုံးစရိတ်သည် ယခုနှစ်အတွင်း ဝမ် ၃၈.၄ ထရီလီယံ (ဒေါ်လာ ၂၇.၁ ဘီလီယံ) တိုးလာခဲ့ပြီး ယခုနှစ် ပထမ ရှစ်လတွင် ဝမ် ၄၈၅.၄ ထရီလီယံ (ဒေါ်လာ ၃၄၂.၂ ဘီလီယံ) တိုးလာခဲ့သည်။ လူမှုဖူလုံရေးရန်ပုံငွေမှအပ စီမံခန့်ခွဲသောဘဏ္ဍာရေး လက်ကျန် သည် ဇန်နဝါရီမှသြဂုတ်လအတွင်း လိုငွေပြမှု ၈၈.၃ ထရီလီယံဝမ် (၆၂.၃ ဘီလီယံဒေါ်လာ) ကို မှတ်တမ်းတင်ခဲ့သည်။ ဗဟိုအစိုးရ၏ကြွေးမြီသည် သြဂုတ်လကုန်တွင် ဝမ် ၁၂၆၀.၉ ထရီလီယံ (ဒေါ်လာ ၈၈၈.၉ ဘီလီယံ) သို့ အစောပိုင်းလကထက် ဝမ် ၂၀.၄ ထရီလီယံ (ဒေါ်လာ ၁၄.၄ ဘီလီယံ) တိုးလာခဲ့သည်။

DOCA(ရန်ကုန်)

           ဇန်နဝါရီမှ စက်တင်ဘာလအတွင်း ဂျပန်နိုင်ငံသို့ နိုင်ငံခြားခရီးသွားဧည့်သည် ဦးရေ ၃၁.၆၅ သန်းဝန်းကျင် တိုးလာခဲ့ပြီး ယခုနှစ် ပထမကိုး လအတွင်း သန်း ၃၀ ကျော် စံချိန်တင်ခဲ့ကြောင်း တရားဝင်အချက်အလက်များအရ သိရသည်။ ကိုးလတာ ကိန်းဂဏန်းသည် ၂၀၂၄ ခုနှစ် အလားတူ ကာလထက် ၁၇.၇ ရာခိုင်နှုန်း မြင့်တက်လာပြီး နှစ်စဉ် ၃၆.၈၇ သန်းဝင်ရောက်သည့် စံချိန်ကို ကျော် လွန်သွားမည်ဖြစ်ကြောင်း ဂျပန်အမျိုးသားခရီးသွားလုပ်ငန်းအဖွဲ့၏ အချက်အလက်များအရ သိရ သည်။

       နိုင်ငံခြားဧည့်သည်များသည် ယခုနှစ် ပထမကိုးလအတွင်း တည်းခိုနေထိုင်ခြင်း၊ ဈေးဝယ်ခြင်း နှင့် အခြားသုံးစွဲမှုများအတွက် ယန်းငွေ ၆.၉ ထရီလီယံ (အမေရိကန်ဒေါ်လာ ၄၅.၅ ဘီလီယံခန့်) သုံးစွဲ ခဲ့ကြောင်း ကိန်းဂဏန်းအချက်အလက်များအရသိရသည်။

     တစ်ချိန်တည်းတွင်ပင် စက်တင်ဘာလ နိုင်ငံခြားဧည့်သည်အရေအတွက်သည် လွန်ခဲ့သည့် နှစ်ကထက် ၁၃.၇ ရာခိုင်နှုန်း တိုးလာခဲ့ပြီး ၃.၂၆ သန်းကျော်ရှိကာ ပထမဆုံး အကြိမ်အဖြစ် ၃ သန်း အထိ ရောက်ရှိလာခဲ့ကြောင်း အဆိုပါအဖွဲ့အစည်းထုတ်ပြန်ချက်မှ သိရသည်။

DOCA(ရန်ကုန်)