ပြည်တွင်းကုန်သွယ်မှုသတင်း

            သဇင်ပန်းကလေးများသည် ဆောင်းရာသီဖြစ်သော နတ်တော်လ၊ ပြာသိုလများတွင် လှိုင်လှိုင်ပွင့် လေ့ရှိသည်။ သဇင်ပန်းသည် ဘုရင်၏မိဖုရားတို့သာ ဦးဦးဖျားဖျားပန်ခွင့်ရသောပန်းဖြစ်သဖြင့် တော်ဝင်ပန်း အဖြစ် အသိအမှတ်ပြုကြသည်။ သဇင်ပန်းသည် နတ်တော်လ၌ ပွင့်သဖြင့် အမြတ်တနိုးထား၍ နတ်တင် ကြသောကြောင့် နတ်ပန်းဟုလည်းခေါ်ကြသည်။

          သဇင်ပင်သည် သစ်ခွမျိုးစိတ်ထဲတွင် ပါဝင်ပြီး ဂမုန်းမျိုးတွင်လည်း ပါဝင်သည်ဟု မှတ်သား ရသည်။ ဂမုန်းမျိုးဖြစ်သော သဇင်(၁၅)မျိုးရှိကြောင်း တော်ဝင်ပန်းဖြစ်ကြောင်းတို့ကို ရွှေတိုက်စိုးဦးတိုး ရေးသားသည့် ရာမရကန်၊ သဇင်အချီးတွင် တွေ့မြင်နိုင်သည်။ သဇင်ပန်းပွင့်အရောင်သည် လေးမျိုးရှိပြီး ယင်းတို့မှာ သဇင်ဖြူ၊ သဇင်ဝါ၊ သဇင်နီ၊ သဇင်နက်တို့ဖြစ်ကြသည်။ မြန်မာနိုင်ငံတွင် ရှမ်းပြည်နယ်၊ မွန်ပြည်နယ်၊ ရခိုင်ပြည်နယ်၊ ရန်ကုန်၊တောင်ငူ၊ မန္တလေး၊ မြစ်ကြီးနားနှင့် ပြင်ဦးလွင် စသည့် အနီးတစ်ဝိုက်တို့တွင် သဇင်ဖြူနှင့်သဇင်ဝါတို့ကိုတွေ့ရပါသည်။ သဇင်နီမျိုးသည် တောင်ငူနယ် တောတောင်စိမ့်ကြီးများ၌ပေါက်၍ မေမြို့တစ်ဝိုက် ကျေးလက်တောအုံများတွင် သဇင်နက်များ တစ်ခါ တစ်ရံတွေ့ရသည်။  သဇင်ပန်းမျိုးများစွာရှိသော်လည်း ယခုအခါတွင် စီးပွားဖြစ်အနေဖြင့် ရောင်းတန်းဝင် လှသော တော်ဝင်သဇင်ပန်းကို ပိုမိုစိုက်ပျိုးလာကြသည်။ သဇင်ပန်းသည် ဆေးဖက်လည်း ဝင်လှပေသည်။ မြန်မာ့ဆေးကျမ်းအလိုအရ သဇင်ပွင့်သည် ဦးခေါင်းကိုက်ခြင်း၊ မျက်စိနာခြင်းတို့ကိုလည်းကောင်း၊ အနာရောဂါ အချို့ကိုလည်းကောင်း ပျောက်ကင်းစေနိုင်သည်ဟုသိရပါသည်။     

          သဇင်ပန်းအမျိုးအမည်များစွာရှိသည့်အနက် လူကြိုက်များ၍ အရောင်းရဆုံးမှာ   တော်ဝင်သဇင်ပန်း ဖြစ်သည်။ ဈေးကွက်အတွင်းတွင် ယခုနှစ် နိုဝင်ဘာလကုန်ပိုင်းတွင်  တော်ဝင်သဇင်ပန်း  ၅" တစ်ခက်လျှင် (၁၀၀၀၀)ကျပ်၊ ၆"တစ်ခက်လျှင် (၂၀၀၀၀)ကျပ်၊ ၇"တစ်ခက်လျှင် (၃၀၀၀၀)ကျပ်၊ ၈"တစ်ခက်လျှင် (၄၀၀၀၀)ကျပ်၊ ဆိုဒ်စုံအရော (၆"/၇"/ ၈")ဆယ်ခက်လျှင်  (၃၀၀၀၀၀)ကျပ်၊ ဆိုဒ်စုံအရော (၅"/၆"/ ၇") ဆယ်ခက်လျှင်  (၂၀၀၀၀၀)ကျပ်၊ ဆိုဒ်စုံအရော (၅"/၆")ဆယ်ခက်လျှင်  (၁၅၀၀၀၀)ကျပ်တို့ဖြင့် ရောင်းချလျက်ရှိကြောင်း သဇင်စိုက်ပျိုးသူတစ်ဦးထံမှ သိရပါသည်။

DOCA(မန္တလေး)                                                                          

          မန္တလေးမြို့တွင်းသို့ ကျောက်ဆည်၊ မုံရွာမြို့များမှ ထွက်ရှိလာသည့် ရုံးပတီသီးများ ဈေးကွက်အတွင်းသို့ ဝင်ရောက်လျက်ရှိပါသည်။ ရုံးပတီသီးသည် ကျန်းမာရေးအနေဖြင့် ဆီးချိုကို ထိန်းညှိပေးခြင်း၊ ဝမ်းချုပ်ခြင်းကို သက်သာစေခြင်း၊ သွေးအား နည်းရောဂါကို ကာကွယ်ပေးခြင်း၊ ကိုယ်အလေးချိန် ကျစေခြင်း၊ ကိုလက်စရော(သွေးတွင်း အဆီဓာတ်) ကျစေခြင်း၊ ကိုယ်ခံအား ကောင်းစေခြင်းနှင့် အမြင်အာရုံကောင်းစေကြောင်းလည်း သိရသည်။ ရုံးပတီသီးကို ကြက်ဥဖြင့် ကြော်ချက်၍လည်းကောင်း၊ ပုဇွန်ခြောက်ဖြင့်လည်းကောင်း ၊ ချဉ်ပေါင်ရွက်နှင့် အချဉ်ရည်ဟင်းချက်၍ လည်းကောင်း၊ အတို့အမြှပ်ပြုလုပ်၍လည်းကောင်း စသည်ဖြင့် ချက်ပြုတ်စားသောက်ကြသူများသောကြောင့် အရောင်းအဝယ်ကောင်းသော သီးနှံတစ်မျိုးဖြစ်ကြောင်း သိရသည်။ ၂၀၂၅ ခုနှစ် နိုဝင်လဘာလစတုတ္ထပတ်တွင် ရောင်းချနေသောရုံးပတီသီးဈေးနှုန်းမှာ (၂၅)ကျပ်သားလျှင်(၁၀၀၀) ကျပ်၊(၁)ပိဿာလျှင် (၃၅၀၀)ကျပ် ဖြင့် အရောင်းအဝယ်ဖြစ်ကြောင်း ကုန်စိမ်းရောင်းချသူတစ်ဦးထံမှ သိရသည်။

DOCA(မန္တလေး)

      ပြောင်းသီးနှံမှာမွေးမြူရေး အစားစပ်လုပ်ငန်းတွင်သုံးစွဲမှုများပြားခြင်း၊ ပြည်ပတင်ပို့ခြင်းတို့ကြောင့် အရောင်းသွက်လျက်ရှိကြောင်း သိရပါသည်။  မန္တလေးတိုင်းဒေသကြီးအတွင်း ၂၀၂၄ - ၂၀၂၅ ခုနှစ်တွင် အစေ့ ထုတ်ပြောင်းစိုက်ပျိုးမှု  ၃၆၆၂၂  ဧက၊ ရိတ်သိမ်းမှု ၁၃၃၃၁ ဧက၊အထွက်နှုန်း  ၄၉.၅၅  တင်း၊ အထွက်တင်းစုစုပေါင်း   ၆၆၀၅၉၁  တင်းဖြစ်ကြောင်းသိရပါသည်။  မန္တလေး ပွဲစား၊ ကုန်သည်စက်ပိုင်များမဟာကထိန်တော်အသင်းတွင် ၂၀၂၅ ခုနှစ်ဒီဇင်ဘာလဒုတိယပတ်အတွင်း ဖြစ်ပေါ်သည့် အစေ့ထုတ်ပြောင်းစျေးမှာပြောင်းဖူးစေ့(ရှမ်း) ၇၄၀၀၀ ကျပ်နှင့် ၇၅၀၀၀ကျပ်၊ ပြောင်းဖူးစေ့ (စီပီ) ၇၄၀၀၀ ကျပ် နှင့် ၇၅၀၀၀ကျပ်၊ တစ်ပိဿာစျေးအနေဖြင့် ပြောင်းဖူးစေ့(ရှမ်း) ၁၃၇၀ကျပ်နှင့် ၁၃၈၉ကျပ်၊(စီပီ)၁၃၇၀ကျပ်နှင့် ၁၃၈၉ကျပ်စျေးတို့ ဖြစ်ကြောင်း သိရှိရပါသည်။ ယခင်နှစ်ကာလတူ တစ်ပိဿာစျေးမှာပြောင်းဖူးစေ့ (ရှမ်း)၁၆၃၀ ကျပ်နှင့် ၁၆၄၈ကျပ်၊ ပြောင်းဖူးစေ့(စီပီ) ၁၆၃၀ကျပ်၊ ပြောင်းဖူးစေ့(ဗမာ)၁၆၇၄ကျပ်တို့ဖြစ်ကြောင်း သိရှိရပါသည်။ ယခုနှစ်ဈေးနှင့် ယခင်နှစ်ကာလတူစျေးနှင့် နှိုင်းယှဉ်ပါက အစေ့ထုတ်ပြောင်းစျေးမှာ အနည်းငယ်ကျဆင်းသွားကြောင်း သိရှိရပါသည်။

DOCA(မန္တလေး)

        မန္တလေးစျေးကွက်အတွင်း ဒီဇင်ဘာလပထမပတ်အတွင်း  မွေးမြူရေးတိရိစ္ဆာန်အစားအစာဖြစ်သည့် ဆီကြိတ်ဖတ်အမျိုးမျိုး စျေးကောင်းရလျက်ရှိပြီး၊ အရောင်းသွက်လျက်ရှိကြောင်း သိရှိရပါသည်။ ဆီထွက်သီးနှံမြေပဲ၊ နှမ်းနှင့် နေကြာသီးနှံများအား ပြည်တွင်းစားဆီကြိတ်ခွဲခြင်းတွင် အရေးပါသကဲ့သို့ စားဆီကြိတ်ခွဲပြီးနောက် ထွက်ရှိလာသည့် မြေပဲဖတ်၊ နှမ်းဖတ်နှင့် နေကြာဖတ်များမှာ မန္တလေးကုန်စည်ဒိုင်စျေးကွက်အတွင်း မွေးမြူရေးလုပ်ငန်းများမှ ဝယ်ယူမှုများပြားသည့်အတွက် ကုန်စည်ဒိုင်စျေးကွက်တွင် စျေးကောင်းရရှိလျက်ရှိကြောင်း သိရှိရပါသည်။  မန္တလေး ပွဲစား၊ ကုန်သည်စက်ပိုင်များ မဟာကထိန်တော်အသင်းတွင် ၂၀၂၅ ခုနှစ်ဒီဇင်ဘာလဒုတိယပတ်အတွင်း ဖြစ်ပေါ်လျက်ရှိသည့်တစ်ပိဿာ ပေါက်စျေးများအနေဖြင့် မြေပဲဖတ် ၆၇၅ဝိ/- နှင့် ၆၈၀ဝိ/-၊ နှမ်းဖတ် ၄၃၀ဝိ/- နှင့် ၄၄၀ဝိ/-၊နေကြာဖတ် ၃၃၀ဝိ/-နှင့် ၃၃၅၀ကျပ်တို့ဖြင့် ရောင်းချလျက်ရှိကြောင်း သိရှိရပါသည်။

DOCA(မန္တလေး)

         မန္တလေးစျေးကွက်တွင် နတ်တော်လအတွင်း ဘုရားပွဲနှင့်အလှူပွဲများ ကျင်းပသည့်အချိန်ဖြစ်၍ ငှက်‌ပျောသီးအမျိုးမျိုးအရောင်းသွက်လျက်ရှိကြောင်း စျေးချိုတော်ရှိ ငှက်ပျောသီးရောင်းချသည့် ဆိုင်ရှင်တစ်ဦး၏ပြောပြချက်အရ သိရှိရပါသည်။ မန္တလေးတိုင်းဒေသကြီးအတွင်း ၂၀၂၄-၂၀၂၅ ခုနှစ် ငှက်ပျောသီးစိုက်ပျိုးမှု ၁၃၂၃၀ ဧက၊ ရိတ်သိမ်းမှု ၁၂၈၃၅ ဧက၊ အထွက်နှုန်းခိုင်အရေအတွက်(၁၀၅၅.၈၂)နှင့် အထွက်ခိုင်အရေအတွက်(၁၃၅၅၁၄၄၀) ဖြစ်ကြောင်း သိရှိရပါသည်။ ဖီးကြမ်း၊ သီးမွှေး၊ ရခိုင်၊ငှက်ပျောချဉ်နှင့် ရွှေနီငှက်ပျောသီးတို့မှာ စျေးကွက်အတွင်း အများဆုံး တွေ့ရှိရပါသည်။ ဖီးကြမ်း၊ သီးမွှေးနှင့် ရခိုင်ငှက်ပျောသီးများကို ဘုရားပွဲနှင့် မိရိုးဖလာပွဲများတွင် သုံးစွဲမှုများပြီး၊ ကန်တော့ပွဲတစ်ပွဲတွင် အုန်းသီးတစ်လုံးနှင့် သုံးစွဲသည့် ငှက်ပျောခိုင်အရေအတွက်အလိုက်၊ အလုံးအရွယ်အစားအလိုက် စျေးနှုန်းအမျိုးမျိုး ရောင်းချကြောင်း သိရှိရပါသည်။ ၂၀၂၅ ခုနှစ်ဒီဇင်ဘာလဒုတိယပတ်အတွင်း ငှက်ပျောဖီးစျေးနှုန်းများအနေဖြင့် တစ်ဖီးလျှင် ဖီးကြမ်း (အစိမ်း) ၂၀၀ဝိ/- နှင့် ၃၅၀ဝိ/- ၊ဖီးကြမ်း (အမှည့်)၁၅၀ဝိ/- နှင့် ၃၀၀ဝိ/-၊သီးမွှေးငှက်ပျောသီးမှာ ၁၅၀ဝိ/-နှင့် ၂၅၀ဝိ/-၊ (တောင်ငူသီး) ၄၀၀ဝိ/- နှင့် ၅၅၀ဝိ/-၊ ရခိုင်ငှက်ပျောသီးနှင့် ငှက်ပျောချဉ်သီးမှာ ၁၅၀ဝ/- နှင့်၂၀၀ဝိ/-၊ ရွှေနီငှက်ပျောသီး (တောင်ငူသီး)မှာ ၅၀၀ဝိ/- နှင့် ၈၀၀ဝိ/- စျေးတို့ဖြင့် ရောင်းချလျက်ရှိကြောင်း သိရှိရပါသည်။

DOCA(မန္တလေး)