ပြည်တွင်းကုန်သွယ်မှုသတင်း

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ညောင်တုန်းမြို့နယ်ဦးစီးမှူးရုံးတွင် (၁၈.၂.၂၀၂၂)နေ့ နေ့လည် (၁၃:၀၀ မှ ၁၄:၁၅) အချိန်ထိ ပဲကုန်စည်ဒိုင်ဖွင့်လှစ်ရေးအတွက် ပဲနှမ်းအသင်းဥက္ကဌ ဦးသန်းဝင်းနှင့် အဖွဲ့အား တွေ့ဆုံ၍ဆွေးနွေးပွဲ ကျင်းပပြုလုပ်ခဲ့ပါသည်။

          အဆိုပါတွေ့ဆုံဆွေးနွေးပွဲတွင် မြို့နယ်ဦးစီးမှူးဦးအောင်လွင်မှ စားသုံးသူရေးရာဦးစီးဌာန၏ လုပ်ငန်းဆောင်ရွက်မှုများ၊ လက်ရှိဖြစ်ပေါ်နေသော ပဲဈေးကွက်အခြေအနေနှင့် ရောင်းဝယ်ဖောက်ကားရာတွင် လုပ်ငန်းရှင်များ သိသင့်သိထိုက်သော စီးပွားရေးဆိုင်ရာများကို ထည့်သွင်းဆွေးနွေးပြီး ပဲနှမ်းအသင်းဥက္ကဌ ဦးသန်းဝင်းမှ ပဲနှမ်းအသင်း၏ ရည်ရွယ်ချက်၊ ညောင်တုန်းပဲဈေးကွက်၊ ရန်ကုန် ဘုရင့်နောင်ပဲဈေးကွက်အခြေအနေများနှင့် (၂၂.၂.၂၀၂၂)နေ့တွင် ကုန်စည်ဒိုင်ဖွင့်လှစ်နိုင်ရေးတို့ကို ဦးစားပေးဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

         မြန်မာနိုင်ငံတွင် ရှေးအစဉ်အဆက်မှစ၍ အမျိုးသမီးဆေးအဖြစ် အသုံးပြုသည့် ရှားစောင်း လက်ပက်မှာ ယခုအခါ အလှအပပစ္စည်းများ၊ ဆပ်ပြာ၊ လူသုံးကုန်ပစ္စည်းများ၊ ဆေးဝါးဓါတ်စာများ၊ အချိုရည်များ ထုတ်လုပ်သုံးစွဲလာခဲ့ရာ မကွေးတိုင်းဒေသကြီး ပခုက္ကူခရိုင်၊ မြိုင်မြို့နယ် ထနောင်းခလှ ကျေးရွာမှ ထုတ်လုပ်သည့် နုပျို သဘာဝရှားစောင်းလက်ပက် ချက်ဆေးမှာ ဂျပန်၊ ကိုရီးယား၊ မလေးရှား၊ စင်ကာပူ၊ ထိုင်း၊ တရုတ်နိုင်ငံများအထိ တင်ပို့ရောင်းချနေရသည့် လုပ်ငန်းတစ်ခုဖြစ်ကြောင်း သိရှိရသည့်အတွက် (၁၇.၂.၂၀၂၂)ရက်နေ့တွင် မြို့နယ်တာဝန်ခံ ဦးဇော်မင်းဦးမှ သွားရောက် တွေ့ဆုံမေးမြန်းခဲ့မှုအား ဒေသတွင်း အလုပ်အကိုင်များ ဖန်တီးပေးနေသည့် အတုယူဖွယ်ရာ လုပ်ငန်းတစ်ခုအဖြစ် ရေးသားတင်ပြလိုက်ရပါသည်။

            နုပျို သဘာဝရှားစောင်းလက်ပက်ချက်ဆေး လုပ်ကိုင်သည့် လုပ်ငန်းရှင်မှာ အသက်(၂၀) ဝန်းကျင်သာရှိသေးသည့် ပခုက္ကူကောလိပ်မှ ဒုတိယနှစ်ကျောင်းသူတစ်ဦးဖြစ်ပြီး ကိုဗစ်-၁၉ကြောင့် ကျောင်းရက်ရှည်ပိတ်ချိန်တွင် သူမဆယ်တန်းဘော်ဒါနေစဉ် အမျိုးသမီးရောဂါအတွက် မိခင်ဖြစ်သူကျောင်းဆရာမ၏ ဖော်စပ်ပေးခဲ့သည့် ရှားစောင်းလက်ပက်ယိုကို တစ်ပိုင်တစ်နိုင် ထုတ်လုပ်ရောင်းချခဲ့ရာမှ Online Bussiness လုပ်ငန်းအဖြစ် ဈေးကွက်ရှာဖွေလုပ်ကိုင်ဆောင်ရွက်ခဲ့ကြောင်း သိရှိရပါသည်။

          လူငယ်လုပ်ငန်းရှင်ဖြစ်သည့်အတွက် မိမိသုံးစွဲသည့် လူမှုကွန်ယက်စာမျက်နှာမှတစ်ဆင့် မိမိထုတ်ကုန်များကို ကြေငြာခြင်း၊ မြို့ကြီးများတွင် အရောင်းကိုယ်စားလှယ်များထားပြီး တစ်ဆင့်ရောင်းချသူများ အကျိုးရှိစေရေး နုပျို ရှားစောင်းလက်ပက်ချက်ဆေး၏ ဈေးနှုန်းကို မြန်မာပြည်တွင်း တစ်ဗူးလျှင်(၅၀၀ဝိ/-)ဈေးနှုန်း သတ်မှတ်ပြီး အရောင်းကိုယ်စားလှယ်များ ကြိုးစားသလောက် ရောင်းအားပေါ်မူတည်၍ တစ်ဗူးလျှင်(၈၀ဝိ/-)မှ (၁၀၀ဝိ/-)ကြားအမြတ်ရရှိအောင် စီမံဆောင်ရွက်ပေးခဲ့မှုကြောင့် တစ်နေ့လျှင် (၅၀၀ဝိ/-)တန်ဆေးဗူး (၈၀မှ ၁၀၀ကြား) ဖြန့်ဖြူးရောင်းချနိုင်သည်အထိ လုပ်ငန်းချဲ့ ထွင်လာရကြောင်း လုပ်ငန်းရှင်ဒေါ်အေမီသိမ့်သိမ့်လွင်၏ ပြောကြားချက်အရ သိရှိရပါသည်။

          ပခုက္ကူခရိုင် မြိုင်ဒေသသည် မိုးခေါင်ရေရှားပြီး ပူးပြင်းခြောက်သွေ့သည့် ဒေသဖြစ်ရာ ရှားစောင်းလက်ပက်ချက်ဆေး၏ ကုန်ကြမ်းများဖြစ်သည့် ရှားစောင်းလက်ပက်၊ ထန်းဖိုထန်းလျက်၊ ဇီးပျားရည်တို့မှာ အလွယ်တကူပေါများစွာ ရရှိနိုင်ခြင်းမှာလည်း နုပျို ရှားစောင်းလက်ပက်ချက်ဆေး လုပ်ငန်း၏ အားသာချက်တစ်ခုဖြစ်ကြောင်း လေ့လာသုံးသပ်ရပါသည်။ ရှားစောင်းလက်ပက်ချက်ဆေးအား တာရှည်အထားခံရန်အတွက် လှီးထားသည့် ရှားစောင်းလက်ပက်များကို တစ်နေကုန်နေလှန်းပြီးမှ ထန်းလျက်၊ ဇီးပျားရည်၊ မန်ကျည်းမှည့်၊ စမုံမျိုးငါးပါး၊ နှမ်းနက်ဆီတို့ကိုထည့်၍ ရေကုန်သည်အထိ မီးကိုလိုအပ်သလို အတိုးအလျှော့ထား၍ ကြိုချက်ရကြောင်း၊ ရှားစောင်းလက်ပက် တစ်ဒယ်အတွက် ရှားစောင်းလက်ပက် ၆ပိဿာ၊ ထန်းလျက် ၄ပိဿာ၊ မန်ကျည်းမှည့် ၁ပိဿာ၂၅သား၊ ပျားရည် ၁၀ကျပ်သား၊ နှမ်းနက်ဆီ ၅၀ကျပ်သား၊ စမုံမျိုးငါးပါး ၁၀ကျပ်သားတို့ကို အချိုးကျထည့်၍ ကြိုရကြောင်း၊ သုံးစွဲသည့်ကုန်ကြမ်းများမှာ သဘာဝအော်ဂဲနစ်စစ်စစ်ဖြစ်၍ ပြည်ပနိုင်ငံများသို့ သွားရောက်လုပ်ကိုင်နေသည့် မြန်မာအလုပ်သမားများမှတစ်ဆင့် ပြည်ပနိုင်ငံများမှ စားသုံးသူများမှပါ မှာယူသုံးစွဲလာကြောင်း သိရှိရပါသည်။

          နုပျို ချက်ဆေးလုပ်ငန်းအတွက် ကျေးရွာမှ အမျိုးသား/သမီး (၅၀)ခန့် ငှားရမ်းသုံးစွဲရကြောင်း၊ အမျိုးသမီးဦးရေ ပိုမိုသုံးစွဲရကြောင်း၊ ရှားစောင်းလက်ပက်လှီးခြင်း၊ ပက်ကင်ထုပ်ခြင်းလုပ်ငန်းများတွင် လုပ်ဆောင်ကြကြောင်း အမျိုးသားလုပ်သားများကို ဆေးကြိုသည့်နေရာတွင် ခိုင်းစေကြောင်း၊ လုပ်သားခအနေဖြင့် အမျိုးသမီးတစ်ဦးလျှင်(၃၀၀ဝိ/-)နှုန်း၊ အမျိုးသားလုပ်သားတစ်ဦးလျှင်(၅၀၀ဝိ/-) နှုန်းပေးရကြောင်း အလုပ်ချိန်မှာ နံနက်ပိုင်း(၆:၃၀မှ ၁၁:၀၀ထိ) ညနေပိုင်းနေ့လည်(၁:၀၀မှ ညနေ ၅:၀၀ထိ) တောင်သူလုပ်ငန်းခွင်လုပ်သည့် အချိန်အတိုင်းဖြစ်ကြောင်း၊ ချက်ဆေးလုပ်ငန်းမှာ အရိပ်ထဲ တွင် လုပ်ရသည့်အတွက် အမျိုးသမီးများအနေဖြင့် အားကျိုးမာန်တက် လုပ်ကိုင်ကြကြောင်း၊ လောင်စာအနေဖြင့် ရှားသား၊ ထန်းလက်များကို အသုံးပြုကြောင်း၊ ဆေးတစ်ဒယ်ကိုကြိုချက်ရန် အချိန်(၈:၀၀)နာရီ အနည်းဆုံး ကြိုချက်ရကြောင်း၊ မှာယူမှုများပါက ညဘက်အထိပါ လုပ်ဆောင်ရကြောင်း၊ နုပျို ချက်ဆေးလုပ်ငန်းမှာ တစ်နှစ်တာကာလအတွင်း လုပ်ငန်းတိုးချဲ့လာရသည့်အတွက် အသေးစား စက်မှုလုပ်ငန်းမှတ်ပုံတင်ရယူဆောင်ရွက်ထားပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ပြည့်စုံစွာဖော်ပြရန်အတွက် လိုအပ်သည့် ဓါတ်မတည့်ကြောင်းဖော်ပြချက်နှင့် အသားတင်ပမာဏတို့အား ပြည့်စုံစွာထည့်သွင်းဖော်ပြနိုင်ရေး အသိပေးရှင်းလင်းဆွေးနွေးခဲ့ကြောင်း သိရှိရပါသည်။

         ယခုကဲ့သို့ ကိုဗစ်ကာလ စီးပွားရေးလုပ်ငန်းများကျဆင်းနေချိန်တွင် လူငယ်အမျိုးသမီးတစ်ဦး ဦးဆောင်သည့် ဒေသထွက်ကုန်များအား တန်ဖိုးမြှင့်ထုတ်ကုန်အဖြစ် ပြောင်းလဲထုတ်လုပ်၍ အွန်လိုင်း မီဒီယာမှတစ်ဆင့် အွန်လိုင်းစီးပွားရေးလုပ်ငန်းကို နိုင်ငံတွင်းသာမက ပြည်ပနိုင်ငံများအထိပါ အောင်မြင်စွာ တင်ပို့ရောင်းချနိုင်ပြီး ဒေသတွင်း အလုပ်အကိုင်အခွင့်အလမ်းများ တစ်နှစ်ပတ်လုံး ဖန်တီးပေးနိုင်သည့် နုပျို ရှားစောင်း လက်ပက်ချက်ဆေးလုပ်ငန်းအား ကွင်းဆင်းလေ့လာ တင်ပြလိုက်ရပါသည်။

DOCA(မကွေး)

          အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ဖေဖေါ်ဝါရီလ (၁၁)ရက်နေ့မှ ဖေဖေါ်ဝါရီလ (၁၇)ရက်အတွင်း ညောင်တုန်း၊ မှော်ဘီ၊ သာရဝေါ၊ ညောင်နှစ်ပင်ကျေးရွာ၊ ကြာကန်စု ကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက် ရောင်းချနေကြောင်း သိရှိရပါသည်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ် (ပိဿာ)ကျပ် ၉၀၀ မှ ၂၀၀၀ အတွင်း၊ ဂေါ်ဖီထုပ်(တစ်ထုပ်)ကျပ် ၄၀၀ မှ ၉၀၀ အတွင်း၊ ပန်းဂေါ်ဖီ(ထုပ်)ကျပ် ၄၀၀ မှ ၇၀၀ အတွင်း၊ အာလူး(ပိဿာ)ကျပ် ၁၁၅၀ မှ ၁၅၀၀ အတွင်း၊ မုန်လာဥနီ(ပိဿာ) ကျပ် ၁၂၀၀ မှ ၁၉၀၀ အတွင်း၊ ရွှေဖရုံသီး(လုံး)ကျပ် ၁၀၀၀ မှ ၁၃၅၀ အတွင်း၊ ဗူးသီး(လုံး) ကျပ် ၆၀၀ မှ ၁၂၀၀ အတွင်း၊ မုန်ညှင်း(ထုပ်)(ပိဿာ)ကျပ် ၈၀၀ မှ ၁၃၀၀ အတွင်း၊ ကြက်သွန်နီ(ဆိပ်ဖြူ)ကျပ် ၉၅၀ မှ ၁၄၀၀ အတွင်း၊ ကြက်သွန်ဖြူ(ရှမ်း)(ပိဿာ) ၂၀၀၀ မှ ၃၅၀၀ အတွင်း၊ ကြက်သွန်ဖြူ(ကြူကုတ်)(ပိဿာ) ကျပ် ၂၈၀၀ မှ ၃၆၀၀ အတွင်း၊ ချင်း(ပိဿာ)ကျပ် ၉၀၀ မှ ၁၅၀၀ အတွင်း၊ ဆလပ်ရွက်(စီး)ကျပ်၁၀၀ မှ ၃၅၀ အတွင်း၊ ချဉ်ပေါင်ရွက်(စီး) ကျပ် ၁၀၀ မှ ၁၅၀ အတွင်း၊ ခရမ်းသီး(ရှည်)(လုံး)ကျပ် ၁၀၀ မှ ၂၅၀ အတွင်း၊ သံပရာသီး(လုံး)ကျပ် ၁၀၀ မှ ၂၀၀ အတွင်း၊ ငရုတ်သီးစိမ်း(ကျောက်စိမ်း)(ပိဿာ) ၇၀၀ မှ ၁၁၀၀ အတွင်း၊ ဖရဲသီး(အကြီး၊ အလတ်၊ အသေး)ကျပ် ၁၅၀၀ မှ ၄၂၀၀ အတွင်း ဖြစ်ကြောင်း သိရှိရပါသည်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပုရာသီး အလုံးပေါင်း (၂၈၂၀၀)ကျော်၊ ခရမ်းသီး(ရှည်)(လုံး) (၁၁၉၀၀) ကျော်၊ ဗူးသီးအလုံးပေါင်း (၄၅၉၀၀)ကျော်၊ ရွှေဖရုံသီးအလုံးပေါင်း (၁၁၁၀၀)ကျော်၊ ဂေါ်ဖီထုပ်ပေါင်း (၁၅၄၀၀)ကျော်၊ ပန်းဂေါ် ဖီထုပ်ပေါင်း (၂၂၈၀၀)ကျော်၊ မုန်ညှင်းထုပ်(ပိဿာ)ပေါင်း (၆၅၀၀)ကျော်၊ ဖရဲသီးလုံးပေါင်း (၁၆၃၀၀)ကျော် အသီးသီးကုန်အဝင်ရှိကြောင်း သိရပါသည်။

DOCA(ရန်ကုန်)

       ပဲခူးတိုင်းဒေသကြီး၊ ပဲခူးခရိုင်၊ ကဝမြို့နယ်ရှိ သပြုကျေးရွာအတွင်း၌ သတ္တုရေကြိုပုံလောင်း လုပ်ငန်းများကို ဂျပန်ခေတ်ကျော်ထဲက လုပ်သားဦးရေထောင်နှင့်ချီ၍ စတင်ထုတ်လုပ်ဆောင်ရွက်ခဲ့ကြောင်းသိရှိရသည်။ သတ္တုကို သန့်စင်၍ ထုတ်လုပ်ရာတွင် ဒယ်အိုးဆိုဒ်စုံ၊ မိုးဗြဲဒယ်၊ ပန်ကာဆိုဒ်စုံ၊ ငရုတ်စုံဆိုဒ်စုံ၊ လျှပ်စစ်မီးကလစ်၊ အသံချဲ့စက်ဟွန်း၊ အလှဆင်အိုး၊ ရေနွေးအိုးများ စသည်ဖြင့် ထုတ်လုပ်လျှက် ရှိကြောင်းသိရပြီး ထုတ်လုပ်ရာတွင် အသုံးပြုသည့် ကုန်ကြမ်းအား  စော်ဘွားကြီးကုန်း၊ တောင်ဒဂုံတို့မှ ဒါန်သတ္တု အကြမ်းတစ်ပိဿာ ၅၅၀၀ ကျပ်၊ သန့်စင်ပြီးအချော တစ်ပိဿာ ၇၅၀၀ ကျပ်ဝယ်ယူရကြောင်း၊ ကုန်ကြမ်း ဝယ်ယူရာတွင် ကား၊ ဆိုင်ကယ်အပိုပစ္စည်း ထုတ်လုပ်သည့် ကုမ္ပဏီများ၊ ဒယ်နီ ထုတ်လုပ်သည့် နည်းပညာမြင့် ကုမ္ပဏီများနှင့် ပြိုင်ဆိုင်ဝယ်ယူရသောကြောင့် ကုန်ကြမ်းရရှိမှု အခက်အခဲရှိကြောင်း သိရှိရသည်။ စက်လှေပန်ကာများကို ထားဝယ်၊ ဘိတ်၊ တောင်ကြီး နှင့် နယ်စုံများသို့ ပို့ဆောင်ပြီး မိုးဗြဲဒယ်နှင့် အခြားပစ္စည်းများကို စစ်တွေ၊ မောင်းတောနယ်စပ်မှ တစ်ဆင့် ပြည်ပနိုင်ငံများသို့ တင်ပို့လျက်ရှိကြောင်း သိရှိရသည်။  ပြုလုပ်ပြီးအိုး တစ်ပိဿာလျှင် ၁၀၀၀၀ကျပ်မှ ၁၃၀၀၀ကျပ်ထိ ရောင်းချရကြောင်း သိရှိရပြီး ထုတ်လုပ်မှုအင်အား အနေဖြင့် တစ်ရက် ကို တစ်ရွာလုံး အနေဖြင့် ဆယ်ပေကားတစ်စီးတိုက်စာ ကျပ်သိန်း  ၃၀၀မှ ၅၀၀ ထိ ထုတ်လုပ်လျက် ရှိကြောင်းသိရှိရပါသည်။

       သတ္တုရေကျိုပုံလောင်းလုပ်ငန်းကို သပြုကျေးရွာအတွင်း လုပ်ငန်းရှင်ပေါင်း ၆၀ ကျော်လုပ်ကိုင် လျက်ရှိကြောင်း သိရပြီး အသေးစားမှ အကြီးစားလုပ်ငန်းရှင်အလိုက် လုပ်သားဦးရေ ၁၅ယောက်မှ အယောက် ၄၀ကျော်ထိ အသုံးပြုကြကြောင်းသိရှိရသည်။ ထိုသို့ လုပ်ငန်းတွင်ကျယ်လာသည်နှင့် အမျှ နေ့စဉ်ပုံမှန် ဝင်ငွေရရှိ၍ ရွာနီးပတ်ဝန်းကျင်ရွာများမှ လာရောက်လုပ်ကိုင်ကြသူများလည်း ရှိကြကြောင်း     သတင်းရရှိပါသည်။     

DOCA(ပဲခူး) 

          တောင်ငူမြို့နယ် ရှမ်းဝတီးကျေးရွာမှ ထွက်ရှိသော စားပြောင်းဖူးများကို တောင်ငူမြို့ ညောင် ပင်ဈေးတွင် ၁၀ ဖူးလျှင် ၂၆၀၀ ကျပ်ဖြင့် အရောင်းသွက်နေသည်ကို တွေ့ရှိရပါသည်။ ရှမ်းဝတီးရွာမှ တောင်သူများသည် စစ်တောင်းမြစ်ရေကို ရေစုပ်စက်များဖြင့် စုပ်တင်၍ ရှူးဂါးကင်း စားပြောင်းဖူး များနှင့် ပါပယ်ဝွိုက်စားပြောင်းဖူးများကို စိုက်ပျိုးကြပါသည်။ ပြောင်းဖူးများသည် ပေါ်ဦးပေါ်ဖျားတွင် ဈေးကောင်းရနေပြီး မြို့ပေါ်ရှိ ပြောင်းဖူးပွဲစားများ ဆင်းဝယ်နေကြရာတွင် အထိုင်ဈေး တစ်ဖူး ၂၃၀ ကျပ် ရောင်းချရကြောင်း သိရပါသည်။

          ယခင်နှစ်က အထိုင်ဈေး ၈၅ ကျပ်သာ ရောင်းရကြောင်း၊ ယခုနှစ် စိုက်ပျိုးရာတွင် ရှူးဂါးကင်း မျိုး တစ်ထုပ်လျှင် ၁၉၅၀၀ ကျပ်၊ ပါပယ်ဝွိုက် မျိုးတစ်ထုပ်လျှင် ၂၁၅၀၀ ကျပ် ဝယ်ယူရကြောင်း၊ တစ်ဧက စိုက်ပျိုးမှုအတွက် မျိုး ၄ ထုပ်ဝယ်ရသဖြင့် တစ်ဧက မျိုးဖိုးအနေဖြင့် ရှူးဂါးကင်း ၇၈၀၀၀ ကျပ်၊ ပါပယ်ဝွိုက် ၈၆၀၀၀ ကျပ် ကုန်ကျပါကြောင်း၊ မြေဩဇာဈေးနှုန်းလည်း တက်လာကြောင်း၊ ပုလဲ ဓါတ်မြေဩဇာ တစ်အိတ် ၇၄၀၀၀ ကျပ်၊ အာမို (၁၅:၁၅)ပတ်လည် တစ်အိတ် ၈၃၀၀၀ ကျပ်၊ အပင် ရွက်ဖျန်းအားဆေး တစ်ထုပ် ၂၃၀၀၀ ကျပ် ကုန်ကျပါကြောင်း၊ မြေပြုပြင်ခြင်းအတွက် ထယ်ထိုးခ တစ်ဧက ၂၀၀၀၀ ကျပ်၊ ပေါင်းမြက်ကောက်ခြင်းလုပ်သား ၂ ဦး ၁၂၀၀၀ ကျပ်၊ ဘောင်ဆွဲရာတွင် လုပ်သား ၈ ဦးအတွက် ၄၈၀၀၀ ကျပ်၊ ပြောင်းစိုက်လုပ်သား ၅ ယောက်အတွက် ၃၀၀၀၀ ကျပ်၊ ဆောင်းပြောင်းစိုက်ပျိုးရာတွင် ရေနှစ်ကြိမ်သွင်းရသောကြောင့် ဒီဇယ်ဆီဖိုး ၂၅၀၀၀ ကျပ်၊ ပြောင်းဖူး ချိုး၊ ပင်ခုတ်သယ်ယူခြင်း လုပ်သားခ ၆၀၀၀၀ ကျပ်၊ ရှမ်းဝတီးရွာမှ တောင်ငူမြို့သို့ သယ်ယူရာတွင် ပြောင်းဖူးတစ်ဧကလျှင် ၃ ခေါက် သယ်ယူရသဖြင့် တစ်ခေါက်လျှင် ၁၅၀၀၀ ကျပ်နှုန်းဖြင့် သယ်ယူခ ၄၅၀၀၀ ကျပ် ကုန်ကျပါကြောင်း၊ စားပြောင်းဖူးမျိုး တစ်ထုပ်လျှင် မျိုးစေ့ ၄၀၀၀ ခန့် ပါဝင်ကြောင်း၊ တစ်ဧကလျှင် ၄ ထုပ်စိုက်ပျိုးရ၍ ခုနစ်ဆယ်ရာခိုင်နှုန်း အပင်ပေါက်ကြောင်း၊ ကြွက်ဖျက်ဆီးမှုမရှိလျှင် ပြောင်းဖူး ၁၁၂၀၀ ဖူး ထွက်ရှိကြောင်း၊ အထိုင်ဈေး တစ်ဖူး ၂၂၀ ကျပ်ရောင်းရလျှင် ၂၄၆၄၀၀၀ ကျပ် ရရှိကြောင်း၊ စိုက်ပျိုးစရိတ် ကုန်ကျငွေ စုစုပေါင်း ၄၉၃၀၀၀ ကျပ်နုတ်လျှင် ပြောင်းဖူးတစ်ဧက အတွက် အကျိုးအမြတ် ၁၉၇၁၀၀၀ ကျပ် ရရှိကြောင်း ပြောင်းဖူးစိုက်တောင်သူ ဦးအောင်မြိုင်၏ ပြောပြချက်အရ သိရှိရပါသည်။

စားသုံးသူရေးရာဦးစီးဌာန(ပဲခူး)