ပြည်တွင်းကုန်သွယ်မှုသတင်း

        မိတ္ထီလာကုန်စိမ်းဈေးကွက်တွင်ခရမ်းချဉ်သီးဈေးမှာဈေးကောင်းရနေကြောင်း သိရသည်။ ဈေကွက်၌ ခရမ်းချဉ်မှာ ဒေသထွက် ဗမာခရမ်းချဉ်၊ အင်းသီး၊ ထိုင်ဝမ်သီးဟူ၍ ရောင်းချကြပြီး ယခုနောက်ပိုင်းဒေသတွင်၌ ဗမာခရမ်းချဉ်မျိုးအပြင် နိုင်ငံခြားမျိုးများကိုလည်း စိုက်ပျိုးလာကြကြောင်းသိရသည်။

          မိတ္ထီလာမြို့နယ်၊ ဇောင်ချမ်းကုန်းကျေးရွာရှိ ခရမ်းချဉ်စိုက်တောင်သူတစ်ဦးနှင့် တွေ့ဆုံ၍ ခရမ်းချဉ်သီး စိုက်ပျိုးမှုအခြေအနေကို မေးမြန်းရာ ခရမ်းချဉ်မျိုး ထိုင်းနိုင်ငံ Sungenta ကုမ္ပဏီမှ တင်သွင်းသည့် (တစ်သုံးလုံး) (111) တံဆိပ်မှာ မျိုစေ့ (၅၀၀၀) ပါဝင်ပြီး (၁၅၀၀၀၀) ကျပ်ပေးရကြောင်း၊ ၎င်းမှာ အပင်ပေါက်နှုင်း (၉၀ %) ရှိကြောင်း သိရပါသည်။ စိုက်ပျိုးရာတွင် ပထမဦးစွာ ပျိုးအိတ်ဖြင့် ပျိုး ထောင်ပြီးမှ အပင်ငယ်ကို ရွေ့ပြောင်းစိုက်ပျိုးရကြောင်း၊ စိုက်ပျိုးသည်မှ ထွက်ရှိသည့်အထိ အဆင့်ဆင့် ကုန်ကျစရိတ်များမှာ ပျိုးအိတ် (၅၀၀၀) အတွက် (၂၀၀၀၀) ကျပ်၊ ပျိုးထောင်လုပ်သား (မ) လေးဦး အတွက် တစ်ရက်လုပ်အားခ (၈၀၀၀) ကျပ်ဖြင့် (၃၂၀၀၀) ကျပ်၊ ထယ်ထွန်ခမှာ နွားရှဉ်း (၁) ရှဉ်းလျှင် (၂၀၀၀၀) ကျပ်ဖြင့် (၈၀၀၀၀) ကျပ်၊ အမှိုက်ကောက်ခြင်း၊ အပင်စိုက်ခြင်းတို့အတွက် ကျား/မ လုပ်သားခ စုစုပေါင်းမှာ (၁၅၀၀၀၀) ကျပ် ဝန်းကျင်ရှိကြောင်း၊ မြေဩဇာအနေနှင့် အပင်(၄၀၀၀) စိုက်ခင်း မြေ (၀.၅) ဧကအတွက် ပုလဲ (၈၅၀၀၀) ကျပ်၊ အမြစ်အားဆေး (၁၅၀၀၀) ကျပ်၊ အပင်ဖြစ်ထွန်းလာပြီး နောက် အပင် (၄၀၀၀) အတွက် တိုင်ဝါး (၂၀၀၀) လုံးကို ဝါးတစ်လုံး (၁၅၀) ကျပ်နှုန်းဖြင့် (၃၀၀၀၀၀) ကျပ်၊ ကြိုး (ချည်ကြိုး) သုံးပိဿာအတွက် (၁၀၅၀၀) ကျပ်၊ ရေတင်ဆီမှာ တစ်ကြိမ်လျှင် (၁၀၀၀၀) ကျပ်၊ ပေါင်းသင်ခြင်း ခူးဆွတ်ခြင်းများ အပါအဝင် (၀.၅) ဧက (အပင် ၄၀၀၀) အတွက် (၁၅) သိန်း ဝန်းကျင်ကုန်ကျကြေင်းသိရပါသည်။ ခရမ်းချဉ်သီးပင်မှာ ပျိုးသက် (၂၅) ရက်ကြာမြင့်ပြီး အပင်သက် (၇၀) ကျော်လျှင် ခူးဆွတ်နိုင်ရာ တစ်ပင်လျှင် (၂) ပိဿာနှုန်းဖြင့် ပိဿာ (၈၀၀၀) ဝန်းကျင် ထွက်ရှိ ကြောင်း သိရပါသည်။ ၎င်းခရမ်းချဉ်စိုက်တောင်သူအနေနှင့် ခရမ်းချဉ်သီ တစ်ပိဿာလျှင် (၁၀၀၀) ကျပ် ဖြင့် ရောင်းချရမည်ဆိုလျှင်ပင် အကျိုးအမြတ်များမည်ဟု မျှော်မှန်းထားကြောင်း တောင်သူမှ ပြောကြား ခဲ့ပါသည်။ မိတ္ထီလာဈေးကွက်၌ ခရမ်းချဉ်လက်လီ (၁) ပိဿာလျှင် (၃၀၀၀-၄၀၀၀) ကျပ် ရှိကြောင်း ဈေးကွက်မှသိရပါသည်။      

DOCA(မန္တလေး)

၁၆.၇.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

       မိတ္ထီလာဈေးကွက်တွင် ဇူလိုင်လဆန်း၌ ကြက်သွန်နီဈေးအနည်းငယ်မြင့်လာကြောင်းသိရသည်။ ရာသီဥတုနှင့်လမ်းအခြေအနေအရ နယ်ဝေးတင်ပို့ရန်ခက်ခဲသည့်အတွက် ဇွန်လစတုတ္ထပတ်တွင် ဈေးအေးနေခဲ့သော်လည်း ဇွန်လကုန်၊ဇူလိုင်လဆန်းတွင် နယ်စပ်ဝယ်လက်များဖြစ်သည့် မြဝတီ၊ တာချီ လိတ်တို့မှ အဝယ်ရှိလာပြီး တင်ပို့မှုများရှိလာကြောင်း သိရှိရပါသည်။ ယခုရက်များအတွင်း မိတ္ထီလာမှ မော်လမြိုင်သို့ (၁၂) ဘီးကားဖြင့် တင်ပို့နေပို့ပြီး မော်လမြိုင်မှတဆင့် မြဝတီသို့ (၆) ဘီးကားဖြင့် ကားစီးလုံးဖြင့် တင်ပို့ သကဲ့သို့ အခြားကုန်များနှင့်လည်းရောနှောတင်ပို့နေကြောင်း၊ ရန်ကုန်နှင့်ပဲခူးသို့ ယခုရက်ပိုင်းတင်ပို့မှု နည်းပြီး (၁၂) ဘီး၊ (၆) ဘီးကားတို့၌ အခြားကုန်များနှင့်ရော၍ တင်ပို့ကြကြောင်း၊ ကြက်သွန်နီဈေးမှာ လက္ကားဈေးတစ်ပိသာလျှင် ယခင်တစ်ပတ်က (၁၆၀၀မှ ၁၈၀၀) ကျပ်ထိရှိခဲ့ပြီး ဇူလိုင်လဆန်းမှာတော့ တစ်ပိဿာ (၁၈၀၀မှ ၁၉၀၀) ကျပ်ရှိကြောင်း သိရသည်။နယ်စပ်ဝယ်လက်များမှ ပစ္စည်းကောင်းကို ဈေးပိုပေးဝယ်ခြင်းကြောင့် ဈေးမြင့်လာခြင်းဖြစ်ပြီး ပြည်တွင်းဝယ်လက်များဖြစ်သည့် ရန်ကုန်၊ပဲခူးတို့မှာ အလတ်စများသာတင်ပို့ရကြောင်း ဈေးကွက်မှသိရပါသည်။

DOCA(မန္တလေး)

           မြင်းခြံခရိုင်၏ ဇူလိုင်လဒုတိယပတ်အတွင်း ဆောင်းကြက်သွန်နီဈေးနှုန်းများမှာ အကြီးစ တစ်ပိဿာလျှင်(၁၈၀၀)ကျပ်မှ(၂၀၀၀)ကျပ်ထိလည်းကောင်း၊အလတ်စတစ်ပိဿာလျှင်(၁၅၀၀)ကျပ်မှ (၁၇၀၀) ကျပ်ထိလည်းကောင်း၊ အသေးစတစ်ပိဿာလျှင်(၁၂၀၀)ကျပ်မှ(၁၄၀၀)ကျပ်ထိ လည်းကောင်း အသီးသီးရောင်းဝယ်လျက်ရှိပါသည်။

          ယခင်တစ်ပတ်ဈေးနှုန်းများမှာ အကြီးစတစ်ပိဿာလျှင်(၁၈၀၀)ကျပ်မှ(၂၁၀၀)ကျပ်၊ အလတ် စတစ်ပိဿာလျှင်(၁၅၀၀)ကျပ်မှ(၁၇၀၀)ကျပ်၊ အသေးစတစ်ပိဿာလျှင်(၁၂၀၀)ကျပ်မှ(၁၄၀၀) ကျပ် များဖြင့် အရောင်းအဝယ်ဖြစ်ခဲ့ပါသည်။ ဆောင်းကြက်သွန်နီဈေးမှာ ယခင်တစ်ပတ်ထက် ယခု တစ်ပတ်တွင် အကြီးစတစ်ပိဿာလျှင်(၁၀၀)ကျပ်ခန့်ဈေးနှုန်းကျဆင်းမှုရှိခဲ့ပါသည်။ အရည်အသွေး ကောင်းပြီး အထားအသိုအလှောင်ခံသော အစများမှာ ဈေးကောင်းပိုရ၍ အရည်အသွေးနိမ့်လျှင် ဈေးနှုန်းအနည်းငယ်ကျဆင်းကြောင်း  ကြက်သွန်နီကုန်သည်တစ်ဦး၏ ပြောကြားချက်အရသိရှိရ ပါသည်။

          ဆောင်းကြက်သွန်နီစိုက်ပျိုးထွက်ရှိရာ ကျေးရွာများမှ မြင်းခြံမြို့ပေါ်ရှိပွဲရုံများသို့ နေ့စဉ်ကုန် ချိန်ပိဿာ(၈၀၀၀၀)ကျော်မှ ပိဿာ(၉၀၀၀၀)ကျော်ခန့် ဝင်ရောက်လျှက်ရှိပါသည်။ မြင်းခြံခရိုင်မှ ထွက်ရှိသော ဆောင်းကြက်သွန်နီများကို မန္တလေး၊ ရန်ကုန်၊ နေပြည်တော်နှင့်မော်လမြိုင်မြို့ ဈေးကွက်များသို့ တင်ပို့ရောင်းချလျက်ရှိကြောင်း သိရှိရပါသည်။

DOCA(မန္တလေး)

     ရှမ်းပြည်နယ်(တောင်ပိုင်း) တောင်ကြီး‌ဈေးကွက်သို့ ပန်းအမျိုးအစားများ စုံလင်စွာ ဝင်ရောက်လျက်ရှိရာ ယခုတစ်ခါမှာဖြင့် ရှမ်း(တောင်)ဈေးကွက်သို့ ပုံစံတစ်မျိုးဖြင့် နယ်သာလန်နှင်းဆီများ ဝင်ရောက်လျက်ရှိပေသည်။ နယ်သာလန်နှင်းဆီမျိုးနှင့် ရိုးရိုးနှင်းဆီမျိုးများ ပေါင်းစပ်စိုက်ပျိုးထားသောကြောင့် နယ်သာလန်နှင်းဆီဟု ခေါ်ဆိုရခြင်းဖြစ်ပေသည်။ အခြားသောနှင်းဆီများထက် တမူထူးခြားသော အသွင်အပြင်နှင့် ထုတ်ပိုးမှုပုံစံများကြောင့် ဝယ်သူများ၏ စိတ်ဝင်စားမှု မြှင့်တက်လျက်ရှိပေသည်။ နယ်သာလန်နှင်းဆီများသည် ရှမ်းပြည်(တောင်ပိုင်း)ရှိ ရွှေညောင်- ညောင်ရွှေ အနီးတဝိုက်ရှိ တောင်လေးလုံးကျေးရွာနှင့် သံတဲကျေးရွာများတွင် အဓိကစိုက်ပျိုးကြပေသည်။ နယ်သာလန်နှင်းဆီများသည် ရှမ်းပြည်နယ်(တောင်ပိုင်း)တွင် အဓိကထွက်သော ပန်းအမျိုးအစားဖြစ်ပေသည်။ ရှမ်းပြည်နယ်(တောင်ပိုင်း)မှတစ်ဆင့် ရန်ကုန်၊ မန္တလေး ၊ ပြင်ဦးလွင်စသည့် မြို့ကြီးများကို အဓိကတင်ပို့ရောင်းချလျက်ရှိပေသည်။ နယ်သာလန်နှင်းဆီများမှာ အရောင်စပ်ပုံကအစ  လှပပြီး ချစ်စရာကောင်းသောကြောင့် ပန်းအလှဆင်သူများ၊ ပန်းစည်း(Handmade ) ပြုလုပ်သူများကြားတွင် အသုံးပြုမှုများပြားပြီး ရေပန်းစားလျက်ရှိပေသည်။ ရှမ်း(တောင်)ဈေးကွက်တွင် နယ်သာလန်နှင်းဆီများကို လက်လီဈေးနှုန်းအနေဖြင့် (၁၂)ပွင့်ပါ တစ်ကဒ်ကို ၂၅၀ဝိ/- ကျပ်မှ ၃၀၀ဝိ/- ကျပ်ထိ ရောင်းချလျက်ရှိပေသည်။         

DOCA(ရှမ်း)