ပြည်တွင်းကုန်သွယ်မှုသတင်း

         စျေးကွက်အတွင်း မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့် ရှမ်းပြည်နယ်တို့မှ ထွက်သည့်မုန်ညင်းစိမ်းဟင်းရွက်များ ဝင်ရောက်မှုများပြီး၊ ဆောင်းရာသီစာ မုန်ညင်းစိမ်းမှာ အရောင်းသွက်လျက်ရှိကြောင်း သိရှိရပါသည်။ မုန်ညင်းစိမ်းဟင်းရွက်မှာ ရာသီမရွေးထွက်ရှိသော်လည်း ဆောင်းရာသီစာအဖြစ် စားသုံးလျက်ရှိကြောင်း သိရှိရပါသည်။ မန္တလေးစျေးကွက်အတွင်း ၂၀၂၅ခုနှစ် ဒီဇင်ဘာလနောက်ဆုံးပတ်အတွင်း မုန်ညင်းစိမ်းဟင်းရွက် ၁၀စီးလျှင်လက္ကားစျေး  ၇၀၀၀ ကျပ်နှင့် ၈၅၀၀ ကျပ်၊ လက်လီစျေး ၉၀၀၀ ကျပ်နှင့် ၁၀၀၀၀ ကျပ်တို့ဖြင့် ရောင်းချ လျက်ရှိကြောင်း ရတနာပုံစျေးရှိ စျေးသည်တစ်ဦး၏ပြောပြချက်အရ သိရှိရပါသည်။

DOCA(မန္တလေး)

         စျေးကွက်အတွင်း မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့် ရှမ်းပြည်နယ်ဒေသထွက် ပဲလိပ်ပြာကုန်စိမ်းများ ဝင်ရောက်မှုများပြားလျက်ရှိပြီး၊ ပဲလိပ်ပြာမှာ စျေးအနည်းငယ်ကျဆင်းကာ အရောင်းသွက်လျက်ရှိကြောင်း သိရှိရပါသည်။ ၂၀၂၅ ခုနှစ် ဒီဇင်ဘာလနောက်ဆုံးပတ်အတွင်း ပဲလိပ်ပြာ (ပဲစိမ်းတောင့်) လက္ကားစျေး ၄၅၀၀ ကျပ်နှင့် ၅၅၀၀ ကျပ်၊လက်လီစျေး ၇၀၀၀ ကျပ်နှင့် ၈၅၀၀ ကျပ်၊ ပဲလိပ်ပြာ (ပဲစိမ်း)တစ်ပြည်လျှင်  လက္ကားစျေး ၇၀၀၀ ကျပ်နှင့် ၈၅၀၀ ကျပ်၊ လက်လီစျေး ၉၀၀၀ ကျပ်နှင့် ၁၀၀၀၀ ကျပ်ဖြင့် ရောင်းချလျက်ရှိကြောင်း သိရှိရပါသည်။ သီရိမာလာစျေးအတွင်း ၂၀၂၅ ခုနှစ် ဒီဇင်ဘာလနောက်ဆုံးပတ်အတွင်း ပဲစိမ်းမျိုးစုံအပါအဝင် ကုန်စိမ်းသီးနှံ ဝင်ရောက်မှုမှာ ကုန်စည်အမျိုးအစားအလိုက် Canter (၁၂ ဘီးနှင့် ၆ဘီး) ယာဉ်(၂၈၀)စီးနှင့် (၄၂၀)စီး အကြား  ဝင်ရောက်လျက်ရှိကြောင်း  သိရှိရပါသည်။

DOCA(မန္တလေး)

            မန္တလေးကုန်စိမ်းသီးနှံစျေးကွက်သို့   ပဲပိုးတီဥကုန်စိမ်းသီးနှံများ အများအပြားဝင်ရောက်ကြောင်း သိရှိရပါသည်။   ပဲပိုးတီကုန်စိမ်းသီးနှံမှာ ချိုစေးစေးအရသာရှိပြီး၊ ဆောင်းရာသီစာသီးနှံအဖြစ် ပဲပိုးတီသီးနှံအား အစိမ်းအတိုင်းစားသုံးခြင်း၊ အချဉ်ဖောက်၍ စားသုံးခြင်း၊ အရွက်များဖြင့် ကြော်စားခြင်း၊ အသုပ်အဖြစ် အမျိုးမျိုးစားသုံးကြကြောင်း သိရှိရပါသည်။ မန္တလေးကုန်စိမ်း စျေးကွက်အတွင်းပဲပိုးတီဥများအား ရှမ်းပြည်နယ်တောင်းပိုင်းဒေသမှဝင်ရောက်လျက်ရှိပြီး ၊တောင်းများဖြင့် ဝင်ရောက်ကြောင်း သိရှိရပါသည်။ ၂၀၂၅ ခုနှစ်ဒီဇင်ဘာလနောက်ဆုံး ပတ်အတွင်း  ပဲပိုးတီဥ သီးနှံလက္ကားစျေးအနေဖြင့်  (၃၀ ပိဿာပါ)တောင်းတစ်ခုလျှင် ၁၈၀၀၀၀  ကျပ် နှင့်   ၁၈၅၀၀၀ကျပ်၊ လက်လီစျေးအနေဖြင့် တစ်ပိဿာလျှင်   ၇၀၀၀ ကျပ်နှင့်   ၈၀၀၀ ကျပ် တို့ဖြင့် ရောင်းချလျက်ရှိပြီး၊  အရောင်းသွက်လျက်ရှိကြောင်း မန္တလေးမြို့၊ ကမ်းနားလမ်းစျေးရှိကုန်စိမ်း ဆိုင်ရှင်တစ်ဦး၏ ပြောပြချက်အရ သိရှိရပါသည်။

DOCA(မန္တလေး)  

         မန္တလေးစျေးကွက်သို့  ဖူးစားပြောင်း(ထိုင်ဝမ်) နှင့် ရှမ်း ပြောင်းသီးနှံများ အများအပြားဝင်ရောက်လျက် ရှိပါသည်။ မန္တလေးတိုင်းဒေသကြီးအတွင်း စိုက်ပျိုးထွက်ရှိသည့် ဖူးစားပြောင်း (ထိုင်ဝမ်) မျိုးနှင့် ရှမ်းပြောင်းမျိုးတို့အပြင်   စစ်ကိုင်းတိုင်းဒေသကြီးနှင့် ရှမ်းပြည်နယ်တို့မှလည်း ဝင်ရောက်ကြောင်း သိရှိရပါသည်။ မန္တလေးတိုင်းဒေသကြီးအတွင်း ၂၀၂၄ - ၂၀၂၅ ခုနှစ်တွင် အစေ့ထုတ်ပြောင်း စိုက်ပျိုးမှု  ၃၆၆၂၂ ဧက၊ ရိတ်သိမ်းမှု ၁၃၃၃၁ ဧက၊ အထွက်နှုန်း ၄၉.၅၅ တင်း၊ အထွက်တင်းစုစုပေါင်း ၆၆၀၅၉၁ တင်းဖြစ်ကြောင်း သိရှိရပါသည်။  ၂၀၂၅ ခုနှစ် ဒီဇင်ဘာလနောက်ဆုံးပတ်အတွင်း မန္တလေးကုန်စိမ်းစျေးကွက်အတွင်း ဖူးစားပြောင်းစျေးကွက်တွင် ထိုင်ဝမ်မျိုးပြောင်း ၁၀ ဖူးလျှင် လက္ကားစျေး  ၅၀၀၀ ကျပ် နှင့် ၆၀၀၀ ကျပ်၊ ရှမ်းပြောင်း ၁၀ ဖူးလျင်  ၆၀၀၀ ကျပ်နှင့် ၇၀၀၀ ကျပ်၊ လက်လီစျေးမှာ ထိုင်ဝမ်ပြောင်း ၁၀ ဖူးလျှင် ၆၅၀၀ ကျပ်နှင့် ၇၀၀၀ ကျပ်၊ ရှမ်းပြောင်း ၁၀ ဖူး လျှင် ၇၅၀၀ ကျပ်နှင့် ၈၀၀၀ ကျပ်စျေးတို့ဖြင့် ရောင်းချလျက်ရှိပြီး၊ အရောင်းသွက်လျက်ရှိကြောင်း သိရှိရပါသည်။

DOCA(မန္တလေး)

                 ဧရာဝတီတိုင်းဒေသကြီးအတွင်းရှိ မြို့နယ်အသီးသီးတွင် မိုးမြေပဲစိုက်ဧက စုစုပေါင်း (၂၈၀,၀၀၀) ခန့် စိုက်ပျိုးထားရှိပြီး ယခုရာသီတွင် ရာသီဥတု ကောင်းမွန်မှုကြောင့် အထွက်နှုန်းများ သတ်မှတ်ပန်းတိုင်ထက် ကျော်လွန်နေကြောင်း သိရသည်။ မြေပဲစိုက်ဧကများပြားသည့် တိုင်းအတွင်းရှိ မြို့နယ်များတွင် ဗီယက်နမ်၊ ဆင်းပဒေသာ-၁၁ နှင့် ဆွန်တာနီ အပါအဝင် အထွက်နှုန်းကောင်းမျိုးများကို အဓိကစိုက်ပျိုးလျက်ရှိသည်။

          အထွက်နှုန်းအနေဖြင့် ပန်းတိုင်အထွက်နှုန်း တင်း (၇၀) သတ်မှတ်ထားသော်လည်း လက်တွေ့တွင် တင်း (၇၅) မှ တင်း (၇၈) အထိ ထွက်ရှိသည့်အပြင် စိုက်ပျိုးရေးနည်းပညာ ကောင်းမွန်သည့် ကျေးရွာများတွင် တင်းကိုးဆယ်ကျော်အထိ ထွက်ရှိကြောင်း စိုက်ပျိုးရေးဦးစီး ဌာနမှ တာဝန်ရှိသူများက ဆိုသည်။ ဈေးနှုန်းအနေဖြင့် အခွံအပါ တစ်ပိဿာလျှင် ကျပ် ၂,၈၀၀ မှ ၃,၀၀၀ အထိ ရရှိပြီး အခွံချွတ်ပြီး တစ်ပိဿာလျှင် ကျပ် ၆,၅၀၀ မှ ၆,၈၀၀ အထိ ရောင်းချနိုင်ကြောင်း သိရသည်။

          မြောင်းမြမြို့နယ်မှ တောင်သူတစ်ဦးက " ယခုနှစ် မိုးမြေပဲအထွက် ကောင်းတယ်။ ဒါပေမယ့် ဈေးနှုန်းကတော့ ပြီးခဲ့တဲ့နှစ်ကထက် နည်းနည်းလျော့နေတယ်။ ကုန်ကျစရိတ် ကတော့ မြင့်တက်နေတုန်းပဲ" ဟု ပြောကြားသည်။ ဧရာဝတီတိုင်းဒေသကြီးအတွင်းမှ ထွက်ရှိ သော မြေပဲများသည် ပြည်တွင်းဈေးကွက်သာမက နိုင်ငံတကာတွင်ပါ ဝယ်လိုအားကောင်းမွန်နေပြီး မြေပဲဆီချက်လုပ်ငန်းများ၊ မုန့်ပဲသွားရေစာလုပ်ငန်းများအတွက် အဓိက ကုန်ကြမ်းအဖြစ် အသုံးပြုလျက်ရှိသည်။ ယခုရာသီတွင် မြေပဲအထွက်နှုန်း မြင့်မားမှုကြောင့် ပြည်တွင်း မြေပဲဆီ ဈေးနှုန်းများ တည်ငြိမ်နိုင်မည်ဟု ကုန်သည်များက ခန့်မှန်းထားကြသည်။

(DOCA ဧရာဝတီ)