ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ မှော်ဇာကျေးရွာတွင် နေထိုင်သော ဒေါ်ခိုင်သည် လယ်ယာစိုက်ပျိုးရေး လုပ်ငန်းကို လုပ်ကိုင်ကြပြီး သီးနှံမျိုးစုံ စိုက်ပျိုးလျက်ရှိရာ နနွင်းကို (၂) ဧက စိုက်ပျိုးထားကြောင်း သိရသည်။
နနွင်းကို ဇွန်လနှင့် ဇူလိုင်လများတွင် စိုက်ပျိုးပြီး ဖေဖော်ဝါရီလနှင့် မတ်လများတွင် တူးဖော် လျက်ရှိကြောင်း၊ နနွင်းကို ဘောင်ခတ်ပြီး မြေအောက်ရေတင်စနစ်ဖြင့် စိုက်ပျိုးပြီး မျိုး၊ သွင်းအားစု၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ် (၆၅-၇၀) သိန်းခန့် ကုန်ကျကြောင်း၊ အထွက်နှုန်းအနေဖြင့် တစ်ဧကလျှင် ပိဿာ (၆၀၀ - ၈၀၀) ခန့် ထွက်ရှိကြောင်း၊ နနွင်းတက်များကို ရောင်းချခြင်းမရှိဘဲ နနွင်းမှုန့်ကိုသာ ရောင်းချကြောင်း သိရသည်။
ဈေးနှုန်းများအနေဖြင့် နနွင်း တပိဿာလျှင် လက်လီဈေး (၂၂၀၀၀)ကျပ်၊ လက်ကားဈေး (၂၅၀၀၀)ကျပ်တို့ဖြင့်ရောင်းချကြောင်းသိရသည်။ မိသားစု တစ်နိုင်တစ်ပိုင်စိုက်ပျိုးပြီး နနွင်းများ လှိုင်လှိုင်ထွက်ပေါ်ချိန်တွင်လည်း ဈေးနှုန်းများ ဆက်လက်ကောင်းမွန်သောကြောင့် တောင်သူများအနေဖြင့် အကျိုးအမြတ် ရရှိကာ စိုက်ပျိုးသင့်သော သီးနှံတစ်မျိုးဖြစ်ကြောင်း ရေးသားလိုက်ရပါသည်။
DOCA(ပဲခူး)