ပြည်တွင်းကုန်သွယ်မှုသတင်း

   သရက်သီးအမှည့်များပေါ်ချိန်တွင် လူအများသည် သရက်သီးအမှည့်ကိုတန်ဖိုးကြီးပေး၍ ဝယ်ယူစားသုံးကြပါသည်။ နောက်ပိုင်းတွင် သရက်သီးအမှည့်များ လှိုင်လှိုင်ထွက်ပေါ်ချိန်တွင် သရက်သီးအမှည့်ကို စားသုံးရန်ပိုလျှံသွားသည့်အတွက် စွန့်ပစ်ရမည့်အစား တန်ဖိုးမြှင့်ထုတ်ကုန်သရက်ပြင်ပြုလုပ်၍ ရောင်းချကြပါသည်။ သရက်ပြင်ပြုလုပ်၍ရောင်းချရာတွင် သရက်သီးအမျိုးပေါင်း ၁၉၀ရှိသည့်အနက် အများဆုံးပြုလုပ်သော သရက်သီးမျိုးများမှာ စိန်တလုံး၊ ရင်ကွဲသရက်၊ မြကျောက်သရက်နှင့်ရွှေဟင်္သာသရက်သီးမျိုးများကိုပြုလုပ်ကြပါသည်။ သရက်ပြင်ပြုလုပ်ရာတွင် သရက်သီးအမှည့်ကို အနှစ်ရအောင်ပြုလုပ်၍ အိုးထဲတွင်ထည့်၍ကျိုရပါသည်။ ကျိုပြီးသားသရက်သီးအနှစ်များအား ဆီသုတ်ထားသောဗန်းများ၊ အခင်းအပြားများပေါ်တွင်ဖြန့်၍ (၂)ရက်မှ (၃)ရက်အထိနေလှန်းရပါသည်။ ထိုနောက် အသင့်စားသုံးရန် သရက်ပြင်များရရှိလာပါသည်။ ထိုသရက်ပြင်များကို ပြည်မြို့ရှိဈေးကွက်များသို့ ပန်းတောင်းနှင့် ပေါက်ခေါင်းဘက်မှလာရောက်ရောင်းချကြသလို ပြည်မြို့အနီးအနားရှိကျေးရွာများမှလည်း လာရောက်ရောင်းချကြပါသည်။ ၂၀၂၄ခုနှစ် ဇူလိုင်လဒုတိယအပတ်တွင်  ရောင်းချသော သရက်ပြင်ဈေးများမှာ တစ်ပိဿာလျှင် ၁၀၀၀၀ကျပ်ဖြင့်ရောင်းချကြောင်း သိရှိရပါသည်။

   သရက်သီးကို တန်ဖိုးမြှင့်ထုတ်ကုန်အဖြစ် သရက်ပြင်ကိုထုတ်လုပ်၍ရောင်းချသဖြင့် ရာသီစာဖြစ်၍ လူအကြိုက်များပြီး ရောင်းချသူများအနေဖြင့်လည်း သရက်သီးအမှည့်ကို ကြာရှည်စွာထားလျှင်ပုပ်လာမည်ဖြစ်၍ ကြာရှည်စွာအထားခံစေရန်အတွက် သရက်ပြင်ပြုလုပ်၍ ရောင်းချသဖြင့် ဝင်ငွေလည်းရရှိလာမည်ဖြစ်ကြောင်းသိရှိရပါသည်။

DOCA(ပဲခူး)

    ယခုဇူလိုင်လဒုတိယပတ်တွင် ပြည်ဈေးကွက်သို့ ရွှေတောင်၊ ကုန်းသလင်းရွာ၊ မြရွာ၊ ရွှေနတ်တောင်ဘက်နှင့် မှော်ဇာ၊ မြင်မာဟုဘုရားဘက်ရှိ မျှင်ဝါးပေါက်ရောက်ရာဒေသများမှအဝင်ရှိနေပြီး တစ်ရက်ခြားလျှင် ပိဿာ ၃၀-၄၀ခန့် အဝင်ရှိနေပါသည်။ ၂၀၂၄ခုနှစ် ဇူလိုင်လဒုတိယအပတ်တွင်  ရောင်းချသောဈေးနှုန်းများမှာ ဖောက်သည်ဈေးတစ်ပိဿာလျှင် ကျပ် ၆၀၀၀ နှုန်းရှိပြီး လက်လီမြို့ပေါ်ဈေးများတွင် တစ်ပိဿာလျှင် ကျပ်၇၀၀၀နှုန်းဖြင့် ရောင်းချမှုရှိကာ စားသုံးသူလက်ဝယ်အရောက် လှည့်လည်ရောင်းချလျက်ရှိသော ဆိုင်ကယ်၊ စက်ဘီးဈေးသည်များတွင် ၅ကျပ်သားပါ မျှစ်အချိုတစ်ထုပ်လျှင် ၅၀၀ကျပ်နှုန်းဖြင့် ရောင်းချမှုရှိနေကြောင်း သိရှိရပါသည်။

DOCA(ပဲခူး)

   ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ ရှမ်းစုကျေးရွာ၊ ဦးဇော်ဝင်း၏ဥယျာဉ်ခြံနှင့် အိမ်ခြံဝန်းထဲတွင် ကီလိုမာလကာသီးများကို မိသားစုတစ်ပိုင်တစ်နိုင်သော်လည်းကောင်း၊ စီးပွားဖြစ်သော်လည်းကောင်းစိုက်ပျိုးကြပါသည်။ ပျိုးပင်များကိုကိုယ်တိုင်ပျိုး၊ ကိုယ်တိုင်ကိုင်းကူး၍စိုက်ပျိုးပြီး (၃-၄)လအကြာတွင် အသီးများခူးစွတ်၍ ရောင်းချနိုင်ကြောင်း သိရှိရပါသည်။ ၂၀၂၄ခုနှစ် ဇူလိုင်လဒုတိယအပတ်တွင် ရောင်းချသောဈေးနှုန်းများအနေဖြင့် အကြီးတစ်လုံးလျှင် (၅၀၀)ကျပ်၊ အသေးတစ်လုံးလျှင် (၃၀၀) ကျပ်ဖြစ်ပြီး အကြီးအသေးပေါ်မူတည်ပြီး ရောင်းချရကြောင်း သိရှိရပါသည်။ ဈေးကွက်အနေဖြင့် ပြည်မြို့ပေါ်ဈေးများ၊ အသီးဆိုင်များနှင့် ကျောင်းဈေးများတွင် ရောင်းချကြကြောင်းသိရှိရပါသည်။

DOCA(ပဲခူး)

                မန္တလေးတိုင်းဒေသကြီး၊ကျောက်ဆည်ခရိုင်တွင် သီးနှံမျိုးစုံစိုက်ပျိုးဖြစ်ထွန်းလျှက်ရှိပြီး ရာသီအလိုက် သီးနှံများလည်း စိုက်ပျိုးကြပါသည် ။ ရာသီအလိုက် စိုက်ပျိုးသော သီးနှံများအနက် ပြောင်ဖူးသီးနှံကိုလည်း စီးပွားဖြစ်စိုက်ပျိုးလာကြပါသည်။ပြောင်းဖူးသီးနှံစိုက်ပျိုးခြင်းဖြင့် ကျွဲ၊နွား စာများဖူလုံသည့်အပြင် ပြောင်းဖူးရိုးပင်များကိုလည်း ပြန်လည်ရောင်းချသောကြောင့် စီးပွားဖြစ် ဝင်ငွေတိုးစေပါသည်။ ခရိုင်အတွင်း၂၀၂၄-၂၀၂၅ဘဏ္ဍာနှစ်တွင် (မိုး)ပြောင်းဖူး စိုက်ဧကအနေဖြင့် ကျောက်ဆည်မြို့နယ်တွင်(၂၀၈)ဧက၊စဉ့်ကိုင်မြို့နယ်တွင်(၂၅၄)ဧက၊မြစ်သားမြို့နယ်တွင်(၃၆၂)ဧက၊ စုစုပေါင်း(၈၂၄)ဧက စိုက်ပျိုးနိုင်ခဲ့ပြီး ဇူလိုင်လပထမပတ်အထိ စဉ့်ကိုင်မြို့နယ်တွင် မိုးပြောင်းဖူး (၁၂၅)ဧက ရိတ်သိမ်းပြီးစီးပြီဖြစ်ကြောင်း ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရှိရပါသည်။ ပြောင်းဖူးစိုက်ပျိုးမှုအနေဖြင့် မျိုး၊သွင်းအားစု၊လုပ်သားခ အပါအဝင် စုစုပေါင်း (၂၆၀၀၀၀/-)ကျပ်ခန့်ကုန်ကျပြီးအများဆုံးစိုက်ပျိုးသောမျိုးမှာဝယ်လိုအားများသောသကြားပြောင်း မျိုးများကိုအများဆုံးစိုက်ပျိုးကြပါသည်။ပြောင်းဖူး(၁)ဧကအထွက်နှုန်းအနေဖြင့် ပြောင်းဖူး(၄၀၀၀) ခန့်ထွက်ရှိကြောင်း၊ပြောင်းဖူးများကိုစိုက်ခင်းများအထိလာရောက်ဝယ်ယူသူများရှိသလို မြို့ပေါ်သို့ ကိုယ်တိုင်တိုက်ရိုက်ရောင်းချသူများလည်းရှိကြောင်း ၊ ယခုလက်ရှိ ပြောင်းဖူးစျေးနှုန်းအနေဖြင့် စိုက်ခင်းအရောက်ဖောက်သည်စျေး(၁၀)ဖူးအထက်(၂၀၀/-)ကျပ်စျေးနှုန်းများဖြင့် ရောင်းချပေးပြီး အစိမ်း(၁)ဖူးလျှင်(၃၀၀/-)ကျပ်၊ ပြောင်းဖူးပြုတ်(၁)ဖူးလျှင်(၅၀၀/-)ကျပ်ဖြင့် ရောင်းဝယ်လျှက် ရှိကြောင်း ၊ ပြောင်းဖူးကို ခရမ်းချဉ်သီး၊ကြက်သွန်နီ၊နံနံပင်တို့နှင့်သုပ်၍စားကြသလို ပြောင်းဖူးအစိမ်း ကိုဂျစ်ဖြင့်ခြစ်၍ ပြောင်းဖူကြော်အဖြစ်စားသုံးကြပါသည်။ ပြောင်းဖူး ဖောက်သည်စျေး(၂၀၀/-)ကျပ် ဖြင့်ရောင်းချပါက(၈၀၀၀၀၀/-)ကျပ်ရရှိကြောင်း၊ စိုက်ပျိုးစရိတ်နှုတ်ပြီးပါက(၅၄၀၀၀၀/-)ကျပ် ရရှိကြောင်း၊ လက်လီရောင်းချပါက ပိုမိုအကျိုးအမြတ်ရရှိကြောင်း၊ ဝယ်လိုအားရှိသော ပြောင်းဖူး သီးနှံကို လည်းတိုးချဲ့စိုက်ပျိုးသင့်ပါကြောင်းရေးသားတင်ပြအပ်ပါသည်။

DOCA(မန္တလေး)

          ကျောက်ဆည်ခရိုင်တွင် နွေနှမ်းကို ၂၀၂၄-၂၀၂၅ ဘဏ္ဍာနှစ် ကျောက်ဆည်မြို့နယ်တွင် (၃၂၂၄၆)ဧက၊စဉ့်ကိုင်မြို့နယ်တွင် (၂၂၉၆၀)ဧကနှင့် မြစ်သားမြို့နယ်တွင် (၃၄၄၂၉)ဧက စုစုပေါင်း (၈၉၆၃၅)ဧက စိုက်ပျိုးထားရှိကြောင်းကို ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရ  သိရှိရပါသည်။ နွေနှမ်းကို မတ်လတွင်စတင်စိုက်ပျိုးပြီး ဇွန်လဆန်းပိုင်းတွင် စတင်ရိတ်သိမ်းလျှက်ရှိ ရာ ယခုဇူလိုင်လတွင် နွေနှမ်းများ ဖြိုင်ဖြိုင်ရိတ်သိမ်းလျှက်ရှိကြောင်း ၊ နွေနှမ်းစိုက်ပျိုးမှု တစ်ဧက ကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင် စုစုပေါင်း (၃၅၀၀၀၀/-)ကျပ်ခန့်ကုန် ကျကြောင်း ၊ (၁)ဧက အထွက်နှုန်းအနေဖြင့်(၁၀)တင်းခန့် ထွက်ရှိကြောင်း၊ နှမ်းစျေးနှုန်းအနေဖြင့် ယခင်နှစ် နှမ်းဖြူတစ်တင်းလျှင် (၁၁၇၀၀၀/-)ကျပ် ၊ နှမ်းညိုတစ်တင်းလျှင် (၉၅၀၀၀/-)ကျပ် ၊ နှမ်းနက်တစ်တင်းလျှင်(၈၈၀၀၀/-)ကျပ် နှင့် နှမ်းနက်စမုံနက်တစ်တင်းလျှင် (၉၀၀၀၀/-)ကျပ် ဖြင့် အရောင်းအဝယ်ဖြစ်ခဲ့ပြီး ယခုနှစ် နွေနှမ်းဖြိုင်ဖြိုင်ပေါ်ချိန်တွင်နှမ်းဖြူတစ်တင်းလျှင် (၁၃၂၀၀၀/-)ကျပ်၊နှမ်းညိုတစ်တင်းလျှင်(၁၀၀၀၀၀/-)ကျပ်၊နှမ်းနက်တစ်တင်းလျှင်(၉၇၀၀၀/-)ကျပ် နှင့် နှမ်းနက် စမုံနက်တစ်တင်းလျှင်(၁၃၀၀၀၀/-)ကျပ်ဖြင့် အရောင်းအဝယ်ဖြစ်လျှက်ရှိကြောင်း ‌ကျောက်ဆည် မြို့ပေါ်ရှိ  ပွဲရုံပိုင်ရှင်ထံမှ သိရှိရပါသည် ။ ယခုနှစ်တွင် နှမ်းစျေးနှုန်းများ ကောင်းမွန်ပြီး တောင်သူများ အကျိုးအမြတ်များစွာရရှိသောကြောင့် နွေနှမ်းကို ပိုမိုတိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)