ပြည်တွင်းကုန်သွယ်မှုသတင်း

     မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့တွင် နဂါးမောက်သီးများ စိုက်ပျိုးထွက်ရှိမှုနည်း၍ အခြားမြို့နယ်များမှ ဝင်ရောက်အရောင်းအဝယ်ဖြစ်လျက်ရှိပြီး နဂါးမောက်သီးကို မန္တလေး တိုင်းဒေသကြီး၊ ကျောက်ပန်းတောင်းနှင့် ပုပ္ပါးနယ်များတွင် အဓိကစိုက်ပျိုးမှုများ၍ အများဆုံးဝင်ရောက်လျက်ရှိပါသည်။ နဂါးမောက်သီးအရသာမှာ ထူးခြားပြီး ကျန်းမာရေးအတွက် အကျိုးပြုကြောင်း သိရှိလာသည်နှင့်အမျှ စိုက်ပျိုးစားသုံးမှုမှာလည်း ပိုမိုမြင့်တက်လာကြောင်း သိရှိရပါသည်။ နဂါးမောက်သီးတွင် အဖြူသီးနှင့် အနီသီးရှိရာတွင် အနီသီးမှာ ပိုမိုဆေးဖက်ဝင်ကြောင်းသိရှိရသည်။

     ဈေးကွက်အနေဖြင့် ယခုနဂါးမောက်သီးပေါ်စ ၂၀၂၄ခုနှစ်၊ ဇူလိုင်လဆန်းတွင် သီးနှံအရည်အသွေးနှင့် အရွယ်အစားလိုက်၍ ဈေးနှုန်းမှာ တစ်ပိဿာလျှင် ကျပ်(၄၀၀၀ မှ ၂၀၀၀)ထိရှိပြီး တစ်လုံး လျှင် ကျပ်(၁၀၀၀ မှ ၃၀၀) ထိ ဈေးဖြင့် ရောင်းဝယ်လျက်ဖြစ်လျက်ရှိကြောင်း၊ ယခင်နှစ် သီးနှံပေါ်ချိန်တွင် ဈေးနှုန်းမှာ တစ်ပိဿာလျှင် ကျပ်(၃၀၀၀ မှ ၂၀၀၀)ထိရှိပြီး ယခုနှစ်တွင်  နဂါးမောက်သီး တစ်ပိဿာလျှင် ကျပ်(၁၀၀၀)ခန့် ဈေးတက်၍ အရောင်းအဝယ်ဖြစ်ကြောင်း သီးနှံဈေးကွက်မှ သိရှိရပါသည်။

      နဂါးမောက်သီးကို နာတာရှည်ရောဂါခံစားနေရသူများ၊ အသားအရေစိုပြေလှပလိုသူများ၊ နှလုံး၊ သွေးတိုး၊ ဆီးချိုရောဂါနှင့် အစာအိမ်အူလမ်းကြောင်း ပြဿနာရှိသူများ၊ ရွေးချယ်စားသုံးသင့်သည့် အသီးအနှံတစ်မျိုးဖြစ်၍ ဝယ်ယူစားသုံးမှုများလျက်ရှိကြောင်း သိရှိရပါသည်။

DOCA(မကွေး)

၂၀.၇.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

     မွန်ပြည်နယ်၊ ဘီးလင်းမြို့နယ်တွင် ကုန်ဈေးနှုန်းတည်ငြိမ်ရေးနှင့် ကိုယ်တိုင် စိုက်ပျိုးမွေးမြူ ထုတ်လုပ်ဖြန့်ဖြူးသူများက သက်သာသောဈေးနှုန်းများဖြင့် စားသောက်ကုန်ပစ္စည်းများ ရောင်းချပေးခြင်းကို မြို့နယ်စီမံအုပ်ချုပ်ရေးအဖွဲ့မှ ဦးဆောင်၍ ၁၃.၇.၂၀၂၄ ရက်နေ့တွင် ဘိုးရာဇာရပ်ကွက် မင်္ဂလာဈေးအတွင်း ရောင်းချပေးလျက်ရှိကြောင်း သိရသည်။

     ယင်းသို့ ရောင်းချရာတွင် အခြေခံစားသောက်ကုန်ပစ္စည်းများဖြစ်သည့် အမဲသား တစ်ပိဿာ (၁၃၀၀၀) ကျပ်၊ ဝက်သား တစ်ပိဿာ (၁၃၀၀၀) ကျပ်၊ ကြက်သား တစ်ပိဿာ (၁၀၀၀၀) ကျပ်၊ ဧည့်မထဆန် (၁) ပြည် (၃၀၀၀) ကျပ်၊ ငါးမြင်းတစ်ပိဿာ (၅၀၀၀) ကျပ်၊ ငါးမုတ်တစ်ပိဿာ (၅၀၀၀) ကျပ်စသည့် စားကုန်ပစ္စည်းများအား သက်သာချောင်ချိသည့် ဈေးနှုန်းဖြင့် ရောင်းချပေးခဲ့ရာ အများပြည်သူများမှ စနစ်တကျ ဝယ်ယူအား‌ပေးခဲ့ကြောင်းသိရသည်။

     အဆိုပါရောင်းချမှုအား မြို့နယ်စီမံအုပ်ချုပ်ရေးအဖွဲ့ဥက္ကဌ ဦးစည်သူအောင်နှင့်အဖွဲ့ဝင်များက ကြည့်ရှုအားပေးခဲ့ကြောင်း သိရသည်။

DOCA(မွန်)

၁၈.၇.၂၀၂၄ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

         ဝါးတန်းဆန်စပါးကုန်စည်ဒိုင်သို့ (၉-၇-၂၀၂၄) ရက်နေ့မှ (၁၅-၇-၂၀၂၄) ရက်နေ့အထိ ဆန်ဝင်ရောက်မှုစာရင်းများမှာ ဧရာဝတီတိုင်းဒေသကြီး၊ ဖျာပုံ၊ မြောင်းမြ၊ ဘိုကလေး၊ လပွတ္တာ၊ မော်ကျွန်း၊ ကျိုက်လတ်၊ ဟင်္သာတ၊ ဓနုဖြူ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ပေါ်ဆန်းမွှေး (၂၉၇၃၃) အိတ်၊ ပေါ်ကျွဲ (၈၈၇၁) အိတ်၊ ဧည့်မထ (၉၃၅၆၂) အိတ်၊ ဆန်ကွဲ (၁၀၈၅၉ အိတ်ဝင်ရောက်ခဲ့ပြီး ပဲခူးတိုင်း(အရှေ့) ကျောက်တံခါး၊ ညောင်လေးပင်၊ ဖြူးမြို့နယ်များမှ ဧည့်မထ (၈၃၂၆) အိတ်နှင့် ပဲခူးတိုင်း(အနောက်) မြို့နယ်များဖြစ်သော သာယာဝတီ၊ သုံးဆယ်၊ လက်ပံတန်း၊ ကြို့ပင်ကောက်မြို့နယ်များမှ ဧည့်မထ (၂၂၃၂၁) အိတ်၊ ငစိန် (၁၆၀၉) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ် ကုန်း၊ ပျော်ဘွယ်၊ တိုက်ကြီး၊ ခရမ်း၊ သုံးခွ၊ ဥက္ကံမြို့နယ်များမှ ဧည့်မထ (၁၃၁၀၀) အိတ်တို့ဝင်ရောက်မှုရှိကြောင်း ဝါးတန်းဆန်စပါးကုန်စည်ဒိုင်၏ ပြောကြားချက်အရသိရှိရပါသည်။

DOCA(ရန်ကုန်)