ပြည်တွင်းကုန်သွယ်မှုသတင်း

    စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကျွန်းလှမြို့နယ်သည် လယ်ယာစိုက်ပျိုးရေး လုပ်ငန်းများကို လုပ်ကိုင်ကြပြီး  သီးနှံမျိုးစုံ စိုက်ပျိုးလျက်ရှိရာ ထောပတ်ပဲသီးနှံကို စိုက်ပျိုးထားရှိ ကြောင်း၊ ၊ ထောပတ်ပဲသီးနှံကို ကျွန်းလှမြို့နယ် ကျီကုန်းကျေးရွာ၊ စံပြကျေးရွာနှင့် အခြားသော ကျေးရွာများတွင် စိုက်ပျိုးကြပြီး ထောပတ်ပဲ(ဆောင်း)သီးနှံကို ယခုအချိန်တွင် ရိတ်သိမ်းပြီး ဖြစ်ကြောင်း သိရသည်။

     ၂၀၂၅ ခုနှစ် မေလ ဒုတိယပတ်အတွင်း ထောပတ်ပဲတစ်တင်းလျှင် (၁၁၀၀၀၀)ကျပ်၊ အကွဲအနာပါ(၁)တင်းလျှင် (၁၀၉၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ကျွန်းလှမြို့ နယ်မှထွက်ရှိသော ထောပတ်ပဲသီးနှံကို ရွှေဘိုမြို့နှင့် မန္တလေးမြို့ရှိ ပွဲရုံများသို့ တင်ပို့ရောင်းချကြောင်း၊ သီးနှံရောင်းဝယ်ရေး လုပ်ငန်းရှင်များထံမှ သတင်းရရှိပါသည်။

DOCA (စစ်ကိုင်း)

          မန္တလေးတိုင်းဒေသကြီး၊  ကျောက်ဆည်ခရိုင်သည် လယ်ယာလုပ်ငန်းများလုပ်ကိုင်ကြသည့် အပြင် တစ်နိုင်တစ်ပိုင်မှ စီးပွားဖြစ်အိမ်တွင်းမှုလုပ်ငန်းများကိုလည်း လုပ်ကိုင်လျှက်ရှိပါသည် ။ တစ်နိုင်တစ်ပိုင်အိမ်တွင်းမှုလုပ်ငန်းတစ်ခုဖြစ်သော မြက်ဖျာရက်ခြင်းလုပ်ငန်းကို မြစ်သားမြို့နယ်ရှိ ကြောင်ပန်းကုန်းကျေးရွာတွင်ရက်လုပ်ရောင်းချလျှက်ရှိပါသည် ။ မြက်ဖျာရက်လုပ်ခြင်းလုပ်ငန်းတွင် ကုန်ကြမ်းဖြစ်သော ဒေသခေါ် မြက်စလုံးမြက်ကို အသုံးပြုရကြောင်း ၊ မြက်စလုံးမြက်ကို အင်းနှင့် မြစ်ချောင်းအစပ်များတွင်အများဆုံးပေါက်ရောက်သောအပင်တစ်မျိုးဖြစ်ကြောင်းမြတ်စလုံးပင်သည် အလေ့ကျပေါက်ရောက်သော အပင်တစ်မျိုးဖြစ်ပြီး ငွေကြေးဖြင့်ဝယ်ယူရန်မလိုအပ်ဘဲ မိမိတို့ အလိုရှိသလောက် နှုတ်ယူ၍ရသောကြောင့် အရင်းနှီးမလိုအပ်ကြောင်း၊ မြတ်ဖျာရက်လုပ်ရန်အတွက် မြတ်စလုံးအပင်ကိုနှုတ်၍ အပင်မှပါလာသောပန်းပွင့်များကိုဖယ်ပြီး မြတ်ပင်မှ အခွံများကိုသင်ပြီး အခြောက်ခံထားရကြောင်း၊ အခြောက်ခံပြီးနှီးများကို ဆေးအနီ၊အဝါ၊ အစိမ်းများထည့်၍ ရေနွေးတွင် (၁၅)မိနစ်ခန့်ပြုတ်ထားရကြောင်း ၊ ပြုတ်ပြီးသားနှီးများကို လက်ကြိတ်စက်ဖြင့် ပြားအောင်ကြိတ်ရ ကြောင်း၊ရလာသောနှီးများကို ဖျာရက်ရန်အတွက် လိုသလိုရက်လုပ်ကြကြောင်း၊ (၂)‌ယောက်အိပ် ၊ ဖျာတစ်ချပ်လျှင်နှီးပင် (၂၄၀)ပင်ရက်လုပ်ရကြောင်း၊ (၄)ယောက်အိပ်တစ်ချပ်လျှင် (၄၈၀)ပင်ရက် လုပ်ရကြောင်း ၊ မြက်ဖျာစျေးနှုန်းအနေဖြင့် (၂)‌ယောက်အိပ်တစ်ချပ်လျှင်ယခင်နှစ်စျေး(၁၁၀၀၀/-) ကျပ် ၊ ယခုနှစ်ဈေး(၁၅၀၀၀)ကျပ်အထိ ရောင်းချရပြီး(၄)ယောက်အိပ်တစ်ချပ်လျှင် ယခင်နှစ် (၁၅၀၀၀/-)ကျပ်၊ ယခုနှစ်စျေး(၂၀၀၀၀/-)ကျပ် စျေးအထိရောင်းချရကြောင်း၊လူတစ်ဦးတစ်နေ့ ရက်လုပ်မှုအနေဖြင့် (၂)ယောက်အိပ်ဖျာ(၂)ချပ်သာပြီးစီးကြောင်း၊(၄)ယောက်အိပ်ဖျာ(၁)ချပ်သာ ပြီးစီးကြောင်း၊ တစ်ရွာလုံးနီးပါးရက်လုပ်ကြကြောင်း၊ စျေးကွက်အနေဖြင့် ငွေကြေးတက်နိုင်သော ဖျာပွဲစားများမှ ရွာထဲရှိမြက်ဖျာယက်လုပ်သူများထံမှ တစ်ချပ်(၁၀၀၀-၁၅၀၀)ခွာ၍ ဝယ်ယူပြီး ရွာငံ၊ရေဦးမြို့များသို့ အများဆုံးတင်ပို့ရောင်းချကြောင်း၊ မြက်ဖျာ၏ အားသာချက်မှာနွေမှာအေး၍ ဆောင်းမှာ နွေးကြောင်း  ၊ ကျန်းမာရေးနှင့်ညီညွတ်သော မြက်ဖျာများကို ဝယ်ယူသုံးစွဲသင့်ပါ ကြောင်း ရေးသားတင်ပြအပ်ပါသည်။

DOCA(မန္တလေး)

           မန္တလေးတိုင်းဒေသကြီး၊  ကျောက်ဆည်ခရိုင်သည် ဆည်ရေသောက်ဒေသတစ်ခုဖြစ်သည့် အလျှောက်သီးနှံမျိုးစုံစိုက်ပျိုးဖြစ်ထွန်းလျှက်ရှိပါသည်။စပါး၊ပဲ၊ပြောင်းသီးနှံများအပြင် မိသားစုဝင်ငွေ တိုးပြီးစီးပွားလည်းဖြစ်သော သင်္ဘောပင်ကိုလည်း တောင်သူဦးကြီးများမ တိုးချဲ့စိုက်ပျိုးလာကြပါ သည်။ ကျောက်ဆည်မြို့နယ်တွင် သင်္ဘောပင်ကို အများဆုံးစိုက်ပျိုးသော ရွာများမှာ မင်းစုရွာ၊ အင်ရောင်းရွာ၊ရဲကြီးရွာနှင့်တောင်တော်ရွာများတွင် အများဆုံးစိုက်ပျိုးကြပါသည်။ သင်္ဘောမျိုးအနေ ဖြင့်ပင်ပုမျိုး၊ထိုင်ဝမ် သင်္ဘောများကို အများဆုံးစိုက်ပျိုးကြကြောင်း၊ သင်္ဘောမျိုးစေ့ကိုပျိုးထောင်၍ ပျိုးသက်တစ်လခွဲတွင် ရွှေ့ပြောင်းစိုက်ပျိုးရကြောင်း၊(၁)ဧက စိုက်ပျိုးမှုအပင်ပေါင်း လေးကွက်ကြား စိုက်ပျိုးလျှင် အပင်(၅၀၀-၆၀၀)အထိ စိုက်ပျိုးရကြောင်း၊အကွာအဝေးပေါ်မူတည်၍ အပင်အရေ အတွက်ကွားခြားနိုင်ကြောင်း၊ သင်္ဘောစိုက်ပျိုးမှု(၁)ဧက ကုန်ကျစရိတ်အနေဖြင့် မျိုး၊သွင်းအားစု၊ လုပ်သားခ အပါအဝင် စုစုပေါင်း(၇၀၀၀၀၀)ကျပ်ခန့်ကုန်ကျကြောင်း၊ သင်္ဘောစိုက်ပျိုးပြီး(၇-၈)လ တွင်အသီးများစတင်ခူးဆွတ်နိုင်ပြီဖြစ်ကြောင်း ၊ သင်္ဘောသက်တမ်း(၃)နှစ်အထိ အသီးများခူးဆွတ် ‌ရောင်းချနိုင်ကြောင်း၊ သင်္ဘောတစ်ပင်လျှင်အသီးပေါင်း(၂၅-၃၀)လုံးခန့်သီးနိုင်ကြောင်း၊ (၁)ဧကလျှင် သင်္ဘောအသီးပေါင်း ‌ရောင်းတန်းဝင်(၁၂၅၀၀)လုံးခန့်ရှိနိုင်ကြောင်း၊ သင်္ဘောသီးစျေးနှုန်းအနေဖြင့် အမှည့်အလုံးအကြီးတစ်လုံးလျှင်(၁၅၀၀-၂၀၀၀)ကျပ် ၊ အလတ်တစ်လုံးလျှင်(၈၀၀-၁၀၀၀)ကျပ် စျေးရှိပြီး သင်္ဘောသီးအစိမ်းတစ်လုံးလျှင်(၃၀၀-၅၀၀)ကျပ်အထိစျေးရရှိကြောင်း၊ စျေးကွက်အနေ ဖြင့်သစ်သီးဒိုင်များဖြစ်သော ဟံမြင့်မိုရ်၊ကျောက်ဆည်နှင့်မန္တလေးမြို့များသို့ တင်ပို့ရောင်းချလျှက်ရှိ ပြီး စိုက်ခင်းထဲအရောက် လာရောက်ဝယ်ယူမှုများလည်းရှိကြောင်း ၊ သရက်သီးပေါ်ချိန်ဖြစ်သဖြင့် အရောင်းနွေးသော်လည်းစျေးနှုန်းကျဆင်းခြင်းမရှိကြောင်း၊သင်္ဘောစိုက်ပျိုးမှုတွင် ငွေတစ်လုံးတစ်ခဲ တည်းမရရှိသော်လည်း အပတ်စဉ်ဝင်ငွေများရရှိသဖြင့် တောင်သူများ အကျိုးအမြတ်ဖြစ်ထွန်း ကြောင်း သင်္ဘောစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

          မန္တလေးတိုင်းဒေသကြီး၊ ပြင်ဦးလွင်ခရိုင်သည် အေးမြသောရာသီဥတုရှိပြီး မြို့နေတောင်သူ အများစုမှာ ရာသီပေါ်သီးနှံအပြင် နှစ်ရှည်သီးနှံများကိုပါ စိုက်ပျိုးအသက်မွေးဝမ်းကြောင်း ပြုလျက် ရှိပါသည်။ ၎င်းသီးနှံများအနက်မှ မက်မန်းစိုက်ပျိုးမှုကို ပြင်ဦးလွင်မြို့နယ်တွင် (၉၅၃)ဧက စိုက်ပျိုး ထားကြောင်းသိရှိရသည်။ မက်မန်းစိုက်ပျိုးသော ကျေးရွာများမှာ အင်းထိပ် ၊ ဆင်ဖြူအင်း ၊ ပန်းဦးတောင်၊ ညောင်ကုန်း၊ ကုန်းကော် ၊ မျှော့တောတို့တွင် အများဆုံးစိုက်ပျိုးပြီး အခြားကျေးရွာ များတွင်လည်း စိုက်ပျိုးလျက်ရှိပါသည်။ မက်မန်းကို ဇူလိုင်၊ ဩဂုတ်လများတွင် စိုက်ပျိုးပြီး မေ၊ ဇွန်လများတွင် အသီးခူးဆွတ်ကြပါသည်။ မက်မန်းပင်သည် ပင်လယ် ရေမျက်နှာပြင်အထက် ပေ(၃၅၀၀)ကျော်ရှိပြီး အေးမြစိုစွတ်သော ရာသီဥတုတွင် စိုက်ပျိုးနိုင်သော အပင်မျိုးဖြစ်ပါသည်။ မက်မန်းပင်ကို ပင်ခြား ၊ တန်းခြား ( ၁၅ x ၁၅ )ပေ စိုက်ပျိုးပြီး တစ်ဧကလျှင် အပင် (၁၉၃)ပင် စိုက်ပျိုးနိုင်ပါသည်။ မက်မန်းပင်သက်တမ်း (၂)နှစ်ကျော်လျှင် အသီးစတင် ခူးဆွတ်နိုင်ပါသည်။ မက်မန်းပင်၏ အဓိကလိုအပ်သော သွင်းအားစုမှာ ယူရီးယား၊ တီစူပါ၊ ပိုတက်မြေဩဇာတို့ဖြစ်ပြီး တစ်ဧက ကုန်ကျစရိတ်အနေဖြင့် လုပ်သားခ၊ သွင်းအားစုအပါအဝင် သိန်း(၃၀)အထိကုန်ကျကြောင်း သိရှိရသည်။ အရွယ်ရောက်ပြီး အသီးခူးဆွတ်နိုင်သော အပင်တစ်ပင်အထွက်နှုန်းမှာ (၀.၅၀)တင်းမှ (၁.၅၀)အထိထွက်ရှိပါသည်။ တစ်ဧကလျှင် ပျမ်းမျှ တင်း(၂၄၀)တင်းအထိထွက်ရှိပါသည်။ မက်မန်း ကိုသီးစားမျိုးနှင့်ဆားရည်စိမ်မျိုးဟူ၍ ခွဲခြားထားပြီး သီးစားမျိုးတွင် အညိုရောင်ရှိပြီး ဆားရည်စိမ် မျိုးတွင် အညို၊ အဝါ၊အနီဟူ၍ ခွဲခြားထားပါသည်။ ဆားရည်စိမ်မျိုးမှ မက်မန်းဝိုင်၊ မက်မန်းတော်ဖီ၊ မက်မန်းအချဉ်ပေါင်းတို့ ပြုလုပ်ပါသည်။ ယခုလက်ရှိ မက်မန်းဆားရည်စိမ် တစ်ပြည်လျှင်(၇၀၀၀-၈၀၀၀)ကျပ် ရောင်းချပြီး မက်မန်းဝိုင် (75Ml) ၁လုံးလျှင်(၁၅၀၀၀)ကျပ်၊ မက်မန်းဝိုင် (50Ml) ၁လုံး လျှင်(၁၂၀၀၀)ကျပ်ဖြင့် ရောင်းချလျက်ရှိပါသည် ။ ယခုထွက်ရှိသော မက်မန်းကို ပြင်ဦးလွင်နှင့် ပြည်တွင်းနေရာအနှံ့အပြား တင်ပို့လျက်ရှိပါသည်။

DOCA(မန္တလေး)

       ရှမ်းပြည်နယ်တောင်ပိုင်း အောင်ပန်း၊ကလောမှ ပန်းဂေါ်ဖီအစိမ်းများ ကျောက်ဆည်ခရိုင် အတွင်းသို့ရောက်ရှိပြီး စားသုံးသူပြည်သူများကြိုက်နှစ်သက်၍ အရောင်းအဝယ်ဖြစ်လျှက်ရှိရာ အစိမ်းရင့်ရင့် ပန်းဂေါ်ဖီစိမ်းသည် အာဟာရဓါတ်ကြွယ်ဝပြီး အစာချေဖျက်ခြင်း၊ နှလုံးသွေးကြောများ စနစ်၊ ကိုယ်ခံအားစနစ် ၊ ကင်ဆာကာကွယ်နိုင်တဲ့ ဓါတ်သတ္တိတို့ များပြားပါဝင်ပါသည်။ ဆိုဒီယမ်နှင့် ကယ်လိုဒီပါဝင်မှု နည်းပါးပြီး အဆီလုံးဝမပါဝင်တဲ့ဟင်းသီးဟင်းရွက်တစ်မျိုးဖြစ်သောကြောင့် ရောင်းအားကောင်းလျှက်ရှိရာ  ကုန်စိမ်းသည်များမှ ရှမ်းပြည်နယ်ထွက်ဂေါ်ဖီစိမ်းများအားမှာယူ‌ ရောင်းချလျှက်ရှိကြောင်း သိရှိရပါသည်။ ကျောက်ဆည်မြို့နယ်တွင် ပန်းဂေါ်ဖီပွင့်စိမ်းတစ်ပွင့်လျှင် လက်ကားဈေးအနေဖြင့် (၅၀၀-၆၀၀)ကျပ် နှင့် လက်လီဈေးမှာ(၈၀၀-၁၀၀၀)ကျပ် ဈေးတို့ဖြင့် အရောင်းအဝယ်လျှက်ဖြစ်ကြောင်း သိရှိရပါသည်။

DOCA(မန္တလေး)