ပြည်တွင်းကုန်သွယ်မှုသတင်း

                    နွားထိုးကြီးမြို့နယ်သည် ဆည်ရေသောက်အသင့်အတင့်ရှိပြီး သီးနှံမျိုးစုံစိုက်ပျိုးဖြစ်ထွန်း၍ ဆီထွက်သီးနှံများဖြစ်သော နှမ်း၊ နေကြာ၊ မြေပဲများအပြင် စျေးကွက်ဝယ်လိုအားရှိသော တိရစ္ဆာန် အစာဖြစ်သော ကျွဲ၊ နွားစာများဖူလုံစေရန် နှံစားပြောင်းသီးနှံကိုလည်း စိုက်ပျိုးထား ကြောင်း၊ ၂၀၂၆ -၂၀၂၇ ဘဏ္ဍာနှစ်တွင် နွားထိုးကြီးမြို့နယ်၌ နှံစားပြောင်း သီးနှံကို (၂၅၄၅၉) ဧကခန့် စိုက်ပျိုး ထားကြောင်း မြို့နယ်ကြေးတိုင်နှင့် မြေစာရင်း ဦးစီးဌာန၏ စာရင်းများအရ သိရှိရပါသည်။ နှံစားပြောင်းသီးနှံကို နနွင်းတော်ဘိုးရွာ၊ ကံရွာ၊ ပဲကြီးခင်းရွာ၊ ထန်းတောမရွာ၊ ကျောက်တန်းရွာ၊ ညောင်ပင်ရွာနှင့် မျက်ရှု‌ကျေးရွာတို့တွင် အများဆုံးစိုက်ပျိုးထားကြောင်း၊ ရာနှုန်းပြည့်ရိတ်သိမ်း ပြီးစီးပြီးဖြစ် ကြောင်း၊ စိုက်ပျိုး ရာတွင် မျိုးအနေဖြင့် အထွက်တိုးနီမျိုး များကို သာအများဆုံး စိုက်ပျိုးကြကြောင်း၊ စိုက်ပျိုးမှုအနေဖြင့် မျိုး(၄-၅)ပြည်ခန့် စိုက်ပျိုးရကြောင်း (၁)ပြည်လျှင်(၂၅၀၀) ကျပ်ဖြင့် ဝယ်ယူရကြောင်း၊ စိုက်ပျိုးမှုအနေဖြင့် ထယ်စနစ်ဖြင့် စိုက်ကြောင်း ဆွဲအစေ့ချ၊ အတန်းလိုက် စိုက်ပျိုးရကြောင်း၊ ဆည်ရေမရရှိသော ယာမြေများတွင် အများဆုံး စိုက်ပျိုးကြကြောင်း၊ စိုက်ပျိုးမှု (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း(၂၈၅၀၀၀)ကျပ်ခန့် ကုန်ကျကြောင်း၊ ‌ဇွန်လနှင့် ဇူလိုင်လတို့တွင် စတင်စိုက်ပျိုးပြီး ယခုအချိန်တွင် အားလုံး ရိတ်သိမ်းပြီးစီးပြီဖြစ် ကြောင်း၊  အထွက်နှုန်း အနေဖြင့် (၂၅) တင်းခန့် ထွက်ရှိပြီး စျေးနှုန်းအနေဖြင့် ယခုလက်ရှိ ပေါက်ဈေး အနေဖြင့် နှံစားပြောင်း တစ်တင်းလျှင် (၂၅၀၀၀)ကျပ် စျေးနှုန်းများဖြင့် ရောင်းဝယ်လျက်ရှိပြီး၊ တောင်သူများမှ ပွဲရုံများသို့ တိုက်ရိုက်တင်ပို့‌ ရောင်း ချကြကြောင်း၊ထိုပွဲရုံများမှတဆင့် မန္တလေး၊ ရန်ကုန်မြို့များသို့ တင်ပို့ရောင်း ချလျက်ရှိကြောင်း၊  တစ်ဧကစိုက်ပျိုးမှု အကျိုးအမြတ်အနေဖြင့် စိုက်ပျိုး စရိတ် နှုတ်ပြီး (၃၄၀၀၀၀)ကျပ် ခန့်ရရှိကြောင်း၊ နှံစားပြောင်းသီးနှံ စိုက်ပျိုးခြင်းဖြင့်  ထုတ်လုပ်မှု ကုန်ကျ စရိတ်သက်သာပြီး အကျိုး အမြတ်ရရှိ၍ ကျွဲ၊ နွားစာပါ ဖူလုံသောကြောင့် တောင်သူများအနေဖြင့် စီးပွားဖြစ် ဝင်ငွေတိုးကြောင်း နနွင်းတော်ဘိုးရွာမှ နှံစားပြောင်း စိုက်တောင်သူ၏ ပြောပြချက် အရသိရှိရသည်။

Doca(မန္တလေး)

                           မန္တလေးတိုင်းဒေသကြီး မြစ်သားမြို့နယ်တွင် ပဲမျိုးစုံသီးနှံဖြစ်သည့် တိုင်ထောင်ပဲ ၊ မတ်ပဲ ၊ ပဲယဉ်း၊ ကုလားပဲ၊ ပဲစဉ်းငုံသီးနှံများအပြင် ဝယ်လိုအားရှိသော ပဲကြီးသီးနှံကိုလည်း စိုက်ပျိုးလာကြ ပါသည်။ မြို့နယ်အတွင်း ပဲကြီးစိုက်ဧက (၂၄၀)ဧက စိုက်ပျိုးခဲ့ပြီး စိုက်ဧကအားလုံး ရိတ်သိမ်းပြီးစီးပြီ ဖြစ်ကြောင်း သက်ဆိုင်ရာဌာန၏ စာရင်းများအရ သိရှိရပါသည်။ စက်တင်ဘာ လဆန်းမှစတင်၍ ပဲကြီးသီးနှံများ စတင်စိုက်ပျိုးခဲ့ပြီး အများဆုံးစိုက်ပျိုးသောရွာများမှာ ကျီတိုင်၊ နွားကူးလေး၊ ပခမ်း နှင့် ခင်လည် ကျေးရွာများတွင် အများဆုံးစိုက်ပျိုးကြပါသည်။ ပဲကြီးစိုက်ပျိုးရာတွင် မျိုးအနေဖြင့် (၅)ပြီခန့် ကုန်ကျကြောင်း၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၃၀၀၀၀၀)ကျပ်ခန့် ကုန်ကျကြောင်း၊ ပဲကြီးသီးနှံကို ထယ်ထိုးပြီး မျိုးစေ့ပတ်၊ ထယ်ဖုံး စနစ်ဖြင့် စိုက်ပျိုးကြပါသည်။ စိုက်ပျိုးသောမျိုးမှာ ပဲကြီး မျိုးသန့်ကိုသာ စိုက်ပျိုးကြကြောင်း၊  ယခုနှစ် ပဲကြီးအထွက်နှုန်းအနေဖြင့် (၁၀-၁၂) တင်း ထွက်ရှိခဲ့ကြောင်း ၊ ယခင်နှစ် ပဲကြီးဈေးနှုန်း အနေဖြင့် တစ်တင်းလျင် (၈၀၀၀၀/-)ကျပ်ဖြင့် ရောင်းဝယ်ခဲ့ကြောင်း၊ ယခုလက်ရှိ ပဲကြီးပေါက်ဈေး တစ်တင်းလျင် (၁၅၀၀၀၀/-)ကျပ်ခန့်ဖြင့် ရောင်းဝယ်လျက်ရှိကြောင်း ၊ ကုန်ကျစရိတ်နုတ်ပြီးပါက (၁၂၀၀၀၀၀/-)ကျပ် မြတ်ခဲ့ကြောင်း ၊ ပဲကြီးသီးနှံပေါ်ချိန်တွင် တောင်သူများမှ မြို့ပေါ်ပွဲရုံများသို့ တိုက်ရိုက်တင်ပို့ရောင်းချကြကြောင်း၊ ပွဲရုံများမှတစ်ဆင့် မန္တလေး၊ရန်ကုန် မြို့များသို့ တင်ပို့ရောင်းချ လျက်ရှိကြောင်း၊ ပဲစားသုံးခြင်းဖြင့် ပရိုတင်းဓာတ်ပြည့်ဝစွာရရှိခြင်း၊ နှလုံးကျန်းမာရေးကို ပိုမိုကောင်းမွန်စေခြင်း၊ အဟာရဓာတ် ပေါများစွာပါဝင်ကြောင်း လေ့လာသိရှိရပါသည်။ စိုက်ပျိုး စရိတ်သက်သာပြီး စီးပွားဖြစ်ဝင်ငွေတိုးသော ပဲကြီးသီးနှံကို တောင်သူများ တိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

                  မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက် ဒေသတစ်ခုဖြစ်သော ကြောင့် သီးနှံမျိုးစုံ စိုက်ပျိုးဖြစ်ထွန်းလျက်ရှိရာ ၄င်းသီးနှံများအနက် ကုန်စိမ်းသီးနှံတစ်မျိုးဖြစ်သော ခရမ်းသီးနှံကိုလည်း စီးပွားဖြစ်တိုးချဲ့ စိုက်ပျိုးလာကြပါသည် ။ ခရမ်းသီးနှံကို ကျောက်ဆည်မြို့နယ် ရန်ပုံနှစ်ကျေးရွာနှင့်ကြက်ဆင်ကျေးရွာများတွင် အများဆုံး စိုက်ပျိုးလျှက်ရှိပြီး မျိုးအနေဖြင့် ခရမ်းသီး အလုံးသေးမျိုးနှင့်(၅၅၅)မျိုးများကို စိုက်ပျိုးကြကြောင်းသိရှိရပါသည်။ ခရမ်းပင် စိုက်ပျိုးမည်ဆိုပါက ပထမဦးဆုံး ပျိုးအရင်ထောင်ရကြောင်း၊ ပျိုးပင်သက် (၁)လခွဲသားအရွယ်တွင် ပြောင်းရွေ့စိုက်ပျိုးရ ကြောင်း၊ ပြောင်းရွေ့စိုက်ပျိုးပြီး (၂)လ၊ (၃)လအကြာတွင် ခရမ်းသီးများ စတင်ခူးဆွတ်နိုင်ပြီး(၄)ရက် ခြားတစ်ကြိမ်ခူးဆွတ်ရကြောင်း ၊ စတင်ခူးဆွတ်သည်မှ တစ်ပတ်နှင့်တစ်ပတ် အထွက်နှုန်းပိုလာ ကြောင်း ၊ (၁)ဧက အထွက်နှုန်းအနေဖြင့် တစ်ပတ်လျှင် ပိဿာ (၂၅၀-၃၀၀)အထိ ထွက်ရှိကြောင်း၊ သက်တမ်းအနေဖြင့် (၄-၅)လခန့်အထိ ခူးဆွတ်နိုင်ကြောင်း ၊ တစ်ဧက ကုန်ကျစရိတ် အနေဖြင့် (၁၀၀၀၀၀၀/-)ကျပ် ခန့်ရှိပြီး စတင်ခူးဆွတ်ချိန်မှ ဖျက်သိမ်းချိန်အထိ ခရမ်းသီးထွက်ရှိမှု စုစုပေါင်း (၂၀၀၀-၂၅၀၀)ပိဿာ ထွက်ရှိကြောင်း သိရှိရပါသည် ။ ခရမ်းသီး တစ်ပိဿာလျှင် ဖောက်သည်ဈေး အနေဖြင့် (၈၀၀/-)ကျပ် ၊ လက်လီ‌ တစ်ပိဿာလျှင် (၁၅၀၀/-)ကျပ်ဖြင့် အရောင်းအဝယ်ဖြစ်နေ ကြောင်း ၊ ကုန်စိမ်းသီးနှံဖြစ်သည့်အတွက် တစ်ပတ်နှင့်တစ်ပတ်စျေးနှုန်းမတူညီကြောင်း ၊ တစ်ဧက အကျိုးအမြတ်အနေဖြင့် (၆၀၀၀၀၀/-)ကျပ် ခန့်မြတ်ကြောင်း ၊ ကုန်စိမ်းပွဲစားများမှ စိုက်ခင်းထဲအထိ လာရောက်ဝယ်ယူကြကြောင်း ၊ ပွဲစားများမှတဆင့် ကျောက်ဆည်၊စဉ့်ကိုင်၊မန္တလေးနှင့်ရန်ကုန်မြို့ များသို့တင်ပို့ရောင်းချကြကြောင်း ခရမ်းသီးစိုက်ပျိုးသော တောင်သူတစ်ဦး၏ပြောကြားချက်အရသိရှိပါသည်။  

DOCA(မန္တလေး)

                 တောင်ငူမြို့နယ်တွင် ထန်းပင်ထန်းတောများ ပေါများစွာရှိရာ မိရိုးဖလာထန်းလျက် လုပ်ငန်းကိုလည်း တစ်နိုင်တစ်ပိုင် လုပ်ကိုင်ကြသူတွေ ရှိပါသည်။ တောင်ငူမြို့နယ် ဆင်ဆိပ်ကျေးရွာ အုပ်စု၊ ပက်တန်းကျေးရွာရှိ တစ်နိုင်တစ်ပိုင် ထန်းလျက်လုပ်ငန်းဖြင့် မိသားစုအပိုဝင်ငွေ ရရှိပါသည်။ ထန်းလျက်ကို ထန်းရည်အချိုဖြင့် ချက်ရကြောင်း သိရပါသည်။

                ထန်းပင်ပေါ်မှ ချချချင်း ထန်းရည်အိုး (၇)အိုးမှ(၈)အိုးခန့် ထန်းရည်အချိုများကို သန့်စင်၍ မိုးပြဲဒယ် တစ်လုံးတွင်ထည့်ပြီး မီးပြင်းပြင်းနှင့် ပွက်လာသည်အထိ ကျိုပေးပြီး သာမအောင် မွှေပေး ရပါသည်။ တစ်ပြိုင်တည်းတွင် မိုးပြဲဒယ် သုံး၊ လေးလုံးခန့် ကျိုချက်ပါသည်။ အရည်ပျစ်လာ၍ ထန်းလျက်သားကျသည့်အခါ မီးဖိုပေါ်မှချပြီး ယောင်းမကြီးနှင့်ကော်၍ ဝါးဖြင့် သုံးမြှောင့်ပုံ အတုံး ချွန်ချွန်ပုံစံ ခုတ်ပေးရပါသည်။

               တောင်ငူထန်းလျက်၏ ထူးခြားချက်မှာ အခြားဒေသ ထန်းလျက်များကဲ့သို့ အလုံးမဟုတ်ဘဲ သုံးမြှောင့်ပုံ အတုံးချွန်ချွန်လေးများ ဖြစ်ပါသည်။ တစ်ဒယ်လျှင် ထန်းလျက် ၁ပိဿာခွဲခန့်ရကြောင်း သိရပါသည်။ ယခုအခါတွင် ထန်းလျက် ၁ပိဿာ ကို ၁၄၀၀၀ ကျပ် ရောင်းချရပါသည်။ ထန်းရည် ကျိုစဉ်တွင် အုန်းသီးရောကျို၍ အုန်းထန်းလျက်အဖြစ်လည်းကောင်း၊ ဇီးသီးမှုန့်ရောကျို၍ ဇီးထန်းလျက် အဖြစ်လည်းကောင်း၊ နှမ်းများရောကျို၍ နှမ်းထန်းလျက်အဖြစ်လည်းကောင်း ထုတ်လုပ်ရောင်းချ ကြပါသည်။ အုန်းထန်းလျက်၊ ဇီးထန်းလျက်နှင့်နှမ်းထန်းလျက်များကို ၁ပိဿာလျှင် ၂၀၀၀၀ ကျပ်ဖြင့် ရောင်းချကြောင်း ပက်တန်းကျေးရွာမှ ထန်းလျက်ပြုလုပ်ရောင်းချသူ တစ်ဦး၏ ပြောကြားချက်အရ သိရပါသည်။

DOCA(ပဲခူး)

              သင်္ကြန်ပွဲတော်သည် မြန်မာ့ရိုးရာပွဲတော်များတွင် နှစ်ဦးတွင်အစောဆုံးကျင်းပသည့် ပွဲတော် ဖြစ်သည့်အပြင် ရေပတ်၍ကစားကြသောပွဲဖြစ်၍ ထူးခြားလှသောပွဲတော်ဖြစ်ပါသည်။ သင်္ကြန် ဆိုသည်မှာ ကူးပြောင်းခြင်းဟုအဓိပ္ပါယ်ရပြီး နှစ်ဟောင်းမှနှစ်သစ်သို့ ကူးပြောင်းသော အဓိပ္ပါယ်ဖြစ်ပါသည်။ အတာသည်လည်း ကူးပြောင်းခြင်းဟုအဓိပ္ပါယ်ရပြီး နှစ်ဟောင်းမှနှစ်သစ်သို့ ကူးပြောင်းသောအဓိပ္ပါယ်ဖြစ်ပြီး သင်္ကြန်ကိုအတာသင်္ကြန်ဟုလည်း ခေါ်ဆိုကြပါသည်။ အိမ်တိုင်းတွင်သင်္ကြန်မကျမီ သင်္ကြန်ကိုကြိုဆိုသောအားဖြင့် အတာအိုးများဖြင့်ကြိုဆိုလေ့ရှိပြီး အတာအိုးတွင်နေ့သင့်နံသင့်ပန်းများ ထည့်၍ကြိုဆို ကြပါသည်။ နှစ်ဟောင်းမှအညစ်အကြေးများအား သင်္ကြန်ရေဖြင့်ဆေးကြောပစ်ပြီး နှစ်သစ်အစဖြစ်သော နှစ်ဆန်းတစ်ရက်နေ့တွင် အန္တရာယ်ကင်းပရိတ်ရွတ်ခြင်း၊ သက်ကြီးရွယ်အိုများအားပြုစုကန်တော့ခြင်း၊ ငါးလွှတ်ပွဲ၊ နွားလွှတ်ပွဲများကျင်းပခြင်းစသည့် ကောင်းမှုကုသိုလ်များပြုလုပ်ကြပါသည်။

          တောင်ငူမြို့နယ်တွင် အတာအိုးနှင့်အခြားသောက်ရေအိုးများ ရောင်းချလျှက်ရှိရာ ယခင်လက အတာအိုး(အကြီး)တစ်အိုးလျှင် (၁၅၀၀)ကျပ်၊ အတာအိုး(အသေး)တစ်အိုးလျှင် (၁၂၀၀)ကျပ်၊ စဉ့်အိုး ကြီး တစ်အိုးလျှင် (၁၀၀၀၀)ကျပ်၊ စဉ်အိုးသေးတစ်အိုးလျှင် (၈၀၀၀)ကျပ်၊ သောက်ရေအိုး အလှတစ်အိုးလျှင် (၄၅၀၀)ကျပ်၊ သောက်ရေအိုးအကြမ်းတစ်အိုးလျှင် (၄၀၀၀)ကျပ်ဖြင့် ရောင်းချလျှက်ရှိရာမှ ယခုလ တွင် အခြားသောက်ရေအိုးများမှာ ဈေးနှုန်းတည်ငြိမ်လျှက်ရှိပြီး အတာအိုးအကြီးတစ်အိုးလျှင် (၁၇၀၀) ကျပ်၊ အတာအိုးအသေးတစ်အိုးလျှင် (၁၅၀၀)ကျပ်အထိမြင့် တက်လာသဖြင့် အတာအိုးအကြီး တစ်အိုး လျှင် (၂၀၀)ကျပ်၊ အတာအိုးအသေးတစ်အိုးလျှင် (၂၀၀)ကျပ်မြင့်တက်သွားကြောင်း အတာအိုးနှင့် သောက်ရေအိုး ရောင်းချသူဒေါ်အေးမူ၏ ပြောကြားချက်အရသိရှိရပါသည်။

DOCA(ပဲခူး)