ပြည်တွင်းကုန်သွယ်မှုသတင်း

          စစ်ကိုင်းတိုင်းဒေသကြီး၊ မုံရွာမြို့တွင် ရာသီပေါ်သီးနှံများကို စိုက်ပျိုးရောင်းချလျက်ရှိ ကြောင်း သိရှိရပြီး  ကြက်ဟင်းခါးပင်၊ ခဆော့ပင်နှင့် ကင်းမုံသီးများကို  မိမိတို့နေအိမ်ခြံဝင်း များတွင်လည်းကောင်း၊ မိမိပိုင်လယ်တောများတွင်လည်းကောင်း တစ်နိုင်တစ်ပိုင်စိုက်ပျိုး၍မုံရွာမြို့ပေါ်ရှိ ဈေးဟောင်းနှင့် ရပ်ကွက်ဈေးများတွင် လာရောက်ရောင်းချကြကြောင်း သိရှိရပါသည်။  

          ၂၀၂၆ ခုနှစ်၊ ဇန်နဝါရီလ ဒုတိယပတ်တွင် မုံရွာမြို့၊ ဈေးဟောင်းတွင် ရောင်းချ လျက်ရှိသော  ကြက်ဟင်းခါးသီးဈေးနှုန်းများမှာ ကြက်ဟင်းခါးသီး (၂၅)ကျပ်သားလျှင် (၈၀၀) ကျပ်၊ (၅၀)ကျပ်သားလျှင် (၁၆၀၀)ကျပ်၊ (၁)ပိဿာလျှင် (၃၂၀၀)ကျပ်၊ ခဆော့သီးတစ် (၁)ဘူးလျှင် (၄၀၀)ကျပ်နှင့် ကင်းမုံသီ(၁)ပြည်လျှင် (၂၄၀၀)ကျပ် ဖြင့်ရောင်းချလျက်ရှိပြီး ဈေးနှုန်းအနည်းငယ်ကျဆင်းသွားကြောင်း ကုန်စိမ်းရောင်းချသူများထံမှသိရှိရပါသည်။

DOCA(စစ်ကိုင်း)

    မန္တလေးတိုင်းဒေသကြီး မြင်းခြံမြို့မြို့နယ်သည် ပဲမျိုးစုံ၊ ဆီထွက်သီးနှံ၊ ပြောင်းနှင့် ကြက်သွန်နီ များစိုက်ပျိုးလျက်ရှိရာ ‌ထောပတ်ပဲ(မိုး)သီးနှံကိုလည်း စိုက်ပျိုးလျက်ရှိကြောင်း၊ ထောပတ်ပဲ(မိုး)ကို ဩဂုတ်လ၊ စက်တင်ဘာလတို့တွင်  စတင်စိုက်ပျိုးပြီး နိုဝင်ဘာလနှင့် ဒီဇင်ဘာလတို့တွင်  ရိတ်သိမ်း ထွက်ပေါ်ကြောင်းသိရှိရသည်။ ၂၀၂၅-၂၀၂၆ခုနှစ်၌ မြင်းခြံမြို့နယ်၌ ထောပတ်ပဲ(မိုး)သီးနှံ စိုက်ပျိုး ဧက (၂၅၀)ဧကတွင် ဧကအားလုံးရိတ်သိမ်းခဲ့ပြီး တစ်ဧကအထွက်နှုန်းအနေဖြင့်   (၁၅)တင်းခန့် ထွက်ရှိ ကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရသိရှိရသည်။ အများဆုံး စိုက်ပျိုးသောရွာများမှာ နဘူးအိုင်ရွာ၊ ခေါင်းကွဲရွာ၊ ဒါးကျွန်းရွာနှင့် ပတ္တာကျေးရွာတို့တွင်စိုက် ပျိုးထား ကြောင်း၊  စိုက်ပျိုးချိန်မှ ရိတ်သိမ်းချိန်အထိ  (၄)လခန့် ကြာမြင့်ကြောင်း၊ ထောပတ်ပဲသီးနှံကို ထယ်ထိုးပြီး မျိုးစေ့ပတ်၊ ထယ်ဖုံးစနစ်ဖြင့် စိုက်ပျိုးကြပါသည်။ အများဆုံးစိုက်ပျိုးသောမျိုးများမှာ ပင်ထောင်မျိုးနှင့်ပင်ပြန့်မျိုးများကို အများဆုံးစိုက်ပျိုးကြကြောင်း၊ ထောပတ်ပဲစိုက်ပျိုးရာတွင် မျိုးအနေ ဖြင့် (၄-၅)ပြီခန့် ကုန်ကျကြောင်း၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် စုစုပေါင်း (၄၈၀၀၀၀)ကျပ်ခန့် ကုန်ကျကြောင်း၊ ထောပတ်ပဲသီးနှံကို ထယ်ထိုးပြီး မျိုးစေ့ပတ်၊ ထယ်ဖုံးစနစ်ဖြင့် စိုက်ပျိုးကြပါသည်။ ယခုထွက်ပေါ်သော ထောပတ်ပဲတစ်တင်းလျှင် (၇၅၀၀၀) ကျပ်ခန့်ပေါက်ဈေးဖြင့် ရောင်းဝယ်လျက်ရှိ‌ကြောင်း၊ တစ်ဧက အကျိုးအမြတ်အနေဖြင့် (၆၄၀၀၀၀) ကျပ်ခန့်ရရှိကြောင်း၊ ထောပတ်ပဲသီးနှံပေါ်ချိန်တွင် တောင်သူများမှ မြို့ပေါ်ပွဲရုံများသို့ တိုက်ရိုက်တင်ပို့ ရောင်းချကြကြောင်း၊ ထိုပွဲရုံများမှတစ်ဆင့် မန္တလေး၊ ရန်ကုန်မြို့ များသို့တင်ပို့ ရောင်းချလျက်ရှိကြောင်း၊  ဈေးကွက်ဝယ်လိုအားကောင်းပြီး စိုက်ပျိုးစရိတ်သက်သာ၍ စီးပွားဖြစ်ဝင်ငွေတိုးသဖြင့် တောင်သူများအကျိုးအမြတ်ရရှိကြောင်း သိရှိရသည်။

DOCA(မန္တလေး)

    မန္တလေးတိုင်းဒေသကြီး၊ မြင်းခြံခရိုင်၊ မြင်းခြံမြို့နယ်အတွင်းရှိ ဆီမီးခုံ၊ ရန္တပို၊ ဆင်ချောင်း၊ တလုပ်မြို့၊ သာပေါင်း၊ ခေါင်းကွဲ၊ ပတ္တာ၊ လေးအိမ်တန်း၊ ရှားတော၊ ဒေါင့်သစ်၊ လင့်ကြီး၊ သဲဖြူဝ၊ ထနောင်းကုန်း၊ထနောင်းတိုင် စသည့်ကျေးရွာအုပ်စုများအတွင်းရှိ ဧရာဝတီမြစ်ရေဝင်မြစ်ရိုး တစ် လျှောက်  သဲနုန်းမြေအမျိုးအစားဖြစ်သည့် ကိုင်းကျွန်းမြေများတွင် ဖူးစားပြောင်း၊CPပြောင်း၊ငရုတ်၊ ပဲမျိုးစုံ နှင့် ကုန်စိမ်းသီးနှံမျိုးစုံကို စိုက်ပျိုးကြသလို ဆေးရွက်ကြီးကိုလည်း အားထားစိုက်ပျိုးထားကြောင်း သိရသည်။ မြင်းခြံမြို့နယ်အနေဖြင့် ယခုနှစ်ဆေးရွက်ကြီးစိုက်ပျိုးရန် လျာထား(၁၅၈၅၅) ဧကတွင် စိုက်ပျိုးဧက (၁၅၈၅၅)ဧက စိုက်ပျိုးပြီးဖြစ်ကြောင်း သိရှိရသည်။ အောက်တိုဘာလဆန်း မှစတင် စိုက်ပျိုးပြီး နိုဝင်ဘာလအထိ စိုက်ပျိုးသွားကြောင်း၊ ဆေးရွက်ကြီးများသည် ဖေဖော်ဝါရီလ တတိယ ပတ်ခန့်မှစတင်၍ မတ်လအထိခူးဆွတ်ရိတ်သိမ်းမည် ဖြစ်ကြောင်း၊ ဆေးရွက်ကြီးသည်မျိုးစေ့ ကို ပျိုး ထောင်စိုက်ပျိုးရပြီး ပျိုးပင်များပျိုးထောင်ရောင်းချသည့် မြင်းခြံမြို့နယ်၊ ထနောင်းကုန်းရွာ၊ ထနောင်း တိုင်ရွာ၊ ဂေါင်းကွဲရွာ၊ တောင်သာမြို့နယ်၊ တမံကြီးကျေးရွာများထံမှ ပျိုးပင်တစ်ပင်လျှင် (၁၅)ကျပ် နှုန်းဖြင့် သွားရောက်ဝယ်ယူကာ စိုက်ပျိုးကြကြောင်း၊ ရေလိုအပ်ပါကရေသွင်းစိုက်ပျိုးကြပြီး တစ်ဧက လျှင် ဆေးရွက်ကြီးပျိုးပင် ၅၅၀၀ မှ ၆၀၀၀ ခန့် စိုက်ပျိုးကြကြောင်း၊ ယခင်နှစ်တွင် ပျမ်းမျှ အထွက်နှုန်းအနေဖြင့် တစ်ဧကလျှင်ပိဿာ(၇၀၀) ခန့် ထွက်ရှိကြောင်းနှင့် ဆေးရွက်ကြီး တစ်ပိဿာ လျှင် (၉၀၀၀)ကျပ်နှုန်းဖြင့် အရောင်းအဝယ်ဖြစ်ခဲ့ကြောင်း၊ ဈေးကွက်အနေဖြင့် အခြားမြို့ များသို့ တင်ပို့ ရောင်းချခြင်းမရှိဘဲ မြင်းခြံမြို့ရှိ ဆေးလိပ်ခုံများသို့သာ ရောင်းချရပါကြောင်း၊ ယခုနှစ်တွင် ဆောင်း ရာသီနှင့် ဆောင်းအကုန်နွေအကူး လေကြီးမိုးကြီး ရာသီဥတုဖျက်ဆီးမှုမရှိပါက  ယခင်နှစ်က ထက် ဆေးရွက်ကြီးဈေးနှုန်းပိုမိုရရှိနိုင်ကြောင်း တောင်သူများအကျိုးအမြတ် ရရှိမည်ဟုမျှော်လင့်မိပါကြောင်း ဆေးရွက်ကြီးစိုက် တောင်သူတစ်ဦးထံမှ သိရသည်။

DOCA(မန္တလေး)

    စျေးကွက်သို့ မန္တလေးတိုင်းဒေသကြီးအတွင်း တံတားဦးခရိုင်၊ ကျောက်ဆည်ခရိုင်၊ မြင်းခြံခရိုင်နှင့်ညောင်ဦးခရိုင်တို့မှ ထွက်သည့်ထန်းပင်မြစ်များနှင့် စစ်ကိုင်းတိုင်းဒေသကြီးတို့မှ ထွက်သည့် ထန်းပင်မြစ်များဝင်ရောက်မှုများပြားလျှက်ရှိပြီး၊စျေးနှုန်းကျဆင်းကာအရောင်းသွက်လျှက်ရှိကြောင်း သိရှိရပါသည်။မန္တလေးစျေးကွက်အတွင်း မုံရွာဒေသမှထွက်ရှိသည့်ရွံ့စေးကပ်သည့်ရုက္ခစိုး ထန်းမြစ် မှာ အသားထူ၍ ဝယ်ယူသူများကြိုက်နှစ်သက်‌ကာ အခြားဒေသများမှ ထွက်ရှိသည့်ထန်းပင်မြစ် ထက်စျေးအနည်းငယ်မြင့်ကြောင်း သိရှိရပါသည်။မန္တလေးစျေးကွက်တွင် ၂၀၂၆ ခုနှစ် ဇန်နဝါရီလ ပထမပတ်အတွင်း ဖြစ်ပေါ်နေသည့် ထန်းပင်မြစ်စျေးနှုန်းများမှာ၁စီး(၃၀ချောင်းပါ)လျှင် ၄၀၀၀ ကျပ် နှင့် ၄၅၀၀ ကျပ်၊ မုံရွာထန်းပင်မြစ်ရွံ့စျေးကပ်(ရုက္ခစိုး)များမှာ ၁စီးလျှင် ၅၅၀၀ကျပ်နှင့် ၆၀၀၀ ကျပ် ဖြစ်တို့ဖြင့် တစ်စီးလျှင် ၅၀၀ ကျပ်ခန့် ကျဆင်းလျက်ရှိကြောင်း ထနောင်းပင်စျေးရှိ စျေးသည် တစ်ဦး၏ပြောပြချက်အရ သိရှိရပါသည်။

DOCA(မန္တလေး)

   မန္တလေးတိုင်ဒေသကြီး၊ တံတားဦးခရိုင်၊ ငါန်းဇွန်မြို့နယ်သည် လယ်ယာစိုက်ပျိုးရေးကို လုပ်ကိုင် သော မြို့နယ်တစ်ခုဖြစ်ပြီး ဒေသခံများသည် ရာသီအလိုက် ပဲ၊ ပြောင်း၊ နှမ်း၊ ဝါ၊ ဂျုံနှင့် စားဖိုဆောင် သီးနှံများကို အဓိကထားစိုက်ပျိုးလုပ်ကိုင်ကြပါသည်။ ၂၀၂၅-၂၀၂၆ ခုနှစ် မိုးနှမ်း လျာထားဧက (၆၄၀၈၀)ဧက၊ စိုက်ပျိုးဧက (၆၇၈၅၂)ဧက အားလုံးရိတ်သိမ်းပြီးဖြစ်ရာ အထွက်နှုန်းမှာ (၅.၀၂)တင်း အထွက်စုစုပေါင်း (၃၄၀၆၁၇)တင်း ထွက်ရှိကြောင်း၊ ဆောင်းနှမ်းလျာထားဧက (၆၁၄၅)ဧက၊ စိုက်ပျိုးဧက(၈၁၆၄)ဧက စိုက်ပျိုးကြောင်း သိရသည်။ စိုက်ပျိုးမှုမှာ ပက်ကျဲနှင့်တန်းစိုက်ဟူ၍ ရှိရာတွင်  နေရာဒေသနှင့်မြေပေါ်မူတည်၍ ဒေသခံ တောင်သူများမှာ ပက်ကျဲစိုက်ပျိုးမှုကိုသာ အများဆုံးစိုက်ပျိုး ကြပြီး မျိုးအသုံးချမှုအနေဖြင့် တစ်ဧကလျှင်(၂) ပြည်ခန့် ထည့်သွင်းစိုက်ပျိုးကြပါသည်။ ရာသီချိန် နှမ်းတစ်တင်းဈေး အနေဖြင့် (၉၅၀၀၀၊၁၀၀၀၀၀)ကျပ် ရှိခဲ့ပါသည်။ မိုးနှမ်းမှာ ဆောင်းနှမ်းနှင့်  နှိုင်းယှဉ်လျှင် အထွက်နှုန်း ထက်ဝက်နီးပါးခန့်လျော့နည်းကြောင်း သိရသည်။ မိုးနှမ်းစိုက်ပျိုးမှုအများ ဆုံးအနေဖြင့် ဘုရားထူး ကျေးရွာ၊ ရွာသစ်၊ စီထိန်း၊ တမာပင်၊ အောက်ရိုး၊ ရွာသာ၊ နတ်စိမ်း၊ ထနောင်းပင်၊ မြို့သာ၊ သရက္ကန်၊ အောင်ချမ်းသာကျေးရွာနှင့်ကုန်းသာကျေးရွာ စသည့်ကျေးရွာများဖြစ်ပါသည်။ ယခုနှစ် နှမ်းမျိုးဈေး အနေဖြင့် တစ်ပြည်လျှင်(၁၀၀၀၀)ကျပ် ဈေးများရှိခဲ့ပြီး နှမ်းတစ်ဧကစိုက်ပျိုးမှု ကုန်ကျ စရိတ်အနေဖြင့် မျိုး၊ မြေယာပြုပြင်မှု၊ သွင်းအားစု၊ လုပ်သားခများအပါအဝင် (၃၅၀၀၀၀) ကျပ်ဝန်းကျင်ခန့် ကုန်ကျမှုရှိပါသည်။ တောင်သူအကျိုးအမြတ်အနေဖြင့် (၂၀၀၀၀၀)ကျပ်ဝန်းကျင် သာ ရှိပြီး နွားစာရှားပါးသည့် ဒေသများဖြစ်သည့်အတွက် အကျိုးအမြတ်နည်းပါးသော်လည်း တစ်ဖက် မှလည်းနွားစာ ရရှိသဖြင့် နှစ်စဉ်စိုက်ပျိုးလျက်ရှိပါသည်။ တစ်ချို့ကျေးရွာများသည် နွားစာအတွက် ကျောက်ဆည်၊ မြစ်သားဒေသဘက်မှ နှမ်းပေါ်ချိန်ထွက်ပေါ်သော နှမ်းရိုးများကို သယ်ယူစရိတ် အကုန်အကျခံ၍ သယ်ယူကျွေးမွေးရပါသည်။ ဒေသထွက်နှမ်းများကို ရောင်းဝယ်မှု ဈေးကွက်အနေဖြင့် မန္တလေးမြို့နှင့် ကျောက်ဆည်မြို့များသို့ တောင်သူများကိုယ်တိုင် ဈေးဝယ်လိုက်ရင်းဖြင့်သော်လည်း ကောင်း၊ ကားတင်ပေး၍သော်လည်းကောင်း အများဆုံးရောင်းချ ကြပါသည်။ တောင်သူများအတွက် သီးနှံစိုက်ပျိုးရာတွင် ရာသီဥတုကောင်းမွန်ရန် လိုအပ်သလို ရေခံမြေခံနှင့်မျိုးစေ့များလည်း ကောင်းမွန် ၍  ဈေးကွက်ခိုင်မာမှုရှိမှသာ သင့်တင့်လျှောက်ပတ်သော အကျိုးအမြတ်များ ရရှိနိုင်မည်ဖြစ်ပါသည်။

DOCA(မန္တလေး)