မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၊ မြို့မဈေး၌ ငဖန့်ဝိုင်းငါးပိကောင်ကို နတ်တလင်းမြို့၊ ဖျာပုံမြို့နှင့် ရန်ကုန်မြို့တို့မှ အဓိကမှာယူရောင်းချကြောင်း သိရသည်။

            ၂၀၂၅ ခုနှစ်၊ ဒီဇင်ဘာလ(ဒုတိယပတ်)တွင် ငဖန့်ဝိုင်းငါးပိကောင်(၁)ပိဿာလျှင် ကျပ်(၃၂၀၀၀) ဖြင့် ရောင်းချလျက်ရှိပြီး ယခင်နိုဝင်ဘာလ(စတုတ္ထပတ်)တွင် ငဖန့်ဝိုင်းငါးပိကောင်(၁)ပိဿာလျှင် ကျပ် (၃၆၀၀၀)ဖြင့် ရောင်းချခဲ့ရာ ဈေးနှုန်းနှိုင်းယှဉ်ပါက ယခုတစ်ပတ်တွင် ကျပ်(၄၀၀၀) ဈေးနှုန်းကျဆင်း ကြောင်း သိရသည်။ မင်းဘူးမြို့မဈေး၌ ငါးပိ၊ ငါးခြောက်များကို ရန်ကုန်မြို့၊ ဖျာပုံမြို့နှင့် နတ်တလင်း မြို့တို့မှ တိုက်ရိုက်မှာယူရောင်းချသည့်အတွက် ယခုအချိန်တွင် ဈေးအတွင်းသို့ ဝင်ရောက်မှုများလာ သဖြင့်  ဈေးနှုန်းမှာ ကျဆင်းလာခြင်းဖြစ်ကြောင်း သိရှိရသည်။

DOCA(မကွေး)

   မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့မဈေး၌ အာလူးကို ကုန်စိမ်းသီးနှံ ဈေးကွက်တွင် ကျောက်ပန်းတောင်းမြို့နှင့် ရှမ်းပြည်နယ်၊ အောင်ပန်း‌မြို့တို့မှထွက်ရှိသော အာလူးများဝင်ရောက်အရောင်းအဝယ်ဖြစ်လျက်ရှိကြောင်း သိရသည်။

         ၂၀၂၅ ခုနှစ်၊ ဒီဇင်ဘာလ(ဒုတိယပတ်)တွင် အာလူး(၁)ပိဿာလျှင် (အလုံးအကြီးအသေးနှင့် အရည်အသွေးလိုက်၍) ကျပ်(၅၅၀၀-၆၀၀၀-၆၅၀၀)ဖြင့် အရောင်းအဝယ်ဖြစ်လျက်ရှိပြီး  ယခင် နိုဝင်ဘာလ(ဒုတိယပတ်)တွင် အာလူး(၁)ပိဿာလျှင် (အလုံးအကြီးအသေးနှင့် အရည်အသွေးလိုက်၍) ကျပ်(၆၅၀၀-၇၀၀၀-၇၅၀၀)ဖြင့် ရောင်းချလျက်ရှိရာ  ဈေးနှုန်း နှိုင်းယှဉ်ပါက ယခုတစ်ပတ်တွင် အာလူး (၁)ပိဿာလျှင် ကျပ်(၅၀၀)ခန့် ဈေးကျပြီး အရောင်းအဝယ်ဖြစ်ကြောင်း သိရသည်။ ယခုအချိန်တွင် ဒေသတွင်းအာလူး ထွက်ရှိမှုမရှိသေးဘဲ ရှမ်းပြည်နယ်၊ အောင်ပန်းမြို့မှ မှာယူရောင်းချရပြီး ဈေးအတွင်း ဝင်ရောက်မှု များလာသောကြောင့် အာလူးဈေးနှုန်းမှာ အနည်းငယ်ကျလာခြင်းဖြစ်ကြောင်း  သိရှိရ သည်။

DOCA(မကွေး)

    မကွေးတိုင်းဒေသကြီး၊ မင်းဘူးခရိုင်၊ မင်းဘူးမြို့၊ မြို့မဈေး၌ ခရမ်းသီးကို မင်းဘူးမြို့နယ်အတွင်းရှိ ကျောက်တံခါးရွာ၊ စကု၊ ပွင့်ဖြူစသည့် ဒေသများအပြင် မကွေးနှင့် တောင်တွင်းကြီးမြို့တို့မှ မှာယူရောင်းချကြောင်း သိရသည်။

  ၂၀၂၅ ခုနှစ်၊ ဒီဇင်ဘာလ(ဒုတိယပတ်)တွင် ခရမ်းသီး(၁)ပိဿာလျှင် ကျပ်(၄၈၀၀)ဖြင့် ရောင်းချလျက်ရှိပြီး ယခင်နိုဝင်ဘာလ(ဒုတိယပတ်)တွင် ခရမ်းသီး(၁)ပိဿာလျှင် ကျပ် (၃၀၀၀)ဖြင့် ရောင်းချ ခဲ့ရာ ဈေးနှုန်းနှိုင်းယှဉ်ပါက ယခုတစ်ပတ်တွင် ကျပ်(၁၈၀၀)ခန့် ဈေးနှုန်းမြင့်တက်ပြီး အရောင်းအဝယ် ဖြစ်ကြောင်း သိရသည်။ ယခုအချိန်တွင် ဒေသတွင်း၌ ခရမ်းသီးများ လှိုင်လှိုင်ထွက်ရှိချိန်မဟုတ်ဘဲ အခြားဒေသမှ မှာယူရောင်းချရသည့်အတွက် ဈေးနှုန်းမှာမြင့်တက်လာခြင်းဖြစ်ကြောင်း သိရှိရသည်။

DOCA(မကွေး)

    မကွေးတိုင်းဒေသကြီး၊ မင်းဘူးခရိုင်၊ ဆင်ဖြူကျွန်းမြို့ စလင်းချောင်းအနောက်ဘက်ရှိ နွယ်တမယ်၊ ချောင်းဖြူ၊ ချောင်းကောက်၊ ညောင်ကုန်း၊ ပန်းတော၊ မြောင်းဘောင် စသည့်ကျေးရွာ များမှတောင်သူများသည် စလင်းချောင်းရေကိုအမှီပြု၍ ဟင်းသီးဟင်းရွက် သီးနှံစားပင်မျိုးစုံကို တစ်ပိုင်တစ်နိုင် စိုက်ပျိုးလုပ်ကိုင်လျက်ရှိသည်။ ယခုနှစ်တွင်  စားသုံးသူများပြား၍ ဈေးကွက်အခိုင် အမာရှိသော စားဖိုဆောင်သုံး ရာသီစာကာလတိုသီးနှံဖြစ်သည့် ပန်းဂေါ်ဖီမှာ ဈေးကောင်းရ၍ တောင်သူများ ပိုမိုတိုးချဲ့စိုက်ပျိုးလျက်ရှိကြောင်းသိရသည်။

            ပန်းဂေါ်ဖီသည် မုန်လာအုပ်စုတွင်ပါဝင်သော အပင်များဖြစ်၍ မြေဆီဩဇာကြွယ်ဝသော မြေအမျိုးအစားကို ကြိုက်နှစ်သက်ကြောင်း၊ အေးသောရာသီဥတုကို ကြိုက်နှစ်သက်သော်လည်း အပူဒဏ်ခံနိုင်သည့် သီးနှံတစ်မျိုးဖြစ်ကြောင်း၊ ပူ၍ခြောက်သွေ့သော ရာသီဥတုတွင် ပန်းမပွင့်သည့် အတွက် အေးပြီးအစိုဓာတ်ရသောနေရာတွင် စိုက်ပျိုးသင့်ကြောင်း၊ ခြောက်သွေ့လွန်းသော ရာသီ          ဥတုတွင် အပွင့်ဖြစ်ထွန်းရန်ခက်ခဲကြောင်း၊ မြေပြန့်ဒေသများတွင် စက်တင်ဘာနှင့် အောက်တိုဘာ  လများတွင် စိုက်ပျိုးကြပြီး တောင်ပေါ်ဒေသများတွင် ဧပြီ၊ မေ၊ စက်တင်ဘာနှင့်အောက်တိုဘာ လများတွင် စိုက်ပျိုးကြကြောင်း၊ စိုက်ပျိုးရာတွင် မြေကိုဘောင်ဖော်၍ အတန်းလိုက်စိုက်ပျိုးကြပြီး တစ်ပင်နှင့်တစ်ပင် (၁.၅-၂)ပေအကွာ၊ တစ်တန်းနှင့်တစ်တန်း(၂-၂.၅)ပေခန့်အကွာ စိုက်ပျိုးရ ကြောင်း၊ သို့မှသာလေဝင်လေထွက်ကောင်း၍ နေရောင်ခြည်ကောင်းစွာရရှိကာ အပင်ဖြစ်ထွန်း ကြောင်း၊ တစ်ပတ်လျှင်(၂)ကြိမ်ခန့် ရေသွင်းပေးရကြောင်း၊ အပင်သက်တမ်း(၃)လခန့်အကြာတွင် ပန်းပွင့်များစတင်ခူးဆွတ်နိုင်ကြောင်း၊ စတင်ခူးဆွတ်ချိန်မှ (၃-၄)လကြာအထိ ခူးဆွတ်ရောင်းချရ ကြောင်း၊ အဝေးသို့တင်ပို့ရောင်းချပါက အပင်ကိုအရွက်များ(၃-၄)ရွက်ခန့် ချန်၍ခုတ်ရကြောင်း စိုက်ပျိုးတောင်သူတစ်ဦးထံမှ သိရှိရသည်။ ဆင်ဖြူကျွန်းဒေသထွက် ပန်းဂေါ်ဖီပွင့်များကို ပွင့်ဖြူ၊ စလင်း၊ စကု၊ မင်းဘူး၊ မကွေးမြို့များသို့ တင်ပို့ရောင်းချကြပြီး ၂၀၂၅ခုနှစ်၊ ဒီဇင်ဘာလ (ဒုတိယပတ်) တွင် ပန်းဂေါ်ဖီပွင့်အရွယ်အစားပေါ်မူတည်၍ တစ်ပွင့်လျှင် ကျပ်(၁၅၀၀)မှ ကျပ်(၂၀၀၀)အထိ ဈေး ကောင်းရရှိကြောင်းသိရှိရသည်။ ရာသီပေါ်သီးနှံဖြစ်၍ စားသုံးသူဈေးကွက်၌လည်း အရောင်းသွက် လျက်ရှိသောကြောင့် ဆင်ဖြူကျွန်းဒေသရှိ  ပန်းဂေါ်ဖီစိုက်ပျိုးသူ တောင်သူများအနေဖြင့် ဝင်ငွေ အဆင်ပြေလျက်ရှိကြောင်း သိရှိရပါသည်။

DOCA(မကွေး)

         ပေါက်ခေါင်းမြို့နယ်အနေဖြင့် ကြံစိုက်ဧက (၂၀၀၀၀) ကျော်စိုက်ပျိုးထားပြီး ယခုအခါ ကြံများ စတင်ခုတ်သိမ်းလျက်ရှိပါသည်။ ထွက်ရှိလာသောကြံများအား ပေါက်ခေါင်းမြို့နယ် အင်ငါးခွသကြား စက်နှင့် ပြည်နဝဒေးသကြားစက်သို့ တင်ပို့ရောင်းချကြောင်း သိရှိရပါသည်။ ဈေးနှုန်းအနေဖြင့် ကြံ (၁) တန် လျှင် (၁၇၀၀၀၀) ကျပ်ဖြင့် ရောင်းချကြကြောင်း သိရှိရပါသည်။ အထွက်နှုန်းအနေဖြင့် (၁) ဧကလျှင် တန် (၃၅) တန် ဝန်းကျင်ထွက်ရှိကြောင်း သိရှိရပါသည်။ (၁) ဧက ကုန်ကျစရိတ်အနေဖြင့် (၂၅၀၀၀၀) ကျပ် ပတ်ဝန်းကျင်ကုန်ကြ၍ ကြံစိုက်တောင်သူများ အနေဖြင့် (၁)ဧကလျှင် အကျိုးအမြတ် (၂၅၀၀၀၀) ကျပ်မှ (၃၀၀၀၀၀) ကျပ်အထိရရှိကြောင်း သိရှိရပါသည်။

DOCA(ပဲခူး)