ပြည်တွင်းကုန်သွယ်မှုသတင်း

        မြန်မာလူမျိုးများသည်ကုလားပဲကို ပြုတ်စားခြင်း၊ ကြော်စားခြင်း၊ လှော်စားခြင်း၊ ပဲခြမ်းပြုလုပ်၍ ဟင်းလျာအမျိုးမျိုးအဖြစ်စားသုံးကြသည့်အပြင် ကုလားပဲကို အမှုန့်ကြိတ်ပြီး တို့ဟူးအစို၊ တို့ဟူးအခြောက် ပြုလုပ်ရာ၌လည်းကောင်း၊ မုန့်ဟင်းခါး/အုန်းနို့ခေါက်ဆွဲ/ နို့စိမ်းခေါက်ဆွဲ ချက်ရာ၌ လည်းကောင်း၊ မုန့်တီ/ခေါက်ဆွဲ/ဟင်းသီးဟင်းရွက်စသည့်တို့ကို အသုပ်စုံများပြုလုပ်ရာ၌လည်းကောင်း ထည့်၍ စားသောက်ကြပါသည်။

         ရွှေကြိုးကြာ ပဲမှုန့်ကြိတ်စက်သည် စစ်ကိုင်းမြို့၊ နန္ဒဝန်ရပ်ကွက်၌ တည်ရှိပြီး၊ ၂၀၁၀ခုနှစ်က စတင်၍ စက်ပစ္စည်းတန်ဖိုး ရင်းနှီးငွေ ကျပ်သိန်း ၅၀၀ဖြင့် စတင်လုပ်ကိုင်ခဲ့ခြင်းဖြစ်သည်။ ကုလားပဲ ခွဲခြမ်းများကို မန္တလေးကုန်စည်ဒိုင်မှဝယ်ယူပြီး ကုလားပဲအစိမ်းမှုန့်ကြိတ်ခြင်းကို တစ်ရက်လျှင် ကုလားပဲခွဲခြမ်းပိဿာ၆၀ခန့်၊ တစ်လလျှင်ပျမ်းမျှကုလားပဲခြမ်း ပိဿာ၁၃၀၀ကျော်ကိုလည်းကောင်း၊ ကုလားပဲအကျက်မှုန့် ကြိတ်ခြင်းကို တစ်ရက်လျှင် ကုလားပဲခွဲခြမ်း ၁၀ ပိဿာခန့်၊ တစ်လလျှင် ပျမ်းမျှကုလားပဲခြမ်း ၂၂၀ ပိဿာကိုလည်းကောင်း ကြိတ်ခွဲထုတ်လုပ်နိုင်ကြောင်း သိရပါသည်။ ကုလားပဲအကျက်မှုန့်နှင့် ကုလားပဲအစိမ်းမှုန့်များအား တစ်ဆယ်ကျပ်သား၊ နှစ်ဆယ့်ငါးကျပ်သား၊ ငါးဆယ်ကျပ်သား အထုပ်များကို လေလုံအောင် ပလပ်စတစ်အိတ်ဖြင့် ထုပ်ပိုးပါသည်။  ထားရှိသုံးစွဲနိုင်မှု သက်တမ်းမှာ လေလုံအောင်ထားပါက  ပဲမှုန့်အကျက် ၃လ၊ ပဲမှုန့်အစိမ်း ၄လထိ ကြာအောင် ထားရှိနိုင်ကြောင်းသိရသည်။ ရောင်းဈေးနှုန်းများမှာ စက်ရုံလက်ကားဈေး ပဲမှုန့်အကျက် တစ်ပိဿာ ၇၀၀၀ကျပ်မှ ၇၇၀၀ ကျပ်ကြား၊ ပဲမှုန့်အစိမ်း တစ်ပိဿာ ၆၅၀၀မှ ၆၈၀၀ကျပ် ကြား ဈေးနှုန်းများဖြင့်  ဒေသတွင်းနှင့် မန္တလေးတိုင်းဒေသကြီးအတွင်းရှိ ပြင်ဦးလွင်၊ ကျောက်ဆည်မြို့နှင့် မိတ္ထီလာမြို့၊ တောင်ကြီး၊ ညောင်လေးပင်၊ အောင်ပန်း၊ လာရှိုး၊ ကလေးမြို့များသို့ အများဆုံး တင်ပို့ရောင်းချကြောင်း သိရပါသည်။ အမျိုးသမီးလုပ်သား(၅)ဦးအား တစ်ရက်လုပ်အားခ ၁၂၀၀၀ကျပ်နှုန်းဖြင့် အလုပ်အကိုင်အခွင့်အလမ်းများ ပေးထားနိုင်ကြောင်း သိရပါသည်။

         ရွှေကြိုးကြာပဲခွဲစက်သည် ခေတ်မီစက်များကို အသုံးပြု၍ ကုလားပဲမှုန့်ကို ကြိတ်ခွဲကြောင်း သိရပါသည်။ ခရိုင်အလိုက်၊ တိုင်းဒေသကြီးအလိုက် အသေးစား၊ အငယ်စား၊ အလတ်စား (MSME) စက်မှုလုပ်ငန်းများဖြစ်သည့် ပဲမှုန့်ကြိတ်စက်လုပ်ငန်းများ ပိုမိုဖွံ့ဖြိုးတိုးတက်လာစေခြင်းဖြင့် ဒေသတွင်း ထုတ်ကုန်များဖြစ်သည့် ကုလားပဲမှုန့်ကို စားသုံးသူပြည်သူများအတွက် စိတ်ချယုံကြည်စွာဖြင့် ဝယ်ယူစားသုံးနိုင်ကြောင်း ကုလားပဲမှုန့်လုပ်ငန်းရှင်ထံမှ သိရှိရပါသည်။

DOCA(စစ်ကိုင်း)

      မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်ပြီး စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင်လည်း သီးနှံမျိုးစုံစိုက်ပျိုးလျက်ရှိရာ ရေ၊ မြေ၊ ရာသီဥတုနှင့် ကိုက်ညီသည့် ပဲစင်းငုံသီးနှံကို အဓိကစိုက်ပျိုးလျက်ရှိကြောင်း စိုက်ပျိုးရေး ဦးစီးဌာန၏ စာရင်းများအရ သိရသည်။

      ကန့်ဘလူမြို့နယ်တွင် ပဲစင်းငုံသီးနှံ အရောင်းအဝယ်ဖြစ်မှု ကောင်းမွန်လျက်ရှိပြီး မန္တလေး ကုန်စည်ဒိုင်ဈေးကွက်၏ ဝယ်လိုအားမြင့်တက်လာမှုကြောင့် ယခုအပတ်အတွင်း ဈေးနှုန်းများ အနည်းငယ်မြင့်တက်လာကြောင်း သိရသည်။ ဒေသတွင်း ပဲစင်းငုံလက်ကျန်များကို ကုန်သည်များမှ ဝယ်ယူစုဆောင်းနေသဖြင့် ဈေးကွက်အတွင်း အရောင်းအဝယ်သွက်လက်နေပြီး တောင်သူများလည်း ဈေးကောင်းရရှိချိန်တွင် ထုတ်ရောင်းလာကြကြောင်း သိရသည်။

        ကန့်ဘလူမြို့နယ်၌ ယခင်အပတ်က ပဲစင်းငုံတစ်တင်းလျှင် ကျပ် ၇၄၀၀၀ မှ ၈၃၀၀၀ အတွင်း ပေါက်ဈေးရှိခဲ့ရာမှ ယခုအပတ်တွင် ကျပ် ၇၅၀၀၀ မှ ၈၅၀၀၀ အထိ မြင့်တက်လာခဲ့ပြီး တစ်တင်းလျှင် ကျပ် ၁၀၀၀ မှ ၂၀၀၀ ခန့် ဈေးတက်လာကြောင်း သိရသည်။ ဈေးနှုန်းမြင့်တက်ရခြင်း၏ အဓိကအကြောင်းရင်းမှာ ပြည်ပတင်ပို့မှုအတွက် ဝယ်လိုအားဆက်လက်ရှိနေခြင်း၊ ဈေးကွက်အတွင်း ပစ္စည်းလက်ကျန်နည်းပါးလာခြင်းနှင့် ကုန်သည်များ၏ အဝယ်လိုက်လာမှုတို့ကြောင့်ဖြစ်ကြောင်း ဈေးကွက်လေ့လာသူများက သုံးသပ်ထားသည်။ လက်ရှိအခြေအနေအရ ပဲစင်းငုံဈေးနှုန်းများမှာ တည်ငြိမ်မှုရှိနေသော်လည်း ပြည်ပဝယ်လိုအား ဆက်လက်ကောင်းမွန်နေပါက လာမည့်သီတင်းပတ်များတွင် ဈေးနှုန်းအနည်းငယ် ထပ်မံမြင့်တက်လာနိုင်ကြောင်း ကုန်သည်အသိုင်းအဝိုင်းထံမှ သိရှိရပါသည်။

DOCA(စစ်ကိုင်း)

တိုင်းဒေသကြီး/ပြည်နယ် မြို့နယ်များအလိုက် ၄-၆-၂၀၂၆ ရက်နေ့တွင် ဖြစ်ပေါ်လျက်ရှိသော ဆန်၊ ဆီ၊ မီးဖိုချောင်သုံးပစ္စည်းများ၊ သားငါးနှင့် ဥ‌ဈေးနှုန်းများကို ပူးတွဲပါ ဖိုင်တွင် ကြည့်ရှုနိုင်ပါသည်-

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ပန်းဈေးကွက်၌ နှင်းဆီပန်း၊ နှင်းပန်း၊ ဂန္ဓမာပန်း၊ သပြေပန်း၊ အာစီယံသပြေ၊ စံပါယ်ပန်း၊ ဇွန်ပန်း၊ သစ္စာပန်းစသည့် ပန်းမျိုးစုံရောင်းချလျက်ရှိကြောင်း၊ ဒေသခံပြည်သူများကလည်း ဘုရားပန်းကပ်လှူရန်၊ ပန်းအလှဆင်ရန်နှင့် အမျိုးသမီးများအလှပန်ဆင်ရန် နေ့စဉ်ဝယ်ယူအသုံးပြုလျက်ရှိကြောင်း သိရသည်။

         ကန့်ဘလူမြို့ပန်းဈေးကွက်၌ ၂၀၂၆ ခုနှစ်၊ မေလ နောက်ဆုံးပတ်အတွင်း ရေဦးဒေသထွက် ဂန္ဓမာပန်း(၁)စီးလျှင်(၂၀၀၀)ကျပ်၊ (၃)စီးလျှင် (၅၀၀၀)ကျပ်၊ ဒေသထွက်ဂန္ဓမာပန်း(၁)စီးလျှင် (၁၀၀၀)ကျပ်၊ သပြေပန်းငုတ်(၁)ငုတ်လျှင် (၂၀၀၀)ကျပ်၊ (၁)စီးလျှင် (၁၀၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိရာ တတိယပတ်၏ ဈေးနှုန်းများနှင့်နှိုင်းယှဉ်ပါက ယခုနောက်ဆုံးပတ်အတွင်း ဂန္ဓမာပန်း(၁)စီးလျှင်(၅၀၀)ကျပ် ဈေးနှုန်းကျဆင်းသွားကြောင်း၊ ယခုအခါ မိုးဦးရာသီ ရောက်လာသည့်အတွက် မိုးရွာသွန်းမှုကြောင့် အပင်များပျက်စီးမှုရှိလာခြင်းနှင့် ရေသွင်းစရိတ် ကျဆင်းသွားခြင်းကြောင့်  ဈေးနှုန်းအနည်းငယ်ကျဆင်းသွားခြင်းဖြစ်ကြောင်း ပန်းရောင်းချသူများထံမှ သိရှိရပါသည်။

DOCA(စစ်ကိုင်း)

         စစ်ကိုင်းတိုင်းဒေသကြီး၊ ကနီမြို့နယ်တွင် နှမ်း၊ ပဲမျိုးစုံ၊ ပန်းမျိုးစုံနှင့် စားဖိုဆောင်သီးနှံများ စိုက်ပျိုးသည့်အပြင် ဥယျာဉ်ခြံမြေသီးနှံများကိုလည်း စီးပွားဖြစ်စိုက်ပျိုးကြပြီး ကနီမြို့နယ်တွင် ငှက်ပျောစိုက်ဧက ၃ ကျော် စိုက်ပျိုးထားရှိကြောင်း သိရသည်။

             ငှက်ပျောသီးနှံကို ဇူလိုင်လတွင် စိုက်ပျိုး၍ စိုက်ပျိုးပြီးတစ်နှစ်ကျော်အကြာ စက်တင်ဘာလတွင် လှိုင်လှိုင်ထွက်ပေါ်ကြောင်း၊ မျိုးအနေဖြင့် ဖီးကြမ်းငှက်ပျောမျိုးကို အများဆုံးစိုက်ပျိုးကြပြီး ငှက်ပျောစိုက်ပျိုးရာတွင် ငှက်ပျောသားတက်များကိုတူးယူ၍ ၃-၄ ရက်ခန့် အခြောက်ခံကာ စိုက်ပျိုးရပြီး တစ်ဧကလျှင် ငှက်ပျောသားတက် ၇၀၀-၈၀၀ ခန့် စိုက်ပျိုးရကြောင်း၊ စိုက်ပျိုးထုတ်လုပ်မှု ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ၊ ငှက်ပျောသား တက်ရှင်းလင်းခြင်း အပါအဝင် တစ်ဧကလျှင် ငွေကျပ် သိန်း ၁၀ ခန့် ကုန်ကျပြီး အထွက်နှုန်းအနေဖြင့် ငှက်ပျောခိုင် ၁၈၀၀-၂၀၀၀ ခန့် ထွက်ရှိ၍ တစ်ခိုင်လျှင် ရောင်းတန်းဝင် ငှက်ပျောဖီး ၄-၅ ဖီးခန့် ရရှိကြောင်း၊ ဈေးနှုန်းအနေဖြင့်  မေလ စတုတ္တပတ်တွင် ဖီးကြမ်းငှက်ပျောတစ်ဖီးလျှင် ရောင်းတန်းဝင် တစ်ဖီးလျှင် ၂၀၀၀-၃၀၀၀ ကျပ်၊ အဖျားတစ်ဖီးလျှင် ၁၀၀၀-၁၂၀၀ ကျပ်နှုန်းဖြင့် ရောင်းချရပြီး အကျိုးအမြတ်အနေဖြင့် တစ်ဧကလျှင် ငွေကျပ် ၂၀ သိန်းကျော်ခန့် ရရှိကြောင်း၊ ဈေးကွက်အနေဖြင့် မုံရွာမြို့ပေါ်ရှိ ငှက်‌ပျောပွဲရုံများ၊ သစ်သီးဆိုင်များသို့ တင်ပို့ရောင်းချကြောင်း၊ ယခုနှစ်တွင် ငှက်ပျောသီးဈေးနှုန်းများ ကောင်းမွန်သောကြောင့် တောင်သူများအနေဖြင့် အကျိုးအမြတ်များရရှိကြောင်း သိရှိရပါသည်။

DOCA(စစ်ကိုင်း)