ကမ္ဘောဒီးယားနိုင်ငံသည် ၂၀၂၅ ခုနှစ်၏ ပထမနှစ်ဝက်တွင် ရင်းနှီးမြှုပ်နှံမှုစီမံကိန်း ၃၇၃ ခုကို ဆွဲဆောင်နိုင်ခဲ့ပြီး ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ၉၆ ရာခိုင်နှုန်းမြင့်တက်ခဲ့ ကြောင်း ကမ္ဘောဒီးယားနိုင်ငံဖွံ့ဖြိုးတိုးတက်ရေးကောင်စီ (CDC) ကဇူလိုင်လ ၇ ရက်နေ့က ပြောကြားခဲ့ပါသည်။ ခွင့်ပြုခဲ့သည့် စာရင်းသေရင်းနှီးမြှုပ်နှံမှုစီမံကိန်းများမှာ အမေရိကန်ဒေါ်လာ ၅.၈ ဘီလီယံတန်ဖိုးရှိပြီး ၂၀၂၄ ခုနှစ် ပထမနှစ်ဝက်နှင့်နှိုင်းယှဉ်ပါက ၈၁ ရာခိုင်နှုန်းမြင့်တက်ခဲ့ ကြောင်း သိရပါသည်။ ထိုခွင့်ပြုခဲ့သည့်စီမံကိန်းများမှာ ပြည်တွင်းလူဦးရေ ၂၅၅၀၀၀ ကိုအလုပ် အကိုင်ဖန်တီးပေးနိုင်ကြောင်း သိရပါသည်။ စီမံကိန်းများတွင် ကုန်ထုတ်လုပ်သည့်စက်ရုံများ၊ ပြည့်ဖြိုးမြဲစွမ်းအင်၊ ခရီးသွားကဏ္ဍနှင့် စိုက်ပျိုးမွေးမြူရေးလုပ်ငန်းကဏ္ဍအစရှိသည့် အခြေခံ အဆောက်အအုံတို့ပါဝင်ကြောင်း သိရပါသည်။ စီမံကိန်း ၂၁၆ ခုမှာ အထူးစီးပွားရေးဇုန်များ၏ ပြင်ပတွင်ရှိပြီး ၁၅၇ ခုမှာ အထူးစီးပွားရေးဇုန်များထဲတွင် တည်ရှိကြောင်း သိရပါသည်။ တရုတ်နိုင်ငံသည် နိုင်ငံခြားတိုက်ရိုက်ရင်းနှီးမြှုပ်နှံမှုတွင် ထိပ်ဆုံးမှရပ်တည်ခဲ့ပြီး စုစုပေါင်း ရင်းနှီး မြှုပ်နှံမှုအရင်းအမြစ်၏ ၅၆.၂၃ ရာခိုင်နှုန်းရှိကာ ၎င်း၏နောက်တွင် ပြည်တွင်းရင်းနှီးမြှုပ်နှံသူများ၊ စင်ကာပူနှင့် ဗီယက်နမ်ရင်းနှီးမြှုပ်နှံသူများက ရပ်တည်နေကြောင်း သိရပါသည်။ CDC ၏ ဒုတိယ ဥက္ကဌ ၁ နှင့် နိုင်ငံ၏ဒုတိယဝန်ကြီးချုပ်ဖြစ်သူ Sun Chanthol က ကမ္ဘောဒီးယား၏လျှင်မြန်စွာ ကြီးထွားလာမှုသည် ငြိမ်းချမ်းခြင်း၊ နိုင်ငံရေးနှင့် စီးပွားရေးတည်ငြိမ်ခြင်း၊ ဥပဒေမူဘောင် အားကောင်းခြင်းနှင့် အလုံးစုံစီးပွားရေးတိုးချဲ့ခြင်းတို့ပေါင်းစပ်မှုကြောင့်ဖြစ်ကြောင်း၊ အွန်လိုင်း ရင်းနှီးမြှုပ်နှံမှုလုပ်ငန်းပရိုဂရမ်သစ်သည်လည်း ရင်းနှီးမြှုပ်နှံသူများအတွက် အဆင်ပြေလွယ်ကူ စေကြောင်းနှင့် နိုင်ငံသည် ကုန်သွယ်ရေးနှင့် နိုင်ငံတကာရင်းနှီးမြှုပ်နှံသူများအတွက် မူဝါဒများ တံခါးဖွင့်ထားရန် ကတိကဝတ်ပြုကြောင်း ပြောကြားခဲ့ပါသည်။ ၂၀၂၄ ခုနှစ်တွင် ကမ္ဘောဒီးယား သည် စုစုပေါင်းမတည်ရင်းနှီးမြှုပ်နှံငွေ အမေရိကန်ဒေါ်လာ ၆.၉ ဘီလီယံတန်ဖိုးရှိသော စာရင်းသေရင်းနှီးမြှုပ်နှံမှုစီမံကိန်း ၄၁၄ ခုကို ဆွဲဆောင်နိုင်ခဲ့ကြောင်း သိရပါသည်။
Khmer Times
DOCA (ရန်ကုန်)