ပြည်ပကုန်သွယ်မှုသတင်းများ

         ထိုင်းနိုင်ငံ၏ ကုန်သွယ်ရေးမူဝါဒနှင့် မဟာဗျူဟာရုံး (TPSO) သည်သကြားလုပ်ငန်းရှင်များအား တန်ဖိုးမြှင့်ဗျုဟာများသို့ လှည့်ပြောင်းပြီး ဇီဝစီးပွားရေး (bio-economy) ကို အခြေခံသည့် ထုတ်လုပ်မှုများကို မြှင့်တင်ရန် တိုက်တွန်းလိုက်ကြောင်း သိရပါသည်။ ထို့အပြင် ယခုနှစ်နှောင်းပိုင်းတွင် သကြားထုတ်လုပ်မှုလွန်ကဲမှု ဖြစ်နိုင်ကြောင်းလည်း သတိပေးထားသည် ဟု  သိရပါသည်။ TPSO ညွှန်ကြားရေးမှူးချုပ် Nantapong Chiralerspong က ထိုင်းနိုင်ငံနှင့် ကမ္ဘာလုံးဆိုင်ရာစျေးကွက်တွင် ကြံနှင့် သကြားထုတ်လုပ်မှုမြင့်တက်လာခြင်းနှင့်အတူ အင်ဒိုနီးရှား ၏ ကိုယ်ပိုင်ဖူလုံရေးမူဝါဒကြောင့် လုပ်ငန်းနယ်ပယ်အနေဖြင့် ကြိုတင်ပြင်ဆင်ကာ အပြောင်းအလဲ လုပ်ဆောင်ရန် လိုအပ်ကြောင်း ပြောကြားခဲ့ပါသည်။ ၎င်းက သကြားလုပ်ငန်းရှင်များအနေဖြင့် ထုတ်လုပ်မှုကိုစျေးကွက်လိုအပ်ချက်နှင့် ကိုက်ညီစေရေးစီမံခန့်ခွဲရန်၊ တင်ပို့ရန်စျေးကွက် အသစ်များရှာဖွေရန်နှင့် ဇီဝစွမ်းအင်နှင့် ဇီဝထုတ်ကုန်များကို အဓိကထားသော တန်ဖိုးမြှင့်လုပ်ငန်းများသို့ လျင်မြန်စွာပြောင်းလဲရန် လိုအပ်ကြောင်း ပြောကြားခဲ့ပါသည်။ ဥပမာအနေဖြင့် သယ်ယူပို့ဆောင်ရေးကဏ္ဍ၏ လိုအပ်ချက်ကို ဖြည့်ဆည်းနိုင်ရန် ဇီဝလောင်စာ ထုတ်လုပ်မှု တိုးချဲ့ခြင်း၊ bagasse ကို အသုံးပြုပြီး လျှပ်စစ်ဓာတ်အားထုတ်လုပ်ခြင်းဖြင့် ကုန်ကျစရိတ်လျှော့ချခြင်းနှင့် သန့်စင်သောစွမ်းအင်မူဝါဒများနှင့် ကိုက်ညီစေခြင်း၊ ထို့အပြင် bioplastics နှင့် တည်တံ့ ခိုင်မြဲသောထုပ်ပိုးပစ္စည်းများကဲ့သို့ တန်ဖိုးမြှင့်ထုတ်ကုန်များ ဖန်တီးထုတ်လုပ်ခြင်းတို့ ပါဝင် ကြောင်း သိရပါသည်။ ထုတ်လုပ်ရေးလုပ်ငန်းကြီးများမှ အီသနောထုတ်လုပ်မှု တိုးမြှင့်ပါက သကြားဈေးနှုန်း တိုးတက်လာနိုင်ကြောင်း သိရပါသည်။ ထိုင်းနိုင်ငံ၏ ၂၀၂၅-၂၀၂၆ ကြံအထွက်နှုန်းမှာ မိုးရေကောင်းမွန်မှုကြောင့် တိုးတက်မည်ဟု ခန့်မှန်းထားပြီး စုစုပေါင်း ကြံ ကြိတ်ခွဲထုတ်လုပ်မှုမှာ တန်ချိန် ၉၈ သန်းအထိ ရောက်ရှိနိုင်ကာ ယခင်နှစ်နှင့် နှိုင်းယှဉ်ပါက ၇ ရာခိုင်နှုန်း မြင့်တက်မည်ဖြစ်ကြောင်း သိရပါသည်။ ၂၀၂၅ ခုနှစ်တွင် ထိုင်းနိုင်ငံသည် ဘရာဇီးနောက်တွင် ကမ္ဘာပေါ်၌ ဒုတိယအကြီးဆုံးသကြားတင်ပို့သူဖြစ်ခဲ့ပြီး တန်ချိန် ၅.၅ သန်းကို အမေရိကန်ဒေါ်လာ ၂.၆ ဘီလီယံကျော်တန်ဖိုးဖြင့် တင်ပို့ခဲ့ကြောင်း သိရပါသည်။ အင်ဒိုနီးရှားသို့ တင်ပို့မှုမှာ အမေရိကန်ဒေါ်လာ ၇၁၅ သန်းရှိပြီး စုစုပေါင်းတင်ပို့မှု၏ ၂၇ ရာခိုင်နှုန်းကျော် ပါဝင်ကြောင်း သိရပါသည်။ အခြား အဓိက စျေးကွက်များမှာ ကမ္ဘောဒီးယား၊ တောင်ကိုရီးယားနှင့် ဖိလစ်ပိုင်တို့ ဖြစ်ကြောင်း သိရပါသည်။ Mr Nantapong က အင်ဒိုနီးရှားသည် ကိုယ်ပိုင်ဖူလုံရေး မူဝါဒသို့ ပြောင်းလဲနေသဖြင့် ထိုင်းသကြားထုတ်လုပ်သူများအနေဖြင့် ပို့ကုန်စျေးကွက်များကို မျိုးစုံကွဲပြားရန်လိုအပ်ကြောင်းနှင့် အင်ဒိုနီးရှားက တင်သွင်းမှုလျှော့ချပါက ပြည်တွင်းကြံဈေးနှုန်း ကျဆင်း စေနိုင်ပြီး စိုက်ပျိုးရေးသမားဝင်ငွေနှင့် တင်ပို့မှုစွမ်းဆောင်ရည်အပေါ် သက်ရောက် မှုရှိနိုင်ကြောင်း ပြောကြားခဲ့ပါသည်။ TPSO အဆိုအရ ယခုနှစ်နှောင်းပိုင်းတွင် ပြည်တွင်း သကြားထုတ်လုပ်မှု လွန်ကဲမှုနှင့် အင်ဒိုနီးရှားမှ ဝယ်လိုအား လျော့နည်းမှုတို့သည် အန္တရာယ်အဖြစ် ရှိနိုင်ကြောင်း သိရပါသည်။ ထို့အပြင် အိန္ဒိယနှင့် ဘရာဇီးကဲ့သို့ အဓိကထုတ်လုပ်သူနိုင်ငံများ၏ ထုတ်လုပ်မှု မြင့်တက်မှုကြောင့် ကမ္ဘာလုံးဆိုင်ရာ သကြားဈေးနှုန်းများ ကျဆင်းနိုင်ကြောင်းလည်း ခန့်မှန်းထား ကြပါသည်။ သို့သော်ဈေးနှုန်း ဖိအားများရှိနေသော်လည်း အခြေအနေသည်ကြီးမားသော ပြဿနာ တစ်ခုအဖြစ်သို့ မရောက်နိုင်ကြောင်း သိရပါသည်။ အင်ဒိုနီးရှား၏ ပြည်တွင်းထုတ်လုပ်မှုသည် သုံးစွဲမှုထက် နည်းနေမည်ဖြစ်ပြီး တင်သွင်းခွင့်များကို စည်းမျဉ်းများအရ ဆက်လက်ခွင့်ပြုနိုင်သည်ဟု ခန့်မှန်းထားကြောင်း သိရပါသည်။ ထို့အပြင် အာရှဒေသရှိ အစားအစာနှင့် အဖျော်ယမကာကဏ္ဍမှ လိုအပ်ချက်များလည်း ဆက်လက်အားကောင်းနေကြောင်း သိရပါသည်။ Grand View Research သုတေသနအဖွဲ့၏ ခန့်မှန်းချက်အရ ကမ္ဘာလုံးဆိုင်ရာ သကြားစျေးကွက်သည် ၂၀၃၀ ခုနှစ်အထိ နှစ်စဉ် ပျမ်းမျှ ၆.၅ ရာခိုင်နှုန်း မြင့်တက်မည်ဖြစ်ကြောင်း သိရပါသည်။ ၂၀၂၅ ခုနှစ်တွင် သကြားအများဆုံး တင်သွင်းသည့်နိုင်ငံများမှာ တရုတ်၊ အမေရိကန်၊ အင်ဒိုနီးရှား၊ ဘင်္ဂလားဒေ့ရှ်နှင့် အိန္ဒိယတို့ ဖြစ်ကြောင်း သိရပါသည်။ စျေးကွက်အပေါ် မီခိုမှုအန္တရာယ် လျော့နည်းစေရန် ထိုင်းနိုင်ငံအနေဖြင့် အရှေ့အာရှနှင့် အလယ်အာရှဒေသများသို့ ပို့ကုန်စျေးကွက်များ ချဲ့ထွင်ရန်စဉ်းစားသင့်ကြောင်း TPSO က အကြံပြုထားပါသည်။ ထို့အပြင် တင်ပို့မှုအတွက် အရည်အသွေး၊ စံချိန်စံညွှန်းများနှင့် ခြေရာခံနိုင်မှုစနစ်ကို ထိန်းသိမ်းထားရန်မှာလည်း အရေးကြီးကြောင်း ပြောကြားခဲ့သည်ဟု သိရှိရပါသည်။

Bangkok Post                                                                           

DOCA (ရန်ကုန်)

          ဒီဇယ်ဈေးနှုန်းများ လျှော့ချနိုင်ရန် ကြိုးပမ်းသည့်အနေဖြင့် စားအုန်းဆီ ၁၅ ရာခိုင်နှုန်း ရောနှောထားသည့် ဇီဝဒီဇယ်ကို ဇွန်လတွင် စတင်ထုတ်လုပ်သွားမည်ဖြစ်ကြောင်း ဒုတိယဝန်ကြီးချုပ်က ဧပြီလ ၄ ရက်နေ့တွင် ပြောကြားခဲ့ပါသည်။ အဆိုပါ ဆောင်ရွက်ချက်မှာ အရှေ့အလယ်ပိုင်းပဋိပက္ခကြောင့် ဖြစ်ပေါ်လာသည့် စွမ်းအင်ဈေးနှုန်း မြင့်တက်မှုနှင့် ထောက်ပံ့မှုဆိုင်ရာ ကန့်သတ်ချက်များကို ရင်ဆိုင်ဖြေရှင်းနေရချိန်တွင် ပေါ်ပေါက်လာခြင်း ဖြစ်ကြောင်း သိရပါသည်။

          အမေရိကန်-အစ္စရေးနှင့် အီရန်တို့အကြား စစ်မက်ဖြစ်ပွားမှုကြောင့် ရေနံဈေးနှုန်းများ အဆမတန် မြင့်တက်လာပြီးနောက် ဖော်ဆီလောင်စာ တင်သွင်းမှုအပေါ် မှီခိုနေရခြင်းကို လျှော့ချရန်အတွက် ဇီဝလောင်စာ (Biofuels) ဘက်သို့ လှည့်လာကြသည့် အာရှနိုင်ငံများထဲတွင် မလေးရှားနိုင်ငံလည်း ပါဝင်နေကြောင်း သိရပါသည်။

          မလေးရှားအစိုးရက ၎င်းတို့၏ B10 ဟု လူသိများသည့် စားအုန်းဆီ ၁၀ ရာခိုင်နှုန်း ပါဝင်သော ဇီဝဒီဇယ် သတ်မှတ်ချက်ကို ၁၅ ရာခိုင်နှုန်းအထိ တိုးမြှင့်မည်ဖြစ်ကြောင်း ပြီးခဲ့သည့်လတွင် ပြောကြားခဲ့ပြီး ကနဦးတွင် ၁၂ ရာခိုင်နှုန်း ရောနှောထုတ်လုပ်မှုဖြင့် စတင်သွားမည်ဖြစ်ကြောင်း သိရပါသည်။

          နိုင်ငံအတွင်းရှိ ထုတ်လုပ်မှုစက်ရုံ ၁၉ ရုံသည် ဇွန်လ ၁ ရက်နေ့မှစတင်ကာ B15 ဇီဝဒီဇယ်ကို စတင်ထုတ်လုပ်သွားမည်ဖြစ်ကြောင်း ဒုတိယဝန်ကြီးချုပ် ဒါတုဆရီ အာမတ်ဇာဟစ် ဟာမီဒီက နိုင်ငံ့ဝန်ထမ်းများသို့ ပြောကြားသည့် မိန့်ခွန်းတွင် ထည့်သွင်းပြောဆိုခဲ့ကြောင်း သိရပါသည်။

          စားအုန်းဆီအခြေခံသည့် ဇီဝဒီဇယ် ရောနှောမှုနှုန်း တိုးမြှင့်ခြင်းကို အဆင့်လိုက် ဆောင်ရွက်သွားမည်ဖြစ်ပြီး ရှေ့ဆက်၍ ၂၀ ရာခိုင်နှုန်းအထိ ပြောင်းလဲရန်နှင့် လာမည့် ၂ နှစ်မှ ၃ နှစ်အတွင်း ၅၀ ရာခိုင်နှုန်းအထိ ရောက်ရှိလာစေရန် ရည်မှန်းထားကြောင်း အာမတ်ဇာဟစ်က ပြောကြားခဲ့ပါသည်။

          ကမ္ဘာ့ဒုတိယအကြီးဆုံး စားအုန်းဆီထုတ်လုပ်သည့် မလေးရှားနိုင်ငံသည် လက်ရှိတွင် သယ်ယူပို့ဆောင်ရေးကဏ္ဍအတွက် B10 စံနှုန်းကို သတ်မှတ်ထားသော်လည်း လာဘူအန် (Labuan) ဖက်ဒရယ်နယ်မြေ၊ လန်ကာဝီကျွန်းနှင့် ဆာရာဝက်ပြည်နယ်တို့တွင် ၂၀ ရာခိုင်နှုန်းအထိ သတ်မှတ်ဆောင်ရွက်ထားပြီးဖြစ်ကြောင်း သိရပါသည်။

          မလေးရှားနိုင်ငံ၏ ဇီဝဒီဇယ် သုံးစွဲမှုသည် နှစ်စဉ် မက်ထရစ်တန်ချိန် ၃ သိန်းကျော်အထိ မြင့်တက်လာနိုင်ကြောင်း လုပ်ငန်းကဏ္ဍဆိုင်ရာ ထိန်းညှိကွပ်ကဲရေးအဖွဲ့ဖြစ်သည့် မလေးရှား စားအုန်းဆီဘုတ်အဖွဲ့က ပြောကြားခဲ့ကြောင်း သိရှိရပါသည်။

Source: Reuters                                                                        

DOCA (ရန်ကုန်)

          LSEG မှ ထုတ်ပြန်သော အချက်အလက်များအရ ကနေဒါနိုင်ငံ LNG Canada စက်ရုံမှ သဘာဝဓာတ်ငွေ့ရည် တင်ပို့မှုသည် ဧပြီလအတွင်း မက်ထရစ်တန် ၁ သန်းကျော်ရှိခဲ့ပြီး လစဉ်အလိုက် အမြင့်ဆုံးစံချိန်သစ် တင်နိုင်ခဲ့ကြောင်း သိရပါသည်။ LNG Canada သည် နိုင်ငံ၏ ပထမဆုံးသော အဓိက LNG တင်ပို့သည့် အဆောက်အအုံဖြစ်ပြီး မြောက်အမေရိက အနောက်ဘက်ကမ်းခြေတွင်လည်း ပထမဆုံးဖြစ်ကြောင်း သိရပါသည်။ ထို့ကြောင့် ကမ္ဘာ့အကြီးဆုံး LNG ဈေးကွက်ဖြစ်သော အာရှသို့ တိုက်ရိုက်တင်ပို့နိုင်သည့် အခွင့်အလမ်း ရရှိထားကြောင်း သိရပါသည်။

          ဧပြီလအတွင်း အဆိုပါစက်ရုံမှ ထုတ်လုပ်သမျှ ပမာဏအားလုံးကို အာရှသို့ တင်ပို့ခဲ့ပြီး ထက်ဝက်ကျော်ကို တောင်ကိုရီးယားနိုင်ငံသို့ ရောင်းချခဲ့ကြောင်းနှင့် ကုန်တင်သင်္ဘော တစ်စင်းမှာမူ တရုတ်နိုင်ငံသို့ တိုက်ရိုက်ပို့ဆောင်ခဲ့ကြောင်း သိရပါသည်။ ဝါရှင်တန်ဒီစီ (အမေရိကန် အစိုးရ) က ထရမ့်အစိုးရလက်ထက်တွင် ပိတ်ဆို့အရေးယူမှုများ ချမှတ်ပြီးကတည်းက တရုတ်နိုင်ငံသည် အမေရိကန်ထံမှ LNG တိုက်ရိုက်တင်သွင်းခြင်း မရှိတော့ကြောင်းနှင့် ယင်းအစား အမေရိကန်ထုတ်လုပ်သူများနှင့် ချုပ်ဆိုထားသည့် သက်တမ်းရှည်စာချုပ်ပါ ဈေးနှုန်းချိုသာသော LNG များကို အခြားနိုင်ငံများသို့ ပြန်လည်ရောင်းချကာ ကမ္ဘာ့လက်ငင်းဈေးကွက်ရှိ မြင့်မားသောဈေးနှုန်းများမှတစ်ဆင့် အကျိုးအမြတ်ရယူရန် ရွေးချယ်ဆောင်ရွက်လျက်ရှိနေကြောင်း သိရပါသည်။

          ဧပြီလ ၂၄ ရက်နေ့တွင် Qingcheng အမည်ရှိ ကုန်တင်သင်္ဘောသည် ကနေဒါနိုင်ငံမှ တရုတ်နိုင်ငံသို့ သုံးပတ်ကြာ ခရီးနှင်ပြီးနောက် Dongjiakou ဆိပ်ကမ်းတွင် ကုန်ပစ္စည်းများချထားခဲ့ကြောင်း သိရပါသည်။ မည်သည့် LNG စက်ရုံကိုမဆို လည်ပတ်ရာတွင် စနစ်တကျ စီမံခန့်ခွဲထားသည့် အဆင့်ဆင့်လုပ်ဆောင်ရသော လုပ်ငန်းစဉ်ဖြစ်ကြောင်းနှင့် လက်ရှိအချိန်အထိ ပိုင်ရှင်များသည် LNG သင်္ဘော ၇၉ စင်း တင်ပို့ပြီးဖြစ်ကြောင်း LNG Canada က ပြောကြားခဲ့သည်။ LNG Canada သည် Shell၊ မလေးရှားနိုင်ငံမှ Petronas၊ PetroChina၊ ဂျပန်နိုင်ငံမှ Mitsubishi Corp နှင့် တောင်ကိုရီးယားနိုင်ငံမှ KOGAS တို့ ပူးပေါင်းထားသည့် ဖက်စပ်လုပ်ငန်းတစ်ခု ဖြစ်ပါသည်။

          အဆိုပါစက်ရုံသည် ဇွန်လတွင် စတင်ထုတ်လုပ်ခဲ့ပြီးကတည်းက လုပ်ငန်းလည်ပတ်မှု နှေးကွေးခဲ့ပြီး လက်ရှိတွင် အပြည့်အဝ လည်ပတ်နိုင်ခြင်းမရှိသေးကြောင်းနှင့် ယင်းစက်ရုံသည် တစ်နှစ်လျှင် မက်ထရစ်တန် ၁၄ သန်းအထိ တင်ပို့နိုင်စွမ်းရှိပြီး ၎င်းမှာ တစ်လလျှင် တန်ချိန် ၁.၁၆ သန်းနှင့် ညီမျှကြောင်း သိရှိရပါသည်။

Source: reuters                                                                         

DOCA (ရန်ကုန်)

        ဖိလစ်ပိုင်စာရင်းအင်းအာဏာပိုင်အဖွဲ့ (PSA) မှ ဧပြီလ ၃၀ ရက်နေ့တွင် ထုတ်ပြန်သော ကနဦးထုတ်ပြန်ချက်များအရ ယခုနှစ် မတ်လအတွင်း ဖိလစ်ပိုင်နိုင်ငံ၏ စုစုပေါင်းကုန်စည် ပြည်ပကုန်သွယ်မှုသည် ၁၅.၃ ရာခိုင်နှုန်း မြင့်တက်ခဲ့ပြီး အမေရိကန်ဒေါ်လာ ၂၀.၈၅ ဘီလီယံအထိ ရှိခဲ့ကြောင်း သိရပါသည်။ ယခင်နှစ် ကာလတူတွင် ကုန်သွယ်မှုပမာဏမှာ အမေရိကန်ဒေါ်လာ ၁၈.၀၇ ဘီလီယံသာ ရှိခဲ့ခြင်းဖြစ်ကြောင်း သိရပါသည်။

         PSA ၏ ထုတ်ပြန်ချက်များအရ မတ်လအတွင်း ဖြစ်ပေါ်ခဲ့သော စုစုပေါင်းပြည်ပကုန်သွယ်မှု ပမာဏသည် ၁၉၉၁ ခုနှစ်နောက်ပိုင်း အမြင့်ဆုံးစံချိန်တင်နိုင်ခဲ့ကြောင်း သိရပါသည်။ ဖိလစ်ပိုင်နိုင်ငံ စုစုပေါင်းကုန်သွယ်မှု၏ ၆၀.၈ ရာခိုင်နှုန်းမှာ သွင်းကုန်များဖြစ်ပြီး ကျန်ရှိသော ၃၉.၂ ရာခိုင်နှုန်းမှာ ပို့ကုန်များဖြစ်ကြောင်း သိရပါသည်။ PSA မှ ထုတ်ပြန်သော အချက်အလက်များအရ ကုန်စည်ကုန်သွယ်မှုပမာဏ ကွာဟချက်သည် ယခင်နှစ်က အမေရိကန်ဒေါ်လာ ၄.၅၁ ဘီလီယံရှိခဲ့ရာမှ ယခုနှစ်တွင် အမေရိကန်ဒေါ်လာ ၄.၅၀ ဘီလီယံသို့ အနည်းငယ်မြင့်တက်လာခဲ့ကြောင်း သိရပါသည်။

        ပို့ကုန်ကဏ္ဍသည် ဆက်လက်တိုးတက်နေဆဲဖြစ်ပြီး ၂၀.၄ ရာခိုင်နှုန်း မြင့်တက်ကာ အမေရိကန်ဒေါ်လာ ၈.၁၇ ဘီလီယံအထိ ရှိလာခဲ့ကြောင်း သိရပါသည်။ အီလက်ထရွန်နစ် ထုတ်ကုန်များသည် ယခုလအတွင်း နိုင်ငံ၏ ထိပ်တန်းပို့ကုန်အဖြစ် ဆက်လက်ရှိနေပြီး အမေရိကန်ဒေါ်လာ ၄.၈၂ ဘီလီယံ ရရှိခဲ့ကာ ၎င်းမှာ စုစုပေါင်းပို့ကုန်၏ ၆၀ ရာခိုင်နှုန်းနီးပါးဖြစ်ခဲ့ကြောင်း သိရပါသည်။

          ၎င်းနောက်တွင် စက်ယန္တရားနှင့် သယ်ယူပို့ဆောင်ရေးပစ္စည်းများမှ ပို့ကုန်ဝင်ငွေ အမေရိကန်ဒေါ်လာ ၄၀၇.၂၂ သန်းနှင့် အခြားကုန်ချောထုတ်ကုန်များမှ အမေရိကန်ဒေါ်လာ ၄၀၂.၇၃ သန်းတို့ဖြင့် အသီးသီးရပ်တည်နေကြောင်း သိရပါသည်။

          အမေရိကန်၊ ဟောင်ကောင်၊ ဂျပန်၊ တရုတ်ပြည်သူ့သမ္မတနိုင်ငံနှင့် ထိုင်ဝမ်တို့မှာ ဖိလစ်ပိုင်နိုင်ငံ၏ အဓိက ပို့ကုန်တင်ပို့ရာ နိုင်ငံများဖြစ်ကြသည်။ တစ်ချိန်တည်းမှာပင် သွင်းကုန်စုစုပေါင်းတန်ဖိုးသည်လည်း ၁၂.၃ ရာခိုင်နှုန်း မြင့်တက်ခဲ့ပြီး အမေရိကန်ဒေါ်လာ ၁၂.၆၈ ဘီလီယံအထိ ရှိခဲ့ကြောင်း သိရပါသည်။

          ကုန်ကြမ်းနှင့် တစ်ဆင့်ခံကုန်စည်များသည် သွင်းကုန်၏ အများဆုံးအပိုင်းအဖြစ် အမေရိကန်ဒေါ်လာ ၄.၆၀ ဘီလီယံအထိ ရှိခဲ့ပြီး ၎င်းနောက်တွင် လူသုံးကုန်ပစ္စည်းများက အသီးသီး လိုက်ပါလျက်ရှိကြောင်း သိရပါသည်။ တရုတ်နိုင်ငံသည် ဖိလစ်ပိုင်သို့ သွင်းကုန်အများဆုံး တင်သွင်းသည့်နိုင်ငံအဖြစ် ဆက်လက်တည်ရှိနေပြီး မတ်လအတွင်း သွင်းကုန် စုစုပေါင်း၏ ၂၇.၆ ရာခိုင်နှုန်း သို့မဟုတ် အမေရိကန်ဒေါ်လာ ၃.၅၀ ဘီလီယံဖိုး တင်သွင်းခဲ့ကြောင်းနှင့် အခြားအဓိက သွင်းကုန်တင်သွင်းသည့် နိုင်ငံများတွင် တောင်ကိုရီးယား၊ ဂျပန်၊ အင်ဒိုနီးရှားနှင့် အမေရိကန်ပြည်ထောင်စုတို့ ပါဝင်ကြောင်း သိရပါသည်။

Source: PNA                                                                             

DOCA (ရန်ကုန်)

    ၂၀၂၆ ခုနှစ် မတ်လတွင် အစိုးရက ဝါဂွမ်းသွင်းကုန်အပေါ် အချိုးကျ ပြောင်းလဲကောက်ခံ သော အကောက်ခွန်နှုန်းထားနှင့် ကုန်သွယ်မှုအတွက် တန်ချိန် ၃၀၀,၀၀၀ ခွဲတမ်းကို တရားဝင် ထုတ်ပြန်ခဲ့သည်။ ၂၀၂၆ ခုနှစ်အတွက် စုစုပေါင်း အကောက်ခွန်ခွဲတမ်းသည် ၂၀၂၅ ခုနှစ်နှင့် နှိုင်းယှဉ်ပါက တန်ချိန် ၁၀၀,၀၀၀ တိုးလာပြီး ပြည်တွင်း အထည်အလိပ်လုပ်ငန်းများ၏ ကုန်ကြမ်း တန်ဖိုး မြှင့်တက်မှုဒဏ်ကို သက်သာစေရန် ခွဲတမ်းထုတ်ပြန်သည့်အချိန်ကို (၅) လခန့် စော၍ ရွှေ့ပြောင်း လုပ်ဆောင်ခဲ့‌ကြောင်း သိရသည်။ တရုတ်နိုင်ငံ၊ အကောက်ခွန်အထွေထွေ အုပ်ချုပ်ရေး မှူးရုံးမှ ထုတ်ပြန်သော နောက်ဆုံးအချက်အလက်များအရ ၂၀၂၆ ခုနှစ် မတ်လတွင် တရုတ်နိုင်ငံ အနေဖြင့်  ဝါဂွမ်းတန်ချိန် ၁.၈ သန်းခန့် တင်သွင်းခဲ့ရာ ယခင်နှစ်ကာလတူထက် ၁၃၈% တိုးတက် လာပြီး လအလိုက်အနေဖြင့် ၆% တိုးလာခဲ့သည်။

   ၂၀၂၆ ခုနှစ် ဇန်နဝါရီလမှ မတ်လအထိ တရုတ်နိုင်ငံ၏ ဝါဂွမ်းသွင်းကုန် စုစုပေါင်းသည် တန်ချိန် ၅.၅ သန်းသို့ ရောက်ရှိခဲ့ရာ ယခင်နှစ်ကာလတူထက် ၆၂% တိုးတက်ခဲ့သည်။ မတ်လ အတွင်း ဝါဂွမ်း သွင်းကုန်ပမာဏသည် ယခင်နှစ်ကာလတူထက် ၂ ဆကျော် တိုးလာခဲ့ပြီး အဆိုပါ အခြေအနေက ရက်ကန်းစက်ရုံများအတွက် ကုန်ကျစရိတ်သက်သာသော ကုန်ကြမ်းများ အရေးတကြီး လိုအပ်နေသည့် အခြေအနေကို ပေါ်လွင်စေသည်။ လာမည့်ကာလများတွင် လက်ရှိ ပြည်တွင်းဝါဂွမ်းဈေးနှုန်းများသည် ဈေးနှုန်းမြင့်မားသော အခြေအနေတွင်ရှိနေဆဲဖြစ်ပြီး သွင်းကုန် လိုအပ်ချက်မှာ အားကောင်းနေဆဲဖြစ်ကြောင်း သိရသည်။

   Zhuochuang သတင်းအချက်အလက်ဌာန၏ စောင့်ကြည့်မှုအရ မတ်လ ပထမ ၁၀ ရက် အတွင်း ပြည်တွင်း- ပြည်ပဝါဂွမ်းဈေးနှုန်းကွာဟမှုသည် တစ်နှစ်အတွင်း အနီးစပ်ဆုံး အမြင့်ဆုံး ဖြစ်သော ယွမ် ၃၀၀၀ သို့ ရောက်ရှိခဲ့သည်။ ပြည်ပဝါဈေးနှုန်းများ ချိုသာနေသည့်အတွက် ကုန်ချော ထုတ်လုပ်သူများက ပိုမိုနှစ်သက်သဘောကျ ဝယ်ယူသုံးစွဲနေကြကြောင်း သိရသည်။ ၂၀၂၆ ခုနှစ် မတ်လတွင် အစိုးရသည် ဝါသွင်းကုန် တန်ဖိုးအလိုက် အကောက်ခွန် ပြုပြင်ထုတ်လုပ် ရေးခွဲတမ်း တန်ချိန် ၃၀၀,၀၀၀ ကို တရားဝင်ထုတ်ပြန်ခဲ့ပြီး ၂၀၂၅ ခုနှစ်နှင့် နှိုင်းယှဉ်ပါက တန်ချိန် ၁၀၀,၀၀၀ တိုးကာ ထုတ်ပြန်ချိန်ကို (၅) လခန့် စော၍ ရွှေ့ပြောင်းခြင်းမှာ ပြည်တွင်း အထည်အလိပ်လုပ်ငန်း များ၏ ကုန်ကြမ်းတန်ဖိုးမြှင့်တက်မှုဒဏ်ကို သက်သာစေရန် ဖြစ်သည်။

   တင်သွင်းသည့်ရင်းမြစ်နိုင်ငံများ၏ ရှုထောင့်မှကြည့်ပါက ပြည်တွင်း-ပြည်ပဝါဂွမ်းဈေးနှုန်း ကွာဟမှုသည် မြင့်မားသောအဆင့်တွင်ရှိပြီး ဈေးသက်သာသော သွင်းကုန်အနေဖြင့် သိသာ ထင်ရှားသော စျေးနှုန်းအကျိုးအမြတ်ရှိကြောင်း သိရသည်။ ၎င်းတို့အနက် ဘရာဇီးဝါဂွမ်းသည် စျေးနှုန်းအကျိုးအမြတ် အမြင့်ဆုံးဖြစ်ပြီး မကြာသေးမီနှစ်များအတွင်း ပြည်တွင်းဈေးကွက်သို့ တင်သွင်းမှု အများဆုံးလည်းဖြစ်သည်။

    အကောက်ခွန်အထွေထွေအုပ်ချုပ်ရေးမှူးရုံး၏ အချက်အလက်များအရ မတ်လတွင် ဘရာဇီးမှ တင်သွင်းသော ဝါဂွမ်းပမာဏသည် ထိုလ၏ စုစုပေါင်းသွင်းကုန်၏ ၆၀% ရှိပြီး ရင်းမြစ် နိုင်ငံအားလုံးတွင် ပထမနေရာမှ ရပ်တည်ခဲ့သည်။ ၎င်းနောက် သြစတြေးလျနှင့် အမေရိကန်တို့က ၁၁% နှင့် ၈% သွင်းကုန် ဈေးကွက်ဝေစု ရှိသည်။ ၎င်းတို့အနက် သြစတြေးလျဝါဂွမ်းနှင့် အမေရိကန် ဝါဂွမ်းတို့၏ ဈေးကွက်ဝေစုသည် ဖေဖော်ဝါရီလနှင့် နှိုင်းယှဉ်ပါက ၃ ရာခိုင်နှုန်းနှင့် ၂ ရာခိုင်နှုန်း အသီးသီး တိုးလာခဲ့ကြောင်း သိရသည်။ အဓိကအကြောင်းရင်းမှာ သြစတြေးလျနှင့် အမေရိကန် ဝါဂွမ်း တို့သည် အလျားနှင့် ညီညာမှုတို့တွင် ဘရာဇီးထက် သာလွန်သောကြောင့် ဖြစ်သည်။ ရက်ကန်း စက်ရုံအချို့သည် အရည်အသွေးမြင့် ကုန်ချောအော်ဒါများ၏ လိုအပ်ချက်ကို ပြည့်မီစေရန်အတွက် အဆင့်မြင့် ဝါဂွမ်းကုန်ကြမ်းများကို ဝယ်ယူမှုတိုးမြှင့်ခဲ့ကြကြောင်း သိရသည်။

    ဧပြီလနှောင်းပိုင်းတွင် ပြည်တွင်းဝါစိုက်ပျိုးမှုသည် ၈၀% ခန့် ပြီးစီးခဲ့ပြီး ယခုနှစ်တွင် Xinjiang ဒေသ၏ ဝါစိုက်ဧရိယာ လျော့နည်းခဲ့ပြီး ထွက်ရှိမှု လျော့ကျနိုင်မည်ဟု ခန့်မှန်းထားသည်။ အထည်အလိပ်ထုတ်လုပ်မှု ကဏ္ဍတွင် စွမ်းရည်သစ်များ ဆက်တိုက် အကောင်အထည်ဖော်လာပြီး ဝါဂွမ်း ဝယ်လိုအားတိုးလာသဖြင့် ကုန်သည်များအနေဖြင့် ရေရှည်တွင် ရောင်းလိုအားနှင့် သုံးစွဲမှု တင်းကျပ်လာမည်ဟု ခိုင်မာစွာ မျှော်လင့်နေကြကြောင်း သိရသည်။ ပြည်တွင်းဝါဂွမ်းဈေးနှုန်းသည် အထောက်အပံ့ ရရှိထားကြောင်း သိရသည်။ Zhuochuang သတင်းအချက်အလက်ဌာန၏ စောင့်ကြည့်မှုအရ ဧပြီလ ၂၂ ရက်နေ့တွင် တရုတ်နိုင်ငံ၏ 3128B ဝါဂွမ်းပျမ်းမျှ လက်ငင်းဈေးသည် တစ်တန်လျှင် ၁၆,၇၂၅ ယွမ်ဖြင့် ၂ နှစ်အတွင်း အမြင့်ဆုံး ရောက်ရှိခဲ့သည်။

Source : Sunsirs, 28 April 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)