ပြည်တွင်းကုန်သွယ်မှုသတင်း

           ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့နယ်အနေဖြင့် မြို့နယ်များအပါအဝင် ၁၅တန်နှင့်အထက် ဆန်စက်အလုံးရေ (၄၈)လုံး ရှိပြီး စပါးကြိတ်ခွဲထွက်ရှိမှုမှ ဆန်များကို ရန်ကုန်တိုင်းဒေသကြီးသို့ အဓိကထား၍ စီးထွက်လျက်ရှိပြီး  ရန်ကုန်မှတဆင့် အခြားဒေသများသို့ နေ့စဉ် ပုံမှန် (စီးထွက်) လျက်ရှိကြောင်း သိရသည်။

          ဆန်များကို ရန်ကုန် သီလဝါ ဆိပ်ကမ်း၊ သံလျင်မြို့၊ ဆူးလေဆိပ်ကမ်း၊ ရွှေပြည်သာမြို့၊ ကျိုက်ဝိုင်းဈေး မရမ်းကုန်းမြို့၊ ကားကြီးဝန်း ဘုရင့်နောင်မြို့၊ ဇုန်-၃ လှိုင်သာယာမြို့ တို့သို့ လည်းကောင်း ဆန်ကွဲများကို စက်မှုဇုန်လုပ်ငန်းများသို့လည်းကောင်း နေ့စဉ်တင်ပို့လျက်ရှိကြောင်း သိရှိရပါသည်။

           ညောင်တုန်းမြို့နယ် ၂၀၂၆ ခုနှစ် ဇန်နဝါရီ လ ၁လအတွင်း ဆန်တင်ပို့မှုအနေဖြင့်  ၂၁၀၉၈ အိတ်၊ တန်အားဖြင့် ၁၀၅၅ တန်နှင့် ပြည်ပသို့ ဆန်တင်ပို့မှုအနေဖြင့် ဆန် ၁၁၀၅၂၇အိတ်၊  ဆန်ကွဲအနေဖြင့် ၈၂၀၆ အိတ်၊ တန်အားဖြင့် ၄၁၀ တန်၊ ပြည်ပတင်ပို့မှုအနေဖြင့် ၁၅၄၁၅၁အိတ် တင်ပို့နိုင်ခဲ့ကြောင်း သိရသည်။ ညောင်တုန်းမြို့နယ်မှ ဆန်/ဆန်ကွဲ  စီးထွက်မှု စုစုပေါင်း ဆန် ၃၆၂၈၅၄ အိတ်နှင့် ဆန်ကွဲ ၁၆၂၃၅၇ အိတ် တင်ပို့ခဲ့ပြီး ကားအစီးရေ ၅၆၆စီး၊ သင်္ဘော ၂စီးဖြင့် ဆန် ၁၂၀၀၀အိတ် စီးထွက်ခဲ့ကြောင်း ဆန်စက်နှင့် သိုလှောင်ရုံများမှ နေ့စဉ်စီးထွက် ကုန်ရပြေစာဖြင့် ထွက်ရှိမှု စာရင်းများအရ သိရှိရပါသည်။

DOCA(ဧရာဝတီ)

   ငါးသလောက်ငါးသည် မြန်မာနိုင်ငံတွင်လူကြိုက်များသော ငါးအမျိုးအစားများ၌ ပါဝင်၍ အရသာမှာလွန်စွာ‌ကောင်းလို့ "ငါးမှာငါးသလောက်" လို့ပါ ဆိုရိုးစကားထဲဝင်ထားသောငါးဖြစ် ကြောင်း၊၂၀၂၆ခုနှစ်၊ ဖေဖော်ဝါရီလတွင် မြင်းခြံမြို့၊ အေးမြသီတာဈေး၌ ရောင်းချနေသော မြစ်ငါးသလောက်ငါး အကြီးတစ်ပိဿာလျှင်(၄၀၀၀၀)ကျပ်၊ အလတ်တစ်ပိဿာလျှင် (၃၅၀၀၀) ကျပ်၊ ပင်လယ်ငါးသလောက်တစ်ပိဿာလျှင် (၂၅၀၀၀-၃၀၀၀၀) ကျပ်ခန့်ပေါက်ဈေးများဖြင့် ရောင်းချလျက်ရှိကြောင်း၊ ဖိုးတုတ်ဖြူကျေးရွာ၊ လေးအိမ်တန်းကျေးရွာနှင့် အနိမ့်ကျေးရွာများသည် ဧရာဝတီမြစ်ရိုး တစ်လျှောက်တွင်တည်ရှိ၍ ငါးဖမ်းလုပ်ငန်းဖြင့် အသက်မွေးဝမ်းကျောင်း ပြုကြကြောင်း၊ မြစ်အတွင်းမှ ဖမ်းယူရရှိသောငါးများကို မြင်းခြံမြို့အတွင်းရှိ ငါးဒိုင်များသို့ ရောင်းချကြကြောင်း၊ ပင်လယ်ငါးသလောက်များကို ရန်ကုန်မြို့ရှိ ကြည့်မြင်တိုင် ငါးဈေးကွက်မှ တင်သွင်း၍ ဒေသတွင်းဖြန့်ဖြူရောင်းချကြောင်း ငါးအရောင်းဒိုင်များမှ သိရှိရသည်။

 DOCA(မန္တလေး)

                 စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စားဖိုဆောင်သီးနှံများကို ရာသီချိန်အလိုက် စိုက်ပျိုးလျက်ရှိရာ ကိုက်လန်၊ ဆလပ်ရွက်နှင့် မုန့်ညှင်းရွက်တို့ကို မြို့ပေါ်ရပ်ကွက် များတွင်သာမက ကန့်ဘလူမြို့နယ်အတွင်းရှိ ကျေးရွာများတွင်လည်း မိမိတို့နေအိမ်ခြံဝင်းများ၊ ယာကွက်များတွင် တစ်နိုင်တစ်ပိုင်စိုက်ပျိုးပြီး ကန့်ဘလူမြို့ပေါ်သို့ လာရောက်ရောင်းချကြောင်း သိရှိရသည်။

           ထိုသို့စိုက်ပျိုးရာတွင်မျိုး၊ သွင်းအားစု၊ လုပ်သားခအပါအဝင် ကုန်ကျစရိတ်အနည်းငယ်ရှိကြောင်း၊ မိသားစုလုပ်ငန်းဖြစ်သည့်အတွက် ထိုက်သင့်သည့်အကျိုးအမြတ် ရရှိကြောင်း၊ ၂၀၂၆ ခုနှစ်၊ ဖေဖေါ်ဝါရီလ ဒုတိယပတ်အတွင်း ဆလပ်ရွက်(၁)ပင်လျှင်(၅၀၀)ကျပ်၊ မုန့်ညှင်းရွက်(၁)စည်း လျှင်(၃၀၀)ကျပ်၊ မုန့်ညှင်းချဉ်(၁)ပန်းကန်လျှင်(၃၀၀)ကျပ်၊ (၂)ပန်းကန်လျှင် (၅၀၀)ကျပ်ဖြင့် လည်းကောင်း၊ ကိုက်လန်လက်လီ(၁)စည်းလျှင်(၄၀၀)ကျပ်၊ လက္ကား(၃)စည်းလျှင်(၁၀၀၀)ကျပ်တို့ ဖြင့်ရောင်းချရသည့်အတွက် ဝင်ငွေရရှိကာ မိသားစုအဆင်ပြေလျက်ရှိကြောင်း သိရသည်။

DOCA(စစ်ကိုင်း)

    မန္တလေးတိုင်းဒေသကြီး၊ ကျောက်ဆည်မြို့နယ်အတွင်းရှိ တောင်သူများသည် စပါး၊ပဲ၊ပြောင်း၊ နှမ်း၊ငရုတ်စသည့် သီးနှံမျိုးစုံစိုက်ပျိုးကြသည့်အပြင် ရုံးပတီသီးကိုလည်း တစ်ပိုင်တစ်နိုင်စိုက်ပျိုးလာ ကြပြီး ယခုအချိန်တွင် တောင်သူများသည် ရုံးပတီသီးကို စီးပွားဖြစ်စိုက်ပျိုး လာကြပါသည်။ ရုံးပတီသီး ကိုရာသီမရွေးစိုက်ပျိုးနိုင်သောကြောင့် တောင်သူများတွက်ခြေကိုက်သောသီးနှံတစ်မျိုးဖြစ်ပါသည်။ ရုံးပတီသီးကို သံချပ်ကုန်း၊ အုတ်ဖို နှင့် ရွာပုလဲကျေးရွာများတွင် အများဆုံး စိုက်ပျိုးကြပါသည်။ စိုက်ပျိုးသောမျိုးများမှာ ပင်ပုမျိုး ၊ ပင်လတ်မျိုး နှင့် ပင်မြင့်မျိုးများကို အများဆုံးစိုက်ပျိုးကြပြီး (၁)ဧကလျှင် မျိုးစေ့(၁၂)ထုပ် စိုက်ပျိုးရပြီး မျိုးစေ့တစ်ထုပ်လျှင် (၂၈၀၀၀/-)ကျပ်ပေးရကြောင်း၊ (၁)ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင် စုစုပေါင်း(၆၃၀၀၀၀/-)ကျပ် ဝန်းကျင်ကုန်ကျကြောင်း၊ စိုက်ပျိုးပြီး(၄၅)ရက်အကြာတွင် စတင်ခူးဆွတ်ရပြီး တစ်ရက်ခြား တစ်ကြိမ် ခူးဆွတ်ပေးရကြောင်း၊ သက်တမ်းအနေဖြင့်(၂)လအထိ ခူးဆွတ်ရကြောင်း၊ ဈေးနှုန်းအနေဖြင့် ဖောက်သည်ဈေး တစ်ပိဿာလျှင်(၁၈၀၀)ကျပ်၊ လက်လီဈေးနှုန်းအနေဖြင့် တစ်ပိဿာလျှင် (၂၀၀၀/-)ကျပ်ဈေးနှုန်းဖြင့် အရောင်းအဝယ်ဖြစ်နေကြောင်း၊ ယခင်အပတ်ထက် စျေးနှုန်းအနည်းငယ် ကျဆင်းသွားကြောင်း ကုန်စိမ်းသီးနှံ ဖြစ်သည့်အတွက်ဈေးနှုန်းအတက်အကျရှိကြောင်း၊ အကျိုး အမြတ်အနေဖြင့်(၇၀၀၀၀၀/-) ကျပ်ခန့်မြတ်ကြောင်း၊ စိုက်ခင်းသို့လာရောက် ဝယ်ယူသော ကုန်စိမ်း ပွဲစားများအား ရောင်းချသည့်အပြင် မြို့မဈေးနှင့် အေးမြကြည်လင်ဈေးများသို့လည်း တင်ပို့ ရောင်းချကြကြောင်း၊ ရုံးပတီသီးစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

   မန္တလေးတိုင်းဒေသကြီး ၊ ကျောက်ဆည်ခရိုင်သည် စိုက်ပျိုးရေးကို အဓိကထား လုပ်ကိုင် ဆောင်ရွက်သော ဒေသတစ်ခုဖြစ်ပြီး သီးနှံမျိုးစုံ စိုက်ပျိုးဖြစ်ထွန်းလျက်ရှိရာ ဈေးကွက်ဝယ်လိုအား ရှိသော ဖရဲသီးနှံကိုလည်း စိုက်ပျိုးလျက်ရှိကြောင်း၊ ဖရဲစိုက်ပျိုးမှုအနေဖြင့် မျိုးစေ့ဝယ်၍ ပျိုးထောင် စိုက်ပျိုးရကြောင်း၊ ပျိုးသက်တမ်း (၂၀)ရက်တွင် စိုက်ခင်းထဲသို့ ပြောင်းရွေ့စိုက်ပျိုးရကြောင်း၊ မျိုးစေ့ကို စိုက်ပျိုးရေးဆေးဆိုင်များမှ ဝယ်ယူစိုက်ပျိုးကြကြောင်း၊ ဖရဲမျိုးစေ့တစ်ထုတ်လျှင်(၃၀၀၀၀ -၃၅၀၀၀) ကျပ်ဖြင့် ဝယ်ယူရကြောင်း၊ တစ်ဧကမျိုးထုပ် (၁၀)ထုပ် စိုက်ပျိုးရကြောင်း၊ တစ်ဧက ကုန်ကျစရိတ်အနေဖြင့် မျိုး၊သွင်းအားစု၊ လုပ်သားခ၊ ပလပ်စတစ်လိပ်ဖိုးများအပါအဝင် စုစုပေါင်း (၄၀၀၀၀၀၀/-)ကျပ်ခန့် ကုန်ကျကြောင်း၊ သွင်းအားစုများ ပိုမိုသုံးစွဲပါက ကုန်ကျစရိတ် ပိုမိုများပြားနိုင်ကြောင်း၊ စိုက်ပျိုးပြီး ရက်(၃၀)အကြာတွင် ပန်းများစတင်ပွင့်ပြီး ပန်းပွင့်ပြီး (၂၅)ရက်၊ (၃၀) ရက်တွင် အသီးများစတင်ခူးခွတ်နိုင်ပြီးဖြစ်ကြောင်း၊ စိုက်ပျိုးမှု မျိုးအနေဖြင့် ကျောက်စိမ်း ဖရဲ၊ ဒုံးကျည်ဖရဲနှင့် 855 ဖရဲမျိုးများ စိုက်ပျိုးကြကြောင်း၊ တစ်ဧကအထွက်နှုန်းအနေဖြင့် အလုံး ပေါင်း (၆၀၀၀)ခန့် ထွက်ရှိကြောင်း၊ ခရိုင်အတွင်း လက်ရှိစိုက်ပျိုးမှု အနည်းငယ်သာရှိပြီး ထွက်ရှိ သောရွာမှာ ရှင်ငယ်ပြေးရွာဖြစ်ကြောင်း၊ ယခုလက်ရှိဈေးကွက်အတွင်း ဝင်ရောက်နေသော ဖရဲသီး များမှာ မြို့နယ်အတွင်း ထွက်ရှိသော အသီးများ၊  ဝမ်းတွင်းမြို့နယ်၊ ဆည်ရွာမှ ထွက်ရှိသော ဖရဲများ ဖြစ်ပြီး ကျောက်စိမ်းဖရဲသီး တစ်လုံးလျှင် အလုံးသေး (၂၃၀၀/-)ကျပ်၊ အလုံးကြီး (၃၅၀၀/-) ကျပ်၊ 855 ဖရဲတစ်လုံးလျှင် အလုံးကြီး(၄၀၀၀/-) ၊ အလုံးသေး (၃၀၀၀/-) ကျပ်တို့ဖြင့် ရောင်းဝယ်လျက်ရှိကြောင်း၊ ရောင်းဝယ်လျက်ရှိကြောင်း၊ ဈေးကွက်အနေဖြင့် မြို့ပေါ်ရှိ သစ်သီးဆိုင်များ၊ သစ်သီးပွဲရုံများနှင့် ဈေးများသို့ ရောင်းချလျက်ရှိပြီး ပွဲရုံများမှ တစ်ဆင့် မန္တလေးမြို့၊ ရန်ကုန်မြို့များသို့ တင်ပို့လျက်ရှိကြောင်း၊ သစ်သီးဆိုင်များမှ စိုက်ခင်းထဲအရောက် လာရောက် ဝယ်ယူသူများ လည်း ရှိကြောင်း သိရှိရပါသည်။

DOCA(မန္တလေး)