အမေရိကန်နိုင်ငံသို့တင်ပို့လျက်ရှိသည့် အမေရိကန်ဒေါ်လာ ၁ ဘီလီယံခန့်တန်ကြေးရှိ သော ဖိလစ်ပိုင်နိုင်ငံမှ စိုက်ပျိုးရေးတင်ပို့ကုန်များသည် အမေရိကန်နိုင်ငံ၏ ၁၉ ရာခိုင်နှုန်းအခွန် ကောက်ခံမှုမှ လွတ်ငြိမ်းခွင့်ရရှိခဲ့ကြောင်းနှင့် ၎င်းလွတ်ငြိမ်းခွင့်သည် ရင်းနှီးမြှုပ်နှံမှုများအတွက် တွန်းအားတစ်ခုဖြစ်ကြောင်းနှင့် တင်ပို့သည့်ကုန်သည်များအတွက် သက်သာရာရစေသည့် ဖွံ့ဖြိုးတိုးတက်မှုတစ်ခုဖြစ်ကြောင်း သိရပါသည်။ ၎င်းအကြောင်းအရာသည် အမေရိကန်နိုင်ငံအတွင်း အများအပြားမထုတ်လုပ်နိုင်သည့် ကော်ဖီ၊ ကိုကိုး၊ ငှက်ပျောသီး၊ ခရမ်းချဥ်သီး အစရှိသည့် စိုက်ပျိုးရေးထုတ်ကုန်များပေါ် အမေရိကန်သမ္မတ Donald Trump ၏ အပြန်အလှန်အခွန် စည်းကြပ်ခြင်းအသစ် ကောက်ခံခြင်းအပြီးတွင် ပေါ်ပေါက်လာခြင်းဖြစ်ကြောင်း သိရပါသည်။ အဆိုပါအကောက်ခွန်စည်းကြပ်ခြင်းအသစ်ကြောင့် ဖိလစ်ပိုင်နိုင်ငံမှတင်ပို့သော ကုန်ပစ္စည်းများ ၏ တစ်ဝက်ခန့်အပေါ် အခွန်ကောက်ခံမှုကင်းလွတ်သွားမည်ဖြစ်ကြောင်းနှင့် ၎င်းပမာဏသည် အမေရိကန်ဒေါ်လာ ၆.၉ ဘီလီယံခန့်တန်ကြေးရှိကြောင်း၊ လျှပ်စစ်ပစ္စည်းများသည်လည်း အခွန် ကင်းလွတ်ခွင့်ရကြောင်း သိရပါသည်။ အမေရိကန်နိုင်ငံသို့ တင်ပို့သော ဖိလစ်ပိုင်နိုင်ငံ၏ တင်ပို့မှု ပမာဏသည် အမေရိကန်ဒေါ်လာ ၁၄.၅ ဘီလီယံခန့်တန်ကြေးရှိကြောင်း သိရပါသည်။ အခွန်ကင်း လွတ်ခွင့်ရခဲ့သော ကုပစ္စည်းများမှာ အုန်းသီး၊ သစ်သီးဖျော်ရည်များ၊ နာနတ်သီးများ၊ အုန်းဆီ၊ ငှက်ပျောသီး၊ တူနာငါးများ၊ ဆန်ဝေဖာထုတ်ကုန်များ၊ မုန့်များနှင့် မာလကာ သီးအခြောက်များ၊ သရက်သီးစသည့်ပစ္စည်းများ ဖြစ်ကြောင်း သိရပါသည်။ အုန်းသီးသည် အမေရိကန်နိုင်ငံသို့ တင်ပို့သည့် ဖိလစ်ပိုင်နိုင်ငံ၏ ထိပ်သီးစိုက်ပျိုးရေးထုတ်ကုန်ဖြစ်ပြီး အမေရိကန်နိုင်ငံမှ အခွန်လွတ်ငြိမ်း ခွင့်ရခဲ့သော ၁ ဘီလီယံခန့်ရှိသော စိုက်ပျိုးရေးထုတ်ကုန် ၆၀ ရာခိုင်နှုန်းခန့်သည် အုန်းသီးတင်ပို့မှုများဖြစ်ကြောင်း သိရပါသည်။ ဖိလစ်ပိုင်နိုင်ငံသည် စိုက်ပျိုးရေးထုတ်ကုန်များအပြင် အထည် အလိပ်၊ ခရီးသွားပစ္စည်းများ၊ ပရိဘောဂနှင့် ရာဘာပစ္စည်းများတွင်လည်း အခွန်ကင်းလွတ်ခွင့်ရရှိ လိုကြောင်း ဖိလစ်ပိုင်နိုင်ငံ အခွန်ညှိနှိုင်းရေး အဖွဲ့က ပြောကြားခဲ့ပါသည်။ အမေရိကန်နိုင်ငံသည် ဖိလစ်ပိုင်နိုင်ငံ၏ ထိပ်သီးတင်ပို့သည့် စျေးကွက်ဖြစ်ပြီး ၂၀၂၄ ခုနှစ်တွင် အပြန်အလှန်ကုန်သွယ်မှု စုစုပေါင်း အမေရိကန်ဒေါ်လာ ၂၀.၃ ဘီလီယံခန့်ရောက်ရှိခဲ့ကြောင်း သိရပါသည်။
DOCA (ရန်ကုန်)