မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့နယ်မှ ဆောင်းရာသီ ကုလားပဲစိုက်တောင်သူများမှာ  ကုလားပဲသီးနှံကို နေရာအနှံ့ စိုက်ပျိုးကြကြောင်း သိရသည်။

      လက်ရှိအချိန်သည် ကုလားပဲသီးနှံ ပေါ်တော့မည့်အချိန်ဖြစ်၍ ဈေးကောင်း ရရှိဖို့ရန် မျှော်လင့်မိပါကြောင်း၊ ယခုနှစ် စိုက်ပျိုးထားသော တစ်ဧကကုန်ကျစရိတ်မှာ ကျပ်(၈-၉)သိန်း ခန့်ရှိကြောင်း၊ ယခင်နှစ်က ကုလားပဲအဖြူ(B2) တစ်တင်းလျှင် ကျပ်(၈၀၀၀၀)၊ ရိုးရိုးကုလားပဲ အဝါကို ကျပ်(၆၀၀၀၀) ဈေးနှုန်းဖြင့် အရောင်းအဝယ်ဖြစ်ခဲ့ပြီး တောင်သူများအတွက် ထိုက်သင့်တဲ့ အကျိုးအမြတ် ရရှိမှသာ အဆင်ပြေမည်ဖြစ်ကြောင်း၊ ကုလားပဲကို မိုးဦးသီးနှံအပြီး တန်ဆောင်မုန်း၊ နတ်တော်လတို့မှာ ဆောင်းသီးနှံအဖြစ် စိုက်ပျိုးပြီး ကုလားပဲခင်းများတွင်  သီးညှပ်အဖြစ် ဆီထွက် သီးနှံဖြစ်သော နေကြာကိုလည်း တောင်သူအများစုက စိုက်ပျိုးလေ့ ရှိကြသည်။ ကုလားပဲ စိုက်ပျိုး ခြင်းသည် တောင်သူများအတွက် ကုန်ကျစရိတ်သက်သာကြောင်း၊ သီးညှပ် သီးနှံဖြစ်သော နေကြာ များရရှိခြင်းတို့ကြောင့် ဆောင်းသီးနှံကုလားပဲကို နှစ်စဉ် စိုက်ပျိုးလေ့ရှိကြသည်။ တန်ဆောင်မုန်း၊ နတ်တော်လတို့တွင် စိုက်ပျိုးထားသောကုလားပဲများကို တပိုတွဲ၊ တပေါင်းလများတွင် ရိတ် သိမ်းကြရမည်ဖြစ်ပြီး ယခုနှစ် ကုလားပဲပေါ်တော့မည်အချိန်တွင် ကုလားပဲ စိုက်တောင်သူများမှ ဈေးကောင်းရရန်မျှော်လင့်မိပါကြောင်း ပေါက်မြို့နယ် ဆောင်းရာသီ ကုလားပဲ စိုက်တောင်သူ တစ်ဦး ထံမှ သိရသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေး၌ အခြေခံစားသောက်ကုန်များ ရောင်းချလျက်ရှိသော ကုန်ခြောက်ဆိုင်များတွင် နေ့စဉ်ခေါက်ဆွဲခြောက်ထုပ်များလည်း အရောင်းအဝယ်သွက်လျက်ရှိသည်။ ခေါက်ဆွဲကို ဂျုံသီးနှံ ကုန်ကြမ်းမှ ကုန်ချောအဖြစ် ထုတ်လုပ်ခြင်းဖြစ်၍ ပခုက္ကူမြို့ နယ်သည် သီးနှံမျိုးစုံ စိုက်ပျိုးကြသော်လည်း ဂျုံသီးနှံစိုက်ပျိုးခြင်းမရှိ၍ စိုက်ပျိုးမှုများ သော စစ်ကိုင်း တိုင်းဒေသကြီး၊ မုံရွာမြို့ ခေါက်ဆွဲ ခြောက်ထုတ်လုပ်သည့် စက်ရုံများမှ ပခုက္ကူ ဈေးကွက်သို့ ဝင်ရောက်ကြောင်း၊ စားသုံးသူများအတွက် ခန္ဓာကိုယ်အားဖြစ်စေပြီး ကျန်းမာရေးနှင့် ညီညွှတ်၍ ဈေးနှုန်း သင့်တင့် မျှတစွာဖြင့် အလွယ်တကူ ဝယ်ယူမှုရရှိခြင်းကြောင့် စားသုံးသူများ အနေဖြင့် ခေါက်ဆွဲသုပ်၊ ခေါက်ဆွဲကြော်၊ ခေါက်ဆွဲအရည်ပျော်ပြုလုပ်၍ မြန်မာ့ရိုးရာ အစားအစာ အဖြစ် ရှေးယခင် နှစ်များစွာကတည်းက စားသုံးမှု များကြောင်း သိရှိရသည်။

          ၂၀၂၆ခုနှစ်၊ ဇန်နဝါရီလ(ဒုတိယပတ်)တွင် ခေါက်ဆွဲခြောက်ထုပ်များ ဈေးငြိမ်၍ အရောင်း အဝယ်ဖြစ်နေကြောင်း၊ ခေါက်ဆွဲတွင် အဝါရောင်နှင့် အဖြူရောင်နှစ်မျိုးရှိကြောင်း၊ ရောင်းချရာတွင် ခေါက်ဆွဲသား အကောင်းနှင့် စက်ကျအကျိုးအကြေနှစ်မျိုး ခွဲခြားပြီးရောင်းချကြောင်း၊ “ရွှေဒင်္ဂါး “ အဝါရောင် ခေါက်ဆွဲခြောက် တစ်စီးလျှင် ကျပ်(၉၀၀)၊ (၂၅)ထုပ်ပါ တစ်ထုပ်လျှင် ကျပ် (၂၁၅၀၀)၊ ခေါက်ဆွဲကျိုး စက်ကျ တစ်ပိဿာလျှင် ကျပ်(၇၀၀၀)ဈေးဖြင့် အရောင်းအဝယ်ဖြစ်ကြောင်း၊ “စွမ်းထက်” ခေါက်ဆွဲခြောက် (၅၀)ကျပ်သား ပါ တစ်ထုပ်လျှင် ကျပ်(၄၅၀၀)၊ အထုတ်(၃၀)ပါ တစ်ဖာလျှင် ကျပ်(၁၃၅၀၀၀)၊ (၂၀)ကျပ်သားပါ တစ်ထုပ်လျှင် ကျပ်(၂၃၀၀)၊ (၅၀)စီးပါ တစ်ဖာလျှင် ကျပ်(၁၁၅၀၀၀)၊ (၂)စီးတွဲ တစ်ထုပ်လျှင် ကျပ်(၁၈၀၀)၊ (၅၀)စီးပါ တစ်ဖာလျှင် ကျပ်(၉၀၀၀၀)၊ “စွမ်းထက်”ခေါက်ဆွဲ စက်ကျအကျိုး တစ်ပိဿာလျှင် ကျပ်(၅၀၀၀)၊ “ရွှေနဒီ” ခေါက်ဆွဲထုပ်ကြီး တစ်ထုပ်လျှင် ကျပ်(၁၅၀၀)၊ အထုပ်သေး တစ်ထုပ်လျှင် ကျပ်(၅၀၀)နှုန်းဖြင့်  အရောင်းအဝယ် သွက်နေကြောင်း၊ ယခုအချိန် စာသင်ကျောင်းများ ဖွင့်လှစ်ချိန်ဖြစ်၍ ကျောင်းမုန့်ဈေးတန်းများတွင် ခေါက်ဆွဲသုပ်၊ ခေါက်ဆွဲကြော်များ ရောင်းချမှုများခြင်းကြောင့် အရောင်းအဝယ်သွက်နေပြီး မြိုင်၊ ရေစကြို၊ ယောနယ်ဒေသများမှလည်း ကုန်ကားများမှတဆင့် မှာယူပြီး ဝယ်ယူမှုများလျက်ရှိ ကြောင်း၊ တစ်ပတ်အတွင်း‌ ခေါက်ဆွဲခြောက်ပိဿာ (၃၅၀-၄၀၀)ခန့် ရောင်းချရကြောင်း ကုန် ခြောက်ဆိုင် ရောင်းချသူထံမှ သိရှိရပါသည်။

DOCA(မကွေး)

      ကျွန်းလှမြို့နယ်အတွင်းရှိဈေးများတွင်ဒေသထွက်ပေါ်ဦးပေါ်ဖျားခေါဆီ(ခေါ်)ကောက်ညှင်းပြားများကိုဆောင်ဝင်ခါနီစက်တင်ဘာ၊ အောက်တိုဘာလများတွင် တင်ရောင်းချလျက် ရှိကြောင်း နှင့် ယခုအချိန်တွင် ကောက်ညှင်းပြားသည်များ လှိုင်လှိုင်ပေါလာပြီး ဈေးအနည်းငယ်လျော့ကာ ကောက်ညှင်းပြား အခုရေတိုးလာကြောင်း သိရှိရပါသည်။

              ကောက်ညှင်းပြားကို ပြုလုပ်ဖို့ ကောက်ညှင်းဆန်ကို ကျောက်ခဲ၊ သလဲများအပါအောင် ရွေးချယ် သန့်စင်ပြီး ကောက်ညှင်းဆန်ကိုရေဆေးပြီး အချိန်အတန်ကြာအောင်ရေစိမ်ထားရပါသည်။ ရေစိမ်ရသော ကောက်ညှင်းဆန်များကို ပေါင်းအိုဖြင့်ပေါင်းပြီး ပေါက်ဆိန်၊ ပေါင်တူ၊ မောင်းတို့ဖြင့်ထည့်၍ ထုထောင်းပြီး အိစက်ညက်ညောသည့် အနေအထားရောက်မှ နှမ်းထောင်း/ဆီတို့ကိုသုံးပြီး ကောက်ညှင်းပြားများပြား၍ ငှက်ပျောဖက်/ပလပ်စတစ်အိတ်အကြည်ပေါ်တွင် အအေးခံပြီးလျှင် စားသုံးရသည့် ကောက်ညှင်းပြား များရရှိပါသည်။

           ဇန်နဝါရီလ ဒုတိယပတ်တွင် ခေါဆီ(ခေါ်)ကောက်ညှင်းပြားဈေးနှုန်းများမှာ ခေါဆီ(ခေါ်) ကောက်ညှင်းပြားအကြီး (၇)ခုလျှင် (၂၀၀၀)ကျပ်၊ အသေး (၁၇)ပြားလျှင် (၁၀၀၀) ကျပ် ၊ တို့ဖြင့် အရောင်းအဝယ်ဖြစ်လျက်ရှိပြီး ကောက်ညှင်းဆန် အသစ်များပေါ်လာသည့်အတွက် ဈေးနှုန်းကျဆင်း ရခြင်းဖြစ်ကြောင်း၊ ရာသီစာဖြစ်သည့်အတွက် ရောင်းအားကောင်းလျက်ရှိကြောင်း သိရသည်။

DOCA(စစ်ကိုင်း)  

                       ကျွန်းလှမြို့နယ်အတွင်းရှိ ကျေးရွာများတွင် စိုက်ပျိုးရေးကို အဓိကထားလုပ်ကိုင်ကြရာမှ စားဖို ဆောင်သီးနှံဖြစ်သည့် ကန်ဇွန်းရွက်၊ ချဉ်ပေါင်ရွက်၊ ရုံးပတီသီး၊ ငရုပ်သီးစိမ်း၊ ခဝဲသီး၊ ဗုံလုံသီး သင်္ဘောသီး ကင်မုံသီး၊ ကြက်ဟင်းခါးသီး၊ ခရမ်းသီး၊ ခရမ်းကြွပ်သီး နှင့်  ခါကြက်ဥ(ဗမာ)မျိုးကို တစ်ပိုင်တစ်နိုင် စိုက်ပျိုးကြပြီး သစ်ရာမြိုင် ဈေးကွက် အတွင်းသို့ လာရောက် ပို့ဆောင်ရောင်းချကြပါသည်။

               ၂၀၂၆ ခုနှစ်၊ ဇန်နဝါရီလ ဒုတိယအပတ် ကျွန်းလှမြို့၊ သစ်ရာမြိုင်ဈေးအတွင်း ရောင်းချနေသော  ခါကြက်ဥ နှင့် မုံညှင်းထုပ် ဈေးနှုန်းအနေဖြင့်  ခါကြက်ဥ(ဗမာ)ဥ တစ်ပိဿာလျှင်(၁၂၀၀၀)ကျပ်၊ (၅၀)ကျပ်သား လျှင်(၆၀၀၀)ကျပ်၊ (၂၅)ကျပ်သားလျှင်(၃၀၀၀)ကျပ်၊ ခါကြက်ဥ(တရုတ်ဥ) တစ်ပိဿာ လျှင် (၁၆၀၀၀)ကျပ်၊ (၅၀)ကျပ်သားလျှင်(၈၀၀၀)ကျပ် နှင့် (၂၅)ကျပ်သားလျှင်(၄၀၀၀)ကျပ် ဈေးနှုန်းဖြင့် လည်းကောင်း၊  မုံညှင်းထုတ် ဈေးနှုန်းများမှာ  မုံညှင်းထုတ် တစ်ပိဿာလျှင်(၈၀၀၀)ကျပ်၊ ၅၀ကျပ် သားလျှင်(၄၀၀၀)ကျပ် နှင့် (၂၅)ကျပ်သားလျှင်(၂၀၀၀)ကျပ် ဈေးနှုန်းများဖြင့် ရောင်းချသောကြောင့် ယခင်အပတ်ထက် ခါကြက်ဥ(ဗမာ) (၁)ပိဿာလျှင်(၂၀၀၀)ကျပ် ဈေးနှုန်ူး မြင့်တက်ပြီး အရောင်းအဝယ် ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)  

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်ပတ်ဝန်းကျင်ရှိ ညောင်ပင်သာ၊ ပန်းတော်ပြင်၊ ဥယျာဉ်၊ မယ်ဇလီတော၊ ကုန်းကြီး၊ ထန်းကိုင်း၊ ရွာသစ်၊ ဂျင်ရဲမြောင်၊ ရွာတော် စသည့်ကျေးရွာများသည် စိုက်ပျိုးရေးကိုအဓိကထားလုပ်ကိုင်ပြီး ကြက်သွန်နီ၊ နှမ်း၊ မြေပဲ၊ ကုလား ပဲ၊ စားတော်ပဲ၊ ပဲကြီး၊ နေကြာ၊ ပဲစဉ်းငုံ၊ ပြောင်း၊ စပါး၊ ခရမ်းချဉ်သီးနှင့် အခြားစားဖိုဆောင်သုံး သီးနှံများကို ရာသီအလိုက်စိုက်ပျိုးကြကြောင်း၊ ဥယျာဉ်ကျေးရွာ၌ ၂၀၂၅ခုနှစ်၊ နိုဝင်ဘာလတွင် တောင်သူ(၆၀)ဦးမှ ဆောင်းသီးနှံကုလားပဲစိုက်ဧက(၁၆၀)ခန့်အား စိုက်ပျိုးခဲ့ကြောင်း သိရသည်။

           ဥယျာဉ်ကျေးရွာနေ တောင်သူတစ်ဦးက ၎င်းအနေဖြင့် ဆောင်းသီနှံကုလားပဲ(မြကျေးမျိုး) (၉)ဧကခန့်အား ထွန်ကြောင်းဆွဲအစေ့ချစနစ်ဖြင့်စိုက်ပျိုးပြီး မျိုးကိုယခင်နှစ်က ကုလားပဲစိုက်ခင်း များမှ စိုက်ပျိုးထွက်ရှိသည့်ကုလားပဲစေ့များကို မျိုးအဖြစ်ဖယ်ချန်၍ စိုက်ပျိုးခြင်းဖြစ်ကြောင်း၊ မျိုး သုံးစွဲမှုအနေဖြင့် စိုက်ပျိုးမြေအနေအထားပေါ်မူတည်ပြီး (၂)တင်းခွဲမှ (၃)တင်းခန့်အထိကုန်ကျ ကြောင်း၊ စိုက်ပျိုးပြီး(၃)လခန့်အကြာတွင် ရိတ်သိမ်းရကြောင်း၊ ကုန်ကျစရိတ်အနေဖြင့် မြေပြု ပြင်ခ၊ လုပ်အားခနှင့် အခြားသွင်းအားစုစရိတ်အပါအဝင် (၁)ဧကလျှင် ကျပ်(၇၀၀၀၀၀) သိန်းခန့် ကုန်ကျကြောင်း သိရသည်။

     ယခင်နှစ်က ကုလားပဲသီးနှံ(၁)ဧကစိုက်ပျိုးရာတွင် စိုက်ပျိုးစရိတ်နှင့်ရိတ်သိမ်းခအပါအဝင် ကျပ်(၈၅၀၀၀၀)ခန့် ကုန်ကျပြီး အထွက်နှုန်းအနေဖြင့် ကုလားပဲစိုက်ပျိုးချိန်တွင် မိုးများပြီးစိုက်ခင်း များအတွင်း ရေဝပ်မှုများ၍ အပင်အသေအပျောက်များသည့်အတွက် (၁)ဧကလျှင် (၁၅)တင်းမှ (၁၈)တင်းထိသာထွက်ရှိခဲ့ကြောင်း၊ ဈေးနှုန်းအနေဖြင့် (၁)တင်းလျှင် ကျပ်(၈၀၀၀၀)ခန့်ရရှိခဲ့ပြီး အကျိုးအမြတ်အနေဖြင့် ကျပ်(၃၅၀၀၀၀ - ၅၉၀၀၀၀)ခန့်သာရရှိခဲ့ကြောင်း၊ ဈေးကွက်အနေဖြင့် မင်းလှမြို့ပေါ်ရှိပွဲရုံများသို့ ရောင်းချခဲ့ကြောင်း သိရသည်။ ယခုနှစ်တွင်မှု ဥယျာဉ်ကျေးရွာ၌ ဆောင်း သီးနှံကုလားပဲစိုက်ခင်းများသည် ရာသီဥတုသမမျှတပြီး အပင်များအောင်မြင်ဖြစ်ထွန်းလျက်ရှိ သည့်အပြင် အဖူးအပွင့်များလည်း စတင်ဖူးပွင့်လျက်ရှိသည့်အတွက် ယခင်နှစ်ကထက် အထွက်နှုန်း များပိုမိုထွက်ရှိနိုင်ကြောင်း၊ ၂၀၂၆ခုနှစ်၊ ဇန်နဝါရီလ(ဒုတိယပတ်)တွင် အထက်မင်းလှမြို့၊ သီးနှံပွဲရုံ များ၌ ကုလားပဲ(မြကြေး)အဟောင်း(၁)တင်းလျှင် ကျပ်(၇၈၀၀၀)ခန့်ဖြင့် အရောင်းအဝယ်ဖြစ် လျက်ရှိကြောင်း သိရှိရသည်။

DOCA(မကွေး)