ပြည်တွင်းကုန်သွယ်မှုသတင်း

          မြင်းခြံမြို့နယ်သည် ဥယျာဉ်ခြံမြေများ၌ စားဖိုဆောင်သီးနှံများ စိုက်ပျိုးလျက်ရှိကြောင်း၊ ဒေသအတွင်းရှိ ကျေးရွာများဖြစ်သော အနိမ့်ရွာ၊ သာပေါင်း၊ ခေါင်းကွဲကျေးရွာများတွင် ပဲတောင့်ရှည်များကို စီးပွားဖြစ် တစ်နိုင်တပိုင်စိုက်ပျိုးထားကြောင်း သိရှိရသည်။ ပဲတောင့်ရှည်တွင် အပင်ပုမျိုး(နွယ်မဲ့မျိုး)နှင့် အပင်ရှည်မျိုး(နွယ်တက်မျိုး)ဟူ၍ နှစ်မျိုးရှိပြီး အပင်ရှည်မျိုးကို တိုင်ထောင်၍ စိုက်ပျိုးကြကြောင်း၊ အစိမ်းနု၊ အစိမ်းရင့်၊ အနီရောင်ဟူ၍ အမျိုးမျိုးရှိကြောင်း၊ ပဲတောင့်ရှည်သည် မြေအမျိုးမျိုးတွင် စိုက်ပျိုး၍ရကြောင်း၊ မြေကောင်းလျှင်အထွက်ပိုကောင်းကြောင်း၊ စိုက်ပျိုးရာတွင် ရေမဝပ်သော မြေတွင် စိုက်ပျိုးပြီး ထွန်ရေးအသင့်အတင့်ဖြင့် စိုက်ပျိုးနိုင်ကြောင်း သိရှိရသည်။ မျိုးစေ့ချရာတွင် အစိုဓာတ်များလွန်းက ပုပ်သွားတတ်ကြောင်း၊ တိုက်ရိုက်အစေ့ချစနစ်ဖြင့် စိုက်ပျိုးပြီး တိုင်‌ထောင်ပဲကို တစ်တန်းနှင့်တစ်တန်း သုံးပေခြား၍ တစ်ပင်နှင့်တစ်ပင် (၉-၁၀)လက်မ ခွာ၍စိုက်ပျိုးကြကြောင်း၊ အပင်များရှည်လာသောအခါ အနည်းဆုံး(၇)ပေခန့်ရှည်သော ဝါးတိုင် (သို့မဟုတ်)သစ်သားတိုင်များကို အပင်၏ တိုင်ခြေတွင် ထောင်ပေးရကြောင်း၊ အပင်ခြေတွင်ရေမဝပ်ရန် သတိပြုရမည်ဖြစ်ကြောင်း၊ စိုက်ပျိုးပြီး (၃၀)ရက်အကြာတွင် ပဲတောင့်ရှည်များကို အစေ့နုသောအချိန်တွင် ခူးဆွတ်ရကြောင်း၊ တစ်ဧကလျှင် အထွက်နှုန်း(၉၅၀)ပိဿာခန့်ထွက်ရှိကြောင်း၊ မြေပြင်ခ၊ မျိုး၊ ဝါးဖိုး၊ လုပ်သားခ၊ သွင်းအားစု၊ စိုက်ပျိုးစရိတ်အပါအဝင် တစ်ဧကကုန်ကျစရိတ်(၁၈)သိန်းခန့် ကုန်ကျကြောင်း၊ စိုက်ခင်းအရောက် ဈေးနှုန်းမှာ တစ်ပိဿာလျှင်(၄၀၀၀)ကျပ်နှုန်းဖြင့် ကုန်သည်များကိုယ်တိုင် စိုက်ခင်းများသို့ လာရောက်ဝယ်ယူကြကြောင်း၊ တစ်ဧကအကျိုးအမြတ်အနေဖြင့် (၁၁၀၀၀၀) ကျပ်ခန့်ရရှိကြောင်း၊ တောင်သူများအနေဖြင့် ကုန်ကျစရိတ်နည်းပြီး ကာလတိုအတွင်း စီးပွားရေး တွက်ခြေကိုက်သော သီးနှံဖြစ်ကြောင်း ပဲတောင့်ရှည်စိုက်တောင်သူတစ်ဦးထံမှ သိရှိရပါသည်။

DOCA(မန္တလေး)

      ဧရာဝတီတိုင်းဒေသကြီး မအူပင်မြို့နယ် အရှေ့ဘက်ကမ်းကျေးရွာများတွင် စံပါယ်ပန်းကို အများဆုံး စိုက်ပျိုးကြကြောင်း သိရသည်။ အိမ်ထောင်စု နှစ်စ်ထောင်ကျော်ရှိပြီး အိမ်ထောင်စု အကုန်နှီးပါး စံပယ်ပန်းကို စိုက်ပျိုးကြသည်။ စံပယ်ပန်းများ နိုဝင်ဘာလတွင် ထွက်ရှိလာပြီး ရန်ကုန်သို့ တင်ပို့က ရန်ကုန်ဈေးကွက်တွင် ဈေးပိုရရှိကြောင်း ၊ စံပါယ်ပန်းခူးပြီး တင်ပို့သော ကားများမှာ နေ့စဉ် နေ့လည် ၁၂နာရီတွင် အချိန်မှန်ရန်ကုန်သို့ တင်ပို့ကြောင်း  သိရသည်။  စံပယ်ပန်းများသည် နွေ၊ မိုး၊ ဆောင်း သုံးရာသီလုံး ထွက်ရှိပြီး ဆောင်းရာသီတွင် အထွက်နှုန်းများပြီး မိုးရာသီထက် ဈေးနှုန်း နည်းသည်။ မိုး’ရာသီတွင် အထွက်နည်းပြီး ဈေးကောင်းမွန်သည်။

     စံပါယ်ပန်းဈေးနှုန်းအနေဖြင့် ၂၀၂၅ခုနှစ် နိုဝင်ဘာလ ဆန်ပိုင်းမှ စ၍ စံပါယ် အဖူး ၁၀၀ကို ၆၀၀ကျပ်၊ အပွင့် ၁၀၀၀လျှင် ၆၀၀၀၀ကျပ်ဖြင့် စံပါယ်ခြံမှ ဈေးပေးဝယ်ရပြီး ရန်ကုန်ဈေးကွက်သို့ တင်ပို့ပါက အဖူး ၁၀၀၀လျှင် ၉၀၀၀၀-၁၀၀၀၀၀ကျပ်အထိဈေးရကြောင်း စိုက်ပျိုးသူထံမှ သိရသည်။ ရန်ကုန်ကား နေ့လည် အချိန်မီခူး၍ တင်ပို့နိုင်ပါက ဈေးကောင်းရပြီး ရန်ကုန်သို့ အချိန်မီတင်ပို့ရန် ကျန်ရှိသော ပန်းများသည် မအူပင်ဈေးကွက်တွင် ဈေးနည်းကြောင်း သိရသည်။ ယခင်လများဖြစ်သော ဇူလိုင်၊ ဩဂုတ်လများက စွပါယ်ပန်းဈေးမှာ အဖူး ၁၀၀လျှင် ၁၅၀၀-၂၀၀၀ကျပ်၊ အဖူး ၁၀၀၀လျှင် ၁၅၀၀၀-၂၀၀၀၀ ကျပ် မအူပင်ဈေးကွက်အတွင်းရောင်းချနေပြီး၊ ရန်ကုန်ဈေးကွက်တွင် အဖူး ၁၀၀၀ လျှင် ၂၂၀၀၀၀-၂၅၀၀၀၀ ကျပ်အထိ ဈေးရရှိခဲ့ကြောင်း၊ မအူပင်ဈေးအတွင်းတွင် စံပါယ် ၁၂ ပွင့်ပါ တစ်ကုံးလျှင် ၄၀၀ကျပ်ဖြင့် အရောင်းအဝယ်ဖြစ်နေပြီး စိုက်ပျိုးသူရေး၊ ပန်းရောင်းချသူများပါ စီးပွားဖြစ် နေ့စဉ် ဝင်ငွေရ အဆင်ပြေနေကြောင်းကို  စံပါယ်ပန်းရောင်းချသူထံမှ သိရှိရပါသည်။

DOCA(ဧရာဝတီ)

        ပဲလင်း‌‌မြွေသီး(ခေါ်) ဗုံလုံသီးပင်သည် သခွား၊ ဗူး၊ ဖရုံနွယ်ဝင် အပင်တစ်မျိုးဖြစ်ကြောင်း၊ အဖြူရောင်ခပ်ရှည်ရှည်အသီးတစ်မျိုးဖြစ်ပြီး၊ အသီးအ‌ပေါ်ယံအလွှာလေးကို ဓါးနဲ့ခြစ်၍ အရွယ်တော်‌လေးတွေတုံးပြီး အလယ်အူတိုင်ကိုဇွန်းအမြီးနှင့် ရစ်ထုတ်ပြီး အလယ်မှာအသား၊ ငါးစသည့်တို့ အဆာသွပ်၍ ချက်စားရကြောင်း  သိရှိရသည်။ ပဲလင်းမြွေသီး(ဗုံလုံသီး)တွင် အာဟာရဓာတ်များစွာပါဝင်ကြောင်း၊ ရေဓာတ်နှင့် အမျှင်ဓာတ်ကြွယ်ဝစွာ ပါဝင်သောကြောင့် အစာခြေစနစ်ကို အားကောင်းစေပြီး အစာအိမ်နှင့် အူလမ်းကြောင်းကျန်းမာရေးကို အထောက်အကူပြုကြောင်း၊ အဆာခံနိုင်၍ ဝိတ်ချချင်သောသူများအတွက် စားပေးသင့်သော အသီးဖြစ်ကြောင်း၊ ကယ်လ်ဆီယမ်ဓာတ် ပါဝင်သောကြောင့် အရိုးနှင့်သွားများကို သန်မာစေကြောင်း၊ စိတ်ဖိစီးမှုကိုလျော့ချပေးပြီး နှလုံးကျန်းမာရေးကို အထောက်အကူပြုကြောင်း၊ ဆီးရွှင်၍ ကိုယ်တွင်းအဆိပ်အတောက်တွေကို ဖယ်ရှားပေးပြီး အသည်းရဲ့ လုပ်ဆောင်မှုကိုလည်း ကောင်းစေကြောင်း သိရှိရသည်။

            မြင်းခြံမြို့နယ် သ‌င်္ဘောတင်ကျေးရွာတွင် ဗုံလုံသီးများကို တောင်သူများက စီးပွားဖြစ် တစ်နိုင်တစ်ပိုင် စိုက်ပျိုးထားကြောင်း၊ စိုက်ပျိုးချိန်မှာ မေလမှဩဂုတ်လအထိ စိုက်ပျိုးထားရှိကြောင်း၊ စိုက်ပျိုးပြီး ၄၅ ရက်မှ ၆၀ ရက်အတွင်း အသီးများစတင်ခူးဆွတ်နိုင်ကြောင်း၊ အသီးရှည်ရန်နှင့် အသီးများ ဖြောင့်တန်းစေရန် ခဲဆွဲပေးရကြောင်း၊ စိုက်ပျိုးချိန်မှ ရိတ်သိမ်းချိန်အထိ ၈၀ ရက်မှ ၉၀ ရက်ကြာမြင့်ကြောင်း သိရှိရသည်။ စိုက်ခင်းရောင်းဈေးမှာ ဗုံလုံသီးတစ်တောင့်လျှင် ပြွန်ဈေး(၁၀၀၀)ကျပ်ခန့်‌ပေါက်ဈေးများရှိကြောင်း၊  အေးမြသီတာဈေးတွင် ရောင်းချနေသော ဗုံလုံသီးတစ်တောင့်လျှင် လက်လီဈေး (၁၂၀၀-၁၇၀၀)ကျပ် ပေါက်ဈေးများဖြင့်ရောင်းချကြောင်း၊ ဗုံလုံသီး အရည်အသွေးနှင့် အကြီးအသေးပေါ်တွင် ဈေးနှုန်းများကွာခြားကြောင်း၊ ဈေးကွက်အနေဖြင့် ဒေသတွင်းစားသုံးရန်နှင့် ရန်ကုန်မြို့သို့လည်းတင်ပို့ရောင်းချကြောင်း သိရှိရပါသည်။

DOCA(မန္တလေး) 

          တန်ဆောင်မုန်းလအခါသမ မန္တလေးစျေးချိုတော်တွင် ငါးခြောက်ဝင်ရောက်မှုအပေါ် မူတည် ၍ စျေးအနည်းငယ်မြင့်တက်သွားပြီး၊ အရောင်းသွက်လျက်ရှိကြောင်းစျေးသည်တစ်ဦး၏ပြောပြချက် အရ သိရှိရပါသည်။  ၂၀၂၅   ခုနှစ်နိုဝင်ဘာလပထမပတ်အတွင်း အမျိုးအစားအလိုက် တစ်ပိဿာပေါက်စျေးတို့ မှာ  ငါးနီတူးခြောက်၂၀၀၀ဝိ/-  နှင့် ၂၈၀၀ဝိ/-၊ ငါးဖောင်ရိုး ခြောက် ၄၀၀၀ဝိ/- နှင့် ၆၀၀၀ဝိ/-၊ ငါးပုတ်သင်ခြောက် (လုံး)၁၆၀၀ဝိ/- နှင့်၂၀၀၀ဝိ/-၊ ငါးပုတ် သင်ခြောက်(ပြား) ၂၀၀၀ဝိ/-နှင့်၂၅၀၀ဝိ/-၊ ငါးရောင်ခြောက် ၄၅၀၀ဝိ/-နှင့်၇၀၀၀ဝိ/-၊ငါးရံ့ခြောက်(လုံး)၆၅၀၀ဝိ/- နှင့် ၇၅၀၀ဝိ/-၊ ငါးရံ့ခြောက် (ပြား)၈၅၀၀ဝိ/- နှင့် ၉၅၀၀ဝိ/-၊ပုဇွန် ခြောက် ၂၅၀၀ဝိ/- နှင့်၆၀၀၀ဝိ/- စျေးဖြင့် ရောင်း ချလျက်ရှိကြောင်း သိရှိရပါသည်။ တန်ဆောင်မုန်းလအခါသမယဖြစ်သည့်အတွက် ဘုရားပွဲများနှင့် အလှူပွဲတော်များတွင် ငါးခြောက်သုံးစွဲမှုများပြားသည့်အတွက် အရောင်းသွက်လျက်ရှိကြောင်း သိရှိရပါသည်။

DOCA(မန္တလေး)

       တန်ဆောင်မုန်းလအခါသမယ ကုန်စိမ်းစျေးကွက်သို့မန္တလေးတိုင်းဒေသကြီးရှိ အမရပူရ ခရိုင်၊ပြင်ဦးလွင်ခရိုင်၊ကျောက်ဆည်ခရိုင်နှင့်မိတ္တီလာခရိုင်တို့မှ ထွက်သည့်ကုန်စိမ်းများ၊ စစ်ကိုင်း တိုင်း ဒေသကြီးနှင့် ရှမ်းပြည်နယ်တို့မှ ထွက်သည့်ပန်းဂေါ်ဖီထုပ်များ ဝင်ရောက်မှုများပြားလျက်ရှိပြီး၊ စျေးအနည်းငယ်လျော့ကျကာ အရောင်းသွက်လျက်ရှိကြောင်း  သိရှိရပါသည်။ ၂၀၂၅ ခုနှစ်နိုဝင်ဘာ လပထမပတ်အတွင်း ဖြစ်ပေါ်သည့်စျေးနှုန်းများမှာ ပန်းဂေါ်ဖီ ထုပ် ၁ ခုလျှင် အပွင့်(ကြီး) ၁၆၀၀ ကျပ်နှင့် ၁၈၀၀ကျပ်၊အပွင့်(သေး) ၁၀၀၀ ကျပ်နှင့်၁၅၀၀ ကျပ် စျေးတို့ဖြင့် ရောင်းချပြီး၊ အလုံးအရွယ် အစားအပေါ်မူတည်၍ စျေးကွာခြားမှုရှိကြောင်းသိရှိရပါသည်။ မန္တလေးမြို့၊သီရိမာလာစျေးအတွင်း နေ့စဉ် ကုန်စိမ်းသီးနှံဝင်ရောက်မှုမှာ ကုန်စည် အမျိုးအစားအလိုက် Canter ၁၂ဘီးနှင့် ၆ ဘီး) ယာဉ်(၄၀) စီးနှင့်(၆၀)စီးအကြားဝင်ရောက်လျက် ရှိကြောင်း သိရှိရပါသည်။

DOCA(မန္တလေး)