ပြည်ပကုန်သွယ်မှုသတင်းများ

        အင်ဒိုနီးရှားနိုင်ငံရွှေ့ပြောင်းအခြေချနေထိုင်ရေးဝန်ကြီးဌာန၏ ဒုတိယဝန်ကြီး Viva Yoga Mauladi က ရာဘာစိုက်ပျိုးရေးလုပ်ငန်းရှင်များ၏ ထုတ်လုပ်မှုနှင့် ဝင်ငွေတိုးမြှင့်နိုင်ရန် ဝန်ကြီးဌာနအနေဖြင့် အဆင်သင့်ကူညီပံ့ပိုးပေးသွားမည်ဖြစ်ကြောင်း ပြောကြားခဲ့ပါသည်။ Mauladi က ပြည်တွင်းစီးပွားရေးဖွံ့ဖြိုးတိုးတက်မှုကို မြှင့်တင်နိုင်ရန်အတွက် ဒေသခံစိုက်ပျိုးရေးအသိုင်းအဝိုင်းများကို အားပေးမြှင့်တင်ခြင်းသည်အရေးကြီးကြောင်း၊ အင်ဒိုနီးရှားနိုင်ငံတစ်ဝန်းတွင် ရာဘာစိုက်ပျိုးသူ အိမ်ထောင်စု ၂.၁ သန်းခန့်ရှိပြီး အများစုမှာ Sumatra နှင့် Kalimantan ဒေသများတွင် နေထိုင်ကြကြောင်း၊ လက်ရှိ သို့မဟုတ် ယခင်ရွှေ့ပြောင်းအခြေချဒေသများရှိ ပြည်သူများ၏ဝင်ငွေ တိုးတက်လာပြီး သာယာဝပြောမှုရရှိစေရန် ဤကိစ္စသည်အရေးကြီးကြောင်း၊ ထိုရည်မှန်းချက် အောင်မြင်ရန်အတွက် ဝန်ကြီးဌာနများအကြား ပူးပေါင်းဆောင်ရွက်မှုနှင့် ညှိနှိုင်းဆောင်ရွက်မှုလိုအပ်ကြောင်းနှင့် အထူးသဖြင့် စိုက်ပျိုးမွေးမြူရေးဝန်ကြီးဌာန၊ အမျိုးသားသုတေသနနှင့် ဆန်းသစ်တီထွင်မှုအေဂျင်စီ (BRIN) နှင့် Ministry of Public Works တို့ကဲ့သို့ နည်းပညာဆိုင်ရာ ဝန်ကြီးဌာနများနှင့် ပူးပေါင်းရန်လိုအပ်ကြောင်း မေလ ၂၃ ရက်နေ့က ပြောကြားခဲ့ပါသည်။ ထိုပူးပေါင်းဆောင်ရွက်မှုများသည် ရာဘာစိုက်ပျိုးသူများ၏ ထုတ်လုပ်မှုတိုးတက်စေရန်၊ ဝင်ငွေမြှင့်တင်ရန်နှင့် ရာဘာရိတ်သိမ်းထုတ်ကုန် အရည်အသွေးကိုမြှင့်တင်ကာ တန်ဖိုးတိုးမြှင့်နိုင်ရန် ရည်ရွယ်ထားကြောင်း သိရပါသည်။ ထို့ပြင် အသေးစား ရာဘာစိုက်ပျိုးသူများအပေါ် အခြေခံသည့် စက်မှုလုပ်ငန်းဖွံ့ဖြိုးရေးလုပ်ငန်းစဉ်များလိုအပ်ပြီး ထိုသို့ဆောင်ရွက်ခြင်းဖြင့် ရေရှည်တည်တံ့စွာ ဖွံ့ဖြိုးတိုးတက်နိုင်မည့် တန်ဖိုးတိုးလာမှုကို ရရှိနိုင်မည်ဟု သိရပါသည်။ Mauladi က ရာဘာသည် ရှေးယခင်ကတည်းက အဓိကကုန်စည်တစ်ရပ်ဖြစ်ခဲ့ပြီး ယနေ့တိုင်လည်း ပို့ကုန်အဖြစ် အရေးပါနေဆဲဖြစ်ကြောင်း၊ အင်ဒိုနီးရှားသည် ထိုင်းနိုင်ငံပြီးလျှင် ကမ္ဘာပေါ်တွင် ဒုတိယအကြီးဆုံး ရာဘာတင်ပို့သည့်နိုင်ငံဖြစ်ကြောင်း၊ သို့သော် ရာဘာစိုက်ပျိုးသူများ၏ ၉၀ ရာခိုင်နှုန်းခန့်မှာ အသေးစားစိုက်ပျိုးသူများဖြစ်ပြီး ကျန်အနည်းငယ်သာ အစိုးရပိုင်လုပ်ငန်းများနှင့် ပုဂ္ဂလိက ကုမ္ပဏီများပိုင်ဆိုင်ကြောင်း ပြောကြားခဲ့ပါသည်။ ၎င်း၏အဆိုအရ ပထမဆုံးစိန်ခေါ်မှုမှာ ရာဘာပင်အများစုသည် အသက် ၂၅ နှစ်ကျော်လာပြီဖြစ်သဖြင့် ထုတ်လုပ်မှုကျဆင်းနေကာ ပြန်လည်စိုက်ပျိုးရန် လိုအပ်နေခြင်းဖြစ်ကြောင်း သိရပါသည်။ ဒုတိယအနေဖြင့် ဓာတ်မြေဩဇာအသုံးပြုမှု၊ အခြေခံအဆောက်အအုံနှင့် လမ်းကွန်ရက်ဖွံ့ဖြိုးရေး စသည့်နည်းလမ်းများဖြင့် ရာဘာစိုက်ခင်းများ၏ ထုတ်လုပ်မှုတိုးတက်စေရန် ဆောင်ရွက်ရန်လိုအပ်ကြောင်း သိရပါသည်။ တတိယအနေဖြင့် ရာဘာပင်များ၏ထုတ်လုပ်မှုစွမ်းရည်တိုးမြှင့်နိုင်ရန် မျိုးစေ့အသစ်များ ဖွံ့ဖြိုးတိုးတက်ရေးအတွက် သုတေသနလုပ်ငန်းများလိုအပ်ကြောင်း သိရှိရပါသည်။

Antara News                                                                             

DOCA (ရန်ကုန်)

         အင်ဒိုနီးရှားနိုင်ငံပိုင် ထောက်ပံ့ပို့ဆောင်ရေးကုမ္ပဏီ Bulog သည် လက်ရှိတွင် ဆန်သိုလှောင်မှုပမာဏကို စံချိန်တင်တန်ချိန် ၅.၃၆ သန်းအထိ စီမံခန့်ခွဲထားပြီး နိုင်ငံတဝန်း သိုလှောင်နိုင်စွမ်းကိုလည်း တန်ချိန် ၆.၂ သန်းအထိ တိုးချဲ့ထားကြောင်း သိရပါသည်။ Bulog ဥက္ကဋ္ဌ Ahmad Rizal Ramdhani က မေလ ၂၅ ရက်နေ့တွင် ပြောကြားရာ၌ နိုင်ငံ၏ ဆန်ထုတ်လုပ်မှုမြင့်တက်လာမှုနှင့် အညီ သိုလှောင်နိုင်စွမ်းကို ဆက်လက်တိုးမြှင့်သွားမည်ဖြစ်ပြီး ဆန်လက်ကျန်စီမံခန့်ခွဲမှုကို ပိုမိုကောင်းမွန်စေရန်နှင့် အစားအသောက်ဈေးကွက်တည်ငြိမ်ရေးကို အားကောင်းစေရန် ရည်ရွယ်ထားကြောင်း ပြောဆိုခဲ့ပါသည်။ ဝယ်ယူစုဆောင်းမှုဘက်တွင်လည်း Bulog သည် ၂၀၂၆ ခုနှစ်အတွက် သတ်မှတ်ထားသော ဆန်တန်ချိန် ၄ သန်း ရည်မှန်းချက်အနက် လက်ရှိတွင်တန်ချိန် ၂.၈ သန်းခန့်ကို ပြည်တွင်းမှ စုဆောင်းထားပြီးဖြစ်ကြောင်း သိရပါသည်။ Ramdhani က ထိုအောင်မြင်မှုသည် ပြည်တွင်းစိုက်ပျိုးရေးသမားများကို အားပေးထောက်ပံ့ပေးရာတွင် Bulog ၏ တက်ကြွသော အခန်းကဏ္ဍကို ဖော်ပြသကဲ့သို့ အမျိုးသားစားနပ်ရိက္ခာ အရန်သိုလှောင်မှုကိုလည်း ခိုင်မာစေကြောင်း၊ ပြည်တွင်းထုတ်လုပ်မှုကို စုဆောင်းဝယ်ယူခြင်းက ဆန်လုံလောက်မှုကို အာမခံပေးရုံသာမက ထုတ်လုပ်သူများနှင့် စားသုံးသူများအတွက် ဈေးနှုန်းတည်ငြိမ်မှုကိုလည်း ထိန်းသိမ်းပေးနိုင်ကြောင်း၊ Bulog သည် အင်ဒိုနီးရှားနိုင်ငံတဝန်းတွင် ဂိုဒေါင်များ၊ ထောက်ပံ့ပို့ဆောင်ရေးကွန်ယက်များနှင့် စပါး၊ ဆန်ပြုပြင်ထုတ်လုပ်ရေးစက်ရုံများအပါအဝင် အခြေခံအဆောက်အအုံကွန်ယက် ကျယ်ပြန့်စွာတည်ဆောက်ထားကြောင်းနှင့် ရေရှည်စားနပ်ရိက္ခာ ဖူလုံမှုရရှိရန်အတွက် ကဏ္ဍစုံပူးပေါင်းဆောင်ရွက်မှုလိုအပ်ပြီး တက္ကသိုလ်များအနေဖြင့် အသိပညာ၊ သုတေသန၊ နည်းပညာတီထွင်မှုနှင့် အတွေးအခေါ်သစ်များ ဖန်တီးရာဗဟိုများအဖြစ် တက်ကြွစွာပါဝင်သင့်ကြောင်း ပြောကြားခဲ့ပါသည်။ Ramdhani ၏အဆိုအရ စားနပ်ရိက္ခာဖူလုံမှု အားကောင်းလာစေရန်မှာ ထုတ်လုပ်မှုပမာဏတိုးမြှင့်ခြင်း တစ်ခုတည်းမဟုတ်ဘဲ လယ်သမားများ၏ သီးနှံထွက်ရှိမှုကို စနစ်တကျဝယ်ယူနိုင်ခြင်း၊ အရန်ရိက္ခာ ထိန်းသိမ်းနိုင်ခြင်း၊ ရိတ်သိမ်းပြီးနောက်ပိုင်း အခြေခံအဆောက်အအုံများ တိုးတက်ကောင်းမွန်လာခြင်းနှင့် စားနပ်ရိက္ခာကို လူထုအတွက် လုံလောက်စွာရရှိနိုင်ပြီး ဈေးနှုန်းသက်သာစွာ ထိန်းထားနိုင်ခြင်းတို့အပေါ် မူတည်ကြောင်း သိရပါသည်။ ယခုတိုးချဲ့မှုများမှာ ထုတ်လုပ်မှုတိုးတက်စေရန်၊ ရိတ်သိမ်းပြီးနောက် စီမံခန့်ခွဲမှုအရည် အသွေးမြှင့်တင်ရန်နှင့် ရေရှည်တည်တံ့သော စားနပ်ရိက္ခာဖူလုံရေးကို အထောက်အကူပြုရန် ရည်ရွယ်သည့် ရေရှည်မဟာဗျူဟာ၏ တစ်စိတ်တစ်ပိုင်းဖြစ်ကြောင်းလည်း ၎င်းက ထပ်လောင်းပြောကြားခဲ့သည်ဟု သိရှိရပါသည်။

Antara News                                                                             

DOCA (ရန်ကုန်)

       Bank Indonesia သည် သဘာဝသယံဇာတအရင်းအမြစ်တင်ပို့မှုဝင်ငွေ (DHE SDA) ဆိုင်ရာ စည်းမျဉ်းကိုတိုးချဲ့ပြင်ဆင်ကာ အမေရိကန်ဒေါ်လာမဟုတ်သော နိုင်ငံခြားငွေများအထူးသဖြင့် တရုတ်ယွမ်ငွေကို နိုင်ငံပိုင်ဘဏ်များတွင် အပ်နှံခွင့်ပြုလိုက်ကြောင်း သိရပါသည်။ ဗဟို ဘဏ်၏ term-deposit အစီအစဉ်တိုးချဲ့မှုအရ ပို့ကုန်လုပ်ငန်းရှင်များသည် အမေရိကန်ဒေါ်လာ မဟုတ်သော နိုင်ငံခြားငွေဝင်ငွေများကို နိုင်ငံပိုင်ဘဏ်များတွင် အများဆုံး ၁၂ လအထိ အပ်နှံထားနိုင်မည်ဖြစ်ကြောင်း သိရပါသည်။ မေလ ၂၁ ရက်နေ့တွင် ဂျာကာတာ၌ ကျင်းပသော စည်းမျဉ်းဆိုင်ရာရှင်းလင်းပွဲတွင် Bank Indonesia အုပ်ချုပ်ရေးမှူး Perry Warjiyo က သဘာဝသယံဇာတ အရင်းအမြစ်တင်ပို့မှုဝင်ငွေများမှာ ယခင်က အမေရိကန်ဒေါ်လာအပေါ် အဓိကမူတည်ခဲ့သော်လည်း ယခုအခါ စီးပွားရေးလုပ်ငန်းများအနေဖြင့် အခြားငွေကြေးများကို ပိုမိုအသုံးပြုနိုင်ပြီဖြစ်ကြောင်း ၎င်းတို့သည် အမေရိကန်ဒေါ်လာအပြင် အခြားငွေကြေးရွေးချယ်ခွင့်များကို တိုးချဲ့နေကြောင်း၊ Bank Indonesia သည် ပြည်တွင်းနိုင်ငံခြားငွေလဲလှယ်ဈေးကွက်ကို တိုးတက်စေရန် ဆောင်ရွက်နေပြီး တရုတ်ယွမ်ငွေမှာလည်း ပြည်တွင်းဈေးကွက်တွင်တက်ကြွစွာရောင်းဝယ်နေပြီဖြစ်ကြောင်း ပြောကြားခဲ့ပါသည်။ ထိုမူဝါဒပြောင်းလဲမှုသည် Local Currency Transactions (LCT) စနစ်မှ တစ်ဆင့် ပြည်တွင်း forex ဈေးကွက်ကိုခိုင်မာစေရန် ဗဟိုဘဏ်၏ရည်မှန်းချက်နှင့် ကိုက်ညီနေပြီး အထူးသဖြင့် အင်ဒိုနီးရှား၏ အကြီးဆုံးကုန်သွယ်ဖက်ဖြစ်သော တရုတ်နှင့် ပူးပေါင်းဆောင်ရွက်မှု ကို တိုးမြှင့်ခြင်းဖြစ်ကြောင်း သိရပါသည်။ Warjiyo ၏ ပြောကြားချက်အရ တရုတ်နှင့် နှစ်နိုင်ငံ သုံးဒေသခံငွေကြေးဖြင့် ကုန်သွယ်ငွေပေးချေမှုတန်ဖိုးမှာ မနှစ်က တစ်နှစ်လျှင် အမေရိကန် ဒေါ်လာ ၂၅ ဘီလီယံကျော်ရှိခဲ့ပြီး ၂၀၂၆ ခုနှစ်တွင် တစ်လလျှင် ပျမ်းမျှ အမေရိကန်ဒေါ်လာ ၃.၇ ဘီလီယံအထိ မြင့်တက်လာခဲ့ကြောင်း သိရပါသည်။ ပြည်တွင်းဘဏ်များနှင့် People’s Bank of China တို့အကြား သဘောတူညီမှုများအပြီးတွင် တရုတ်ယွမ်ငွေကို ကိုင်ဆောင်ထားသော စီးပွားရေးလုပ်ငန်းများသည် spot, swap နှင့် forward transaction များကို ပြည်တွင်းဈေးကွက်အတွင်း တိုက်ရိုက်ဆောင်ရွက်နိုင်ပြီဖြစ်ကြောင်း Warjiyo က ထပ်မံပြောကြားခဲ့ပါသည်။ ဗဟိုဘဏ်၏ ယခုပြင်ဆင်ချက်သည် ၂၀၂၆ ခုနှစ် ဇွန်လ ၁ ရက်နေ့မှ စတင်အသက်ဝင်မည့် အစိုးရ စည်းမျဉ်းအသစ်များမတိုင်မီ ကုန်ပစ္စည်းတင်ပို့သူများအတွက် လုပ်ငန်းဆောင်ရွက်ရာတွင် ပိုမို လွတ်လပ်မှုရရှိစေရန် ရည်ရွယ်ထားကြောင်း သိရပါသည်။ Government Regulations No. 2 and No. 21 of 2026 အရ သဘာဝသယံဇာတအရင်းအမြစ်တင်ပို့သူများသည် ၎င်းတို့၏ ပို့ကုန်ဝင်ငွေ ၁၀၀ ရာခိုင်နှုန်းကို အင်ဒိုနီးရှားနိုင်ငံ၏ နိုင်ငံပိုင်ဘဏ်စနစ်အတွင်း ပြန်လည်ထည့်သွင်းရမည်ဖြစ်ကြောင်း သိရပါသည်။ ထို့ပြင် အဆိုပါဝင်ငွေများအနက် ရေနံနှင့်သဘာဝဓာတ်ငွေ့ ကဏ္ဍအတွက် အနည်းဆုံး ၃၀ ရာခိုင်နှုန်းနှင့် ရေနံမဟုတ်သော ကဏ္ဍများအတွက် ၁၀၀ ရာခိုင်နှုန်းကို အထူးပြည်တွင်းအကောင့်များတွင် ထားရှိရမည်ဖြစ်ကြောင်း သိရပါသည်။ အဆိုပါ ငွေများကို ရေနံနှင့်ဓာတ်ငွေ့ကဏ္ဍအတွက် အနည်းဆုံး ၃ လနှင့် အခြားကုန်စည်ကဏ္ဍများအတွက် ၁၂ လကြာ ပြည်တွင်းတွင် ထိန်းသိမ်းထားရမည်ဖြစ်ကြောင်း သိရပါသည်။ ထူးခြားချက် တစ်ရပ်အနေဖြင့် နိုင်ငံခြားရင်းနှီးမြှုပ်နှံသူများအတွက် အစိုးရက အင်ဒိုနီးရှားရူပီးသို့ မဖြစ်မနေ ပြောင်းလဲရမည့်ပမာဏကို လျှော့ချပေးခဲ့ပြီး ကုမ္ပဏီများအနေဖြင့် ၎င်းတို့၏ ဝင်ငွေ ၅၀ ရာခိုင်နှုန်းအထိကို နိုင်ငံခြားငွေဖြင့် ဆက်လက်ထိန်းသိမ်းထားနိုင်မည်ဖြစ်ကြောင်း သိရှိရပါသည်။

Antara News                                                                             

DOCA (ရန်ကုန်)

        အမျိုးသားစာရင်းအင်းရုံးက ဇွန်လ ၃ ရက်နေ့တွင် ထုတ်ပြန်သည့် အချက်အလက်များအရ ၂၀၂၆ ခုနှစ်၏ ပထမ (၅) လအတွင်း ဗီယက်နမ်နိုင်ငံ၏ စုစုပေါင်း ကုန်သွယ်မှုပမာဏသည် ယခင်နှစ် ကာလတူထက် ၂၅ ရာခိုင်နှုန်း မြင့်တက်ခဲ့ပြီး အမေရိကန်ဒေါ်လာ ၄၄၅.၁၂ ဘီလီယံအထိ ရောက်ရှိခဲ့ကြောင်း သိရသည်။

         အဆိုပါ ကာလအတွင်း ပို့ကုန်တင်ပို့မှုသည် ယခင်နှစ် ကာလတူထက် ၁၉.၅ ရာခိုင်နှုန်း မြင့်တက်ကာ ဒေါ်လာ ၂၁၅.၆၆ ဘီလီယံရှိခဲ့ပြီး သွင်းကုန်တင်သွင်းမှုမှာမူ ၃၀.၈ ရာခိုင်နှုန်းအထိ သိသိသာသာ မြင့်တက်ခဲ့ပြီး ဒေါ်လာ ၂၂၉.၄၆ ဘီလီယံ ရှိခဲ့သည်။ ထို့ကြောင့် ကုန်သွယ်မှုလိုငွေ ပြောင်းပြန်ပြကာ ဒေါ်လာ ၁၃.၈ ဘီလီယံအထိ ရှိလာခဲ့သည်။ ယခင်နှစ် ကာလတူတွင်မူ ဗီယက်နမ်နိုင်ငံသည် ကုန်သွယ်မှုပိုငွေ ဒေါ်လာ ၅.၁ ဘီလီယံ ရရှိခဲ့ဖူးသည်။

       မေလတစ်လတည်းတွင် စုစုပေါင်း ပို့ကုန်-သွင်းကုန် ကုန်သွယ်မှုပမာဏသည် ဒေါ်လာ ၉၉.၀၇ ဘီလီယံအထိရှိခဲ့ရာ ဧပြီလထက် ၃.၂ ရာခိုင်နှုန်းနှင့် ယခင်နှစ် မေလထက် ၂၅.၈ ရာခိုင်နှုန်း ပိုမိုမြင့်မားလာခဲ့သည်။ မေလအတွင်း ပို့ကုန်တင်ပို့မှုမှာ ပြီးခဲ့သည့်လထက် ၂.၁ ရာခိုင်နှုန်း မြင့်တက်ကာ ဒေါ်လာ ၄၆.၉၃ ဘီလီယံရှိခဲ့ပြီး သွင်းကုန်မှာမူ ၄.၃ ရာခိုင်နှုန်း မြင့်တက်ကာ ဒေါ်လာ ၅၂.၁၄ ဘီလီယံရှိခဲ့သဖြင့် မေလတစ်လတည်း၌ပင် ကုန်သွယ်မှုလိုငွေ ဒေါ်လာ ၅.၂၁ ဘီလီယံအထိ ဖြစ်ပေါ်ခဲ့ကြောင်း သိရသည်။

       နိုင်ငံခြားရင်းနှီးမြှုပ်နှံမှုကဏ္ဍ (Foreign-invested sector) သည် ဗီယက်နမ်၏ ပို့ကုန်ကဏ္ဍတွင် အဓိကအခန်းကဏ္ဍမှ ဆက်လက်ဦးဆောင်နေပြီး၊ ယခင်နှစ်ထက် ၂၄.၇ ရာခိုင်နှုန်း မြင့်တက်ကာ တန်ဖိုးအားဖြင့် ဒေါ်လာ ၁၇၂.၁၆ ဘီလီယံအထိ တင်ပို့နိုင်ခဲ့သဖြင့် စုစုပေါင်း ပို့ကုန်ပမာဏ၏ နီးပါး ၈၀ ရာခိုင်နှုန်းခန့်အထိ ရှိခဲ့ကြောင်း သိရသည်။

           အုပ်စုအလိုက်ကြည့်ပါက ပြုပြင်မွမ်းမံပြီး စက်မှုကုန်ချောပစ္စည်းများ (Processed industrial goods) သည် ဗီယက်နမ်၏ အကြီးမားဆုံး ပို့ကုန်အမျိုးအစားအဖြစ် ဆက်လက်ရပ်တည်နေပြီး ပို့ကုန်ဝင်ငွေ ဒေါ်လာ ၁၉၃.၇၁ ဘီလီယံ ရရှိခဲ့ကာ စုစုပေါင်းပို့ကုန်၏ ၈၉.၈ ရာခိုင်နှုန်းကို ကိုယ်စားပြုနေသည်။ စိုက်ပျိုးရေးနှင့် သစ်တောထွက်ပစ္စည်းများ တင်ပို့မှုမှ ဒေါ်လာ ၁၅.၇၉ ဘီလီယံ ရရှိခဲ့ပြီး ရေထွက်ပစ္စည်း တင်ပို့မှုမှ ဒေါ်လာ ၄.၆၇ ဘီလီယံ ရရှိခဲ့ကြောင်း သိရသည်။

        အမေရိကန်ပြည်ထောင်စုသည် ဗီယက်နမ်၏ အကြီးမားဆုံး ပို့ကုန်စျေးကွက်အဖြစ် ကုန်သွယ်မှုပမာဏ ဒေါ်လာ ၆၉.၆ ဘီလီယံဖြင့် ဆက်လက်တည်ရှိနေပြီး၊ တရုတ်နိုင်ငံသည် ဗီယက်နမ်၏ အကြီးမားဆုံး သွင်းကုန်တင်သွင်းရာနိုင်ငံအဖြစ် ဒေါ်လာ ၉၂.၆ ဘီလီယံဖြင့် ထိပ်ဆုံးကရှိနေကြောင်း သိရှိရပါသည်။

Source : Vn Economy                                                                         

DOCA (ရန်ကုန်)

          ကမ္ဘောဒီးယားနိုင်ငံ၊ အလုပ်သမားရေးရာဝန်ကြီး Heng Sour က ၃၀-၅-၂၀၂၆ ရက်နေ့တွင် စိုက်ပျိုးရေးထုတ်လုပ်မှုကွင်းဆက်များသို့ ကွင်းဆင်းစစ်ဆေးမှုခရီးစဉ်အတွင်း Kraite ပြည်နယ်၊ Snoul ခရိုင်ရှိ Thaco Agri  ကုမ္ပဏီအား ကမ္ဘောဒီးယားနိုင်ငံ၏ အလုပ်သမားဥပဒေနှင့် လူမှု ဖူလုံရေးစနစ်နှင့်အညီ အလုပ်သမားလိုအပ်ချက်များအတွက် အလုပ်ခွင်အခြေအနေများ ဖန်တီးပေးသည့်အတွက် ချီးကျူးဂုဏ်ပြုခဲ့သည်။ အဆိုပါ ကွင်းဆင်းစစ်ဆေးမှုတွင် ဝန်ကြီးဌာနမှ တာဝန်ရှိအရာရှိများ၊ ပြည်နယ်အုပ်ချုပ်ရေးခေါင်းဆောင်များနှင့် ကုမ္ပဏီကိုယ်စားလှယ်များ ပါဝင်ခဲ့ကြသည်။ အဆိုပါခရီးစဉ်၏ ရည်ရွယ်ချက်မှာ နည်းပညာနှင့်အခြားထောက်ပံ့မှုများ ပေးအပ်နိုင်မှုနှင့် ဝန်ကြီးဌာန၏ ကဏ္ဍတွင် ပူးပေါင်းဆောင်ရွက်မှုများကို ပိုမိုမြှင့်တင်ရန်နှင့် ကုမ္ပဏီများနှင့် အလုပ်သမားတို့၏ လိုအပ်ချက်များကို ပံ့ပိုးပေးနိုင်ရန် စစ်ဆေးခြင်းဖြစ်ကြောင်း ဝန်ကြီးဌာနမှ ထုတ်ပြန်ထားသည်။ ကုမ္ပဏီကိုယ်စားလှယ်များသည် ဒေသခံဝန်ထမ်းများ၏ ကျွမ်းကျင်မှုတိုးတက်ရေးကို အာရုံစိုက်သည့် ၎င်းတို့၏ ဗျူဟာမြောက်အစီအစဉ်အကြောင်းနှင့် ၂၀၂၆ ခုနှစ်အတွင်း ကုမ္ပဏီသည် ၎င်းတို့၏ တိုးချဲ့လာသော ထုတ်လုပ်မှုကွင်းဆက်ကို ပံ့ပိုးရန် အတွက် အလုပ်သမား ၇,၀၀၀ ခန့်အားအလုပ်ခန့်ရန် စီစဉ်ထားကြောင်း  Heng Sour အား တင်ပြခဲ့ကြသည်။ Thaco Agri  ကုမ္ပဏီမှ ဝန်ထမ်းများကို အလုပ်ခန့်ထားပြီးသည်နှင့် သင့်လျော်သော အလုပ်ခန့်ထားမှုစာချုပ်နှင့် ကျန်းမားရေးစောင့်ရှောက်မှု၊ အလုပ်ခွင်အန္တရာယ် ကင်းရှင်းရေးနှင့် ပင်စင်များအတွက် ကုမ္ပဏီမှအပြည့်အဝပေးထားသော လူမှုဖူလုံရေးထည့်ဝင်ငွေများကို ရရှိမည်ဖြစ်ကြောင်း အလုပ်သမားဝန်ကြီးဌာန၏ ထုတ်ပြန်ချက်တစ်ခုအရ သိရသည်။

Source: Khmer Times

DOCA(ရန်ကုန်)