ပြည်ပကုန်သွယ်မှုသတင်းများ

                   မလေးရှားနိုင်ငံသည် ၂၀၂၅ ခုနှစ် ပထမ ၉ လ အတွင်း အတည်ပြုထားသော ရင်းနှီးမြှုပ်နှံ မှုများသည် ရမ်းဂစ် ၂၈၅.၂ ဘီလီယံ (အမေရိကန်ဒေါ်လာ ၆၈.၃၆ ဘီလီယံ)  ရှိခဲ့ပြီး ယခင်နှစ် ကထက် ၁၃.၂ ရာခိုင်နှုန်း တိုးလာခဲ့ကြောင်း မလေးရှားရင်းနှီးမြှုပ်နှံမှု ဖွံ့ဖြိုးတိုးတက်ရေး အာဏာပိုင်အဖွဲ့  (MIDA) က နိုဝင်ဘာလ ၁၈ ရက်နေ့တွင် ပြောကြားခဲ့ပါသည်။

                   MIDA က ထုတ်ပြန်ချက်တွင် အတည်ပြုထားသော စီမံကိန်း ၄၈၇၄ ခုဟာ ကုန်ထုတ် လုပ်မှု၊ ဝန်ဆောင်မှုနှင့် အခြေခံကဏ္ဍများ ပါဝင်ပြီး အကိုင်အကိုင်သစ် ၁၅၂၇၆၆ နေရာ ဖန်တီး နိုင်မည်ဖြစ်ကြောင်း ခန့်မှန်းထားပါသည်။ နိုင်ငံခြားရင်းနှီးမြှုပ်နှံမှုသည် ယခင်နှစ်ကထက် ၄၇.၅ ရာခိုင်နှုန်း တိုးတက်လာခဲ့ပြီး ကဏ္ဍ သုံးခုလုံးတွင် အကျိုးအမြတ်ရရှိခဲ့ပါသည်။

                  ကမ္ဘာလုံးဆိုင်ရာရင်းနှီးမြှုပ်နှံမှုများ ကျဆင်းနေသော်လည်း အရည်အသွေးရှိသော ရင်းနှီး မြှုပ်နှံမှုများ ရှိနေဆဲဖြစ်ကြောင်း ၊ နိုင်ငံရေးတည်ငြိမ်မှုနှင့် စီးပွားရေးအမြင်အပေါ်တွင် ရင်းနှီး မြှုပ်နှံသူများ၏အမြင်ကို ထင်ဟပ်စေကြောင်း မလေးရှား ရင်းနှီးမြှုပ်မှု၊ ကုန်သွယ်ရေးနှင့် စက်မှုဝန်ကြီး Tengku  Zafrul Aziz ကပြောကြားခဲ့ပါသည်။

DOCA(ရန်ကုန်)

     မလေးရှားနိုင်ငံ၏ စားအုန်းဆီကြမ်း (CPO) ထုတ်လုပ်မှုသည် ၂၀၂၄ ခုနှစ်တွင် တန်ချိန် ၁၉.၃ သန်းသာရှိခဲ့သော်လည်း ၂၀၂၅ ခုနှစ်တွင် တန်ချိန် ၁၉.၅ သန်းအထိရှိမည်ဟု ခန့်မှန်းထားပြီး ထုတ်လုပ်မှုတိုးတက်နိုင်မည်ဟု ခန့်မှန်းထားကြောင်း The Edge Malaysia သတင်းဌာနက နိုဝင်ဘာ လ ၂၁ ရက်နေ့တွင် ဖော်ပြထားသည်။

     မလေးရှားစားအုန်းဆီဘုတ်အဖွဲ့ (MPOB) မှ ဥက္ကဋ္ဌ Datuk Mohamad Helmy Othman Basha က ယခုနှစ်သည် နှစ်ကုန်ကာလ မရောက်ရှိသေးသော်လည်း လက်ရှိခန့်မှန်းချက်များအရ နှစ်လိုဖွယ်ရာ စျေးနှုန်းဖြစ်ပေါ်မှုနှင့်အတူ နိုင်ငံအတွင်း စားအုန်းဆီကြမ်းထုတ်လုပ်မှုသည် မြင့်မား ဖွယ်ရှိကြောင်း ထောက်ပြပြောဆိုပါသည်။

     လက်ရှိအချိန်အထိ စားအုန်းဆီဈေးနှုန်းများသည် ယခင်နှစ်ကထက် ပိုမြင့်မားလျက်ရှိသည်။ လက်ရှိ စားအုန်းဆီထုတ်လုပ်မှုနှင့် ဈေးနှုန်းများအရ မလေးရှား၏ ပို့ကုန်သည်လည်း ပိုမိုမြင့်မား နိုင်သည်ဟု နိုဝင်ဘာလ ၂၁ ရက်တွင် ကျင်းပသော အပြည်ပြည်ဆိုင်ရာ စားအုန်းဆီလုပ်ငန်း ကာကွယ်ရေးညီလာခံ (ICOPP) အခမ်းအနားအပြီး ပြုလုပ်သည့် သတင်းစာရှင်းလင်းပွဲတွင် MPOB ဥက္ကဋ္ဌ Mohamad Helmy က သတင်းထောက်များအား ပြောကြားခဲ့သည်။

     နှစ်ပတ်လည် အစီရင်ခံစာနှင့် ရှေ့လာမည့် အလားအလာသုံးသပ်ခြင်းတို့ကို ဆွေးနွေး ဆောင် ရွက်သည့် ညီလာခံကာလအတွင်း တစ်နှစ်တာ ကိန်းဂဏန်းအချက်အလက်များ ရရှိသည်နှင့် တစ်ပြိုင်နက် နောက်ဆုံးတင်ပို့ခဲ့သည့် ပို့ကုန်ဒေတာအချက်အလက်များကို ၂၀၂၆ ခုနှစ်၊ ဇန်နဝါရီလ တွင် ထုတ်ပြန်ကြေညာမည်ဖြစ်သည်ဟု ၎င်းက ဆက်လက် ပြောကြားခဲ့သည်။

     စားအုန်းဆီလုပ်ငန်းသည် စိန်ခေါ်မှုများစွာကို ရင်ဆိုင်နေရဆဲဖြစ်သော်လည်း မလေးရှား၏ စားအုန်းဆီကြမ်းထုတ်လုပ်မှုအနေဖြင့် ယခုနှစ်တွင် မြင့်တက်လာမည်ဟု Mohamad Helmy က မှတ်ချက်ပြုထားသည်။ စားအုန်းဆီလုပ်ငန်းတွင် ကြုံတွေ့ရသော စိန်ခေါ်မှုများတွင် အပျက်အစီး အများဆုံးဖြစ်ပေါ်ခြင်း၊ ပိုးမွှားများ၊ ရောဂါများ၊ ပေါင်းပင်များဝင်ရောက်ခြင်းတို့ကြောင့် နဂိုအတိုင်း ပြန်လည်ကောင်းမွန်မှု မရှိတော့ခြင်း၊ မြေဆီလွှာကျန်းမာရေးကျဆင်းခြင်းနှင့် ရာသီဥတု ပြောင်းလဲမှု၏ ဆိုးကျိုးသက်ရောက်မှုများလာခြင်းတို့ ပါဝင်သည်။ အဆိုပါ စိန်ခေါ်မှုများအပေါ် စီမံခန့်ခွဲမှု မပြုလုပ်ပါက ယခုခြိမ်းခြောက်မှုများက ဆယ်စုနှစ်များစွာတိုးတက်မှုကို ထိခိုက်စေပြီး ရေရှည်တည်တံ့မှုကိုပါ ထိခိုက်စေပါသည်ဟု ၎င်းက ပြောကြားခဲ့သည်။

     အဓိကစိုးရိမ်ရသည့်အချက်မှာ ဂါနိုဒါးမား ဘိုနိုက်စ်မှို (Ganoderma Boninense) ကြောင့် ဆီအုန်းပင်စည်ပုပ်ခြင်း ဖြစ်ပေါ်လျက် အရွက်ပြောက်အကွက်များနှင့် အဏုဇီဝပိုးမွှားရောဂါ ကျရောက်လာပြီး ဆီအုန်းထုတ်လုပ်မှုစွမ်းအားကို ဆက်လက်ထိခိုက်စေခြင်းဖြစ်ကြောင်း၊ ပိုးမွှားများနှင့် စပ်လျဉ်း၍ သစ်ခိုးကောင်ပိုးမွှား (bagworm) သည် ဆီအုန်းစိုက်ခင်းများတွင် တွေ့ရှိရသည့် အရေး ပါသော အရွက်စားပိုးမွှားများအနက် တစ်ခုအပါအဝင်ဖြစ်ပြီး ထိန်းချုပ်နိုင်မှုမရှိပါက ဆိုးရွားစွာ ဆီအုန်းအရွက်ကြွေကျခြင်းနှင့် အထွက်နှုန်းကျဆင်းခြင်းတို့ဖြစ်စေကြောင်း သိရှိရသည်။

     လက်ရှိအချိန်တွင် ဆီအုန်းပင်စည်ပုပ်ခြင်းနှင့် သစ်ခိုးကောင်ပိုးမွှား (bagworm) ကျရောက် ခြင်းတို့သည် မလေးရှားနိုင်ငံ၏ ဆီအုန်းကဏ္ဍအတွက် အဆိုးရွားဆုံး ပိုးမွှားနှင့် ရောဂါအန္တရာယ် ခြိမ်းခြောက်မှု နှစ်ခုဖြစ်နေခဲ့ကြောင်း The Edge Malaysia သတင်းဌာန၏ ဖော်ပြချက်ကို တင်ပြလိုက်ရပါသည်။

Source: The Edge Malaysia, 21 Nov 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    ဗီယက်နမ်နိုင်ငံ၏ ယခုနှစ် ပထမ ၁၀ လအတွင်း ဟောင်ကောင်နှင့် တရုတ်နိုင်ငံသို့ ပုစွန် တင်ပို့မှုမှ ဝင်ငွေဒေါ်လာ ၁.၁ ဘီလီယံရရှိခဲ့ရာ တိုးတက်မှု ၆၄ ရာခိုင်နှုန်းဖြင့် တင်ပို့သော ဈေးကွက် အားလုံးအနက် အမြင့်ဆုံးဖြစ်ခဲ့ကြောင်း သိရှိရပါသည်။

    ဗီယက်နမ်အနေဖြင့် အောက်တိုဘာလ တစ်လတည်းမှာပင် တန်ဖိုးဒေါ်လာသန်း ၁၄၀  ဖြင့် ၎င်းဈေးကွက်သို့ ပုစွန်တင်ပို့မှု အမြင့်ဆုံးစံချိန်တင်ခဲ့ကြောင်း ဗီယက်နမ် ပင်လယ်ရေထွက်ကုန် တင်ပို့သူများနှင့် ထုတ်လုပ်သူများအသင်း၏ နောက်ဆုံးထုတ် အစီရင်ခံစာတွင် ဖော်ပြထားပါသည်။ အဆိုပါ လ၌ ပုစွန်တင်ပို့မှု စုစုပေါင်းတန်ဖိုးမှာ ‌ဒေါ်လာ ၄၉၈ သန်းရှိခဲ့ပြီး ယခင်နှစ်ကာလတူနှင့် နှိုင်းယှဉ်ပါက ၂၆ ရာခိုင်နှုန်းအထိ မြင့်တက်ခဲ့ကြောင်း သိရှိရပါသည်။ အဓိက ဈေးကွက်များ၏ ဝယ်လိုအားများပြားခြင်းနှင့် လုပ်ငန်းရှင်များ၏ ကြိုးပမ်းအားထုတ်မှုများကြောင့် ယခုတင်ပို့မှုသည် လစဉ်တင်ပို့မှုများအနက် အများဆုံးဖြစ်ခဲ့သည်။

     ၂၀၂၅ ခုနှစ် ပထမ ၁၀ လအတွင်း ပုစွန်တင်ပို့မှု စုစုပေါင်းတန်ဖိုးသည် ဒေါ်လာ ၃.၉ ဘီလီယံ ရှိပြီး ယခင်နှစ်ကာလတူနှင့် နှိုင်းယှဉ်ပါက ၂၂ ရာခိုင်နှုန်းမြင့်တက်ခဲ့ပါသည်။ အောက်တိုဘာလတွင် ပုစွန်အရှင်များ၊ လတ်ဆတ်ပုစွန်များနှင့် အေးခဲပုစွန်များ ဝယ်လိုအားမြင့်မားသော တရုတ်နိုင်ငံသို့ တင်ပို့မှု သိသာစွာမြင့်တက်မှုနှင့်အတူ ပုစွန်ဖြူ တင်ပို့မှုက အများအပြားပါဝင်ခဲ့သည်။

   ပစိတ်ဖိတ်ဒေသဖြတ်ကျော် မိတ်ဖက်ဆောင်ရွက်ရေးဆိုင်ရာ ဘက်စုံတိုးတက်မှု သဘောတူညီချက်အောက်တွင် ဂျပန်၊ ကနေဒါနှင့် ဩစတြေးလျတို့မှ ဝယ်ယူမှုဆက်လက်ရှိနေပြီး ဈေးကွက် အတွင်းသို့ ‌တန်ဖိုးဒေါ်လာ ၁ ဘီလီယံကျော်ဖြင့် ၃၃ ရာခိုင်နှုန်း  တိုးတက်လျက် တင်ပို့နိုင်ခဲ့ကြောင်း၊ အီကွေဒေါနှင့် အိန္ဒိယတို့မှ ဈေးကွက်ယှဉ်ပြိုင်မှုပြင်းထန်လျက်ရှိသော်လည်း ဝယ်လိုအားများပြားနေမှုအရ အမေရိကန်ဈေးကွက်သို့ ပုစွန်တန်ဖိုး ဒေါ်လာ ၇၀၂ သန်း တင်ပို့လျက် ၉ ရာခိုင်နှုန်း တိုးတက်မှုရရှိခဲ့ကြောင်း၊ ပုစွန်ဖြူတင်ပို့မှု တန်ဖိုးသည် ဒေါ်လာ ၂.၅ ဘီလီယံရှိခဲ့ပြီး စုစုပေါင်း တင်ပို့ မှု၌ ၆၅ ရာခိုင်နှုန်းနီးပါးရှိခဲ့ကြောင်း၊ ဈေးကွက်အသီးသီးမှ ဝယ်လိုအား ကောင်းမွန်မှုနှင့် ဈေးနှုန်းအရ ယှဉ်ပြိုင်စွမ်းရှိခြင်းတို့ကြောင့် ယင်းပုစွန်အမျိုးအစား တင်ပို့မှုသည် လျင်မြန်စွာ မြင့်တက်လာခြင်း ဖြစ်ကြောင်း၊ အစဉ်အလာအရ ဝယ်ယူမှုရှိသည့် ဂျပန်နိုင်ငံနှင့် ပုစွန်ကျား အကောင်ကြီး ဝယ်လိုအား များပြားသည့် တရုတ်နိုင်ငံတို့ကဲ့သို့သော ဈေးကွက်များသို့ ပုစွန်ကျားတင်ပို့မှုသည် ဒေါ်လာ ၃၈၅ သန်းရှိခဲ့ပြီး အခြားအေးခဲပုစွန်တင်ပို့မှုသည် စုစုပေါင်း ဒေါ်လာ ၉၉၁ သန်းရှိကြောင်း သိရှိရပါသည်။

Source : Vietnam Plus, 24/11/2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ထိုင်းဝန်ကြီးချုပ်နှင့် ပြည်ထဲရေးဝန်ကြီးဖြစ်သူ Anutin Charnvirakul  သည် ၂၀၂၅ ခုနှစ် ဒီဇင်ဘာလ ၁၄ ရက်နေ့တွင်ကျင်းပမည့် မဲခေါင်-လန်ချန်းဖိုရမ်တွင် ဆန်တန်ချိန် ၅ သိန်းရောင်းချမည့် ဆန်ကုန်သွယ်မှု သဘောတူညီချက် (MOU) ကို လက်မှတ်ရေးထိုးရန် တရုတ်နိုင်ငံဝန်ကြီးချုပ် Li Qiang နှင့် တွေ့ဆုံလိမ့်မည်ဟု ထိုင်းနိုင်ငံခြားရေးဝန်ကြီး Sihasak Phuangketkeow က နိုဝင်ဘာလ ၂၅ ရက်နေ့တွင် ထုတ်ဖော် ပြောကြားခဲ့ပါသည်။

       မဲခေါင်-လန်ချန်း ပူးပေါင်းဆောင်ရွက်မှုဖိုရမ် ကျင်းပနေစဉ်အတွင်း အဆိုပါ ဆန်ကုန်သွယ်မှု သဘောတူညီချက် (MOU) ကို တရားဝင် လက်မှတ်ရေးထိုးနိုင်ရေး ဆောင်ရွက်မည်ဖြစ်ကြောင်း၊ ၎င်းသဘောတူညီချက်၏ အသေးစိတ်အချက်အလက်များကို  ဆက်လက်ညှိနှိုင်းဆောင်ရွက်လျက် ရှိပြီး MOU ကို အစီအစဉ်အတိုင်း လက်မှတ်ရေးထိုးနိုင်ရန် မျှော်မှန်းထားကြောင်း Mr. Sihasak က ရှင်းလင်းပြောကြားခဲ့သည်။

      ဆန်ကုန်သွယ်မှုသည် ဆွေးနွေးပွဲများ၏ ဗဟိုအချက်အဖြစ် ပါဝင်သော်လည်း နှစ်နိုင်ငံကြား ပူးပေါင်းဆောင်ရွက်မှုဆိုင်ရာ အခြားခေါင်းစဉ်များကိုလည်း တင်ပြဆွေးနွေးနိုင်သည်ဟု ၎င်းက ဆို သည်။ ဆွေးနွေးရန် ဖြစ်နိုင်ခြေရှိသည့် အခြားနယ်ပယ်များနှင့် ပတ်သက်၍ လက်ရှိညှိနှိုင်းဆဲ ဖြစ် ကြောင်း Mr. Sihasak က ထပ်မံပြောကြားခဲ့သည်။

      ထိုင်းနိုင်ငံဆိုင်ရာ တရုတ်သံအမတ်ကြီး Zhang Jianwei က ဆန်ကုန်သွယ်မှုနှင့်စပ်လျဉ်း၍ လက်ရှိကာလ၌ ထိုင်းနှင့်တရုတ်နိုင်ငံတို့မှ သက်ဆိုင်ရာအဖွဲ့အစည်းများက ညှိနှိုင်းဆွေးနွေးလျက်ရှိ သည်ဟု နိုဝင်ဘာလ ၂၄ ရက်နေ့ အစောပိုင်းတွင် မီဒီယာများအား ပြောကြားခဲ့ကြောင်း သိရှိရသည်။

Source: The Nation Thailand, November 25, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     ဒေသအခြေအနေများနှင့် ကိုက်ညီသော အရည်အသွေးမြင့် ကုန်ထုတ်စွမ်းအားသစ်များ ဖွံ့ဖြိုးတိုးတက်မှု မြှင့်တင်ရေးနှင့် စပ်လျဉ်းသည့် တရုတ်ကွန်မြူနစ်ပါတီ (CPC) ဗဟိုကော်မတီ အထွေထွေအတွင်းရေးမှူးချုပ် ရှီကျင့်ဖိန်၏ ဆောင်းပါးတစ်ပုဒ်ကို နိုဝင်ဘာ ၁၆ ရက်၌ ထုတ်ပြန် သွားမည်ဖြစ်ကြောင်း သိရသည်။တရုတ်နိုင်ငံ သမ္မတ၊ ဗဟိုစစ်ကော်မရှင် ဥက္ကဋ္ဌလည်းဖြစ်သူ ရှီ ရေးသားထားသော အဆိုပါ ဆောင်းပါးအား CPC ဗဟိုကော်မတီ၏ အထင်ကရ မဂ္ဂဇင်းဖြစ်သည့် Qiushi ဂျာနယ်၏ ယခုနှစ်အတွင်း ၂၂ ကြိမ်မြောက် ထုတ်ဝေသော စာစောင်၌ ဖော်ပြသွား မည်ဖြစ်သည်။

    ထိုဆောင်းပါးသည် ၂၀၂၃ ခုနှစ် စက်တင်ဘာလမှ ၂၀၂၅ ခုနှစ် ဧပြီလအထိ ရှီ မိန့်ကြား့သည့် အရေးကြီး မှတ်ချက်စကား စုစည်းကောက်နုတ်ချက်များအပေါ် အခြေခံရေးသားထားခြင်း ဖြစ်ကြောင်း သိရသည်။

     အရည်အသွေးမြင့် ကုန်ထုတ်စွမ်းအားသစ်များကို အဓိကအားဖြင့် ဆန်းသစ်တီထွင်မှုဖြင့် မောင်းနှင် တွန်းအား ပေးလျက်ရှိကာ ယင်းကုန်ထုတ်စွမ်းအားသစ်များမှာ အဆင့်မြင့်နည်းပညာ၊ စွမ်းဆောင်ရည်မြင့်မားမှု၊ အရည်အသွေးမြင့်မားမှု စသည့် စရိုက်လက္ခဏာများကို ဖော်ကျူးလျက်ရှိ ပြီး ဖွံ့ဖြိုးတိုးတက်မှု အတွေးအမြင်သစ်နှင့် ကိုက်ညီသော အဆင့်မြင့် ကုန်ထုတ်စွမ်းအားပုံစံ တစ်မျိုးပင်ဖြစ်ကြောင်း ထိုဆောင်းပါး၌ ရေးသားဖော်ပြထားသည်။

    သိပ္ပံနှင့်နည်းပညာ တီထွင်ဆန်းသစ်မှုနှင့် စက်မှုလုပ်ငန်း တီထွင်ဆန်းသစ်မှုတို့မှာ အရည် အသွေးမြင့် ကုန်ထုတ်စွမ်းအားသစ်များ ဖွံ့ဖြိုးတိုးတက်စေရေးအတွက် အခြေခံလမ်း ကြောင်းများ ပင်ဖြစ်ကြောင်း၊ ယင်းတို့အား တစ်သားတည်းပေါင်းစည်းရာတွင် ပလက်ဖောင်းများတည်ဆောက် ခြင်း၊ ယန္တရားနှင့်စနစ်များ တိုးတက်ကောင်းမွန်အောင် လုပ်ဆောင်ခြင်းနှင့် ဆန်းသစ်တီထွင်မှုနယ်ပယ်တွင် ပုဂ္ဂလိက စီးပွားရေး လုပ်ငန်းများ၏ အခန်းကဏ္ဍ ခိုင်မာအားကောင်းအောင် လုပ်ဆောင်ခြင်းတို့ကို လိုအပ်လျက်ရှိကြောင်း ယင်းဆောင်းပါး၌ ဖော်ပြထားသည်။

   ထို့ပြင် အရည်အသွေးမြင့် ဖွံ့ဖြိုးတိုးတက်မှုကို အဟန့်အတားဖြစ်စေသော အဖွဲ့အစည်းဆိုင်ရာ အတားအဆီးများကို ယတိပြတ်ဖယ်ရှားရန်၊ အရည်အသွေးမြင့် ကုန်ထုတ်စွမ်းအားသစ်များကို ပိုမိုကောင်းမွန်စွာ ချိန်ညှိနိုင်ရေးအတွက် ကုန်ထုတ်လုပ်မှုဆိုင်ရာ ဆက်ဆံရေးတိုးမြှင့်ရန် အဆိုပါ ဆောင်းပါး၌ တိုက်တွန်းထားသည်။

    ၁၅ ကြိမ်မြောက် ငါးနှစ်စီမံကိန်းကာလ (၂၀၂၆-၂၀၃၀) အတွင်း ဒေသအခြေအနေများနှင့် ကိုက်ညီသော အရည်အသွေးမြင့် ကုန်ထုတ်စွမ်းအားသစ်များ ဖွံ့ဖြိုးတိုးတက်မှုမြှင့်တင်ရေးအတွက် မဟာဗျူဟာပိုင်းအရ ပိုမိုအလေးထားလုပ်ဆောင်မှုများကို လိုအပ်ကြောင်း၊ ဒေသများအနေနှင့်လည်း စက်မှုကုန်ထုတ်လုပ်ငန်းသစ်များ ဖွံ့ဖြိုးတိုးတက်မှု၊ စီးပွားရေးစံနမူနာများနှင့် ဖွံ့ဖြိုးတိုးတက်ရေး မောင်းနှင်အားများကို ယင်းတို့၏ အရင်းအမြစ် ပံ့ပိုးမှု၊ လုပ်ငန်းအခြေခံအုတ်မြစ်၊ သိပ္ပံနည်းကျ သုတေသနလုပ်ဆောင်မှု အခြေအနေများနှင့် အခြားသော အရင်းခံအကြောင်းရင်းများအပေါ် မူတည်၍ ထိထိရောက်ရောက် အဆင့်မြှင့်တင်သွားရန် တိုက်တွန်းထားကြောင်း သိရသည်။

Source: ဆင်ဟွာ                                                               

DOCA(ပြည်ထောင်စုနယ်မြေ)