ပြည်တွင်းကုန်သွယ်မှုသတင်း

      ကြက်သွန်ဖြူသည် မိသားစုတိုင်းစားသုံးကြသည့် စားဖိုဆောင်သီးနှံတစ်မျိုးဖြစ်ပါသည်။ ကြက်သွန်ဖြူမှာ ကျန်းမာ‌ရေးအတွက် အကျိုးကျေးဇူးများစွာရရှိသည့် သီးနှံတစ်မျိုးဖြစ်သည့်အတွက် စားသုံးမှု မြင့်မားခြင်းဖြစ်ပါသည်။ ကြက်သွန်ဖြူသုံးစွဲမှု စစ်တမ်းများအရ လူတစ်ဦးလျှင် တရက် ၀.၁၂ ကျပ်သား၊ တလလျှင် ၀.၀၄ ပဲသား၊ တနှစ်လျှင် ၀.၄၃ ပိဿာခန့် စားသုံးသည်ဟု စာရင်းဇယားများ အရ သိရပါသည်။

          ကြက်သွန်ဖြူဈေးကွက်တွင် ရှမ်းတောင်ကြက်သွန်ဖြူ၊ ကျောက်ဆည်ဖက်မှ အညာဒေသ ကြက်သွန်ဖြူ၊ တရုတ်(ကြူကုတ်) ကြက်သွန်ဖြူ၊ ရှမ်းမြောက် ခရမ်းစွဲကြက်သွန်ဖြူဟူ၍ ဈေးကွက်တွင် ရောင်းဝယ်နေကြပေသည်။ တရုတ်ကြက်သွန်ဖြူ(ကြူကုတ်) သည် ဈေးကွက်တွင် အခွံခွာရလွယ်ကူခြင်းကြောင့် စားသောက်ဆိုင်များနှင့် စားသုံးသူအချို့သာ သုံးစွဲပြီး ရှမ်းတောင် ကြက်သွန်ဖြူမှာ အနံ့အရသာကောင်းမွန်ပြီး ထားသိုသိမ်းဆည်းမှု တာရှည်ခံသဖြင့် အသုံးများ ကြသည်။ တရုတ်ကြက်သွန်ဖြူဈေးနှုန်းမှာလည်း ၁၃၀၀၀/၁၅၀၀၀ ခန့်ရှိ၍ ရှမ်းတောင်ကြက်သွန်ဖြူ ထူးလွန် ၈၅၀၀/၉၀၀၀ ခန့်နှင့် ဈေးနှုန်း တစ်ပိဿာ ၅၀၀၀ ခန့်ကွာခြားသဖြင့် သုံးစွဲမှုနှင့်  ဈေးကွက် ကွာခြားခြင်း ဖြစ်ပါသည်။

          ရှမ်းတောင်ကြက်သွန်ဖြူခေါ် အကျစ်စတွင် တီကျစ်၊ နောင်တရားဖက်မှထွက်သော အောင်ပန်းစ အကျစ်စနှင့် တောင်ကြီး‌ဒေသ၊ ဟိုပုံးဒေသထွက် အပွစနှင့် မြောက်ပိုင်းခရမ်းစွဲစသည့် ကြက်သွန်ဖြူ များသည် အရည်အသွေးနှင့် ထုတ်လုပ်မှုအဆင့်အတန်းအရ ဈေးနှုန်း ဈေးကွက် ကွာခြားပါသည်။ အောင်ပန်းစခေါ် အကျစ်စမှာ ကြက်သွန်ဖြူဥ အမြင်လှပြီး ကျစ်လျစ် သဖြင့် အရည်အသွေးကောင်းပြီး ထားသိုသိမ်းဆည်းရာတွင် တာရှည်ခံသဖြင့် ဈေးကွက်တွင်ခိုင်မာပြီး ထူး၁ ၃၅၀၀၊ ထူး၂ ၄၅၀၀၊ ထူး၃ ၆၀၀၀၊ ထူး၄ ၇၅၀၀၊ ထူး၅ ၇၅၀၀၀၊ ထူးလွန် ၈၅၀၀ ဈေး‌ပေါက်ပြီး တောင်ကြီးစနှင့် ခရမ်းစွဲကြက်သွန်ဖြူမှာ ဇကာချသန့်စင်ပြီး အဆင့်တွင် မျိုးချ ၂၅၀၀၊ ထူး၂ ၃၀၀၀၊ ထူး၃ ၃၅၀၀၊ ထူး၄ ၄၅၀၀၊ ထူး၅ ၅၅၀၀၊ ထူးလွန် ၇၀၀၀ ဈေးပေါက်သော်လည်း တောင်ကြီးစနှင့် ခရမ်းစွဲကြက်သွန်ဖြူမှာ အရောင်းအဝယ်သမားနှင့် အိမ်သုံးသူတို့အတွက် ဈေးလည်းသက်သာ အရည်အသွေးလည်းမကွာသည့်အတွက် ထူး၃၊ ထူး၄ အရွယ်များကို တအိတ် ၃၀ ပိဿာခန့်ဖြင့် တပိဿာလျှင် ၃၅၀၀ ဈေးဖြင့် အရောင်းသွက်နေကြောင်း ဈေးကွက်မှသိရပါသည်။

          ကြက်သွန်ဖြူမှာ အသုံးများလာချိန် ၂ လပိုင်း/ ၃ လပိုင်းတွင် ‌ဈေးမြင့်လာနိုင်သော်လည်း တရုတ်ကြက်သွန်ဖြူအဝင်ကြောင့် ဈေးကွက်တွင်  ငြိမ်နေဦးမည်ဖြစ်ကြောင်း သိရပါသည်။ စားသုံးသူ များအနေဖြင့် တရုတ်(ကြူကုတ်) တောင်ပိုင်း အကျစ်စနှင့် တောင်ကြီးအပွနှင့် ခရမ်းစွဲကို ဈေးကွက်အရ သင့်တော်ရာသုံးစွဲနိုင်ပါစေကြောင်း လေ့လာရေးသားရပေသည်။

DOCA(ရှမ်း)

         မြင်းခြံမြို့နယ်ရှိ အေးမြသီတာဈေး၌ ကုန်စိမ်းသီးနှံမျိုးစုံနှင့် ဟင်းသီးဟင်းရွက်များ ရောင်းဝယ်လျက်ရှိသည့်အနက် ဗမာခရမ်းချဉ်သီးများကိုလည်း ရောင်းချလျက်ရှိကြောင်း၊ ၂၀၂၅ခုနှစ် ဒီဇင်ဘာလ၌ ဗမာခရမ်းချဉ်သီး ကြီးစတစ်ပိဿာလျှင် (၆၀၀၀)ကျပ်၊ အလတ်စတစ်ပိဿာလျှင် (၅၀၀၀)ကျပ်၊ အသေးတစ်ပိဿာလျှင် (၄၀၀၀) ကျပ်ခန့် ပေါက်ဈေးများဖြင့် အရောင်းအဝယ်ဖြစ်လျက်ရှိကြောင်း၊ ယခင်လနှင့် နှိုင်းယှဉ်ပါက ယခုလတွင် ဗမာခရမ်းချဉ်သီး အစစုံတစ်ပိဿာလျှင် (၁၀၀၀-၁၅၀၀) ကျပ်ခန့် ဈေးနှုန်းများ မြင့်တက်ခဲ့ကြောင်း၊ ထိုသို့ဈေးနှုန်းမြင့် တက်ခဲ့ခြင်းမှာ ‌ဒေသအတွင်း၌ စိုက်ပျိုးထားရှိသော ဗမာခရမ်းချဉ်သီးများ ဈေးကွက်၌ လှိုင်လှိုင်ထွက် ပေါ်ခြင်းမရှိသေးသဖြင့် ဈေးကွက်လိုအပ်ချက်အရ စားသုံးမှုအတွက်လိုအပ်သောခရမ်းချဉ်သီးများကို ပုပ္ပါးမြို့နှင့် ပခုက္ကူမြို့တို့မှတင်သွင်းရောင်းချကြောင်း၊ မြန်မာလူမျိုးများအနေဖြင့် ဟင်းလျာတိုင်း လိုလိုတွင် ခရမ်းချဉ်သီးများထည့်သွင်းအသုံးပြုခြင်း၊ ဆောင်းရာသီစာဗမာခရမ်းချဉ်သီး (ခေါ်) ကိုင်းခရမ်းချဉ်သီးများအား ပန်ထွေဖျော်စားခြင်းစသည်ဖြင့် စားသုံးမှုများပြားသောကြောင့်  ဈေးကွက်တွင် ဝယ်လိုအားများပြားပြီး အရောင်းအဝယ်ကောင်းကြောင်း ကုန်စိမ်းပွဲရုံများမှ သိရှိရပါသည်။

DOCA(မန္တလေး)

    မုန်လာဥဖြူသည် ဆောင်းရာသီတွင်ထွက်ရှိသော ဆောင်းသီးနှံဖြစ်သောကြောင့် ယခုအချိန် တွင် အရောင်းအဝယ်ပိုမိုဖြစ်ထွန်းလျက်ရှိပါသည်။ ထားဝယ်မြို့ အနီးပတ်ဝန်းကျင်ကျေးရွာများနှင့် အိမ်ခြံမြေများတွင် မုန်လာဥဖြူများအား အများအပြားစိုက်ပျိုးလျက်ရှိကြောင်း သိရှိရပါသည်။ တနင်္သာရီတိုင်းဒေသကြီး၊ ထားဝယ်ခရိုင်၊ ထားဝယ်မြို့အတွင်းရှိစျေးများတွင် မုန်လာဥဖြူများ ရောင်းချကြပါသည်။

     ယခု ဒီဇင်ဘာလ ပထမပတ်တွင် မုန်လာဥဖြူများသည် အသင့်အတင့်ပေါများနေသော်လည်း စျေးနှုန်းများမှာ တစ်စည်းလျှင် (၂၅၀၀)ကျပ်နှုန်းဖြင့်‌ ရောင်းချလျက်ရှိရာ ရောင်းချသူများ အနေဖြင့် စျေးကောင်းရရှိနေပြီး အရောင်းအဝယ်ကောင်းမွန်နေကြောင်း သိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ ထားဝယ်ခရိုင်၊ သရက်ချောင်းမြို့နယ်တွင် မိသားစု တစ်ပိုင်တစ်နိုင် စိုက်ပျိုးရာမှ အောင်မြင်ဖြစ်ထွန်းလျက်ရှိပြီး ကွမ်းရွက်ဈေးနှုန်း မြင့်တက်မှုကြောင့် ကွမ်းရွက်စိုက်ပျိုး သူများ ပိုမိုအဆင်ပြေလျက် ရှိကြောင်း သိရှိရပါသည်။

          အဆိုပါ ကွမ်းရွက်ပင်အစ စိုက်ပျိုးချိန်၌ အပင်ငယ်စဉ်တွင် ကြီးထွားမှုအတွက် တိုင်များစိုက်၍ စနစ်တကျစိုက်ပျိုးရခြင်း၊ လေဒဏ်၊ နေဒဏ်ခံနိုင်ရန်အကာအကွယ်များ၊ ရေကောင်းစွာရရှိသော နေရာများတွင် စိုက်ပျိုးရကြောင်းသိရှိရပြီး ဒေသထွက်ကွမ်းရွက်များကို သရက်ချောင်းမြို့မစျေးနှင့် ထားဝယ်မြို့ပေါ်သို့ တင်ပို့ရောင်းချကြကြောင်းနှင့်  ကွမ်းရွက်အသေးတစ်စည်းလျှင် (၂၀၀၀-၂၅၀၀ ) ကျပ် နှင့် အကြီးတစ်စည်းလျှင် (၃၅၀၀-၄၀၀၀ ) ကျပ်ရှိကြောင်း သိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီးသည် တောင်ကုန်း၊ တောင်တန်း၊ တောင်စွယ်များပေါများပြီး အဆိုပါ တောင်ကုန်း၊ တောင်တန်း၊ တောင်စွယ်များ၊ တောင်ကြားလွင်ပြင်များတွင် ဝဥများသည် သဘာဝ အလျောက်ပေါက်ရောက်ကြပြီး ယခုအခါ စီးပွားဖြစ်စိုက်ပျိုးကြရာ ဒေသအခေါ်(ပိန်းဥ)ဟူ၍ခေါ်ကြ သည်။ ဝဥများအား ဇူလိုင်လမှ အောက်တိုဘာလများကဲ့သို့ မိုးကောင်းသောအချိန်များတွင် တူးဖော် ရရှိပြီး ယခုနှစ် ဝဥပေါ်ချိန်တွင် တူးဖော်ရရှိသော ဝဥအကြမ်းများအား ထားဝယ်မြို့ပေါ်ရှိ အဝယ်ဒိုင် များမှတစ်ပိဿာလျှင် (၃၆၀၀) ကျပ်ဖြင့် ဝယ်ယူခဲ့ကြောင်းသိရှိရပါသည်။ အဆိုပါဝဥ ကုန်ကြမ်းများ အား ရေး၊ မန္တ‌လေး၊ တရုတ်ဝယ်လက်ကုန်သည်များသို့တစ်ဆင့် ပြန်လည်ရောင်းချပြီး ၎င်းတို့မှ တစ်ဆင့် တရုတ်ပြည်သို့တင်‌ပို့ရောင်းချ၍ ဒေသတွင်းအလုပ်ရုံများဖြင့် ဝဥအကြမ်းများအား ရေဆေး သန့်စင်ကာ လှီးစက်ဖြင့်(Chip) ပြားများပြုလုပ်အခြောက်ခံပြီး အရည်အသွေးကောင်းမွန်သော ဝဥခြောက် များအား တရုတ်နိုင်ငံသို့ တိုက်ရိုက်တင်ပို့ရောင်းချကြကြောင်း သိရပါသည်။ ယခုအခါ ဝဥအခြောက်များအား တစ်ပိဿာလျှင် (၃၀၀၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)